Chapter
၆
တိူၵ်ႈပတိၺိၼ်ႇၸဝ်ႈၶိုၼ်းႁွတ်ႈထိုင်မိူင်းဢိသရေႇလ
၁ တိူၵ်ႈပတိၺိၼ်ႇထႃႇဝရႃႉၽြႃးၼၼ်ႉယူႇၵႃႈတီႈမိူင်းၽိလိတ်ႉတိၸဵတ်းလိူၼ်သေယဝ်ႉ၊ၵူၼ်းၽိလိတ်ႉတိၸိူဝ်းၼၼ်ႉႁွင်ႉဢဝ်ယိတ်ႉပရေႃးႁိၵ်ႈတင်းလၢႆဢိၵ်ႇတင်းၶဝ်ၸိူဝ်းဢၼ်ႁဵတ်းပရေႃးၽႅတ်ႈၸိူဝ်းၼၼ်ႉမႃးလႄႈတွင်ႈထၢမ်ဝႃႈ၊-
၂ ႁဝ်းတၵ်းလႆႈဢဝ်တိူၵ်ႈပတိၺိၼ်ႇထႃႇဝရႃႉၽြႃးႁဵတ်းၸိူဝ်ႉၼင်ႇႁိုဝ်။မွၵ်ႇလၢတ်ႈတီႈႁဝ်းလွင်ႈဢၼ်ႁဝ်းတၵ်းလႆႈဢဝ်တင်းၵႃႈသင်သေလႄႈပွႆႇၸႂ်ႉၵႂႃႇဝႆႉၵႃႈတီႈဢၼ်မၼ်းယူႇၵဝ်ႇၵဝ်ႇၼၼ်ႉဝႃႈၼင်ႇၼႆဢေႃႈ။
၃ ၶဝ်ၵေႃႈလၢတ်ႈလႄႈဝႃႈ၊-ပေႃးပွႆႇတိူၵ်ႈပတိၺိၼ်ႇၽြႃးပဵၼ်ၸဝ်ႈမဵဝ်းဢိသရေႇလၵႂႃႇၸိုင်ယႃႇပပွေႆႇၵႂႃႇတူဝ်လၢႆမိုဝ်းပဝ်ႇ။တၵ်းလႆႈပၼ်ၶိူင်ႈပုၵ်ႉၸေႃႇဢပျႅတ်ႈတူႉၸရိူၵ်ႈဢေႃႈ။ပေႃးႁဵတ်းၸိူဝ်ႉၼင်ႇၼၼ်ၸင်ႇတၢင်းၶႆႈတၢင်းပဵၼ်သူတၵ်းထၢတတ်ႈယဵၼ်ဢေႃႈ။သူတၵ်းႁူႉလွင်ႈဢၼ်ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမိုဝ်းမၼ်းၸဝ်ႈဢမ်ႇပႆႇၶၢႆႉသေၵႃႈတီႈသူဢၼ်ဝႃႈၼၼ်ႉဢေႃႈ၊ဝႃႈၼင်ႇၼႆဢေႃႈ။
၄ ၶဝ်ၼၼ်ႉၵေႃႈထၢမ်လႄႈဝႃႈ၊-ႁဝ်းတၵ်းလႆႈဢဝ်လွင်ႈတၢင်းဢၼ်လႂ်ႁဵတ်းၶိူင်ႈပုၵ်ႉၸေႃႇပုၼ်ႈဢၼ်တၵ်းၽႄႇဢပျႅတ်ႈတူႉၸရိူၵ်ႈၼၼ်ႉပၼ်ၵႂႃႇ၊ဝႃႈၼင်ႇၼႆသေယဝ်ႉၶဝ်ၵေႃႈၶိုၼ်းလၢတ်ႈလႄႈဝႃႈ၊-တၵ်းလႆႈပၼ်ၵႂႃႇမႅင်းသရိူၵ်ႈၶမ်းႁႃႈဢၼ်တင်းၼူၶမ်းႁႃႈတူဝ်ၸွမ်းလူၺ်ႈမီးၶုၼ်ၽိလိတ်ႉတိႁႃႈပႃးၼၼ်ႉဢေႃႈ။လွင်းမၼ်းၸမ်းတၢင်းၶႆႈတၢင်းပဵၼ်မဵဝ်းလဵဝ်ၸပ်းတီႈသူတင်းၶုၼ်သူၸိူဝ်းၼၼ်ႉဢေႃႈ။
၅ ၵွပ်ႈပိူဝ်ႈၼင်ႇၼၼ်လႄႈသူတၵ်းလႆႈႁဵတ်းပုင်ႇႁၢင်ႊမႅင်းသရိူၵ်ႈဢိၵ်ႇတင်းပုင်ႇႁၢင်ႊၼူဢၼ်ၸၢင်ႊယႃႉလိၼ်ၼၼ်ႉသေလႄႈယွင်ႈယေႃးမူၼ်ၵုင်ႇၽြႃးပဵၼ်ၸဝ်ႈမဵဝ်းဢိသရေႇလဢေႃႈ။မၼ်းၸဝ်ႈၸၢင်ႊၶေးတၵ်းယူၵ်ႉမိုဝ်းမၼ်းၸဝ်ႈသေၵႃႈၼိူဝ်သူၵႃႈၼိူဝ်ၽြႃးသူတင်းၵႃႈၼိူဝ်လိၼ်သူဢေႃႈ။
၆ ၵွပ်ႈပိူဝ်ႈၸိူဝ်ႉႁိုဝ်ၼင်ႇႁိုဝ်လႄႈသူမီးႁူဝ်ၸႂ်ဢၼ်ၵႅၼ်ႇၶႅင်မိူၼ်ၸိူဝ်ႉၼင်ႇဢၼ်ၶုၼ်ႁေႃၶမ်းၽႃႇရေႃးဢိၵ်ႇတင်းၵူၼ်းဢေႇၵႅပ်ႉတုၸိူဝ်းၼၼ်ႉ။မိူဝ်ႈဢၼ်မၼ်းၸဝ်ႈၼႄပျႃးလွင်ႈတၢင်းဢၼ်လၢၵ်ႇလၢႆးၵႃႈၼႂ်းၶဝ်ယႂ်ႇၼမ်ၼႃႇလူင်လၢင်ယဝ်ႉၼၼ်ႉၶဝ်လႆႈပွႆႇၵူၼ်းမဵဝ်းဢိသရေႇလၶဝ်တင်းလၢႆႁႂ်ႈၶဝ်လႆႈဢွၵ်ႇၵႂႃႇဢမ်ႇၸႂ်ႈႁိုဝ်။
၇ မိူဝ်ႈလဵဝ်ၼႆႉႁၢင်ႈလေႃႉဢၼ်မႂ်ႇသေယဝ်ႉဢဝ်ဝူဝ်းမေႈသွင်တူဝ်ဢၼ်ဢမ်ႇပႆႇယၢမ်ႈတၢင်ႇၵၢၼ်းဢၼ်မီးလုၵ်ႈယဝ်ႉၼၼ်ႉႁၢင်ႈသႂ်ႇတီႈလေႃႉသေလႄႈဢဝ်လုၵ်ႈဢွၼ်ႇၶဝ်ၼၼ်ႉၽၢတ်ႇယၢၼ်ၵၼ်တင်းၶဝ်သေလႄႈသူင်ႇဝႆႉၵႃႈတီႈတီႈဢၼ်ၶဝ်ယူႇၼၼ်ႉတႃႉ။
၈ ဢဝ်တိူၵ်ႈပတိၺိၼ်ႇထႃႇဝရႃႉၽြႃးတၢင်ႇသႂ်ႇၼိူဝ်လေႃႉၼၼ်ႉလႄႈဢဝ်ၶိူင်ႈၶမ်းဢၼ်သူၶိုၼ်းပၼ်ပုၼ်ႈတၢင်းပုၵ်ႉၸေႃႇဢၼ်ၽႄႇဢပျႅတ်ႈတူႉၸရိူၵ်ႈၼၼ်ႉသႂ်ႇၵႃႈၼႂ်းတိူၵ်ႈဢွၼ်ႇသေယဝ်ႉဝႆႉၵႃႈႁိမ်းတိူၵ်ႈပတိၺိၼ်ႇၸဝ်ႈလႄႈပွႆႇႁႂ်ႈၵႂႃႇတႃႉ။
၉ ပႂ်ႉတူၺ်းတႃႉ။ပေႃးတိူၵ်ႈပတိၺိၼ်ႇၸဝ်ႈၼၼ်ႉၸွမ်းသဵၼ်ႈတၢင်းဝဵင်းပိတ်ႉသေမိတ်ႉလႄႈၵႂႃႇၸူးၵႃႈတီႈမိူင်းတူဝ်ၸဝ်ႈၵဝ်ႇၸိုင်ႁဝ်းတၵ်းႁူႉလွင်ႈဢၼ်ဝႃႈမၼ်းၸဝ်ႈၼၼ်ႉပဵၼ်ၸဝ်ႈဢၼ်ႁဵတ်းၽေးလူင်သႂ်ႇတီႈႁဝ်းၼၼ်ႉယဝ်ႉ။ပေႃးလေႃႉၼၼ်ႉဢမ်ႇၵႂႃႇၸိူဝ်ႉၼင်ႇၼၼ်ၸိုင်ႁဝ်းတၵ်းႁူႉလွင်ႈဢၼ်ဝႃႈၽေးတမ်ႇဢၼ်ႁွတ်ႈထိုင်မႃးတီႈႁဝ်းၼၼ်ႉဢမ်ႇၸႂ်ႈၵွပ်ႈပိူဝ်ႈမိုဝ်းမၼ်းၸဝ်ႈ။မၼ်းပဵၼ်မႃးႁင်းၵူၺ်းမၼ်းၵူၺ်းဢေႃႈ၊ဝႃႈၼင်ႇၼႆဢေႃႈ။
၁၀ ၵူၼ်းတင်းလၢႆၵေႃႈႁဵတ်းၸွမ်းၸိူဝ်ႉၼင်ႇၼၼ်သေယဝ်ႉဢဝ်ဝူဝ်းမေႈသွင်တူဝ်ဢၼ်မီးလုၵ်ႈယဝ်ႉၼၼ်ႉႁၢင်ႈသႂ်ႇတီႈလေႃႉၼၼ်ႉလႄႈဢဝ်လုၵ်ႈ၁၁ ဢွၼ်ႇၶဝ်ၶင်ဝႆႉၵႃႈၼႂ်းတီႈယူႇၶဝ်ဢေႃႈ။
၁၁ ၶဝ်ဢွၼ်ၵၼ်ဢဝ်တိူၵ်ႈပတိၺိၼ်ႇထႃႇဝရႃႉၽြႃးဢိၵ်ႇတင်းတိူၵ်ႈဢွၼ်ဢၼ်မီးၼူၶမ်းဢိၵ်ႇတင်းပုင်ႇႁၢင်ႊမႅင်းသရိူၵ်ႈၸိူဝ်းၼၼ်ႉတၢင်ႇသႂ်ႇၵႃႈၼိူဝ်လေႃႉၼၼ်ႉဢေႃႈ။
၁၂ ဝူဝ်းမေႈၸိူဝ်းၼၼ်ႉႁွင်ႉသဵင်လႄႈၸွမ်းသဵၼ်ႈတၢင်းပိတ်ႉသေမိတ်ႉၵႂႃႇသိုဝ်ႈသိုဝ်ႈဢေႃႈ။ဢမ်ႇငိၵ်းၵႂႃႇၽၢႆႇသၢႆႉၽၢႆႇၶႂႃ။ၶုၼ်ၽိလိတ်ႉတိၸိူဝ်းၼၼ်ႉၸွမ်းလင်ဝူဝ်းၸိူဝ်းၼၼ်ႉတေႃႇထိုင်ႁွတ်ႈလႅၼ်လိၼ်ဝဵင်းပိတ်ႉသေမိတ်ႉဢေႃႈ။
၁၃ ၵူၼ်းဝဵင်းပိတ်ႉသေမိတ်ႉၸိူဝ်းၼၼ်ႉပၢတ်ႇၶဝ်ႈၵျုင်ႇၵႃႈၼႂ်းပၢင်ႇႁူၺ်ႈယူႇလႄႈမိူဝ်ႈဢၼ်မုင်ႈတူၺ်းၸိုင်လႆႈႁၼ်တိူၵ်ႈပတိၺိၼ်ႇၸဝ်ႈၼၼ်ႉသေယဝ်ႉဢွၼ်ၵၼ်ၸူမ်းသိူဝ်းမူၼ်ႈပျေႃႇၼႃႇဢေႃႈ။
၁၄ လေႃႉၼၼ်ႉၶဝ်ႈၵႂႃႇၵႃႈၼႂ်းတူင်ႈၼႃးယေႃးသု၊ၵူၼ်းဝဵင်းပိတ်ႉသေမိတ်ႉ၊ၼၼ်ႉသေယဝ်ႉၵိုတ်းသဝ်းယူႇၵႃႈတီႈႁိမ်းမၢၵ်ႇႁိၼ်လူင်ၵႃႈတီႈၼၼ်ႉဢေႃႈ။ၶဝ်ၽႃႇတႅပ်းလေႃႉၼၼ်ႉသေယဝ်ႉဢဝ်ဝူဝ်းမေႈၸိူဝ်းၼၼ်ႉႁဵတ်းယိၸ်ႉဢၼ်တုတ်ႇၽႆးလႄႈပုၵ်ႉၸေႃႇထႃႇဝရႃႉၽြႃးဢေႃႈ။
၁၅ မိူဝ်ႈၼၼ်ႉၵူၼ်းမဵဝ်းလေႇဝိၶဝ်ဢွၼ်ၵၼ်ဢဝ်တိူၵ်ႈပတိၺိၼ်ႇထႃႇဝရႃႉၽြႃးဢိၵ်ႇတင်းတိူၵ်ႈဢွၼ်ႇဢၼ်မီးၶိူင်ႈၶမ်းၼၼ်ႉသေယဝ်ႉဢဝ်တၢင်ႇဝႆႉၵႃႈၼိူဝ်မၢၵ်ႇႁိၼ်လူင်ၼၼ်ႉဢေႃႈ။ၵူၼ်းဝဵင်းပိတ်ႉသေႇမိတ်ႉၸိူဝ်းၼၼ်ႉဢွၼ်ၵၼ်ပုၵ်ႉၸေႃႇယိၸ်ႉဢၼ်တုတ်ႇၽႆးဢိၵ်ႇတင်းတၢင်းလူႇတင်းလၢႆတီႈထႃႇဝရႃႉၽြႃးၼႂ်းဝၼ်းၼၼ်ႉၵမ်းလဵဝ်ဢေႃႈ။
၁၆ ၶုၼ်ၽိလိတ်ႉတိႁႃႈပႃးၼၼ်ႉႁၼ်လွင်ႈတၢင်းၼၼ်ႉသေယဝ်ႉၶိုၼ်းမိူဝ်းၵႂႃႇၵႃႈတီႈဝဵင်းဢေႇၵုၼ်ႇၵမ်းလဵဝ်သေဢေႃႈ။
၁၇ ပုင်ႇႁၢင်ႊမႅင်းသရိူၵ်ႈၶမ်းဢၼ်ၵူၼ်းၽိလိတ်ႉတိၶဝ်ပၼ်ပုၼ်ႈၶိူင်ႈပုၵ်ႉၸေႃႇဢၼ်ၽႄႇဢပျႅတ်ႈတူႉၸရိူၵ်ႈတီႈထႃႇဝရႃႉၽြႃးၼၼ်ႉၸမ်းပဵၼ်ပုၼ်ႈဝဵင်းဢႃႇၸုတ်ႉဢၼ်ၼိုင်ႈ၊ပုၼ်ႈဝဵင်းၵႃႇလဢၼ်ၼိုင်ႈ၊ပုၼ်ႈဝဵင်းဢႃႇသၵေႇလုၼ်ႇဢၼ်ၼိုင်ႈ၊ပုၼ်ႈဝဵင်းၵႃႇသဢၼ်ၼိုင်ႈ၊ပုၼ်ႈဝဵင်းဢေႇၵုၼ်ႇဢၼ်ၼိုင်ႈဢေႃႈ။
၁၈ ၼူၶမ်းၸိူဝ်းၼၼ်ႉၸမ်းၸၢပ်ႈသႅင်ႇၵၼ်တင်းၶုၼ်ၽိလိတ်ႉတိႁႃႈပႃးၼႂ်းဝဵင်းဢၼ်မၼ်ႈၶိူင်ႇ၊ၼႂ်းဝၢၼ်ႈထိူၼ်ႇလႂ်ၼၼ်ႉဢေႃႈ။မၢၵ်ႇႁိၼ်လူင်တီႈဢၼ်ဢဝ်တိူၵ်ႈပတိၺိၼ်ႇထႃႇဝရႃႉၽြႃးတၢင်ႇဝႆႉၼၼ်ႉၸမ်းမီးၵႃႈၼႂ်းတူင်ႈၼႃးယေႃးသုၵူၼ်းဝဵင်းပိတ်ႉသေႇမိတ်ႉၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
၁၉ မၼ်းၸဝ်ႈပၼ်တၢမ်ႇတီႈၵူၼ်းဝဵင်းပိတ်ႉသေမိတ်ႉၸိူဝ်းၼၼ်ႉၵွပ်ႈပိူဝ်ႈဢၼ်ၶဝ်လွမ်တူၺ်းမႅၼ်ႈၵႃႈၼႂ်းတိူၵ်ႈပတိၺိၼ်ႇထႃႇဝရႃႉၽြႃးၼၼ်ႉဢေႃႈ။မၼ်းၸဝ်ႈႁႂ်ႈၵူၼ်းတၢႆႁႃႈမိုၼ်ႇပၢႆၸဵတ်းသိပ်းဢေႃႈ။ၵူၼ်းတင်းလၢႆဢွၼ်ၵၼ်ႁႆႈႁွင်ႉပွင်ႉၶၢင်းၵွပ်ႈပိူဝ်ႈထႃႇဝရႃႉၽြႃးဢဝ်တၢင်းဢၼ်ယႃႉပႅတ်ႈဢၼ်ယႂ်ႇၼႃႇပၼ်တၢမ်ႇတီႈၵူၼ်းတင်းလၢႆၼၼ်ႉဢေႃႈ။
၂၀ ၵူၼ်းဝဵင်းပိတ်ႉသေႇမိတ်ႉၸိူဝ်းၼၼ်ႉလၢတ်ႈလႄႈဝႃႈ၊-ၽူႈလႂ်တၵ်းၸုၵ်းၶၢမ်ႇယူႇၵႃႈတီႈၽၢႆႇၼႃႈထႃႇဝရႃႉၽြႃးၽြႃးပဵၼ်ၸဝ်ႈဢၼ်မူတ်းၸၢင်ႇၼၼ်ႉလႆႈ။တိူၵ်ႈပတိၺိၼ်ႇၸဝ်ႈၼႆႉတၵ်းလုၵ်ႉသေၵႃႈတီႈႁဝ်းလႄႈၵႂႃႇၸူးၵႃႈတီႈၽူႈလႂ်၊ဝႃႈၼင်ႇၼႆသေယဝ်ႉ၊
၂၁ ၶဝ်ၸႂ်ႉပွႆႇၵူၼ်းၵႂႃႇၸူးၵႃႈတီႈၵူၼ်းဝဵင်းၵိရယတ်ႉယႃႇရိမ်ႇတင်းလၢႆလႄႈသင်ႇလၢတ်ႈၵႂႃႇဝႃႈ၊-ၵူၼ်းၽိလိတ်ႉတိၸိူဝ်းၼၼ်ႉသမ်ႉၶိုၼ်းဢဝ်တိူၵ်ႈပတိၺိၼ်ႇထႃႇဝရႃႉၽြႃးမႃးသူင်ႇယဝ်ႉ။သူဢွၼ်ၵၼ်လူင်းမႃးလႄႈဢဝ်ၵႂႃႇဝႆႉၵႃႈတီႈသူသေၵမ်း၊ဝႃႈၼင်ႇၼႆဢေႃႈ။