Chapter
၃၅
ယုဝ်ႇသိယႁဵတ်းပွႆးပတ်ႉသၶႃႇ
၁ လၢႆးသမ်ႉယုဝ်ႇသိယၶၢမ်ႇပွႆးပႃသၶႃႇပုၼ်ႈထႃႇဝရႃႉၽြႃးၵႃႈၼႂ်းဝဵင်းယေႇရုသလႅမ်ႇလႄႈၼႂ်းလိူၼ်ပထမသိပ်းသီႇဝၼ်းၼၼ်ႉၶဝ်ဢွၼ်ၵၼ်ဢဝ်သူဝ်းဢွၼ်ႇပႃသၶႃႇတၢႆဢေႃႈ။
၂ မၼ်းၶၢၼ်းယိတ်ႉပရေႃးႁိၵ်ႈတင်းလၢႆဝႆႉၵႃႈၼႂ်းဢရႃႇၶဝ်လႄႈတိုၵ်းယူင်းၸဝ်းဢဝ်ၶဝ်ႁႂ်ႈၶဝ်ပွင်ႁဵတ်းဢမူႉႁိူၼ်းထႃႇဝရႃႉၽြႃးဢေႃႈ။
၃ မၼ်းမီးဢမိင်ႉတီႈၵူၼ်းမဵဝ်းလေႇဝိဢၼ်သင်ႇသွၼ်မဵဝ်းဢိသရေႇလဢၼ်လႆႈမူတ်းၸၢင်ႇပုၼ်ႈထႃႇဝရႃႉၽြႃးၸိူဝ်းၼၼ်ႉလႄႈဝႃႈ၊-ဢွၼ်ၵၼ်ဢဝ်တိူၵ်ႈတႃႇၸဝ်ႈဢၼ်မူတ်းၸၢင်ႇၼၼ်ႉသႂၢင်းသႂ်ႇဝႆႉၵႃႈၼႂ်းႁိူၼ်းၸဝ်ႈဢၼ်သေႃးလမုၼ်ႇလုၵ်ႈၸၢႆးတႃႇဝိတ်ႉၶုၼ်ႁေႃၶမ်းဢိသရေႇလတႄႇႁဵတ်းဝႆႉၼၼ်ႉတႃႉ။ၵမ်းလိုၼ်းတၵ်းဢမ်ႇလႆႈပဵၼ်ၶူဝ်းႁၢပ်ႇၶူဝ်းပႃးၵႃႈၼိူဝ်ႁူဝ်မႃႇသူယဝ်ႉ။မိူဝ်ႈလဵဝ်ၼႆႉၸိုင်သူဢွၼ်ၵၼ်ပွင်ႁဵတ်းဢမူႉထႃႇဝရႃႉၽြႃးၽြႃးပဵၼ်ၸဝ်ႈသူဢိၵ်ႇတင်းဢမူႉၵူၼ်းမၼ်းၸဝ်ႈမဵဝ်းဢိသရေႇလၼၼ်ႉတႃႉ။
၄ ၸွမ်းၵႃႈၼင်ႇဢၼ်တႃႇဝိတ်ႉၶုၼ်ႁေႃၶမ်းဢိသရေႇလတင်းလုၵ်ႈၸၢႆးၸဝ်ႈသေႃးလမုၼ်ႇတႅမ်ႈဝႆႉၼၼ်ႉဢွၼ်ၵၼ်မႄးႁႅၼ်းတူဝ်သူၸွမ်းလူၺ်ႈမဵဝ်းပူႇမဵဝ်းပေႃႈသူ
၅ ၵႃႈၼင်ႇဢၼ်ပဵၼ်မုၵ်ႉပဵၼ်ၸိူဝ်းဢၼ်ၸုၵ်းယူႇၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈႁင်းၽႂ်ႁင်းမၼ်းသေလႄႈႁႂ်ႈမဵဝ်းပူႇမဵဝ်းပေႃႈၵူၼ်းမဵဝ်းလေႇဝိယေႈပုၼ်ႈပဵၼ်ပုၼ်ႈယေႈမဵဝ်းႁင်းၽႂ်ႁင်းမၼ်းၼၼ်ႉတႃႉ။
၆ ၼင်ႇၼၼ်လႄႈဢွၼ်ၵၼ်ဢဝ်သူဝ်းဢွၼ်ႇပႃသၶႃႇတၢႆလႄႈႁႂ်ႈတူဝ်သူမူတ်းၸၢင်ႇသေလႄႈမႄးႁႅၼ်းပီႈၼွင်ႉသူၸိူဝ်းၼၼ်ႉဝႆႉႁႂ်ႈလႆႈႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးဢဝ်မုဝ်းသေႇလႄႈသင်ႇလၢတ်ႈဝႆႉၼၼ်ႉတႃႉ၊ဝႃႈၼင်ႇၼႆဢေႃႈ။
၇ ယုဝ်ႇသိယဢဝ်သူဝ်းဢွၼ်ႇပေႉဢွၼ်ႇၵႃႈၼႂ်းၽုင်သူဝ်းၽုင်းပေႉသၢမ်ႇမိုၼ်ႇဢိၵ်ႇတင်းဝူဝ်းသၢမ်ႁဵင်ဢၢပ်ႈပၼ်ၵူၼ်းဝၢၼ်ႈၵူၼ်းမိူင်းၵႃႈဢၼ်ၸူႉတုမ်တင်းသဵင်ႈတင်းလူင်ၼၼ်ႉႁႂ်ႈပဵၼ်ပုၼ်ႈတၢင်းပုၵ်ႉၸေႃႇပႃသၶႃႇဢေႃႈ။ဢၼ်ၸိူဝ်းၼၼ်ႉၸမ်းပဵၼ်ၶွင်ၶူဝ်းၶုၼ်ႁေႃၶမ်းဢေႃႈ။
၈ မူးမၢတ်ႈၽွင်းမိူင်းမၼ်းတင်းလၢႆၵေႃႈဢွၼ်ၵၼ်မီးၸႂ်ၸေႇတၼႃႇသေလႄႈပၼ်တီႈၵူၼ်းတင်းလၢႆဢိၵ်ႇတင်းယိတ်ႉပရေႃးႁိၵ်ႈတင်းလၢႆတင်းၵူၼ်းမဵဝ်းလေႇဝိၸိူဝ်းၼၼ်ႉဢေႃႈ။ႁိလၶိ၊ၸႃႇၶရိ၊ယေႇႁေႇလဢၼ်ဢုပ်ႉၵႃႈၼိူဝ်ႁိူၼ်းၽြႃးပဵၼ်ၸဝ်ႈၸိူဝ်းၼၼ်ႉၵေႃႈဢွၼ်ၵၼ်ဢဝ်သူဝ်းပေႉသွင်ႁဵင်ပၢႆႁူၵ်းပၢၵ်ႇတင်းဝူဝ်းသၢမ်ပၢၵ်ႇဢၢပ်ႈပၼ်တီႈယိတ်ႉပရေႃးႁိၵ်ႈတင်းလၢႆပုၼ်ႈတႃႇတၢင်းပုၵ်ႉၸေႃႇပႃသၶႃႇဢေႃႈ။
၉ ၵေႃႇၼၼိဢိၵ်ႇတင်းသေႇမႃႇယတင်းၼႃႇသၼေႇလဢၼ်ပဵၼ်ၼွင်ႉၸၢႆးမၼ်းႁႃႇသပိ၊ယေႇယေႇၸ၊ယေႃႇသပတ်ႉဢၼ်ပဵၼ်ငဝ်ႈပဵၼ်ႁူဝ်ၵူၼ်းမဵဝ်းလေႇဝိၸိူဝ်းၼၼ်ႉၵေႃႈဢွၼ်ၵၼ်ဢဝ်တၢင်းပုၵ်ႉၸေႃႇယိၸ်ႉႁႃႈႁဵင်တင်းဝူဝ်းႁႃႈပၢၵ်ႇဢၢပ်ႈပၼ်တီႈၵူၼ်းမဵဝ်းလေႇဝိတင်းလၢႆႁႂ်ႈပဵၼ်ပုၼ်ႈတၢင်းပုၵ်ႉၸေႃႇပႃသၶႃႇဢေႃႈ။
၁၀ ၼင်ႇၼၼ်လႄႈၶဝ်ဢွၼ်ၵၼ်မႄးႁႅၼ်းပုၼ်ႈဢၼ်တၵ်းႁဵတ်းဝၢတ်ႈလႄႈယိတ်ႉပရေႃးႁိၵ်ႈၸိူဝ်းၼၼ်ႉဢွၼ်ၵၼ်ၸုၵ်းယူႇၵႃႈၼႂ်းတီႈယူႇၶဝ်သေလႄႈၵူၼ်းမဵဝ်းလေႇဝိၸိူဝ်းၼၼ်ႉၵေႃႈဢွၼ်ၵၼ်ႁဵတ်းပဵၼ်မုၵ်ႉပဵၼ်ၸိူဝ်းယူႇၸွမ်းၵႃႈၼင်ႇဢၼ်ဢမိင်ႉၶုၼ်ႁေႃၶမ်းမီးၼၼ်ႉဢေႃႈ။
၁၁ ၶဝ်ဢွၼ်ၵၼ်ဢဝ်သူဝ်းဢွၼ်ႇပႃသၶႃႇတၢႆလႄႈယိတ်ႉပရေႃးႁိၵ်ႈၸိူဝ်းၼၼ်ႉဢွၼ်ၵၼ်ဢဝ်လိူတ်ႈဢၼ်ၶဝ်ႁပ်ႉၶၢမ်ႇဢဝ်ၵႃႈတီႈမိုဝ်းၶဝ်ၼၼ်ႉၽႅတ်းသႂ်ႇယူႇၵူၼ်းမဵဝ်းလေႇဝိၸိူဝ်းၼၼ်ႉၵေႃႈဢွၼ်ၵၼ်လွၵ်ႈၼင်မၼ်းယူႇဢေႃႈ
၁၂ ၶဝ်ဢွၼ်ၵၼ်ၽႄဢဝ်ယိၸ်ႉဢၼ်တုတ်ႇၽႆးတင်းလၢႆမႅင်ႇပၼ်ၸွမ်းလူၺ်ႈဢၼ်မဵဝ်းပူႇမဵဝ်းပေႃႈၵူၼ်းဝၢၼ်ႈၵူၼ်းမိူင်းတင်းလၢႆလႆႈၶၢမ်ႇတၢင်းဢၼ်ၽႄဝႆႉႁင်းၽႂ်ႁင်းမၼ်းႁႂ်ႈလႆႈပုၵ်ႉၸေႃႇတီႈထႃႇဝရႃႉၽြႃးမႅၼ်ႈၸွမ်းၵႃႈၼင်ႇဢၼ်တႅမ်ႈဝႆႉၵႃႈၼႂ်းၵျၢမ်းလိၵ်ႈမုဝ်းသေႇၼၼ်ႉဢေႃႈ။ဝူဝ်းတင်းလၢႆၵေႃႈၶဝ်ဢဝ်ႁဵတ်းၸိူဝ်ႉၼင်ႇၼၼ်ဢေႃႈ။
၁၃ ၶဝ်ဢွၼ်ၵၼ်ဢဝ်သူဝ်းဢွၼ်ႇပႃသၶႃႇပိငႆ်ႈးႁၢငႆ်းးၸွမ်းၵႃႈၼင်ႇဢၼ်ထုင်းိင်ႈတြႃးမီးၼၼ်ႉလႄႈဢဝ်ၶိူင်ႈပုၵ်ႉၸေႃႇတၢင်းဢၼ်မူတ်းၸၢင်ႇၸိူဝ်းၼၼ်ႉတူမ်ႈၵႃႈၼႂ်းမေႃႈလိၼ်၊မေႃႈလဵၵ်းဢွမ်လဵၵ်းသေလႄႈဢဝ်ၽႄမႅင်ႇပၼ်တီႈၵူၼ်းတင်းသဵင်ႈတင်းလူင်ၶၼ်ၶၼ်ၽႂ်းၽႂ်းဢေႃႈ။
၁၄ လိုၼ်းၼၼ်ႉၶဝ်ဢွၼ်ၵၼ်မႄးႁဵတ်းမႄးႁႅၼ်းပုၼ်ႈတူဝ်ၸဝ်ႈၵဝ်ႇဢိၵ်ႇတင်းပုၼ်ႈယိတ်ႉပရေႃးႁိၵ်ႈတင်းလၢႆဢေႃႈ။ၵွပ်ႈပိူဝ်ႈဢၼ်ယိတ်ႉပရေႃးႁိၵ်ႈၵူၼ်းမဵဝ်းဢႃႇရုၼ်ႇၸိူဝ်းၼၼ်ႉပုၵ်ႉၸေႃႇယိၸ်ႉဢၼ်တုတ်ႇၽႆးဢိၵ်ႇတင်းၵွၼ်ႈၶႆႈၵွၼ်ႈမၼ်းယူႇတေႃႇထိုင်ႁွတ်ႈၶိင်ႇႁူဝ်ၶမ်ႈလႄႈၵူၼ်းမဵဝ်းလေႇဝိၸိူဝ်းၼၼ်ႉလႆႈဢွၼ်ၵၼ်မႄးႁဵတ်းမႄးႁႅၼ်းပုၼ်ႈတူဝ်ၸဝ်ႈၵဝ်ႇဢိၵ်ႇတင်းပုၼ်ႈယိတ်ႉပရေႃးႁိၵ်ႈၵူၼ်းမဵဝ်းဢႃႇရုၼ်ႇၸိူဝ်းၼၼ်ႉဝႆႉဢေႃႈ။
၁၅ ၽူႈႁဵတ်းၵႂၢမ်းဢၼ်ပဵၼ်ၵူၼ်းမဵဝ်းဢႃႇသပ်ႉၸိူဝ်းၼၼ်ႉဢွၼ်ၵၼ်မီးယူႇၵႃႈၼႂ်းတီႈယူႇၶဝ်ၸွမ်းၵႃႈၼင်ႇဢၼ်တႃႇဝိတ်ႉ၊ဢႃႇသပ်ႉ၊ႁေႇမၼ်ႇတင်းယေႇတုသုၼ်ႇဢၼ်ႁူပွင်ႇတႃလႅင်းတီႈၶုၼ်ႁေႃၶမ်းၸိူဝ်းၼၼ်ႉၸီႇယၢင်ႇဝႆႉၼၼ်ႉဢေႃႈ။ၵူၼ်းပႂ်ႉၽၵ်းတူၸိူဝ်းၼၼ်ႉၵေႃႈဢွၼ်ၵၼ်မီးယူႇၵႃႈတီႈႁူးၽၵ်းတူၽႂ်ႁူးၽၵ်းတူမၼ်းလႄႈဢမ်ႇလႆႈၶႆႉဢွင်ႈၶႆႉတီႈၶဝ်ၵွပ်ႈပိူဝ်ႈပီႈၼွင်ႉၶဝ်ၵူၼ်းမဵဝ်းလေႇဝိၸိူဝ်းၼၼ်ႉဢွၼ်ၵၼ်မႄးႁႅၼ်းပုၼ်ႈၶဝ်ယူႇဢေႃႈ။
၁၆ ၶဝ်ဢွၼ်ၵၼ်မႄးႁဵတ်းမႄးႁႅၼ်းဝၢတ်ႈဢၼ်လႆႈႁဵတ်းတီႈထႃႇဝရႃႉၽြႃးၼႂ်းဝၼ်းၼၼ်ႉၵမ်းလဵဝ်ႈႁႂ်ႈလႆႈၶၢမ်ႇပွႆးပႃသၶႃႇလႄႈပုၵ်ႉၸေႃႇယိၸ်ႉဢၼ်တုတ်ႇၽႆးၵႃႈၼိူ်ဝ်ယိတ်ႉပလၢင်ႇထႃႇဝရႃႉၽြႃးၸွမ်းၵႃႈၼင်ႇဢၼ်ၶုၼ်လူင်ယုဝ်ႇသိယမီးဢမိင်ႉၼၼ်ႉဢေႃႈ။
၁၇ ၵူၼ်းမဵဝ်းဢိသရေႇလဢၼ်ၸူႉၵၼ်တုမ်ၵၼ်ၸိူဝ်းၼၼ်ႉဢွၼ်ၵၼ်ၶၢမ်ႇပွႆးပႃသၶႃႇဢိၵ်ႇတင်းပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၸဵတ်းဝၼ်းတဵမ်တဵမ်ၼႂ်းၶိင်ႇမိူဝ်ႈၼၼ်ႉဢေႃႈ။
၁၈ ပွႆးဢၼ်မိူၼ်ၸိူဝ်ႉၼင်ႇပွႆးပႃသၶႃႇဢၼ်ယုဝ်ႇသိယတင်းယိတ်ႉပရေႃးႁိၵ်ႈလႂ်ၵူၼ်းမဵဝ်းလေႇဝိလႂ်ၵူၼ်းမိူင်းယုတတင်းၵူၼ်းမိူင်းဢိသရေႇလဢၼ်ၸူႉတုမ်လႂ်၊ၵူၼ်းဝဵင်းယေႇရုသလႅမ်ႇလႂ်ၶၢမ်ႇၼၼ်ႉၸႃႉၸဵမ်ၸူဝ်ႈပၢၼ်ပရေႃးၽိတ်ႈသမုၺ်ႇလၼၼ်ႉဢမ်ႇတွၼ်ႉၶၢမ်ႇၵႃႈတီႈသိုင်ႇၸိုင်ႈဝၢၼ်ႈမိူင်းဢိသရေႇလၼၼ်ႉသပွေၵ်ႈ။ပွႆးပႃသၶႃႇၸိူဝ်ႉၼင်ႇၼၼ်ၼၼ်ႉၸိုင်ၶုၼ်ႁေႃၶမ်းဢိသရေႇလတင်းလၢႆဢမ်ႇတွၼ်ႉလႆႈၶၢမ်ႇမႃးသေၵေႃႉသေၵူၼ်း။
၁၉ ၼႂ်းပီႊဢၼ်ယုဝ်ႇသိယၸၢမ်ႇႁၢင်ႈၸၢမ်ႇႁေႃသိပ်းပၢႆပႅတ်ႈပီႊၼၼ်ႉၶဝ်ဢွၼ်ၵၼ်ၶၢမ်ႇပွႆးပႃႇသၶႃႇၼၼ်ႉဢေႃႈ။
ယုဝ်ႇသိယတၢႆ
၂၀ လိုၼ်းၼၼ်ႉမိူဝ်ႈဢၼ်ယုဝ်ႇသိယမႄးၵုမ်းမႄးႁဵတ်းပိၵ်ႉမၢၼ်ႇၸဝ်ႈယဝ်ႉၼၼ်ႉၸိုင်ၼေႇၶေႃႇၶုၼ်ႁေႃၶမ်းဢေႇၵႅပ်ႉတုၶီႇသိုၵ်းၶိုၼ်ႈၸူးၵႃႈတီႈဝဵင်းၶႃႇသေႇမိတ်ႉၵႃႈတီႈႁိမ်းၼမ်ႉႁွင်ႈဢုၽရတ်ႉၼၼ်ႉလႄႈယုဝ်ႇသိယဢွၵ်ႇၵႂႃႇႁႂ်ႈလႆႈႁႄႉၶႅၼ်မၼ်းဢေႃႈ။
၂၁ မၼ်းပွႆႇၸႂ်ႉတမၢၼ်ႇတင်းလၢႆမႃးတီႈမၼ်းလႄႈလၢတ်ႈဝႃႈ၊-ၶုၼ်ႁေႃၶမ်းယုတဢိူၺ်း။မႂ်းၸၢပ်ႈသႅင်ႇၵၼ်တင်းၵဝ်ၸိူဝ်ႉၼင်ႇႁိုဝ်။ၵဝ်ၶီႇသိုၵ်းၸူးတီႈမႂ်းဝၼ်းမိူဝ်ႈၼႆႉဢမ်ႇၸႂ်ႈ။ၵဝ်ၶီႇသိုၵ်းၸူးတီႈၶဝ်ၸိူဝ်းဢၼ်တိုၵ်းတေႃးၵၼ်တင်းၵဝ်ၼၼ်ႉဢေႃႈ။ၽြႃးပဵၼ်ၸဝ်ႈသင်ႇလၢတ်ႈဝႆႉႁႂ်ႈၵဝ်ႁဵတ်းၶၼ်ၶၼ်ၽႂ်းၽႂ်းယဝ်ႉ။ယႃႇပေႁဵတ်းၶတ်းၵၼ်တင်းၽြႃးပဵၼ်ၸဝ်ႈဢၼ်မီးယူႇၽၢႆႇၵဝ်ၼႆႉၼၼ်ႉသေၵမ်း။ပေႃးဢမ်ႇၼၼ်မၼ်းၸဝ်ႈတၵ်းယႃႉမႂ်းပႅတ်ႈဢေႃႈ၊ဝႃႈၼင်ႇၼႆဢေႃႈ။
၂၂ ၵူၺ်းၵႃႈယုဝ်ႇသိယၼၼ်ႉဢမ်ႇဝၢႆႇၼႃႈၶိုၼ်းမိူဝ်း။မၼ်းယႃႉႁၢင်ႊယႃႉၽၢင်မၼ်းသေလႄႈႁႂ်ႈလႆႈတိုၵ်းသိုၵ်းၵၼ်တင်းမၼ်းဢေႃႈ။မၼ်းဢမ်ႇထွမ်ႇဢမ်ႇဢဝ်ၵႂၢမ်းဢၼ်ၼေႇၶေႃႇဢဝ်တင်းဢမိင်ႉၽြႃးပဵၼ်ၸဝ်ႈလႄႈသင်ႇလၢတ်ႈၼၼ်ႉလႄႈမၼ်းၶဝ်ႈၵႃႈၼႂ်းပွႆးသိုၵ်းၵႃႈတီႈပၢင်ႇႁူၺ်ႈမေႇၵိတ်ႉတေႃႇဢေႃႈ။
၂၃ ႁူဝ်ႁၢၼ်ၵူၼ်းသိုၵ်းဢၼ်ယိပ်းၵမ်ၵၢင်ႇၸိူဝ်းၼၼ်ႉပိုတ်းယိုဝ်းသႂ်ႇၶုၼ်လူင်ယုဝ်ႇသိယလႄႈထုၵ်ႇမႅၼ်ႈသေဢေႃႈ။ၶုၼ်လူင်လၢတ်ႈတီႈၶႃႈမၼ်းၵူၼ်းမၼ်းလႄႈဝႃႈ၊-ဢဝ်ၵဝ်ဢွၵ်ႇၵႂႃႇတႃႉ။ၵဝ်လႆႈၶၢမ်ႇတၢင်းဢၼ်တိူဝ်ႉမၢတ်ႇဢၼ်ၸဵပ်းၼႃႇလူင်လၢင်ယဝ်ႉ၊ဝႃႈၼင်ႇၼႆလႄႈၶႃႈမၼ်းၵူၼ်းမၼ်းၸိူဝ်းၼၼ်ႉဢွၼ်ၵၼ်ဢဝ်မၼ်းၶျႃးလူင်းသေၵႃႈၼိူဝ်လေႃႉရထႃးမၼ်းလႄႈတၢင်ႇၵႃႈၼိူဝ်လေႃႉရထႃးတုတိယသေယဝ်ႉဢဝ်မၼ်းၵႂႃႇၵႃႈတီႈဝဵင်းယေႇရုသလႅမ်ႇလႄႈမၼ်းႁွတ်ႈဢၼိၵ်ႉၸႃႉသေဢေႃႈ။
၂၄ မၼ်းၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းသၢင်းၶႅင်းပူႇမွၼ်ႇမၼ်းတင်းလၢႆဢေႃႈ။ၵူၼ်းမိူင်းယုတတင်းၵူၼ်းဝဵင်းယေႇရုသလႅမ်ႇတင်းသဵင်ႈတင်းလူင်ဢွၼ်ၵၼ်ႁဵတ်းတၢင်းဢၼ်ႁႆႈႁွင်ႉပွင်ႉၶၢင်းၵွပ်ႈပိူဝ်ႈယုဝ်ႇသိယၼၼ်ႉဢေႃႈ။
၂၅ ယေႇရမိၵေႃႈၸီႇယၢင်ႇၸၢပ်ႈၵႂၢမ်းဢၼ်ပွင်ႉၶၢင်းပွင်ႉမိုၼ်ဝႆႉလႄႈမေႈယိင်းၵူၼ်းၸၢႆးဢၼ်မေႃႁဵတ်းၵႂၢမ်းၵႃႈမီးၼၼ်ႉဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်းယုဝ်ႇသိယယူႇသေလႄႈသုင်းသွင်ႇၵႂၢမ်းဢၼ်ပွင်ႉၶၢင်းပွင်ႉမိုၼ်တေႃႇထိုင်ႁွတ်ႈဝၼ်းမိူဝ်ႈၼႆႉလႄႈႁႂ်ႈပဵၼ်ထုင်းပဵၼ်ိင်ႈတီႈမဵဝ်းဢိသရေႇလယူႇဢေႃႈ။ၵႂၢမ်းၼၼ်ႉတႅမ်ႈဝႆႉမီးယူႇၵႃႈၼႂ်းလိၵ်ႈဢၼ်ပွင်ႉၶၢင်းပွင်ႉမိုၼ်ၼၼ်ႉဢေႃႈ။
၂၆ လွင်ႈတၢင်းယုဝ်ႇသိယဢၼ်ယင်းၵိုတ်းယင်းၵျၢၼ်ႇဢိၵ်ႇတင်းလွင်ႈတၢင်းဢၼ်မၼ်းႁဵတ်းၵျေးၸူးၸွမ်းၵႃႈၼင်ႇဢၼ်တႅမ်ႈဝႆႉမီးယူႇၵႃႈၼႂ်းၵျၢမ်းလိၵ်ႈပိင်းၺၢပ်ႈတိထႃႇဝရႃႉၽြႃး၊
၂၇ လွင်ႈတၢင်းဢၼ်မၼ်းၵမ်ၵျၢင်ႉၸဵမ်ငဝ်ႈတေႃႇပၢႆၸိူဝ်းၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇဢိသရေႇလတင်းရႃႇၸဝၢင်ႇယုတဢေႃႈ။