Chapter
၁၄
ၵူၼ်းတင်းလၢႆလုၵ်ႉၽိုၼ်ႉ
၁ မိူဝ်ႈၼၼ်ႉ ပရိၵ်ႈသၢတ်ႈတင်းသဵင်ႈတင်းလူင်ဢွၼ်ၵၼ်ႁွင်ႉသႅၼ်ႇဢူၼ်ဢဵၼ်မေႃးမေးယူႇသေလႄႈ ႁွင်ႉႁႆႈယူႇ တင်းၶိုၼ်းဢေႃႈ။
၂ ပရိၵ်ႈသၢတ်ႈၵူၼ်းမဵဝ်းဢိသရေႇလတင်းသဵင်ႈတင်းလူင် တၢင်ႇဢပျႅတ်ႈပွင်ႉၶင်းပွင်ႉမိူၼ်ႇတီႈမုဝ်းသေႇတင်းဢႃႇရုၼ်ႇလႄႈဝႃႈ၊-ႁဵတ်းသင်ႁဝ်းဢမ်ႇတၢႆၵႃႈၼႂ်းမိူင်းဢေႇၵႅပ်ႉတုလႄႈ သမ်ႉမႃးတၢႆၵႃႈ ၼႂ်းထိူၼ်ႇၼႆႉ။
၃ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈထႃႇဝရႃႉၽြႃးဢဝ်ႁဝ်းမႃးၵႃႈတီႈမိူင်းၼႆႉ ႁႂ်ႈႁဝ်းလႆႈလႆႈမႃးတၢႆလူၺ်ႈလၢပ်ႇလူၺ်ႈလႅဝ်းၸိုဝ်ႉၼင်ႇႁိုဝ်။လုၵ်ႈႁဝ်းမေးႁဝ်းၸိူဝ်းၼႆႉ တၵ်းလႆႈပဵၼ်တီႈဢၼ်ပိူၼ်ႈတီႉဢဝ်သိမ်းဢဝ်ဢေႃႈ။ႁဝ်းလီၶိုၼ်းမိူဝ်းၵႂႃႇၵႃႈတီႈမိူင်းဢေႇၵႅပ်ႉတုယဝ်ႉဢမ်ႇၸႂ်ႈႁိုဝ်၊ဝႃႈၼင်ႇၼႆသေယဝ်ႉ၊ ၵေႃႉၼိုင်ႈ လၢတ်ႈတီႈၵေႃႉၼိုင်ႈလႄႈဝႃႈ၊-
၄ ဢွၼ်ၵၼ်ယုၵ်ႉယွင်ႈၵူၼ်းသေၵေႃႉၵေႃႉ ႁႂ်ႈပဵၼ်ၵူၼ်းဢွၼ်ႁူဝ်ႁဝ်းလႄႈၶိုၼ်းမိူဝ်းၵႂႃႇၵႃႈတီႈမိူင်းဢေႇၵႅပ်ႉတု ပုၼ်ႉတႃႉႁဝ်း၊ဝႃႈၼင်ႇ ၼႆဢေႃႈ။
၅ မုဝ်းသေႇတင်းဢႃႇရုၼ်ႇၶုပ်ႉမူပ်ႇယူႇၵႃႈတီႈၽၢႆႇၼႃႈပရိၵ်ႈသၢတ်ႈ ၵူၼ်းမဵဝ်းဢိသရေႇလတင်းသဵင်ႈတင်းလူင်ၼၼ်ႉဢေႃႈ။
၆ ယေႃးသုလုၵ်ႈၸၢႆးၼုၼ်ႇတင်းၵႃႇလိပ်ႉလုၵ်ႈၸၢႆးယေႇၽုၼ်ႇၼႃႇ ဢၼ်ၶဝ်ႈပႃးၼႂ်း ၶဝ်ၸိူဝ်းဢၼ်ၵႂႃႇလွမ်တူၺ်းမိူင်းၶႃႇၼၢၼ်ႇၼၼ်ႉ ၸၵ်ႉသိၵ်ႇၶူဝ်းၼုင်ႈသွင်ၶႃလႄႈ လၢတ်ႈတီႈပရိၵ်ႈသၢတ်ႈၵူၼ်းမဵဝ်းဢိသရေႇလ တင်းသဵင်ႈတင်းလူင်လႄႈဝႃႈ၊-
၇ မိူဝ်ႈဢၼ်ႁဝ်းၵႂႃႇလႄႈလႄႇလဵပ်ႈလွမ်တူၺ်းၼၼ်ႉပဵၼ်မိူင်းဢၼ်လီၼႃႇလူင်လၢင် ဢေႃႈ။
၈ ပေႃးထႃႇဝရႃႉၽြႃးသိူဝ်းၸႂ်လူၺ်ႈႁဝ်းၸိုင်မၼ်းၸဝ်ႈ တၵ်းဢဝ်ႁဝ်းသူင်ႇႁွတ်ႈၵႃႈတီႈမိူင်းဢၼ်ၼမ်ႉၼူမ်းတင်းၼမ်ႉၽိုင်ႈလႆယူႇၼၼ်ႉလႄႈ ပၼ်ႁဝ်း ပိူင်ႇဢေႃႈ။
၉ ၵူၺ်းၵႃႈ ယႃႇပေဢွၼ်ၵၼ်ပုင်ႇၵၢၼ်ႇထႃႇဝရႃႉၽြႃးသေၵမ်း။ယႃႇပေၵူဝ်ပေႁႄၵူၼ်းဝၢၼ်ႈၵူၼ်းမိူင်းၼၼ်ႉသေၵမ်း။ႁဝ်းတၵ်းဢိုၼ်ႈၶဝ်ပႅတ်ႈဢေႃႈ။တၢင်းဢၼ်ႁႄႉဢၼ်ၵင်ႈၶဝ်ၼၼ်ႉ ၶၢႆႉသေၵႃႈတီႈၼိူဝ် ၶဝ်ၵႂႃႇယဝ်ႉ။
၁၀ ထႃႇဝရႃႉၽြႃးမီးယူႇၽၢႆႇႁဝ်းဢေႃႈ။ယႃႇပေၵူဝ်ပေႁႄၶဝ်ၼၼ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊ပရိၵ်ႈသၢတ်ႈတင်းသဵင်ႈတင်းလူင်ၼၼ်ႉ ဢွၼ်ၵၼ်ၸီႇယၢင်ႇႁႂ်ႈဢဝ်မၢၵ်ႇႁိၼ်ထႅမ်ႈသွင်ၶႃၼၼ်ႉဢေႃႈ။မိူဝ်ႈၼၼ်ႉ မုၼ်ၽုင်းထႃႇဝရႃႉၽြႃးထၢင်ႇသႃးမႃးၵႃႈၼႂ်းသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈၽၢႆႇၼႃႈ ၵူၼ်းမဵဝ်းဢိသရေႇလတင်းသဵင်ႈတင်းလူင်ဢေႃႈ။
၁၁ ထႃႇဝရႃႉၽြႃးလၢတ်ႈတီႈမုဝ်းသေႇလႄႈဝႃႈ၊- ၵူၼ်းမဵဝ်းၼႆႉ တၵ်းႁဵတ်းဢမ်ႇရူဝ်ႇသေႇၵူဝ်ယမ်ၵဝ်ယူႇၶိင်ႇၵႃႇလႃႉႁိုင်ၵႃႈႁိုဝ်။ပိၵ်ႉသမ်ႉၶဝ်ႁၼ်ၼီႈမိၵ်ႈလၢၵ်ႈၶၼႃႇၵႃႈဢၼ်ၵဝ်လႆႈၼႄပျႃး တီႈၶဝ်မႃးယဝ်ႉၸိူဝ်းၼၼ်ႉသေၵေႃႈ ၶဝ်ယင်းဢမ်ႇယုမ်ႇၵဝ်လႄႈ တၵ်းယူႇၶိင်ႇၵႃႇ လႃႉႁိုင်ၵႃႈႁိုဝ်။
၁၂ ၵဝ်တၵ်းဢဝ်တၢင်းဢၼ်ပဵၼ်ၵႃႇလႃႉႁႃႇလႅင်ႉမိူင်း ပၼ်တၢမ်ႇတီႈၶဝ်လႄႈၼုၵ်ႈထွၼ်ဢွၵ်ႇသေၵႃႈၼႂ်းဢရႃႇတၢင်းဢၼ်ၶၢမ်ႇဢမူၺ်ႇၼၼ်ႉဢေႃႈ။တၵ်းႁႂ်ႈမႂ်းပဵၼ်ၵူၼ်းမဵဝ်းဢၼ်ယိင်ႈၶႅၼ်းၼမ်ၵိုၼ်း မဵဝ်းဢၼ်တၼ်းၶူဝ်းယိင်ႈၶႅၼ်းယႂ်ႇသေၶဝ်ၼၼ်ႉ ဢေႃႈ၊ဝႃႈၼင်ႇၼႆဢေႃႈ။
၁၃ မုဝ်းသေႇၵေႃႈလဝ်ႈလၢတ်ႈတီႈထႃႇဝရႃႉၽြႃးလႄႈဝႃႈ၊-ၵူၼ်းဢေႇၵႅပ်ႉတုတင်းလၢႆ လႆႈငိၼ်း လွင်ႈဢၼ်ၸဝ်ႈႁဝ်းဢဝ်တၼ်းၶူဝ်းၸဝ်ႈႁဝ်း ၼုၵ်ႈဢဝ်ၵူၼ်းမဵဝ်းၼႆႉဢွၵ်ႇသေၵႃႈၼႂ်းမိူင်း ဢေႇၵႅပ်ႉတုမႃးယဝ်ႉၼၼ်ႉလႄႈ လႆႈမွၵ်ႇလၢတ်ႈတီႈၶဝ်ၸိူဝ်းဢၼ်ယူႇၵႃႈတီႈမိူင်းၼႆႉၼၼ်ႉယဝ်ႉ တီႈၶႃႈယဝ်ႉ။
၁၄ ၶဝ်လႆႈငိၼ်းလွင်ႈဢၼ်ၸဝ်ႈႁဝ်းထႃႇဝရႃႉၽြႃးမီးယူႇလူၺ်ႈၵၼ်တင်း ၵူၼ်းမဵဝ်းၼႆႉ၊လွင်ႈဢၼ်ၸဝ်ႈႁဝ်းထႃႇဝရႃႉၽြႃးထၢင်ႇသႃးပေႃႇမႃးၼႃႈတေႃႇၼႃႈၵၼ်တင်းၶဝ် လွင်ႈဢၼ်မွၵ်ႇၵုမ်ႈၸဝ်ႈႁဝ်းတႄႇယူႇၵႃႈၼိူဝ်ၶဝ် လွင်ႈဢၼ်ၸဝ်ႈႁဝ်းယူႇၵႃႈၼႂ်းသဝ်မွၵ်ႇၵုမ်ႈၶိင်ႇၵၢင်ဝၼ်းၵႃႈၼႂ်းသဝ်ၽႆးၶိင်ႇၵၢင်ၶိုၼ်းသေလႄႈဢွၼ်ႁူဝ်ၶဝ်ၵႂႃႇၼၼ်ႉတီႈၶႃႈယဝ်ႉ။
၁၅ မိူဝ်ႈလဵဝ်ၼႆႉပေႃးၸဝ်ႈႁဝ်းမၢတ်ႈၵူၼ်းမဵဝ်းၼႆႉပဵၼ်ၸိူဝ်ႉၼင်ႇၵူၼ်းၵေႃႉလဵဝ်သေလႄႈဢဝ်တၢႆပႅတ်ႈၸိုင်ၵူၼ်းၵူႈၸိူဝ်ႉၵူႈမဵဝ်း ဢၼ်ယၢမ်ႈလႆႈငိၼ်းသတၢင်းသဵင်ၶၢဝ်ႇၸဝ်ႈႁဝ်းၸိူဝ်းၼၼ်ႉတၵ်းဢွၼ်ၵၼ်လၢတ်ႈ လႄႈဝႃႈ၊-
၁၆ ထႃႇဝရႃႉၽြႃးၼၼ်ႉၵွပ်ႈပိူဝ်ႈဢၼ်ဢမ်ႇတတ်ႈၼိုင်ႇ ႁႂ်ႈလႆႈဢဝ်ၶဝ်သူင်ႇႁွတ်ႈၵႃႈတီႈမိူင်းဢၼ်မၼ်းၸဝ်ႈတိူင်ႇဝႃႈတၵ်းပၼ်ၼၼ်ႉလႄႈ မၼ်းၸဝ်ႈဢဝ်ၶဝ်တၢႆပႅတ်ႈသေ ၵႃႈတီႈၼႂ်းထိူၼ်ႇယဝ်ႉ၊ဝႃႈၼင်ႇ ၼႆတီႈၶႃႈဢေႃႈ။
၁၇ ႁႂ်ႈတၼ်းၶူဝ်းၸဝ်ႈၽြႃးႁဝ်းၶႃႈ ယႂ်ႇမႅၼ်ႈၸွမ်း ၵႃႈၼင်ႇဢၼ်ၸဝ်ႈႁဝ်းလၢတ်ႈလႄႈဝႃႈ၊-
ထႃႇဝရႃႉၽြႃးပဵၼ်ၽြႃးပဵၼ်ၸဝ်ႈ ဢၼ်တဵမ်ဝႆႉတင်းသၽေႃးဢၼ်ၸႂ်ယႂ်ႇၸႂ်ယၢဝ်း ဢၼ်လိူင်ႇတဵမ်ဝႆႉတင်းတၢင်းဢၼ်ဢိတ်းလူ ဢၼ်ပွႆႇလွတ်ႈတၢင်းဢၼ်ၵမ်ၵျၢင်ႉဢႃႉထမ်ႇမႃႉဢိၵ်ႇတင်း တၢင်းဢၼ်ပူၼ်ႉလိူဝ်တြႃးၸဝ်ႈသေလႄႈ
၁၈ ဢမ်ႇပွႆႇဢမ်ႇလွတ်ႈလၢႆလၢႆလွၵ်ႇလွၵ်ႇဢၼ်ၸီႇယၢင်ႇတႅၼ်းပၼ်ဢပျႅတ်ႈပေႃႈ တီႈလုၵ်ႈလၢင်းတင်းလၢႆ တေႃႇထိုင်ႁွတ်ႈၸူဝ်ႈလုၵ်ႈပၢၼ်လၢၼ်သိုပ်ႇတတိယ၊သိုပ်ႇၸတုၵ်ႉထၼၼ်ႉဢေႃႈ၊ ဝႃႈ ၼင်ႇၼႆၼၼ်ႉသေၵမ်းလူၺ်ႈတီႈၶႃႈ။
၁၉ ၶႅၼ်းတေႃႈပွႆႇလွတ်ႈဢပျႅတ်ႈၵူၼ်းမဵဝ်းၼႆႉ ၸွမ်းၵႃႈၼင်ႇဢၼ်ၵရူႉၼႃႇၸဝ်ႈႁဝ်း ယႂ်ႇၼမ်ၼႃႇလူင်လၢင်ၼၼ်ႉ ဢိၵ်ႇတင်း ၸွမ်းၵႃႈၼင်ႇဢၼ်ၸဝ်ႈႁဝ်းပွႆႇလွတ်ႈဢပျႅတ်ႈၵူၼ်းမဵဝ်းၼႆႉ ၸႃႉၸဵမ်ဝၼ်းဢၼ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉ တေႃႇထိုင်ႁွတ်ႈမိူဝ်ႈလဵဝ်ၼႆႉၼၼ်ႉသေၵမ်းတီႈၶႃႈ၊ၵဝ်ၶႃႈတွင်းပၢၼ်ႇတီႈၶႃႈဢေႃႈ၊ဝႃႈၼင်ႇၼႆသေယဝ်ႉ၊
၂၀ ထႃႇဝရႃႉၽြႃးလၢတ်ႈလႄႈဝႃႈ၊- ၵဝ်ပွႆႇလွတ်ႈၸွမ်းၵႃႈၼင်ႇဢၼ်မႂ်းတွင်းပၢၼ်ႇ ၼၼ်ႉဢေႃႈ။
၂၁ ၵႃႈၼင်ႇဢၼ်ၵဝ်ဢသၢၵ်ႈလိပ်းယူႇလႄႈ မုၼ်ၽုင်းထႃႇဝရႃႉၽြႃးတၵ်းၸွတ်ႇတူဝ်ႈၵႃႈ ၼိူဝ်လိၼ်မိူင်းတင်းသဵင်ႈတင်းမူတ်းၼၼ်ႉ
၂၂ ၵူၼ်းၵႃႈဢၼ်လႆႈႁၼ်မုၼ်ၽုင်းၵဝ် ဢိၵ်ႇတင်းၼီႈမိၵ်ႈလၢၵ်ႈၶၼႃႇဢၼ်ၵဝ်ၼႄပျႃးၵႃႈၼႂ်းမိူင်းဢေႇၵႅပ်ႉတု ဢိၵ်ႇတင်း ၵႃႈၼႂ်းထိူၼ်ႇၸိူဝ်းၼၼ်ႉယူႇသေၵေႃႈ ဢမ်ႇထွမ်ႇဢဝ်ၵႂၢမ်းၵဝ် ၸၢမ်းတူၺ်းၵဝ်တေႃႇထိုင်ႁွတ်ႈ သိပ်းပွၵ်ႈၼၼ်ႉ တၵ်းဢမ်ႇလႆႈႁၼ်မိူင်းဢၼ်ၵဝ်တိူင်ႇဝႃႈတီႈပူႇမွၼ်ႇၶဝ်ၼၼ်ႉ ဢမၢၼ်ႇၶၢၼ်ပဵၼ်ဢေႃႈ။
၂၃ ၵေႃႉဢၼ်ႁဵတ်းဢမ်ႇရူဝ်ႇသေႇၵူဝ်ယမ်ၵဝ်ၼၼ်ႉ တၵ်း ဢမ်ႇလႆႈႁၼ်သေၵေႃႉသေၵူၼ်း။
၂၄ ၶႃႈၵဝ်ၵႃႇလိပ်ႉၸမ်းၵွပ်ႈပိူဝ်ႈဢၼ်မီးသၽေႃးဢၼ်လၢၵ်ႇပိူင်ႈလႄႈ ၸွမ်းလင်ၵဝ်လုမ်းလုမ်းၼၼ်ႉလႄႈ ၵဝ်တၵ်းဢဝ်မၼ်းသူင်ႇႁွတ်ႈၵႃႈၼႂ်း မိူင်းဢၼ်မၼ်းႁွတ်ႈမႃးယဝ်ႉၼၼ်ႉလႄႈ ၸိူဝ်ႉၶိူဝ်းမၼ်းတၵ်းလႆႈပိူင်ႇဢေႃႈ။
၂၅ ၵွပ်ႈပိူဝ်ႈၵူၼ်းမဵဝ်းဢႃႇမလိၵ်ႉ ဢိၵ်ႇတင်းၵူၼ်းမဵဝ်းၶႃႇၼၢၼ်ႇတင်းလၢႆယူႇၵႃႈၼႂ်းပၢင်ႇၼႂ်းႁူၺ်ႈလႄႈ ဝၼ်းမိူဝ်ႈၽုၵ်ႈသူဝၢႆႇၶိုၼ်းၵႂႃႇလႄႈ ၸွမ်းသဵၼ်ႈတၢင်းပၢင်ႇလၢႆႇဢေႇတုင်ႇၵႂႃႇၸူးတီႈထိူၼ်ႇသေတႃႉ၊ဝႃႈၼင်ႇၼႆဢေႃႈ။
၂၆ ထႃႇဝရႃႉၽြႃးသမ်ႉလၢတ်ႈတီႈမုဝ်းသေႇ တင်းဢႃႇရုၼ်ႇလႄႈဝႃႈ၊-
၂၇ ၵဝ်တၵ်းလႆႈယိူၼ်ႉၶၢမ်ႇမူႇၸုမ်းဢၼ်ႁုၵ်းဢၼ်ႁၢႆႉ ဢၼ်တၢင်ႇဢပျႅတ်ႈ ပွင်ႉၶင်းပွင်ႉ မိူၼ်ႇတီႈၵဝ်ၸိူဝ်းၼႆႉႁိုင်ၵႃႈႁိုဝ်။
၂၈ ၵဝ်လႆႈငိၼ်းၵႂၢမ်းဢၼ်ၵူၼ်းမဵဝ်းဢိသရေႇလတင်းလၢႆ တၢင်ႇဢပျႅတ်ႈပွင်ႉၶင်းပွင်ႉမိူၼ်ႇတီႈၵဝ်ၼၼ်ႉယဝ်ႉ။မႂ်းသင်ႇလၢတ်ႈတီႈၶဝ်လႄႈဝႃႈ၊-ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၵႃႈၼင်ႇဢၼ်ၵဝ်ဢသၢၵ်ႈလိပ်းယူႇၼၼ်ႉ ၵဝ်တၵ်းႁဵတ်းတီႈသူ ၸွမ်းၵႃႈၼင်ႇၵႂၢမ်းဢၼ်သူလၢတ်ႈထိုင် ႁူၵဝ်ၼၼ်ႉဢေႃႈ။
၂၉ တူဝ်တၢႆသူတၵ်းတူၵ်းတီႈၵိုတ်းဝႆႉၵႃႈၼႂ်းထိူၼ်ႇၼႆႉဢေႃႈ။သူၸိူဝ်းဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇ ၶဝ်ႈပႃးၼႂ်းၸရၢင်းဢၼ်ဢသၢၵ်ႈလႆႈသၢဝ်းၼိုင်ႈလႄႈ ဢသၢၵ်ႈလိူဝ်သၢဝ်းၵႂႃႇဢၼ်လႆႈ တၢင်ႇဢပျႅတ်ႈ
၃၀ ပွင်ႉၶင်းပွင်ႉမိူၼ်ႇတီႈၵဝ်ယဝ်ႉၸိူဝ်းၼၼ်ႉတၵ်းဢမ်ႇလႆႈႁွတ်ႈထိုင် ၵႃႈတီႈမိူင်းဢၼ်ၵဝ်တိူင်ႇဝႆႉဝႃႈ တၵ်းၶျႃးတီႈယူႇပၼ်သူၵႃႈၼႂ်းမိူင်းၼၼ်ႉဢေႃႈ၊ဝႃႈၼင်ႇၼႆၼၼ်ႉ လိူဝ်သေၵႃႇလိပ်ႉလုၵ်ႈၸၢႆးယေႇၽုၼ်ႇၼႃႇဢိၵ်ႇတင်း ယေႃးသု လုၵ်ႈၸၢႆးၼုၼ်ႇၼၼ်ႉၽႂ်ဢမ်ႇလႆႈၶဝ်ႈ။
၃၁ ၵဝ်တၵ်းဢဝ်လုၵ်ႈဢွၼ်ႇလၢင်းဢွၼ်ႇသူဢၼ်သူဝႃႈ တၵ်းပဵၼ်တီႈဢၼ်ပိူၼ်ႈတီႉဢဝ်သိမ်းဢဝ်ဝႃႈၼင်ႇၼႆၼၼ်ႉၸိူဝ်းၼၼ်ႉ သူင်ႇႁွတ်ႈ လႄႈ ၶဝ်ၼၼ်ႉတၵ်းလႆႈႁူႉမိူင်းဢၼ်သူပႄႇပႅတ်ႈၼၼ်ႉဢေႃႈ။
၃၂ သူၸမ်းတူဝ်တၢႆသူတၵ်းတူၵ်းတီႈၵိုတ်းဝႆႉၵႃႈ ၼႂ်းထိူၼ်ႇၼႆႉဢေႃႈ။
၃၃ လုၵ်ႈလၢၼ်သူတၵ်းလႆႈလႄႇၵႂႃႇလႄႇမႃးယူႇၵႃႈၼႂ်းထိူၼ်ႇၼႆႉ သီႇသိပ်းပီႊတဵမ်တဵမ်လႄႈ ႁၢပ်ႇဢပျႅတ်ႈတၢင်းဢၼ်သူၽိတ်းပိူင်ႈၸိူဝ်းၼၼ်ႉၵႂႃႇ တေႃႇထိုင်ႁွတ်ႈတူဝ်တၢႆသူတၵ်းလႆႈလူႉလႅဝ် ႁၢႆလၢႆၵႂႃႇၵႃႈၼႂ်းထိူၼ်ႇၼႆႉဢေႃႈ။
၃၄ ၸွမ်းၼင်ႇမိူဝ်ႉဝၼ်းဢၼ်သူၵႂႃႇလွမ်တူၺ်းမိူင်းၼၼ်ႉ သီႇသိပ်းဝၼ်းၼၼ်ႉယေႈဝၼ်းဝႆႉယေႈပီႊလႄႈ သူတၵ်းလႆႈႁၢပ်ႇဢပျႅတ်ႈသူသီႇသိပ်းပီႊတဵမ်တဵမ်လႄႈ သူတၵ်းႁူႉတၢင်းဢၼ်ၵဝ် ၸုၼ်ႉပႅတ်ႈသူၼၼ်ႉဢေႃႈ။
၃၅ ၵဝ်ထႃႇဝရႃႉၽြႃးမီးဢမိင်ႉဝႆႉယဝ်ႉ။ၵဝ်တၵ်းႁဵတ်းတီႈမူႇၸုမ်းၵူၼ်းဢၼ်ႁုၵ်းဢၼ်ႁၢႆႉဢၼ်ၸူႉၵၼ်တုမ်ၵၼ် ယူႇၽၢႆႇၼိုင်ႈတင်းၵဝ်တင်းသဵင်ႈတင်းလူင်ၼႆႉၸိူဝ်ႉၼင်ႇၼၼ် ဢမၢၼ်ႇၶၢၼ်ပဵၼ်လႄႈ ၶဝ်တၵ်းလႆႈလူႉလႅဝ်ႁၢႆလၢႆၵႂႃႇၵႃႈၼႂ်းထိူၼ်ႇၼႆႉလႄႈတၢႆၵႃႈတီႈၼႆႉဢေႃႈ၊ဝႃႈၼင်ႇၼႆဢေႃႈ။
၃၆ ၶဝ်ၸိူဝ်းဢၼ်မုဝ်းသေႇ ပွႆႇၸႂ်ႉၵႂႃႇလွမ်တူၺ်းမိူင်းၼၼ်ႉလႄႈၶိုၼ်းမႃးသေယဝ်ႉႁဵတ်းႁႂ်ႈပရိၵ်ႈသၢတ်ႈတင်းသဵင်ႈတင်းလူင် တၢင်ႇဢပျႅတ်ႈပွင်ႉၶင်းပွင်ႉမိူၼ်ႇတီႈမၼ်း ၵွပ်ႈပိူဝ်ႈဢၼ်သေႉသွမ်းမိူင်းၼၼ်ႉ
၃၇ ဢၼ်ပဵၼ်ၶဝ် ၸိူဝ်းဢၼ်မွၵ်ႇလၢတ်ႈသတၢင်းသဵင်ၶၢဝ် ဢၼ်ဢမ်ႇလီလူၺ်ႈလွင်ႈမိူင်းၼၼ်ႉၸိူဝ်းၼၼ်ႉ တၢႆလူၺ်ႈၽေး ၵႃႇလႃႉၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။
၃၈ ၼႂ်းၵူၼ်းဢၼ်ၵႂႃႇလႄႈ လွမ်တူၺ်းမိူင်းၼၼ်ႉၸိူဝ်းၼၼ်ႉယေႃးသု လုၵ်ႈၸၢႆးၼုၼ်ႇဢိၵ်ႇတင်းၵႃႇလိပ်ႉလုၵ်ႈၸၢႆးယေႇၽုၼ်ႇၼႃႇ ၵူၺ်းလႆႈၵတ်းယဵၼ်ၶျၢမ်းသႃႇဢေႃႈ။
၃၉ မုဝ်းသေႇဢဝ်ၵႂၢမ်းၸဝ်ႈသင်ႇလၢတ်ႈဝႆႉတီႈၵူၼ်းမဵဝ်းဢိသရေႇလတင်းသဵင်ႈတင်းလူင်လႄႈ ၵူၼ်းၸိူဝ်းၼၼ်ႉ ဢွၼ်ၵၼ်ၶင်းၶီၶင်းၽၢၼ်ၼႃႇလူင်လၢင်လႄႈ ယူႇဢေႃႈ။
၄၀ ၶဝ်ဢွၼ်ၵၼ်လုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈၶိုၼ်ႈၵႃႈၼိူဝ်ပၢႆလွႆသေယဝ်ႉလၢတ်ႈလႄႈဝႃႈ၊-
၄၁ ယေႃႈ၊ ၵမ်းၼႆႉ၊ႁဝ်းၽိတ်းပိူင်ႈယဝ်ႉ။ႁဝ်းတၵ်းၶိုၼ်ႈၸူးၵႃႈတီႈမိူင်းဢၼ်ထႃႇဝရႃႉၽြႃးဝႆႉၵတိတီႈႁဝ်းၼၼ်ႉယဝ်ႉ မိူဝ်ႈဢၼ်ဝႃႈၼင်ႇၼႆၸိုင်၊ မုဝ်းသေႇၵေႃႈလၢတ်ႈလႄႈဝႃႈ၊-ႁဵတ်းႁိုဝ်လႄႈသူပူၼ်ႉလိူဝ်ဢမိင်ႉထႃႇဝရႃႉၽြႃး။
၄၂ တၢင်းၵျၢမ်ႇတၢင်းပွင်သူဢမ်ႇပဵၼ်လႆႈ။ယႃႇပေၶိုၼ်ႈသေၵမ်း၊ထႃႇဝရႃႉၽြႃးဢမ်ႇမီးၵႃႈၼႂ်းသူ။ပေႃးသူၵႂႃႇၸိုင် သူတၵ်းလႆႈတူၵ်းသုမ်းၵႃႈတီႈၽၢႆႇၼႃႈရၢၼ်ႇသူႇ သူဢေႃႈ။
၄၃ လွင်ႈမၼ်းၸမ်းၵူၼ်းမဵဝ်းဢႃႇမလိၵ်ႉဢိၵ်ႇတင်းၵူၼ်းမဵဝ်းၶႃႇၼၢၼ်ႇ တင်းလၢႆႁွတ်ႈထိုင်မီးဝႆႉထႃႈသူၵႃႈတီႈၼၼ်ႉလႄႈ သူတၵ်းတူၵ်းသုမ်းလူၺ်ႈလၢပ်ႇလႅဝ်းဢေႃႈ။ပိူဝ်ႈဢၼ်သူဝေႈပိူင်ႈသေၵႃႈတီႈထႃႇဝရႃႉၽြႃးလႄႈ ထႃႇဝရႃႉၽြႃးဢမ်ႇယူႇလူၺ်ႈၵၼ်တင်း သူယဝ်ႉ၊ ဝႃႈၼင်ႇၼႆသေၵေႃႈ
၄၄ ၶဝ်ၼၼ်ႉမီးၸႂ်ဢၼ်ၵႅၼ်ႇၶႅင်လႄႈသမ်ႉဢွၼ်ၵၼ် ၶိုၼ်ႈၵႃႈၼိူဝ်ပၢႆလွႆဢေႃႈ။ၵူၺ်းၵႃႈတိူၵ်ႈပတိၺိၼ်ႇထႃႇဝရႃႉၽြႃးဢိၵ်ႇ တင်းမုဝ်းသေႇဢမ်ႇၶၢႆႉသေၵႃႈတီႈၼွၵ်ႈတပ်ႉ။
၄၅ မိူဝ်ႈၼၼ်ႉၵူၼ်းမဵဝ်းဢႃႇမလိၵ်ႉဢိၵ်ႇတင်း ၵူၼ်းမဵဝ်းၶႃႇၼၼိဢၼ်မီးဝႆႉထႃႈၵႃႈၼိူဝ်လွႆၼၼ်ႉၸိူဝ်းၼၼ်ႉ ဢွၼ်ၵၼ်လူင်းမႃးလႄႈ တိုၵ်းတေႃးပႄႉၼႅင်ႇၵူၼ်းမဵဝ်းဢိသရေႇလတင်းလၢႆသေယဝ်ႉ လိုပ်ႈၸွမ်းယႃႉပႅတ်ႈတေႃႇထိုင်ႁွတ်ႈဝဵင်းႁေႃႇမႃႇဢေႃႈ။