Chapter
၂၄
တႃႇဝိတ်ႉဢမ်ႇဢဝ်ဢသၢၵ်ႈသေႃးလုတၢႆ
၁ ဝၢႆးသသေေႃးလုလုၵ်ႉသေၵႃႈတီႈတိုၵ်းတေႃးၵၼ်တင်းၵူၼ်းၽိလိတ်ႉတိၸိူဝ်းၼၼ်ႉယဝ်ႉလႄႈၶိုၼ်းမႃးၼၼ်ႉပိူၼ်ႈလဝ်ႈလၢတ်ႈတီႈမၼ်းလႄႈဝႃႈ၊-တူၺ်းတီႈၶႃႈလူး။
၂ တႃႇဝိတ်ႉမီးယူႇၵႃႈၼႂ်းထိူၼ်ႇဢိၼ်ႇၵေႇတိၶႃႈဢေႃႈ၊ဝႃႈၼင်ႇၼႆလႄႈသေႃးလုသမ်ႉႁွင်ႉဢဝ်ၵူၼ်းသၢမ်ႁဵင်ဢၼ်လိူၵ်ႈၵဵပ်းဢဝ်သေၵႃႈၼႂ်းၵူၼ်းမဵဝ်းဢိသရေႇလတင်းသဵင်ႈတင်းလူင်ၼၼ်ႉသေလႄႈၵႂႃႇႁႃတႃႇဝိတ်ႉတင်းၵူၼ်းမၼ်းၸိူဝ်းၼၼ်ႉၵႃႈၼိူဝ်လွႆႁိၼ်လွႆၽႃဢၼ်မီးပေႉထိူၼ်ႇၼၼ်ႉဢေႃႈ။
၃ မိူဝ်ႈဢၼ်မၼ်းႁွတ်ႈထိုင်ၵႃႈတီႈႁိမ်းၶွၵ်ႈသူဝ်းႁိမ်းတၢင်းၼၼ်ႉတီႈၼၼ်ႉမီးႁူးထမ်ႈဢၼ်ၼိုင်ႈဢေႃႈ။သေႃးလုၶဝ်ႈၵႂႃႇၵႃႈၼႂ်းႁူးထမ်ႈၼၼ်ႉႁႂ်ႈလႆႈႁဵတ်းၽၢႆႈလူင်ဢေႃႈ။တႃႇဝိတ်ႉတင်းၵူၼ်းမၼ်းၸိူဝ်းၼၼ်ႉၵေႃႈမီးယူႇၵႃႈၼႂ်းႁူးထမ်ႈတီႈလိုၵ်ႉၼၼ်ႉဢေႃႈ။
၄ ၵူၼ်းတႃႇဝိတ်ႉၸိူဝ်းၼၼ်ႉလၢတ်ႈမၼ်းလႄႈဝႃႈ၊-တူၺ်းၶႃႈလူး။ဝၼ်းမိူဝ်ႈၼႆႉၵႃႈဢၼ်ထႃႇဝရႃႉၽြႃးမီးဢမိင်ႉဝႆႉဝႃႈ၊-တူၺ်းလူး။ၵဝ်တၵ်းဢဝ်ရၢၼ်ႇသူႇမႂ်းဢၢပ်ႈပၼ်ၵႃႈၼႂ်းမိုဝ်းမႂ်းလႄႈမႂ်းမီးဢၶႂၢင်ႉဢၼ်လႆႈႁဵတ်းတီႈမၼ်းၸွမ်းၵႃႈၼင်ႇဢၼ်မႂ်းၶႂ်ႈႁဵတ်းၼၼ်ႉဢေႃႈ၊ဢၼ်ဝႃႈၼၼ်ႉ၊ႁွတ်ႈထိုင်မႃးၶႃႈယဝ်ႉ၊ဝႃႈၼင်ႇၼႆဢေႃႈ။တႃႇဝိတ်ႉၵေႃႈၵႂႃႇတဵတ်ႇတဵတ်ႇသေယဝ်ႉထိူဝ်ဢဝ်ပၢႆႊသိူဝ်ႈယၢဝ်းသေႃးလုၼၼ်ႉပွတ်းၼိုင်ႈဢေႃႈ။
၅ လိုၼ်းသေၼၼ်ႉတႃႇဝိတ်ႉၸႂ်ဢမ်ႇလီၵွပ်ႈပိူဝ်ႈလႆႈထိူဝ်ဢဝ်ပၢႆႊသိူဝ်ႈယၢဝ်းသေႃးလုၸိူဝ်ႉၼင်ႇၼၼ်ၼၼ်ႉလႄႈမၼ်းလၢတ်ႈတီႈၵူၼ်းမၼ်းၸိူဝ်းၼၼ်ႉလႄႈဝႃႈ၊-
၆ ႁႂ်ႈထႃႇဝရႃႉၽြႃးႁၢမ်ႈတပ်ႉႁႄႉၶႅၼ်ၵဝ်ၼႂ်းလွင်ႈဢမူႉဢၼ်ၵဝ်တၵ်းလႆႈယဵတ်ႇမိုဝ်းၵဝ်သေလႄႈႁဵတ်းတေႃႇၸဝ်ႈၵဝ်ဢၼ်ပဵၼ်ၵေႃႉဢၼ်လႆႈၶၢမ်ႇၽိၵ်ႈသိၵ်ႈထႃႇဝရႃႉၽြႃးၼၼ်ႉသေၵမ်းလူၺ်ႈ၊ဝႃႈၼင်ႇၼႆဢေႃႈ။
၇ တႃႇဝိတ်ႉဢဝ်ၵႂၢမ်းၸိူဝ်းၼႆႉသေလႄႈႁႄႉၶႅၼ်ႁၢမ်ႈတပ်ႉၵူၼ်းမၼ်းၸိူဝ်းၼၼ်ႉဢမ်ႇပၼ်ဢၶႂၢင်ႉႁႂ်ႈၶဝ်လႆႈတိူဝ်ႉထုၵ်ႇသေႃးလုၼၼ်ႉဢေႃႈ။သေႃးလုၵေႃႈဢွၵ်ႇသေၵႃႈၼႂ်းႁူးထမ်ႈၼၼ်ႉလႄႈၵႂႃႇဢေႃႈ။
၈ လိုၼ်းၼၼ်ႉတႃႇဝိတ်ႉၵေႃႈလုၵ်ႉလႄႈဢွၵ်ႇၵႃႈၼႂ်းႁူးထမ်ႈၼၼ်ႉမႃးသေယဝ်ႉႁွင်ႉသႅၼ်ႇၸွမ်းလင်သေႃးလုလႄႈဝႃႈ၊-
၉ ၸဝ်ႈၶုၼ်လူင်တီႈၶႃႈ၊ဝႃႈၼင်ၼႆသေယဝ်ႉမိူဝ်ႈဢၼ်သေႃးလုဝၢႆႇၶိုၼ်းတၢင်းလင်ၼၼ်ႉၸိုင်တႃႇဝိတ်ႉၵူမ်ႈႁူဝ်ၵႃႈတီႈလိၼ်လႄႈၶုပ်ႉမူပ်ႇယူႇသေလႄႈဝႃႈ၊-ႁဵတ်းသင်လႄႈၸဝ်ႈႁဝ်းထွမ်ႇဢဝ်ၵႂၢမ်းၵူၼ်းၵမ်ႈၽွင်ႈဢၼ်ဝႃႈ၊-
၁၀ တႃႇဝိတ်ႉၵျၢမ်ႇႁႃႁႂ်ႈလႆႈယႃႉဢၵျူဝ်းၸဝ်ႈႁဝ်းဢေႃႈ၊ဢၼ်ဝႃႈၼၼ်ႉတီႈၶႃႈ။တူၺ်းတီႈၶႃႈလူး။ဝႃႈတႄႉမၼ်းမိူဝ်ႈၼႆႉၸိူဝ်ႉၼင်ႇဢၼ်ၸဝ်ႈႁဝ်းဢဝ်မၢၵ်ႇတႃတူၺ်းႁၼ်ယူႇၼၼ်ႉထႃႇဝရႃႉၽြႃးယင်းပေႃးဢဝ်ၸဝ်ႈႁဝ်းဢၢပ်ႈပၼ်ၵႃႈၼႂ်းမိုဝ်းၶႃႈၸဝ်ႈၵႃႈၼႂ်းႁူးထမ်ႈၼႆႉၶႃႈယဝ်ႉ။ပိၵ်ႉသမ်ႉၵမ်ႈၽွင်ႈတိုၵ်းယူင်းႁႂ်ႈၶႃႈၸဝ်ႈဢဝ်ဢသၢၵ်ႈၸဝ်ႈႁဝ်းတၢႆသေၵေႃႈၶႃႈၸဝ်ႈဢမ်ႇဢဝ်ၸဝ်ႈႁဝ်းတၢႆ။ၶႃႈၸဝ်ႈဝႃႈ၊-ၵဝ်တၵ်းဢမ်ႇယဵတ်ႇမိုဝ်းၵဝ်ႁႂ်ႈလႆႈတိူဝ်ႉထုၵ်ႇၸဝ်ႈၵဝ်ၵွပ်ႈပိူဝ်ႈဢၼ်ၸဝ်ႈၵဝ်ပဵၼ်ၵေႃႉဢၼ်ထႃႇဝရႃႉၽြႃးပၼ်ၽိၵ်ႈသိၵ်ႈၼၼ်ႉဢေႃႈ၊ဝႃႈၼင်ႇၼႆတီႈၶႃႈဢေႃႈ။
၁၁ လိူဝ်သေၼၼ်ႉၸဝ်ႈပေႃႈတီႈၶႃႈဢိူၺ်း။လူတူၺ်းသေၵမ်းၶႃႈ။လူတူၺ်းပၢႆႊသိူဝ်ႈယၢဝ်းၸဝ်ႈႁဝ်းပွတ်းၼိုင်ႈၵႃႈၼႂ်းမိုဝ်းၶႃႈၸဝ်ႈၼႆႉသေၵမ်းၶႃႈ။ၵွပ်ႈပိူဝ်ႈဢၼ်ၶႃႈၸဝ်ႈယင်းဢမ်ႇဢဝ်ဢသၢၵ်ႈၸဝ်ႈႁဝ်းတၢႆလႄႈထိူဝ်ဢဝ်ပၢႆႊသိူဝ်ႈယၢဝ်းပွတ်းၼိုင်ႈၼႆႉၵူၺ်းၼၼ်ႉၶႅၼ်းတေႃႈႁူႉပွင်ႇၸႂ်ဝႃႈၶႃႈၸဝ်ႈဢမ်ႇမီးဢပျႅတ်ႈတူႉၸရိူၵ်ႈဢမ်ႇမီးဢပျႅတ်ႈတၢင်းဢၼ်ပူၼ်ႉလိူဝ်ႁဵတ်းမႅၼ်ႈတေႃႇၸဝ်ႈႁဝ်းဢၼ်ဝႃႈၼၼ်ႉသေၵမ်းၶႃႈ။ၶႃႈၸဝ်ႈဢမ်ႇၽိတ်းပိူင်ႈၸဝ်ႈႁဝ်းၶႃႈ။ၼႂ်းဝႃႈၼၼ်သေၵေႃႈၸဝ်ႈႁဝ်းၸွမ်းလႄႇႁႃႁႂ်ႈလႆႈဢဝ်ဢသၢၵ်ႈၶႃႈၸဝ်ႈတၢႆတီႈၶႃႈလူင်ပေႇ။
၁၂ ႁႂ်ႈထႃႇဝရႃႉၽြႃးၸီႇယၢင်ႇဝူင်ႈၵၢင်ၶႃႈၸဝ်ႈတင်းၸဝ်ႈႁဝ်းသေၵမ်းလူၺ်ႈ။ႁႂ်ႈထႃႇဝရႃႉၽြႃးတွပ်ႇတႅၼ်းပၼ်ဢပျႅတ်ႈဢၼ်ၽိတ်းပိူင်ႈတီၶႃႈၸဝ်ႈၼၼ်ႉသေၵမ်းလူၺ်း။ၼႂ်းဝႃႈၼၼ်သေၵေႃႈမိုဝ်းၶႃႈၸဝ်ႈၼႆႉတၵ်းဢမ်ႇလႆႈႁွတ်ႈထိုင်ၵႃႈၼိူဝ်ၸဝ်ႈႁဝ်းတီႈၶႃႈ။
၁၃ ၵႃႈၼင်ႇဢၼ်မီးၵႂၢမ်းမိူဝ်ႈၵွၼ်ႇၼၼ်ႉလႄႈဝႃႈ၊-တၢင်းႁဵတ်းဢၼ်ႁၢႆႉမိူၵ်ႈၼၼ်ႉလုၵ်ႉၵႃႈတီႈၵေႃႉဢၼ်ႁၢႆႉမိူၵ်ႈၼၼ်ႉမႃးဢေႃႈ၊ဝႃႈၼင်ႇၼႆတီႈၶႃႈဢေႃႈ။ၼႂ်းဝႃႈၼၼ်သေၵေႃႈမိုဝ်းၶႃႈၸဝ်ႈၼႆႉတၵ်းဢမ်ႇလႆႈႁွတ်ႈထိုင်ၵႃႈၼိူဝ်ၸဝ်ႈႁဝ်းတီႈၶႃႈ။
၁၄ ၶုၼ်ႁေႃၶမ်းဢိသရေႇလဢွၵ်ႇမႃးၸွမ်းႁႃၽူႈလႂ်။ၸဝ်ႈႁဝ်းၸွမ်းႁႃၽူႈလႂ်။ၸွမ်းႁႃတူဝ်တၢႆမႃၶႃႈႁိုဝ်း။ၸွမ်းႁႃမတ်ၶႃႈႁိုဝ်း။
၁၅ ႁႂ်ႈထႃႇဝရႃႉၽြႃးၸီႇယၢင်ႇတႅပ်းတတ်းတြႃးၵႄႈဝူင်ႈၵၢင်ၶႃႈၸဝ်ႈတင်းၸဝ်ႈႁဝ်းသေၵမ်းလူၺ်ႈ။ႁႂ်ႈမၼ်းၸဝ်ႈလူတူၺ်းပႂ်ႉတူၺ်းဢမူႉၶႃႈၸဝ်ႈသေလႄႈၵႄႇသႄႇဢဝ်ၶႃႈၸဝ်ႈလွတ်ႈသေၵႃႈၼႂ်းမိုဝ်းၸဝ်ႈႁဝ်းသေၵမ်းလူၺ်ႈ၊ဝႃႈၼင်ႇၼႆဢေႃႈ။
၁၆ တႃႇဝိတ်ႉလဝ်ႈလၢတ်ႈတီႈသေႃးလုၸိူဝ်ႉၼင်ႇၼၼ်ယဝ်ႉတူဝ်ႈယဝ်ႉလႄႈသေႃးလုထၢမ်လႄႈဝႃႈ၊-လုၵ်ႈၸၢႆးၵဝ်တႃႇဝိတ်ႉဢိူၺ်း။ဢၼ်ၼႆႉပဵၼ်သဵင်ၵႂၢမ်းမႂ်းႁိုဝ်၊ဝႃႈၼင်ႇၼႆသေလႄႈသေႃးလုၵိဝ်သဵင်လႄႈႁွင်ႉႁႆႈဢေႃႈ။
၁၇ လၢႆးသမ်ႉမၼ်းလၢတ်ႈတီႈတႃႇဝိတ်ႉလႄႈဝႃႈ၊-မႂ်းယိင်ႈၶႅၼ်းပႂ်ႉၸွမ်းတြႃးၼႃႇသေၵဝ်ဢေႃႈ။ပိၵ်ႉသမ်ႉၵဝ်ယႃႉဢၵျူဝ်းမႂ်းသေၵေႃႈမႂ်းၸိုင်ပွင်ႁဵတ်းဢၵျူဝ်းတီႈၵဝ်ယဝ်ႉ။
၁၈ မႂ်းၼႄပျႃးလွင်ႈဢၼ်မႂ်းႁဵတ်းၵျေးၸူးတီႈၵဝ်ၸိူဝ်ႉၼင်ႇႁိုဝ်ၼၼ်ႉဝၼ်းမိူဝ်ႈၼႆႉယဝ်ႉ။လွင်ႈမၼ်းၸမ်းပိၵ်ႉသမ်ႉထႃႇဝရႃႉၽြႃးဢဝ်ၵဝ်ဢၢပ်ႈပၼ်ၵႃႈၼႂ်းမိုဝ်းမႂ်းသေၵေႃႈမႂ်းယင်းဢမ်ႇဢဝ်ၵဝ်တၢႆလူင်ပေႇ။
၁၉ ပေႃးၵူၼ်းထူပ်းႁၼ်ရၢၼ်ႇသူႇတူဝ်ၸဝ်ႈၵဝ်ႇၸိုင်တၵ်းပွႆႇမၼ်းလွတ်ႈႁိုဝ်။ပိူဝ်ႈဢၼ်ပဵၼ်ၼင်ႇၼႆလႄႈႁႂ်ႈထႃႇဝရႃႉၽြႃးတွပ်ႇတႅၼ်းၵျေးၸူးဢၼ်မႂ်းႁဵတ်းတီႈၵဝ်ဝၼ်းမိူဝ်ႈၼႆႉၼၼ်ႉသေၵမ်းလူၺ်ႈ။
၂၀ မိူဝ်ႈလဵဝ်ၼႆႉၵဝ်ႁူႉလွင်ႈဢၼ်မႂ်းတၵ်းပဵၼ်ၶုၼ်ႁေႃၶမ်းဢမၢၼ်ႇၶၢၼ်ပဵၼ်ဢိၵ်ႇတင်းလွင်ႈဢၼ်သိုင်ႇၸိုင်ႈမိူင်းဢိသရေႇလတၵ်းတႄႇယူႇၵႃႈၼႂ်းမိုဝ်းမႂ်းၼၼ်ႉ။
၂၁ ပိူဝ်ႈဢၼ်ပဵၼ်ၼင်ႇၼႆလႄႈမႂ်းတိူင်ႇထႃႇဝရႃႉၽြႃးလႄႈႁဵတ်းတၢင်းဢၼ်ၵိၼ်ႇဝႃႈဝႆႉတီႈၵဝ်လွင်ႈဢၼ်ဝႃႈ၊မႂ်းတၵ်းဢမ်ႇပႄႇၽဵဝ်ႈပႅတ်ႈၸူဝ်ႈလုၵ်ႈပၢၼ်လၢၼ်ၵဝ်လိုၼ်းၵဝ်ၸိူဝ်းၼၼ်ႉမႂ်းတၵ်းဢမ်ႇယႃႉၽဵဝ်ႈၸိုဝ်သဵင်ၵဝ်ပႅတ်ႈမူတ်းမူတ်းၵဵင်ႈၵဵင်ႈသေၵႃႈၼႂ်းပီႈၼွင်ႉၸိူဝ်ႉၶိူဝ်းပေႃႈၵဝ်ၼၼ်ႉ၊ဝႃႈၼင်ႇၼႆဢေႃႈ။
၂၂ တႃႇဝိတ်ႉၵေႃႈႁဵတ်းတၢင်းဢၼ်ၵိၼ်ႇဝႃႈတီႈသေႃးလုလႄႈသေႃးလုၶိုၼ်းမိူဝ်းၵႂႃႇၵႃႈတီႈႁေႃတီႈယူႇမၼ်းသေဢေႃႈ။တႃႇဝိတ်ႉဢိၵ်ႇတင်းၵူၼ်းမၼ်းၸိူဝ်းၼၼ်ႉၵေႃႈဢွၼ်ၵၼ်ၶိုၼ်ႈၸူးၵႃႈတီႈတပ်ႉၶဝ်ၼၼ်ႉဢေႃႈ။