Chapter
၁၅
ဢႃႇသႁဵတ်းၼႄးလၢႆးဢၼ်မႂ်ႇ
၁ ဝိၺိၺ်ႇၽြႃးပဵၼ်ၸဝ်ႈတူၵ်းႁွတ်ႈၵႃႈၼိူဝ်ဢႃႇၸရိလုၵ်ႈၸၢႆးဢုဝ်ႇတိတ်ႉလႄႈ၊မၼ်းဢွၵ်ႇႁႂ်ႈလႆႈႁပ်ႉႁူဝ်တၢင်းဢႃႇသလႄႈလဝ်ႈလၢတ်ႈလႄႈဝႃႈ၊-ၶုၼ်ဢႃႇသဢိၵ်ႇတင်းၵူၼ်းမဵဝ်းယုတတင်းၵူၼ်းမဵဝ်းပိၼ်ႇယႃႇမိၼ်ႇတင်းသဵင်ႈတင်းလူင်ၶဝ်ဢိူၺ်း။
၂ ဢွၼ်ၵၼ်ထွမ်ႇငိၼ်းၵႂၢမ်းၵဝ်တႃႉ။ထႃႇဝရႃႉၽြႃးတၵ်းမီးယူႇလူၺ်ႈၵၼ်တင်းသူၼႂ်းမိူဝ်ႈဢၼ်သူယင်းမီးယူႇလူၺ်ႈၵၼ်တင်းမၼ်းၸဝ်ႈၼၼ်ႉဢေႃႈ။ပေႃးသူႁႃမၼ်းၸဝ်ႈၸိုင်မၼ်းၸဝ်ႈတၵ်းၶၢမ်ႇတၢင်းဢၼ်သူထူပ်းႁၼ်ဢေႃႈ။ပေႃးသူၸုၼ်ႉပႅတ်ႈမၼ်းၸဝ်ႈၸိုင်မၼ်းၸဝ်ႈတၵ်းၸုၼ်ႉပႅတ်ႈသူဢေႃႈ။
၃ ၶိင်ႇၵႃႇလႃႉႁိုင်ၼႃႇၵူၼ်းမဵဝ်းဢိသရေႇလဢမ်ႇမီးၽြႃးဢၼ်မၢၼ်ႇဢၼ်မႅၼ်ႈ။ဢမ်ႇမီးယိတ်ႉပရေႃးႁိၵ်ႈဢၼ်ၸၢင်ႊပၼ်ဢေႃးဝႃႇတႃႉၶဝ်။ဢမ်ႇမီးတြႃး။
၄ ၵူၺ်းၵႃႈမိူဝ်ႈဢၼ်ၶဝ်မီးၽေးလႄႈဢွၼ်ၵၼ်ၶိုၼ်ႈမႃးတီႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလလႄႈႁႃမၼ်းၸဝ်ႈၼၼ်ႉၸိုင်မၼ်းၸဝ်ႈၶၢမ်ႇတၢင်းဢၼ်ၶဝ်ထူပ်းႁၼ်ဢေႃႈ။
၅ ၶိင်ႇၵႃႇလႃႉမိူဝ်ႈဢွၼ်ႇၼႆႉၼၼ်ႉၶဝ်ၸိူဝ်းဢၼ်ဢွၵ်ႇလႂ်ၶဝ်ၸိူဝ်းဢၼ်ၶဝ်ႈလႂ်ဢမ်ႇလႆႈၵတ်းယဵၼ်ၶျၢမ်းသႃႇ။ၵူၼ်းၼႂ်းဝၢၼ်ႈၼႂ်းမိူင်းတင်းသဵင်ႈတင်းလူင်လႆႈၶၢမ်ႇတုၵ်ႉၶႃႉတၢင်းဢၼ်ၶၢၼ်ၸႂ်ၼႃႇလူင်လၢင်ဢေႃႈ။
၆ မိူင်းၼိုင်ႈလႄႈမိူင်းၼိုင်ႈဝဵင်းၼိုင်ႈလႄႈဝဵင်းၼိုင်ႈယႃႉၵၼ်ယုၵ်ႉၵၼ်လႄႈၽြႃးပဵၼ်ၸဝ်ႈဢဝ်ၽေးၵူႈၸိူဝ်ႉၵူႈမဵဝ်းလႄႈသင်ႇသွၼ်သုင်းမႃႉၶဝ်ဢေႃႈ။
၇ သူၸမ်းဢွၼ်ၵၼ်ဢဝ်ႁႅင်းႁွမ်ႁႅင်းတႃႉ။ယႃႇပေႁႂ်ႈႁႅင်းမိုဝ်းသူဢူၼ်ႈ။သူတၵ်းလႆႈၶၢမ်ႇဢၵျူဝ်းၸွမ်းၵႃႈၼင်ႇဢၼ်သူၵမ်ၵျၢင်ႉၼၼ်ႉဢေႃႈ၊ဝႃႈၼင်ႇၼႆဢေႃႈ။
၈ မိူဝ်ႈဢၼ်ဢႃႇသငိၼ်းၵႂၢမ်းၼၼ်ႉဢိၵ်ႇတင်းၵႂၢမ်းဢၼႃႇၵၢတ်ႈတိပရေႃးၽိတ်ႈဢုဝ်ႇတိတ်ႉၼၼ်ႉၸိုင်မၼ်းမီးတၢင်းဢၼ်ႁတ်းဢၼ်ႁၢၼ်မႃးလႄႈပႄႇၽဵဝ်ႈပႅတ်ႈၶိူင်ႈဢၼ်လီႁင်ႈဢဵတ်ႇသဵတ်ႇတင်းလၢႆဢၼ်မီးၵႃႈတီႈမိူင်းယုတ၊မိူင်းပိၼ်ႇယႃႇမိၼ်ႇၵူႈတီႈၵူႈလႅၼ်ဢိၵ်ႇတင်းၵႃႈတီႈဝဵင်းဢၼ်မၼ်းတိုၵ်းဢဝ်ၵႃႈၼိူဝ်ႁၢၼ်ႉလွႆဢေႇၽရိမ်ႇၸိူဝ်းၼၼ်ႉပႅတ်ႈလႄႈမႄးၵုမ်းမႄးႁဵတ်းယိတ်ႉပလၢင်ႇထႃႇဝရႃႉၽြႃးဢၼ်မီးၵႃႈတီႈၽၢႆႇၼႃႈၼႃႈႁိူၼ်းၸဝ်ႈၼၼ်ႉဢေႃႈ။
၉ မၼ်းႁႂ်ႈၵူၼ်းမဵဝ်းယုတတင်းၵူၼ်းမဵဝ်းပိၼ်ႇယႃႇမိၼ်ႇတင်းသဵင်ႈတင်းလူင်ဢိၵ်ႇတင်းၶဝ်ၸိူဝ်းဢၼ်ဢွၵ်ႇသေၵႃႈၼႂ်းမဵဝ်းဢေႇၽရိမ်ႇ၊မဵဝ်းမၼႃႇသေႇ၊မဵဝ်းသိမုၼ်ႇလႄႈမႃးသွၼ်ႈပိုင်ႈယူႇတီႈၶဝ်ၸိူဝ်းၼၼ်ႉၸူႉၵၼ်တုမ်ၵၼ်ဢေႃႈ။ၶဝ်ဢွၼ်ၵၼ်ဢွၵ်ႇသေၵႃႈၼႂ်းၵူၼ်းမဵဝ်းဢိသရေႇလမႃးယူႇၽၢႆႇမၼ်းၼမ်ၼႃႇၼႂ်းမိူဝ်ႈဢၼ်ၶဝ်ႁူႉႁၼ်လွင်ႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈမၼ်းမီးယူႇလူၺ်ႈၵၼ်တင်းမၼ်းၼၼ်ႉဢေႃႈ။
၁၀ ၼင်ႇၼၼ်လႄႈၼႂ်းပီႊဢၼ်ဢႃႇသၼင်ႈႁၢင်ႈၼင်ႈႁေႃသိပ်းပၢႆႁႃႈပီႊလိူၼ်တတိယၼၼ်ႉၶဝ်ဢွၼ်ၵၼ်မႃးၸူႉတုမ်ၵႃႈတီႈဝဵင်းယေႇရုသလႅမ်ႇလႄႈ
၁၁ ဢဝ်ၵႃႈၼႂ်းဢုၵ်ႉၸႃႇဢၼ်ၶဝ်ႁိမ်ႁူင်ႇဢဝ်မႃးၼၼ်ႉဝူဝ်းၸဵတ်းပၢၵ်ႇတင်းသူဝ်းၸဵတ်းႁဵင်ပုၵ်ႉၸေႃႇတီႈထႃႇဝရႃႉၽြႃးဢေႃႈ။
၁၂ ၶဝ်ဢွၼ်ၵၼ်ႁဵတ်းပတိၺိၼ်ႇတၢင်းဢၼ်ႁပ်ႉတုင်းဢဝ်လူၺ်ႈလွင်ႈဢၼ်ၶဝ်တၵ်းပႃးတင်းႁူဝ်ၸႂ်သဵင်ႈသဵင်ႈတင်းၸႂ်သဵင်ႈသဵင်ႈသေလႄႈႁႃဢဝ်ထႃႇဝရႃႉၽြႃးၽြႃးပဵၼ်ၸဝ်ႈပူႇၶဝ်မွၼ်ႇၶဝ်၊
၁၃ လွင်ႈဢၼ်ၵေႃႉလဵၵ်ႉၵေႃႉယႂ်ႇၵူၼ်းယိင်းၵူၼ်းၸၢႆးၵေႃႉလႂ်သေဢမ်ႇဝႃႈဢၼ်ဢမ်ႇႁႃဢဝ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆၼၼ်ႉဢေႃႈ။
၁၄ ၶဝ်ႁဵတ်းသဵင်ဢၼ်ႁႅင်းယႂ်ႇၼႃႇဢိၵ်ႇလူၺ်ႈၵၼ်တင်းသဵင်ဢၼ်ႁွင်ႉပၢဝ်ႇႁွင်ႉသႅၼ်ႇ၊သဵင်ဢၼ်ပဝ်ႇၼႄးၶရႃႇသေလႄႈတိူင်ႇဝႃႈၵိၼ်ႇဝႃႈတီႈထႃႇဝရႃႉၽြႃးဢေႃႈ။
၁၅ ၵူၼ်းမဵဝ်းယုတတင်းသဵင်ႈတင်းလူင်ဢွၼ်ၵၼ်ၸူမ်းသိူမ်းၵွပ်ႈပိူဝ်ႈဢၼ်ႁဵတ်းတၢင်းဢၼ်တိူင်ႇဝႃႈၵိၼ်ႇဝႃႈၸိူဝ်ႉၼင်ႇၼၼ်ၼၼ်ႉဢေႃႈ။လွင်ႈမၼ်းၸမ်းၵွပ်ႈပိူဝ်ႈၶဝ်ဢၼ်ပႃးတင်းႁူဝ်ၸႂ်သဵင်ႈသဵင်ႈတိူင်ႇဝႃႈၵိၼ်ႇဝႃႈလႄႈမီးဢလူဝ်ႇသၼ်ႇတႃႉဢၼ်ႁႅင်းယႂ်ႇၼႃႇႁႃဢဝ်မၼ်းၸဝ်ႈၼၼ်ႉလႄႈမၼ်းၸဝ်ႈၶၢမ်ႇတၢင်းဢၼ်ၶဝ်ထူပ်းႁၼ်သေယဝ်ႉထႃႇဝရႃႉၽြႃးပၼ်ဢၶႂၢင်ႉဢၼ်ၶဝ်လႆႈထၢတ်ႇသိုၵ်းယဵၼ်သိုၵ်းသေၵႃႈတီႈၵူႈတီႈၵူႉႈလႅၼ်ဢေႃႈ။
၁၆ ၶုၼ်လူင်ဢႃႇသၼုၵ်ႈဢဝ်မႃႇၶႃႇဢၼ်ပဵၼ်ၼၢႆးၸဝ်ႈၼၼ်ႉဢွၵ်ႇပႅတ်ႈသေၵႃႈၼႂ်းဢရႃႇၼၢင်းႁေႃၶမ်းၵွပ်ႈပိူဝ်ႈဢၼ်မၼ်းႁဵတ်းရုၵ်ႉထူႉဢၼ်လီႁင်ႈဢဵတ်ႇသဵတ်ႇပုၼ်ႈတူၼ်ႈဢႃႇသရၼၼ်ႉလႄႈမၼ်းၽၼ်းလူမ်ႉရုၵ်ႉထူႉၼၼ်ႉလႄႈႁႂ်ႈပဵၼ်မုၼ်ႈပဵၼ်ၽွင်သေယဝ်ႉဢဝ်တုတ်ႇၽႆးပႅတ်ႈၵႃႈတီႈႁိမ်းၼမ်ႉႁွင်ႊၵိ၁၇ တြႃၼ်ႇဢေႃႈ။
၁၇ ပိၵ်ႉသမ်ႉမၼ်းဢမ်ႇပႄႇပႅတ်ႈထႃႇၼႃႉတီႈသုင်တင်းလၢႆသေၵႃႈၼႂ်းမိူင်းဢိသရေႇလသေၵေႃႈႁူဝ်ၸႂ်ဢႃႇသၼၼ်ႉမီးတၢင်းဢၼ်ၸေးၸုင်ႇယူႇၼႂ်းၸူဝ်ႈပၢၼ်မၼ်းၼၼ်ႉတဵမ်တဵမ်ဢေႃႈ။
၁၈ မၼ်းဢဝ်ဢုၵ်ႉၸႃႇဢၼ်ၸဝ်ႈပေႃႈမၼ်းလူႇတၢၼ်းဢုၵ်ႉၸႃႇဢၼ်မၼ်းလူႇတၢၼ်း၊ၶမ်း၊ငိုၼ်း၊ၶိူင်ႈပိူင်ၸိူဝ်းၼၼ်ႉသႂၢင်းသႂ်ႇဝႆႉၵႃႈၼႂ်းႁိူၼ်းၽြႃးပဵၼ်ၸဝ်ႈဢေႃႈ။
၁၉ လိုၼ်းၼၼ်ႉဢမ်ႇမီးတၢင်းဢၼ်တိုၵ်းသိုၵ်းတေႃႇထိုင်ႁွတ်ႈဢႃႇသၼင်ႈႁၢင်ႈၼင်ႈႁေႃထၼ်ႈပေႃးလႆႈသၢမ်သိပ်းပၢႆႁႃႈပီႊဢေႃႈ။