Chapter
၉
ၼၢင်းႁေႃၶမ်းမိူင်းသေႇၽမႃးၸႂ်းၶုၼ်သေႃးလမုၼ်ႇ
၁ ၼၢင်းႁေႃၶမ်းဢၼ်ဢုပ်ႉပိူင်ႇမိူင်းသေႇၽၼၼ်ႉလႆႈငိၼ်းသတၢင်းသဵင်ၶၢဝ်ႇမူၼ်သရေႇသေႃးလမုၼ်ႇလႄႈမၼ်းပႃးဢဝ်တင်းၵူၼ်းဢၼ်ၸွမ်းၼမ်ၼႃႇဢိၵ်ႇတင်းၵလႃႈဢုၵ်ႉဢၼ်ပႃးၼၢမ်ႇသႃႇတင်းၶမ်းၼမ်ၼႃႇဢၼ်ထိူၵ်ႈၵႃႈထိူၵ်ႈၶၼ်ယႂ်ႇၸိူဝ်းၼၼ်ႉသေယဝ်ႉမႃးၵႃႈတီႈဝဵင်းယေႇရုသလႅမ်ႇႁႂ်ႈလႆႈဢဝ်ပျၢတ်ႈသၼႃႇဢၼ်လိုၵ်ႉလမ်ႇယၢပ်ႇၽိုတ်ႇၼႃႇၼၼ်ႉသေလႄႈၸၢမ်းတူၺ်းသေႃးလမုၼ်ႇဢေႃႈ။မၼ်းႁွတ်ႈထိုင်တီႈသေႃးလမုၼ်ႇသေယဝ်ႉတိူင်ႇပၢင်ႇတွင်ႉထၢမ်လူၺ်ႈလွင်ႈၵႃႈဢၼ်မီးၵႃႈၼႂ်းႁူဝ်ၸႂ်မၼ်းၼၼ်ႉဢေႃႈ။
၂ သေႃးလမုၼ်ႇၵေႃႈၵေႈလိတ်ႈပျၢတ်ႈသၼႃႇၵႃႈဢၼ်မၼ်းတွင်ႉထၢမ်ၼၼ်ႉဢေႃႈ။လွင်ႈတၢင်းဢၼ်သေႃးလမုၼ်ႇဢမ်ႇႁူႉလႄႈဢမ်ႇၵေႈလိတ်ႈလႆႈၼၼ်ႉဢမ်ႇမီးသေၸိူဝ်ႉသပေိူင်။
၃ မိူဝ်ႈဢၼ်ၼၢင်းႁေႃၶမ်းမိူင်းသေႇၽႁၼ်ပိင်ႇၺႃႇသေႃးလမုၼ်ႇဢိၵ်ႇတင်းႁိူၼ်းၸဝ်ႈဢၼ်မၼ်းတႄႇႁဵတ်း၊ၶိူင်ႈပိူင်ၶူင်ႇတီႈၵိၼ်ၸဝ်ႈ၊တီႈယူႇတီႈၼင်ႈဢၼ်ၵူၼ်းပႂ်ႉဢမူႉၸဝ်ႈတင်းလၢႆၼင်ႈ၊
၄ ဢၼ်ၵူဝ်ႇရၢမ်ႇဢွၼ်ႇၸၢႆးၸဝ်ႈတင်းလၢႆၸုၵ်းၶႃးၸႃးယူႇ၊ဢၼ်ၶူဝ်းၼုင်ႈတၢင်းမႆႊဢၼ်ၶဝ်ၼုင်ႈမႆႊၸိူဝ်းၼၼ်ႉ၊ၵူၼ်းယိပ်းၵွၵ်းၸဝ်ႈလႂ်ဢိၵ်ႇတင်းၶူဝ်းၼုင်ႈတၢင်းမႆႊဢၼ်ၶဝ်ၼုင်ႈမႆႊၸိူဝ်းၼၼ်ႉ၊ဢိၵ်ႇတင်းၶူဝ်လႆတီႈဢၼ်ၶိုၼ်ႈၸူးႁိူၼ်းထႃႇဝရႃႉၽြႃးလႂ်ၸိူဝ်းၼၼ်ႉၸိုင်မၼ်းမီးတၢင်းဢၼ်လိုမ်းတူဝ်လိုမ်းႁၢင်ႊယူႇသေလႄႈလၢတ်ႈတီႈၶုၼ်ႁေႃၶမ်းလႄႈဝႃႈ၊-
၅ ၵႂၢမ်းသတၢင်းသဵင်ၶၢဝ်ႇဢၼ်ၵဝ်ၶႃႈယူႇၵႃႈတီႈမိူင်းၵဝ်ၶႃႈလႄႈလႆႈငိၼ်းလွင်ႈတၢင်းဢၼ်ၸဝ်ႈႁဝ်းႁဵတ်းတင်းလၢႆဢိၵ်ႇတင်းပိင်ႇၺႃႇၸဝ်ႈႁဝ်းၸိူဝ်းၼၼ်ႉမၼ်းမႅၼ်ႈတီႈၶႃႈဢေႃႈ။
၆ ၼႂ်းဝႃႈၼၼ်သေၵေႃႈၸူဝ်ႈဢၼ်ၵဝ်ၶႃႈဢမ်ႇပႆႇႁွတ်ႈထိုင်လႄႈထူပ်းႁၼ်ၼၼ်ႉၵဝ်ၶႃႈဢမ်ႇယုမ်ႇၵႂၢမ်းၼၼ်ႉ။မိူဝ်ႈလဵဝ်ၼႆႉၸမ်းၵႂၢမ်းဢၼ်ၵဝ်ၶႃႈလႆႈငိၼ်းလွင်ႈပိင်ႇၺႃႇၸဝ်ႈႁဝ်းယႂ်ႇၵႂၢင်ႈၼႆႉၼၼ်ႉဢမ်ႇၶိုတ်းသေၶိုင်ႈၼိုင်ႈလႄႈၸဝ်ႈႁဝ်းပဵၼ်ဢၼ်ပူၼ်ႉလိူဝ်သတၢင်းသဵင်ၶၢဝ်ႇဢၼ်ၵဝ်ၶႃႈလႆႈငိၼ်းၼၼ်ႉၶႃႈဢေႃႈ။
၇ ၵူၼ်းၸဝ်ႈႁဝ်းတင်းၶႃႈၸဝ်ႈႁဝ်းဢၼ်ယူႇၵႃႈတီႈၽၢႆႇၼႃႈၸဝ်ႈႁဝ်းယူႇသေလႄႈလႆႈငိၼ်းပိင်ႇၺႃႇၸဝ်ႈႁဝ်းၸိူဝ်းၼႆႉမီးမၢင်ႇၵလႃႇၶႃႈဢေႃႈ။ႁႂ်ႈထႃႇဝရႃႉၽြႃးၽြႃးပဵၼ်ၸဝ်ႈၸဝ်ႈႁဝ်းဢၼ်ထုၵ်ႇၸႂ်တီႈၸဝ်ႈႁဝ်းလႄႈဢဝ်ၸဝ်ႈႁဝ်းတၢင်ႇၵႃႈၼိူဝ်ရႃႇၸႃႉပလၢင်ႇမၼ်းၸဝ်ႈႁႂ်ႈပဵၼ်ၶုၼ်ႁေႃၶမ်းတၢင်ႈတူဝ်ထႃႇဝရႃႉၽြႃးၽြႃးပဵၼ်ၸဝ်ႈၸဝ်ႈႁဝ်းၼၼ်ႉ၊မီးမၢင်ႇၵလႃႇသေၵမ်းလူၺ်ႈ။
၈ ၵွပ်ႈပိူဝ်ႈဢၼ်ၽြႃးပဵၼ်ၸဝ်ႈၸဝ်ႈႁဝ်းၼၼ်ႉႁၵ်ႉမဵဝ်းဢိသရေႇလလႄႈမၼ်းၸဝ်ႈၶၢၼ်းၸဝ်ႈႁဝ်းဝႆႉႁႂ်ႈပဵၼ်ၶုၼ်ႁေႃၶမ်းၵႃႈၼိူဝ်ၶဝ်ၼၼ်ႉလႄႈႁႂ်ႈလႆႈႁဵတ်းတၢင်းဢၼ်ၸီႇယၢင်ႇတြႃးဢိၵ်ႇတင်းတၢင်းဢၼ်တႅပ်းတတ်းသိုဝ်ႈသိုဝ်ႈတေႃႇတေႃႇၼၼ်ႉၶႃႈယဝ်ႉ၊
၉ ဝႃႈၼင်ႇၼႆလႄႈမၼ်းဢဝ်ၶမ်းပၢၵ်ႇပၢႆသၢဝ်းတလၢၼ်ႇတၢၼ်ႇ၊ၼၢမ်ႇသႃႇၼမ်ၼႃႇလူင်လၢင်၊သႅင်လီသႅင်မျၢတ်ႈတင်းလၢႆသၢၵ်ႈပၼ်ဢေႃႈ။မဵဝ်းၼၢမ်ႇသႃႇဢၼ်မိူၼ်ၸိူဝ်ႉၼင်ႇၼၢမ်ႇသႃဢၼ်ၼၢင်းႁေႃၶမ်းမိူင်းသေႇၽသၢၵ်ႈပၼ်တီႈၶုၼ်လူင်သေႃးလမုၼ်ႇၼၼ်ႉဢမ်ႇမီး။
၁၀ ၶႃႈၵူၼ်းႁိရမ်ႇဢိၵ်ႇတင်းၶႃႈၵူၼ်းသေႃးလမုၼ်ႇဢၼ်ဢဝ်ၶမ်းၵႃႈတီႈမိူင်းဢေႃႇၽိရမႃးၸိူဝ်းၼၼ်ႉဢွၼ်ၵၼ်ပႃးဢဝ်ၼၢမ်ႇသႃႇဢိၵ်ႇတင်းသႅင်လီသႅင်မျၢတ်ႈမႃးဢေႃႈ။
၁၁ ၶုၼ်ႁေႃၶမ်းဢဝ်မႆႉၼၢမ်ႇသႃႇၼၼ်ႉႁဵတ်းတီႈယဵပ်ႇၶိုၼ်ႈႁိူၼ်းထႃႇဝရႃႉၽြႃးတင်းႁေႃၸဝ်ႈဢိၵ်ႇတင်းတိင်ႇတရေႃးပုၼ်ႈၶဝ်ၸိူဝ်းဢၼ်ႁဵတ်းၵႂၢမ်းၼၼ်ႉဢေႃႈ။မႆႉၼၢမ်ႇသႃႇၸိူဝ်ႉၼင်ႇၼၼ်ၼၼ်ႉဢမ်ႇတွၼ်ႉပေႃႇမႃးၵႃႈတီႈမိူင်းယုတသပွေၵ်ႈ။
၁၂ ၶုၼ်လူင်သေႃးလမုၼ်ႇပၼ်လၢၵ်ႈသွင်ႇၵႃႈဢၼ်ၼၢင်းႁေႃၶမ်းမိူင်းသေႇၽမီးဢလူဝ်ႇသၼ်ႇတႃႉၶႂ်ႈလႆႈၸိူဝ်းၼၼ်ႉယိင်ႈၶႅၼ်းၼမ်လိူဝ်တွၼ်းသလေၢၵ်ႈသွင်ႇဢၼ်မၼ်းသၢၵ်ႈပၼ်တီႈၶုၼ်ႁေႃၶမ်းၼၼ်ႉဢေႃႈ။လိုၼ်းၼၼ်ႉမၼ်းတင်းၶႃႈမၼ်းၵူၼ်းမၼ်းတင်းလၢႆၶိုၼ်းမိူဝ်းၵႂႃႇၵႃႈတီႈမိူင်းမၼ်းသေဢေႃႈ။
တၢင်းဢၼ်လီဢၢမ်းဢေႃးၶုၼ်လူင်သေႃးလမုၼ်ႇ
၁၃ ၶမ်းဢၼ်မႃးႁွတ်ႈၽႅဝ်တီႈသေႃးလမုၼ်ႇၼၼ်ႉၼႂ်းယေႈပီႊယေႈပီႊၸမ်းမီးႁူၵ်းပၢၵ်ႇႁူၵ်းသိပ်းပၢႆႁူၵ်းတလၢၼ်ႇတၢၼ်ႇဢေႃႈ။
၁၄ ၼွၵ်ႈသေၼၼ်ႉယင်းမီးၶမ်းဢၼ်ၵူၼ်းၵႃႉၵူၼ်းၶၢႆလႂ်၊ၸဝ်ႈၵုၼ်ႇၸဝ်ႈသိၼ်လႂ်၊ၶုၼ်ဢႃႇရေႇပျႃႇလႂ်၊မဵဝ်ႉဝုၼ်ႇတင်းလၢႆလႂ်သၢၵ်ႈၼၼ်ႉလူးၵွၼ်ႇဢေႃႈ။
၁၅ ၶုၼ်သေႃးလမုၼ်ႇတွင်ႈႁဵတ်းၶိူင်ႈႁႄႉလၢၵ်ႈၼၢၵ်ႈဢၼ်ပႃးၶမ်းယေႈဢၼ်ႁူၵ်းပၢၵ်ႇၵျၢပ်ႈသၶလေၼၼ်ႉသွင်ပၢၵ်ႇဢၼ်၊ၶိူင်ႈႁႄႉလၢၵ်ႈၼၢၵ်ႈဢွၼ်ႇ
၁၆ ဢၼ်ပႃးၶမ်းယေႈဢၼ်သၢမ်ၵျၢပ်ႈသၶေႇလၼၼ်ႉသၢမ်ပၢၵ်ႇဢၼ်လႄႈၶုၼ်ႁေႃၶမ်းဢဝ်ဝႆႉၵႃႈၼႂ်းႁေႃၸဝ်ႈထိူၼ်ႇလေႇပၼုၼ်ႇၼၼ်ႉဢေႃႈ။
၁၇ ၶုၼ်ႁေႃၶမ်းႁဵတ်းရႃႇၸႃႉပလၢင်ႇငႃးၸၢင်ႉလူင်ဢၼ်ဢဝ်တင်းၶမ်းလွတ်ႈငၢၼ်ႇဢုမ်ႇႁေႃႇၼၼ်ႉဢေႃႈ။
၁၈ ယႃႇၸႃႉပလၢင်ႇမီးႁၢၼ်ႉႁူၵ်းႁၢၼ်ႉတင်းၶူင်ႇႁၢၼ်ႉတၼ်ၶမ်းဢၼ်ၸပ်းၵၼ်တင်းရႃႇၸႃႉပလၢင်ႇၸဝ်ႈၼၼ်ႉလႄႈၵႃႈတီႈသွင်ၽၢႆႇတီႈၼင်ႈၼၼ်ႉၵေႃႈမီးႁၢဝ်းတီႈဢိင်လႄႈၵႃႈတီႈႁိမ်းႁၢဝ်းၼၼ်ႉမီးသၢင်ႇသီႈသွင်တူဝ်ၸုၵ်းယူႇဢေႃႈ။
၁၉ ၵႃႈတီႈသွင်ၽၢႆႇၼိူဝ်ႁၢၼ်ႉႁူၵ်းႁၢၼ်ႉၸိူဝ်းၼၼ်ႉၵေႃႈမီးသၢင်ႇသီႈသိပ်းသွင်တူဝ်ၸုၵ်းယူႇဢေႃႈ။ၵႃႈတီႈသိုင်ႇၸိုင်ႈဝၢၼ်ႈမိူင်းတီႈလႂ်တၼ်းလႂ်သေၸိူဝ်ႉသမေိူင်းဢမ်ႇမီးမိူၼ်ၸိူဝ်ႉၼင်ႇၼၼ်ၼၼ်ႉလႃးလႃး။
၂၀ ၵွၵ်းၸဝ်ႈဢၼ်ၶုၼ်လူင်သေႃးလမုၼ်ႇၵိၼ်ၵႃႈမီးဢိၵ်ႇတင်းၵွၵ်းၸဝ်ႈဢၼ်သုင်းသွင်ႇၵႃႈတီႈႁေႃၸဝ်ႈထိူၼ်ႇလေႇပၼုၼ်ႇၵႃႈမီးၼၼ်ႉဢမ်ႇၸႂ်ႈၵွၵ်းငိုၼ်းပဵၼ်ၵွၵ်းၶမ်းလွၼ်ႉလွၼ်ႉဢေႃႈ။
၂၁ ၼႂ်းၸူဝ်ႈပၢၼ်သေႃးလမုၼ်ႇၼၼ်ႉဢမ်ႇၸၢင်ႊမၢတ်ႈငိုၼ်းပဵၼ်ၵႃႈသင်လႃးလႃး။ၶုၼ်ႁေႃၶမ်းမီးႁိူဝ်းသၢင်းၽေႃးဢၼ်ၵႂႃႇၸူးၵႃႈတီႈဝဵင်းတႃႇသုဢိၵ်ႇလူၺ်ႈၵၼ်တင်းၶႃႈၶုၼ်ႁိရမ်ႇၸိူဝ်းၼၼ်ႉလႄႈသၢမ်ပီႊယေႈပွၵ်ႈႁိူဝ်းသၢင်းၽေႃးတႃႇသုၸိူဝ်းၼၼ်ႉပႃးဢဝ်ငိုၼ်း၊ၶမ်း၊ငႃးၸၢင်ႉ၊လိင်း၊ၼူၵ်ႉယုင်းလႂ်လႄႈၶိုၼ်းမႃးဢေႃႈ။
၂၂ ၼင်ႇၼၼ်လႄႈၶုၼ်လူင်သေႃးလမုၼ်ႇမီးၸေးၸိမ်ႇတင်းပိင်ႇၺႃႇယိင်ႈၶႅၼ်းလိူဝ်တွၼ်းၼႃႇသေၶုၼ်ႁေႃၶမ်းၵႃႈဢၼ်မီးၵႃႈၼိူဝ်လိၼ်မိူင်းတင်းသဵင်တင်းမူတ်းၼၼ်ႉဢေႃႈ။
၂၃ ၶုၼ်ႁေႃၶမ်းၵႃႈၼိူဝ်လိၼ်မိူင်းတင်းသဵင်ႈတင်းလူင်ဢွၼ်ၵၼ်မႃးၵႃႈတီႈသေႃးလမုၼ်ႇႁႂ်ႈလႆႈငိၼ်းၵႂၢမ်းပိင်ႇၺႃႇဢၼ်ၽြႃးပဵၼ်ၸဝ်ႈသႂၢင်းသႂ်ႇပၼ်ၵႃႈၼႂ်းႁူဝ်ၸႂ်မၼ်းၼၼ်ႉဢေႃႈ။
၂၄ ၶဝ်ၸိူဝ်းဢၼ်မႃးႁင်းၽႂ်ႁင်းမၼ်းၼၼ်ႉဢွၼ်ၵၼ်လႆႈသၢၵ်ႈၵွၵ်းၶမ်းၵွၵ်းငိုၼ်းၶိူင်ႈၼုင်ႈတၢင်းမႆႊလၢၵ်ႈၼၢၵ်ႈတိုၵ်းသိုၵ်း၊မဵဝ်းၼၢမ်ႇသႃႇ၊မႃႉလႂ်၊မႃႉလီႈလႂ်၊ၵူႈပီႊၵူႈပီႊဢေႃႈ။
၂၅ သေႃးလမုၼ်ႇမီးထၼ်မႃႉဢၼ်ၸၢပ်ႈသႅင်ႇၵၼ်တင်းလေႃႉရထႃးၸဝ်ႈၼၼ်ႉသီႇႁဵင်ႁူဝ်ႁၢၼ်ၵူၼ်းသိုၵ်းၶီႇမႃႉမိုၼ်ႇပၢႆသွင်ႁဵင်၊ဢၼ်မၼ်းဢဝ်ဝႆႉၵႃႈတီႈဝဵင်းဢၼ်ထိင်းလေႃႉရထႃးၸဝ်ႈဢိၵ်ႇတင်းၵႃႈတီႈမၼ်းၵႃႈၼႂ်းဝဵင်းယေႇရုသလႅမ်ႇၼၼ်ႉဢေႃႈ။
၂၆ မၼ်းၸဝ်ႈဢုပ်ႉပိူင်ႇၶုၼ်ႁေႃၶမ်းဢၼ်မီးၵႃႈတီႈၸႃႉၸဵမ်ၼမ်ႉႁွင်ႊလူင်တေႃႇထိုင်ႁွတ်ႈမိူင်းၽိလိတ်ႉတိဢိၵ်ႇတင်းၶွပ်ႇၼမ်ႉလႅၼ်လိၼ်မိူင်းဢေႇၵႅပ်ႉတုၼၼ်ႉဢေႃႈ။
၂၇ ၶုၼ်ႁေႃၶမ်းႁႂ်ႈငိုၼ်းၼမ်ၼႃႇမိူၼ်ၸိူဝ်ႉၼင်ႇမၢၵ်ႇႁိၼ်မၢၵ်ႇသၢႆးၵႃႈၼႂ်းဝဵင်းယေႇရုသလႅမ်ႇလႄႈႁႂ်ႈတူၼ်ႈဢႃႇရိတ်ႉၼမ်ၼႃႇမိူၼ်ၸိူဝ်ႉၼင်ႇတူၼ်ႈမၢၵ်ႇလိူဝ်ႇသၢင်းၽေႃးဢၼ်ဢွၵ်ႇၵႃႈတီႈတႂ်ႈတီႈဢၼ်ပၢင်ႇဢၼ်ပဵင်းၼၼ်ႉဢေႃႈ။
၂၈ ၶဝ်ဢွၼ်ၵၼ်ဢဝ်မႃႉဢွၵ်ႇသေၵႃႈၼႂ်းမိူင်းဢေႇၵႅပ်ႉတုဢိၵ်ႇတင်းၵႃႈၼႂ်းၵူႈၸိုင်ႈၵူႈမိူင်းမႃးတီႈသေႃးလမုၼ်ႇဢေႃႈ။
ၶုၼ်ႁေႃၶမ်းသေႃးလမုၼ်ႇတၢႆ
၂၉ လွင်ႈတၢင်းသေႃးလမုၼ်ႇဢၼ်ယင်းၵိုတ်းယင်းၵျၢၼ်ႇၸဵမ်ငဝ်ႈတေႃႇပၢႆၸိူဝ်းၼၼ်ႉၸိုင်တႅမ်ႈမၢႆဝႆႉမီးယူႇၵႃႈၼႂ်းၵျၢမ်းလိၵ်ႈပရေႃးၽႅတ်ႈၼႃႇသၼ်ႇ၊ၵျၢမ်းလိၵ်ႈဢၼႃႇၵၢတ်ႈတိဢႁိယၵူၼ်းဝဵင်းသိလေႃႇ၊ပျႃႇတိၵ်ႈဢိတေႃႇဢၼ်ပဵၼ်ၵေႃႉဢၼ်ႁူပွင်ႇတႃလႅင်းဢၼ်ယူႇၽၢႆႇၼိုင်ႈသေလႄႈလၢတ်ႈလူၺ်ႈလွင်ႈယေႇရူဝ်ႇပုမ်ႇလုၵ်ႈၸၢႆးၼေႇပတ်ႈၸိူဝ်းၼၼ်ႉဢေႃႈ။
၃၀ သေႃးလမုၼ်ႇၼၼ်ႉယူႇၵႃႈၼႂ်းဝဵင်းယေႇရုသလႅမ်ႇလႄႈဢုပ်ႉပိူင်ႇၸၢမ်ႇၸႃးမိူင်းဢိသရေႇလတင်းသဵင်ႈတင်းမူတ်းသီႇသိပ်းပီႊတဵမ်တဵမ်သေယဝ်ႉ
၃၁ သေႃးလမုၼ်ႇၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းဝဵင်းတႃႇဝိတ်ႉၸဝ်ႈပေႃႈမၼ်းၼၼ်ႉဢေႃႈ။ရူဝ်ႇပုမ်ႇလုၵ်ႈၸၢႆးမၼ်းၼင်ႈႁၢင်ႈၼင်ႈႁေႃတၢင်တူဝ်မၼ်းဢေႃႈ။