Chapter
၃
ၽြႃးပဵၼ်ၸဝ်ႈႁွင်ႉဢဝ်သမူၺ်ႇလ
၁ သမူၺ်ႇလဢၼ်ပဵၼ်လုၵ်ႈဢွၼ်ႇၼၼ်ႉပွင်ႁဵတ်းဢမူႉထႃႇဝရႃႉၽြႃးယူႇၵႃႈတီႈၽၢႆႇၼႃႈဢေးလိဢေႃႈ။မိူဝ်ႈၶိင်ႇၵႃႇလႃႉၼၼ်ႉၼုၵ်ႉၵပၢတ်ႈထႃႇဝရႃႉၽြႃးဢေႇမၢင်ဢေႃႈ။ရူႇပႃႇရူင်ႇဢၼ်ထၢင်ႇထၢင်ႇသႃးသႃးၵေႃႈဢမ်ႇပေႃးမီးၼမ်။
၂ ဢေးလိၼၼ်ႉမၢၵ်ႇတႃမၼ်းမူဝ်းၼႃႇထၼ်ႈပေႃးဢမ်ႇႁၼ်လႆႈလီလီယဝ်ႉ။မီးၶမ်ႈၼိုင်ႈမၼ်းၼွၼ်းယူႇၵႃႈတီႈယူႇမၼ်းဢေႃႈ။
၃ ၵွၵ်းၽႆးတဵၼ်းၽြႃးပဵၼ်ၸဝ်ႈၵေႃႈယင်းဢမ်ႇပႆႇမွတ်ႇလႄႈသမူၺ်ႇလၵေႃႈၼွၼ်းယူႇၵႃႈၼႂ်းႁိူၼ်းထႃႇဝရႃႉၽြႃးတီႈဢၼ်ဝႆႉတိူၵ်ႈပတိၺိၼ်ႇၽြႃးပဵၼ်ၸဝ်ႈၼၼ်ႉဢေႃႈ။
၄ မိူဝ်ႈၶိင်ႇၼၼ်ႉထႃႇဝရႃႉၽြႃးႁွင်ႉသမူၺ်ႇလလႄႈမၼ်းၵေႃႈဢိူဝ်ႈလႄႈဝႃႈ၊-ၵဝ်ၶႃႈမီးယူႇၶႃႈဢေႃႈ၊ဝႃႈၼင်ႇၼႆသေယဝ်ႉ၊မၼ်းလႅၼ်ႈၵႂႃႇၸူးၵႃႈတီႈဢေးလိလႄႈထၢမ်ဝႃႈ၊-ၸဝ်ႈႁဝ်းႁွင်ႉၵဝ်ၶႃႈလႄႈၵဝ်ၶႃႈမႃးၶႃႈယဝ်ႉ၊ဝႃႈၼင်ႇၼႆဢေႃႈ။
၅ ဢေးလိလၢတ်ႈဝႃႈ၊ၵဝ်ဢမ်ႇႁွင်ႉမႂ်း။သမ်ႉၶိုၼ်းၵႂႃႇၼွၼ်းတႃႉ၊ဝႃႈၼင်ႇၼႆလႄႈမၼ်းၵေႃႈသမ်ႉၶိုၼ်းၵႂႃႇၼွၼ်းဢေႃႈ။ထႃႇဝရႃႉၽြႃးသမ်ႉႁွင်ႉလႄႈဝႃႈ၊-သမူၺ်ႇလဢိူၺ်း၊ဝႃႈၼင်ႇၼႆဢေႃႈ။
၆ သမူၺ်ႇလၵေႃႈလုၵ်ႉသေလႄႈၵႂႃႇၸူးၵႃႈတီႈဢေးလိလႄႈလၢတ်ႈဝႃႈ၊-ၸဝ်ႈႁဝ်းႁွင်ႉၵဝ်ၶႃႈလႄႈၵဝ်ၶႃႈမႃးၶႃႈယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်ဢေးလိၼၼ်ႉလၢတ်ႈဝႃႈ၊-ၵဝ်ဢမ်ႇႁွင်ႉမႂ်း။လုၵ်ႈၸၢႆးၵဝ်ဢိူၺ်း။သမ်ႉၶိုၼ်းၵႂႃႇၼွၼ်းတႃႉ၊ဝႃႈၼင်ႇၼႆဢေႃႈ။
၇ သမူၺ်ႇလဢမ်ႇပႆႇႁူႉထႃႇဝရႃႉၽြႃး။ဢမ်ႇပႆႇလႆႈၶၢမ်ႇဢဝ်ပျႃႇတိၵ်ႈၸဝ်ႈ။
၈ ပွၵ်ႈတတိယထႃႇဝရႃႉၽြႃးသမ်ႉႁွင်ႉသမူၺ်ႇလလႄႈမၼ်းၵေႃႈလုၵ်ႉသေလႄႈၵႂႃႇၵႃႈတီႈဢေးလိထႅင်ႈလႄႈဝႃႈ၊-ၸဝ်ႈႁဝ်းႁွင်ႉၵဝ်ၶႃႈလႄႈၵဝ်ၶႃႈမႃးၶႃႈယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်ဢေးလိႁူႉသၢႆငၢႆလွင်ႈဢၼ်ဝႃႈပဵၼ်ထႃႇဝရႃႉၽြႃးႁွင်ႉလုၵ်ႈဢွၼ်ႇၼၼ်ႉသေယဝ်ႉ၊မၼ်းသင်ႇလၢတ်ႈတီႈသမူၺ်ႇလလႄႈဝႃႈ၊-မႂ်းၵႂႃႇလႄႈၼွၼ်းလူးၵွၼ်ႇတႃႉ။
၉ ပေႃးမၼ်းၸဝ်ႈႁွင်ႉထႅင်ႈၸိုင်မႂ်းတၵ်းလႆႈလဝ်ႈလၢတ်ႈဝႃႈ၊-ထႃႇဝရႃႉၽြႃးတီႈၶႃႈ။မီးဢမိင်ႉသေၵမ်းၶႃႈ။ၶႃႈၸဝ်ႈငိၼ်းယူႇတီႈၶႃႈဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆသေယဝ်ႉသမူၺ်ႇလၵေႃႈၵႂႃႇလႄႈၼွၼ်းၵႃႈတီႈတီႈယူႇမၼ်းၼၼ်ႉဢေႃႈ။
၁၀ ထႃႇဝရႃႉၽြႃးၵေႃႈမႃးၸုၵ်းယူႇမိူၼ်ၸိူဝ်ႉၼင်ႇၵမ်းဢွၼ်တၢင်းၼၼ်ႉသေလႄႈႁွင်ႉဝႃႈ၊-သမူၺ်ႇလဢိူၺ်း။သမူၺ်ႇလဢိူၺ်း။ဝႃႈၼင်ႇၼႆလႄႈသမူၺ်ႇလၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်းမီးဢမိင်ႉသေၵမ်းတီႈၶႃႈ။
၁၁ ၶႃႈၸဝ်ႈထွမ်ႇယူႇတီႈၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်ထႃႇဝရႃႉၽြႃးၵေႃႈမီးဢမိင်ႉတီႈသမူၺ်ႇလလႄႈဝႃႈ၊-တူၺ်းလူး။ၵဝ်တၵ်းႁဵတ်းမဵဝ်းၼိုင်ႈတီႈၵူၼ်းမဵဝ်းဢိသရေႇလၶဝ်ႁႂ်ႈႁူၶဝ်ၸိူဝ်းဢၼ်လႆႈထွမ်ႇလႆႈငိၼ်းလွင်ႈၼၼ်ႉၵူႈၵေႃႉၵူႈၵူၼ်းလႆႈၶူမ်းလႆႈၵၢႆးတင်းသွင်ၽၢႆႇဢေႃႈ။
၁၂ ၼႂ်းမိူဝ်ႈဝၼ်းၼၼ်ႉၵဝ်တၵ်းႁဵတ်းတီႈဢေးလိၵႃႈဢၼ်ၵဝ်ဝႃႈဝႆႉလူၺ်ႈလွင်ႈၵူၼ်းႁိူၼ်းမၼ်းၼၼ်ႉဢဝ်ၸႃႉၸဵမ်ငဝ်ႈတေႃႇထိုင်ႁွတ်ႈတီႈသုတ်းတီႈၵွႆမၼ်းဢေႃႈ။
၁၃ ၵဝ်လၢတ်ႈဝႆႉတီႈမၼ်းလွင်ႈဢၼ်ၵဝ်တၵ်းၸီႇယၢင်ႇပၼ်တၢမ်ႇတီႈၵူၼ်းႁိူၼ်းမၼ်းတင်းလၢႆတႃႇသေႇၵွပ်ႈပိူဝ်ႈတူႉၸရိူၵ်ႈဢပျႅတ်ႈဢၼ်မၼ်းႁူႉယူႇဢၼ်လုၵ်ႈၸၢႆးမၼ်းၸိူဝ်းၼၼ်ႉႁဵတ်းထၼ်ႈပေႃးႁႂ်ႈတၢင်းဢၼ်ၵိၼ်ႇဢၼ်ဝႃႈႁွတ်ႈထိုင်ၵႃႈၼိူဝ်တူဝ်ၸဝ်ႈၵဝ်ႇလႄႈမၼ်းဢမ်ႇသင်ႇသွၼ်သုင်းမႃႉၶဝ်ၼႃႇၼႃႇၼၼ်ႉဢေႃႈ။
၁၄ ၵွပ်ႈပိူဝ်ႈၼင်ႇၼၼ်လႄႈၵဝ်ၵိၼ်ႇဝႃႈတီႈၵူၼ်းႁိူၼ်းဢေးလိတင်းလၢႆၼင်ႇႁိုဝ်ဢပျႅတ်ႈၵူၼ်းႁိူၼ်းဢေးလိတင်းလၢႆၸိူဝ်းၼၼ်ႉတၵ်းဢမ်ႇလႆႈပျေႇလူၺ်ႈယိၸ်ႉတင်းၶိူင်ႈပုၵ်ႉၸေႃႇၼၼ်ႉသေပွၵ်ႈယဝ်ႉ၊ဝႃႈၼင်ႇၼႆဢေႃႈ။
၁၅ သမူၺ်ႇလၼၼ်ႉၼွၼ်းတေႃႇထိုင်ႁွတ်ႈၶိင်ႇၵၢင်ၼႂ်သေယဝ်ႉၸင်ႇၽုၺ်ႇၽၵ်းတူႁိူၼ်းထႃႇဝရႃႉၽြႃးဢေႃႈ။သမူၺ်ႇလဢမ်ႇႁတ်းမွၵ်ႇလၢတ်ႈရူႇပႃႇရူင်ႇဢၼ်မၼ်းႁၼ်ၼၼ်ႉၵႃႈတီႈဢေးလိ။
၁၆ ဢေးလိႁွင်ႉသမူၺ်ႇလလႄႈဝႃႈ၊-သမူၺ်ႇလ၊လုၵ်ႈၸၢႆးၵဝ်ဢိူၺ်း။ဝႃႈၼင်ႇၼႆလႄႈသမူၺ်ႇလၵေႃႈဢိူဝ်ႈလႄႈဝႃႈ၊-ၵဝ်ၶႃႈမီးယူႇၶႃႈဢေႃႈ၊ဝႃႈၼင်ႇၼႆဢေႃႈ။
၁၇ မၼ်းၼၼ်ႉၵေႃႈဝႃႈ၊-မၼ်းၸဝ်ႈမီးဢမိင်ႉၸိူဝ်ႉၼင်ႇႁိုဝ်တီႈမႂ်း။ၶႅၼ်းတေႃႈယႃႇပေသိူင်ႇမႅပ်းဝႆႉတီႈၵဝ်။ပေႃးမႂ်းသိူင်ႇမႅပ်းဝႆႉသေၸိူဝ်ႉသေပိူင်ၵႃႈဢၼ်မၼ်းၸဝ်ႈမီးဢမိင်ႉတီႈမႂ်းၼၼ်ႉၸိုင်ႁႂ်ႈမၼ်းၸဝ်ႈႁဵတ်းတေႃႇမႂ်းၼၵ်းၼၵ်းၼႃၼႃသေၵမ်းလူၺ်ႈ၊ဝႃႈၼင်ႇၼႆလႄႈသမူၺ်ႇလၼၼ်ႉဢမ်ႇသိူင်ႇဢမ်ႇမႅပ်းသေၸိူဝ်ႉသေပိူင်လႄႈၶိုၼ်းမွၵ်ႇလၢတ်ႈပၼ်ဢၼ်မၼ်းလႆႈငိၼ်းတင်းသဵင်ႈတင်းမူတ်းဢေႃႈ။
၁၈ မၼ်းၵေႃႈႁပ်ႉတုင်းဢဝ်လႄႈဝႃႈ၊-ပေႃးပဵၼ်ထႃႇဝရႃႉၽြႃးၸိုင်ႁႂ်ႈမၼ်းၸဝ်ႈႁဵတ်းၸွမ်းၵႃႈၼင်ႇဢၼ်မၼ်းၸဝ်ႈမီးဢလူဝ်ၼၼ်ႉသေၵမ်းလူၺ်ႈ၊ဝႃႈၼင်ႇၼႆဢေႃႈ။
၁၉ သမူၺ်ႇလၼၼ်ႉယႂ်ႇမႃးလႄႈထႃႇဝရႃႉၽြႃးၵေႃႈမီးယူႇလူၺ်ႈၵၼ်တင်းမၼ်းလႄႈဢမ်ႇပၼ်ဢၶႂၢင်ႉႁႂ်ႈၵႂၢမ်းမၼ်းၸဝ်ႈတူၵ်းၼိူဝ်လိၼ်သေၶေႃႈသေၵမ်း။
၂၀ ၵူၼ်းမဵဝ်းဢိသရေႇလတင်းသဵင်ႈတင်းလူင်ဢဝ်ၵႃႈတီႈၸႃႉၸဵမ်ဝဵင်းတၼ်ႇတေႃႇထိုင်ႁွတ်ႈဝဵင်းပေႇရသေႇၽၸိူဝ်းၼၼ်ႉႁူႉမၢတ်ႈလွင်ႈဢၼ်သမူၺ်ႇလလႆႈၶၢမ်ႇတၢင်းဢၼ်တႄႇပဵၼ်ပရေႃးၽႅတ်ႈထႃႇဝရႃႉၽြႃးယဝ်ႉၼၼ်ႉဢေႃႈ။
၂၁ ထႃႇဝရႃႉၽြႃးပေႃႇမႃးၵႃႈတီႈဝဵင်းသိလေႃႇၶိူဝ်းၶိူဝ်းယႂ်းယႂ်းဢေႃႈ။ထႃႇဝရႃႉၽြႃးဢဝ်ၼုၵ်ႈၵပၢတ်ႈမၼ်းၸဝ်ႈသေလႄႈပၼ်ပျႃႇတိၵ်ႈတီႈသမူၺ်ႇလဢေႃႈ။