Chapter
၁၉
၁ ယုဝ်ႇသၽတ်ႉၶုၼ်ႁေႃၶမ်းယုတၶိုၼ်းမႃးၸူးၵႃႈတီႈႁေႃၸဝ်ႈၵႃႈတီႈဝဵင်းယေႇရုသလႅမ်ႇၼိမ်ၼိမ်လီလီဢေႃႈ။
၂ ယေႇႁုလုၵ်ႈၸၢႆးႁႃႇၼၼိဢၼ်ပဵၼ်ၵေႃႉဢၼ်ႁူပွင်ႇတႃႇလႅင်းၼၼ်ႉဢွၵ်ႇမႃးႁပ်ႉႁူဝ်တၢင်းၶုၼ်လူင်ယုဝ်ႇသၽတ်ႉလႄႈလဝ်ႈလၢတ်ႈတီႈမၼ်းလႄႈဝႃႈ၊-ၸဝ်ႈၶုၼ်လူင်ထုၵ်ႇလီၸွႆႈထႅမ်ၶဝ်ၸိူဝ်းဢၼ်ဢမ်ႇတြႃးၼၼ်ႉတီႈၶႃႈႁိုဝ်။ထုၵ်ႇလီႁၵ်ႉၶဝ်ၸိူဝ်းဢၼ်ၸင်းထႃႇဝရႃႉၽြႃးၼၼ်ႉတီႈၶႃႈႁိုဝ်။ၵွပ်ႈပိူဝ်ႈတီႈႁဵင်းၼႆႉလႄႈတၢင်းၸႂ်မႆႈၶႆႈၸႃႉထႃႇဝရႃႉၽြႃးတူၵ်းႁွတ်ႈၵႃႈၼိူဝ်ၸဝ်ႈၶုၼ်လူင်တီႈၶႃႈယဝ်ႉ။
၃ ၼႂ်းဝႃႈၼၼ်သေၵေႃႈၵွပ်ႈပိူဝ်ႈဢၼ်ၶုၼ်လူင်ပႄႇၽဵဝ်ႈတူၼ်ႈဢႃႇသရတင်းလၢႆပႅတ်ႈသေၵႃႈၼႂ်းမိူင်းတင်းမိူင်းလႄႈၶျႃးၸႂ်ႁႂ်ႈလႆႈႁႃၽြႃးပဵၼ်ၸဝ်ႈၼၼ်ႉလႄႈယင်းမီးလွင်ႈတၢင်းဢၼ်လီဢၼ်ငၢမ်းၵႃႈၼႂ်းၶုၼ်လူင်ယူႇတီႈၶႃႈဢေႃႈဝႃႈၼင်ႇၼႆဢေႃႈ။
ယုဝ်ႇသၽတ်ႉပဵၼ်ၽူႈဢၼ်ၸီႇယၢင်ႇတြႃး
၄ လိုၼ်းၼၼ်ႉယုဝ်ႇသၽတ်ႉယူႇၵႃႈၼႂ်းဝဵင်းယေႇရုသလႅမ်ႇဢေႃႈ။လၢႆးသမ်ႉမၼ်းဢွၵ်ႇသလေႄႇလဵပ်ႈၵႃႈၼႂ်းၵူၼ်းဝၢၼ်ႈၵူၼ်းမိူင်းတင်းလၢႆဢဝ်ၵႃႈတီႈၸႃႉၸဵမ်ဝဵင်းပေႇရသေႇၽတေႃႇထိုင်ႁွတ်ႈႁၢၼ်ႉလွႆဢေႇၽရိမ်ႇလႄႈႁႂ်ႈၶဝ်ၶိုၼ်းဝၢႆႇၸူးၵႃႈတီႈထႃႇဝရႃႉၽြႃးၽြႃးပဵၼ်ၸဝ်ႈပူႇမွၼ်ႇၶဝ်ၼၼ်ႉဢေႃႈ။
၅ မၼ်းၶၢၼ်းၵူၼ်းလူင်ဢၼ်ၸီႇယၢင်ႇတြႃးတင်းလၢႆဝႆႉၵႃႈတီႈဝဵင်းဢၼ်မၼ်ႈၶိူင်ႇၵႃႈၼႂ်းမိူင်းယုတၵႃႈမီးႁင်းၽႂ်ႁင်းမၼ်းလႄႈသင်ႇလၢတ်ႈဝႆႉတီႈၵူၼ်းလူင်ဢၼ်ၸီႇယၢင်ႇတြႃးၸိူဝ်းၼၼ်ႉလႄႈဝႃႈ၊-ဢွၼ်ၵၼ်ႁဵတ်းသတိလူၺ်ႈလွင်ႈဢၼ်သူႁဵတ်းၼၼ်ႉတႃႉ။
၆ သူဢွၼ်ၵၼ်ပႂ်ႉဢမူႉၵူၼ်းသေလႄႈၸီႇယၢင်ႇတြႃးဢမ်ႇၸႂ်ႈ။သူဢွၼ်ၵၼ်ပႂ်ႉဢမူႉထႃႇဝရႃႉၽြႃးသေလႄႈၸီႇယၢင်ႇလႄႈမၼ်းၸဝ်ႈမီးယူႇလူၺ်ႈၵၼ်တင်းသူၼႂ်းလွင်ႈတၢင်းဢၼ်သူၸီႇယၢင်ႇၼၼ်ႉဢေႃႈ။
၇ ပိူဝ်ႈဢၼ်ပဵၼ်ၼင်ႇၼႆလႄႈႁႂ်ႈတၢင်းဢၼ်ရူဝ်ႇသေႇၵူဝ်ယမ်ထႃႇဝရႃႉၽြႃးၼၼ်ႉမီးတီႈသူတႃႉ။ဢွၼ်ၵၼ်ပႃးသတိလႄႈႁဵတ်းတႃႉ။ထႃႇဝရႃႉၽြႃးၽြႃးပဵၼ်ၸဝ်ႈႁဝ်းဢမ်ႇႁပ်ႉတၢင်းဢၼ်ႁဵတ်းဢမူႉဢၼ်ဢမ်ႇတြႃးတၢင်းဢၼ်ထွၵ်ႈလူၺ်ႈၼႃႈၵူၼ်း၊တၢင်းဢၼ်ၵိၼ်လၢၵ်ႈသွင်ႇသူးလၢပ်ႈၸိူဝ်းၼၼ်ႉ၊ဝႃႈၼင်ႇၼႆဢေႃႈ။
၈ ၵႃႈၼႂ်းဝဵင်းယေႇရုသလႅမ်ႇၵေႃႈယုဝ်ႇသၽတ်ႉဢဝ်ၵႃႈၼႂ်းၵူၼ်းမဵဝ်းလေႇဝိ၊ၵႃႈၼႂ်းယိတ်ႉပရေႃးႁိၵ်ႈ၊ၵႃႈၼႂ်းၵူၼ်းဢၼ်ပဵၼ်ငဝ်ႈပဵၼ်ႁူဝ်ၼႂ်းမဵဝ်းၸိူဝ်ႉၶိူဝ်းပေႃႈၶဝ်ၼႂ်းမဵဝ်းဢိသရေႇလၵမ်ႈၽွင်ႈၶၢၼ်းဝႆႉႁႂ်ႈလႆႈၸီႇယၢင်ႇဢမူႉတြႃးထႃႇဝရႃႉၽြႃးတင်းဢမူႉဢၼ်ၵူၼ်းၼင်ႇၵၼ်ထူပ်းတြႃးတီႈၵၼ်ၼႂ်းဝဵင်းယေႇရုသလႅမ်ႇၼၼ်ႉဢေႃႈ။
၉ မၼ်းသင်ႇလၢတ်ႈတီႈၶဝ်လႄႈဝႃႈ၊-သူဢွၼ်ၵၼ်မီးတင်းႁူဝ်ၸႂ်ဢၼ်ၸေးဢၼ်ၸုမ်ႇၼၼ်ႉလႄႈၵူဝ်ယမ်ထႃႇဝရႃႉၽြႃးယူႇ၊ပႂ်ႉသႅတ်ႉၸႃႇမၼ်းၸဝ်ႈယူႇသေလႄႈၸီႇယၢင်ႇတႃႉ။
၁၀ ပေႃးဢမူႉတၢင်းဢၼ်ပီႈၼွင်ႉသူဢၼ်ယူႇၵႃႈၼႂ်းၵူႈဝၢၼ်ႈၵူႈဝဵင်းၼၼ်ႉထူပ်းတြႃးတီႈၵၼ်ဢၼ်ဝႃႈဢမူႉတၢင်းဢၼ်ဢဝ်ဢသၢၵ်ႈၵူၼ်းတၢႆဢမူႉတၢင်းဢၼ်ပူၼ်ႉလိူဝ်ပိင်းၺၢပ်ႈတြႃးဢိၵ်ႇတင်းလွင်ႈတၢင်းဢၼ်မၼ်းၸဝ်ႈသင်ႇလၢတ်ႈဝႆႉတင်းထုငိ်းင်ႈတြႃးတင်းလွင်ႈတၢင်းဢၼ်မၼ်းၸဝ်ႈၸီႇယၢင်ႇဝႆႉၸိူဝ်းၼၼ်ႉႁွတ်ႈထိုင်ၵႃႈတီႈၽၢႆႇၼႃႈသူၸိုင်သူဢွၼ်ၵၼ်ပၼ်သတိတီႈၶဝ်ယႃႇႁႂ်ႈၶဝ်လႆႈၽိတ်းပိူင်ႈထႃႇဝရႃႉၽြႃးသေၵမ်း။ပေႃးဢမ်ႇၼၼ်တၢင်းၸႂ်မႆႈၶႆႈၸႃႉၸဝ်ႈတူၵ်းႁွတ်ႈၵႃႈၼိူဝ်သူဢိၵ်ႇတင်းပီႈသူၼွင်ႉသူဢေႃႈ။ပေႃးႁဵတ်းၸိူဝ်ႉၼင်ႇၼၼ်ၸိုင်တူဝ်သူတၵ်းဢွၼ်ၵၼ်ၵၢင်းလွတ်ႈတင်းဢပျႅတ်ႈဢေႃႈ။
၁၁ ၼႂ်းဢမူႉထႃႇဝရႃႉၽြႃးၵူႈၸိူဝ်ႉၵူႈပိူင်ၼၼ်ႉၸိုင်ၶုၼ်ယိတ်ႉပရေႃးႁိၵ်ႈဢႃႇမရိလႆႈဢုပ်ႉၵႃႈၼိူဝ်သူဢေႃႈ။ၼႂ်းဢမူႉၶုၼ်ႁေႃၶမ်းၵူႈၸိူဝ်ႉၵူႈပိူင်ၼၼ်ႉၸေႇပတိလုၵ်ႈၸၢႆးဢိသမေႇလဢၼ်ပဵၼ်ၶုၼ်ၵႃႈၼိူဝ်မဵဝ်းယုတၼၼ်ႉလႆႈဢုပ်ႉဢေႃႈ။ၵူၼ်းမဵဝ်းလေႇဝိတင်းလၢႆၵေႃႈတၵ်းလႆႈဢွၼ်ၵၼ်ႁဵတ်းၵူၼ်းလူင်သူဢေႃႈ။ဢွၼ်ၵၼ်ၸီႇယၢင်ႇႁတ်းႁတ်းႁၢၼ်ႁၢၼ်တႃႉ။ထႃႇဝရႃႉၽြႃးတၵ်းယူႇၽၢႆႇၶဝ်ၸိူဝ်းဢၼ်လီဢၼ်ငၢမ်းၼၼ်ႉဢေႃႈ၊ဝႃႈၼင်ႇၼႆဢေႃႈ။