၉
သမူၺ်ႇလပၼ်ၽိၵ်ႉသိၵ်ႈတီႈသေႃးလု
၁ မိူဝ်ႈၼၼ်ႉမီးၵူၼ်းမဵဝ်းပိၼ်ႇယႃႇမိၼ်ႇဢၼ်လႆႈၸိုဝ်ႈၵိသ၊ဢၼ်ပဵၼ်လုၵ်ႈၸၢႆးဢပျေႇလ၊ဢၼ်ပဵၼ်လုၵ်ႈၸၢႆးၸေႇရေႃႇ၊ဢၼ်ပဵၼ်လုၵ်ႈၸၢႆးပေႇၶေႃႇရတ်ႉ၊ဢၼ်ပဵၼ်လုၵ်ႈၸၢႆးဢႃႇၽိၵူၼ်းမဵဝ်းပိၼ်ႇယႃႇမိၼ်ႇၼၼ်ႉၵေႃႉၼိုင်ႈဢေႃႈ။မၼ်းၼၼ်ႉပဵၼ်ၵေႃႉဢၼ်မၢၵ်ႈမီးၶူဝ်းလဵင်းၼမ်ၼႃႇလူင်လၢင်ဢေႃႈ။
၂ မၼ်းၼၼ်ႉမီးလုၵ်ႈၸၢႆးဢၼ်လႆႈၸိုဝ်သေႃးလုဢၼ်ပဵၼ်ၵေႃႉဢၼ်မီးၼႃႈတႃတူဝ်ၶိင်းႁၢင်ႊလီၼႃႇသေပိူၼ်ႈၼႂ်းၵူၼ်းမဵဝ်းဢိသရေႇလတင်းလၢႆၼၼ်ႉဢေႃႈ။မီးသုင်သေပိူၼ်ႈတႃႇၵွၵ်းႁူဝ်လုၵ်ႉၼိုင်ႈဢေႃႈ။
၃ မိူဝ်ႈၼၼ်ႉၽုင်မႃႉလီႈၵိသ၊ဢၼ်ပဵၼ်ပေႃႇသေႃးလုၼၼ်ႉႁၢႆၵႂႃႇဢေႃႈ။ၵိသလၢတ်ႈတီႈလုၵ်ႈၸၢႆးမၼ်းသေႃးလုလႄႈဝႃႈ၊-မႂ်းႁွင်ႉဢဝ်ၵူၼ်းဢွၼ်ႇၵေႃႉၼိုင်ႈသေလႄႈၵႂႃႇႁႃမႃႉလီႈၸိူဝ်းၼၼ်ႉတႃႉ၊ဝႃႈၼင်ႇၼႆလႄႈ
၄ မၼ်းၵေႃႈၵႂႃႇလႄႇႁႃၵႃႈၼိူဝ်ႁၢၼ်ႉလွႆဢေႇၽရိမ်ႇဢိၵ်ႇတင်းၵႃႈတီႈမိူင်းသလိသၵူႈတီႈၵူႈလႅၼ်ၵေႃႈဢမ်ႇထူပ်းဢမ်ႇႁၼ်။ၶဝ်သမ်ႉလႄႇႁႃၵႃႈတီႈမိူင်းသႃႇလိမ်ႇၵေႃႈဢမ်ႇထူပ်းဢမ်ႇႁၼ်။လၢႆးသမ်ႉမၼ်းလႄႇႁႃၵႃႈတီႈမိူင်းပိၼ်ႇယႃႇမိၼ်ႇၵူႈတီႈၵူႈလႅၼ်သေၵေႃႈဢမ်ႇထူပ်းဢမ်ႇႁၼ်။
၅ မိူဝ်ႈဢၼ်ၶဝ်ႁွတ်ႈထိုင်ၵႃႈတီႈမိူင်းၸုၽၼၼ်ႉၸိုင်သေႃးလုလၢတ်ႈတီႈၵူၼ်းဢွၼ်ႇမၼ်းလႄႈဝႃႈ၊-ၶိုၼ်းမိူဝ်းတႃႉႁဝ်း။ပေႃးဢမ်ႇၼၼ်ပေႃႈႁဝ်းတၵ်းဢမ်ႇမႆႈၸႂ်ၵွပ်ႈပိူဝ်ႈမႃႉလီႈၸိူဝ်းၼၼ်ႉလႄႈတၵ်းမႆႈၸႂ်ၵွပ်ႈပိူဝ်ႈႁဝ်းဢေႃႈ၊ဝႃႈၼင်ႇၼႆဢေႃႈ။
၆ ၵူၼ်းဢွၼ်ႇမၼ်းလၢတ်ႈလႄႈဝႃႈ၊-တူၺ်းၶႃႈလူး။ၵႃႈတီႈဝဵင်းၼႆႉမီးၵူၼ်းၽြႃးပဵၼ်ၸဝ်ႈဢၼ်မီးသရေႇၼႃႈတႃႁူင်ႁၢင်းၵေႃႉၼိုင်ႈဢေႃႈ။ၵႂၢမ်းၵႃႈဢၼ်မၼ်းလၢတ်ႈၼၼ်ႉၸၢင်ႊတဵမ်ထူၼ်ႈဢမၢၼ်ႇၶၼ်ပဵၼ်ဢေႃႈ။ၵႂႃႇၵႃႈတီႈမၼ်းတႃႉႁဝ်း။မၼ်းၸၢင်ႊၶေးတၵ်းၼႄပၼ်သဵၼ်ႈတၢင်းဢၼ်ႁဝ်းတၵ်းလႆႈၵႂႃႇၼၼ်ႉဢေႃႈ၊ဝႃႈၼင်ႇၼႆဢေႃႈ။
၇ သေႃးလုၵေႃႈထၢမ်တီႈၵူၼ်းဢွၼ်ႇမၼ်းလႄႈဝႃႈ၊-ပေႃးႁဝ်းၵႂႃႇၸိုင်တၵ်းလႆႈဢဝ်ၵႃႈသင်လူႇတၢၼ်းပၼ်မၼ်း။ၶဝ်ႈမုၼ်းဢၼ်ပႃးမႃးၵႃႈတီႈႁဝ်းၼၼ်ႉသဵင်ႈၵႂႃႇယဝ်ႉ။တၢင်းလူႇတၢင်းတၢၼ်းဢၼ်တၵ်းလႆႈလူႇတၢၼ်းတီႈၵူၼ်းၽြႃးပဵၼ်ၸဝ်ႈၼၼ်ႉဢမ်ႇမီးသေၸိူဝ်ႉသေပိူင်ယဝ်ႉ။
၈ တီႈႁဝ်းယင်းမီးၵႃႈသင်၊မိူဝ်ႈဢၼ်ဝႃႈၼင်ႇၼႆၸိုင်၊ၵူၼ်းဢွၼ်ႇၼၼ်ႉၵေႃႈၶိုၼ်းလၢတ်ႈတီႈသေႃးလုလႄႈဝႃႈ၊-တူၺ်းၶႃႈလူး။ၼႂ်းမိုဝ်းၵဝ်ၶႃႈၼႆႉယင်းမီးငိုၼ်းမၢတ်ႈၼိုင်ႈၶႃႈဢေႃႈ။တၵ်းဢဝ်ဢၼ်ၼၼ်ႉပၼ်တီႈၵူၼ်းၽြႃးပဵၼ်ၸဝ်ႈပုၼ်ႈဢၼ်မၼ်းၼႄပၼ်သဵၼ်ႈတၢင်းတီႈႁဝ်းၶႃႈၼၼ်ႉဢေႃႈ၊ဝႃႈၼင်ႇၼႆဢေႃႈ။
၉ မိူဝ်ႈၵွၼ်ႇဢွၼ်ၼၼ်ႉပေႃးၵူၼ်းမဵဝ်းဢိသရေႇလၶဝ်တၵ်းၵႂႃႇၵႃႈတီႈၵူၼ်းၽြႃးပဵၼ်ၸဝ်ႈလႄႈထၢမ်သေၸိူဝ်ႉသပေိူင်းၸိုင်ၶဝ်ယၢမ်ႈဝႃႈ၊-ၵႂႃႇထၢမ်ၵႃႈတီႈၵူၼ်းဢၼ်ႁၼ်ၼၼ်ႉတႃႉႁဝ်း၊ဝႃႈၼင်ႇၼႆဢေႃႈ။မိူဝ်ႈၵွၼ်ႇဢွၼ်ၼၼ်ႉၵေႃႉဢၼ်လႆႈၶၢမ်ႇတၢင်းဢၼ်ႁွင်ႉႁိၵ်ႈပရေႃးၽႅတ်ႈၼၼ်ႉတေႃႈလဵဝ်ၼႆႉလႆႈၶၢမ်ႇတၢင်းဢၼ်ႁွင်ႉႁိၵ်ႈၵူၼ်းဢၼ်ႁၼ်ဢေႃႈ။
၁၀ သေႃးလုၵေႃႈလၢတ်ႈတီႈၵူၼ်းဢွၼ်ႇမၼ်းလႄႈဝႃႈ၊-လီႈယဝ်ႉ၊ၵႂႃႇတႃႉႁဝ်း၊ဝႃႈၼင်ႇၼႆသေလႄႈဢွၼ်ၵၼ်ၵႂႃႇၸူးၵႃႈတီႈဝဵင်းတီႈဢၼ်ၵူၼ်းၽြႃးပဵၼ်ၸဝ်ႈမီးၼၼ်ႉဢေႃႈ။
၁၁ ၼႂ်းမိူဝ်ႈဢၼ်သွင်ၶႃယင်းတိုၵ်ႉၶိုၼ်ႈၵႂႃႇၵႃႈၼိူဝ်ၵုင်းလွႆၼွၵ်ႈဝဵင်းယူႇၼၼ်ႉၸိုင်ၶဝ်ထူပ်းႁၼ်မေႈယိင်းသၢဝ်တင်းလၢႆဢွၵ်ႇမႃးႁႂ်ႈလႆႈတဵၵ်းၼမ်ႉလႄႈၶဝ်ထၢမ်တီႈမေႈယိင်းၸိူဝ်းၼၼ်ႉလႄႈဝႃႈ၊-ၵႃႈတီႈၼႆႉၸွင်ႇမီးၵူၼ်းဢၼ်ႁၼ်ႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၵေႃႈဢွၼ်ၵၼ်ၶိုၼ်းလၢတ်ႈလႄႈဝႃႈ၊-မီးၶႃႈဢေႃႈ။
၁၂ မၼ်းႁွတ်ႈမႃးမီးယူႇဢွၼ်တၢင်းသူၸဝ်ႈၶႃႈဢေႃႈ။ၵႂႃႇၶၼ်ၶၼ်ၽႂ်းၽႂ်းတႃႉ။မၼ်းႁွတ်ႈမႃးၵႃႈတီႈဝဵင်းၼႆႉဝၼ်းမိူဝ်ႈၼႆႉၵူၺ်းယဝ်ႉ။ၵူၼ်းတင်းလၢႆႁဵတ်းပွႆးယိၸ်ႉၵႃႈတီႈဢၼ်သုင်ၼၼ်ႉဝၼ်းမိူဝ်ႈၼႆႉၶႃႈယဝ်ႉ။
၁၃ ပေႃးသူၸဝ်ႈၶဝ်ႈၵႃႈၼႂ်းဝဵင်းၸိုင်သူၸဝ်ႈတၵ်းထူပ်းႁၼ်မၼ်းၸူဝ်ႈဢၼ်မၼ်းဢမ်ႇပႆႇၶိုၼ်ႈၵႃႈၼိူဝ်ထႃႇၼႃႉတီႈသုင်ႁႂ်ႈလႆႈၵိၼ်ယိၸ်ႉၼၼ်ႉဢေႃႈ။ၸူဝ်ႈဢၼ်မၼ်းဢမ်ႇပႆႇႁွတ်ႈထိုင်ၼၼ်ႉၸိုင်ၵူၼ်းတင်းလၢႆတၵ်းဢမ်ႇၵိၼ်ၵွပ်ႈပိူဝ်ႈလူဝ်ႇတၢင်းဢၼ်မၼ်းၸဝ်ႈပၼ်တၢင်းလီတူဝ်ယိၸ်ႉၼၼ်ႉဢွၼ်တၢင်းၶႃႈဢေႃႈ။
၁၄ လိုၼ်းၼၼ်ႉၸင်ႇၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ႁွင်ႉပၢင်းၼၼ်ႉတၵ်းၵိၼ်ဢေႃႈ။ပိူဝ်ႈၼႆလႄႈတေႃႈလဵဝ်ၼႆႉသူၸဝ်ႈၶဝ်ႈၵႂႃႇတႃႉ။တၵ်းထူပ်းႁၼ်မၼ်းၸဝ်ႈၵမ်းလဵဝ်ဢေႃႈ၊ဝႃႈၼင်ႇၼႆသေယဝ်ႉ၊သွင်ၶႃၼၼ်ႉၵေႃႈၶိုၼ်ႈၸူးၵႃႈတီႈဝဵင်းလႄႈၶဝ်ႈၵႃႈၼႂ်းဝဵင်းၼၼ်ႉဢေႃႈ။
၁၅ သမူၺ်ႇလၼၼ်ႉဢွၵ်ႇမႃးႁပ်ႉဢဝ်သွင်ၶႃႁႂ်ႈလႆႈၶိုၼ်ႈၵႃႈၼိူဝ်ထႃႇၼႃႉတီႈသုင်ၼၼ်ႉဢေႃႈ။ဝၼ်းမိူဝ်ႈဝႃးၼၼ်ႉၸူဝ်ႈဢၼ်သေႃးလုဢမ်ႇပႆႇႁွတ်ႈထိုင်ၼၼ်ႉၸိုင်ထႃႇဝရႃႉၽြႃးမီးဢမိင်ႉထိုင်ႁူသမူၺ်ႇလဝႆႉလႄႈဝႃႈ၊-ဝၼ်းမိူဝ်ႈၽုၵ်ႈၶိင်ႇၼႆႉၵဝ်တၵ်းပွႆႇၸႂ်ႉၵူၼ်းၵေႃႉၼိုင်ႈလုၵ်ႉသေၵႃႈတီႈမိူင်းပိၼ်ႇယႃႇမိၼ်ႇမႃးၸူးၵႃႈတီႈမႂ်းဢေႃႈ။
၁၆ မႂ်းတၵ်းလႆႈပၼ်ၽိၵ်ႉသိၵ်ႈတီႈမၼ်းလႄႈၶၢၼ်းမၼ်းဝႆႉၼႂ်းဢရႃႇၽူႈဢွၼ်ႁဝ်ၵူၼ်းၵဝ်မဵဝ်းဢိသရေႇလၶဝ်ဢေႃႈ။မၼ်းတၵ်းၵႄႇသႄႇၼုၵ်ႈဢဝ်ၵူၼ်းၵဝ်တင်းလၢႆလွတ်ႈဢွၵ်ႇသေၵႃႈၼႂ်းမိုဝ်းၵူၼ်းၽိလိတ်ႉတိၸိူဝ်းၼၼ်ႉဢေႃႈ။လွင်ႈမၼ်းၸမ်းၵွပ်ႈပိူဝ်ႈၵဝ်ငိၼ်းသဵင်ဢၼ်ၶဝ်ႁွင်ႉသႅၼ်ႇၼၼ်ႉယဝ်ႉလႄႈၵဝ်လႆႈလူတူၺ်းၵူၼ်းၵဝ်တင်းလၢႆယဝ်ႉ၊ဝႃႈၼင်ႇၼႆဢေႃႈ။
၁၇ မိူဝ်ႈဢၼ်သမူၺ်ႇလႁၼ်သေႃးလုၼၼ်ႉၸိုင်ထႃႇဝရႃႉၽြႃးမီးဢမိင်ႉတီႈမၼ်းလႄႈဝႃႈ၊-ၵေႃႉၼႆႉပဵၼ်ၵေႃႉဢၼ်ၵဝ်လၢတ်ႈဝႆႉတီႈမႂ်းၼၼ်ႉယဝ်ႉ။
၁၈ မၼ်းတၵ်းပဵၼ်ၵေႃႉဢၼ်ဢုပ်ႉၼိူဝ်ၵူၼ်းၵဝ်တင်းလၢႆဢေႃႈ၊ဝႃႈၼင်ႇၼႆဢေႃႈ။မိူဝ်ႈၼၼ်ႉသေႃးလုသုတ်ႉၸပ်းသုတ်ႉၸူးၵႃႈတီႈသမူၺ်ႇလၵႃႈၼႂ်းႁူးၽၵ်းတူၼၼ်ႉသေလႄႈတွင်ႈထၢမ်လႄႈဝႃႈ၊-ၶႅၼ်းတေႃႈၼႄပၼ်ႁိူၼ်းၵေႃႉဢၼ်ႁၼ်ၼၼ်ႉသေၵမ်း၊မိူဝ်ႈဢၼ်ဝႃႈၼင်ႇၼႆၸိုင်၊သမူၺ်ႇလၶိုၼ်းလၢတ်ႈတီႈသေႃးလုလႄႈဝႃႈ၊-ၵဝ်ပဵၼ်ၵေႃႉဢၼ်ႁၼ်ၼၼ်ႉဢေႃႈ။
၁၉ ၶိုၼ်ႈၵႂႃႇထႃႈၵဝ်ၵႃႈၼိူဝ်ထႃႇၼႃႉတီႈသုင်ၼၼ်ႉဢွၼ်တၢင်းၵဝ်တႃႉ။ဝၼ်းမိူဝ်ႈၼႆႉမႂ်းတၵ်းလႆႈၵိၼ်လူၺ်ႈၵၼ်တင်းၵဝ်ဢေႃႈ။မိူဝ်ႈၽုၵ်ႈၵၢင်ၼႂ်ၵဝ်ၸင်ႇတၵ်းၽုၺ်ႇဢွၵ်ႇၼႄပျႃးၵႃႈဢၼ်မီးၵႃႈၼႂ်းႁူဝ်ၸႂ်မၼ်းၼၼ်ႉဢေႃႈ။
၂၀ မႃႉလီႈမႂ်းဢၼ်ႁၢႆၵႂႃႇဝၼ်းမိူဝ်ႈသိုၼ်းၼၼ်ႉၵေႃႈယႃႇပေမႆႈၸႂ်လႅင်ၸႂ်။ထူပ်းႁၼ်ယဝ်ႉ။လွင်ႈတၢင်းဢၼ်ၶႂ်ႈလႆႈၵႃႈၼႂ်းမဵဝ်းဢိသရေႇလၵႃႈမီးၼၼ်ႉပဵၼ်ပုၼ်ႈၽူႈလႂ်။ပဵၼ်ပုၼ်ႈမႂ်းဢိၵ်ႇတင်းပီႈၼွင်ႉၸိူဝ်ႉၶိူဝ်းပေႃႈမႂ်းၵႃႈမီးၼၼ်ႉဢမ်ႇၸႂ်ႈႁိုဝ်၊ဝႃႈၼင်ႇၼႆဢေႃႈ။
၂၁ သေႃးလုၵေႃႈၶိုၼ်းလၢတ်ႈလႄႈဝႃႈ၊-ၵဝ်ၶႃႈၼႆႉပဵၼ်မဵဝ်းပိၼ်ႇယႃႇမိၼ်ႇ၊မဵဝ်းဢၼ်လဵၵ်ႉဢၼ်ၼွႆႉသေပိူၼ်ႈၵႃႈၼႂ်းမဵဝ်းဢိသရေႇလတင်းလၢႆဢမ်ႇၸႂ်ႈၶႃႈႁိုဝ်။ပီႈၼွင်ႉၸိူဝ်ႉၶိူဝ်းၶႃႈၼႆႉပဵၼ်ဢၼ်လဵၵ်ႉဢၼ်ၼွႆႉသေပိူၼ်ႈၵႃႈၼႂ်းပီႈၼွင်ႉၸိူဝ်ႉၶိူဝ်းဢၼ်ပဵၼ်ၵႃႈၼႂ်းမဵဝ်းပိၼ်ႇယႃႇမိၼ်ႇၼၼ်ႉဢမ်ႇၸႂ်ႈၶႃႈႁိုဝ်။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းလၢတ်ႈတီႈၵဝ်ၶႃႈၸိူဝ်ႉၼင်ႇၼႆၶႃႈ၊ဝႃႈၼင်ႇၼႆဢေႃႈ။
၂၂ မိူဝ်ႈၼၼ်ႉသမူၺ်ႇလႁွင်ႉဢဝ်သေႃးလုဢိၵ်ႇတင်းၵူၼ်းဢွၼ်မၼ်းသႂၢင်းၶဝ်ႈၵႃႈၼႂ်းလုၵ်းၶႅၵ်ႇသေယဝ်ႉႁႂ်ႈသွင်ၶႃၼင်ႈၵႃႈတီႈဢၼ်မျၢတ်ႈၼႃႇသေပိူၼ်ႈၵႃႈၼႂ်းၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ႁွင်ႉပၢင်းမႃးသၢမ်သိပ်းၵေႃႉၼၼ်ႉဢေႃႈ။
၂၃ မိူဝ်ႈၼၼ်ႉသမူၺ်ႇလႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ပွႆးၼၼ်ႉလႄႈဝႃႈ၊-ဢဝ်ၼိူဝ်ႉပုၼ်ႊဢၼ်ၵဝ်ဢၢပ်ႈပၼ်ဝႆႉတီႈမႂ်းႁႂ်ႈမႂ်းဢဝ်ဝႆႉၶေႃၶေႃႁင်းၵူၺ်းမၼ်းၼၼ်ႉမႃးၵႃႈတီႈၵဝ်တႃႉ၊ဝႃႈၼင်ႇၼႆလႄႈ
၂၄ ၵူၼ်းဢၼ်ပဵၼ်ၵႄႇပဵၼ်ႁူဝ်ပွႆးၼၼ်ႉၵေႃႈဢဝ်ၼိူဝ်ႉႁူဝ်ၶႃတင်းဢၼ်ၸပ်းၵႃႈၼိူဝ်မၼ်းၼၼ်ႉမႃးသေလႄႈတမ်းပၼ်ၵႃႈတီႈၽၢႆႇၼႃႈသေႃးလုဢေႃႈ။သမူၺ်ႇလၵေႃႈလၢတ်ႈလႄႈဝႃႈ၊-ဢၼ်ၼႆႉပဵၼ်ၼိူဝ်ႉဢၼ်ၵဝ်ဢဝ်ဝႆႉပုၼ်ႈမႂ်းပုၼ်ႈပွႆးၼႆႉဢေႃႈ။ၵိၼ်တႃႉ။ၵဝ်လႆႈလၢတ်ႈဝႆႉဝႃႈၵဝ်လႆႈၽိတ်ႉပၢင်းၶႅၵ်ႇဝႆႉယဝ်ႉ၊ဝႃႈၼင်ႇၼႆလႄႈသေႃးလုၵေႃႈၵိၼ်လူၺ်ႈၵၼ်တင်းသမူၺ်ႇလဢေႃႈ။
၂၅ သွင်ၶႃဢွၼ်ၵၼ်လူင်းသေၵႃႈၼိူဝ်ထႃႇၼႃႉတီႈသုင်ၼၼ်ႉလႄႈၶဝ်ႈၵႃႈၼႂ်းဝဵင်းသေယဝ်ႉသမူၺ်ႇလတင်းသေႃးလုၼၼ်ႉလၢတ်ႈၵၼ်ၸႃၵၼ်ယူႇၵႃႈၼိူဝ်မုင်းႁိူၼ်းဢေႃႈ။
၂၆ သွင်ၶႃၼၼ်ႉလုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈမိူဝ်ႈဢၼ်မိူင်းလႅင်းၼၼ်ႉသမူၺ်ႇလႁွင်ႉသေႃးလုၵႃႈၼိူဝ်မုင်းႁိူၼ်းသေလႄႈလၢတ်ႈဝႃႈ၊-လုၵ်ႉတႃႉ။ၵဝ်တၵ်းသူင်ႇမႂ်းၵႂႃႇဢေႃႈ၊ဝႃႈၼင်ႇၼႆလႄႈသေႃးလုၵေႃႈလုၵ်ႉလႄႈၸွမ်းသမူၺ်ႇလဢွၵ်ႇၵႂႃႇၵႃႈၼွၵ်ႈဢေႃႈ။
၂၇ ၼႂ်းမိူဝ်ႈဢၼ်ၶဝ်ယင်းတိုၵ်ႉလူင်းၵႂႃႇၵႃႈတီႈႁိမ်းတီႈသုတ်းဝဵင်းယူႇၼၼ်ႉၸိုင်သမူၺ်ႇလလၢတ်ႈတီႈသေႃးလုလႄႈဝႃႈ၊-လၢတ်ႈႁႂ်ႈၵူၼ်းဢွၼ်ႇမႂ်းၵႂႃႇဢွၼ်တၢင်းတႃႉ၊ဝႃႈၼင်ႇၼႆလႄႈၵူၼ်းဢွၼ်ႇၼၼ်ႉၵေႃႈၵႂႃႇဢွၼ်တၢင်းသေယဝ်ႉမၼ်းသမ်ႉလၢတ်ႈလႄႈဝႃႈ၊-ၸုၵ်းၵိုတ်းယူႇၵမ်းဢွၼ်ႇၼိုင်ႈတႃႉ။ႁႂ်ႈၵဝ်လႆႈမွၵ်ႇလၢတ်ႈဢမိင်ႉၽြႃးပဵၼ်ၸဝ်ႈတီႈမႂ်းတႃႉ၊ဝႃႈၼင်ႇၼႆဢေႃႈ။