Chapter
၆
၁ မိူဝ်ႈၼၼ်ႉသေႃးလမုၼ်ႇဢွၵ်ႇသူပ်းလႄႈဝႃႈ၊-ထႃႇဝရႃႉၽြႃးလၢတ်ႈလူၺ်ႈလွင်ႈဢၼ်မၼ်းၸဝ်ႈတၵ်းယူႇၵႃႈၼႂ်းမွၵ်ႇၵုမ်ႈဢၼ်လပ်းသိင်ႇၼႃတၼ်ၼႃႇၼၼ်ႉဢေႃႈ။
၂ ၵူၺ်းၵႃႈၶႃႈၸဝ်ႈတႄႇႁဵတ်းႁိူၼ်းတီႈဢၼ်ၸဝ်ႈႁဝ်းတၵ်းၵိင်းဝပ်ႈယူႇ၊ထႃႇၼႃႉတီႈဢၼ်ၸဝ်ႈႁဝ်းတၵ်းယူႇတၵ်းသဝ်းတႃႇသေႇၼၼ်ႉတီႈၶႃႈယဝ်ႉ၊ဝႃႈၼင်ႇၼႆဢေႃႈ။
၃ လၢႆးသမ်ႉၶုၼ်ႁေႃၶမ်းဝၢႆႇၼႃႈတူၺ်းလႄႈပၼ်တၢင်းလီတီႈပရိၵ်ႈသၢတ်ႈမဵဝ်းဢိသရေႇလတင်းသဵင်ႈတင်းလူင်လႄႈပရိၵ်ႈသၢတ်ႈမဵဝ်းဢိသရေႇလတင်းသဵင်ႈတင်းလူင်ဢွၼ်ၵၼ်ၸုၵ်းယူႇဢေႃႈ။မၼ်းဢွၵ်ႇသူပ်းလႄႈဝႃႈ၊-
၄ ႁႂ်ႈထႃႇဝရႃႉၽြႃးၽြႃးပဵၼ်ၸဝ်မဵဝ်းဢိသရေႇလၽြႃးဢၼ်ဝႆႉပျႃႇတိၵ်ႈၸဝ်ႈတီႈၸဝ်ႈပေႃႈၵဝ်တႃႇဝိတ်ႉၸွမ်းၵႃႈၼင်ႇပျႃႇတိၵ်ႈၸဝ်ႈမီးဝႆႉဝႃႈ၊-
၅ ၸႃႉၸဵမ်မိုဝ်ႉဝၼ်းဢၼ်ၵဝ်ၼုၵ်ႈဢဝ်ၵူၼ်းၵဝ်တင်းလၢႆဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉပိၵ်ႉသမ်ႉၵဝ်ဢမ်ႇလိူၵ်ႈၵဵပ်းဢဝ်ဝဵင်းသတေီႈသဝေဵင်းၵႃႈၼႂ်းလိၼ်မဵဝ်းဢိသရေႇလႁႂ်ႈလႆႈတႄႇႁဵတ်းႁိူၼ်းတီႈဢၼ်ၼႃႇမႃႉၸိုဝ်သဵင်ၵဝ်တၵ်းတႄႇယူႇၼၼ်ႉလႄႈဢမ်ႇလိူၵ်ႈၵဵပ်းဢဝ်ၵေႃႉဢၼ်တၵ်းဢုပ်ႉၵႃႈၼိူဝ်ၵူၼ်းၵဝ်မဵဝ်းဢိသရေႇလတင်းလၢႆၼၼ်ႉသေၵေႃႈ
၆ မိူဝ်ႈလဵဝ်ၼႆႉၵဝ်လိူၵ်ႈၵဵပ်းဢဝ်ဝဵင်းယေႇရုသလႅမ်ႇတီႈဢၼ်ၼႃႇမႃႉၸိုဝ်သဵင်ၵဝ်တၵ်းတႄႇယူႇဢိၵ်ႇတင်းလိူၵ်ႈၵဵပ်းဢဝ်တႃႇဝိတ်ႉႁႂ်ႈမၼ်းလႆႈဢုပ်ႉၵႃႈၼိူဝ်ၵူၼ်းၵဝ်မဵဝ်းဢိသရေႇလတင်းလၢႆၼၼ်ႉယဝ်ႉ၊ဝႃႈၼင်ႇၼႆၼၼ်ႉ၊မီးမၢင်ႇၵလႃႇသေၵမ်းလူၺ်ႈ။
၇ ၸဝ်ႈပေႃႈၵဝ်တႃႇဝိတ်ႉၼၼ်ႉမီးတၢင်းၵျၢမ်ႇတၢင်းပွင်တၵ်းတႄႇႁဵတ်းႁိူၼ်းပုၼ်ႈၼႃႇမႃႉၸိုဝ်သဵင်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလဢေႃႈ။
၈ ၵူၺ်းၵႃႈထႃႇဝရႃႉၽြႃးမီးဢမိင်ႉတီႈၸဝ်ႈပေႃႈၵဝ်တႃႇဝိတ်ႉလႄႈဝႃႈ၊-ၵွပ်ႈပိူဝ်ႈဢၼ်မႂ်းမီးတၢင်းၵျၢမ်ႇတၢင်းပွင်တၵ်းတႄႇႁဵတ်းႁိူၼ်းၸဝ်ႈပုၼ်ႈၼႃႇမႃႉၸိုဝ်သဵင်ၵဝ်လႄႈလွင်ႈတၢင်းဢၼ်မီးၼႂ်းၸႂ်မႂ်းၼၼ်ႉပဵၼ်ဢၼ်လီယဝ်ႉ။
၉ ၼႂ်းဝႃႈၼၼ်သေၵေႃႈမႂ်းတၵ်းဢမ်ႇလႆႈတႄႇႁဵတ်းႁိူၼ်းၸဝ်ႈ။လုၵ်ႈၸၢႆးဢွၵ်ႇမႂ်းၼၼ်ႉတၵ်းလႆႈတႄႇႁဵတ်းႁိူၼ်းၸဝ်ႈပုၼ်ႈၼႃႇမႃႉၸိုဝ်သဵင်ၵဝ်ဢေႃႈဝႃႈၼင်ႇၼႆဢေႃႈ။
၁၀ ထႃႇဝရႃႉၽြႃးၼၼ်ႉႁဵတ်းၸွမ်းၵႃႈၼင်ႇဢၼ်ဢမိင်ႉၸဝ်ႈမီးၼၼ်ႉသေလႄႈၵဝ်လႆႈပေႃႇပဵၼ်မႃးတၢင်တူဝ်ၸဝ်ႈပေႃႈၵဝ်တႃႇဝိတ်ႉသေလႄႈၼင်ႈယူႇၵႃႈၼိူဝ်ရႃႇၸႃႉပလၢင်ႇသိုင်ႇၸိုင်ႈဝၢၼ်ႈမိူင်းဢိသရေႇလမႅၼ်ႈၸွမ်းၵႃႈၼင်ႇဢၼ်ထႃႇဝရႃႉၽြႃးမီးၵတီႉၸဝ်ႈဝႆႉၼၼ်ႉသေလႄႈတႄႇႁဵတ်းႁိူၼ်းၸဝ်ႈပုၼ်ႈၼႃႇမႃႉၸိုဝ်သဵင်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလယဝ်ႉ။
၁၁ ၵႃႈၼႂ်းႁိူၼ်းၸဝ်ႈၼၼ်ႉၵေႃႈၵဝ်ဢဝ်တိူၵ်ႈတႃႇၸဝ်ႈဢၼ်ပႃးလိၵ်ႈမၢၵ်ႇႁိၼ်ပတိၺိၼ်ႇထႃႇဝရႃႉၽြႃးဢၼ်မၼ်းၸဝ်ႈႁဵတ်းလူၺ်ႈၵၼ်တင်းၵူၼ်းမဵဝ်းဢိသရေႇလတင်းလၢႆၼၼ်ႉသႂ်ႇဝႆႉယဝ်ႉ၊ဝႃၼင်ႇၼႆဢေႃႈ။
သေႃးလမုၼ်ႇသူးတွင်းသၢၵ်ႈၵၢပ်ႈ
၁၂ လၢႆးသမ်ႉသေႃးလမုၼ်ႇၸုၵ်းယူၵႃႈတီႈၽၢႆႇၼႃႈယိတ်ႉပလၢင်ႇထႃႇဝရႃႉၽြႃးသိုဝ်ႈၼႃႈတႂ်ႈတႃပရိၵ်ႈသၢတ်ႈမဵဝ်းဢိသရေႇလတင်းသဵင်ႈတင်းလူင်သေလႄႈၵီႈၽႃႇမိုဝ်းမၼ်းၶိုၼ်ႈၵႃႈၼိူဝ်ဢေႃႈ။
၁၃ ၵွပ်ႈပိူဝ်ႈဢၼ်သေႃးလမုၼ်ႇႁဵတ်းပလၢင်ႇတွင်းလိူင်ဢၼ်ၼႃႈယၢဝ်းမၼ်းမီးႁႃႈသွၵ်ႇ၊ၼႃႈပွတ်းမၼ်းမီးႁႃႈသွၵ်ႇဢၼ်သုင်မၼ်းမီးသၢမ်သွၵ်ႇၼၼ်ႉသေလႄႈဝႆႉၵႃႈၼႂ်းတမ်ႇတိူင်းၼၼ်ႉသေယဝ်ႉမၼ်းၸုၵ်းယူႇၵႃႈၼိူဝ်ပလၢင်ႇၼၼ်ႉသေလႄႈၶုပ်ႉၶဝ်ႇၵႃႈတီႈၽၢႆႇၼႃႈပရိၵ်ႈသၢတ်ႈမဵဝ်းဢိသရေႇလတင်းသဵင်ႈတင်းလူင်
သေယဝ်ႉၵီႈၽႃႇမိုဝ်းမၼ်းၶိုၼ်ႈၵႃႈၼိူဝ်ၵၢင်ႁၢဝ်ယူႇသေလႄႈႁဵတ်းသူးတွင်းပထၼႃႇလႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလတီႈၶႃႈ။
၁၄ ၵႃႈၼိူဝႃ်ႉၵၢင်ႁၢဝ်၊ၵႃႈၼိူဝ်လိၼ်မိူင်းၼႆႉၽြႃးဢၼ်မိူၼ်ၵၼ်တင်းၸဝ်ႈႁဝ်းဢၼ်ပႂ်ႉၵမ်ပႂ်ႉၸွမ်းပတိၺိၼ်ႇတြႃးဢိၵ်ႇတင်းၵရူႉၼႃႇတြႃးပုၼ်ႈၶႃႈၸဝ်ႈႁဝ်းတင်းလၢႆ
၁၅ ဢၼ်ပႃးတင်းႁူဝ်ၸႂ်သဵင်ႈသဵင်ႈၵႂႃႇမႃးၵႃႈတီႈၽၢႆႇၼႃႈၸဝ်ႈႁဝ်းဢၼ်ႁဵတ်းတီႈၶႃႈၸဝ်ႈႁဝ်းၸဝ်ႈပေႃႈၶႃႈၸဝ်ႈတႃႇဝိတ်ႉၸွမ်းၵႃႈၼင်ႇဢၼ်ၸဝ်ႈႁဝ်းဝႆႉၵတိတီႈမၼ်းဢၼ်မီးဢမိင်ႉဢွၵ်ႇသူပ်းဝႃႈတီႈမၼ်းလႄႈႁႂ်ႈတဵမ်ထူၼ်ႈပဵၼ်မိူၼ်ၸိူဝ်ႉၼင်ႇဢၼ်ပဵၼ်ဝၼ်းမိူဝ်ႈၼႆႉၼၼ်ႉ၊ဢမ်ႇမီးသပေႃးတီႈၶႃႈယဝ်ႉ။
၁၆ ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလတီႈၶႃႈ။မိူဝ်ႈလဵဝ်ၼႆႉၶႅၼ်းတေႃႈပႂ်ႉၸွမ်းၵတိၸဝ်ႈဢၼ်ၸဝ်ႈႁဝ်းဝႆႉတီႈၶႃႈၸဝ်ႈႁဝ်းၸဝ်ႈပေႃႈၶႃႈၸဝ်ႈတႃႇဝိတ်ႉၼၼ်ႉလႄႈမီးဢမိင်ႉဝႆႉလႄႈဝႃႈ၊-ပေႃးလုၵ်ႈမႂ်းလၢၼ်မႂ်းႁဵတ်းသတိပႂ်ႉၵမ်ပႂ်ႉၸွမ်းသဵၼ်ႈတၢင်းတြႃးၵဝ်မိူၼ်ၸိူဝ်ႉၼင်ႇဢၼ်မႂ်းၵႂႃႇမႃးၵႃႈတီႈၽၢႆႇၼႃႈၵဝ်ၼၼ်ႉၸိုင်မဵဝ်းၸိူဝ်ႉၶိူဝ်းမႂ်းဢၼ်လႆႈၼင်ႈၵႃႈၼိူဝ်ရႃႇၸႃႉပလၢင်ႇသိုင်ႇၸိုင်ႈဝၢၼ်ႈမိူင်းဢိသရေႇလသိုဝ်ႈၼႃႈတႂ်ႈတႃၵဝ်ၼႆႉဢမ်ႇလႆႈထၢတ်ႇလႆႈဝၢႆး၊ဝႃႈၼင်ႇၼႆဢေႃႈ။
၁၇ ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလတီႈၶႃႈ။မိူဝ်ႈလဵဝ်ၼႆႉၶႅၼ်းတေႃႈႁႂ်ႈၵႂၢမ်းၸဝ်ႈႁဝ်းဢၼ်ၸဝ်ႈႁဝ်းမီးဢမိင်ႉဝႆႉတီႈၶႃႈၸဝ်ႈႁဝ်းၸဝ်ႈပေႃႈၶႃႈၸဝ်ႈတႃႇဝိတ်ႉၼၼ်ႉႁႂ်ႈလႆႈတဵမ်ထူၼ်ႈသေၵမ်းတီႈၶႃႈ။
၁၈ ၼႂ်းဝႃႈၼၼ်သေၵေႃႈၽြႃးပဵၼ်ၸဝ်ႈတၵ်းၵိင်းဝပ်ႈယူႇၵႃႈၼႂ်းၵူၼ်းတင်းလၢႆၵႃႈၼိူဝ်လိၼ်မိူင်းၼႆႉဢမၢၼ်ႇၶၢၼ်ပဵၼ်တီႈၶႃႈႁိုဝ်။တူၺ်းတီႈၶႃႈလူ။ၵၢင်ႁၢဝ်ဢိၵ်ႇတင်းၵၢင်ႁၢဝ်ဢၼ်ပဵၼ်ၸိၵ်းၸွမ်ၵၢင်ႁၢဝ်ၼၼ်ႉဢမ်ႇပေႃးဢမ်ႇၶၢမ်ႇၸဝ်ႈႁဝ်းလႆႈလႄႈႁိူၼ်းဢၼ်ၶႃႈၸဝ်ႈတႄႇႁဵတ်းၼႆႉယိင်ႈၶႅၼ်းတၵ်းဢမ်ႇပေႃးဢမ်ႇၶၢမ်ႇၸဝ်ႈႁဝ်းလႆႈတီႈၶႃႈ။
၁၉ ၼႂ်းဝႃႈၼၼ်သေၵေႃႈထႃႇဝရႃႉၽြႃးၽြႃးပဵၼ်ၸဝ်ႈၵဝ်ၶႃႈတီႈၶႃႈ။ၶႅၼ်းတေႃႈႁူၸႅင်ႈထွမ်ႇဢဝ်တၢင်းဢၼ်ၶႃႈၸဝ်ႈႁဝ်းသူးတွင်းလႄႈလဝ်ႈယွၼ်း၊ၶႅၼ်းတေႃႈႁပ်ႉတုင်းဢဝ်ၵႂၢမ်းဢၼ်ၶႃႈၸဝ်ႈႁဝ်းႁွင်ႉသႅၼ်ႇလႄႈႁဵတ်းပထၼႃႇၵႃႈတီႈၽၢႆႇၼႃႈၸဝ်ႈႁဝ်းၼၼ်ႉသေၵမ်းတီႈၶႃႈ။
၂၀ ၶႅၼ်းတေႃႈမိုၼ်းတႃၽုၺ်ႇတႃၸဝ်ႈႁဝ်းၸူးၵႃႈတီႈႁိူၼ်းၸဝ်ႈၼႆႉၵူႈဝၼ်းၵူႈၶိုၼ်းဢမ်ႇထၢတ်ႇဢၼ်ၸဝ်ႈႁဝ်းမီးဢမိင်ႉလွင်ႈဢၼ်ၸဝ်ႈႁဝ်းတၵ်းႁႂ်ႈၼႃႉမႃႉၸိုဝ်သဵင်ၸဝ်ႁဝ်းတႄႇယူႇၵႃႈတီႈၼႆႉၼၼ်ႉလႄႈထွမ်ႇဢဝ်ၵႂၢမ်းဢၼ်ၶႃႈၸဝ်ႈသူးတွင်းၸူးၵႃႈတီႈၼႆႉၼၼ်ႉသေၵမ်းတီႈၶႃႈ။
၂၁ ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်တီႈဢၼ်ၸဝ်ႈႁဝ်းၵိင်းဝပ်ႈယူႇၼၼ်ႉသေလႄႈထွမ်ႇငိၼ်းၵႂၢမ်းဢၼ်ၶႃႈၸဝ်ႈဢိၵ်ႇတင်းၵူၼ်းၸဝ်ႈႁဝ်းၵူၼ်းမဵဝ်းဢိသရေႇလတင်းလၢႆႁဵတ်းပထၼႃႇလဝ်ႈယွၼ်းသူးတွင်းၸူးၵႃႈတီႈၼႆႉၼၼ်ႉသေလႄႈပွႆႇလွတ်ႈၵႃႈၼႂ်းဢပျႅတ်ႈသေၵမ်းတီႈၶႃႈ။
၂၂ ပေႃးသေၵေႃႉသေၵူၼ်းၽိတ်းပိူင်ႈၵူၼ်းႁိူၼ်းၸမ်ၵၼ်တင်းမၼ်းၼၼ်ႉသေလႄႈမၼ်းမႃးႁႂ်ႈလႆႈႁဵတ်းတၢင်းဢၼ်ၵိၼ်ႇဝႃႈၵႃႈတီႈၽၢႆႇၼႃႈယိတ်ႉပလၢင်ႇၸဝ်ႈႁဝ်းၵႃႈၼႂ်းႁိူၼ်းၸဝ်ႈၼၼ်ႉၸိုင်
၂၃ ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်သေလႄႈထွမ်ႇငိၼ်းသေယဝ်ႉႁဵတ်းၸွမ်းလႄႈတႅပ်းတတ်းတြႃးတီႈၶႃႈၸဝ်ႈႁဝ်းတင်းလၢႆလႄႈၸီႇယၢင်ႇပၼ်တၢမ်ႇဢပျႅတ်ႈတီႈၵေႃႉဢၼ်ဢမ်ႇတြႃးၼၼ်ႉသေယဝ်ႉႁႂ်ႈဢပျႅတ်ႈမၼ်းတူၵ်းႁွတ်ႈၵႃႈၼိူဝ်ႁူဝ်မၼ်းသေလႄႈၸီႇယၢင်ႇတၢင်းဢၼ်သိုဝ်ႈတေႃႇတီႈၵေႃႉဢၼ်သိုဝ်ႈတေႃႇၼၼ်ႉလႄႈပၼ်ၸွမ်းၵႃႈၼင်ႇဢၼ်သိုဝ်ႈတေႃႇၼၼ်ႉသေၵမ်းတီႈၶႃႈ။
၂၄ ယၢမ်းမိူဝ်ႈဢၼ်ၵူၼ်းၸဝ်ႈႁဝ်းၵူၼ်းမဵဝ်းဢိသရေႇလတင်းလၢႆၸူႉၵၼ်တုမ်ၵၼ်ၵႃႈတီႈၽၢႆႇၼႃႈရၢၼ်ႇသူႇၵွပ်ႈပိူဝ်ႈဢၼ်ၶဝ်ၽိတ်းပိူင်ႈၸဝ်ႁဝ်းၼၼ်ႉၸိုင်ပေႃးၶဝ်ၶိုၼ်းမႃးတီႈၸဝ်ႈႁဝ်းလႄႈႁပ်ႉတုင်းဢဝ်ၼႃႇမႃႉၸိုဝ်သဵင်ၸဝ်ႈႁဝ်းယူႇႁဵတ်းသူးတွင်းပထၼႃႇလဝ်ႈ
၂၅ ယွၼ်းၵႃႈတီႈၽၢႆႇၼႃႈၸဝ်ႈႁဝ်းၵႃႈၼႂ်းႁိူၼ်းၸဝ်ႈၼႆႉၸိုင်ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်လႄႈထွမ်ႇငိၼ်းလႄႈပွႆႇၵူၼ်းၸဝ်ႈႁဝ်းၵူၼ်းမဵဝ်းဢိသရေႇလတင်းလၢႆလွတ်ႈသေၵႃႈၼႂ်းဢပျႅတ်ႈသေလႄႈသမ်ႉဢဝ်ၶိုၼ်းသူင်ႇႁွတ်ႈထိုင်ၵႃႈၼႂ်းမိူင်းဢၼ်ၸဝ်ႈႁဝ်းဢိတ်းလူပၼ်တီႈၶဝ်ဢိၵ်ႇတင်းပူႇမွၼ်ႇၶဝ်ၸိူဝ်းၼၼ်ႉသေၵမ်းတီႈၶႃႈ။
၂၆ ယၢမ်းမိူဝ်ႈဢၼ်ၽူၼ်ဢမ်ႇတူၵႃ်းႉလႅင်ႉၵွပ်ႈပိူဝ်ႈဢၼ်ၶဝ်ၽိတ်းပိူင်ႈၸဝ်ႈႁဝ်းၼၼ်ႉၸိုင်ပေႃးၶဝ်သူးတွင်းၸူးၵႃႈတီႈထႃႇၼႃႉတီႈၼႆႉလႄႈႁပ်ႉတုင်းဢဝ်ၼႃႇမႃႉၸိုဝ်သဵင်ၸဝ်ႈႁဝ်းယူႇသေလႄႈၸုၼ်ႉပႅတ်ႈတူႉၸရိူၵ်ႈၶဝ်မိူဝ်ႈဢၼ်ၸဝ်ႈႁဝ်းသင်ႇသွၼ်သုင်းမႃႉၶဝ်ၼၼ်ႉၸိုင်ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်သေလႄႈ
၂၇ ထွမ်ႇငိၼ်းလႄႈပွႆႇၶႃႈၸဝ်ႈႁဝ်းၵူၼ်းၸဝ်ႈႁဝ်းၵူၼ်းမဵဝ်းဢိသရေႇလတင်းလၢႆလွတ်ႈသေၵႃႈၼႂ်းဢပျႅတ်ႈၼႂ်းမိူဝ်ႈဢၼ်ၸဝ်ႈႁဝ်းၸီႉၼႄသဵၼ်ႈတၢင်းဢၼ်လီဢၼ်ငၢမ်းဢၼ်ၶဝ်ထုၵ်ႇလီၸွမ်းၼၼ်ႉတီႈၶဝ်လႄႈႁႂ်ႈၽူၼ်တူၵ်းၵႃႈၼိူဝ်လိၼ်ဢၼ်ၸဝ်ႈႁဝ်းပၼ်ဢမူၺ်ႇတီႈၵူၼ်းၸဝ်ႈႁဝ်းတင်းလၢႆၼႆႉသေၵမ်းတီႈၶႃႈ။
၂၈ ၵႃးၼႂ်းမိူင်းၸဝ်ႈၼႆႉပေႃးပဵၼ်တၢင်းဢၼ်ၶဝ်ႈၵႃႈမၢၵ်ႇပႅင်းပေႃးပဵၼ်ၽေးၵႃႇလႃႉႁႃႈလႅင်ႉမိူင်းပေႃးပဵၼ်တၢင်းဢၼ်လူမ်းတိူဝ်ႉထုၵ်ႇသႂ်ႇလႄႈတူၼ်ႈမႆႉတၢႆ၊တၢင်းဢၼ်ၼမ်ႉႁူဝ်ႈယွတ်ႇလႄႈတူၼ်ႈမႆႉတၢႆ၊ပေႃးပဵၼ်တၢင်းဢၼ်မႅင်းၵႅင်းဢရႃႇၽ၊မႅင်းၵႅင်းၶႃႇသိလၶူပ်းၵိၼ်၊ပေႃးပဵၼ်တၢင်းဢၼ်ရၢၼ်ႇသူႇၶဝ်တင်းလၢႆမႃးဝႅင်းလွမ်ႉႁွပ်ႈၼမ်ႉလိၼ်ဝၢၼ်ႈဝဵင်းၶဝ်ပေႃးပဵၼ်ၽေးဢူးပၢတ်ႈမဵဝ်းလႂ်သေဢမ်ႇဝႃႈ၊
၂၉ ပေႃးပဵၼ်တၢင်းၶႆႈတၢင်းပဵၼ်မဵဝ်းလႂ်သေဢမ်ႇဝႃႈ၊ၼၼ်ႉၸိုင်ပေႃးသေၵေႃႉသေၵူၼ်းဢမ်ႇၼၼ်ၵူၼ်းၸဝ်ႈႁဝ်းၵူၼ်းမဵဝ်းဢိသရေႇလတင်းသဵင်ႈတင်းလူင်ဢၼ်ႁူႉၽေးတၢမ်ႇတုၵ်ႉၶႃႉဢၼ်လႆႈၶၢမ်ႇႁင်းၽႂ်ႁင်းမၼ်းၼၼ်ႉသေလႄႈၵီႈၽႃႇမိုဝ်းၶဝ်ၸူးၵႃႈတီႈႁိူၼ်းၸဝ်ႈၼႆႉလႄႈဢဝ်တင်းၵႂၢမ်းပထၼႃႇတၢင်းဢၼ်သူးတွင်းလဝ်ႈယွၼ်းသေၸိူဝ်ႉသပေိူင်တီႈၸဝ်ႈႁဝ်းၸိုင်
၃၀ ၸဝ်ႈႁဝ်းၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်သေလႄႈထွမ်ႇငိၼ်းသေယဝ်ႉပွႆႇလွတ်ႈဢပျႅတ်ႈသေလႄႈၸီႇယၢင်ႇတီႈၵူၼ်းဢၼ်ၸဝ်ႈႁဝ်းႁူႉသၽေႃးႁူဝ်ၸႂ်ၶဝ်ႁင်းၽႂ်ႁင်းမၼ်းၼၼ်ႉၸွမ်းၵႃႈၼင်ႇသဵၼ်ႈတၢင်းဢၼ်ၶဝ်ၵႂႃႇမႃးၵႃႈမီးၵွပ်ႈပိူဝ်ႈဢၼ်ၸဝ်ႈႁဝ်းၵူၺ်းႁူႉသၽေႃးႁူဝ်ၸႂ်ၵူၼ်းသတ်ႉတဝႃႇတင်းသဵင်ႈတင်းလူင်ၼၼ်ႉလႄႈႁႂ်ႈၶဝ်ၵူဝ်ယမ်ၸဝ်ႈႁဝ်းသေယဝ်ႉ
၃၁ ၸွမ်းသဵၼ်ႈတၢင်းတြႃးၸဝ်ႈႁဝ်းယူႇၶိင်ႇၵႃႇလႃႉမိုဝ်ႉဝၼ်းဢၼ်ၶဝ်ဢသၢၵ်ႈလိပ်းယူႇၵႃႈၼႂ်းမိူင်းဢၼ်ၸဝ်ႈႁဝ်းဢိတ်းလူပၼ်တီႈပူႇမွၼ်ႇႁဝ်းၸိူဝ်းၼႆႉၼၼ်ႉသေၵမ်းတီႈၶႃႈ။
၃၂ ပေႃးၵူၼ်းတၢင်ႇၸိူဝ်ႉတၢင်ႇမဵဝ်းဢၼ်ဢမ်ႇၸႂ်ႈၵူၼ်းၸဝ်ႈႁဝ်းမဵဝ်းဢိသရေႇလၼၼ်ႉထွၵ်ႈလူၺ်ႈၼႃႇမႃႉၸိုဝ်သဵင်ၸဝ်ႈႁဝ်းဢၼ်မျၢတ်ႈၼႃႇဢိၵ်ႇတင်းမိုဝ်းၸဝ်ႈႁဝ်းဢၼ်တၼ်းၶူဝ်းယႂ်ႇၼႃႇတင်းၶႅၼ်ၸဝ်ႈႁဝ်းဢၼ်ယဵတ်ႇယိုၼ်းၼၼ်ႉသေလႄႈလုၵ်ႉသေၵႃႈတီႈမိူင်းဢၼ်ၵႆမႃးလႄႈႁွတ်ႈမႃးသေယဝ်ႉသူးတွင်းၵႃႈတီႈႁိူၼ်းၸဝ်ႈၼႆႉၸိုင်၊
၃၃ ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်တီႈဢၼ်ၸဝ်ႈႁဝ်းၵိင်းဝပ်ႈယူႇၼၼ်ႉသေလႄႈထွမ်ႇငိၼ်းလႄႈႁဵတ်းၸွမ်းၵႃႈၼင်ႇဢၼ်ၵူၼ်းတၢင်ႇၸိူဝ်ႉတၢင်ႇမဵဝ်းၼၼ်ႉသူးတွင်းလဝ်ႈယွၼ်းၼၼ်ႉႁႂ်ႈၵူၼ်းလိၼ်မိူင်းတင်းသဵင်ႈတင်းလူင်ႁူႉၸၵ်းၼႃႇမႃႉၸိုဝ်သဵင်ၸဝ်ႈႁဝ်းလႄႈၵူဝ်ယမ်ၸဝ်ႈႁဝ်းမိူၼ်ၸိူဝ်ႉၼင်ႇဢၼ်ၵူၼ်းၸဝ်ႈႁဝ်းၵူၼ်းမဵဝ်းဢိသရေႇလတင်းလၢႆၵူဝ်ယမ်ၸဝ်ႈႁဝ်းၼၼ်ႉလႄႈႁႂ်ႈၶဝ်ႁူႉလွင်ႈဢၼ်ႁိူၼ်းၸဝ်ႈဢၼ်ၶႃႈၸဝ်ႈတႄႇႁဵတ်းၼႆႉလႆႈၶၢမ်ႇတၢင်းဢၼ်ဢဝ်ၼႃႇမႃႉၸိုဝ်သဵင်ၸဝ်ႈႁဝ်းႁွင်ႉႁိၵ်ႈၼၼ်ႉသေၵမ်းတီႈၶႃႈ။
၃၄ ယၢမ်းမိူဝ်ႈဢၼ်ၵူၼ်းၸဝ်ႈႁဝ်းၶီႇသိုၵ်းၵႂႃႇတီႈရၢၼ်ႇသူႇၶဝ်ၸွမ်းၵႃႈၼင်ႇဢၼ်ၸဝ်ႈႁဝ်းပွႆႇၸႂ်ႉၶဝ်ၵႂႃႇၼၼ်ႉလႄႈမိူဝ်ႈဢၼ်ၶဝ်ဢွၼ်ၵၼ်သူးတွင်းယွၼ်းၸူးတေႃႇၵႃႈတီႈဝဵင်းဢၼ်ၸဝ်ႈႁဝ်းလိူၵ်ႈၵဵပ်းဢဝ်၊
၃၅ ဢိၵ်ႇတင်းႁိူၼ်းၸဝ်ႈႁဝ်းဢၼ်ၶႃႈၸဝ်ႈတႄႇႁဵတ်းပုၼ်ႈၼႃႇမႃႉၸိုဝ်သဵင်ၸဝ်ႈႁဝ်းၼႆႉၼၼ်ႉၸိုင်၊ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်သေလႄႈထွမ်ႇငိၼ်းဢဝ်ၵႂၢမ်းဢၼ်ၶဝ်သူးတွင်းလဝ်ႈယွၼ်းၼၼ်ႉလႄႈပႂ်ႉဢမူႉၶဝ်သေၵမ်းတီႈၶႃႈ။
၃၆ ၵွပ်ႈပိူဝ်ႈဝႃႈၵေႃႉဢၼ်ဢမ်ႇၸၢင်ႊၽိတ်းပိူင်ၼၼ်ႉဢမ်ႇမီးသေၵေႃႉသေၵူၼ်းလႄႈပေႃးၶဝ်ၽိတ်းပိူင်ႈၸဝ်ႈႁဝ်းလႄႈၸဝ်ႈႁဝ်းၸႂ်မႆႈၶႆႈၸႃႉတီႈၶဝ်လႄႈၸဝ်ႈႁဝ်းဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၶဝ်ထၼ်ႈပေႃးရၢၼ်ႇသူႇၸိူဝ်းၼၼ်ႉ
၃၇ သိမ်းဢဝ်ၶဝ်ၵႂႃႇၵႃႈတီႈမိူင်းဢၼ်ၵႆဢမ်ႇၼၼ်မိူင်းဢၼ်ၸမ်ၼၼ်ႉၸိုင်ပေႃးၶဝ်သမ်ႉလႆႈသတိၵႃႈတီႈၼႂ်းမိူင်းတီႈဢၼ်ၶဝ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉလႄႈၸႂ်ၶဝ်ၶၢႆႉပုတ်ႈသေယဝ်ႉယူႇၵႃႈၼႂ်းမိူင်းတီႈဢၼ်ၶဝ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉလႄႈၶဝ်တွင်းပၢၼ်ႇလႄႈဝႃႈ၊-ၶႃႈၸဝ်ႈႁဝ်းၸိူဝ်းၼႆႉၽိတ်းပိူင်ႈတီႈၶႃႈယဝ်ႉ။
၃၈ ႁဵတ်းဢမူႉဢၼ်ဢမ်ႇသိုဝ်ႈတေႃႇတီႈၶႃႈယဝ်ႉ။ၵမ်ၵျၢင်ႉဢၼ်ႁၢႆႉယုတ်ႈတီႈၶႃႈယဝ်ႉ၊ဝႃႈၼင်ႇၼႆလႄႈပေႃးၶဝ်ပႃးတင်းႁူဝ်ၸႂ်သဵင်ႈသဵင်ႈၶိုၼ်းမႃးတီႈၸဝ်ႈႁဝ်းၼႂ်းမိူဝ်ႈဢၼ်ၶဝ်ယင်းတိုၵ်ႉယူႇၵႃႈၼႂ်းမိူင်းဢၼ်လႆႈၶၢမ်ႇသိမ်းဢဝ်ၶဝ်ၵႂႃႇၼၼ်ႉလႄႈသူးတွင်းလဝ်ႈယွၼ်းၸူးၵႃႈတီႈမိူင်းဢၼ်ၸဝ်ႈႁဝ်းပၼ်တီႈပူႇမွၼ်ႇၶဝ်၊
၃၉ ဝဵင်းဢၼ်ၸဝ်ႈႁဝ်းလိူၵ်ႈၵဵပ်းဢဝ်ႁိူၼ်းၸဝ်ႈႁဝ်းဢၼ်ၶႃႈၸဝ်ႈတႄႇႁဵတ်းပုၼ်ႈၼႃႇမႃႉၸိုဝ်သဵင်ၸဝ်ႈႁဝ်းၼႆႉၸိုင်၊ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်တီႈဢၼ်ၸဝ်ႈႁဝ်းၵိင်းဝပ်ႈယူႇၼၼ်ႉသေလႄႈထွမ်ႇငိၼ်းၵႂၢမ်းဢၼ်ၶဝ်သူးတွင်းလဝ်ႈယွၼ်းၼၼ်ႉလႄႈပႂ်ႉဢမူႉၶဝ်သေၵမ်းတီႈၶႃႈ။ၶႅၼ်းတေႃႈပွႆႇလွတ်ႈဢပျႅတ်ႈၵူၼ်းၸဝ်ႈႁဝ်းဢၼ်ၽိတ်းပိူင်ႈၸဝ်ႈႁဝ်းၸိူဝ်းၼၼ်ႉသေၵမ်းတီႈၶႃႈ။
၄၀ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ၶႅၼ်းတေႃႈၽုၺ်ႇတႃမိုၼ်းတႃႇၸဝ်ႈႁဝ်းၸူးလႄႈႁႂ်ႈႁူၸဝ်ႈႁဝ်းငိၼ်းၵႂၢမ်းဢၼ်သူးတွင်းယွၼ်းၵႃႈၼႂ်းထႃႇၼႃႉတီႈၼႆႉၼၼ်ႉၸႅင်ႈၸႅင်ႈလႅင်းလႅင်းသေၵမ်းတီႈၶႃႈ။
၄၁ ထႃႇဝရႃႉၽြႃးၽြႃးပဵၼ်ၸဝ်ႈတီႈၶႃႈ၊ၸဝ်ႈႁဝ်းဢိၵ်ႇတင်းတိူၵ်ႈထမ်ႇမႃႉဢၼ်ၸၢပ်ႈသႅင်ႇၵၼ်တင်းမူၼ်တၼ်းၶူဝ်းၸဝ်ႈႁဝ်းၼၼ်ႉၶႅၼ်းတေႃႈၶိုၼ်ႈၸူးၵႃႈတီႈဢၼ်ၸဝ်ႈႁဝ်းၵိင်းဝပ်ႈယူႇၼၼ်ႉသေၵမ်းတီႈၶႃႈ။ထႃႇဝရႃႉၽြႃးၽြႃးပဵၼ်ၸဝ်ႈတီႈၶႃႈ။ႁႂ်ႈယိတ်ႉပရေႃးႁိၵ်ႈၸဝ်ႈႁဝ်းတင်းလၢႆၼုင်ႈမႆႊတၢင်းဢၼ်ၵႄႇသႄႇၶျွတ်ႈဢဝ်ၼၼ်ႉလႄႈႁႂ်ႈၶဝ်ၸိူဝ်းဢၼ်မူတ်းၸၢင်ႇၸဝ်ႈႁဝ်းၼၼ်ႉဢွၼ်ၵၼ်ၸူမ်းသိူဝ်းသေၵမ်းလူၺ်ႈတီႈၶႃႈ။
၄၂ ထႃႇဝရႃႉၽြႃးၽြႃးပဵၼ်ၸဝ်ႈတီႈတီႈၶႃႈ။ယႃႇပေႁႂ်ႈၼႃႈၵေႃႉဢၼ်ၸဝ်ႈႁဝ်းပၼ်ၽိၵ်ႈသိၵ်ႈၼၼ်ႉဝၢႆႇပႅတ်ႈသေၵမ်းတီႈၶႃႈ။ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၵျေးၸူးၸဝ်ႈဢၼ်ၶႃႈၸဝ်ႈႁဝ်းတႃႇဝိတ်ႉလႆႈၶၢမ်ႇၼၼ်ႉသေၵမ်းတီႈၶႃႈ၊ဝႃႈၼင်ႇၼႆဢေႃႈ။