Chapter
၂၅
ဢႃႇမၸိပဵၼ်ၶုၼ်ႁေႃၶမ်းယုတ
၁ ဢႃႇမၸိၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈသၢဝ်းႁႃႈပီႊလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်းယေႇရုသလႅမ်ႇသၢဝ်းၵဝ်ႈပီႊဢေႃႈ။ၸိုဝ်သဵင်မေးၸဝ်ႈၸမ်းပဵၼ်ယုတ်ႉတၼ်ႇၵူၼ်းယိင်းဝဵင်းယေႇရုသလႅမ်ႇဢေႃႈ။
၂ မၼ်းႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးသေၵေႃႈႁူဝ်ၸႂ်မၼ်းဢမ်ႇၸေးဢမ်ႇၸုမ်ႇ။
၃ မိူဝ်ႈဢၼ်သိုင်ႇၸိုင်ႈဝၢၼ်ႈမိူင်းတႄႇယူႇတီႈမၼ်းယဝ်ႉၼၼ်ႉၸိုင်မၼ်းဢဝ်ၶႃႈၵူၼ်းမၼ်းဢၼ်ဢဝ်ၸဝ်ႈပေႃႈမၼ်းတၢႆၸိူဝ်းၼၼ်ႉတၢႆပႅတ်ႈဢေႃႈ။
၄ ၵူၺ်းၵႃႈမၼ်းဢမ်ႇဢဝ်လုၵ်ႈၸၢႆးၶဝ်တၢႆလႄႈမၼ်းၸွမ်းပိင်းၺၢပ်ႈတြႃးဢၼ်တႅမ်ႈဝႆႉမီးယူႇၵႃႈၼႂ်းၵျၢမ်းလိၵ်ႈပိင်းၺၢပ်ႈတိမုဝ်းသေႇဢၼ်ထႃႇဝရႃႉၽြႃးမီးဢမိင်ႉဝႆႉဝႃႈ၊-ပေႃႈတၵ်းဢမ်ႇလႆႈၶၢမ်ႇတၢႆတၢင်တူဝ်လုၵ်ႈလၢင်းလုၵ်ႈလၢင်းတၵ်းဢမ်ႇလႆႈၶၢမ်ႇတၢင်တူဝ်ပေႃႈ။ၵူႈၵေႃႉၵူႈၵူၼ်းတၵ်းလႆႈၶၢမ်ႇတၢႆၵွပ်ႈပိူဝ်ႈဢပျႅတ်ႈတူဝ်ၸဝ်ႈၵဝ်ႇၵူၺ်းဢေႃႈ၊ဝႃႈၼင်ႇၼႆၼၼ်ႉဢေႃႈ။
၅ ဢႃႇမလိၼၼ်ႉႁႂ်ႈၵူၼ်းမဵဝ်းယုတတင်းလၢႆၸူႉၵၼ်တုမ်ၵၼ်လႄႈၸွမ်းလူၺ်ႈပီႈၼွင်ႉၸိူဝ်ႉၶိူဝ်းၶဝ်ၼၼ်ႉမၼ်းၶၢၼ်းၶဝ်ႁႂ်ႈလႆႈဢုပ်ႉၵႃႈၼိူဝ်ၵူၼ်းယေႈႁဵင်ၵႃႈၼိူဝ်ၵူၼ်းယေႈပၢၵ်ႇၵႃႈၼႂ်းၵူၼ်းမဵဝ်းယုတတင်းၵူၼ်းပိၼ်ႇယႃႇမိၼ်ႇၸိူဝ်းၼၼ်ႉဢေႃႈ။မၼ်းၼပ်ႉဢၢၼ်ႇၶဝ်ၸိူဝ်းဢၼ်ၸႃႉၸဵမ်ဢသၢၵ်ႈလႆႈသၢဝ်းၼိုင်ႈလႄႈဢသၢၵ်ႈလိူဝ်သၢဝ်းၵႂႃႇၸိူဝ်းၼၼ်ႉလႄႈလႆႈထူပ်းႁၼ်မီးၶဝ်ၸိူဝ်းဢၼ်တတ်ႈၼိုင်ႇလႆႈႁႂ်ႈလႆႈဢွၵ်ႇၵႂႃႇတိုၵ်းသိုၵ်းလႄႈၸၢင်ႊယိပ်းႁွၵ်ႇတင်းၶိူင်ႈႁႄႉလၢၵ်ႈၼၢၵ်ႈၼၼ်ႉသၢမ်သႅၼ်ဢေႃႈ။
၆ ႁူဝ်ႁၢၼ်ၵူၼ်းသိုၵ်းဢိသရေႇလဢၼ်ႁႅင်းယႂ်ႇၼႃႇသႅၼ်ၼိုင်ႈၵေႃႈမၼ်းဢဝ်တင်းငိုၼ်းပၢၵ်ႇတလၢၼ်ႇတၢၼ်ႇၸၢင်ႈငႃးဢဝ်ဝႆႉဢေႃႈ။
၇ ၵူၺ်းၵႃႈၵူၼ်းၽြႃးပဵၼ်ၸဝ်ႈၵေႃႉၼိုင်ႈမႃးတီႈမၼ်းလႄႈဝႃႈ၊-ၸဝ်ႈၶုၼ်လူင်ဢိူၺ်း။ယႃႇပေႁႂ်ႈတပ်ႉဢိသရေႇလတင်းလၢႆၸွမ်းလူၺ်ႈၵၼ်တင်းၸဝ်ႈႁဝ်း။ထႃႇဝရႃႉၽြႃးဢမ်ႇမီးလူၺ်ႈၵၼ်တင်းၵူၼ်းမဵဝ်းဢိသရေႇလဢၼ်ဝႃႈၵူၼ်းမဵဝ်းဢေႇၽရိမ်ႇၸိူဝ်းၼၼ်ႉ။
၈ ပေႃႈၸဝ်ႈၶုၼ်လူင်ၵႂႃႇလႄႈတိုၵ်းတေႃးႁတ်းႁတ်းႁၢၼ်ႁၢၼ်သေၵေႃႈၽြႃးပဵၼ်ၸဝ်ႈတၵ်းႁႂ်ႈၸဝ်ႈႁဝ်းတူၵ်းသုမ်းၵႃႈတီႈၽၢႆႇၼႃႈရၢၼ်ႇသူႇဢေႃႈ။ၽြႃးပဵၼ်ၸဝ်ႈၼၼ်ႉတတ်ႈၼိုင်ႇလႆႈႁႂ်ႈလႆႈယုၵ်ႉယွင်ႈဢိၵ်ႇတင်းႁႂ်ႈလႆႈၶျႃးတူၵ်းတီႈတႅမ်ႇယူႇဢေႃႈ၊ဝႃႈၼင်ႇၼႆဢေႃႈ။
၉ ဢႃႇမၸိထၢမ်တီႈၵူၼ်းၽြႃးပဵၼ်ၸဝ်ႈၼၼ်ႉလႄႈဝႃႈ၊-ငိုၼ်းပၢၵ်ႇတလၢၼ်ႇတၢၼ်ႇဢၼ်ၵဝ်လႆႈဢဝ်ၸၢင်ႈငႃးတပ်ႉဢိသရေႇလမႃးယဝ်ႉၼၼ်ႉတၵ်းလႆႈႁဵတ်းၸိူဝ်ႉၼင်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်ၵူၼ်းၽြႃးပဵၼ်ၸဝ်ႈၼၼ်ႉၶိုၼ်းလၢတ်ႈလႄႈဝႃႈ၊-ၽြႃးပဵၼ်ၸဝ်ႈပၼ်လႆႈဢၼ်ယိင်ႈၶႅၼ်းလိူဝ်တွၼ်းၼႃႇသေၼၼ်ႉယူႇဢေႃႈ၊ဝႃႈၼင်ႇၼႆဢေႃႈ။
၁၀ မိူဝ်ႈၼၼ်ႉဢႃႇမၸိၽႄဢဝ်ႁူဝ်ႁၢၼ်ၵူၼ်းသိုၵ်းဢၼ်လုၵ်ႉသေၵႃႈတီႈမိူင်းဢေႇၽရိမ်ႇမႃးၸိူဝ်းၼၼ်ႉလႄႈပွႆႇႁႂ်ႈၶဝ်ၶိုၼ်းမိူဝ်းၵႂႃႇၵႃႈတီႈတီႈယူႇတီႈသဝ်းၶဝ်ၼၼ်ႉဢေႃႈ။ၶဝ်ၸိူဝ်းၼၼ်ႉၸႂ်မႆႈၶႆႈၸႃႉၼႃႇလူင်လၢင်လႄႈဝႆႉတၢင်းၽိတ်းတီႈၵူၼ်းမိူင်းယုတတင်းလၢႆသေလႄႈဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈတီႈယူႇတီႈသဝ်းၶဝ်ဢေႃႈ။
၁၁ ဢႃႇမၸိၵေႃႈႁႂ်ႈတူဝ်ၸဝ်ႈၵဝ်ႇမၼ်ႈၶိူင်ႇလႄႈဢွၼ်ႁူဝ်ၵူၼ်းမၼ်းတင်းလၢႆၶီႇသိုၵ်းဢွၵ်ႇၸူးၵႃႈတီႈပၢၵ်ႇႁူၺ်ႈၵိူဝ်သေယဝ်ႉတိုၵ်းတေႃးယႃႉပႅတ်ႈၵူၼ်းလွႆၸိရမိုၼ်ႇၼိုင်ႈဢေႃႈ။
၁၂ ၵူၼ်းမဵဝ်းယုတတင်းလၢႆတီႉလႆႈၵူၼ်းလိပ်းမိုၼ်ႇၼိုင်ႈသေယဝ်ႉဢွၼ်ၵၼ်ဢဝ်ၶဝ်ၵႂႃႇၵႃႈတီႈပၢႆၸိၵ်းလွႆမၢၵ်ႇႁိၼ်သေလႄႈဢီးၶဝ်တူၵ်းသေၵႃႈၼိူဝ်ပၢႆၸိၵ်းလွႆမၢၵ်ႇႁိၼ်ၼၼ်ႉၵႂႃႇႁႂ်ႈၶဝ်ထၼ်ႈပေႃးႁၵ်းပေႃးလႅဝ်ဢေႃႈ။
၁၃ ႁူဝ်ႁၢၼ်ၵူၼ်းသိုၵ်းဢၼ်ဢႃႇမၸိပွႆႇမိူ်ဝ်းၵႂႃႇလႄႈဢမ်ႇပၼ်ဢၶႂၢင်ႉဢၼ်လႆႈၸွမ်းလူၺ်ႈၵၼ်တင်းမၼ်းၵႂႃႇတိုၵ်းသိုၵ်းၸိူဝ်းၼၼ်ႉၸမ်းဢွၼ်ၵၼ်တိုၵ်းတေႃးဝဵင်းယုတတင်းလၢႆဢဝ်ၵႃႈတီႈၸႃႉၸဵမ်ဝဵင်းသမႃႇရိတေႃႇထိုင်ႁွတ်ႈဝဵင်းပိတ်ႉႁေႃႇရုၼ်ႇသေလႄႈဢဝ်ၵူၼ်းသၢမ်ႁဵင်တၢႆလႄႈသိမ်းဢဝ်ၶွင်ၶူဝ်းဢၼ်ႁိမ်လႆႈၼၼ်ႉၼမ်ၼႃႇဢေႃႈ။
၁၄ ဢႃႇမၸိၼၼ်ႉမိူဝ်ႈဢၼ်လုၵ်ႉသေၵႃႈတီႈဢၼ်ၶႃႈၽၼ်းဢဝ်တၢႆၵူၼ်းမဵဝ်းဢေႇတုမ်ႇၸိူဝ်းၼၼ်ႉသေယဝ်ႉၶိုၼ်းမႃးၼၼ်ႉၸိုင်မၼ်းဢဝ်ၽြႃးဢၼ်ၵူၼ်းလွႆၸိရတင်းလၢႆၵူဝ်းၵႂၢႆႇၼၼ်ႉမႃးလႄႈတႄႇတင်ႈဝႆႉႁႂ်ႈလႆႈပဵၼ်ၽြႃးတီႈဢၼ်မၼ်းၵူဝ်းၵႂၢႆႇၼၼ်ႉသေယဝ်ႉၶုပ်ႉမူပ်ႇဝၢင်းႁူဝ်ၵႃႈတီႈၽၢႆႇၼႃႈၶဝ်ၼၼ်ႉလႄႈဢဝႆ်းတုတ်ႇၼၢမ်ႇသႃႇဢေႃႈ။
၁၅ ပိူဝ်ႈၼႆလႄႈထႃႇဝရႃႉၽြႃးၸႂ်မႆႈၶႆႈၸႃႉတီႈဢႃႇမၸိလႄႈပွႆႇၸႂ်ႉပရေႃးၽိတ်ႈၵေႃႉၼိုင်ႈမႃးတီႈမၼ်းလႄႈလၢတ်ႈတီႈမၼ်းလႄႈဝႃႈ၊-ၵွပ်ႈပိူဝ်ႈၸိူူဝ်ႉၼင်ႇႁိုဝ်လႄႈၸဝ်ႈႁဝ်းသွၼ်ႈပိုင်ႈၽြႃးၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ဢမ်ႇၵႄႇသႄႇၼုၵ်ႈဢဝ်ၵူၼ်းၶဝ်ဢွၵ်ႇသေၵႃႈၼႂ်းမိူင်းၸဝ်ႈႁဝ်းလႆႈၸိူဝ်းၼၼ်ႉၶႃႈ၊ဝႃႈၼင်ႇၼႆဢေႃႈ။
၁၆ ၼႂ်းမိူဝ်ႈဢၼ်မၼ်းၼၼ်ႉယင်းတိုၵ်ႉလဝ်ႈလၢတ်ႈယူႇၼၼ်ႉၸိုင်ၶုၼ်ၼၼ်ႉၶိုၼ်းလၢတ်ႈလႄႈဝႃႈ၊-ႁဝ်းၶၢၼ်းမႂ်းပဵၼ်မူးမၢတ်ႈဢၼ်တိူင်ႇပၢင်ႇၵၼ်တင်းၶုၼ်ႁေႃၶမ်းႁိုဝ်။ပေႃးတႃႉ။ပေႃးဢမ်ႇၼၼ်ၵဝ်တေဢဝ်မႂ်းလူမ်ႉတၢႆဢေႃႈ၊ဝႃႈၼင်ႇၼႆလႄႈပရေႃးၽိတ်ႈၼၼ်ႉၵေႃႈၶိုၼ်းလၢတ်ႈလႄႈဝႃႈ၊-ၶႃႈၸဝ်ႈႁူႉႁၼ်လွင်ႈဢၼ်ၽြႃးပဵၼ်ၸဝ်ႈၶိုင်ပွင်တၵ်းလႆႈယႃႉၽဵဝ်ၸဝ်ႈၶုၼ်လူင်ပႅတ်ႈၵွပ်ႈပိူဝ်ႈဢၼ်ၸဝ်ႈၶုၼ်လူင်ႁဵတ်းဢမူႉၼႆႉလႄႈယင်းဢမ်ႇထွမ်ႇဢမ်ႇဢဝ်ၵႂၢမ်းဢၼ်ၶႃႈၸဝ်ႈပၼ်သတိယူႇၼၼ်ႉဢေႃႈ၊ဝႃႈၼင်ႇၼႆဢေႃႈ။
၁၇ လိုၼ်းၼၼ်ႉဢႃႇမၸိၶုၼ်ႁေႃၶမ်းယုတၼၼ်ႉတိူင်ႇပၢင်ႇၵၼ်တင်းၽူႈတိူင်ႇပၢင်ႇၸိူဝ်းၼၼ်ႉသေယဝ်ႉမၼ်းပွႆႇၸႂ်ႉၵႂႃႇၸူးၵႃႈတီႈၶုၼ်ႁေႃၶမ်းဢိသရေႇလၼၼ်ႉလႄႈသင်ႇလၢတ်ႈၵႂႃႇဝႃႈ၊-မႃးလႄႈတေႃႇၼႃႈႁူပ်ႉထူပ်းၵၼ်တင်းၵဝ်တႃႉ၊ဝႃႈၼင်ႇၼႆဢေႃႈ။
၁၈ ယႁေႃႇသၶုၼ်ႁေႃၶမ်းဢိသရေႇလၶိုၼ်းသင်ႇလၢတ်ႈမႃးတီႈဢႃႇမၸိၶုၼ်ႁေႃၶမ်းယုတလႄႈဝႃႈ၊-တူၼ်ႈၼၢမ်လေႇပၼုၼ်ႇပွႆႇၸႂ်ႉၵႂႃႇၵႃႈတီႈတူၼ်ႈဢႃႇရိတ်ႉလေႇပၼုၼ်ႇလႄႈဝႃႈ၊-ဢဝ်လုၵ်ႈယိင်းမႂ်းပၼ်ၵၼ်တင်းလုၵ်ႈၸၢႆးၵဝ်တႃႉ၊ဝႃႈၼင်ႇၼႆလႄႈတူဝ်ထိူၼ်ႇႁၢႆႉလေႇပၼုၼ်ႇတူဝ်ၼိုင်ႈတႆႇတၢင်းပႆတၢင်းၵႂႃႇလႄႈယဵပ်ႇမႅၼ်ႈတူၼ်ႈၼၢမ်ၼၼ်ႉဢေႃႈ။
၁၉ မႂ်းဝႃႈ၊-ၵဝ်ၼႆႉတိုၵ်းတေႃးယႃႉပႅတ်ႈၵူၼ်းဢေႇတုမ်ႇၸိူဝ်းၼၼ်ႉယဝ်၊ႉဝႃႈၼင်ႇၼႆသေလႄႈမႂ်းမီးၸႂ်တၢင်းဢၼ်ၶႂ်ႈဢုပ်ႇဢၢတ်ႇသုင်ၼႃႇဢေႃႈ။ယူႇၵႃႈတီႈႁိူၼ်းမႂ်းၼိမ်ၼိမ်လီလီတႃႉ။ႁဵတ်းသင်မႂ်းႁႃဢမူႉၽေးဢၼ်တၵ်းႁွတ်ႈထိုင်ၵႃႈတီႈမႂ်းလႄႈႁဵတ်းႁႂ်ႈမႂ်းလႆႈလူမ်ႉတူၵ်းပႃးလူၺ်ႈၵၼ်တင်းမိူင်းယုတ၊ဝႃႈၼင်ႇၼႆဢေႃႈ။
၂၀ ၵူၺ်းၵႃႈဢႃႇမၸိဢမ်ႇထွမ်ႇဢမ်ႇဢဝ်ၵႂၢမ်းၼၼ်ႉ။လွင်ႈမၼ်းၸမ်းလွင်ႈတၢင်းၼၼ်ႉပဵၼ်မႃးတီႈၽြႃးပဵၼ်ၸဝ်ႈႁႂ်ႈမၼ်းၸဝ်ႈလႆႈဢဝ်ၶဝ်ဢၢပ်ႈၵႃႈၼႂ်းမိုဝ်းရၢၼ်ႇသူႇၵွပ်ႈပိူဝ်ႈၶဝ်သွၼ်ႈပိုင်ႈၽြႃးဢေႇတုမ်ႇၸိူဝ်းၼၼ်ႉဢေႃႈ။
၂၁ ယႁေႃႇသၶုၼ်ႁေႃၶမ်းဢိသရေႇလၶီႇသိုၵ်းၶိုၼ်ႈၸူးလႄႈတေႃႇၼႃႈႁူပ်ႉထူပ်းၵၼ်တင်းဢႃႇမၸိၵႃႈတီႈပၢင်ႇပဵင်းပိတ်ႉသမေိတ်ႉမိူင်းယုတၼၼ်ႉသေယဝ်ႉ၊
၂၂ မဵဝ်းယုတတူၵ်းသုမ်းၵႃႈတီႈၽၢႆႇၼႃႈမဵဝ်းဢိသရေႇလလႄႈဢွၼ်ၵၼ်ဢွၵ်ႇပၢႆႈၸူးၵႃႈတီႈသုမ်ႉထဵင်တီႈယူႇတီႈသဝ်းၶဝ်ႁင်းၽႂ်ႁင်းမၼ်းဢေႃႈ။
၂၃ ယႁေႃႇသၶုၼ်ႁေႃၶမ်းဢိသရေႇလၼၼ်ႉတီႉလႆႈဢႃႇမၸိၶုၼ်ႁေႃၶမ်းယုတဢၼ်ပဵၼ်လုၵ်ႈၸၢႆးယေႃႇသလုၵ်ႈၸၢႆးယေႇႁေႃႇႁတ်ႉၼၼ်ႉၵႃႈတီႈဝဵင်းပိတ်ႉသေမိတ်ႉလႄႈဢဝ်ၵႂႃႇၸူးၵႃႈတီႈဝဵင်းယေႇရုသလႅမ်ႇသေယဝ်ႉၵိူၼ်ႇယႃႉလမ်းဝဵင်းယေႇရုသလႅမ်ႇပႅတ်ႈသီႇပၢၵ်ႇသွၵ်ႇဢဝ်ၵႃႈတီႈၽၵ်းတူဢေႇၽရိမ်ႇတေႃႇထိုင်ႁွတ်ႈၽၵ်းတူၸဵင်ႇဝဵင်းဢေႃႈ။
၂၄ မၼ်းသိမ်းဢဝ်ၸႃႉၸဵမ်ငိုၼ်းၶမ်းလႄႈၶိူင်ႈပိူင်ၵႃႈဢၼ်ထူပ်းႁၼ်ၵႃႈၼႂ်းမိူင်းဢုဝ်ႇပိတ်ႉဢေႇတုမ်ႇၵႃႈတီႈႁိူၼ်းၽြႃးပဵၼ်ၸဝ်ႈဢိၵ်ႇတင်းၽၼ်ႇတႃႇႁေႃၸဝ်ႈတင်းၶဝ်ၸိူဝ်းဢၼ်တီႉမတ်ႉလႆႈၵမ်ႈၽွင်ႈၼၼ်ႉသေလႄႈၶိုၼ်းမိူဝ်းၵႂႃႇၵႃႈတီႈဝဵင်းသမႃႇရိဢေႃႈ။
၂၅ လိုၼ်းသယေႁေႃႇသလုၵ်ႈၸၢႆးယေႃႇၶတ်ႉၶုၼ်ႁေႃၶမ်းဢိသရေႇလတၢႆယဝ်ႉၼၼ်ႉဢႃႇမၸိလုၵ်ႈၸၢႆးယေႃႇသၶုၼ်ႁေႃၶမ်းယုတၼၼ်ႉဢသၢၵ်ႈလိပ်းယူႇသိပ်းႁႃႈပီႊလူးၵွၼ်ႇဢေႃႈ။
၂၆ လွင်ႈတၢင်းဢႃႇမၸိဢၼ်ယင်းၵိုတ်းယင်းၵျၢၼ်ႇဢဝ်ၸဵမ်ငဝ်ႈတေႃႇပၢႆၸိူဝ်းၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇယုတတင်းရႃႇၸဝၢင်ႇဢိသရေႇလဢေႃႈ။
၂၇ ၸႃႉၸဵမ်မိူဝ်ႈဢၼ်ဢႃႇမၸိယင်းဢမ်ႇၸွမ်းလင်ထႃႇဝရႃႉၽြႃးလႄႈဝႄႈပိူင်ႈၵႂႃႇၼၼ်ႉၶဝ်ဢွၼ်ၵၼ်လွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းမၼ်းၵႃႈၼႂ်းဝဵင်းယေႇရူႉသလႅမ်ႇလႄႈမၼ်းလႆႈဢွၵ်ႇပၢႆႈၵႂႃႇၵႃႈတီႈဝဵင်းလႃႇၶိသလႄႈၶဝ်ဢွၼ်ၵၼ်ပွႆႇၸႂ်ႉၸွမ်းၵႂႃႇၵႃႈတီႈဝဵင်းလႃႇၶိသလႄႈဢဝ်မၼ်းတၢႆၵႃႈတီႈၼၼ်ႉသေယဝ်ႉ၊
၂၈ ဢဝ်မၼ်းတၢင်ႇၵႃႈၼိူဝ်မႃႉသေလႄႈမႃးၵႃႈတီႈဝဵင်းယေႇရုသလႅမ်ႇလႄႈဢဝ်မၼ်းသၢင်းၵျူဝ်ႇလူၺ်ႈၵၼ်တင်းပူႇမၼ်းမွၼ်ႇမၼ်းတင်းလၢႆၵႃႈၼႂ်းဝဵင်းၸဝ်ႈမိူင်းယုတၼၼ်ႉဢေႃႈ။