Chapter
၃၄
ယုဝ်ႇသိယၶိုၼ်းပွင်ၶိုၼ်းမႄးသၢင်ႈႁဵတ်း
၁ ယုဝ်ႇသိယၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈပႅတ်ႈပီႊလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်းယေႇရုသလႅမ်ႇသၢမ်သိပ်းပၢႆဢဵတ်းပီႊဢေႃႈ။
၂ မၼ်းႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈၸွမ်းသဵၼ်ႈတၢင်းဢၼ်တႃႇဝိတ်ႉၸဝ်ႈပေႃႈမၼ်းၸွမ်းၼၼ်ႉသေလႄႈဢမ်ႇဝေႈဢမ်ႇပိူင်ႈသေၵႃႈတီႈၽၢႆႇၶႂႃၽၢႆႇသၢႆႉ။
၃ ၼႂ်းပီႊဢၼ်ၸၢမ်ႇႁၢင်ႈၸၢမ်ႇႁေႃပႅတ်ႇပီႊၼၼ်ႉၼႂ်းမိူဝ်ႈဢၼ်ဢသၢၵ်ႈမၼ်းယင်းလဵၵ်ႉယင်းၼုမ်ႇၼၼ်ႉၸိုင်မၼ်းၸႃႉႁႃၽြႃးပဵၼ်ၸဝ်ႈၸဝ်ႈပေႃႈမၼ်းတႃႇဝိတ်ႉၼၼ်ႉဢေႃႈ။ၼႂ်းပီႊဢၼ်လႆႈသိပ်းသွင်ပီႊၼၼ်ႉမၼ်းၸႃႉပႄႇၽဵဝ်ႈပႅတ်ႈထႃႇၼႃႉတီႈသုင်လႂ်၊တူၼ်ႈဢႃႇသရလႂ်၊ရုၵ်ႉထူႉဢၼ်တွင်ႈႁဵတ်းၶၵ်းႁဵတ်းလႂ်၊ရုၵ်ႉထူႉဢၼ်သွၼ်းႁဵတ်းလေႃႇႁဵတ်းလႂ်ၸိူဝ်းၼၼ်ႉသေၵႃႈၼႂ်းမိူင်းယုတတင်းဝဵင်းယေႇရုသလႅမ်ႇဢေႃႈ။
၄ ၶဝ်ဢွၼ်ၵၼ်ၵိူၼ်ႇယႃႉယိတ်ႉပလၢင်ႇၽြႃးပႃႇလတင်းလၢႆတူၵ်းပႅတ်ႈၵႃႈတီႈၽၢႆႇၼႃႈမၼ်းလႄႈၼ်းလူမ်ႉရုၵ်ႉထူႉၵၢင်ဝၼ်းတင်းလၢႆဢၼ်တၢင်ႇဝႆႉၵႃႈတီႈဢၼ်သုင်ၵႃႈၼိူဝ်ယိတ်ႉပလၢင်ႇၸိူဝ်းၼၼ်ႉပႅတ်ႈဢေႃႈ။မၼ်းႁၵ်းႁိၵ်းတူၼ်ႈဢႃႇသရလႂ်၊ရုၵ်ႉထူႉဢၼ်တွင်ႈႁဵတ်းၶၵ်းႁဵတ်းလႂ်ဢိၵ်ႇတင်းရုၵ်ႉထူႉဢၼ်သွၼ်းႁဵတ်းလေႃႇႁဵတ်းလႂ်ၸိူဝ်းၼၼ်ႉသေလႄႈႁႂ်ႈပဵၼ်မုၼ်ႈပဵၼ်ၽွင်သေယဝ်ႉဢဝ်ၽၢဝ်ႇဢဝ်ပိုၼ်သႂ်ႇၵႃႈၼိူဝ်သၢင်းၶႅင်းၶဝ်ၸိူဝ်းဢၼ်ပုၵ်ႉၸေႃႇယိၸ်ႉတီႈၼၼ်ႉၸိူဝ်းၼၼ်ႉဢေႃႈ။
၅ မၼ်းဢဝ်လုပ်ႇယိတ်ႉပရေႃးႁိၵ်ႈတင်းလၢႆတုတ်ႇၽႆးၵႃႈၼိူဝ်ယိတ်ႉပလၢင်ႇၶဝ်ၸိူဝ်းၼၼ်ႉလႄႈႁႂ်ႈမိူင်းယုတတင်းဝဵင်းယေႇရုသလႅမ်ႇမူတ်းသ်ႂဢေႃႈ။
၆ မိူၼ်ၼင်ႇၼၼ်မၼ်းႁဵတ်းတီႈဝဵင်းတင်းလၢႆၵႃႈၼႂ်းလႅၼ်လိၼ်မၼႃႇသေႇ၊လိၼ်ဢေႇၽရိမ်ႇ၊လိၼ်သိမုၼ်ႇတေႃႇထိုင်ႁွတ်ႈလိၼ်ၼပ်ႉထလိၵႃႈၼႂ်းဝၢၼ်ႈလူႉဝဵင်းႁၢမ်းၸိူဝ်းၼၼ်ႉလႄႈ
၇ ႁၵ်းႁိၵ်းယိတ်ႉပလၢင်ႇတင်းလၢႆပႅတ်ႈ၊ဢဝ်တူၼ်ႈဢႃႇသရလႂ်ဢိၵ်ႇတင်းရုၵ်ႉထူႉဢၼ်တွင်ႈႁဵတ်းၶၵ်းႁဵတ်းလႂ်တွႆႇတမ်ပႅတ်ႈႁႂ်ႈပဵၼ်မုၼ်ႈပဵၼ်ၽွင်ၼ်းလူမ်ႉပႅတ်ႈရုၵ်ႉထူႉၵၢင်ဝၼ်းၵႃႈဢၼ်မီးၵႃႈၼႂ်းမိူင်းဢိသရေႇလတင်းသဵင်ႈတင်းမူတ်းၼၼ်ႉသေလႄႈၶိုၼ်းမိူဝ်းၵႂႃႇၵႃႈတီႈဝဵင်းယေႇရုသလႅမ်ႇသေဢေႃႈ။
၈ ၼႂ်းပီႊဢၼ်မၼ်းၸၢမ်ႇႁၢင်ၸၢမ်ႇႁေႃသိပ်းပၢႆပႅတ်ႈပီႊၼၼ်ႉမၼ်းႁႂ်ႈသိုင်ႇၸိုင်ႈဝၢၼ်ႈမိူင်းၸဝ်ႈတင်းပိၵ်ႉမၢၼ်ႇၸဝ်ႈမူတ်းသ်ႂသေယဝ်ႉပွႆႇၸႂ်ႉသႃႇၽၼ်ႇလုၵ်ႈၸၢႆးဢႃႇၸလိ၊မဵဝ်ႉဝုၼ်ႇမႃႇသေႇယ၊ဢတႂၢင်းဝုၼ်ႇယုဝ်းဢေႇလလုၵ်ႈၸၢႆးယေႃႇၶတ်ႉၸိူဝ်းၼၼ်ႉႁႂ်ႈလႆႈမႄးၵုမ်းမႄးႁဵတ်းႁိူၼ်းထႃႇဝရႃႉၽြႃးၽြႃးပဵၼ်ၸဝ်ႈမၼ်းဢေႃႈ။
၉ ၶဝ်ၼၼ်ႉၵႂႃႇၸူးၵႃႈတီႈၶုၼ်ယိတ်ႉပရေႃးႁိၵ်ႈႁိလၶိလႄႈဢဝ်ငိုၼ်းဢၼ်ၵူၼ်းတင်းလၢႆဢဝ်မႃးၵႃႈတီႈႁိူၼ်းၽြႃးပဵၼ်ၸဝ်ႈဢၼ်ၵူၼ်းမဵဝ်းလေႇဝိဢၼ်ပႂ်ႉၽၵ်းတူၸိူဝ်းၼၼ်ႉၶၢမ်ႇဢဝ်ၵႃႈတီႈမိုဝ်းၵူၼ်းမဵဝ်းမၼႃႇသေႇ၊ၵူၼ်းမဵဝ်းဢေႇၽရိမ်ႇ၊ၵူၼ်းမဵဝ်းဢိသရေႇလဢၼ်ၵိုတ်းဢၼ်ၵျၢၼ်ႇၵႃႈမီး၊ၵူၼ်းမဵဝ်းယုတ၊ၵူၼ်းမဵဝ်းပိၼ်ႇယႃႇမိၼ်ႇ၊ၵူၼ်းၶူးၵူၼ်းဝဵင်းယေႇရုသလႅမ်ႇတင်းသဵင်ႈတင်းလူင်ၸိူဝ်းၼၼ်ႉသေလႄႈ
၁၀ ဢဝ်ဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်သၢင်ႈဢၼ်ႁဵတ်းဢၼ်ဢုပ်ႉထိင်းၵႃႈၼိူဝ်ႁိူၼ်းထႃႇဝရႃႉၽြႃးယူႇၸိူဝ်းၼၼ်ႉသေယဝ်ႉၶဝ်ၼၼ်ႉဢွၼ်ၵၼ်မႅင်ႇပၼ်တီႈၶဝ်ၸိူဝ်းဢၼ်သၢင်ႈႁဵတ်းႁႂ်ႈလႆႈမႄးၵုမ်းမႄးႁဵတ်းႁိူၼ်းထႃႇဝရႃႉၽြႃးဢၼ်ဝႃႈ
၁၁ ၶဝ်ၸိူဝ်းဢၼ်မေႃတိၼ်မေႃမိုဝ်းလႂ်တင်းလၢၵ်ႈသမႃးလႂ်ပုၼ်ႈဢၼ်တၵ်းသိုဝ်ႉဢဝ်မၢၵ်ႇႁိၼ်ဢၼ်သပ်းယဝ်ႉထၢၵ်ႇယဝ်ႉဢိၵ်ႇတင်းၶိူင်ပတေူင်ၵွၼ်ပုၼ်ႈဢၼ်တၵ်းမႄးၵုမ်းမႄးႁဵတ်းလင်ဢၼ်ၶုၼ်ႁေႃၶမ်းယုတတင်းလၢႆယႃႉပႅတ်ႈၸိူဝ်းၼၼ်ႉဢေႃႈ။
၁၂ ၶဝ်ၸိူဝ်းဢၼ်သၢင်ႈႁဵတ်းၼၼ်ႉဢွၼ်ၵၼ်ပႂ်ႉသႅတ်ႈၸႃႇသေလႄႈသၢင်ႈႁဵတ်းဢေႃႈ။ၶဝ်ၸိူဝ်းဢၼ်ဢုပ်ႉၼိူဝ်ၶဝ်ၼၼ်ႉပဵၼ်ယႃႇႁတ်ႉတင်းဢေႃႇပတိၸိူဝ်ႉၶိူဝ်းမေႇရႃႇရိမဵဝ်းလေႇဝိ၊ၸႃႇၶရိတင်းမေႇသုလမ်ႇၸိူဝ်ႉၶိူဝ်းၵေႃႇႁတ်ႉၼၼ်ႉႁႂ်ႈလႆႈဢွၼ်ႁဵတ်းဢွၼ်သၢင်ႈဢိၵ်ႇတင်းၵူၼ်းမဵဝ်းလေႇဝိၵႃႈဢၼ်ၸၢင်ႊပဝ်ႇၸၢင်ႊႁႆႇမဵဝ်းတူႇရီႉယႃႇသေလႄႈႁဵတ်းၵႂၢမ်းၸိူဝ်းၼၼ်ႉဢေႃႈ။
၁၃ ၶဝ်ၼၼ်ႉလႆႈဢွၼ်ၵၼ်လူတူၺ်းဢုပ်ႉၵႃႈၼိူဝ်ၶဝ်ၸိူဝ်းဢၼ်လႆႈတေႃႉလႆႈႁၢပ်ႇၼၼ်ႉလႄႈဢွၼ်ႁဵတ်းဢွၼ်သၢင်ႈၶဝ်ၵႃႈဢၼ်လႆႈႁဵတ်းလႆႈသၢင်ႈမဵဝ်းတၢင်းႁဵတ်းၵူႈမဵဝ်းၸိူဝ်းၼၼ်ႉဢေႃႈ။ၵူၼ်းလေႇဝိၵမ်ႈၽွင်ႈၵေႃႈလႆႈႁဵတ်းၸရေးလႂ်ၵူၼ်းလူင်ဢၼ်ၸီႇယၢင်ႇတြႃးလႂ်၊ၵူၼ်းပႂ်ႉၽၵ်းတူလႂ်ဢေႃႈ။
ၶိုၼ်းထူပ်းႁၼ်ၵျၢမ်းပိင်းၺၢပ်ႈတိ
၁၄ မိူဝ်ႈဢၼ်ၶဝ်ဢဝ်ငိုၼ်းဢၼ်ဢဝ်မႃးၵႃႈတီႈႁိူၼ်းထႃႇဝရႃႉၽြႃးၼၼ်ႉဢွၵ်ႇၼၼ်ႉၸိုင်ယိတ်ႉပရေႃးႁိၵ်ႈႁိလၶိထူပ်းႁၼ်ၽိုၼ်ၵျၢမ်းလိၵ်ႈပိင်းၺၢပ်ႈတိဢၼ်ထႃႇဝရႃႉၽြႃးဢဝ်မုဝ်းသေႇတႅမ်ႈဝႆႉၼၼ်ႉလႄႈ၊ႁိလၶိၼၼ်ႉမွၵ်ႇလၢတ်ႈလွင်ႈဢၼ်ထူပ်းႁၼ်ၼၼ်ႉတီႈသႃႇၽၼ်ႇၸရေးၸဝ်ႈလႄႈဝႃႈ၊-
၁၅ ၵဝ်ထူပ်းႁၼ်ၽိုၼ်ၵျၢမ်းပိင်းၺၢပ်ႈတိၵႃႈၼႂ်းႁိူၼ်းထႃႇဝရႃႉၽြႃးယဝ်ႉ၊ဝႃႈၼင်ႇၼႆလႄႈႁိလၶိၼၼ်ႉဢဝ်ၵျၢမ်းလိၵ်ႈၼၼ်ႉဢၢပ်ႈပၼ်တီႈသႃႇၽၼ်ႇလႄႈသႃႇၽၼ်ႇၼၼ်ႉဢဝ်ၵျၢမ်းလိၵ်ႈၼၼ်ႉၵႂႃႇၸူးၵႃႈတီႈၶုၼ်ႁေႃၶမ်းသေလႄႈလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-
၁၆ တၢင်းႁဵတ်းၵႃႈဢၼ်ၸဝ်ႈႁဝ်းသင်ႇလၢတ်ႈတီႈၶႃႈၸဝ်ႈႁဝ်းၶဝ်ၼၼ်ႉၸိုင်ၶႃႈၸဝ်ႈႁဝ်းၶဝ်ဢွၼ်ၵၼ်ႁဵတ်းတီႈၶႃႈဢေႃႈ။
၁၇ ၶဝ်ဢဝ်ငိုၼ်းဢၼ်ထူပ်းႁၼ်ၵႃႈၼႂ်းႁိူၼ်းထႃႇဝရႃႉၽြႃးၼၼ်ႉဢွၵ်ႇသေယဝ်ႉဢဝ်ဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်ဢုပ်ႉထိင်းလႂ်ဢိၵ်ႇတင်းၶဝ်ၸိူဝ်းဢၼ်သၢင်ႈႁဵတ်းလႂ်ၼၼ်ႉၸိူဝ်းၼၼ်ႉတီႈၶႃႈယဝ်ႉ၊ဝႃႈၼင်ႇၼႆဢေႃႈ။
၁၈ ၸရေးလူင်သႃႇၽၼ်ႇသမ်ႉလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ယိတ်ႉပရေႃးႁိၵ်ႈႁိသၶိၼၼ်ႉဢဝ်ၽိုၼ်လိ်ၵ်ႈဢၢပ်ႈပၼ်တီႈၶႃႈၸဝ်ႈတီႈၶႃႈဢေႃႈ၊ဝႃႈၼင်ႇၼႆသေယဝ်ႉဢဝ်ၽတ်းႁွတ်ႈၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။
၁၉ ၶုၼ်ႁေႃၶမ်းငိၼ်းၵႂၢမ်းတြႃးၼၼ်ႉသေယဝ်ႉသိၵ်ႇၶူဝ်းၼုင်ႈမၼ်းလႄႈၶုၼ်ႁေႃၶမ်းမီးဢမိင်ႉတီႈယိတ်ႉပရေႃးႁိၵ်ႈႁိလၶိ၊ဢႁိၵမ်ႇလုၵ်ႈၸၢႆးသႃႇၽၼ်ႇ၊
၂၀ ဢႃႇပတုၼ်ႇလုၵ်ႈၸၢႆးမိၵ်ႉၶႃႇ၊သႃႇၽၼ်ႇၸရေးၸဝ်ႈ၊ဢသႃႇယၶႃႇၶုၼ်ႁေႃၶမ်းၸိူဝ်းၼၼ်ႉလႄႈဝႃႈ၊-
၂၁ သူဢွၼ်ၵၼ်ၵႂႃႇလႄႈလဝ်ႈထၢမ်တီႈထႃႇဝရႃႉၽြႃးလူၺ်ႈလွင်ႈၵႂၢမ်းၵျၢမ်းလိၵ်ႈဢၼ်ထူပ်းႁၼ်မိူဝ်ႈလဵဝ်ၼႆႉၼၼ်ႉပုၼ်ႈၵဝ်ဢိၵ်ႇတင်းပုၼ်ႈၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇတီႈမိူင်းဢိသရေႇလဢိၵ်ႇတင်းမိူင်းယုတတင်းလၢႆၼၼ်ႉသေၵမ်း။လွင်ႈမၼ်းၸမ်းၵွပ်ႈပိူဝ်ႈဢၼ်ပူႇမွၼ်ႇႁဝ်းၸိူဝ်းၼၼ်ႉယင်းဢမ်ႇထွမ်ႇဢမ်ႇဢဝ်ဢမိင်ႉထႃႇဝရႃႉၽြႃးႁႂ်ႈလႆႈၵမ်ၵျၢင်ႉၸွမ်းၵႃႈဢၼ်တႅမ်ႈဝႆႉၵႃႈၼႂ်းၵျၢမ်းလိၵ်ႈၼႆႉလႄႈယူႇၼၼ်ႉလႄႈတၢင်းၸႂ်မႆႈၶႆႈၸႃႉထႃႇဝရႃႉၽြႃးဢၼ်တူၵ်းႁွတ်ႈၵႃႈၼိူဝ်ႁဝ်းၼၼ်ႉပဵၼ်ဢၼ်ႁႅင်းယႂ်ႇၼႃႇလူင်လၢင်ဢေႃႈ၊ဝႃႈၼင်ႇၼႆဢေႃႈ။
၂၂ မိူဝ်ႈဢၼ်ႁိလၶိဢိၵ်ႇတင်းၶဝ်ၸိူဝ်းဢၼ်ၶုၼ်ႁေႃၶမ်းပွႆႇၸႂ်ႉၼၼ်ႉၶဝ်ဢွၼ်ၵၼ်ၵႂႃႇၸူးၵႃႈတီႈမေႈယိင်းပရေႃးၽိတ်ႈႁုလတဢၼ်ပဵၼ်မေးသႃႇလုမ်ႇဢၼ်ပဵၼ်ဝူၼ်ႇဢၼ်ပႂ်ႉလူပႂ်ႉထိင်းၶူဝ်းၼုင်ႈၸဝ်ႈဢၼ်ပဵၼ်လုၵ်ႈၸၢႆးတိၵဝ၊ဢၼ်ပဵၼ်လုၵ်ႈၸၢႆးရႃႇႁတ်ႉၼၼ်ႉလႄႈယူႇၵႃႈၼႂ်းဝဵင်းယေႇရုသလႅမ်ႇထၢပ်ႈၼွၵ်ႈၼၼ်ႉသေယဝ်ႉမွၵ်ႇလၢတ်ႈတီႈမၼ်းဢေႃႈ။
၂၃ မေႈယိင်းၼၼ်ႉၵေႃႈၶိုၼ်းလၢတ်ႈတီႈၶဝ်လႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလၼၼ်ႉမီးဢမိင်ႉလႄႈဝႃႈၸမ်း၊သူၶိုၼ်းမိူဝ်းလၢတ်ႈတီႈၵေႃႉဢၼ်ပွႆႇၸႂ်ႉသူမႃးတီႈၵဝ်ၼၼ်ႉလႄႈဝႃႈ၊-
၂၄ ၵဝ်တၵ်းႁႂ်ႈၽေးႁွတ်ႈထိုင်ၵႃႈၼိူဝ်တီႈၼႆႉဢိၵ်ႇတင်းၵႃႈၼိူဝ်ၵူၼ်းၵႃႈတီႈၼႆႉၵႃႈၼင်ႇၵႂၢမ်းဢၼ်ၵိၼ်ႇဝႃႈဢၼ်တႅမ်ႈဝႆႉၵႃႈၼႂ်းၵျၢမ်းလိၵ်ႈဢၼ်ၶဝ်လႆႈၽတ်းၵႃႈတီႈၽၢႆႇၼႃႇၶုၼ်ႁေႃၶမ်းယုတယဝ်ႉၼၼ်ႉတဵမ်ထူၼ်ႈဢေႃႈ။၂၅ လွင်ႈမၼ်းၸမ်းၶဝ်ဢွၼ်ၵၼ်ၸုၼ်ႉပႅတ်ႈၵဝ်လႄႈဢဝ်ၼၢမ်ႇသႃႇတုတ်ႇၽႆးတီႈၽြႃးတၢင်ႇသူႇတၢင်ႇပႃးႁႂ်ႈလႆႈဢဝ်လွင်ႈတၢင်းဢၼ်ၶဝ်ႁဵတ်းၸိူဝ်းၼၼ်ႉတိုၵ်းယူင်းတၢင်းၸႂ်မႆႈၶႆႈၸႃႉၵဝ်ယဝ်ႉ။ၵွပ်ႈပိူဝ်ႈၼင်ႇၼၼ်လႄႈၽႆးတၢင်းၸႂ်မႆႈၶႆႈၸႃႉၵဝ်ယင်းဢမ်ႇမွတ်ႇလႄႈတၵ်းလႆႈတူၵ်းႁွတ်ႈၵႃႈၼိူဝ်ၶဝ်ၵႃႈတီႈၼႆႉဢေႃႈ၊ဝႃႈၼင်ႇၼႆဝႆႉယဝ်ႉ၊ဝႃႈၼင်ႇၼႆတႃႉ။
၂၆ လၢႆးသမ်ႉသူတၵ်းလႆႈၶိုၼ်းလဝ်ႈလၢတ်ႈတီႈၶုၼ်ႁေႃၶမ်းယုတဢၼ်ပွႆႇၸႂ်ႉသူမႃးႁႂ်ႈလႆႈလဝ်ႈထၢမ်ႇတီႈထႃႇဝရႃႉၽြႃးၼၼ်ႉလႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလဢဝ်လွင်ႈၵႂၢမ်းၵျၢမ်းလိၵ်ႈဢၼ်ၸဝ်ႈလႆႈငိၼ်းၼၼ်ႉလႄႈမီးဢမိင်ႉလႄႈဝႃႈၸမ်း၊-
၂၇ ၵွပ်ႈပိူဝ်ႈဢၼ်မႂ်းမီးၸႂ်ဢၼ်ဢူၼ်ႈဢွၼ်ႇလႄႈၶျႃးတူၵ်းတူဝ်ၸဝ်ႈၵဝ်ႇတူၵ်းတႅမ်ႇၵႃႈတီႈၽၢႆႇၼႃႈၽြႃးပဵၼ်ၸဝ်ႈၼႂ်းမိူဝ်ႈဢၼ်မႂ်းငိၼ်းၵႂၢမ်းဢၼ်ၵဝ်လွၵ်ႇငိူတ်ႈတီႈထႃႇၼႃႉတီႈၼႆႉဢိၵ်ႇတင်းတီႈၵူၼ်းၵႃႈတီႈၼႆႉၸိူဝ်းၼၼ်ႉလႄႈမႂ်းသိၵ်ႇၶူဝ်းၼုင်ႈမႂ်းလႄႈႁႆႈႁွင်ႉၵႃႈတီႈၽၢႆႇၼႃႈၵဝ်ၼၼ်ႉလႄႈၵဝ်ထွမ်ႇဢဝ်ၵႂၢမ်းမႂ်းဢေႃႈ။ထႃႇဝရႃႉၽြႃးမီးဢမိင်ႉဢေႃႈ။ၵူၺ်းၵႃႈၵဝ်တၵ်းဢဝ်မႂ်းသူင်ႇႁွတ်ႈတီႈဢၼ်ပူႇမႂ်းမွၼ်ႇမႂ်းၸူႉတုမ်ၼၼ်ႉလႄႈမႂ်းတၵ်းလႆႈၶဝ်ၸူးၵႃႈတီႈသၢင်းၶႅင်းၼိမ်ၼိမ်လီလီဢေႃႈ။
၂၈ တႃမႂ်းတၵ်းလႆႈတူၺ်းလႆႈႁၼ်ၽေးၵႃႈဢၼ်ၵဝ်ႁႂ်ႈႁွတ်ႈထိုင်ၵႃႈၼိူဝ်ႈတီႈၼႆႉဢိၵ်ႇတင်းၶဝ်ၸိူဝ်းဢၼ်ယူႇၵႃႈတီႈၼႆႉၼၼ်ႉဢေႃႈ၊ဝႃႈၼင်ႇၼႆဝႆႉယဝ်ႉ၊ဝႃႈၼင်ႇၼႆတႃႉ၊ဝႃႈၼင်ႇၼႆလႄႈၶဝ်ၼၼ်ႉၵေႃႈဢွၼ်ၵၼ်ၶိုၼ်းလဝ်ႈလၢတ်ႈတီႈၶုၼ်ႁေႃၶမ်းဢေႃႈ။
၂၉ မိူဝ်ႈၼၼ်ႉၶုၼ်ႁေႃၶမ်းပွႆႇၸႂ်ႉလႄႈႁႂ်ႈၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမိူင်းယုတတင်းၵူၼ်းဝဵင်းယေႇရုသလႅမ်ႇတင်းသဵင်ႈတင်းလူင်ဢွၼ်ၵၼ်ၸူႉၵၼ်တုမ်ၵၼ်မႃးလႄႈၶုၼ်ႁေႃၶမ်းၶိုၼ်ႈၵႃႈၼိူဝ်ႁိူၼ်းထႃႇဝရႃႉၽြႃးဢိၵ်ႇလူၺ်ႈၵၼ်တင်းၵူၼ်းမိူင်းယုတတင်းၵူၼ်းဝဵင်းယေႇရုသလႅမ်ႇတင်းသဵင်ႈတင်းလူင်၊
၃၀ ယိတ်ႉပရေႃးႁိၵ်ႈလႂ်၊ၵူၼ်းမဵဝ်းလေႇဝိလႂ်၊ၵူၼ်းတင်းသဵင်ႈတင်းလူင်ၸဵမ်လဵၵ်ႉၸဵမ်ယႂ်ႇၸိူဝ်းၼၼ်ႉလႄႈဢဝ်ၵႂၢမ်းၵျၢမ်းလိၵ်ႈပတိၺိၼ်ႇတြႃးဢၼ်ထူပ်းႁၼ်ၵႃႈတီႈႁိူၼ်းထႃႇဝရႃႉၽြႃးၵႃႈမီးၼၼ်ႉၽတ်းဢၢၼ်ႇႁႂ်ႈႁူၶဝ်လႆႈငိၼ်းဢေႃႈ။
၃၁ ၶုၼ်ႁေႃၶမ်းၵေႃႈၸုၵ်းယူႇၵႃႈၼႂ်းတီႈၼၼ်ႉသေလႄႈႁဵတ်းတိၵ်ႉထၢၼ်ႇၵႃႈတီႈၽၢႆႇၼႃႈထႃႇဝရႃႉၽြႃးလူၺ်ႈလွင်ႈဢၼ်မၼ်းတၵ်းၸွမ်းလင်ထႃႇဝရႃႉၽြႃးလႄႈဢဝ်ႁူဝ်ၸႂ်သဵင်ႈသဵင်ႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးမၼ်းၸဝ်ႈ၊သၢၵ်ႈသေႇမၼ်းၸဝ်ႈထုငိ်းင်ႈတြႃးမၼ်းၸဝ်ႈၸိူဝ်းၼၼ်ႉသေလႄႈၵမ်ၵျၢင်ႉၸွမ်းၵႂၢမ်းပတိၺိၼ်ႇဢၼ်ပႃးၵႃႈၼႂ်းၵျၢမ်းလိၵ်ႈၼႆႉၼၼ်ႉဢေႃႈ။
၃၂ မၼ်းၸီႇယၢင်ႇႁႂ်ႈၶဝ်ၵႃႈဢၼ်လႆႈထူပ်းလႆႈႁၼ်လႄႈယူႇၵႃႈၼႂ်းဝဵင်းယေႇရုသလႅမ်ႇတင်းလႅၼ်လိၼ်ပိၼ်ႇယႃႇမိၼ်ႇၸိူဝ်းၼၼ်ႉႁပ်ႉတုင်းဢဝ်ၵႂၢမ်းၼၼ်ႉဢေႃႈ။ၵူၼ်းဝဵင်းယေႇရုသလႅမ်ႇၸိူဝ်းၼၼ်ႉၵေႃႈဢွၼ်ၵၼ်ၵမ်ၵျၢင်ႉၸွမ်းပတိၺိၼ်ႇတြႃးၽြႃးပဵၼ်ၸဝ်ႈဢၼ်ပဵၼ်ၽြႃးပဵၼ်ၸဝ်ႈပူႇမွၼ်ႇၶဝ်ၼၼ်ႉဢေႃႈ။
၃၃ ယုဝ်ႇသိယပႄႇၽဵဝ်ႈပႅတ်ႈလွင်ႈတၢင်းဢၼ်လီႁင်ႈဢဵတ်ႇသဵတ်ႇၵႃႈမီးၸိူဝ်းၼၼ်ႉသေၵႃႈၼႂ်းမိူင်းဢၼ်ၵူၼ်းမဵဝ်းဢိသရေႇလပိူင်ႇၵူႈတီႈၵူႈလႅၼ်ၼၼ်ႉလႄႈၸီႇယၢင်ႇႁႂ်ႈၶဝ်ၸိူ်ဝ်းဢၼ်ယူႇၵႃႈၼႂ်းမိူင်းဢိသရေႇလတင်းလၢႆၼၼ်ႉႁဵတ်းဝၢတ်ႈဢၼ်ဝႃႈဝၢတ်ႈတီႈထႃႇဝရႃႉၽြႃးၽြႃးပဵၼ်ၸဝ်ႈၶဝ်ၼၼ်ႉတဵမ်တဵမ်ထူၼ်ႈထူၼ်ႈၵႃႈၼႂ်းၸူဝ်ႈပၢၼ်မၼ်းၼၼ်ႉဢေႃႈ။ၶဝ်ၼၼ်ႉယင်းဢမ်ႇသုတ်ႈၶိုၼ်းယိုတ်းၶိုၼ်းသေၵႃႈတီႈတၢင်းဢၼ်ၸွမ်းလင်ထႃႇဝရႃႉၽြႃးၽြႃးပဵၼ်ၸဝ်ႈပူႇၶဝ်မွၼ်ႇၶဝ်ၼၼ်ႉလႄႈယူႇဢေႃႈ။