Chapter
၂၉
ႁေႇၸၵိႁဵတ်းတၢင်းဢၼ်ႁႂ်ႈပိၵ်ႉမၢၼ်ႇၽြႃးမူတ်းၸၢင်ႇ
၁ ႁေႇၸၵိၼၼ်ႉမိူဝ်ႈဢၼ်မၼ်းၸႃႉၼင်ႈႁင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈသၢဝ်းႁႃႈပီႊလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်းယေႇရုသလႅမ်ႇသၢဝ်းၵဝ်ႈပီႊဢေႃႈ။ၸိုဝ်သဵင်မေႈၸဝ်ႈၸမ်းပဵၼ်ဢႃႇၽိယလုၵ်ႈယိင်းၸႃႇၶရိဢေႃႈ။
၂ မၼ်းႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးၸွမ်းၵႃႈၼင်ႇဢၼ်ၸဝ်ႈပေႃႈမၼ်းတႃႇဝိတ်ႉႁဵတ်းၼၼ်ႉဢေႃႈ။
၃ ၼႂ်းပီႊပထမလိူၼ်ပထမဢၼ်မၼ်းၼင်ႈႁၢင်ႈၼင်ႈႁေႃၼၼ်ႉမၼ်းၽုၺ်ႇပိုတ်ႇၽၵ်းတူႁိူၼ်းထႃႇဝရႃႉၽြႃးသေလႄႈမႄးၵုမ်းမႄးႁဵတ်းဢေႃႈ။
၄ မၼ်းႁွင်ႉဢဝ်ယိတ်ႉပရေႃးႁိၵ်ႈလႂ်ဢိၵ်ႇတင်းၵူၼ်းမဵဝ်းလေႇဝိလႂ်မႃးလႄႈႁႂ်ႈၶဝ်ၸူႉၵၼ်တုမ်ၵၼ်ၵႃႈၼႂ်းတလၢင်းၽၢႆႇဝၼ်းဢွၵ်ႇၼၼ်ႉသေလႄႈမီးဢမိင်ႉဝႃႈ၊-ၵူၼ်းမဵဝ်းလေႇဝိၶဝ်ဢိူၺ်း။ဢွၼ်ၵၼ်ထွမ်ႇငိၼ်းတႃႉ။
၅ ဢွၼ်ၵၼ်ႁႂ်ႈတူဝ်ၸဝ်ႈၵဝ်ႇမူတ်းၸၢင်ႇလႄႈႁႂ်ႈႁိူၼ်းထႃႇဝရႃႉၽြႃးၽြႃးပဵၼ်ၸဝ်ႈပူႇသူမွၼ်ႇသူမူတ်းၸၢင်ႇသေလႄႈပႄႇၽဵဝ်ႈမုၼ်ဢၢင်ႈဢၢၵ်ႇယိူဝ်ႈယုၵ်းၸိူဝ်းၼၼ်ႉပႅတ်ႈသေၵႃႈၼႂ်းထႃႇၼႃႉတီႈမူတ်းၸၢင်ႇတႃႉ။
၆ ပူႇႁဝ်းပေႃႈႁဝ်းၸိူဝ်းၼၼ်ႉဢွၼ်ၵၼ်ၽိတ်းပိူင်ႈလႄႈႁဵတ်းတူႉၸရိူၵ်ႈဢပျႅတ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးၽြႃးပဵၼ်ၸဝ်ႈႁဝ်းယဝ်ႉ။ၶဝ်ၼၼ်ႉဢွၼ်ၵၼ်ၸုၼ်ႉပႅတ်ႈမၼ်းၸဝ်ႈသေလႄႈဝၢႆႇၼႃႈပႅတ်ႈသေၵႃႈတီႈဢၼ်မၼ်းၸဝ်ႈၵိင်းဝပ်ႈယူႇၼၼ်ႉသေလႄႈၵွင်လင်ပၼ်ယဝ်ႉလူင်ပေႇ။
၇ ၶဝ်ၼၼ်ႉဢွၼ်ၵၼ်ဢိုတ်းႁပ်းၽၵ်းတူႁိူၼ်းၼႃႈႁိူၼ်းၸဝ်ႈၸိူဝ်းၼၼ်ႉဝႆႉသေလႄႈဢဝ်ဝၢၼ်ႇၽႆးတဵၼ်းတင်းလၢႆမွတ်ႇဝႆႉသေယဝ်ႉယင်းဢမ်ႇဢဝ်ၼၢမ်ႇသႃႇတုတ်ႇၽႆးယင်းဢမ်ႇပုၵ်ႉၸေႃႇယိၸ်ႉဢၼ်တုတ်ႇၽႆးတီႈၽြႃးပဵၼ်ၸဝ်ႈမဵဝ်းဢိသရေႇလၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈၼၼ်ႉလႄႈယူႇဢေႃႈ။
၈ ပိူဝ်ႈဢၼ်ပဵၼ်ၼင်ႇၼႆလႄႈတၢင်းၸႂ်မႆႈၶႆႈၸႃႉထႃႇဝရႃႉၽြႃးဢွၵ်ႇတီႈမိူင်းယုတတင်းတင်းဝဵင်းယေႇရုသလႅမ်ႇလႄႈမၼ်းၸဝ်ႈဢဝ်ၶဝ်ဢၢပ်ႈပၼ်ႁႂ်ႈပဵၼ်တၢင်းဢၼ်လႆႈၶၢမ်ႇတုၵ်ႉၶႃႉၶၢၼ်ၸႂ်တၢင်းဢၼ်ၵိုတ်းမိူၼ်ႇၵႂင်ၸႂ်၊တၢင်းဢၼ်ငိၼ်းသဵင်ဢၼ်သေႉဢၼ်ဢၼ်သွမ်းၼၼ်ႉၵႃႈၼင်ႇဢၼ်တႃသူလႆႈႁၼ်ၼၼ်ႉယဝ်ႉ။
၉ ပိူဝ်ႈဢၼ်ပဵၼ်ၼင်ႇၼႆလႄႈပူႇႁဝ်းပေႃႈႁဝ်းၸိူဝ်းၼၼ်ႉလႆႈလူမ်ႉတၢႆလူၺ်ႈလၢပ်ႇလူၺ်ႈလႅဝ်းယဝ်ႉ။လုၵ်ႈၸၢႆးလုၵ်ႈယိင်းႁဝ်းမေးႁဝ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇယဝ်ႉ။
၁၀ မိူဝ်ႈလဵဝ်ၼႆႉၸမ်းလွင်ႈၼင်ႇႁိုဝ်တၢင်းၸႂ်မႆႈၶႆႈၸႃႉၸဝ်ႈဢၼ်ႁႅင်းၼႃႇၼၼ်ႉတၵ်းဝေႈပိူင်ႈသေၵႃႈတီႈႁဝ်းၵႂႃႇၸိုင်ၵဝ်မီးတၢင်းၵျၢမ်ႇတၢင်းပွင်တၵ်းႁဵတ်းပတိၺိၼ်ႇလူၺ်ႈၵၼ်တင်းထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလဢေႃႈ။
၁၁ လုၵ်ႈၸၢႆးၵဝ်တင်းလၢႆၶဝ်ဢိူၺ်း။ယႃႇပေဢွၼ်ၵၼ်ႁဵတ်းၵွႆႈႁဵတ်းထိူင်း။ထႃႇဝရႃႉၽြႃးလိူၵ်ႈၵဵပ်းဢဝ်သူႁႂ်ႈသူလႆႈၸုၵ်းၵႃႈတီႈၽၢႆႇၼႃႈမၼ်းၸဝ်ႈသေလႄႈႁဵတ်းဢမူႉတၢင်းဢၼ်ႁဵတ်းဝၢတ်ႈၼၼ်ႉလႄႈပဵၼ်ၵေႃႉဢၼ်ပႂ်ႉဢမူႉၸဝ်ႈလႄႈဢဝ်ၼၢမ်ႇသႃႇတုတ်ႇၽႆးယဝ်ႉ၊ဝႃႈၼင်ႇၼႆသေယဝ်ႉ၊
၁၂ ၵူၼ်းမဵဝ်းလေႇဝိဢၼ်ပဵၼ်မႃႇႁတ်ႉလုၵ်ႈၸၢႆးဢႃႇမသေႇတင်းယုဝ်းဢေႇလလုၵ်ႈၸၢႆးဢႃႇၸရိၼႂ်းၸိူဝ်ႉၶိူဝ်းၵေႃႇႁတ်ႉ၊ၵိလႉလုၵ်ႈၸၢႆးဢႃႇပတိတင်းဢႃႇၸရိလုၵ်ႈၸၢႆးယေႇႁလေႇလၼႂ်းၸိူဝ်ႉၶိူဝ်းမေႇရႃႇရိ၊ယေႃႇဢႃႇလုၵ်ႈၸၢႆးၸိမ်ႇမတင်းဢေႇတိၼ်ႇလုၵ်ႈၸၢႆးယေႃႇဢႃႇၼႂ်းၸိူဝ်ႉၶိူဝ်းၵေႇရသုၼ်ႇ၊
၁၃ သိမရတင်းယေႇယေႇလၼႂ်းၵူၼ်းမဵဝ်းဢေႇလိၸပၼ်ႇ၊ၸႃႇၶရိတင်းမတ်ႉတၼိၼႂ်းၵူၼ်းမဵဝ်းဢႃႇသပ်ႉ၊ယေႇႁေႇလတင်းသိမိၼႂ်းၵူၼ်းမဵဝ်းႁေႇမၼ်ႇ၊
၁၄ သေႇမႃႇယတင်းဢေႃႇၸေႇလၼႂ်းၵူၼ်းမဵဝ်းယေႇတုသုၼ်ႇၸိူဝ်းၼၼ်ႉဢွၼ်ၵၼ်လုၵ်ႉလႄႈ၊ႁွင်ႉဢဝ်ပီႈၶဝ်ၼွင်ႉၶဝ်သေလႄႈ
၁၅ ႁႂ်ႈတူဝ်ၸဝ်ႈၵဝ်ႇမူတ်းၸၢင်ႇသေယဝ်ႉၶဝ်ႈၵႂႃႇႁႂ်ႈလႆႈႁဵတ်းႁိူၼ်းထႃႇဝရႃႉၽြႃးလႆႈမူတ်းလီၵဵင်ႈလီၸွမ်းၵႃႈၼင်ႇဢၼ်ၶုၼ်ႁေႃၶမ်းဢဝ်ဢမိင်ႉထႃႇဝရႃႉၽြႃးၸီႇယၢင်ႇ၁၆ ဝႆႉၼၼ်ႉဢေႃႈ။
၁၆ ယိတ်ႉပရေႃးႁိၵ်ႈၸိူဝ်းၼၼ်ႉဢွၼ်ၵၼ်ၶဝ်ႈၵႃႈၼႂ်းလုၵ်းတၢင်းၼႂ်းႁိူၼ်းထႃႇဝရႃႉၽြႃးႁႂ်ႈမူတ်းလီၵဵင်ႈလီလႄႈဢဝ်မုၼ်ဢၢင်ႈဢၢၵ်ႇယိူဝ်ႈယႃႈယိူဝ်ႈယုၵ်းၵႃႈဢၼ်ထူပ်းၵႃႈၼႂ်းပိၵ်ႉမၢၼ်ႇထႃႇဝရႃႉၽြႃးၼၼ်ႉဢွၵ်ႇၸူးၵႃႈတီႈတမ်ႇတိူင်းႁိူၼ်းထႃႇဝရႃႉၽြႃးသေယဝ်ႉၵူၼ်းမဵဝ်းလေႇဝိၸိူဝ်းၼၼ်ႉဢွၼ်ၵၼ်ဢဝ်ဢွၵ်ႇၵႂႃႇၵႃႈၼွၵ်ႈတီႈၼမ်ႉႁွင်ႊၵိတြုၼ်ႇဢေႃႈ။
၁၇ ၼႂ်းလိူၼ်ပထမဝၼ်းပထမၼၼ်ႉၶဝ်ဢွၼ်ၵၼ်ၸႃႉႁဵတ်းတၢင်းဢၼ်ႁႂ်ႈမူတ်းၸၢင်ႇလႄႈၼႂ်းဝၼ်းဢၼ်ထူၼ်ႈထိုင်ပႅတ်ႈဝၼ်းၼၼ်ႉထိုင်ႁွတ်ႈၵႃႈတီႈႁိူၼ်းၼႃႈႁိူၼ်းထႃႇဝရႃႉၽြႃးဢေႃႈ။လိူၼ်ၼၼ်ႉပႅတ်ႇဝၼ်းတဵမ်တဵမ်ဢွၼ်ၵၼ်ႁႂ်ႈႁိူၼ်းၽြႃးပဵၼ်ၸဝ်ႈမူတ်းၸၢင်ႇလႄႈၼႂ်းလိူၼ်ပထမသိပ်းႁူၵ်းဝၼ်းၼၼ်ႉယဝ်ႉတူဝ်ႈလီငၢမ်းဢေႃႈ။
၁၈ မိူဝ်ႈၼၼ်ႉၶဝ်ဢွၼ်ၵၼ်ၶဝ်ႈၸူးၵႃႈတီႈၶုၼ်လူင်ႁေႇၸၵိလႄႈလဝ်ႈလၢတ်ႈလႄႈဝႃႈ၊-ၶႃႈၸဝ်ႈႁဝ်းၶဝ်ဢွၼ်ၵၼ်ႁႂ်ႈႁိူၼ်းထႃႇဝရႃႉၽြႃးတင်းသဵင်ႈတင်းလူင်ယိတ်ႉပလၢင်တီႈဢၼ်ဢဝ်ယိၸ်ႉတုတ်ႇၽႆးတင်းၶိူင်ႈပိူင်ၵႃႈမီး၊ၶူင်ႇတီႈၵိၼ်ဢၼ်ဢဝ်ၶဝ်ႈမုၼ်းၽၢႆႇၼႃႈၸဝ်ႈတၢင်ႇဝႆႉတင်းၶိူင်ႈပိူင်မၼ်းၵႃႈမီးၼၼ်ႉမူတ်းလီၵဵင်ႈလီယဝ်ႉတီႈၶႃႈယဝ်ႉ။
၁၉ ၼွၵ်ႈသေၼႆႉၶိူင်ႈပိူင်ၵႃႈဢၼ်ၶုၼ်လူင်ဢႃႇၶတ်ႉႁဵတ်းဢႃႉထမ်ႇမႃႉပႅတ်ႈဝႆႉၼႂ်းၸူဝ်ႈပၢၼ်မၼ်းလႄႈၼႂ်းမိူဝ်ႈဢၼ်မၼ်းၽိတ်းပိူင်ႈၼၼ်ႉၸိူဝ်းၼၼ်ႉၵေႃႈၶႃႈၸဝ်ႈႁဝ်းၶဝ်ၶိုၼ်းႁဵတ်းၶိုၼ်းမႄးလႄႈႁႂ်ႈမူတ်းၸၢင်ႇယဝ်ႉတီႈၶႃႈဢေႃႈ။တူၺ်းတီႈၶႃႈလူ။မီးယူႇၵႃႈတီႈၽၢႆႇၼႃႈယိတ်ႉပလၢင်ႇထႃႇဝရႃႉၽြႃးၼၼ်ႉတီႈၶႃႈဢေႃႈ၊ဝႃႈၼင်ႇၼႆဢေႃႈ။
၂၀ မိူဝ်ႈၼၼ်ႉၶုၼ်လူင်ႁေႇၸၵိလုၵ်ႉၸဝ်ႉၸဝ်ႉသေလႄႈႁႂ်ႈၵူၼ်းဝဵင်းတင်းလၢႆၸူႉၵၼ်တုမ်ၵၼ်လႄႈၶိုၼ်ႈၸူးၵႃႈတီႈႁိူၼ်းထႃႇဝရႃႉၽြႃးဢေႃႈ။
၂၁ ၶဝ်ဢွၼ်ၵၼ်ဢဝ်ဝူဝ်းၸဵတ်းတူဝ်၊သူဝ်းပေႃႈၸဵတ်းတူဝ်၊သူဝ်းဢွၼ်ႇၸဵတ်းတူဝ်၊ပႄႉပေႃႈၸဵတ်းတူဝ်မႃးပုၼ်ႈဢၼ်တၵ်းပုၵ်ႉၸေႃႇယိၸ်ႉၽႄႇဢပျႅတ်ႈႁေႃၸဝ်ႈ၊ဢပျႅတ်ႈထႃႇၼႃႉတီႈမူတ်းၸၢင်ႇၸဝ်ႈ၊ဢပျႅတ်ႈမိူင်းယုတၸိူဝ်းၼၼ်ႉဢေႃႈ။မၼ်းမီးဢမိင်ႉႁႂ်ႈယိတ်ႉပရေႃးႁိၵ်ႈၵူၼ်းမဵဝ်းဢႃႇရုၼ်ႇတင်းလၢႆဢဝ်ၸိူဝ်းၼၼ်ႉပုၵ်ႉၸေႃႇၵႃႈၼိူဝ်ယိတ်ႉပလၢင်ႇထႃႇဝရႃႉၽြႃးၼၼ်ႉလႄႈ
၂၂ ၶဝ်ၼၼ်ႉဢွၼ်ၵၼ်ဢဝ်ဝူဝ်းတၢႆၸွမ်းၵႃႈၼင်ႇဢၼ်မီးဢမိင်ႉၼၼ်ႉလႄႈယိတ်ႉပရေႃးႁိၵ်ႈၸိူဝ်းၼၼ်ႉၶၢမ်ႇဢဝ်လိူတ်ႈမၼ်းသေလႄႈဢဝ်ၽႅတ်းသႂ်ႇၵႃႈၼိူဝ်ယိတ်ႉပလၢင်ႇဢေႃႈ။သူဝ်းပေႃႈၸိူဝ်းၼၼ်ႉၵေႃႈၶဝ်ဢွၼ်ၵၼ်ဢဝ်တၢႆလႄႈဢဝ်လိူတ်ႈမၼ်းၽႅတ်းသႂ်ႇၵႃႈၼိူဝ်ယိတ်ႉပလၢင်ႇဢေႃႈ။သူဝ်းဢွၼ်ႇၸိူဝ်းၼၼ်ႉၵေႃႈၶဝ်ဢွၼ်ၵၼ်ဢဝ်တၢႆလႄႈဢဝ်လိူတ်ႈမၼ်းၽႅတ်းသႂ်ႇၵႃႈၼိူဝ်ယိတ်ႉပလၢင်ႇဢေႃႈ။
၂၃ ပႄႉပေႃႈပုၼ်ႈဢၼ်တၵ်းပုၵ်ႉၸေႃႇယိၸ်ႉၽႄႇဢပျႅတ်ႈၸိူဝ်းၼၼ်ႉၵေႃႈၶဝ်ဢွၼ်ၵၼ်ဢဝ်ဢွၵ်ႇၵႃႈတီႈၽၢႆႇၼႃႈၶုၼ်ႁေႃၶမ်းတင်းပရိၵ်ႈသၢတ်ႈတင်းလၢႆလႄႈၶဝ်ဢဝ်မိုဝ်းတူဝ်ၸဝ်ႈၵဝ်ႇတၢင်ႇသေယဝ်ႉယိတ်ႉပရေႃးႁိၵ်ႈၸိူဝ်းၼၼ်ႉဢွၼ်ၵၼ်ဢဝ်တၢႆလႄႈႁဵတ်းမၢင်ႇၵလႃႇတၢင်းဢၼ်ဢဝ်လိူတ်ႈၽႄႇဢပျႅတ်ႈၵႃႈၼိူဝ်ယိတ်ႉပလၢင်ႇႁႂ်ႈလႆႈၽႄႇဢပျႅတ်ႈၵူၼ်းမဵဝ်းဢိသရေႇလတင်းသဵင်ႈတင်းလူင်ဢေႃႈ။
၂၄ ၼင်ႇၼၼ်လႄႈၶုၼ်ႁေႃၶမ်းမီးဢမိင်ႉႁႂ်ႈပုၵ်ႉၸေႃႇယိၸ်ႉဢၼ်တုတ်ႇၽႆးတင်းယိၸ်ႉဢၼ်ၽႄႇဢပျႅတ်ႈပုၼ်ႈၵူၼ်းမဵဝ်းဢိသရေႇလတင်းသဵင်ႈတင်းလူင်ဢေႃႈ။
၂၅ မၼ်းၶၢၼ်းၵူၼ်းမဵဝ်းလေႇဝိဢၼ်ပႃးဢဝ်တင်းသႅင်ႇလႂ်၊တိင်ႇလႂ်၊တရေႃးလႂ်၊ၸိူဝ်းၼၼ်ႉဝႆႉၵႃႈၼႂ်းႁိူၼ်းထႃႇဝရႃႉၽြႃးၸွမ်းၵႃႈၼင်ႇဢၼ်ၶုၼ်လူင်တႃႇဝိတ်ႉဢိၵ်ႇတင်းၵတ်ႉၵေႃႉဢၼ်ႁူပွင်ႇတႃႈလႅင်းတီႈၶုၼ်ႁေႃၶမ်းတင်းပရေႃးၽႅတ်ႈၼႃႇသၼ်ႇၸီႇယၢင်ႇဝႆႉၼၼ်ႉဢေႃႈ။ၼင်ႇၼၼ်လႄႈဢမိင်ႉၸဝ်ႈၼၼ်ႉပဵၼ်မႃးတီႈထႃႇဝရႃႉၽြႃးၵႃႈၼႂ်းသူပ်းပရေႃးၽိတ်ႈတင်းလၢႆၼၼ်ႉဢေႃႈ။
၂၆ ပိူဝ်ႈဢၼ်ပဵၼ်ၼင်ႇၼႆလႄႈၵူၼ်းမဵဝ်းလေႇဝိၸိူဝ်းၼၼ်ႉဢွၼ်ၵၼ်ယိပ်းၵမ်မဵဝ်းတူႇရီႉယႃႇဢၼ်ၶုၼ်တႃႇဝိတ်ႉၸီႇယၢင်ႇဝႆႉၼၼ်ႉယူႇ၊ယိတ်ႉပရေႃးႁိၵ်ႈၸိူဝ်းၼၼ်ႉဢွၼ်ၵၼ်ယိပ်းၵမ်ၼႄးၶရႃႇတင်းလၢႆယူႇသေလႄႈၸုၵ်းယူႇဢေႃႈ။
၂၇ ႁေႇၸၵိမီးဢမိင်ႉႁႂ်ႈဢဝ်ယိၸ်ႉဢၼ်တုတ်ႇၽႆးပုၵ်ႉၸေႃႇၵႃႈၼိူဝ်ယိတ်ႉပလၢင်ႇလႄႈမိူဝ်ႈဢၼ်ၸႃႉႁဵတ်းတၢင်းဢၼ်ပုၵ်ႉၸေႃႇယိၸ်ႉဢၼ်တုတ်ႇၽႆးယူႇၼၼ်ႉၸိုင်ၶဝ်ဢွၼ်ၵၼ်ၸႃႉႁဵတ်းၵႂၢမ်းတီႈထႃႇဝရႃႉၽြႃးဢိၵ်ႇတင်းတၢင်းဢဝ်ပဝ်ႇႁႆႇၼႄးၶရႃႇတင်းမဵဝ်းတူႇရီႉယႃႇဢၼ်တႃႇဝိတ်ႉၶုၼ်ႁေႃၶမ်းဢိသရေႇလၸီႇယၢင်ႇဝႆႉၸိူဝ်းၼၼ်ႉဢေႃႈ။
၂၈ ပရိၵ်ႈသၢတ်ႈတင်းသဵင်ႈတင်းဢွၼ်ႈၵၼ်ၵူဝ်းၵႂၢႆႇယူႇ၊ၶဝ်ၸိူဝ်းဢၼ်ႁဵတ်းၵႂၢမ်းၵေႃႈႁဵတ်းယူႇ၊ၶဝ်ၸိူဝ်းဢၼ်ပဝ်ႇတိုင်ႈၼႄးၶရႃႇၵေႃႈပဝ်ႇတိုင်ႈယူႇတေႃႇထိုင်ႁွတ်ႈတၢင်းဢၼ်ပုၵ်ႉၸေႃႇယိၸ်ႉဢၼ်တုတ်ႇၽႆးၼၼ်ႉထၼ်ႈပေႃးယဝ်ႉတူဝ်ႈဢေႃႈ။
၂၉ ဢဝ်ပုၵ်ႉၸႃႇယဝ်ႉတူဝ်ႈသေယဝ်ႉၶုၼ်ႁေႃၶမ်းဢိၵ်ႇတင်းၶဝ်ၵႃႈဢၼ်မီးၵႃႈတီႈမၼ်းၸိူဝ်းၼၼ်ႉဢွၼ်ၵၼ်ၶုပ်ႉမူပ်ႇဝၢင်းႁူဝ်လႄႈၵူဝ်းၵႂၢႆႇဢေႃႈ။
၃၀ လၢႆးသမ်ႉၶုၼ်လူင်ႁေႇၸၵိဢိၵ်ႇတင်းၶုၼ်ၸိူဝ်းၼၼ်ႉၸီႇယၢင်ႇႁႂ်ႈၵူၼ်းမဵဝ်းလေႇဝိၸိူဝ်းၼၼ်ႉဢွၼ်ၵၼ်ဢဝ်ၵႂၢမ်းတႃႇဝိတ်ႉတင်းၵႂၢမ်းဢႃႇသပ်ႉၵေႃႉဢၼ်ႁူပွင်ႇတႃလႅင်းၼၼ်ႉႁဵတ်းၵႂၢမ်းထေႃးပၼႃႇတီႈထႃႇဝရႃႉၽြႃးဢေႃႈ။ၶဝ်ၼၼ်ႉဢွၼ်ၵၼ်မီးတင်းၸႂ်ဢၼ်သႂၢင်ႇသိူဝ်းႁဵတ်းၵႂၢမ်းထေႃးပၼႃႇသေလႄႈၵူမ်ႈၵွမ်းဝၢင်းႁူဝ်လႄႈၵူဝ်းၵႂၢႆႇဢေႃႈ။
၃၁ လိုၼ်းၼၼ်ႉႁေႇၸၵိသမ်ႉမီးဢမိင်ႉထႅင်ႈလႄႈဝႃႈ၊-သူၼႆႉဢွၼ်ၵၼ်ဢဝ်တူဝ်ၸဝ်ႈၵဝ်ႇပုၵ်ႉၸေႃႇတီႈထႃႇဝရႃႉၽြႃးမိူဝ်ႈလဵဝ်ၼႆႉယဝ်ႉ။ဢွၼ်ၵၼ်သုတ်ႉၸပ်းသုတ်ႉၸူးလႄႈဢဝ်မဵဝ်းယိၸ်ႉလႂ်ဢိၵ်ႇတင်းၶိူင်ႈပုၵ်ႉၸေႃႇတီႈဢၼ်ႁပ်ႉတုင်းဢဝ်ၵျေးၸူးၸဝ်ႈလႂ်မႃးၵႃႈၼႂ်းႁိူၼ်းထႃႇဝရႃႉၽြႃးတႃႉ၊ဝႃႈၼင်ႇၼႆလႄႈပရိၵ်ႈသၢတ်ႈၸိူဝ်းၼၼ်ႉဢွၼ်ၵၼ်ဢဝ်မဵဝ်းယိၸ်ႉဢိၵ်ႇတင်းၶိူင်ႈပုၵ်ႉၸေႃႇတီႈဢၼ်ႁပ်ႉတုင်းဢဝ်ၵျေးၸူးၸဝ်ႈလႂ်မႃးဢေႃႈ။ၶဝ်ၵႃႈဢၼ်မီးၸႂ်ၸေႇတၼႃႇၸိူဝ်းၼၼ်ႉဢဝ်ယိၸ်ႉဢၼ်တုတ်ႇၽႆးမႃးႁင်းၽႂ်ႁင်းမၼ်းဢေႃႈ။
၃၂ ယိၸ်ႉဢၼ်တုတ်ႇၽႆးဢၼ်ပရိၵ်ႈသၢတ်ႈဢဝ်မႃးၸိူဝ်းၼၼ်ႉပွင်းၵၼ်မီးဝူဝ်းၸဵတ်းသိပ်း၊သူဝ်းပေႃႈပၢၵ်ႇၼိုင်ႈ၊သူဝ်းဢွၼ်ႇသွင်ပၢၵ်ႇဢေႃႈ။ၸိူဝ်းၼၼ်ႉပဵၼ်ပုၼ်ႈဢၼ်တၵ်းပုၵ်ႉၸေႃႇယိၸ်ႉဢၼ်တုတ်ႇၽႆးတီႈထႃႇဝရႃႉၽြႃးဢေႃႈ။
၃၃ ဢုၵ်ႉၸႃႇဢၼ်ပုၵ်ႉၸေႃႇၼၼ်ႉၸမ်းမီးဝူဝ်းႁႃႈပၢၵ်ႇဢိၵ်ႇတင်းသူဝ်းသၢမ်ႁဵင်ဢေႃႈ။ၵွပ်ႈပိူဝ်ႈယိတ်ႉပရေႃးႁိၵ်ႈၸိူဝ်းၼၼ်ႉၵေႇလႄႈဢမ်ႇလွၵ်ႈဢဝ်ၼင်တူဝ်ယိၸ်ႉဢၼ်တုတ်ႇၽႆးၸိူဝ်းၼၼ်ႉလႆႈလႄႈပီႈၼွင်ႉၶဝ်ၵူၼ်းမဵဝ်းလေႇဝိတင်းလၢႆဢွၼ်ၵၼ်ၸွႆႈထႅမ်တေႃႇထိုင်ႁွတ်ႈဢမူႉၼၼ်ႉထၼ်ႈပေႃးယဝ်ႉတူဝ်ဢိၵ်ႇတင်းတေႃႇထိုင်ႁွတ်ႈယိတ်ႉပရေႃးႁိၵ်ႈတၢင်ႇၵေႃႉတၢင်ႇၵူၼ်းၸိူဝ်းၼၼ်ႉႁႂ်ႈတူဝ်ၸဝ်ႈၵဝ်ႇလႆႈမူတ်းၸၢင်ႇယဝ်ႉၼၼ်ႉဢေႃႈ။
၃၄ ၵူၼ်းမဵဝ်းလေႇဝိၸိူဝ်းၼၼ်ႉယိင်ႈၶႅၼ်းဢွၼ်
ၵၼ်မီးၸႂ်သၽေႃးဢၼ်သိုဝ်ႈလီရူဝ်းလီႁႂ်ႈတူဝ်ၸဝ်ႈၵဝ်ႇလႆႈမူတ်းၸၢင်ႇလိူဝ်တွၼ်းၼႃႇသယေိတ်ႉပရေႃးႁိၵ်ႈၸိူဝ်းၼၼ်ႉဢေႃႈ။
၃၅ ယိၸ်ႉဢၼ်တုတ်ႇၽႆးဢိၵ်ႇတင်းၵွၼ်ႈၶႆၵွၼ်ႈမၼ်းယိၸ်ႉမိၵ်ႉသႁႃႇယႃႉၶိူင်ႈပုၵ်ႉၸေႃႇဢၼ်သွၼ်းလေႃႇဢၼ်ၸၢပ်ႈသႅင်ႇၵၼ်တင်းယိၸ်ႉဢၼ်တုတ်ႇၽႆးႁင်းၽႂ်ႁင်းမၼ်းၸိူဝ်းၼၼ်ႉမီးဝႆႉၼမ်ၼႃႇဢေႃႈ။ၼင်ႇၼၼ်လႄႈၶဝ်ဢွၼ်ၵၼ်ၸီႇယၢင်ႇတၢင်းဢၼ်ႁဵတ်းဝတ်ႈၵႃႈတီႈႁိူၼ်းထႃႇဝရႃႉၽြႃးၼၼ်ႉဝႆႉဢေႃႈ။
၃၆ ႁေႇၸၵိဢိၵ်ႇတင်းၵူၼ်းတင်းသဵင်ႈတင်းလူင်ဢွၼ်ၵၼ်ၸူမ်းသိူဝ်းၵွပ်ႈပိူဝ်ႈလွင်ႈတၢင်းဢၼ်ၽြႃးပဵၼ်ၸဝ်ႈလႆႈႁဵတ်းပွင်ပုၼ်ႈၵူၼ်းတင်းလၢႆၼၼ်ႉဢေႃႈ။လွင်ႈမၼ်းၸမ်းဢမူႉၼၼ်ႉပဵၼ်တၢင်းဢၼ်ၶဝ်ၶုၵ်းၶီႈၶုၵ်းၶၢၵ်းႁဵတ်းဢေႃႈ။