Chapter
၂၀
ၼမ်ႉလုၵ်ႉသေၵႃႈတီႈမၢၵ်ႇႁိၼ်ဢွၵ်ႇမႃး
၁ ၼႂ်းလိူၼ်ပထမၼၼ်ႉ ၵူၼ်းမဵဝ်းဢိသရေႇလတင်းလၢႆဢၼ်ပဵၼ်ပရိၵ်ႈသၢတ်ႈတင်းသဵင်ႈတင်းလူင်ၼၼ်ႉႁွတ်ႈထိုင်ၵႃႈတီႈထိူၼ်ႇၸိၼလႄႈ ဢွၼ်ၵၼ်ယူႇၵႃႈတီႈၵႃႇတေႇသဢေႃႈ။
၂ မိရိဢမ်ႇတၢႆၵႃႈတီႈၼၼ်ႉလႄႈ သၢင်းၵျူဝ်းဢေႃႈ။ၵွပ်ႈပိူဝ်ႈဢမ်ႇမီးၼမ်ႉပုၼ်ႈပရိၵ်ႈသၢတ်ႈတၵ်းၵိၼ်ၼၼ်ႉလႄႈ ၶဝ်ၸူႉတုမ်ၵၼ်ယူၽၢႆႇ ၼိုင်ႈတင်းမုဝ်းသေႇတင်းဢႃႇရုၼ်ႇဢေႃႈ။
၃ ၵူၼ်းတင်းလၢႆၼၼ်ႉဢွၼ်ၵၼ်တၢင်ႇဢပျႅတ်ႈတီႈမုဝ်းသေႇ လႄႈဝႃႈ၊-ၸိုင်ဝႃႈႁဝ်းဢမ်ႇတၢႆမိူဝ်ႈဢၼ်ပီႈၼွင်ႉႁဝ်းတင်းလၢႆတၢႆၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉ ၵွပ်ႈပိူဝ်ႈ ၸိူဝ်ႉၼင်ႇႁိုဝ်လႄႈ
၄ သွင်ၶိူဝ်ဢဝ်ပရိၵ်ႈသၢတ်ႈထႃႇဝရႃႉၽြႃးမႃးၵႃႈတီႈထိူၼ်ႇၼႆႉႁႂ်ႈႁဝ်းဢိၵ်ႇတင်း တရိၵ်ႈ သၢၼ်ႇႁဝ်းလႆႈတၢႆၵႃႈတီႈၼႆႉ။
၅ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ႁႂ်ႈႁဝ်းဢွၵ်ႇသေၵႃႈၼႂ်းမိူင်းဢေႇၵႅပ်ႉတု ဢဝ်ႁဝ်းမႃးၵႃႈတီႈဢၼ်ႁၢႆႉဢၼ်ႁုၵ်းၼႆႉ။ၵႃႈတီႈၼႆႉပဵၼ်တီႈဢၼ်တၵ်းဝၢၼ်ႇၸိူဝ်ႉဝၢၼ်ႇၽၼ်း တီႈဢၼ်တၵ်းၽုၵ်ႇတူၼ်ႈမၢၵ်ႇလိူဝ်သၢင်းၽေႃး တူၼ်ႈၶိူဝ်းမၢၵ်ႇၸပိတ်ႉတူၼ်ႈမၢၵ်ႇၸင်ႊဢမ်ႇၸႂ်ႈ။ဢမ်မီးၼမ်ႉပုၼ်ႈဢၼ် တၵ်းၵိၼ်လႃးလႃး၊ဝႃႈၼင်ႇၼႆဢေႃႈ။
၆ မုဝ်းသေႇတင်းဢႃႇရုၼ်ႇၼၼ်ႉဢွၵ်ႇသေၵႃႈတီႈၽၢႆႇၼႃႈပရိၵ်ႈသၢတ်ႈတင်းလၢႆလႄႈ ၵႂႃႇၵႃႈတီႈႁူးၽၵ်းတူသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈၼၼ်ႉသေယဝ်ႉ ၶုပ်ႉမူပ်ႇလႄႈ မုၼ်ၽုင်းထႃႇဝရႃႉၽြႃးထၢင်ႇသႃးမႃးတီႈၶဝ်ဢေႃႈ။
၇-၈ ထႃႇဝရႃႉၽြႃးမီးဢမိင်ႉတီႈမုဝ်းသေႇလႄႈဝႃႈ၊-ယိပ်းဢဝ်ၵၼ်းႁွၵ်ႇလႄႈ ပႃးဢဝ်တင်းပီႈၸၢႆးမႂ်းဢႃႇရုၼ်ႇသေယဝ်ႉ ႁႂ်ႈပရိၵ်ႈသၢတ်ႈတင်းလၢႆၸူႉၵၼ်တုမ်ၵၼ်တႃႉ။လၢတ်ႈတီႈမၢၵ်ႇႁိၼ်ၼၼ်ႉသိုဝ်ႈၼႃႈတႂ်ႈတႃၶဝ် ႁႂ်ႈမၢၵ်ႇႁိၼ်ၼၼ်ႉပၼ်ၼမ်ႉတႃႉ။
၉ ၼင်ႇၼၼ်လႄႈမႂ်းတၵ်းလႆႈႁႂ်ႈ ၼမ်ႉဢွၵ်ႇသေၵႃႈၼႂ်းမၢၵ်ႇႁိၼ်မႃးလႄႈပၼ်ၼမ်ႉတီႈပရိၵ်ႈသၢတ်ႈတင်းလၢႆဢိၵ်ႇတင်း တရိၵ်ႈသၢၼ်ႇၶဝ်ပုၼ်ႈဢၼ်ၶဝ်တၵ်းၵိၼ်ဢေႃႈ၊ ဝႃႈၼင်ႇ ၼႆသေလႄႈ
၁၀ မုဝ်းသေႇၵေႃႈဢဝ်ၵၼ်းႁွၵ်ႇၵႃႈတီႈၽၢႆႇၼႃႈထႃႇဝရႃႉၽြႃးသေယဝ်ႉႁဵတ်းၸွမ်းၵႃႈၼင်ႇဢၼ်မၼ်းၸဝ်ႈမီးဢမိင်ႉၼၼ်ႉလႄႈ ပႃးဢဝ်တင်းဢႃႇရုၼ်ႇသေယဝ်ႉ ႁႂ်ႈပရိၵ်ႈသၢတ်ႈတင်းလၢႆၸူႉၵၼ်တုမ်ၵၼ် ၵႃႈတီႈၽၢႆႇၼႃႈမၢၵ်ႇႁိၼ်ၼၼ်ႉသေလႄႈလၢတ်ႈဝႃႈ၊-ၵူၼ်းဢၼ်ပုင်ႇၵၢၼ်ႇၶဝ်ဢိူၺ်း၊ဢွၼ် ၵၼ်ထွမ်ႇငိၼ်းတႃႉ။
၁၁ ၸွင်ႇႁဝ်းတၵ်းလႆႈႁႂ်ႈၼမ်ႉဢွၵ်ႇသေၵႃႈၼႂ်းမၢၵ်ႇႁိၼ်ၼႆႉမႃးပုၼ်ႈသူႁိုဝ်၊ ဝႃႈၼင်ႇၼႆသေယဝ်ႉ မုဝ်းသေႇယဵတ်ႇမိုဝ်းမၼ်းဢဝ်ၵၼ်းႁွၵ်ႇပေႃႉယႅၼ်ႉမၢၵ်ႇႁိၼ်ၼၼ်ႉသွင်ၵမ်းလႄႈ ၼမ်ႉလႆဢွၵ်ႇမႃးၼမ်ၼႃႇလႄႈ ပရိၵ်ႈသၢတ်ႈတင်းလၢႆဢိၵ်ႇတင်းတရိၵ်ႈသၢၼ်ႇၶဝ်လႆႈၵိၼ်ဢေႃႈ။
၁၂ ထႃႇဝရႃႉၽြႃး မီးဢမိင်ႉတီႈမုဝ်းသေႇတင်းဢႃႇရုၼ်ႇလႄႈဝႃႈ၊-ၵွပ်ႈပိူဝ်ႈသူယင်းဢမ်ႇယုမ်ႇမၢတ်ႈၵဝ်လႄႈဢမ်ႇႁဵတ်းႁႂ်ႈတၢင်းဢၼ်မူတ်းၸၢင်ႇၵဝ် ထၢင်ႇသႃးသိုဝ်ႈၼႃႈတႂ်ႈတႃႇၵူၼ်းမဵဝ်းဢိသရေႇလ တင်းလၢႆၼၼ်ႉလႄႈ သူဢမ်ႇလႆႈဢၶႂၢင်ႉဢၼ်တၵ်းဢဝ်ပရိၵ်ႈသၢတ်ႈၼႆႉ ၵႂႃႇသူင်ႇၵႃႈတီႈမိူင်းဢၼ်ၵဝ်တၵ်းပၼ်တီႈ ၶဝ်ၼၼ်ႉ၊ဝႃႈၼင်ႇၼႆဢေႃႈ။
၁၃ ၼမ်ႉၼၼ်ႉပဵၼ်ၼမ်ႉမေႇရိၽဢေႃႈ။လွင်ႈမၼ်းၸမ်းၵူၼ်းမဵဝ်းဢိသရေႇလတင်းလၢႆ ႁဵတ်းၶတ်းၵၼ်တင်းထႃႇဝရႃႉၽြႃးလႄႈမၼ်းၸဝ်ႈႁႂ်ႈ တၢင်းဢၼ်မၼ်းၸဝ်ႈမူတ်းၸၢင်ႇၼၼ်ႉထၢင်ႇသႃးၵႃႈၼႂ်းၶဝ်ၼၼ်ႉဢေႃႈ။
ၶုၼ်ႁေႃၶမ်းဢေႇတုင်ႇ ဢမ်ႇပၼ်ဢၶႂၢင်ႉၵူၼ်းဢိသရေႇလ
၁၄ မိူဝ်ႈၼၼ်ႉမုဝ်းသေႇ ပွႆႇၸႂ်ႉသၢၼ်ႇတမၢၼ်ႇတင်းလၢႆလုၵ်ႉသေၵႃႈတီႈၵႃႇတေႇသ ၸူးၵႃႈတီႈၶုၼ်ႁေႃၶမ်းဢေႇတုင်ႇလႄႈ ႁႂ်ႈၶဝ်လၢတ်ႈလႄႈဝႃႈ၊-ၸဝ်ႈႁဝ်းႁူႉတုၵ်ႉၶႃႉတၢင်းၽၢၼ် ဢၼ်ႁဝ်းၶႃႈလႆႈထူပ်းၵူႈၸိူဝ်ႉၵူႈ ပိူင်ဢၼ်ဝႃႈ၊
၁၅ လွင်ႈဢၼ်ပူႇမွၼ်ႇႁဝ်းၶႃႈလူင်းၵႂႃႇၵႃႈတီႈမိူင်းဢေႇၵႅပ်ႉတုလႄႈ ႁဝ်းၶႃႈလႆႈယူႇၵႃႈၼႂ်းမိူင်းဢေႇၵႅပ်ႉတုၶိင်ႇၵႃႇလႃႉႁိုင်ၼႃႇလႄႈ ၵူၼ်းဢေႇၵႅပ်ႉတုတင်းလၢႆၼိၵ်ႈၸၢၵ်ႈငႅၼ်းသေးႁဝ်းၶႃႈ တင်းပူႇမွၼ်ႇႁဝ်းၶႃႈဢိၵ်ႇတင်း လွင်ႈဢၼ်မိူဝ်ႈဢၼ်ႁဝ်းၶႃႈႁွင်ႉသႅၼ်ႇတီႈထႃႇဝရႃႉၽြႃးၼၼ်ႉ မၼ်းၸဝ်ႈပွႆႇၸႂ်ႉတမၢၼ်ႇၵၢင်ႁၢဝ်မႃးသေလႄႈ ၼုၵ်ႈဢဝ်ႁဝ်းၶႃႈဢွၵ်ႇ ၵေႃႈၼႂ်းမိူင်းဢေႇၵႅပ်ႉတုၼၼ်ႉယူႇၶႃႈဢေႃႈ။
၁၆ မိူဝ်ႈလဵဝ်ၼႆႉ ႁဝ်းၶႃႈမီးယူႇၵႃႈတီႈၵႃႇတေႇသဢၼ်ပဵၼ်ဝဵင်းၵႃႈတီႈႁိမ်း တီႈသုတ်းလႅၼ်လိၼ်မိူင်းၸဝ်ႈႁဝ်းၼၼ်ႉ ၶႃႈဢေႃႈ။
၁၇ ႁႂ်ႈႁဝ်းၶႃႈလႆႈပႆလတ်ႈၵႃႈၼႂ်းၵၢင်မိူင်းၸဝ်ႈႁဝ်းၵႂႃႇသေၵမ်း။ႁဝ်းၶႃႈဢမ်ႇယဵပ်ႇဢမ်ႇၶၢမ်ႈႁႆႊၼႃးသူၼ်ဢူးယဵၼ်ႇၸပိတ်ႉတင်းလၢႆၶႃႈ။ႁဝ်းၶႃႈဢမ်ႇၵိၼ်ၼမ်ႉၵႃႈတီႈၼမ်ႉမေႃႇၶႃႈ။ႁဝ်းၶႃႈတၵ်းပႆၸွမ်းၵႃႈတီႈသဵၼ်ႈတၢင်းလူင်ၵူၺ်းလႄႈ ဢမ်ႇဝၢႆႇၵႂႃႇၵႃႈတီႈၽၢႆႇၶႂႃၽၢႆႇသၢႆႉ တေႃႇထိုင်ႁွတ်ႈပေႃးပူၼ်ႉလႅၼ်လိၼ်မိူင်းၸဝ်ႈႁဝ်းၼၼ်ႉတီႈၶႃႈ၊ဝႃႈၼင်ႇၼႆဢေႃႈ။
၁၈ ဢေႇတုင်ႇၵေႃႈၶိုၼ်းလၢတ်ႈလႄႈဝႃႈ၊-မႂ်းဢမ်ႇလႆႈပႆလတ်းၵႃႈတီႈၼႂ်းၵၢင်မိူင်းၵဝ်ၵႂႃႇ။ပေႃးပႆလတ်းၵႂႃႇၸိုင်ၵဝ်တၵ်းဢဝ်လၢၵ်ႈၼၢၵ်ႈလၢပ်ႇလႅဝ်း ႁၢမ်ႈတပ်ႉႁႄႉၶႅၼ်ဢေႃႈ၊ဝႃႈၼင်ႇၼႆဢေႃႈ။
၁၉ ၵူၼ်းမဵဝ်းဢိသရေႇလတင်းလၢႆၵေႃႈလၢတ်ႈလႄႈဝႃႈ၊-ႁဝ်းၶႃႈတၵ်းပႆၸွမ်းတၢင်းလူင်ၵူၺ်းၶႃႈဢေႃႈ။ပေႃးႁဝ်းၶႃႈဢိၵ်ႇတင်းတရိၵ်ႈသၢၼ်ႇႁဝ်းၶႃႈၵိၼ်ၼမ်ႉၸဝ်ႈႁဝ်းၸိုင် ႁဝ်းၶႃႈတၵ်းပၼ်ၵႃႊမၼ်းၶၼ်မၼ်းၶႃႈဢေႃႈ။ယင်းဢမ်ႇႁဵတ်းဢမူႉတၢင်ႇၸိူဝ်ႉတၢင်ႇပိူင်လႄႈ ႁဝ်းၶႃႈတၵ်းဢဝ် တိၼ်ပႆၵႂႃႇၵူၺ်းၶႃႈဢေႃႈ။
၂၀ ပိၵ်ႉသမ်ႉဝႃႈၼင်ႇၼႆသေၵေႃႈဢေႇတုင်ႇ လၢတ်ႈလႄႈဝႃႈ၊-မႂ်းဢမ်ႇလႆႈပႆလတ်းၵႂႃႇ၊ဝႃႈၼင်ႇၼႆသေယဝ်ႉ ပႃးဢဝ်တင်းၵူၼ်းၼမ်ၼႃႇဢိၵ်ႇတင်း ၶႅၼ်မိုဝ်းဢၼ်ႁႅင်းၼႃႇဢွၵ်ႇမႃး ႁႂ်ႈလႆႈႁၢမ်ႈတပ်ႉႁႄႉၶႅၼ်ဢေႃႈ။
၂၁ ၼင်ႇၼၼ်လႄႈဢေႇတုင်ႇ ဢမ်ႇပၼ်ဢၶႂၢင်ႉႁႂ်ႈၵူၼ်းဢိသရေႇလ ပႆလတ်းၵႃႈတီႈၼႂ်းၵၢင်မိူင်းမၼ်းၵႂႃႇ။ပိူဝ်ႈၼႆလႄႈဢိသရေႇလဝေႈပိူင်ႈမၼ်းသေဢေႃႈ။
ဢႃႇရုၼ်ႇတၢႆၼိူဝ်လွႆ
၂၂ ၶဝ်ဢွၼ်ၵၼ်လုၵ်ႉသေၵႃႈတီႈၵႃႇတေႇသ ဢွၵ်ႇတႃပႆတၢင်းလႄႈၵူၼ်းမဵဝ်းဢိသရေႇလ ပရိၵ်ႈသၢတ်ႈတင်းသဵင်ႈတင်းလူင်ႁွတ်ႈထိုင်ၵႃႈတီႈလွႆႁေႃႇရဢေႃႈ။
၂၃ ထႃႇဝရႃႉၽြႃးမီးဢမိင်ႉတီႈမုဝ်းသေႇ တင်းဢႃႇရုၼ်ႇၵႃႈၼိူဝ်လွႆႁေႃႇရ ၵႃႈတီႈႁိမ်းလႅၼ်လိၼ်ဢေႇတုင်ႇၼၼ်ႉလႄႈဝႃႈၸမ်း၊-
၂၄ ဢႃႇရုၼ်ႇတၵ်းလႆႈႁွတ်ႈထိုင်ၵႃႈတီႈဢၼ်ၵူၼ်းမဵဝ်းမၼ်းတင်းလၢႆ ၸူႉတုမ်ၼၼ်ႉဢေႃႈ။လွင်ႈမၼ်းၸမ်းၵွပ်ႈပိူဝ်ႈသွင်ၶိူဝ်ၶတ်းၵႂၢမ်းၵဝ်ၵႃႈတီႈႁိမ်းၼမ်ႉမေႇရိၽၼၼ်ႉလႄႈ မၼ်းတၵ်းဢမ်ႇလႆႈၶဝ်ႈၵႃႈၼႂ်းမိူင်းဢၼ်ၵဝ်တၵ်းပၼ်တီႈၵူၼ်းမဵဝ်း ဢိသရေႇလၼၼ်ႉ။
၂၅ ပိူဝ်ႈၼႆလႄႈ ႁွင်ႉဢဝ်ဢႃႇရုၼ်ႇတင်းလုၵ်ႈၸၢႆးမၼ်းဢေႇလႃႇၸႃႇလႄႈ ဢဝ်သွင်ၶႃၵႂႃႇၵႃႈတီႈၼိူဝ်လွႆႁေႃႇရသေယဝ်ႉ၊ ထွတ်ႇၶူဝ်းၼုင်ႈဢႃႇရုၼ်ႇလႄႈ ဢဝ်ၼုင်ႈပၼ်လုၵ်ႈၸၢႆးမၼ်းဢေႇ လႃႇၸႃႇတႃႉ။
၂၆ ဢႃႇရုၼ်ႇတၵ်းလႆႈတၢႆၵႃႈတီႈၼၼ်ႉလႄႈ ႁွတ်ႈထိုင်ၵႃႈတီႈဢၼ်ၵူၼ်းမဵဝ်းမၼ်းၸူႉတုမ် ၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၇ မုဝ်းသေႇႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉၼၼ်ႉလႄႈ ၶဝ်ၶိုၼ်ႈၵႂႃႇၵႃႈၼိူဝ်လွႆႁေႃႇရၵႃႈတီႈၽၢႆႇၼႃႈပရိၵ်ႈ သၢတ်ႈတင်းသဵင်ႈတင်းလူင်ဢေႃႈ။
၂၈ မုဝ်းသေႇထွတ်ႇၶူဝ်းၼုင်ႈဢႃႇရုၼ်ႇလႄႈဢဝ်ၼုင်ႈပၼ်တီႈလုၵ်ႈၸၢႆးမၼ်းဢေႇလႃႇၸႃႇသေယဝ်ႉ ဢႃႇရုၼ်ႇတၢႆၵႃႈတီႈၼၼ်ႉၵႃႈၼိူဝ်ၸိၵ်းလွႆဢေႃႈ။မုဝ်းသေႇတင်းဢေႇလႃႇ ၸႃႇလူင်းသေၵႃႈၼိူဝ်လွႆၼၼ်ႉမႃးဢေႃႈ။
၂၉ မိူဝ်ႈဢၼ်ပရိၵ်ႈသၢတ်ႈတင်းသဵင်ႈတင်းလူင် ႁူႉႁၼ်လွင်ႈဢၼ်ဢႃႇရုၼ်ႇတၢႆယဝ်ႉၼၼ်ႉၸိုင် ၵူၼ်းမဵဝ်းဢိသရေႇလၵႃႈမီးၸိူဝ်းၼၼ်ႉ ဢွၼ်ၵၼ်ႁဵတ်းတၢင်းဢၼ်ႁႆႈႁွင်ႉပွင်ႉၶင်းသီႇသိပ်းဝၼ်းတဵမ်တဵမ် ၵွပ်ႈပိူဝ်ႈဢႃႇရုၼ်ႇဢေႃႈ။