Chapter
၂၄
၁ ၶုၼ်ပႃႇလမ်ႇ ႁူႉႁၼ်လွင်ႈဢၼ်ထႃႇဝရႃႉၽြႃးမီးဢလူဝ်ႇၶႂ်ႈပၼ်တၢင်းလီတီႈၵူၼ်းမဵဝ်ႈဢိသရေႇလ တင်းလၢႆၼၼ်ႉလႄႈ မၼ်းယင်းဢမ်ႇၵႂႃႇႁႂ်ႈလႆႈႁဵတ်းဢတၢတ်ႈဝိပ်ႉၸႃႇ မိူၼ်ၸိူဝ်ႉၼင်ႇဢွၼ်တၢင်းၼၼ်ႉလႄႈ မၼ်းဝၢႆႇၼႃႈၵႂႃႇၸူးၵႃႈတီႈထိူၼ်ႇဢေႃႈ။
၂ ၶုၼ်ပႃႇလမ်ႇမုင်ႈတူၺ်းလႄႈ ႁၼ်ၵူၼ်းမဵဝ်းဢိသရေႇလတင်းလၢႆၸွမ်းလူၺ်ႈမဵဝ်းၸိူဝ်ႉၶိူဝ်းႁင်းၽႂ်ႁင်းမၼ်း ၶျႃးတပ်ႉယူႇၼၼ်ႉသေယဝ်ႉ ဝိၺိၺ်ႇၽြႃးပဵၼ်ၸဝ်ႈလူင်းမႃးႁွတ်ႈထိုင်ၵႃႈၼိူဝ်မၼ်းလႄႈမၼ်းဢဝ်တင်းၵႂၢမ်း ပရေႃးၽႅတ်ႈဢွၵ်ႇသူပ်းဝႃႈ၊-
၃ ၵႂၢမ်းၶုၼ်ပႃႇလမ်ႇ လုၵ်ႈၸၢႆးပေႃႇရ ၵႂၢမ်းၵေႃႉဢၼ်မၢၵ်ႇတႃ တူၺ်းႁၼ်သႂ်လႅင်းလီ ၵႂၢမ်းၵေႃႉဢၼ်ငိၼ်းဢမိင်ႉၽြႃးပဵၼ်ၸဝ်ႈၵေႃႉဢၼ်ၶုပ်ႉမူပ်ႇယူႇမၢၵ်ႇတႃပိုတ်ႇၵီႈယူႇသေလႄႈ ႁၼ် ရူႇပႃႇရူင်ႇၸဝ်ႈဢၼၼ်ႇတႃႉတၼ်းၶူဝ်းၼၼ်ႉ ၸမ်း၊-
၄ မဵဝ်းယႃႇၵုပ်ႉဢိူၺ်း။သုမ်ႉထဵင်မႂ်းတင်းလၢႆႁၢင်ႊလီႁၢင်ႊ ငၢမ်းၼႃႇဢေႃႈ။ၵူၼ်းမဵဝ်းဢိသရေႇလဢိူၺ်း။
၅ တီႈယူႇတၼ်းသဝ်းမႂ်းတင်းလၢႆ ႁၢင်ႊလီႁၢင်ႊငၢမ်းၼႃႇဢေႃႈ။
၆ ၽေႈၵႂၢင်ႈၸိူဝ်ႉၼင်ႇပၢင်ႇႁူၺ်ႈပၢင်ႇႁွင်ႊ၊ ၸိူဝ်ႉၼင်ႇသူၼ်ဢူးယဵၼ် ဢၼ်မီးၵႃႈႁိမ်းၼမ်ႉႁွင်ႊၼမ်ႉၵႄးၸိူဝ်ႉၼင်ႇတူၼ်ႈဢၵျေႃႇ ဢၼ်ထႃႇဝရႃႉၽြႃးၽုၵ်ႇသွမ်ႈဝႆႉၸိူဝ်ႉၼင်ႇတူၼ်ႈဢႃႇရိတ်ႉ ဢၼ်ဢွၵ်ႇၵႃႈတီႈႁိမ်းၼမ်ႉ ႁိမ်းၼွင်တင်းလၢႆၼၼ်ႉဢေႃႈ။
၇ ၼမ်ႉတၵ်းလႆဢွၵ်ႇၵႃႈတီႈပုင်းၼမ်ႉဢႅင်ႇၼမ်ႉၸိူဝ်းၼၼ်ႉဢေႃႈ။ၸိူဝ်ႉၽၼ်းမၼ်းတၵ်းတူၵ်းၵႃႈတီႈဢၼ်ၼမ်ႉလိူင်ႇၼမ်ႉၼမ်ၼၼ်ႉဢေႃႈ။ၶုၼ်ႁေႃၶမ်းမၼ်းတၵ်းမုၼ်ယႂ်ႇမုၼ်သုင်ၼႃႇသေၶုၼ်ဢႃႇၵတ်ႉလႄႈသိုင်ႇၸိုင်ႈဝၢၼ်ႈမိူင်း မၼ်းတၵ်းလႆႈၶၢမ်ႇတၢင်းဢၼ်ယုၵ်ႉယွင်ႈဢေႃႈ။
၈ ၽြႃးပဵၼ်ၸဝ်ႈၼုၵ်ႈဢဝ်မၼ်းဢွၵ်ႇသေၵႃႈၼႂ်း မိူင်းဢေႇၵႅပ်ႉတုမႃးလႄႈ မၼ်းႁႅင်းယႂ်ႇၼႃႇမိူၼ်ၸိူဝ်ႉၼင်ႇၸူင်ဢၼ်ႁႅင်းယႂ်ႇၼႃႇၼၼ်ႉဢေႃႈ။မၼ်းတၵ်းၶူပ်းတၵ်းၵဵဝ်ႉမဵဝ်းၵူၼ်း ဢၼ်ပဵၼ်ရၢၼ်ႇသူႇမၼ်းတင်းလၢႆလႄႈႁၵ်းလုပ်ႇၶဝ်ပႅတ်ႈဢေႃႈ။မၼ်းတၵ်းဢဝ်တင်းပိုၼ်ၵၢင်ႇမၼ်းယိုဝ်းႁႂ်ႈထၼ်ႈပေႃးလူင်ႉပေႃးပွင်ႇဢေႃႈ။
၉ မၼ်းမူပ်ႇလႄႈယူႇဢေႃႈ။မၼ်းမူပ်ႇလိူၼ်းဢႅဝ်မၼ်းမိူၼ်ၸိူဝ်ႉၼင်ႇသၢင်ႇသီႈဢိၵ်ႇတင်း ၸိူဝ်ႉၼင်ႇသၢင်ႇသီႈတူဝ်ႈမေႈၼၼ်ႉဢေႃႈ။ၽူႈ လႂ်တၵ်းႁတ်းယူင်းမၼ်းတိုၼ်ႇ။ၵေႃႉဢၼ်ပၼ်တၢင်းလီတီႈမႂ်းၼၼ်ႉမီးမင်ႇၵလႃႇဢေႃႈ။ၵေႃႉဢၼ်ၵိၼ်ႇလႃႇၵိၼ်ႇဝႃႈမႂ်းၼၼ်ႉလႆႈၶၢမ်ႇတၢင်းဢၼ်ၵိၼ်ႇလႃႇၵိၼ်ႇဝႃႈဢေႃႈ၊ ဝႃႈ ၼင်ႇၼႆဢေႃႈ။
၁၀ မိူဝ်ႈၼၼ်ႉၶုၼ်ပႃႇလၵ်ႉၸႂ်မႆႈၶႂ်ႈၸႃႉၶုၼ်ပႃႇလမ်ႇလႄႈၶုၼ်ပႃႇလၵ်ႉ တူပ်းမိုဝ်းသေယဝ်ႉလၢတ်ႈတီႈၶုၼ်ပႃႇလမ်ႇလႄႈဝႃႈ၊-ၵဝ်ႁွင်ႉၸဝ်ႈမႃးႁႂ်ႈလႆႈၵိၼ်ႇလႃႇၵိၼ်ႇဝႃႈရၢၼ်ႇသူႇၵဝ်ဢေႃႈ။တူၺ်းလူႊ။ၸဝ်ႈသမ်ႉပၼ်တၢင်းလီၵူၺ်းၵူၺ်းတေႃႇထိုင် ႁွတ်ႈသၢမ်ပွၵ်ႈယဝ်ႉလူင်ပေႇ။
၁၁ ပိူဝ်ႈၼႆလႄႈၼႅတ်ႈၶိုၼ်းမိူဝ်းၵႂႃႇၵႃႈတီႈမိူင်းတီႈဢၼ်ၸဝ်ႈယူႇၼၼ်ႉတႃႉ။မိူဝ်ႈဢွၼ်တၢင်းၼၼ်ႉ ၵဝ်မီးတၢင်းၵျၢမ်ႇတၢင်းပွင်တၵ်းယုၵ်ႉယွင်ႈၸဝ်ႈဝႆႉၵႃႈၼႂ်းမုၼ်ၽုင်းဢၼ်ယႂ်ႇၼႃႇဢေႃႈ။ၵူၺ်းၵႃႈထႃႇဝရႃႉၽြႃးႁၢမ်ႈတပ်ႉႁႄႉၶႅၼ်မႂ်းဢမ်ႇႁႂ်ႈမုၼ်ၽုင်းၸဝ်ႈလႆႈယႂ်ႇၵႂၢင်ႈယဝ်ႉ၊ ဝႃႈၼင်ႇၼႆဢေႃႈ။
၁၂ ၶုၼ်ပႃႇလမ်ႇၵေႃႈၶိုၼ်းလၢတ်ႈတီႈၶုၼ်ပႃႇလၵ်ႉလႄႈဝႃႈ၊- ၵဝ်ပေႃးလႆႈလၢတ်ႈတီႈသၢၼ်ႇတ မၢၼ်ႇၶုၼ်လူင်ၸိူဝ်းၼၼ်ႉဝႆႉဝႃႈ၊-
၁၃ ပိၵ်ႉသမ်ႉၶုၼ်ပႃႇလၵ်ႉဢဝ်ႁေႃႇမၼ်းၸဝ်ႈဢၼ်တဵမ်ဝႆႉတင်း ငိုၼ်းၶမ်းၼၼ်ႉပၼ်တီႈၵဝ်သေၵေႃႈ ၵဝ်ဢမ်ႇပူၼ်ႉဢမ်ႇလိူဝ်ၵႂၢမ်းထႃႇဝရႃႉၽြႃးလႄႈႁဵတ်းၸွမ်းဢလူဝ်ႇတူဝ်ၸဝ်ႈၵဝ်ႇ ဢၼ်လီဢၼ်ဢမ်ႇလီသေၸိူဝ်ႉသေပိူင်။ၵဝ်တၵ်းလၢတ်ႈၸွမ်း ၵႃႈၼင်ႇဢၼ် ထႃႇဝရႃႉၽြႃးမီးဢမိင်ႉၼၼ်ႉ ၵူၺ်းဢေႃႈ။
၁၄ မိူဝ်ႈလဵဝ်ၼႆႉၸမ်းၵဝ်တၵ်းၶိုၼ်းမိူဝ်းၸူးၵႃႈတီႈၵူၼ်းမဵဝ်းၸိူဝ်ႉၶိူဝ်းၵဝ်ဢေႃႈ။ယေႃႈ၊ၵမ်းၼႆႉၵဝ်တၵ်းလၢတ်ႈၼႄပၼ်တီႈသူ လွင်ၵူၼ်းမဵဝ်းၼႆႉ ၶဝ်တၵ်းႁဵတ်းတီႈသူၼႂ်းၶိင်ႇၵႃႇလႃႉၵမ်းလိုၼ်းၼၼ်ႉ ၸိူဝ်ႉၼင်ႇႁိုဝ်ၼၼ်ႉလူးၵွၼ်ႇဢေႃႈ၊ဝႃႈၼင်ႇၼႆဢေႃႈ။
ၵႂၢမ်းပရေႃးၽႅတ်ႈပႃႇလမ်ပွၵ်ႈၸတုၵ်ႉထ
၁၅ မၼ်းဢဝ်တင်းၵႂၢမ်းပရေႃးၽႅတ်ႈသေလႄႈ ဢွၵ်ႇသူပ်းဝႃႈၸမ်း၊-ၵႂၢမ်းၶုၼ်ပႃႇလမ်ႇ၊လုၵ်ႈၸၢႆးပေႃႇရ ၵႂၢမ်းၵေႃႉဢၼ်တူၺ်းႁၼ်ၸႅင်ႈလႅင်း
၁၆ ၵႂၢမ်းၵေႃႉဢၼ်ငိၼ်းဢမိင်ႉၽြႃးပဵၼ်ၸဝ်ႈလႄႈလႆႈၺၢၼ်ႇၽြႃးဢၼ်သုင်ၼႃႇသေပိူၼ်ႈ ၵေႃႉဢၼ်ၶုပ်ႉမူပ်ႇယူႇ မၢၵ်ႇတႃႇပိုတ်ႇၵီႈယူႇသေလႄႈ ႁၼ်ရူႇပႃႇရူင်ႇၸဝ်ႈဢၼၼ်ႇ တႃႉတၼ်းၶူဝ်းၼၼ်ႉၸမ်း၊-
၁၇ ၵဝ်ႁၼ်မၼ်းဢေႃႈ။ၵူၺ်းၵႃႈဢမ်ႇပႆႇၸႂ်ႈတေႃႈလဵဝ်ၼႆႉ။ၵဝ်တူၺ်းမၼ်းဢေႃႈ။ၵူၺ်းၵႃႈဢမ်ႇပႆႇၸမ်။လၢဝ်လုၵ်ႈၼိုင်ႈတၵ်းဢွၵ်ႇၵႃႈၼႂ်းမဵဝ်းယႃႇၵုပ်ႉလႄႈ ၵၼ်းႁွၵ်ႇရႃႇၸႃႉ တၵ်းပေႃႇပဵၼ်မႃးၵႃႈၼႂ်းမဵဝ်းဢိသရေႇလဢေႃႈ။တၵ်းပေႃႉယႅၼ်ႉမိူင်းမေႃႇၽတေႃႇထိုင်ႁွတ်ႈတီႈၸွၵ်ႉတီႈၸဵင်ႇလႄႈ ယႃႉၽဵဝ်ႈၶဝ်ၸိူဝ်းဢၼ်ဢမ်ႇတႄႇဢမ်ႇၼိမ်ၸၢင်ႊႁဵတ်း တၢင်းဢၼ်ၶတ်းၶႅင်ႇႁႅင်းတႃႉတင်းလၢႆ ၼၼ်ႉပႅတ်ႈဢေႃႈ။
၁၈ မိူင်းဢေႇတုင်ႇတၵ်းပဵၼ်တီႈဢၼ်မၼ်းပိူင်ႇဢေႃႈ။မိူင်းၸိရတၵ်းပဵၼ်တီႈရၢၼ်ႇသူႇမၼ်းတင်းလၢႆပိူင်ႇဢေႃႈ။မဵဝ်းဢိသရေႇလၼၼ်ႉတၵ်းႁဵတ်း ႁတ်းႁၢၼ်ၼႃႇလူင်လၢင်ဢေႃႈ။
၁၉ ၵေႃႉဢၼ်ဢုပ်ႉပိူင်ႇပႃးၼိုင်ႈ တၵ်းပေႃႇဢွၵ်ႇမႃးၵႃႈၼႂ်းမဵဝ်းယႃႇၵုပ်ႉ လႄႈယႃႉၽဵဝ်ႈ ၵူၼ်းဢၼ်ၵိုတ်းဢၼ်ၵျၢၼ်ႇၵႃႈၼႂ်းဝၢၼ်ႈၼႂ်းဝဵင်းတင်းလၢႆၼၼ်ႉပႅတ်ႈဢေႃႈ၊ ဝႃႈၼင်ႇၼႆဢေႃႈ။
ၵႂၢမ်းပရေႃးၽႅတ်ႈပႃႇလမ်ပွၵ်ႈလိုၼ်းသုတ်း
၂၀ မၼ်းသမ်ႉတူၺ်းမိူင်းဢႃႇမလိၵ်ႉလႄႈ ဢဝ်တင်းၵႂၢမ်းပရေႃးၽႅတ်ႈဢွၵ်ႇသူပ်းဝႃႈထႅင်ႈၸမ်း၊-မဵဝ်းဢႃႇမလိၵ်ႉယၢမ်ႈလႆႈပဵၼ်ၸိၵ်းပဵၼ်ၸွမ်မႃး ၵႃႈၼိူဝ်မဵဝ်းၵူၼ်းတင်းလၢႆဢေႃႈ။ၵူၺ်းၵႃႈတီႈသုတ်းတီႈၵွႆမၼ်းၶဝ်တၵ်းႁွတ်ႈထိုင်တၢင်းလူႉတၢင်းလႅဝ် မူတ်းမူတ်းသဵင်ႈ သဵင်ႈဢေႃႈ၊ဝႃႈၼင်ႇၼႆဢေႃႈ။
၂၁ မၼ်းသမ်ႉတူၺ်းမဵဝ်းၵေႇၼိလႄႈ ဢဝ်တင်းၵႂၢမ်းပရေႃးၽႅတ်ႈသေလႄႈဢွၵ်ႇသူပ်းဝႃႈၸမ်း၊-တီႈယူႇမႂ်းမၼ်ႈၶိူင်ႇၼႅၼ်ႈၼႃႇဢေႃႈ။ႁၢင်းမႂ်းတႄႇဝႆႉမီးယူႇၵႃႈၼိူဝ်မၢၵ်ႇႁိၼ်မၢၵ်ႇၽႃယဝ်ႉ။
၂၂ ၵူၺ်းၵႃႈမဵဝ်းၵေႇၼိတၵ်းလႆႈၶၢမ်ႇတၢင်းဢၼ်ယႃႉပႅတ်ႈၽဵဝ်ႈပႅတ်ႈမိူဝ်ႈဢၼ်ၶုၼ်ဢႃႇသု သိမ်းဢဝ်မႂ်းၵႂႃႇၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၃ မၼ်းသမ်ႉဢဝ်တင်းၵႂၢမ်းပရေႃးၽႅတ်ႈသေလႄႈ ဢွၵ်ႇသူပ်းဝႃႈထႅင်ႈၸမ်း၊-ဢလူဝ်၊ဢလူဝ်၊ၽူႈ လႂ်တၵ်းလႆႈဢသၢၵ်ႈၵတ်းယဵၼ်ၶျၢမ်းသႃႇ ၼႂ်းမိူဝ်ႈဢၼ်ၽြႃးပဵၼ်ၸဝ်ႈ ႁဵတ်းလွင်ႈတၢင်းၼႆႉၼၼ်ႉ။
၂၄ ႁိူဝ်းသၢင်းၽေႃးတင်းလၢႆတၵ်းလုၵ်ႉသေ ၵႃႈတီႈၽင်ႇၼမ်ႉမိူင်းၶိတ်ႉတိမ်ႇ မႃးလႄႈ ယႃႉယူၵ်ႉမိူင်းဢႃႇသု တင်းမိူင်းႁေႃႇပႃႇပႅတ်ႈဢေႃႈ။တၵ်းလူႉလႅဝ်ပႅတ်ႈမူတ်းမူတ်းသဵင်ႈသဵင်ႈဢေႃႈ၊ဝႃႈၼင်ႇၼႆသေယဝ်ႉ၊
၂၅ ၶုၼ်ပႃႇလမ် လုၵ်ႉလႄႈၶိုၼ်းမိူဝ်းၵႂႃႇၸူးတီႈယူႇမၼ်းသေဢေႃႈ။ၶုၼ်ပႃႇလၵ်ႉၵေႃႈၶိုၼ်းမိူဝ်းၵႂႃႇသေဢေႃႈ။