Chapter
၁၇
မွၵ်ႇၵီႈမႃးၼိူဝ်ၵၼ်းႁွၵ်ႇဢႃႇရုၼ်ႇ
၁ ထႃႇဝရႃႉၽြႃး သမ်ႉမီးဢမိင်ႉတီႈ မုဝ်းသေႇ လႄႈဝႃႈ ၸမ်း၊-
၂ မႂ်းသင်ႇလၢတ်ႈတီႈၵူၼ်းမဵဝ်းဢိသရေႇလၶဝ်တင်းလၢႆ ၸွမ်းလူၺ်ႈမဵဝ်းပူႇမဵဝ်းပေႃႈၶဝ်ၵႃႈၼႂ်းမဵဝ်းၵူၼ်းဢိသရေႇလသိပ်းသွင်မဵဝ်းၼၼ်ႉ ႁႂ်ႈၶဝ်ဢဝ်ၵၼ်းႁွၵ်ႇသိပ်းသွင်လႅမ်ႈ တီႈၶဝ်ၸိူဝ်းဢၼ်ႁဵတ်းၶုၼ်ၼၼ်ႉလႄႈ ဢဝ်ၸိုဝ်သဵင်ၶဝ်ၵူႈၵေႃႉတႅမ်ႈသႂ်ႇဝႆႉၵႃႈၼိူဝ်ၵၼ်း ႁွၵ်ႇၼၼ်ႉတႃႉ။
၃ ၸိုဝ်သဵင်ဢႃႇရုၼ်ႇၸိုင်ဢဝ်တႅမ်ႈသႂ်ႇဝႆႉၵႃႈၼိူဝ်ၵၼ်းႁွၵ်ႇမဵဝ်းလေႇဝိတႃႉ။တၵ်းလႆႈမီးၵၼ်းႁွၵ်ႇယေႈလႅမ်ႈ ပုၼ်ႈၵူၼ်းလူင်မဵဝ်းပူႇမဵဝ်းပေႃႈၶဝ်ယေႈႁူဝ်ဢေႃႈ။
၄ မႂ်းဢဝ်ၸိူဝ်းၼၼ်ႉဝႆႉၵႃႈတီႈၽၢႆႇၼႃႈၶိူင်ႈၶၢမ်ႇသၢၵ်ႈသေႇ ၵႃႈၼႂ်းသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈတီႈဢၼ်ၵဝ်ထူပ်းၵၼ်တင်းမႂ်းၼၼ်ႉ တႃႉ။
၅ ၵၼ်းႁွၵ်ႇၵေႃႉဢၼ်ၵဝ်လိူၵ်ႈၵဵပ်းဢဝ်ၼၼ်ႉတၵ်းမွၵ်ႇမွၵ်ႇဢေႃႈ။ၵဝ်တၵ်းႁဵတ်းႁႂ်ႈတၢင်းဢၼ်ၵူၼ်းမဵဝ်းဢိသရေႇလတင်းလၢႆ တၢင်ႇဢပျႅတ်ႈပွင်ႉၶင်းပွင်ႉမိူၼ်ႇတီႈမႂ်းၼၼ်ႉထၢတ်ႇယဵၼ်သေၵႃႈတီႈၵဝ်ဢေႃႈ၊ ဝႃႈ ၼင်ႇၼႆလႄႈ
၆ မုဝ်းသေႇၵေႃႈသင်ႇလၢတ်ႈတီႈၵူၼ်းမဵဝ်းဢိသရေႇလတင်းလၢႆလႄႈ ၶုၼ်ၸိူဝ်းၼၼ်ႉတင်းသဵင်ႈတင်းလူင်ၵေႃႈ ၸွမ်းလူၺ်ႈမဵဝ်းပူႇမဵဝ်းပေႃႈၶဝ်ၼၼ်ႉၶုၼ်ယေႈႁူဝ်ၵၼ်းႁွၵ်ႇယေႈလႅမ်ႈ ဢွၼ်ၵၼ်ပၼ်ၵၼ်းႁွၵ်ႇသိပ်းသွင်လႅမ်ႈဢေႃႈ။ၵၼ်းႁွၵ်ႇဢႃႇရုၼ်ႇၵေႃႈ ပႃးလူၺ်ႈၵၼ်တင်းၵၼ်းႁွၵ်ႇၸိူဝ်းၼၼ်ႉဢေႃႈ။
၇ မုဝ်းသေႇဢဝ်ၵၼ်းႁွၵ်ႇၸိူဝ်းၼၼ်ႉ ဝႆႉၵႃႈတီႈၽၢႆႇၼႃႈထႃႇဝရႃႉၽြႃး ၵႃႈၼႂ်းသုမ်ႉထဵင်ၶၢမ်ႇသၢၵ်ႈသေႇၸဝ်ႈ ၼၼ်ႉဢေႃႈ။
၈ ဝၼ်းမိူဝ်ႈၽုၵ်ႈမုဝ်းသေႇၶဝ်ႈၵႃႈၼႂ်းသုမ်ႉထဵင်ၶၢမ်ႇသၢၵ်ႈသေႇၸဝ်ႈလႄႈလႆႈႁၼ်ၵၼ်းႁွၵ်ႇဢႃႇရုၼ်ႇ ဢၼ်ၸၢပ်ႈသႅင်ႇၵၼ်တင်းမဵဝ်း လေႇဝိၼၼ်ႉ မီးတၢင်းဢၼ်ဢွၵ်ႇမႂ်ႊယူႇ၊တုမ်ႇယူႇ၊ၵီႈယူႇ၊ မၢၵ်ႇမၢၵ်ႇပႃႇတမ်ႇယူႇဢေႃႈ။
၉ မုဝ်းသေႇဢဝ်ၵၼ်းႁွၵ်ႇတင်းသဵင်ႈ ဢွၵ်ႇသေၵႃႈတီႈၽၢႆႇၼႃႈထႃႇဝရႃႉၽြႃးသေယဝ်ႉမႃးၵႃႈတီႈၵူၼ်းမဵဝ်းဢိသရေႇလ တင်းလၢႆလႄႈ ၶဝ်ၵေႃႈဢွၼ်ၵၼ်လူတူၺ်းသေယဝ်ႉၶိုၼ်းဢဝ်ၵၼ်းႁွၵ်ႇတူဝ်ၸဝ်ႈၵဝ်ႇၶိုၼ်း ႁင်းၽႂ်ႁင်းမၼ်းဢေႃႈ။
၁၀ ထႃႇဝရႃႉၽြႃးၵေႃႈ မီးဢမိင်ႉတီႈမုဝ်းသေႇလႄႈဝႃႈ၊-ဢဝ်ၵၼ်းႁွၵ်ႇဢႃႇရုၼ်ႇ ၶိုၼ်းဝႆႉၵႃႈတီႈၽၢႆႇၼႃႈၶိူင်ႈၶၢမ်ႇသၢၵ်ႈသေႇၼၼ်ႉလႄႈ ႁႂ်ႈမီးယူႇတီႈၼၼ်ႉသေႇသေႇ ပုၼ်ႈဢၼ်တၵ်းပဵၼ်သၢၵ်ႈသေႇၽၢႆႇၼိုင်ႈတင်းၶဝ်ၸိူဝ်းဢၼ်ပုင်ႇၵၢၼ်ႇၼၼ်ႉတႃႉ။
၁၁ ၼင်ႇၼၼ်လႄႈမႂ်းတၵ်းလႆႈႁႂ်ႈ တၢင်းဢၼ်ၶဝ်တၢင်ႇဢပျႅတ်ႈပွင်ႉၶင်းပွင်ႉမိူၼ်ႇတီႈၵဝ်ၸိူဝ်းၼၼ်ႉသုတ်းၵွႆလႄႈ ႁႂ်ႈၶဝ်လႆႈၵၢင်းလွတ်ႈတင်းၽေးတၢင်းတၢႆဢေႃႈ၊ ဝႃႈၼင်ႇၼႆလႄႈ၊မုဝ်းသေႇႁဵတ်းၸွမ်းဢေႃႈ။ၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမၼ်းၼၼ်ႉ မၼ်းႁဵတ်းၸိူဝ်ႉၼင်ႇၼၼ်ဢေႃႈ။
၁၂ ၵူၼ်းမဵဝ်းဢိသရေႇလတင်းလၢႆၵေႃႈ ဢွၼ်ၵၼ်လဝ်ႈလၢတ်ႈတီႈမုဝ်းသေႇလႄႈဝႃႈ၊- ႁဝ်းၶႃႈၼႆႉတေတၢႆၶႃႈယဝ်ႉ။ႁဝ်းၶႃႈလူႉလႅဝ်ၶႃႈယဝ်ႉ။ႁဝ်းၶႃႈတင်းသဵင်ႈ တင်းလူင်လူႉလႅဝ်ၶႃႈယဝ်ႉ။
၁၃ ၵႃႈပဵၼ်ၵေႃႉဢၼ်သုတ်ႉၸပ်းသုတ်ႉၸူးၵႃႈတီႈသုမ်ႉထဵင်ထႃႇဝရႃႉၽြႃးၼၼ်ႉတၵ်းတၢႆၵူႈၵေႃႉၶႃႈယဝ်ႉ။ႁဝ်းၶႃႈၵႃႈမီးၸိူဝ်းၼႆႉတၵ်းထုပ်းၽေးတၢင်းတၢႆယဝ်ႉၶႃႈႁိုဝ်း၊ ဝႃႈၼင်ႇၼႆဢေႃႈ။