Chapter
၂၆
ဢုဝ်ႇၸိယပဵၼ်ၶုၼ်ႁေႃၶမ်းယုတ
၁ ၵူၼ်းဝၢၼ်ႈၵူၼ်းမိူင်းယုတတင်းသဵင်ႈတင်းလူင်ဢွၼ်ၵၼ်ဢဝ်ဢုဝ်ႇၸိယဢၼ်ဢသၢၵ်ႈလႆႈသိပ်းပၢႆႁူၵ်းပီႊၼၼ်ႉႁဵတ်းၶုၼ်ႁေႃၶမ်းတၢင်တူဝ်ဢႃႇမၸိၸဝ်ႈပေႃႈမၼ်းၼၼ်ႉဢေႃႈ။
၂ မၼ်းတႄႇႁဵတ်းဝဵင်းဢေႇလုတ်ႉလႄႈသမ်ႉဢဝ်သႂၢင်းၶဝ်ၵႃႈၼႂ်းမိူင်းယုတလိုၼ်းသေၸဝ်ႈပေႃႈမၼ်းၼွၼ်းလပ်းလူၺ်ႈၵၼ်တင်းပူႇမၼ်းမွၼ်ႇမၼ်းတင်းလၢႆယဝ်ႉၼၼ်ႉဢေႃႈ။
၃ ဢုဝ်ႇၸိယၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈသိပ်းပၢႆႁူၵ်းပီႊလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်းယေႇရုသလႅမ်ႇႁႃႈသိပ်းပၢႆသွင်ပီႊဢေႃႈ။ၸိုဝ်သဵင်မေႈၸဝ်ႈၸမ်းပဵၼ်ယေႇၶေႃႇၸိမေႈယိင်းဝဵင်းယေႇရုသလႅမ်ႇဢေႃႈ။
၄ မၼ်းႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးၸွမ်းၵႃႈၼင်ႇဢၼ်ၸဝ်ႈပေႃႈမၼ်းဢႃႇမၸိႁဵတ်းၼၼ်ႉဢေႃႈ။
၅ ၼႂ်းၸူဝ်ႈပၢၼ်ၸႃႇၶရိဢၼ်ႁူႉပျႃႇတိၵ်ႈရူႇပႃႇရူင်ႇၽြႃးပဵၼ်ၸဝ်ႈၼၼ်ႉမၼ်းသွၼ်ႈပိုင်ႈၽြႃးပဵၼ်ၸဝ်ႈဢေႃႈ။ၼႂ်းၸူဝ်ႈပၢၼ်ဢၼ်မၼ်းသွၼ်ႈပိုင်ႈထႃႇဝရႃႉၽြႃးယူႇၼၼ်ႉတဵမ်တဵမ်ၽြႃးပဵၼ်ၸဝ်ႈႁႂ်ႈတၢင်းၵျၢမ်ႇတၢင်းပွင်မၼ်းပဵၼ်လႆႈဢေႃႈ။
၆ မၼ်းၶီႇသိုၵ်းဢွၵ်ႇလႄႈတိုၵ်းတေႃးၵူၼ်းၽိလိတ်ႉတိတင်းလၢႆသေလႄႈၵိူၼ်ႇယႃႉပႅတ်ႈလမ်းဝဵင်းၵႃႇသ၊လမ်းဝဵင်းယႃႇပၼ်ႇ၊လမ်းဝဵင်းဢႃႇၸုတ်ႉသေယဝ်ႉတႄႇႁဵတ်းဝဵင်းမႂ်ႇၵူၺ်းၵူၺ်းၵႃႈၼႂ်းလိၼ်ဢႃႇၸုတ်ႉမိူင်းၽိလိတ်ႉတိၼၼ်ႉဢေႃႈ။
၇ ၽြႃးပဵၼ်ၸဝ်ႈၸွႆႈထႅမ်မႃႉၸႃႉမၼ်းယူႇၽၢႆႇၼိုင်ႈတင်းၵူၼ်းၽိလိတ်ႉတိ၊ၵူၼ်းဢႃႇရေႇပျႃႇဢၼ်ယူႇၵႃႈတီႈဝဵင်းၵုရပႃႇလတင်းၵူၼ်းမႁုၼိမ်ႇၸိူဝ်းၼၼ်ႉဢေႃႈ။
၈ ၵူၼ်းမဵဝ်းဢမ်ႇမုၼ်ႇတင်းလၢႆၵေႃႈဢွၼ်ၵၼ်သၢၵ်ႈလၢၵ်ႈသွင်ႇပၼ်ၼႃႇတီႈဢုဝ်ႇၸိယဢေႃႈ။မၼ်းႁႂ်ႈတူဝ်ၸဝ်ႈၵဝ်ႇမၼ်ႈၶိူင်ႇၼႃႇလူင်လၢင်သေယဝ်ႉသတၢင်းသဵင်ၶၢဝ်ႇၸိုဝ်သဵင်မၼ်းႁူင်ႈႁၢင်းၸွတ်ႇတူဝ်ႈၵႂႃႇတေႃႇထိုင်ႁွတ်ႈတီႈမိူင်းဢေႇၵႅပ်ႉတုၼၼ်ႉဢေႃႈ။
၉ ဢုဝ်ႇၸိယတႄႇႁဵတ်းတိူၵ်ႈတီႈတိုၵ်းသိုၵ်းၵႃႈတီႈၽၵ်းတူၸဵင်ႇဝဵင်း၊ၽၵ်းတူၶူင်ႈႁူၺ်ႈ၊ၽၵ်းတူလမ်းဝဵင်းတီႈဢၼ်ၵူတ်ႉၸိူဝ်းၼၼ်ႉၵႃႈတီႈဝဵင်းယေႇရုသလႅမ်ႇလႄႈႁႂ်ႈမၼ်ႈၶိူင်ႇဢေႃႈ။ၵႃႈၼႂ်းထိူၼ်ႇၵေႃႈမၼ်းတႄႇႁဵတ်းတိူၵ်ႈတီႈတိုၵ်းသိုၵ်းတင်းလၢႆလႄႈၶုတ်းၼမ်ႉမေႃႇဝႆႉၼမ်ၼႃႇဢေႃႈ။
၁၀ လွင်ႈမၼ်းၸမ်းမၼ်းမီးသူဝ်းဝူဝ်းၼမ်ၼႃႇၵႃႈတႂ်ႈတီႈဢၼ်ပၢင်ႇဢၼ်ပဵင်းဢိၵ်ႇတင်းၵႃႈၼိူဝ်ႁၢၼ်ႉလွႆၵႄႈလွႆၼၼ်ႉဢေႃႈ။မၼ်းမီးၵူၼ်းဢၼ်ႁဵတ်းႁႆႊႁဵတ်းၼႃးဢိၵ်ႇတင်းၵူၼ်းဢၼ်လုမ်းလႃးသူၼ်ဢူးယဵၼ်ႇၸပိတ်ႉၼမ်ၼႃႇၵႃႈၼိူဝ်လွႆလႂ်၊ၵႃႈတီႈဢၼ်လိၼ်လီလႂ်လႄႈမၼ်းမီးဝႃႇသၼႃႇလွင်ႈတၢင်ၸိူဝ်းၼၼ်ႉဢေႃႈ။
၁၁ ဢုဝ်ႇၸိယမီးပူဝ်ႇပႃႇႁူဝ်ႁၢၼ်ၵူၼ်းသိုၵ်းၼမ်ၼႃႇဢၼ်ပဵၼ်မုၵ်ႉပဵၼ်ၸိူဝ်းႁင်းၽႂ်ႁင်းမၼ်းၸွမ်းၵႃႈၼင်ႇဢၼ်ႁႃႇၼၼိဢၼ်ပဵၼ်ၶုၼ်ပူဝ်ႇႁေႃၶမ်းၸႂ်ႉသွႆယေႇလၸရေႇတင်းမႃႇသေႇယဢၼ်ပဵၼ်ၽူႈဢုပ်ႉတပ်ႉၸိူဝ်းၼၼ်ႉဢေႃႈ။
၁၂ ၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼႂ်းပီႈၼွင်ႉၸိူဝ်ႉၶိူဝ်းပေႃႈၶဝ်ဢၼ်ပဵၼ်ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၸိူဝ်းၼၼ်ႉၸမ်းမီးသွင်ႁဵင်ပၢႆႁူၵ်းပၢၵ်ႇဢေႃႈ။
၁၃ တႂ်ႈၶဝ်ၼၼ်ႉမီးႁူဝ်ႁၢၼ်ၵူၼ်းသိုၵ်းဢၼ်မီးႁႅင်းယႂ်ႇလႄႈတိုၵ်းသိုၵ်းႁႂ်ႈလႆႈၵမ်ႉထွၵ်ႈၶုၼ်ႁေႃၶမ်းယူႇၽၢႆႇၼိုင်ႈတင်းရၢၼ်ႇသူႇမၼ်းၸိူဝ်းၼၼ်ႉသၢမ်သႅၼ်ပၢႆၸဵတ်းႁဵင်ႁႃႈပၢၵ်ႇဢေႃႈ။
၁၄ ဢုဝ်ႇၸိယၼၼ်ႉပွင်ႁဵတ်းပွင်ႁႅၼ်းၶိူင်ႈပိူင်ႁႄႉလၢၵ်ႈၼၢၵ်ႈလႂ်၊ႁွၵ်ႇလႂ်၊ၵုပ်းလဵၵ်းလႂ်၊သိူဝ်ႈၶႅပ်းလဵၵ်းလႂ်၊ၵၢင်ႇလႂ်၊ၵူင်ႇၵွၼ်တီႈဢၼ်တၵ်းပိုတ်းမၢၵ်ႇႁိၼ်လႂ်ပုၼ်ႈပူဝ်ႇပႃႇၵႃႈမီးၼၼ်ႉဢေႃႈ။
၁၅ ၸၢၵ်ႈယၼ်းတရႃးဢၼ်ၶဝ်ၸိူဝ်းဢၼ်လၵ်းလႅမ်ဢဝ်ၺၢၼ်ႇၶဝ်လႄႈႁဵတ်းဢွၵ်ႇမႃးၸိူဝ်းၼၼ်ႉၵေႃႈမၼ်းပွင်ႁဵတ်းပွင်ႁႅၼ်းၵႃႈၼႂ်းဝဵင်းယေႇရုသလႅမ်ႇပုၼ်ႈဢၼ်တၵ်းဝႆႉၵႃႈၼိူဝ်တိူၵ်ႈတီႈတိုၵ်းသိုၵ်းဢိၵ်ႇတင်းလၢင်းၸီႇတင်းလၢႆႁႂ်ႈလႆႈပိုတ်းပိုၼ်ထႅမ်ႈမၢၵ်ႇႁိၼ်လူင်းဢေႃႈ။ၼင်ႇၼၼ်လႄႈပိူဝ်ႈဢၼ်မၼ်းလႆႈၶၢမ်ႇတၢင်းဢၼ်ၸွႆႈထႅမ်ၼႃႇလူင်လၢင်ထၼ်ႈပေႃးႁႅင်းမၼ်းယႂ်ႇမႃးလႄႈသတၢင်းသဵင်ၶၢဝ်ႇၸိုဝ်သဵင်မၼ်းႁူင်ႁၢင်းၸွတ်ႇတူဝ်ႈၵႂႃႇဢေႃႈ။
၁၆ မိူဝ်ႈဢၼ်ႁႅင်းမၼ်းယႂ်ႇမႃးၼၼ်ႉမၼ်းမီးၸႂ်ဢၼ်ပူၵ်းပႅၼ်ၶိုၼ်ႈသုင်လႄႈပဵၼ်တၢင်းဢၼ်ႁဵတ်းႁႂ်ႈတူဝ်ၸဝ်ႈၵဝ်ႇတူၵ်းသုမ်းလူႉလႅဝ်ဢေႃႈ။မၼ်းၶဝ်ႈၵႂႃႇၵႃႈၼႂ်းပိၵ်ႉမၢၼ်ႇထႃႇဝရႃႉၽြႃးႁႂ်ႈလႆႈဢဝ်ၼၢမ်ႇသႃႇတုတ်ႇၽႆးၵႃႈၼိူဝ်ယိတ်ႉပလၢင်ႇတီႈဢၼ်တုတ်ႇၽႆးၼၢမ်ႇသႃႇၼၼ်ႉလႄႈပဵၼ်တၢင်းဢၼ်ၽိတ်းပိူင်ႈထႃႇဝရႃႉၽြႃးၽြႃးပဵၼ်ၸဝ်ႈမၼ်းဢေႃႈ။
၁၇ ယိတ်ႉပရေႃးႁိၵ်ႈဢႃႇၸရိတင်းယိတ်ႉပရေႃးႁိၵ်ႈပႅတ်ႇသိပ်းဢၼ်ၵိုတ်ႈႁၢပ်ႇဢမူႉထႃႇဝရႃႉၽြႃးဢၼ်ႁတ်းႁၢၼ်ၸိူဝ်းၼၼ်ႉၸွမ်းလင်ၶုၼ်ႁေႃၶမ်းဢုဝ်ႇၸိယလႄႈၶဝ်ႈၵႂႃႇသေယဝ်ႉတပ်ႉႁႄႉၶႅၼ်မၼ်းလႄႈဝႃႈ၊-ၸဝ်ႈၶုၼ်လူင်ဢုဝ်ႇၸိရဢိူၺ်း။ၸဝ်ႈႁဝ်းၼႆႉဢမ်ႇၸၢပ်ႈသႅင်ႇၵၼ်တင်းဢမူႉတၢင်းဢၼ်ဢဝ်ၼၢမ်ႇသႃႇတုတ်ႇၽႆးတီႈထႃႇဝရႃႉၽြႃးၼႆႉတီႈၶႃႈ။
၁၈ ယိတ်ႉပရေႃးႁိၵ်ႈဢၼ်ပဵၼ်လုၵ်ႈလၢၼ်ဢႃႇရုၼ်ႇဢၼ်လႆႈၶၢမ်ႇတၢင်းဢၼ်ၶၢၼ်းဝႆႉၼၼ်ႉၵူၺ်းတၵ်းလႆႈႁဵတ်းတီႈၶႃႈဢေႃႈ။ဢွၵ်ႇသေၵႃႈၼႂ်းထႃႇၼႃႉတီႈမူတ်းၸၢင်ႇၼႆႉၵႂႃႇသေၵမ်း။ၸဝ်ႈႁဝ်းၽိတ်းပိူင်ႈတီႈၶႃႈယဝ်ႉ။သရေႇၸဝ်ႈႁဝ်းတၵ်းလူႉၵႃႈတီႈၽၢႆႇၼႃႈထႃႇဝရႃႉၽြႃးၽြႃးပဵၼ်ၸဝ်ႈတီႈၶႃႈဢေႃႈ၊ဝႃႈၼင်ႇၼႆဢေႃႈ။
၁၉ ဢုဝ်ႇၸိယၼၼ်ႉတေႃးသႃႉၸႂ်မႆႈဢွၵ်ႇလႄႈယိပ်းၵမ်ပလၢင်ႇႁႂ်ႈလႆႈဢဝ်ၼၢမ်ႇသႃႇတုတ်ႇၽႆးယူႇဢေႃႈ။ၼႂ်းမိူဝ်ႈဢၼ်မၼ်းယင်းတိုၵ်ႉၸႂ်မႆႈၶႆႈၸႃႉတီႈယိတ်ႉပရေႃးႁိၵ်ႈၸိူဝ်းၼၼ်ႉယူႇၼၼ်ႉၸိုင်တုတ်ႈပေႃႇဢွၵ်ႇမႃးၵႃႈတီႈၼႃႈၽၢၵ်ႇမၼ်းၵႃႈတီႈၽၢႆႇၼႃႈယိတ်ႉပရေႃးႁိၵ်ႈၸိူဝ်းၼၼ်ႉၵႃႈၼႂ်းႁိူၼ်းထႃႇဝရႃႉၽြႃးၵႃႈတီႈႁိမ်းယိတ်ႉပလၢင်ႇတီႈဢၼ်ဢဝ်ၼၢမ်ႇသႃႇတုတ်ႇၽႆးၼၼ်ႉၵမ်းလဵဝ်ဢေႃႈ။
၂၀ ၶုၼ်ယိတ်ႉပရေႃးႁိၵ်ႈဢႃႇၸရိဢိၵ်ႇတင်းယိတ်ႉပရေႃးႁိၵ်ႈၵႃႈမီးၸိူဝ်းၼၼ်ႉလူတူၺ်းလႄႈႁၼ်တုတ်ႈၸပ်းၵႃႈတီႈၼႃႈၽၢၵ်ႇမၼ်းၼၼ်ႉသေယဝ်ႉဢွၼ်ၵၼ်ဢီးမၼ်းဢွၵ်ႇၵႂႃႇၵႃႈတီႈၼွၵ်ႈသေဢေႃႈ။မၼ်းၵေႃႈဢွၵ်ႇၶၼ်ၶၼ်ၽႂႂ်းၽႂ်းၵွပ်ႈပိူဝ်ႈထႃႇဝရႃႉၽြႃးပၼ်တၢမ်ႇတီႈမၼ်းၼၼ်ႉဢေႃႈ။ၼင်ႇၼၼ်လႄႈၶုၼ်လူင်ဢုဝ်ႇၸိယၼၼ်ႉပဵၼ်တုတ်ႈတေႃႇထိုင်ႁွတ်ႈထၼ်ႈပေႃးတၢႆလႄႈလႆႈယူႇၵႃႈတီႈႁေႃလင်ၼိုင်ႈၶေႃၶေႃႁင်းၵူၺ်းမၼ်းဢေႃႈ။
၂၁ မၼ်းဢမ်ႇလႆႈဢၶႂၢင်ႉဢၼ်လႆႈၶဝ်ႈၵႃႈၼႂ်းႁိူၼ်းထႃႇဝရႃႉၽြႃး။ယုဝ်ႇထမ်ႇလုၵ်ႈၸၢႆးၸဝ်ႈၼၼ်ႉလႆႈဢုပ်ႉၵႃႈၼိူဝ်ႁေႃၸဝ်ႈလႄႈၸီႇယၢင်ႇဢမူႉၵူၼ်းဝၢၼ်ႈၵူၼ်းမိူင်းတင်းလၢႆဢေႃႈ။
၂၂ လွင်ႈတၢင်းဢုဝ်ႇၸိယဢၼ်ယင်းၵိုတ်းယင်းၵျၢၼ်ႇဢဝ်ၸဵမ်ငဝ်ႈတေႃႇပၢႆၸိူဝ်းၼၼ်ႉၸိုင်ပရေႃးၽႅတ်ႈဢိသႃႇယလုၵ်ႈၸၢႆးဢႃႇမုတ်ႉၼၼ်ႉတႅမ်ႈဝႆႉမီးယူႇဢေႃႈ။
၂၃ ဢုဝ်ႇၸိယၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈၶဝ်ဢွၼ်ၵၼ်ဢဝ်သၢင်းၵျူဝ်ႇလူၺ်ႈၵၼ်တင်းပူႇမၼ်းမွၼ်ႇမၼ်းၸိူဝ်းၼၼ်ႉၵႃႈၼႂ်းၵႂၵ်ႉလိၼ်ဢၼ်ၸၢပ်ႈသႅင်ႇၵၼ်တင်းသၢင်းၶႅင်းၶုၼ်ႁေႃၶမ်းၸိူဝ်းၼၼ်ႉၵူၺ်းၵွပ်ႈပိူဝ်ႈဢၼ်မၼ်းပဵၼ်ၵူၼ်းတုတ်ႈၼၼ်ႉဢေႃႈ။ယုဝ်ႇထမ်ႇလုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။