Chapter
၁၀
ၼႄးၶရႃႇငိုၼ်း
၁ ထႃႇဝရႃႉၽြႃး သမ်ႉမီးဢမိင်ႉတီႈ မုဝ်းသေႇ လႄႈဝႃႈ ၸမ်း၊-
၂ မႂ်းတၵ်းလႆႈႁဵတ်းၼႄးၶရႃႇဢၼ်ဢဝ်ငိုၼ်းတွင်ႈႁဵတ်းၼၼ်ႉသွင်လုၵ်ႈဢေႃႈ။လွင်ႈၼင်ႇႁိုဝ်တၵ်းႁႂ်ႈပရိၵ်ႈသၢတ်ႈ လႂ်ၸူႉၵၼ်တုမ်ၵၼ် ဢိၵ်ႇတင်းလွင်ႈၼင်ႇႁိုဝ်တၵ်းႁႂ်ႈတပ်ႉၶီႇၵႂႃႇၼၼ်ႉၸိုင် တၵ်းလႆႈပဝ်ႇ ဢေႃႈ။
၃ မိူဝ်ႈဢၼ်ပဝ်ႇၶရႃႇၸိူဝ်းၼၼ်ႉၸိုင် ပရိၵ်ႈသၢတ်ႈတင်းသဵင်ႈတင်းလူင် တၵ်းလႆႈၸူႉၵၼ်တုမ်ၵၼ်ၵႃႈတီႈမႂ်းၵႃႈတီႈၽၢႆႇၼႃႈၽၵ်းတူသုမ်ႉထဵင်ၸဝ်ႈ တီႈ ၸူႉတီႈတုမ်ပရိၵ်ႈသၢတ်ႈဢေႃႈ။
၄ ပေႃးပဝ်ႇၼႄးၶရႃႇလုၵ်ႈလဵဝ်ၵူၺ်းၸိုင် ၵူၼ်းဢၼ်ဢုပ်ႉၼိူဝ်ၵူၼ်းယေႈႁဵင်ၵႃႈတီႈၵူၼ်းမဵဝ်းဢိသရေႇလ တင်းလၢႆၸိူဝ်းၼၼ်ႉတၵ်းလႆႈၸူႉၵၼ်တုမ်ၵၼ်ၵႃႈတီႈမႂ်းဢေႃႈ။
၅ မိူဝ်ႈဢၼ်ပဝ်ႇႁဵတ်းသဵင်ဢၼ်တိုၵ်းယူင်းၼၼ်ႉၸိုင် တပ်ႉဢၼ်မီး တၢင်းဝၼ်းဢွၵ်ႇၸိူဝ်းၼၼ်ႉတၵ်းလႆႈၶီႇၵႂႃႇဢေႃႈ။
၆ မိူဝ်ႈဢၼ်ပဝ်ႇႁဵတ်းသဵင်ဢၼ် တိုၵ်းယူင်းၵမ်းတုတိယၸိုင်တပ်ႉဢၼ်မီးတၢင်းၸၢၼ်းၸိူဝ်းၼၼ်ႉ တၵ်းလႆႈၶီႇၵႂႃႇဢေႃႈ။ၼင်ႇႁိုဝ်ၶဝ်တၵ်းၶီႇၵႂႃႇၸႅၼ်ႇတၢမ်းၵၼ်ၸိုင်တၵ်းလႆႈပဝ်ႇႁဵတ်းသဵင်ဢၼ်တိုၵ်းယူင်းဢေႃႈ။
၇ မိူဝ်ႈဢၼ်ပရိၵ်ႈသၢတ်ႈ မီးတီႈဢၼ်ၸူႉၵၼ်တုမ်ၵၼ်ၼၼ်ႉၸိုင် သူတၵ်းလႆႈပဝ်ႇၶရႃႇလႄႈဢမ်ႇႁဵတ်းသဵင်ဢၼ်တိုၵ်းယူင်းၼၼ်ႉဢေႃႈ။
၈ ယိတ်ႉပရေႃးႁိၵ်ႈဢၼ်ပဵၼ်လုၵ်ႈၸၢႆးဢႃႇရုၼ်ႇ ၸိူဝ်းၼၼ်ႉတၵ်းလႆႈပဝ်ႇၶရႃႇၼၼ်ႉဢေႃႈ။ပဵၼ်ပိင်းၺၢပ်ႈတီႈၸူဝ်ႈလုၵ်ႈပၢၼ်လၢၼ် သူသိုပ်ႇသိုပ်ႇတၢမ်ႈတၢမ်ႈတႃႇသေႇဢေႃႈ။
၉ မိူဝ်ႈဢၼ်သူယူႇၵႃႈတီႈမိူင်းသူယူႇလႄႈၶီႇသိုၵ်းၸူးၵႃႈတီႈရၢၼ်ႇသူႇဢၼ်မႃးတိုၵ်းၼၼ်ႉၸိုင် သူတၵ်းလႆႈပဝ်ႇၶရႃႇၸိူဝ်းၼၼ်ႉဢေႃႈ။မိူဝ်ႈၼၼ်ႉထႃႇဝရႃႉၽြႃး ၽြႃးပဵၼ်ၸဝ်ႈသူတၵ်းၶုၵ်းၸႂ်လႆႈၶႆႈၸႂ်ထူပ်းသူလႄႈ ၵႄႇ ၶျွတ်ႈဢဝ်သူၵႃႈၼႂ်းမိုဝ်းရၢၼ်ႇသူႇဢေႃႈ။
၁၀ ဝၼ်းဢၼ်သူႁဵတ်းတၢင်းဢၼ်သႂၢင်ႇသိူဝ်း ဝၼ်းပွႆးသၽၢင်ႇဝၼ်းလိူၼ်မႂ်ႇၸိူဝ်းၼၼ်ႉ သူတၵ်းလႆႈပဝ်ႇၼႄးၶရႃႇၵႃႈၼိူဝ်ယိၸ်ႉဢၼ်တုတ်ႇၽႆးဢိၵ်ႇတင်း တၢင်းပုၵ်ႉၸေႃႇယိၸ်ႉမိၵ်ႉသႁႃႇယႃႉ တင်းလၢႆပုၼ်ႈဢၼ်ၽြႃးပဵၼ်ၸဝ်ႈသူတၵ်းၶုၵ်းၸႂ်လႆႈၶႆႈၸႂ်ထူပ်းဢေႃႈ။ၵဝ်ပဵၼ်ထႃႇဝရႃႉၽြႃးၽြႃးပဵၼ်ၸဝ်ႈသူဢေႃႈ ဝႃႈၼင်ႇၼႆဢေႃႈ။
ၵူၼ်းဢိသရေႇလဢွၵ်ႇသေၵႃႈတီႈသိၼႃႇ
၁၁ ပီႊတုတိယ လိူၼ်တုတိယ ဝၼ်းဢၼ်ထူၼ်ႈထိုင်သၢဝ်းဝၼ်းၼၼ်ႉ၊ မွၵ်ႇၵုမ်ႈယုၵ်ႉၽၢတ်ႇသေၵႃႈၼိူဝ် သုမ်ႉထဵင်ၸဝ်ႈၶိူင်ႈၶၢမ်ႇသၢၵ်ႈသေႇၼၼ်ႉလႄႈ
၁၂ ၵူၼ်းမဵဝ်းဢိသရေႇလၸိူဝ်းၼၼ်ႉ ဢွၼ်ၵၼ်လုၵ်ႉသေၵႃႈတီႈထိူၼ်ႇသိၼႃႇလႄႈဢွၵ်ႇတႃပႆတၢင်းဢေႃႈ။လိုၼ်းၼၼ်ႉ မွၵ်ႇၵုမ်ႈၼၼ်ႉတႄႇယူႇၵႃႈတီႈထိူၼ်ႇပႃႇရၼ်ႇဢေႃႈ။ၼင်ႇၼၼ်လႄႈၶဝ်ဢွၼ်ၵၼ်ႁဵတ်းတၢင်းဢၼ်ဢွၵ်ႇတႃပႆတၢင်းၵမ်းပထမ ၸွမ်းၵႃႈၼင်ႇဢၼ်ထႃႇဝရႃႉၽြႃး ဢဝ်တင်း မုဝ်းသေႇ မီးဢမိင်ႉၼၼ်ႉဢေႃႈ။
၁၄ တပ်ႉယုတပႃးဢဝ်လၢမ်ႇသေလႄႈ ၶီႇသုၵ်းၵႂႃႇဢွၼ်တၢင်းၸွမ်းလူၺ်ႈမုၵ်ႉၶဝ်ၸိူဝ်းၶဝ်ၼၼ်ႉဢေႃႈ။မုၵ်ႉၸိူဝ်းယုတၸိုင်ၼႃႇသုၼ်ႇ ဢၼ်ပဵၼ်လုၵ်ႈၸၢႆးဢမိၼ တပ်ႉၼၼ်ႉဢုပ်ႉဢေႃႈ။
၁၅ မုၵ်ႉၸိူဝ်းဢိသၶႃႇၸိုင်ၼႃႇသၼေႇလဢၼ်ပဵၼ်လုၵ်ႈၸၢႆးၸုဢႃႇ ၼၼ်ႉဢုပ်ႉဢေႃႈ။
၁၆ မုၵ်ႉၸိူဝ်းၸေႇပုလုၼ်ႇ ၸိုင် ဢေႇလျႃႇၽဢၼ်ပဵၼ် လုၵ်ႈၸၢႆးႁေႇလုၼ်ႇၼၼ်ႉဢုပ်ႉဢေႃႈ။
၁၇ ပူတ်းၶျႃးသုမ်ႉထဵင်ၸဝ်ႈလူင်းလႄႈ ၵူၼ်းမဵဝ်းၵေႇရသုၼ်ႇဢိၵ်ႇတင်းၵူၼ်းမဵဝ်းမေႇရႃႇရိ ၸိူဝ်းၼၼ်ႉႁၢပ်ႇသုမ်ႉထဵင်ၸဝ်ႈသေလႄႈၶီႇသိုၵ်းၵႂႃႇဢေႃႈ။
၁၈ တပ်ႉရုပိၼ်ႇ ပႃးဢဝ်လၢမ်ႇသေလႄႈၶီႇၵႂႃႇၸွမ်းလူၺ်ႈ မုၵ်ႉၶဝ်ၸိူဝ်းၶဝ်ၼၼ်ႉဢေႃႈ။
၁၉ မုၵ်ႉၸိူဝ်းရုပိၼ်ႇၸိုင်ဢေႇလိၸုရဢၼ်ပဵၼ်လုၵ်ႈၸၢႆးသတေုရ ၼၼ်ႉဢုပ်ႉဢေႃႈ။မုၵ်ႉၸိူဝ်းသိမုၼ်ႇၸိုင်သေႇလုမျေႇလ ဢၼ်ပဵၼ်လုၵ်ႈ ၸၢႆးၸုရိသတ်ႉတေႇၼၼ်ႉဢုပ်ႉဢေႃႈ။
၂၀ မုၵ်ႉၸိူဝ်းၵတ်ႉၸိုင်ဢေႇလျႃႇသပ်ႉဢၼ်ပဵၼ်လုၵ်ႈၸၢႆးတူၺ်ႇလ ၼၼ်ႉ ဢုပ်ႉဢေႃႈ။
၂၁ ၵူၼ်းမဵဝ်းၵေႃႇႁတ်ႉၸိူဝ်းၼၼ်ႉႁၢပ်ႇၶိူင်ႈပိူင်ထႃႇၼႃႉတီႈမူတ်းၸၢင်ႇၸဝ်ႈသေလႄႈ ၶီႇၵႂႃႇဢေႃႈ။ၸူဝ်ႈဢၼ်ၶဝ်ဢမ်ႇပႆႇႁွတ်ႈပႆႇၽႅဝ်ၼၼ်ႉၸိုင် ၶဝ်ၸိူဝ်းဢၼ်ၵႂႃႇဢွၼ်တၢင်းၸိူဝ်းၼၼ်ႉ လႆႈပူၵ်းတင်ႈသုမ်ႉထဵင်ၸဝ်ႈဝႆႉထႃႈဢေႃႈ။
၂၂ တပ်ႉဢေးၽရိမ်ႇပႃးဢဝ်လၢမ်ႇသေလႄႈၶီႇၵႂႃႇၸွမ်းလူၺ်ႈမုၵ်ႉၶဝ်ၸိူဝ်းၶဝ်ၼၼ်ႉဢေႃႈ။မုၵ်ႉၸိူဝ်းဢေးၽရိမ်ႇၸိုင်ဢေႇလိသမႃႇ ဢၼ် ပဵၼ်လုၵ်ႈၸၢႆးဢမိႁုတ်ႉၼၼ်ႉဢုပ်ႉဢေႃႈ။
၂၃ မုၵ်ႉၸိူဝ်းမၼႃႇသေႇၸိုင်ၵႃႇမလျေႇလ ဢၼ်ပဵၼ်လုၵ်ႈၸၢႆးပေႇတႃႇၸုရၼၼ်ႉဢုပ်ႉဢေႃႈ။
၂၄ မုၵ်ႉၸိူဝ်း ပိၼ်ႇယႃႇမိၼ်ႇၸိုင်ဢၽိတၼ်ႇ ဢၼ်ပဵၼ်လုၵ်ႈၸၢႆးၵိတေႃႇၼိ ၼၼ်ႉဢုပ်ႉဢေႃႈ။
၂၅ တပ်ႉတၼ်ႇ ဢၼ်ပဵၼ်တပ်ႉလိုၼ်းလင်သုတ်းပိူၼ်ႈတင်းသဵင်ႈတင်းလူင်ၼၼ်ႉ ပႃးဢဝ်လၢမ်ႇသေလႄႈၶီႇၵႂႃႇၸွမ်းလူၺ်ႈမုၵ်ႉၶဝ်ၸိူဝ်းၶဝ်ဢေႃႈ။မုၵ်ႉၸိူဝ်းတၼ်ႇၸိုင်ဢႁေႇၸႃႇဢၼ်ပဵၼ်လုၵ်ႈၸၢႆးဢမိသတ်ႉတေႇၼၼ်ႉဢုပ်ႉဢေႃႈ။
၂၆ မုၵ်ႉၸိူဝ်းဢႃႇသႃႇၸိုင်ပႃႇၵျေႇလ ဢၼ်ပဵၼ်လုၵ်ႈၸၢႆးဢွၵ်ႇရၼ်ႇ ၼၼ်ႉဢုပ်ႉဢေႃႈ။
၂၇ မုၵ်ႉၸိူဝ်းၼပ်ႉထလိၸိုင် ဢႁိရဢၼ် ပဵၼ်လုၵ်ႈၸၢႆးဢေႇၼၼ်ႇၼၼ်ႉဢုပ်ႉဢေႃႈ။
၂၈ ၼင်ႇၼၼ်လႄႈ ပဵၼ်တၢင်းဢၼ်ၵူၼ်းမဵဝ်းဢိသရေႇလတင်းလၢႆ ဢွၵ်ႇတႃပႆတၢင်းၸွမ်းလူၺ်ႈမုၵ်ႉၶဝ်ၸိူဝ်းၶဝ်ၼၼ်ႉဢေႃႈ။ၶဝ်ၼၼ်ႉဢွၼ်ၵၼ်ၶီႇတပ်ႉၵႂႃႇဢေႃႈ။
၂၉ မုဝ်းသေႇ လၢတ်ႈတီႈႁေႃႇပပ်ႉဢၼ်ပဵၼ်လုၵ်ႈၸၢႆးရူၺ်ႇလမဵဝ်းၵူၼ်းမိတျၢၼ်ႇ ဢၼ်ပဵၼ်ပူႇၼၢႆး မုဝ်းသေႇၼၼ်ႉလႄႈဝႃႈ၊-ႁဝ်းၼႆႉဢွၵ်ႇတႃပႆတၢင်းၵႂႃႇၸူးၵႃႈတီႈဢၼ်ထႃႇဝရႃႉၽြႃးဝႆႉၵတိဝႃႈ၊-ၵဝ်တၵ်းဢဝ်ပၼ်တီႈသူဢေႃႈ၊ဢၼ်ဝႃႈၼၼ်ႉဢေႃႈ။ၸွမ်းလူၺ်ႈၵၼ်တင်းႁဝ်းမႃးသေၵမ်း။ႁဝ်းတၵ်းႁဵတ်းၵျေးၸူးတီႈမႂ်းဢေႃႈ။ထႃႇဝရႃႉၽြႃးမီးဢမိင်ႉလွင်ႈဢၼ်တၵ်းႁဵတ်းၵျေးၸူးတီႈၵူၼ်းမဵဝ်းဢိသရေႇလတင်းလၢႆဝႆႉယဝ်ႉ၊ ဝႃႈၼင်ႇၼႆလႄႈ၊ မၼ်းၼၼ်ႉၶိုၼ်းလၢတ်ႈလႄႈဝႃႈ၊-
၃၀ ၵဝ်ဢမ်ႇၸွမ်းဢမ်ႇၵႂႃႇ ၵဝ်တၵ်းၶိုၼ်းမိူဝ်းၵႂႃႇၵႃႈတီႈမိူင်းတီႈယူႇၵဝ်ႇၵဝ်ႇ၊ ၵႃႈတီႈပီႈၼွင်ႉၸိူဝ်ႉၶိူဝ်းၵဝ်ပုၼ်ႉဢေႃႈ၊ဝႃႈၼင်ႇၼႆဢေႃႈ။
၃၁ မုဝ်းသေႇၵေႃႈၶိုၼ်းလၢတ်ႈလႄႈဝႃႈ၊-ယႃႇပေၸုၼ်ႉပေပႅတ်ႈႁဝ်းၵႂႃႇသေၵမ်း။ပိူဝ်ႈဢၼ်မႂ်းႁူႉလွင်ႈဢၼ် ႁဝ်းတၵ်းလႆႈၶျႃးပၢင်ၵႃႈတီႈၼႂ်းထိူၼ်ႇၼႂ်းၶိူဝ်းလႄႈ မႂ်းတၵ်းလႆႈပဵၼ်မၢၵ်ႇတႃႁဝ်း ဢေႃႈ။
၃၂ ပေႃးၸွမ်းလူၺ်ႈၵၼ်တင်းႁဝ်းၵႂႃႇၸိုင် ၵႃႈၼင်ႇဢၼ် ထႃႇဝရႃႉၽြႃးႁဵတ်းၵျေးၸူးတီႈႁဝ်းၼၼ်ႉႁဝ်းတၵ်းႁဵတ်းၵျေးၸူးတီႈမႂ်းဢေႃႈ၊ဝႃႈၼင်ႇၼႆဢေႃႈ။
၃၃ ၵူၼ်းမဵဝ်းဢိသရေႇလၸိူဝ်းၼၼ်ႉဢွၵ်ႇသေၵႃႈတီႈလွႆထႃႇဝရႃႉၽြႃးလႄႈ ၵႂႃႇၶၢဝ်းတၢင်းသၢမ်ဝၼ်းဢေႃႈ။တိူၵ်ႈတႃႇပတိၺိၼ်ႇထႃႇဝရႃႉၽြႃးၼၼ်ႉဢွၼ်ႁူဝ်ၶဝ်ၵႂႃႇ ၶၢဝ်းတၢင်းသၢမ်ဝၼ်းႁႂ်ႈလႆႈႁႃတီႈပုၼ်ႈဢၼ်ၶဝ်တၵ်းၶျႃးပၢင်ဢေႃႈ။
၃၄ မွၵ်ႇၵုမ်ႈထႃႇဝရႃႉၽြႃးၼၼ်ႉ မီးယူႇၵႃႈၼိူဝ်ၶဝ်ၶိင်ႇၵၢင်ဝၼ်းမိူဝ်ႈ ဢၼ်ၶဝ်ယင်းတိုၵ်ႉၶီႇတပ်ႉၵႂႃႇၼၼ်ႉဢေႃႈ။
၃၅ မိူဝ်ႈဢၼ်တိူၵ်ႈတႃႇၸဝ်ႈၵႂႃႇယူႇၼၼ်ႉၸိုင် မုဝ်းသေႇလဝ်ႈလၢတ်ႈလႄႈဝႃႈ၊-ဢူဝ်းထႃႇဝရႃႉၽြႃးတီႈၶႃႈ။လုၵ်ႉသေၵမ်းတီႈၶႃႈ။ႁႂ်ႈရၢၼ်ႇသူႇၸဝ်ႈႁဝ်းတင်းလၢႆပိဝ်သဵၼ်ၵႂႃႇသေၵမ်းလူၺ်ႈတီႈၶႃႈ။ႁႂ်ႈၶဝ်ၸိူဝ်းဢၼ်ၸင်းၸဝ်ႈႁဝ်းၼၼ်ႉ ဢွၵ်ႇပၢႆႊသေၵႃႈတီႈၽၢႆႇၼႃႈၸဝ်ႈႁဝ်းသေၵမ်းလူၺ်ႈတီႈၶႃႈ၊ ဝႃႈၼင်ႇၼႆဢေႃႈ။
၃၆ မိူဝ်ႈဢၼ်တိူၵ်ႈတႃႇၸဝ်ႈၵိုတ်းသဝ်းၼၼ်ႉၸိုင် မၼ်းလဝ်ႈလၢတ်ႈလႄႈဝႃႈ၊-ဢူဝ်းထႃႇဝရႃႉၽြႃး။ၶိုၼ်းမႃးၵႃႈတီႈဢၼ်ၵူၼ်းမဵဝ်း ဢိသရေႇလ ပဵၼ်မိုၼ်ႇပဵၼ်သႅၼ်မီးဝႆႉၼႆႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။