Chapter
၂
ၶိုင်ပွင်မႄးႁႅၼ်းႁႂ်ႈလႆႈတႄႇႁဵတ်းပိၵ်ႉမၢၼ်ႇၽြႃး
၁ သေႃးလမုၼ်ႇမီးတၢင်းၵျၢမ်ႇတၢင်းပွင်တၵ်းတႄႇႁဵတ်းႁိူၼ်းပုၼ်ႈၼႃႇမႃႉၸိုဝ်သဵင်ထႃႇဝရႃႉၽြႃးဢိၵ်ႇတင်းႁေႃပုၼ်ႈသိုင်ႇၸိုင်ႈဝၢၼ်ႈမိူင်းၸဝ်ႈလႄႈသေႃးလမုၼ်ႇ
၂ ၽႃႇၵဵပ်းၶၢၼ်းဝႆႉၶဝ်ၸိူဝ်းဢၼ်လႆႈႁၢပ်ႇလႆႈႁၢမ်ၸဵတ်းမိုၼ်ႇ၊ၶဝ်ၸိူဝ်းဢၼ်လႆႈပွမ်ႈလႆႈၽၼ်းမႆႉၵႃႈၼိူဝ်လွႆပႅတ်ႇမိုၼ်ႇ၊ၶဝ်ၸိူဝ်းဢၼ်လူတူၺ်းၸီႇယၢင်ႇသၢမ်ႁဵင်ႁူၵ်းပၢၵ်ႇသေယဝ်ႉ၊
၃ သေႃးလမုၼ်ႇပွႆႇၸႂ်ႉၽူႈတၢင်တူဝ်ၵႂႃႇတီႈၶုၼ်လူင်ႁိရမ်ႇလႄႈႁႂ်ႈဝႃႈ၊-ၸိူဝ်ႉၼင်ႇဢၼ်ၶုၼ်လူင်ႁဵတ်းၵျေးၸူးတီႈၸဝ်ႈပေႃႈၵဝ်တႃႇဝိတ်ႉလႄႈပၼ်မႆႉဢႃႇရိတ်ႉမႃးပုၼ်ႈဢၼ်မၼ်းၸဝ်ႈတၵ်းတႄႇႁဵတ်းႁေႃၸဝ်ႈတီႈဢၼ်မၼ်းၸဝ်ႈတၵ်းယူႇၼၼ်ႉသမ်ႉႁဵတ်းၵျေးၸူးတီၵဝ်သေၵမ်း။
၄ ၵဝ်တၵ်းတႄႇႁဵတ်းႁိူၼ်းပုၼ်ႈၼႃႇမႃႉၸိုဝ်သဵင်ထႃႇဝရႃႉၽြႃးၽြႃးပဵၼ်ၸဝ်ႈႁဝ်းသေလႄႈႁႂ်ႈလႆႈဢဝ်ၼၢမ်ႇသႃႇဢၼ်ႁွမ်ဢၼ်ႁူၺ်းတုတ်ႇၽႆးၵႃႈတီႈၽၢႆႇၼႃႈမၼ်းၸဝ်ႈသေလႄႈႁႂ်ႈလႆႈပုၵ်ႉၸေႃႇႁႂ်ႈလႆႈဢဝ်ၶဝ်ႈမုၼ်းတၢင်ႇဝႆႉၽၢႆႇၼႃႈၸဝ်ႈသေႇသေႇဢိၵ်ႇတင်းႁႂ်ႈလႆႈဢဝ်ယိၸ်ႉဢၼ်တုတ်ႇၽႆးပုၵ်ႉၸေႃႇၶိင်ႇႁူဝ်ၶမ်ႈ၊ၶိင်ႇၵၢင်ၼႂ်၊ဝၼ်းၵမ်သိၼ်၊ဝၼ်းလိူၼ်မႂ်ႇတင်းဝၼ်းပွႆးထမ်ႇမႃႉထႃႇဝရႃႉၽြႃးၽြႃးပဵၼ်ၸဝ်ႈႁဝ်းၸွမ်းၼင်ႇတြႃးဢၼ်ၸီႇယၢင်ႇဝႆႉတီႈမဵဝ်းဢိသရေႇလတႃႇသေႇၼၼ်ႉဢေႃႈ။
၅ ႁိူၼ်းၸဝ်ႈဢၼ်ၵဝ်တၵ်းႁဵတ်းၼၼ်ႉတၵ်းလႆႈပဵၼ်ဢၼ်ယႂ်ႇဢေႃႈ။လွင်ႈမၼ်းၸမ်းၽြႃးပဵၼ်ၸဝ်ႈႁဝ်းယႂ်ႇမျၢတ်ႈၼႃႇသေၽြႃးတင်းသဵင်ႈတင်းလူင်ဢေႃႈ။
၆ ပိူဝ်ႈဢၼ်ၵၢင်ႁၢဝ်ဢိၵ်ႇတင်းၵၢင်ႁၢဝ်ဢၼ်ပဵၼ်ၸိၵ်းၸွမ်ၵၢင်ႁၢဝ်ၼၼ်ႉဢမ်ႇပေႃးဢမ်ႇၶၢမ်ႇမၼ်းၸဝ်ႈလႆႈလႄႈၽူႈလႂ်တၵ်းတႄႇႁဵတ်းႁိူၼ်းတီႈဢၼ်မၼ်းၸဝ်ႈတၵ်းၵိင်းဝပ်ႈယူႇၼၼ်ႉလႆႈ။ၼွၵ်ႈသေႁိူၼ်းတီႈဢၼ်ဢဝ်ယိၸ်ႉတုတ်ႇၽႆးၵႃႈတီႈၽၢႆႇၼႃႈမၼ်းၸဝ်ႈၼၼ်ႉၵဝ်ၼႆႉပဵၼ်ၵူၼ်းၸိူဝ်ႉၼင်ႇႁိုဝ်လႄႈတၵ်းတႄႇႁဵတ်းႁိူၼ်းတၢင်ႇၸိူဝ်ႉတၢင်ႇဢၼ်လႆႈ။
၇ ပိူဝ်ႈၼႆလႄႈမိူဝ်ႈလဵဝ်ၼႆႉပွႆႇၸႂ်ႉၵူၼ်းၵေႃႉၼိုင်ႈဢၼ်မီးဢတၢတ်ႈပိင်ႇၺႃႇ၊ဢၼ်မေႃႁဵတ်းလူၺ်ႈၶမ်း၊ငိုၼ်း၊တွင်းလိူင်၊လဵၵ်း၊ၶူဝ်းဢၼ်လႅင်ႊၵမ်ႇ၊ၶူဝ်းဢၼ်လႅင်ႊၸုင်းႁုင်း၊ၶူဝ်းဢၼ်သွမ်ႇ၊ဢၼ်မေႃဢတၢတ်ႈပိင်ႇၺႃႇဢၼ်မေႃၽွမ်ႉၵၼ်လႄႈတွင်ႈႁဵတ်းၶႅၵ်းႁဵတ်းလူၺ်ႈၵၼ်တင်းသြႃႇသမႃးဢၼ်မီးယူႇၵႃႈတီႈၵဝ်ၵႃႈၼႂ်းမိူင်းယုတတင်းဝဵင်းယေႇရုသလႅမ်ႇဢၼ်ၸဝ်ႈပေႃႈၵဝ်တႃႇဝိတ်ႉဢဝ်ဝႆႉထႃႈၸိူဝ်းၼၼ်ႉမႃးၵႃႈတီႈၵဝ်သေၵမ်း။
၈ ဢဝ်ဢႃႇရိတ်ႉ၊မႆႉပႅၵ်ႇ၊မႆႉၼၢမ်ႇသႃႇၼမ်ၼႃႇၵႃႈၼိူဝ်လွႆလေႇပၼုၼ်ႇလႄႈမႃးပၼ်တီႈၵဝ်သေၵမ်း။ၵဝ်ႁူႉလွင်ႈဢၼ်ၶႃႈၵူၼ်းၶုၼ်လူင်ၸၢင်ႊပွမ်ႈမႆႉၽၼ်းမႆႉၵႃႈၼိူဝ်လွႆလေႇပၼုၼ်ႇၼၼ်ႉယူႇဢေႃႈ။
၉ ၶႃႈၵူၼ်းၵဝ်တၵ်းဢွၼ်ၵၼ်ၽွမ်ႉႁူမ်ႈလူၺ်ႈၵၼ်တင်းၶႃႈၵူၼ်းၶုၼ်လူင်ႁႂ်ႈလႆႈပွင်ႁဵတ်းပွင်ႁႅၼ်းမႆႉၼမ်ၼႃႇပုၼ်ႈၵဝ်ဢေႃႈ။ႁိူၼ်းၸဝ်ႈဢၼ်ၵဝ်တၵ်းတႄႇႁဵတ်းၼၼ်ႉတၵ်းလႆႈပဵၼ်ႁိူၼ်းဢၼ်ယႂ်ႇၼႃႇလူင်လၢင်လႄႈလီဢၢမ်းဢေႃႈ။
၁၀ ၵဝ်တၵ်းဢဝ်ၶဝ်ႈသၢၼ်ၵျုင်ႇသွင်မိုၼ်ႇၵေႃႇရႃႉ၊ၶဝ်ႈသၢၼ်မူႉယေႃးသွင်မိုၼ်ႇၵေႃႇရႃႉ၊ၼမ်ႉၸပိတ်ႉသွင်မိုၼ်ႇပၢတ်ႉ၊ၼမ်ႉမၼ်းသွင်မိုၼ်ႇပၢတ်ႉပၼ်တီႈၶႃႈၵူၼ်းၶုၼ်လူင်ဢၼ်ပွမ်ႈမႆႉၽၼ်းမႆႉၸိူဝ်းၼၼ်ႉဢေႃႈ၊ဝႃႈၼင်ႇၼႆဢေႃႈ။
၁၁ ႁိရမ်ႇၶုၼ်လူင်တုရုၼၼ်ႉတႅမ်ႈလိၵ်ႈလႄႈၶိုၼ်းပၼ်တီႈသေႃးလမုၼ်ႇလႄႈဝႃႈၸမ်း၊-ၵွပ်ႈပိူဝ်ႈဢၼ်ထႃႇဝရႃႉၽြႃးႁၵ်ႉဢိတ်းလူၵူၼ်းမၼ်းၸဝ်ႈလႄႈမၼ်းၸဝ်ႈယုၵ်ႉယွင်ႈၸဝ်ႈႁဝ်းပဵၼ်ၶုၼ်ႁေႃၶမ်းၵႃႈၼိူဝ်ၶဝ်ယဝ်ႉ၊ဝႃႈၼင်ႇၼႆဢေႃႈ။
၁၂ ႁိရမ်ႇသမ်ႉလၢတ်ႈထႅင်ႈလႄႈဝႃႈ၊-ႁႂ်ႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလဢၼ်ႁဵတ်းပဵၼႃ်ႉၵၢင်ႁၢဝ်ဢိၵ်ႇတင်းလိၼ်မိူင်းဢၼ်ဢိတ်းလူပၼ်လုၵ်ႈၸၢႆးဢၼ်လၵ်းလႅမ်လႄႈတဵမ်ဝႆႉတင်းၺၢၼ်ႇပိင်ႇၺႃႇထၼ်ႈပေႃးမၼ်းတတ်ႈၼိုင်ႇလႆႈႁႂ်ႈလႆႈတႄႇႁဵတ်းႁိူၼ်းၸဝ်ႈပုၼ်ႈထႃႇဝရႃႉၽြႃးတင်းႁေႃပုၼ်ႈသိုင်ႇၸိုင်ႈဝၢၼ်ႈမိူင်းၸဝ်ႈၼၼ်ႉတီႈၶုၼ်လူင်တႃႇဝိတ်ႉၼၼ်ႉမီးမၢင်ႇၵလႃႇသေၵမ်းလူၺ်ႈ။
၁၃ မိူဝ်ႈလဵဝ်ၼႆႉၸိုင်ၵဝ်ပွႆႇၸႂ်ႉႁိရမ်ႇဢၽိဢၼ်ပဵၼ်ၵေႃႉဢၼ်ၺၢၼ်ႇလီလႄႈလၵ်းလႅမ်ၼၼ်ႉၵႂႃႇဢေႃႈ။
၁၄ မၼ်းၼၼ်ႉပဵၼ်လုၵ်ႈၸၢႆးမေႈယိင်းမဵဝ်းတၼ်ႇလႄႈပေႃႈမၼ်းၸမ်းပဵၼ်ၵူၼ်းမဵဝ်းတုရုဢေႃႈ။မၼ်းမီးဢတၢတ်ႈပိင်ႇၺႃႇဢၼ်မေႃႁဵတ်းလူၺ်ႈၶမ်း၊ငိုၼ်း၊တွင်းလိူင်၊လဵၵ်း၊မၢၵ်ႇႁိၼ်၊မႆႉ၊ၶူဝ်းဢၼ်သွမ်ႇ၊ၶူဝ်းဢၼ်လႅင်ႊၵမ်ႇပိၵ်ႉၶျေႃးၶူဝ်းဢၼ်လႅင်ႊၸုင်းႁုင်းဢတၢတ်ႈပိင်ႇၺႃႇဢၼ်မေႃတွင်ႈႁဵတ်းၶႅၵ်းႁဵတ်းလႄႈမေႃသၢင်ႈမေႃႁဵတ်းၵူႈၸိူဝ်ႉၵူႈပိူင်၊ပဵၼ်ၵေႃႉဢၼ်ၽွမ်ႉႁူမ်ႈၸွႆႈထႅမ်သြႃႇသမႃးၸဝ်ႈႁဝ်းတင်းလၢႆဢိၵ်ႇတင်းသြႃႇသမႃးၸဝ်ႈၵဝ်ၶႃႈၸဝ်ႈပေႃႈၸဝ်ႈႁဝ်းတႃႇဝိတ်ႉၸိူဝ်းၼၼ်ႉဢေႃႈ။
၁၅ ပိူဝ်ႈဢၼ်ပဵၼ်ၼင်ႇၼႆလႄႈဢဝ်ၶဝ်ႈသၢၼ်ၵျုင်ႇ၊ၶဝ်ႈသၢၼ်မူႉယေႃး၊ၼမ်ႉၸပိတ်ႉ၊ၼမ်ႉမၼ်းဢၼ်ၸဝ်ႈႁဝ်းမီးဢမိင်ႉၼၼ်ႉပၼ်တီႈၶႃႈၸဝ်ႈႁဝ်းတင်းလၢႆမႃးသေၵမ်း။
၁၆ ႁဝ်းတၵ်းတီႇပွမ်ႈတႅပ်းၽၼ်းမႆႉၵႃႈၼိူဝ်လွႆလေႇပၼုၼ်ႇၵႃႈဢၼ်ၸဝ်ႈႁဝ်းမီးဢလူဝ်ႇၶႂ်ႈလႆႈၼၼ်ႉသေလႄႈၶၢတ်ႈႁဵတ်းၽွင်ႇသေယဝ်ႉဢဝ်ၸွမ်းတၢင်းပၢင်ႇလၢႆႇၵႂႃႇၸူးၵႃႈတီႈဝဵင်းယွပ်ႇပဢေႃႈ။ၸဝ်ႈႁဝ်းတၵ်းလႆႈတေႃႉဢဝ်ၶိုၼ်ႈၸူးၵႃႈတီႈဝဵင်းယေႇရုသလႅမ်ႇဢေႃႈ၊ဝႃႈၼင်ႇၼႆဢေႃႈ။
၁၇ သေႃးလမုၼ်ႇသမ်ႉၶိုၼ်းၼပ်ႉဢၢၼ်ႇဢဝ်ၸရၢင်းၵူၼ်းတၢင်ႇၸိူဝ်ႉတၢင်ႇမဵဝ်းၵႃႈဢၼ်ယူႇၵႃႈၼႂ်းမိူင်းဢိသရေႇလၸိူဝ်းၼၼ်ႉၸွမ်းလူၺ်ႈတၢင်းဢၼ်ၸဝ်ႈပေႃႈမၼ်းတႃႇဝိတ်ႉၼပ်ႉဢၢၼ်ႇဢဝ်ၸရၢင်းၼၼ်ႉထႅင်ႈလႄႈထူပ်းႁၼ်သႅၼ်ပၢႆႁႃႈမိုၼ်ႇသၢမ်ႁဵင်ႁူၵ်းပၢၵ်ႇဢေႃႈ။
၁၈ မၼ်းပၼ်ပုၼ်ႈထွၼ်းၶဝ်ၸိူဝ်းဢၼ်လႆႈႁၢပ်ႇလႆႈႁၢမ်ၼၼ်ႉၸဵတ်းမိုၼ်ႇ၊ၶဝ်ၸိူဝ်းဢၼ်လႆႈပွမ်ႈမႆႉၽၼ်းမႆႉၵႃႈၼိူဝ်သၼ်လွႆၼၼ်ႉပႅတ်ႇမိုၼ်ႇ၊ၶဝ်ၸိူဝ်းဢၼ်လႆႈလူတူၺ်းၸီႇယၢင်ႇႁႂ်ႈၵူၼ်းတင်းလၢႆႁဵတ်းသၢင်ႈၼၼ်ႉသၢမ်ႁဵင်ႁူၵ်းပၢၵ်ႇဢေႃႈ။