Chapter
၁၆
ပီႊလိုၼ်းသုတ်းဢႃႇသ
၁ ၼႂ်းပီႊဢၼ်ဢႃႇသၼင်ႈႁၢင်ႈၼင်ႈႁေႃသၢမ်သိပ်းပၢႆႁူၵ်းပီႊၼၼ်ႉပႃႇသႃႇဢၼ်ပဵၼ်ၶုၼ်ႁေႃၶမ်းဢိသရေႇလၼၼ်ႉၶီႇသိုၵ်းၸူးၵႃႈတီႈမိူင်းယုတလႄႈတႄႇႁဵတ်းဝဵင်းရႃႇမဢမ်ႇႁႂ်ႈၽူႈလႂ်သေၵေႃႉသေၵူၼ်းဢွၵ်ႇလႆႈၶဝ်ႈလႆႈတီႈၶုၼ်ႁေႃၶမ်းဢႃႇသဢေႃႈ။
၂ မိူဝ်ႈၼၼ်ႉဢႃႇသဢဝ်ငိုၼ်းၶမ်းၵႃႈၼႂ်းၽၼ်ႇတႃႇႁိူၼ်းထႃႇဝရႃႉၽြႃးဢိၵ်ႇတင်းၽၼ်ႇတႃႇႁေႃၸဝ်ႈၼၼ်ႉသေလႄႈပၼ်ၵႂႃႇၵႃႈတီႈပိၼ်ႇႁႃႇတတ်ႉဢၼ်ပဵၼ်ၶုၼ်ႁေႃၶမ်းသုရိဢၼ်ယူႇၵႃႈတီႈဝဵင်းထမ်ႇမသႅတ်ႉၼၼ်ႉလႄႈသင်ႇလၢတ်ႈဝႃႈ၊-
၃ ၸဝ်ႈႁဝ်းၶႅၼ်းတေႃႈမီးတၢင်းဢၼ်ႁဵတ်းမိၵ်ႉသႁႃႇယႃႉၵေႃႉသေႈၵၼ်တင်းၵဝ်ၶႃႈမိူၼ်ၸိူဝ်ႉၼင်ႇဢၼ်ၸဝ်ႈပေႃႈၵဝ်ၶႃႈဢိၵ်ႇတင်းၸဝ်ႈပေႃႈၸဝ်ႈႁဝ်းလႆႈႁဵတ်းမိၵ်ႉသႁႃႇယႃႉလူၺ်ႈၵၼ်မႃးၼၼ်ႉသေၵမ်းတီႈၶႃႈ။တူၺ်းတီႈၶႃႈလူး။ၵဝ်ၶႃႈပၼ်ငိုၼ်းပၼ်ၶမ်းမႃးတီႈမႂ်းၸဝ်ႈႁဝ်းၶႃႈဢေႃႈ။ၶႅၼ်းတေႃႈယႃႉပႅတ်ႈမိၵ်ႉသႁႃႇယႃႉဢၼ်ၸဝ်ႈႁဝ်းႁဵတ်းလူၺ်ႈၵၼ်တင်းပႃႇသႃႇၶုၼ်ႁေႃၶမ်းဢိသရေႇလၼၼ်ႉလႄႈႁႂ်ႈမၼ်းလႆႈဢွၵ်ႇသေၵႃႈတီႈၵဝ်ၶႃႈၼႆႉၵႂႃႇသေၵမ်း၊ဝႃႈၼင်ၼႆဢေႃႈ။
၄ ပိၼ်ႇႁႃႇတတ်ႉၼၼ်ႉထွမ်ႇဢဝ်ၵႂၢမ်းၶုၼ်လူင်ဢႃႇသသေလႄႈပွႆႇၸႂ်ႉႁူဝ်သိုၵ်းမၼ်းတင်းလၢႆႁႂ်ႈၶဝ်ၶီႇသိုၵ်းၵႂႃႇၵႃႈတီႈဝၢၼ်ႈဝဵင်းဢိသရေႇလလႄႈယႃႉၽဵဝ်ႈပႅတ်ႈဝဵင်းယုၼ်ႇ၊ဝဵင်းတၼ်ႇ၊ဝဵင်းဢႃႇပေႇလမိမ်ႇဢိၵ်ႇတင်းဝဵင်းတီႈဢၼ်သိမ်းဝႆႉၽၼ်ႇတႃႇၵႃႈဢၼ်မီးၵႃႈၼႂ်းမိူင်းၼပ်ႉထလိၸိူဝ်းၼၼ်ႉဢေႃႈ။
၅ ပႃႇသႃႇငိၼ်းလွင်ႈၼၼ်ႉသေယဝ်ႉယင်းဢမ်ႇတႄႇႁဵတ်းဝဵင်းရႃႇမလႄႈၵိုတ်းတၢင်းႁဵတ်းၼၼ်ႉသေဢေႃႈ။
၆ မိူဝ်ႈၼၼ်ႉၶုၼ်လူင်ဢႃႇသႁွင်ႉဢဝ်ၵူၼ်းမဵဝ်းယုတတင်းသဵင်ႈတင်းလူင်သေလႄႈၶဝ်ဢွၼ်ၵၼ်ဢဝ်မၢၵ်ႇႁိၼ်ၵႃႈတီႈဝဵင်းရႃႇမဢိၵ်ႇတင်းမႆႉဢၼ်ပႃႇသႃႇဢဝ်တႄႇႁဵတ်းၸိူဝ်းၼၼ်ႉလႄႈမၼ်းဢဝ်ၵႂႃႇတႄႇႁဵတ်းဝဵင်းၵေႇပတင်းဝဵင်းမိၸပႃႇဢေႃႈ။
၇ မိူဝ်ႈၼၼ်ႉႁႃႇၼၼိဢၼ်ပဵၼ်ၵေႃႉဢၼ်ႁူပွင်ႇတႃလႅင်းၼၼ်ႉမႃးၸူးၵႃႈတီႈဢႃႇသဢၼ်ပဵၼ်ၶုၼ်ႁေႃၶမ်းယုတၼၼ်ႉလႄႈလၢတ်ႈဝႃႈ၊-ၵွပ်ႈပိူဝ်ႈဢၼ်ၸဝ်ႈၶုၼ်လူင်သွၼ်ႈပိူင်ၶုၼ်ႁေႃၶမ်းသုရိသေလႄႈဢမ်ႇသွၼ်ႈပိုင်ႈထႃႇဝရႃႉၽြႃးၽြႃးပဵၼ်ၸဝ်ႈတူဝ်ႈၸဝ်ႈၵဝ်ႇၼၼ်ႉလႄႈပူဝ်ႇပႃႇၵူၼ်းသိုၵ်းၶုၼ်ႁေႃၶမ်းသုရိၸိူဝ်းၼၼ်ႉလွတ်ႈသေၵႃႈၼႂ်းမိုဝ်းၸဝ်ႈၶုၼ်လူင်ၵႂႃႇယဝ်ႉ။၈ ၵူၼ်းၵုသဢိၵ်ႇတင်းၵူၼ်းလိပုၸိူဝ်းၼၼ်ႉပဵၼ်မူႇၽုင်မုၵ်ႉၸိူဝ်းဢၼ်ႁႅင်းယႂ်ႇၼႃႇလႄႈမီးလေႃႉရထႃးလႂ်၊ႁူဝ်ႁၢၼ်ၵူၼ်းသိုၵ်းၶီႇမႃႉလႂ်ၼမ်ၼႃႇဢမ်ႇၸႂ်ႈတီႈၶႃႈႁိုဝ်။
၈ ၼႂ်းဝႃႈၼၼ်သေၵေႃႈၵွပ်ႈပိူဝ်ႈဢၼ်ၶုၼ်လူင်သွၼ်ႈပိုင်ႈထႃႇဝရႃႉၽြႃးလႄႈမၼ်းၸဝ်ႈဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းၸဝ်ႈၶုၼ်လူင်ယဝ်ႉတီႈၶႃႈယဝ်ႉ။ထႃႇဝရႃႉၽြႃးသွတ်ႉသႅတ်ႉယူႇၵႃႈၼိူဝ်ၼႃႈလိၼ်မိူင်းတၢင်းၼႃႈယူႇႁႂ်ႈလႆႈယူႇၽၢႆႇၶဝ်ၸိူဝ်းဢၼ်မီးၸႂ်ၸေႇတၼႃႇဢၼ်ၸေးၸုမ်ႇတီႈမၼ်းၸဝ်ႈၸိူဝ်းၼၼ်ႉမၼ်ႈမၼ်ႈၶိူင်ႇၶိူင်ႇတီႈၶႃႈဢေႃႈ။
၉ ၼႂ်းတီႈႁဵင်းၼႆႉၸဝ်ႈၶုၼ်လူင်ႁဵတ်းမိူၵ်ႈၼႃႇလူင်လၢင်တီႈၶႃႈယဝ်ႉ။ၸႃႉၸဵမ်မိူဝ်ႈလဵဝ်ၼႆႉၵႂႃႇဢမူႉသိုၵ်းတၵ်းမီးတီႈၸဝ်ႈၶုၼ်လူင်တီႈၶႃႈဢေႃႈ၊ဝႃႈၼင်ႇၼႆဢေႃႈ။
၁၀ မိူဝ်ႈၼၼ်ႉဢႃႇသၸႂ်မႆႈၶႆႈၸႃႉတီႈၵေႃႉဢၼ်ႁူပွင်ႇတႃလႅင်းၼၼ်ႉလႄႈဢဝ်ၶင်ဝႆႉၵႃႈၼႂ်းထွင်ႇၵွပ်ႈပိူဝ်ႈဢၼ်တေႃးသႃႉမၼ်းဢွၵ်ႇလူၺ်ႈလွင်ႈတီႈႁဵင်းၼၼ်ႉဢေႃႈ။မိူဝ်ႈၼၼ်ႉဢႃႇသၼိၵ်ႈၸၢၵ်ႈငႅၼ်းသေးၵူၼ်းဝၢၼ်ႈၵူၼ်းမိူင်းၵမ်ႈၽွင်ႈဢေႃႈ။
၁၁ လွင်ႈတၢင်းဢႃႇသဢဝ်ၸဵမ်ငဝ်ႈတေႃႇပၢႆၸိူဝ်းၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇယုတတင်းရႃႇၸဝၢင်ႇဢိသရေႇလဢေႃႈ။
၁၂ ၼႂ်းပီႊဢၼ်မၼ်းၸၢမ်ႇႁၢင်ႈၸၢမ်ႇႁေႃသၢမ်သိပ်းပၢႆၵဝ်ႈပီႊၼၼ်ႉတၢင်းၶႆႈတၢင်းပဵၼ်ၸပ်းတီႈတိၼ်ၸဝ်ႈလႄႈပိၵ်ႉသမ်ႉမၼ်းလႆႈၶၢမ်ႇႁႅင်းယႂ်ႇၼႃႇလူင်လၢင်သေၵေႃႈမၼ်းဢမ်ႇသွၼ်ႈပိုင်ႈထႃႇဝရႃႉၽြႃး၊သွၼ်ႈပိုင်ႈမေႃယႃၵူၺ်းဢေႃႈ။
၁၃ ဢႃႇသၼၼ်ႉၼွၼ်းလပ်းလူၺ်ႈၵၼ်တင်းပူႇမၼ်းမွၼ်ႇမၼ်းတင်းလၢႆလႄႈၼႂ်းပီႊဢၼ်ၸၢမ်ႇႁၢင်ႈၸၢမ်ႇႁေႃသီႇသိပ်းပၢႆဢဵတ်းပီႊၼၼ်ႉမၼ်းႁွတ်ႈဢၼိၵ်ႉၸႃႉသေယဝ်ႉ၊
၁၄ ၶဝ်ဢွၼ်ၵၼ်ဢဝ်မၼ်းသၢင်းၵျူဝ်ႇၵႃႈၼႂ်းသၢင်းၶႅင်းဢၼ်မၼ်းႁဵတ်းဝႆႉပုၼ်ႈမၼ်းၵႃႈၼႂ်းဝဵင်းတႃႇဝိတ်ႉၼၼ်ႉလႄႈဢဝ်တူဝ်တၢႆမၼ်းသႂၢင်းသႂ်ႇဝႆႉၵႃႈၼႂ်းၵွမ်ႇၼႂ်းၸူင်ႇဢၼ်ၶဝ်ဢဝ်မဵဝ်းၼၢမ်ႇသႃႇဢၼ်ႁွမ်ဢၼ်ႁူၺ်းၽေႃႇႁဵတ်းၸွမ်းၼင်ႇဢတၢတ်ႈမေႃယႃၼၼ်ႉသေလႄႈသႂ်ႇတဵမ်ဝႆႉဢေႃႈ။ပွႆးတုတ်ႇၽႆးဢၼ်ယႂ်ႇၼႃႇလူင်လၢင်ၵေႃႈၶဝ်ႁဵတ်းဢေႃႈ။