Chapter
၄
ၵူၼ်းမဵဝ်းၵေႃႇႁတ်ႉ
၁ ထႃႇဝရႃႉၽြႃး သမ်ႉမီးဢမိင်ႉတီႈ မုဝ်းသေႇ တင်း ဢႃႇရုၼ်ႇလႄႈဝႃႈ၊-
၂ ၼႂ်းၵူၼ်းမဵဝ်းလေႇဝိ ၸိူဝ်ႉၶိူဝ်းၵေႃႇႁတ်ႉၼၼ်ႉ ၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်မဵဝ်းပူႇမဵဝ်းပေႃႈၶဝ်ၼၼ်ႉလႄႈ ဢဝ်ၸရၢင်းၶဝ်ၸိူဝ်း ဢၼ်ဢသၢၵ်ႈလႆႈသၢမ်သိပ်းၶိုၼ်ႈၵႂႃႇ
၃ တေႃႇထိုင်ႁွတ်ႈႁႃႈသိပ်း ၵႃႈဢၼ်ၶဝ်ႈၵႃႈၼႂ်းမုၵ်ႉၼႂ်းၸိူဝ်းႁႂ်ႈလႆႈပွင်ႁဵတ်းဢမူႉသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈ သၢတ်ႈတင်းသဵင်ႈတင်းလူင်ၼၼ်ႉတႃႉ။
၄ ဢမူႉဢၼ်ၵူၼ်းၸိူဝ်ႉၶိူဝ်းၵေႃႇႁတ်ႉတင်းလၢႆတၵ်းလႆႈပႂ်ႉလူပႂ်ႉတူၺ်းၵႃႈတီႈသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈလႄႈ ၸၢပ်ႈသႅင်ႇလူၺ်ႈၵၼ်တင်းၶိူင်ႈပိူင်ဢၼ်မူတ်း ၸၢင်ႇၼႃႇလူင်လၢင်ၼၼ်ႉၸမ်း
၅ မိူဝ်ႈဢၼ်ထိုင်ၶိင်ႇဢၼ်ၶီႇတပ်ႉၼၼ်ႉၸိုင် ဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉ တၵ်းလႆႈၶဝ်ႈၵႃႈၼႂ်းလႄႈဢဝ်ၽႃႈၵင်ႈတၢင်းၼႂ်းၼၼ်ႉ ၶျႃးလူင်းသေယဝ်ႉဢဝ်ႁူမ်ႇသုမ်ႇ တိူၵ်ႈတႃႇၶိူင်ႈၶၢမ်ႇသၢၵ်ႈသေႇဝႆႉဢေႃႈ။
၆ သမ်ႉတၵ်းလႆႈဢဝ်ၼင်တႁႃႇသႁူမ်ႇသုမ်ႇလႄႈ ဢဝ်ၶူဝ်းဢၼ်သွမ်ႇသိူဝ်ႇၵႃႈၼိူဝ်ၼင်ၼၼ်ႉဝႆႉသေယဝ်ႉ ဢဝ်ၵၢၼ်းႁၢပ်ႇ မၼ်းသွတ်ႇသႂ်ႇဝႆႉဢေႃႈ။
၇ ၵႃႈၼိူဝ်ၶူင်ႇတီႈၵိၼ်ၶဝ်ႈမုၼ်းၽၢႆႇၼႃႈၸဝ်ႈၵေႃႈ ၶဝ်တၵ်းလႆႈဢဝ်ၶူဝ်းဢၼ်သွမ်ႇသိူဝ်ႇဝႆႉလႄႈဢဝ်မေႃႈဢႅင်ႇ၊ ၸေႃႉ၊ ၵွၵ်းဢႅင်ႇ၊ ၵွၵ်းပုၼ်ႈဢၼ်တၵ်းထွၵ်ႇတၵ်းႁိုဝ်ႈၸိူဝ်းၼၼ်ႉ ဢိၵ်ႇတင်း ၶဝ်ႈမုၼ်းဢၼ်လႆႈမီးတႃႇသေႇၼၼ်ႉ
၈ တၢင်ႇသႂ်ႇဝႆႉၵႃႈၼိူဝ်မၼ်းသေယဝ်ႉ ဢဝ်တင်းၶူဝ်းဢၼ်လႅင်ႊႁူမ်ႇသုမ်ႇၶိူင်ႈပိူင်ၸိူဝ်းၼၼ်ႉဝႆႉဢေႃႈ။သမ်ႉတၵ်းလႆႈဢဝ်ၼင်တႁႃႇသႁူမ်ႇသုမ်ႇလႄႈ ဢဝ်ၵၢၼ်းႁၢပ်ႇမၼ်းသွတ်ႇသႂ်ႇဝႆႉ ဢေႃႈ။
၉ ၶဝ်တၵ်းလႆႈဢဝ်ၶူဝ်းဢၼ်သွမ်ႇႁူမ်ႇသုမ်ႇၶူင်ႇတီႈတႆႈၽႆး ဢၼ်တႆႈၽႆးၼၼ်ႉဢိၵ်ႇတင်းၵွၵ်းၽႆးမၼ်းၵိမ်းၺၢပ်ႈၽႆးမၼ်း ၵွၵ်းပုၼ်ႈဢၼ်တၵ်းၶၢမ်ႇဢဝ်ဢၼ်ၺၢပ်ႈၽႆးပႅတ်ႈၼၼ်ႉ တင်းမူၵ်ႇၼမ်ႉမၼ်း ဢၼ်ၶဝ်ဢဝ်ပွင်ဢဝ်ႁဵတ်းမၼ်းၸိူဝ်းၼၼ်ႉလႄႈ
၁၀ ဢဝ်တူဝ်မၼ်းဢိၵ်ႇတင်း ၶိူင်ႈပိူင်မၼ်းၵႃႈမီးၸိူဝ်းၼၼ်ႉသႂ်ႇၵႃႈၼႂ်းထူင်ၼင်တႁႃႇသဝႆႉသေယဝ်ႉ ဢဝ်တၢင်ႇသႂ်ႇၵႃႈ ၼိူဝ်ၶဵင်ႇမၼ်းဝႆႉဢေႃႈ။
၁၁ ၵႃႈၼိူဝ်ယိၸ်ႉပလၢင်ႇၶမ်းၵေႃႈၶဝ်တၵ်းလႆႈဢဝ်ၶူဝ်းဢၼ်သွမ်ႇသိူဝ်ႇဝႆႉလႄႈ ဢဝ်ၼင်တႁႃႇသႁူမ်ႇသုမ်ႇသေယဝ်ႉဢဝ်ၵၢၼ်းႁၢပ်ႇမၼ်း သွတ်ႇသႂ်ႇဝႆႉဢေႃႈ။
၁၂ ၶိူင်ႈပိူင်ပုၼ်ႈဢၼ်တၵ်းပွင်ႁဵတ်းဢမူႉၸဝ်ႈဢၼ်ၶဝ်ဢဝ်ပွင်ႁဵတ်းဢမူႉၸဝ်ႈၵႃႈၼႂ်းထႃႇၼႃႉ တီႈမူတ်းၸၢင်ႇၼၼ်ႉၸိူဝ်းၼၼ်ႉၸိုင် ၶဝ်တၵ်းလႆႈဢဝ်သႂ်ႇဝႆႉၵႃႈၼႂ်းထူင်ၶူဝ်းဢၼ်သွမ်ႇလႄႈဢဝ်ၼင်တႁႃႇသႁူမ်ႇသုမ်ႇသေယဝ်ႉ၊ဢဝ်တၢင်ႇသႂ်ႇ ၵႃႈၼိူဝ်ၶဵင်ႇမၼ်းဝႆႉဢေႃႈ။
၁၃ ယိၸ်ႉပလၢင်ႇၸိုင်ၶဝ်တၵ်းလႆႈဢဝ်တဝ်ႊၵႃႈၼိူဝ်မၼ်းပႅတ်ႈမူတ်းမူတ်းလႄႈ ဢဝ်ၶူဝ်းဢဝ်လႅင်ႊ သိူဝ်ႇဝႆႉၵႃႈၼိူဝ်မၼ်းသေယဝ်ႉဢဝ်ၶိူင်ႈပိူင်ပုၼ်ႈဢၼ်တၵ်းပွင်ႁဵတ်းဢမူႉၸဝ်ႈ ဢၼ်သႅင်ႇၵၼ်တင်းမၼ်း ဢၼ်ပဵၼ်လၢင်ႇပၢၼ်း လႂ်ၶေႃဢၼ်ၵွင်ႉၼိူဝ်ႉ လႂ်ၸေႃႉၽႅပ်ႉ လႂ်ဝၢၼ်ႇ လႂ် ၶိူင်ႈပိူင်ယိၸ်ႉပလၢင်ႇၵႃႈ မီးၸိူဝ်းၼၼ်ႉတၢင်ႇသႂ်ႇၵႃႈၼိူဝ်မၼ်းလႄႈ
၁၄ ဢဝ်ၼင်တႁႃႇသႁူမ်ႇသုမ်ႇသေယဝ်ႉ ဢဝ်ၵၢၼ်းႁၢပ်ႇမၼ်းသွတ်ႇ သႂ်ႇဝႆႉဢေႃႈ။
၁၅ မိူဝ်ႈဢၼ်ဢႃႇရုၼ်ႇဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉႁူမ်ႇသုမ်ႇထႃႇၼႃႉတီႈမူတ်းၸၢင်ႇၸဝ်ႈ တင်းၶိူင်ႈပိူင်ဢၼ်ၸၢပ်ႈသႅင်ႇၵၼ်တင်းထႃႇၼႃႉတီႈမူတ်းၸၢင်ႇၸဝ်ႈၸိူဝ်းၼၼ်ႉ ယဝ်ႉတူဝ်ႈယဝ်ႉလႄႈ ႁွတ်ႈထိုင်ၶိင်ႇၶီႇတပ်ႉၵႂႃႇၸိူဝ်ႉၼင်ႇၼၼ်ၼၼ်ႉ ၵူၼ်းၸိူဝ်ႉၶိူဝ်းၵေႃႇႁတ်ႉတင်းလၢႆတၵ်းလႆႈဢွၼ်ၵၼ်သုတ်ႉၸပ်းသုတ်ႉၸူးႁႂ်ႈလႆႈႁၢပ်ႇၵႂႃႇဢေႃႈ။ၼႂ်းဝႃႈၼၼ်သေၵေႃႈ လွင်ႈၼင်ႇႁိုဝ်ၶဝ်တၵ်းၵၢင်းလွတ်ႈတင်းတၢင်းတၢႆၸိုင် ၶဝ်ဢမ်ႇလႆႈတိူဝ်ႉလႆႈယိပ်းၶိူင်ႈပိူင်ဢၼ်မူတ်းၸၢင်ႇၸိူဝ်းၼၼ်ႉ။ဢၼ်ၼႆႉၸမ်းပဵၼ်ဢမူႉဢၼ်ၵူၼ်းၸိူဝ်ႉၶိူဝ်းၵေႃႇႁတ်ႉတင်းလၢႆ တၵ်းလႆႈပွင်ႁဵတ်းၵႃႈတီႈသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈၼၼ်ႉဢေႃႈ။
၁၆ ဢမူႉဢၼ်ဢေႇလႃႇၸႃႇ ဢၼ်ပဵၼ်လုၵ်ႈၸၢႆးယိတ်ႉပရေႃးႁိၵ်ႈဢႃႇရုၼ်ႇၼၼ်ႉ တၵ်းလႆႈလူတူၺ်းလုမ်းလႃးၼၼ်ႉၸမ်း ပဵၼ်ၼမ်ႉမၼ်းပုၼ်ႈဢၼ်တၵ်းတႆႈၽႆးၼၢမ်ႇသႃႇဢၼ်ႁွမ်ဢၼ်ႁူၺ်း ပုၼ်ႈဢၼ်တၵ်းတုတ်ႇၽႆးတၢင်းပုၵ်ႉၸေႃႇၽေႃးၸဵၼ်ႇ ဢၼ်သၢၵ်ႈၵၢပ်ႈၵူႈဝၼ်းၼမ်ႉမၼ်း ပုၼ်ႈဢၼ်တၵ်းတႃးၼၼ်ႉဢိၵ်ႇတင်းသုမ်ႉထဵင်ၸဝ်ႈတင်းၶိူင်ႈပိူင်မၼ်းၵႃႈမီး ထႃႇၼႃႉတီႈမူတ်းၸၢင်ႇၸဝ်ႈ တင်းၶိူင်ႈပိူင်မၼ်းၵႃႈမီးၸိူဝ်းၼၼ်ႉဢေႃႈ၊ဝႃႈၼင်ႇၼႆဢေႃႈ။
၁၇ ထႃႇဝရႃႉၽြႃး သမ်ႉမီးဢမိင်ႉတီႈ မုဝ်းသေႇ တင်းဢႃႇရုၼ်ႇလႄႈဝႃႈ၊-
၁၈ ယႃႇပေပႄႇတႅပ်းပႅတ်ႈၵူၼ်းမဵဝ်းပီႈမဵဝ်းၼွင်ႉၸိူဝ်ႉၶိူဝ်းၵေႃႇႁတ်ႉ ၸိူဝ်းၼၼ်ႉသေၵႃႈၼႂ်း မုၵ်ႉၼႂ်းၸိူဝ်းလေႇဝိ။
၁၉ လွင်ႈၼင်ႇႁိုဝ်ၶဝ်တၵ်းၵၢင်းလွတ်ႈတင်းၽေးတၢင်းတၢႆလႄႈ ဢသၢၵ်ႈလႆႈလိပ်းၼႂ်းမိူဝ်ႈဢၼ်ၶဝ်သုတ်ႉၸပ်းသုတ်ႉၸူး ၵႃႈတီႈၶိူင်ႈပိူင်ဢၼ်မူတ်းၸၢင်ႇၼႃႇလူင်လၢင်ၸိူဝ်းၼၼ်ႉၸိုင် တၵ်းလႆႈႁဵတ်းတီႈၶဝ်ၸိူဝ်ႉၼင်ႇႁိုဝ်ဝႃႈၼႆၸမ်း ဢႃႇရုၼ်ႇဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉ တၵ်းလႆႈၶဝ်ႈဢွၼ်တၢင်းလႄႈ မႅင်ႇၽႄၶၢၼ်းဝႆႉဢမူႉဢၼ်ၶဝ်တၵ်းလႆႈပႂ်ႉလႆႈႁဵတ်းဢိၵ်ႇတင်း ၶူဝ်းဢၼ်ၶဝ်တၵ်းလႆႈႁၢပ်ႇလႆႈ ပႃးၼၼ်ႉတီႈၶဝ်ႁင်းၽႂ်ႁင်းမၼ်းဢေႃႈ။
၂၀ ၵူၺ်းၵႃႈလွင်ႈၼင်ႇႁိုဝ် ၶဝ်တၵ်းၵၢင်းလွတ်ႈတင်းတၢင်းတၢႆၸိုင်ၶဝ်ဢမ်ႇလႆႈၶဝ်ႈၵႃႈၼႂ်းလႄႈတူၺ်းထႃႇၼႃႉတီႈမူတ်းၸၢင်ႇၸဝ်ႈၼၼ်ႉၵႅပ်ႉဢွၼ်ႇၵမ်းဢွၼ်ႇၼိုင်ႈ၊ ဝႃႈၼင်ႇၼႆဢေႃႈ။
ၵူၼ်းမဵဝ်းၵေႇရသုၼ်ႇ
၂၁ ထႃႇဝရႃႉၽြႃးသမ်ႉမီးဢမိင်ႉတီႈမုဝ်းသေႇလႄႈဝႃႈ၊-
၂၂ ၼႂ်းၵူၼ်းၸိူဝ်ႉၶိူဝ်းၵေႇရသုၼ်ႇ တင်းလၢႆၼၼ်ႉၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ် မဵဝ်းပူႇမဵဝ်းပေႃႈၶဝ် ၼၼ်ႉလႄႈ
၂၃ ဢဝ်ၸရၢင်းၶဝ်ၸိူဝ်းဢၼ်ဢသၢၵ်ႈလႆႈသၢမ်သိပ်းၶိုၼ်ႈၵႂႃႇတေႃႇထိုင်ႁွတ်ႈႁႃႈသိပ်း ၵႃႈဢၼ်ၶဝ်ႈၵႃႈၼႂ်းမုၵ်ႉၼႂ်းၸိူဝ်း ႁႂ်ႈလႆႈပွင်ႁဵတ်းဢမူႉသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၼၼ်ႉ တင်းသဵင်ႈ တင်းလူင်ၼၼ်ႉတႃႉ။
၂၄ ဢမူႉဢၼ်ၵူၼ်းၸိူဝ်ႉၶိူဝ်းၵေႇရသုၼ်ႇတင်းလၢႆတၵ်းလႆႈပႂ်ႉလူပႂ်ႉတူၺ်းဢိၵ်ႇတင်း ၶူဝ်းဢၼ်ၶဝ်တၵ်းလႆႈႁၢပ်ႇလႆႈပႃးၸမ်း ပဵၼ်ၽႃႈၵင်ႈသုမ်ႉ ထဵင်ၸဝ်ႈဢိၵ်ႇတင်း
၂၅ သုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၼင်တႁႃႇသဢၼ်ႁူမ်ႇမၼ်း ၽႃႈၵင်ႈဢၼ်ၵင်ႈႁူးၽၵ်းတူသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈၽႃႈၵင်ႈႁူဝ်ႉဝၢင်းၽႃႈၵင်ႈ ဢၼ်ၵင်ႈႁူး ၽၵ်းတူႁူဝ်ႉဝၢင်းဢၼ်လဵပ်ႈႁွပ်ႈသုမ်ႉထဵင်ၸဝ်ႈ
၂၆ တင်းယိၸ်ႉပလၢင်ႇၼၼ်ႉၸိူၵ်ႈမၼ်းတင်းလၢႆ ဢိၵ်ႇတင်းၶိူင်ႈပိူင် ၵႃႈဢၼ်ဢဝ်ပွင်ဢဝ်ႁဵတ်းဢမူႉၸဝ်ႈ တင်းသဵင်ႈတင်းလူင်ၼၼ်ႉဢေႃႈ။ၼင်ႇၼၼ်လႄႈၶဝ်တၵ်းလႆႈပွင်လႆႈႁဵတ်းဢေႃႈ။
၂၇ ၼႂ်းၵႃႈဢၼ်ၵူၼ်းၸိူဝ်ႉၶိူဝ်းၵေႇရသုၼ်ႇတင်းလၢႆပႂ်ႉဢမူႉဢိၵ်ႇတင်း ၼႂ်းၵႃႈဢၼ်ၶဝ်ႁၢပ်ႇၶူဝ်းပႃးၶူဝ်းၼၼ်ႉ ၶဝ်တၵ်းလႆႈပွင်လႆႈႁဵတ်းၸွမ်း ၵႃႈၼင်ႇဢၼ်ဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉၶၢၼ်းဝႆႉၼၼ်ႉဢေႃႈ။ၼႂ်းၵႃႈဢၼ်ၶဝ်ႁၢပ်ႇၶူဝ်းပႃးၶူဝ်းၼၼ်ႉ သူတၵ်းလႆႈမႅင်ႇၽေၸီႇယၢင်ႇဝႆႉတီႈ ၶဝ်ဢေႃႈ။
၂၈ ဢၼ်ၼႆႉၸမ်းပဵၼ်ဢမူႉဢၼ်ၵူၼ်းၸိူဝ်ႉၶိူဝ်းၵေႇရသုၼ်ႇတင်းလၢႆ တၵ်းလႆႈပွင်လႆႈႁဵတ်းၵႃႈတီႈသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈ ၼၼ်ႉဢေႃႈ။ဢိသမႃႇ ဢၼ်ပဵၼ်လုၵ်ႈၸၢႆးယိတ်ႉပရေႃးႁိၵ်ႈဢႃႇရုၼ်ႇၼၼ်ႉ တၵ်းလႆႈဢုပ်ႉၵႃႈၼိူဝ်ဢမူႉဢၼ်ၶဝ်ပွင်ႁဵတ်းၼၼ်ႉဢေႃႈ။
ၵူၼ်းမဵဝ်းမေႇရႃႇရိ
၂၉ ၼႂ်းၵူၼ်းၸိူဝ်ႉၶိူဝ်းမေႇရႃႇရိ တင်းလၢႆၼၼ်ႉၵေႃႈၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ် မဵဝ်းပူႇမဵဝ်းပေႃႈၶဝ် ၼၼ်ႉလႄႈ
၃၀ ဢဝ်ၸရၢင်းၶဝ်ၸိူဝ်းဢၼ်ဢသၢၵ်ႈလႆႈသၢမ်သိပ်းၶိုၼ်ႈၵႂႃႇတေႃႇထိုင်ႁွတ်ႈႁႃႈသိပ်း ၵႃႈဢၼ်ၶဝ်ႈၵႃႈၼႂ်းမုၵ်ႉၼႂ်းၸိူဝ်း ႁႂ်ႈလႆႈပွင်ႁဵတ်းဢမူႉသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၼၼ်ႉ တင်းသဵင်ႈ တင်းလူင်ၼၼ်ႉတႃႉ။
၃၁ ဢမူႉတၢင်းဢၼ်ၶဝ်တၵ်းလႆႈႁၢပ်ႇလႆႈပႃးၸွမ်းလူၺ်ႈတၢင်းဢၼ်ၶဝ်ပႂ်ႉလူပႂ်ႉတူၺ်းၵႃႈတီႈသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈၼၼ်ႉၸမ်းပဵၼ်ပႅၼ်ႈသုမ်ႉထဵင်ၸဝ်ႈ လႂ် သေႈမၼ်း လႂ်သဝ်မၼ်း လႂ် တီႈသုပ်းတိၼ်မၼ်း လႂ် ဢိၵ်ႇတင်းသဝ်ႁူဝ်ႉဝၢင်းဢၼ်လဵပ်ႈႁွပ်ႈၼၼ်ႉ လႂ် တီႈသုပ်းတိၼ်မၼ်း လႂ်လၵ်းမၼ်း လႂ်ၸိူၵ်ႈမၼ်း လႂ် တင်းၶိူင်ႈပိူင်ၵႃႈဢၼ်ၸၢပ်ႈသႅင်ႇၵၼ်တင်းၸိူဝ်းၼၼ်ႉလႄႈ ပဵၼ်ပုၼ်ႈဢၼ်တၵ်းႁၢပ်ႇဢမူႉၸဝ်ႈ တင်းသဵင်ႈတင်းလူင်ၼၼ်ႉဢေႃႈ။
၃၂ သူတၵ်းလႆႈမၢတ်ႈမၢႆ ၸိုဝ်သဵင်ၶိူင်ႈပိူင်ဢၼ်ၶဝ်တၵ်းလႆႈလူတူၺ်းႁၢပ်ႇၵႂႃႇၸိူဝ်းၼၼ်ႉသေလႄႈ ၼပ်ႉဢၢၼ်ႇဢေႃႈ။
၃၃ ဢၼ်ၼႆႉၸမ်းပဵၼ်ဢမူႉဢၼ်ၵူၼ်းၸိူဝ်ႉၶိူဝ်းမေႇရႃႇရိတင်းလၢႆ တၵ်းလႆႈပွင်လႆႈႁဵတ်းၵႃႈတီႈသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၼၼ်ႉလႄႈ ဢိသမႃႇ လုၵ်ႈၸၢႆးယိတ်ႉပရေႃးႁိၵ်ႈဢႃႇရုၼ်ႇ ၼၼ်ႉတၵ်းလႆႈဢုပ်ႉဢေႃႈ၊ ဝႃႈၼင်ႇၼႆဢေႃႈ။
ၼပ်ႉဢၢၼ်ႇၸိူဝ်ႉၶိူဝ်းလေႇဝိ
၃၄ မုဝ်းသေႇဢိၵ်ႇတင်းဢႃႇရုၼ်ႇတင်းၵူၼ်းလူင်ပရိၵ်ႈသၢတ်ႈတင်းလၢႆ ဢွၼ်ၵၼ်ၼပ်ႉဢၢၼ်ႇဢဝ်ၸရၢင်းၵူၼ်းၸိူဝ်ႉၶိူဝ်းၵေႃႇႁတ်ႉ ဢၼ်ဢသၢၵ်ႈလႆႈသၢမ်သိပ်း ၶိုၼ်ႈၵႂႃႇတေႃႇထိုင်ႁွတ်ႈႁႃႈသိပ်း
၃၅ ၵႃႈဢၼ်ၶဝ်ႈၵႃႈၼႂ်းမုၵ်ႉၼႂ်းၸိူဝ်း ႁႂ်ႈလႆႈပွင်လႆႈႁဵတ်းဢမူႉသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၼၼ်ႉ ၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ် မဵဝ်းပူႇမဵဝ်းပေႃႈၶဝ်ၼၼ်ႉဢေႃႈ။
၃၆ ၶဝ်ၸိူဝ်းဢၼ် လႆႈၶၢမ်ႇတၢင်းဢၼ်ၼပ်ႉဢၢၼ်ႇၶဝ်ႈပႃးၼႂ်းၸရၢင်းၼၼ်ႉၸမ်း မီးသွင်ႁဵင်ၸဵတ်းပၢၵ်ႇပၢႆ ႁႃႈသိပ်းဢေႃႈ။
၃၇ ၶဝ်ၸိူဝ်းၼႆႉပဵၼ်ၵူၼ်းၸိူဝ်ႉၶိူဝ်းၵေႃႇႁတ်ႉဢၼ်လႆႈၶၢမ်ႇ တၢင်းဢၼ်ၼပ်ႉဢၢၼ်ႇ ၵႃႈဢၼ်တၵ်းလႆႈပွင်လႆႈႁဵတ်းဢမူႉသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈလႄႈ မုဝ်းသေႇဢိၵ်ႇတင်းဢႃႇရုၼ်ႇၼပ်ႉဢၢၼ်ႇၸွမ်းၵႃႈၼင်ႇဢၼ်ထႃႇဝရႃႉၽြႃး ဢဝ်မုဝ်းသေႇသင်ႇလၢတ်ႈဝႆႉၼၼ်ႉဢေႃႈ။
၃၈ ၼႂ်းၵူၼ်းၸိူဝ်ႉၶိူဝ်းၵေႇရသုၼ်ႇတင်းလၢႆၼၼ်ႉ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇ ၸွမ်းလူၺ်ႈမဵဝ်းပီႈမဵဝ်းၼွင်ႉၶဝ်မဵဝ်းပူႇမဵဝ်းပေႃႈၶဝ်လႄႈ
၃၉ ဢသၢၵ်ႈ လႆႈသၢမ်သိပ်းၶိုၼ်ႈၼိူဝ်ၵႂႃႇ တေႃႇထိုင်ႁွတ်ႈႁႃႈသိပ်းၵႃႈဢၼ်ၶဝ်ႈၵႃႈၼႂ်းမုၵ်ႉၼႂ်းၸိူဝ်း ႁႂ်ႈလႆႈပွင်လႆႈႁဵတ်းဢမူႉသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈ
၄၀ ဢၼ် ပဵၼ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၶဝ်ႈပႃးၼႂ်းၸရၢင်းၸွမ်းလူၺ်ႈ မဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်မဵဝ်းပူႇမဵဝ်းပေႃႈၶဝ်ၼၼ်ႉၸမ်း မီးသွင်ႁဵင်ႁူၵ်းပၢၵ်ႇပၢႆသၢမ် သိပ်းဢေႃႈ။
၄၁ ၶဝ်ၸိူဝ်းၼႆႉပဵၼ်ၵူၼ်းၸိူဝ်ႉၶိူဝ်းၵေႇရသုၼ်ႇဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇ တၵ်းလႆႈပွင်လႆႈႁဵတ်းဢမူႉသုမ်ႉထဵင်ၸဝ်ႈ တီႈၸူႉတီႈတုမ် ပရိၵ်ႈသၢတ်ႈလႄႈ မုဝ်းသေႇတင်းဢႃႇရုၼ်ႇၼပ်ႉဢၢၼ်ႇၸွမ်းၵႃႈၼင်ႇဢၼ် ထႃႇဝရႃႉၽြႃး သင်ႇလၢတ်ႈဝႆႉ ၼၼ်ႉဢေႃႈ။
၄၂ ၼႂ်းၵူၼ်းၸိူဝ်ႉၶိူဝ်းမေႇရႃႇရိတင်းလၢႆၼၼ်ႉၶဝ်ၸိူဝ်းဢၼ် လႆႈၶၢမ်ႇတၢင်းဢၼ်ၼပ်ႉဢၢၼ်ႇၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ် မဵဝ်းပူႇမဵဝ်းပေႃႈၶဝ်လႄႈ
၄၃ ဢသၢၵ်ႈလႆႈသၢမ်သိပ်းၶိုၼ်ႈၼိူဝ်ၵႂႃႇတေႃႇထိုင်ႁွတ်ႈႁႃႈသိပ်း ၵႃႈဢၼ်ၶဝ်ႈၵႃႈၼႂ်းမုၵ်ႉၼႂ်းၸိူဝ်းႁႂ်ႈလႆႈပွင်ႁဵတ်းဢမူႉသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈ သၢတ်ႈ ဢၼ်ပဵၼ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၶဝ်ႈပႃးၼႂ်းၸရၢင်း ၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်ၼၼ်ႉၸမ်းမီးသၢမ်ႁဵင်ပၢႆသွင်ပၢၵ်ႇဢေႃႈ။
၄၄ ၶဝ်ၸိူဝ်းၼႆႉ ပဵၼ်ၵူၼ်းၸိူဝ်ႉၶိူဝ်းမေႇရႃႇရိဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇၸွမ်းလူၺ်ႈ မဵဝ်းပီႈမဵဝ်းၼွင်ႉ ၶဝ်
၄၅ ဢၼ်မုဝ်းသေႇတင်းဢႃႇရုၼ်ႇၼပ်ႉဢၢၼ်ႇၸွမ်းၵႃႈၼင်ႇဢၼ် ထႃႇဝရႃႉၽြႃး ဢဝ် မုဝ်းသေႇ သင်ႇလၢတ်ႈဝႆႉၼၼ်ႉဢေႃႈ။
၄၆ ၼင်ႇၼၼ်လႄႈ ၼႂ်းၵူၼ်းမဵဝ်းလေႇဝိတင်းလၢႆၼၼ်ႉၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇ ဢၼ်မုဝ်းသေႇတင်းဢႃႇရုၼ်ႇ ၼပ်ႉဢၢၼ်ႇၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်မဵဝ်းပူႇမဵဝ်းပေႃႈၶဝ်
၄၇ ဢၼ်ဢ သၢၵ်ႈလႆႈသၢမ်သိပ်းၶိုၼ်ႈၼိူဝ်ၵႂႃႇ တေႃႇထိုင်ႁွတ်ႈႁႃႈသိပ်း ၵႃႈဢၼ်ၶဝ်ႁႂ်ႈလႆႈပွင်လႆႈႁဵတ်းလႆႈႁၢပ်ႇလႆႈပႃး ဢမူႉၸဝ်ႈ
၄၈ တီႈၸူႉတီႈတုမ်ပရိၵ်ႈသၢတ်ႈဢၼ်ပဵၼ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၶဝ်ႈပႃးၼႂ်းၸရၢင်းၼၼ်ႉၸမ်းမီးပႅတ်ႇႁဵင်ႁႃႈပၢၵ်ႇပၢႆပႅတ်ႇသိပ်းဢေႃႈ။
၄၉ မႅၼ်ႈၸွမ်းၼင်ႇဢ မိင်ႉထႃႇဝရႃႉၽြႃး ၼၼ်ႉၶဝ်လႆႈၶၢမ်ႇတၢင်းဢၼ် မုဝ်းသေႇ ထွၵ်ႈလူၺ်ႈဢမူႉဢၼ်ၵူၼ်းတၵ်းလႆႈပွင်လႆႈႁဵတ်းႁင်းၽႂ်ႁင်းမၼ်း ၶူဝ်းႁၢပ်ႇဢၼ်တၵ်းလႆႈႁၢပ်ႇႁင်းၽႂ်ႁင်းမၼ်းသေလႄႈ ၼပ်ႉဢၢၼ်ႇၼၼ်ႉဢေႃႈ။ၼင်ႇၼၼ်လႄႈၶဝ်လႆႈၶၢမ်ႇတၢင်းဢၼ်မုဝ်းသေႇ ၼပ်ႉဢၢၼ်ႇၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမၼ်းၼၼ်ႉဢေႃႈ။