Chapter
၁၄
ဢႃႇသပဵၼ်ၶုၼ်ႁေႃၶမ်းမိူင်းယုတ
၁ ဢၽိယၼၼ်ႉၼွၼ်းလပ်းလူၺ်ႈၵၼ်တင်းပူႇမၼ်းမွၼ်ႇမၼ်းၸိူဝ်းၼၼ်ႉလႄႈၶဝ်ဢဝ်မၼ်းသၢင်းၵျူဝ်ႇၵႃႈၼႂ်းဝဵင်းတႃႇဝိတ်ႉဢေႃႈ။ဢႃႇသလုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းလႄႈၼႂ်းၸူဝ်ႈပၢၼ်မၼ်းၼၼ်ႉမိူင်းၸဝ်ႈတဵတ်ႇလီၼိမ်လီသိပ်းပီႊတဵမ်တဵမ်ဢေႃႈ။
၂ ဢႃႇသၼၼ်ႉႁဵတ်းလွင်ႈတၢင်းဢၼ်လီဢၼ်ငၢမ်း၊လွင်ႈတၢင်းဢၼ်သိုဝ်ႈဢၼ်တေႃႇသိုဝ်ႈၼႃႈတႂ်ႈတႃထႃႇဝရႃႉၽြႃးၽြႃးပဵၼ်ၸဝ်ႈမၼ်းဢေႃႈ။မၼ်းယႃႉၽဵဝ်ႈပႅတ်ႈယိတ်ႉပလၢင်ႇၽြႃးၵူၼ်းတၢင်ႇၸိူဝ်ႉတၢင်ႇမဵဝ်းဢိၵ်ႇတင်းထႃႇၼႃႉတီႈသုင်တင်းလၢႆၸိူဝ်းၼၼ်ႉဢေႃႈ။
၃ မၼ်းၵိူၼ်ႇယႃႉပႅတ်ႈသဝ်တီႈၵူဝ်းၵႂၢႆႇၼၼ်ႉလႄႈၽၼ်းတူၼ်ႈဢႃႇသရတင်းလၢႆလူမ်ႉပႅတ်ႈဢေႃႈ။
၄ မၼ်းမီးဢမိင်ႉႁႂ်ႈၵူၼ်းမဵဝ်းယုတတင်းလၢႆဢွၼ်ၵၼ်ႁႃဢဝ်ထႃႇဝရႃႉၽြႃးၽြႃးပဵၼ်ၸဝ်ႈပူႇမွၼ်ႇၶဝ်ၼ်ႉလႄႈပႂ်ႉၵမ်ပႂ်ႉၸွမ်းတြႃးၸဝ်ႈဢိၵ်ႇတင်းပိင်းၺၢပ်ႈၸဝ်ႈဢေႃႈ။
၅ မၼ်းပႄႇၽဵဝ်ႈပႅတ်ႈထႃႇၼႃႉတီႈသုင်ဢိၵ်ႇတင်းရုၵ်ႉထူႉၵၢင်ဝၼ်းတင်းလၢႆပႅတ်ႈသေၵႃႈၼႂ်းဝၢၼ်ႈၼႂ်းဝဵင်းယုတၸိူဝ်းၼၼ်ႉလႄႈဢမူႉသိုင်ႇၸိုင်ႈဝၢၼ်ႈမိူင်းၸဝ်ႈမီးတၢင်းဢၼ်တဵတ်ႇလီၼိမ်လီဝႆႉၵႃႈတီႈၽၢႆႇၼႃႈမၼ်းဢေႃႈ။
၆ မိူဝ်ႈၼၼ်ႉမၼ်းတႄႇႁဵတ်းဝဵင်းဢၼ်မၼ်ႈၶိူင်ႇၵႃႈၼႂ်းမိူင်းယုတၵွပ်ႈပိူဝ်ႈဢၼ်ထႃႇဝရႃႉၽြႃးပၼ်ဢၶႂၢင်ႉဢၼ်လႆႈၵတ်းယဵၼ်ၶျၢမ်းသႃႇတီႈမၼ်းလႄႈမိူင်းၸဝ်ႈတဵတ်ႇလီၼိမ်လီလႄႈၵၢင်းလွတ်ႈတင်းဢမူႉဢၼ်တိုၵ်းသိုၵ်းၼၼ်ႉဢေႃႈ။
၇ လွင်ႈမၼ်းၸမ်းမၼ်းမီးဢမိင်ႉတီႈၵူၼ်းမဵဝ်းယုတတင်းလၢႆလႄႈဝႃႈႁဝ်းဢွၼ်ၵၼ်ပွင်ႁဵတ်းပွင်မႄးဝဵင်းၸိူဝ်ႉၼင်ႇၼႆၼၼ်ႉလႄႈႁဵတ်းလမ်းဝဵင်း၊လၢင်းၸီ၊ၽၵ်းတူတင်းၵိူၼ်ႇၽၵ်းတူတင်းလၢႆတႃႉႁဝ်း။မိူင်းၸဝ်ႈယင်းမီးယူႇတႂ်ႈမိုဝ်းႁဝ်းၵွပ်ႈပိူဝ်ႈဢၼ်ႁဝ်းၶတ်းၸႂ်ႁႃထႃႇဝရႃႉၽြႃးၽြႃးပဵၼ်ၸဝ်ႈႁဝ်းၼၼ်ႉဢေႃႈ။ႁဝ်းၶတ်းၸႂ်ႁႃမၼ်းၸဝ်ႈလႄႈမၼ်းၸဝ်ႈပၼ်ဢၶႂၢင်ႉဢၼ်လႆႈတဵတ်ႇလီၼိမ်လီၵူႈၽၢႆႇၵူႈပႃႈယဝ်ႉဝႃႈၼင်ႇၼႆဢေႃႈ။ၼင်ႇၼၼ်လႄႈၶဝ်ဢွၼ်ၵၼ်ပွင်ႁဵတ်းပွင်မႄးလႄႈ၈ ႁဵတ်းလႆႈပဵၼ်လႆႈဢေႃႈ။
၈ ဢႃႇသၼၼ်ႉမီးႁူဝ်ႁၢၼ်ၵၼ်းသိုၵ်းမဵဝ်းယုတဢၼ်ယိပ်းၵမ်ၶိူင်ႈႁႄႉလၢၵ်ႈၼၢၵ်ႈလူင်လႂ်တင်းႁွၵ်ႇလႂ်ၼၼ်ႉသၢမ်သႅၼ်၊ႁူဝ်ႁၢၼ်ၵူၼ်းသိုၵ်းမဵဝ်းပိၼ်ႇယႃႇမိၼ်ႇဢၼ်ယိပ်းၵမ်ၶိူင်ႈႁႄႉလၢၵ်ႈၼၢၵ်ႈဢွၼ်ႇလႂ်တင်းၵၢင်ႇလႂ်ၼၼ်ႉသွင်သႅၼ်ပၢႆပႅတ်ႇမိုၼ်ႇလႄႈၶဝ်တင်းသဵင်ႈတင်းလူင်ပဵၼ်ႁူဝ်ႁၢၼ်ၵူၼ်းသိုၵ်းဢၼ်ႁႅင်းယ်ႂၼႃႇဢေႃႈ။
၉ မီးၽဝ်ႇၼိုင်ႈၸေႇရဢၼ်ပဵၼ်ၶုၼ်မိူင်းၵုသၼၼ်ႉၶီႇသိုၵ်းလူၺ်ႈၵၼ်တင်းႁူဝ်ႁၢၼ်ၵူၼ်းသိုၵ်းလၢၼ်ႉၼိုင်ႈတင်းလေႃႉရထႃးသၢမ်ပၢၵ်ႇၼၼ်ႉမႃးလႄႈႁွတ်ႈထိုင်ၵႃႈတီႈဝဵင်းမရေႇသသေယဝ်ႉ၊ဢႃႇသဢွၵ်ႇႁႂ်ႈလႆႈႁႄႉႁပ်ႉတိုၵ်းလႄႈၶဝ်ယၼ်ႇတပ်ႉၶၢင်းတပ်ႉၶဝ်ၸူးၵၼ်ၵႃႈတီႈပၢင်ႇႁူၺ်ႈၸေႇၽသၵႃႇႁိမ်းဝဵင်းမရေႇသၼၼ်ႉဢေႃႈ။
၁၀ ဢႃႇသသႅၼ်ႇႁွင်ႉတီႈထႃႇဝရႃႉၽြႃးၽြႃးပဵၼ်ၸဝ်ႈမၼ်းလႄႈဝႃႈ၊-ထႃႇဝရႃႉၽြႃးတီႈၶႃႈ။လိူဝ်သေၸဝ်ႈႁဝ်းၼႆႉဢမ်ႇမီးၽူႈလႂ်ဢၼ်ၸွႆႈထႅမ်မႃႉၸႃႉၵႃႈတီႈၵႄႈဝူင်ႈၵၢင်ၵေႃႉဢၼ်ႁႅင်းယႂ်ႇဢိၵ်ႇတင်းၵေႃႉဢၼ်ႁႅင်းလဵၵ်ႉၼၼ်ႉလႆႈလႃးလႃးတီႈၶႃႈ။
၁၁ ထႃႇဝရႃႉၽြႃးၽြႃးပဵၼ်ၸဝ်ႈႁဝ်းၶႃႈတီႈၶႃႈ။ၶႅၼ်းတေႃႈၸွႆႈထႅမ်မႃႉၸႃႉၶႃႈၸဝ်ႈႁဝ်းၶဝ်သေၵမ်းတီႈၶႃႈ။ၶႃႈၸဝ်ႈႁဝ်းၸိူဝ်းၼႆႉသွၼ်ႈပိုင်ႈၸဝ်ႈႁဝ်းလႄႈဢွၼ်ၵၼ်ဢိင်ပိုင်ႈၼႃႇမႃႉၸိုဝ်သဵင်ၸဝ်ႈႁဝ်းသေလႄႈၶီႇသိုၵ်းႁႂ်ႈလႆႈတိုၵ်းမုၵ်ႉလူင်ၸိူဝ်းလူင်ၼႆႉတီႈၶႃႈဢေႃႈ။ထႃႇဝရႃႉၽြႃးတီႈၶႃႈ။ၸဝ်ႈႁဝ်းပဵၼ်ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်တီႈၶႃႈဢေႃႈ။ယႃႇပေႁႂ်ႈၵူၼ်းမီးဢၶႂၢင်ႉဢၼ်လႆႈပေႉၼႅင်ႇၸဝ်ႈႁဝ်းသေၵမ်းတီႈၶႃႈ၊ဝႃႈၼင်ႇၼႆဢေႃႈ။
၁၂ ထႃႇဝရႃႉၽြႃးပၼ်တၢမ်ႇၵူၼ်းၵုသတင်းလၢႆၵႃႈတီႈၽၢႆႇၼႃႈဢႃႇသဢိၵ်ႇတင်းၵူၼ်းမဵဝ်းယုတတင်းလၢႆလႄႈၵူၼ်းၵုသၸိူဝ်းၼၼ်ႉဢွၼ်ၵၼ်ဢွၵ်ႇပၢႆႈဢေႃႈ။
၁၃ ဢႃႇသဢိၵ်ႇတင်းၵူၼ်းဢၼ်ပႃးလူၺ်ႈၵၼ်တင်းမၼ်းၸိူဝ်းၼၼ်ႉဢွၼ်ၵၼ်လိုပ်ႈၸွမ်းလမ်းၸွမ်းတေႃႇထိုင်ႁွတ်ႈဝဵင်းၵေႇရႃႇသေယဝ်ႉၵူၼ်းၵုသၸိူဝ်းၼၼ်ႉတူၵ်းသုမ်းထၼ်ႈပေႃးၶဝ်ဢမ်ႇႁတ်းၶိုၼ်းႁပ်ႉၶၢမ်ႇတိုၵ်းတေႃးၶဝ်လႆႈဢေႃႈ။လွင်ႈမၼ်းၸမ်းၶဝ်လႆႈၶၢမ်ႇတၢင်းဢၼ်ယႃႉပႅတ်ႈၵႃႈတီႈၽၢႆႇၼႃႈထႃႇဝရႃႉၽြႃးဢိၵ်ႇတင်းပူဝ်ႇပႃႇတင်းလၢႆဢေႃႈ။ၶဝ်ဢွၼ်ၵၼ်သိမ်းဢဝ်မႃးဢုၵ်ႉၸႃႇဢၼ်ႁိမ်ႁူင်ႇလႆႈၼၼ်ႉၼမ်ၼႃႇဢေႃႈ။
၁၄ ၶဝ်တိုၵ်းတေႃးယႃႉပႅတ်ႈဝဵင်းၵႃႈဢၼ်မီးလဵပ်ႈႁွပ်ႈဝဵင်းၵေႇရႃႇၸိူဝ်းၼၼ်ႉၵွပ်ႈပိူဝ်ႈတၢင်းဢၼ်ၵူဝ်ႁႄထႃႇဝရႃႉၽြႃးႁွတ်ႈထိုင်ၵႃႈၼိူဝ်ၶဝ်ၼၼ်ႉဢေႃႈ။ၼင်ႇၼၼ်လႄႈၶဝ်ယႃႉဝဵင်းၵႃႈမီးၼၼ်ႉပႅတ်ႈၵွပ်ႈပိူဝ်ႈဢၼ်ၽၼ်ႇတႃႇဢုၵ်ႉၸႃႇဢၼ်ႁိမ်ႁူင်ႇလႆႈၼၼ်ႉမီးယႂ်ႇမီးၼမ်ၵႃႈၼႂ်းၸိူဝ်းၼၼ်ႉဢေႃႈ။ၶွၵ်ႈတရိၵ်ႈသၢၼ်ႇတင်းလၢႆၵေႃႈၶဝ်ဢွၼ်ၵၼ်ယႃႉပႅတ်ႈသေလႄႈသိမ်းဢဝ်သူဝ်းဢိၵ်ႇတင်းၵလႃႇဢုၵ်ႉၼမ်ၼႃႇလႄႈၶိုၼ်းမိူဝ်းၵႂႃႇၵႃႈတီႈဝဵင်းယေႇရုသလႅမ်ႇဢေႃႈ။