Chapter
၁၈
သေႃးလုဢမ်ႇၼႃႇလူဝ်ႇၼိူဝ်တႃႇဝိတ်ႉ
၁ ဝႆးသမေၼ်းလဝ်ႈလၢတ်ႈၸိူဝ်ႉၼင်ႇၼၼ်တီႈသေႃးလုယဝ်ႉၼၼ်ႉၸိုင်ႁူဝ်ၸႂ်ယေႃးၼသၼ်ႇလုၵ်ႈၸၢႆးသေႃးလုၼၼ်ႉမီးႁူဝ်ၸႂ်သဵၼ်ႈလဵဝ်လူၺ်ႈၵၼ်တင်းတႃႇဝိတ်ႉယူႇသေလႄႈႁၵ်ႉႁွမ်မၼ်းမိူၼ်ၼင်ႇမၼ်းႁၵ်ႉတူဝ်ၸဝ်ႈၵဝ်ႇဢေႃႈ။
၂ တႄႇၸႃႉဢဝ်ဝၼ်းၼၼ်ႉၵႂႃႇသေႃးလုဢမ်ႇႁႂ်ႈတႃႇဝိတ်ႉၶိုၼ်းမိူဝ်းၶိုၼ်းလႄႈႁႂ်ႈမၼ်းယူႇၵႃႈတီႈၼၼ်ႉဢေႃႈ။
၃ မိူဝ်ႈၼၼ်ႉယေႃးၼသၼ်ႇၸူမ်းပဵင်းတႃႇဝိတ်ႉၼႃႇလႄႈမၼ်းႁဵတ်းပတိၺိၼ်ႇသႅတ်ႈၸႃႇလူၺ်ႈၵၼ်တင်းမၼ်းဢေႃ။
၄ မၼ်းထွတ်ႇဢဝ်သိူဝ်ႈယၢဝ်းဢၼ်မၼ်းၼုင်ႈယူႇၼၼ်ႉသေယဝ်ႉပၼ်တီႈတႃႇဝိတ်ႉၵူၺ်းဢမ်ႇၵႃးပၼ်ပႃးၶိူင်ႈၼုင်ႈတၢင်းမႆႊမၼ်းလၢပ်ႇမၼ်း၊ၵၢင်ႇမၼ်း၊သၢႆႁတ်ႉဢႅဝ်မၼ်း၊ၸိူဝ်းၼၼ်ႉဢေႃႈ။
၅ ၼႂ်းတၢင်းဢၼ်သေႃးလုပွႆႇၸႂ်ႉမၼ်းၵႂႃႇတီႈလႂ်ႁဵတ်းဢီသင်ၵေႃႈတႃႇဝိတ်ႉဢဝ်တင်းသတိပိင်ႇၺႃႇသေလႄႈပွင်ႁဵတ်းယဝ်ႉတူဝ်လီငၢမ်းဢေႃႈ။သေႃးလုၶၢၼ်းမၼ်းဝႆႉၼႂ်းဢရႃႇဢၼ်ဢုပ်ႉၵႃႈၼိူဝ်ၵူၼ်းသိုၵ်းတင်းလၢႆလႄႈမၼ်းမီးသရေႇၼႃႈတႃၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင်ဢိၵ်ႇတင်းၵႃႈတီႈၽၢႆႇၼႃႈၶႃႈၵူၼ်းသေႃးလုၸိူဝ်းၼၼ်ႉဢေႃႈ။
၆ ဝၢႆးသတေႃႇဝိတ်ႉဢဝ်ၵူၼ်းၽိလိတ်ႉတိတၢႆယဝ်ႉလႄႈၵူၼ်းသိုၵ်းတင်းလၢႆဢွၼ်ၵၼ်ၶိုၼ်းမႃးယူႇၼၼ်ႉၸိုင်မေႈယိင်းတင်းလၢႆဢွၵ်ႇသေၵႃႈၼႂ်းဝၢၼ်ႈဝဵင်းဢိသရေႇလတင်းသဵင်ႈတင်းလူင်မႃးလႄႈဢွၼ်ၵၼ်ႁဵတ်းၵႂၢမ်းယူႇၵႃႈဝႅၼ်ယူႇပႃးဢဝ်တင်းၵွင်ၶဵတ်ႇဢိၵ်ႇတင်းၸႂ်ဢၼ်သႂၢင်ႇသိူဝ်းတင်းမဵဝ်းတူႇရီႉယႃႇသေလႄႈႁပ်ႉႁူဝ်တၢင်းၶုၼ်လူင်သေႃးလုလႄႈႁွင်ႉၵႂၢမ်းဝႃႈ၊-
၇ သေႃးလုဢဝ်တၢႆပဵၼ်ႁဵင်ပဵၼ်ႁဵင်လႄႈတႃႇဝိတ်ႉဢဝ်တၢႆပဵၼ်မိုၼ်ႇပဵၼ်မိုၼ်ႇဢေႃႈ၊ဝႃႈၼင်ႇၼႆဢေႃႈ။ၵွပ်ႈပိူဝ်ႈၵႂၢမ်းဢၼ်ဝႃႈသေႃးလုဢဝ်တၢႆပဵၼ်ႁဵင်တႃႇဝိတ်ႉဢဝ်တၢႆပဵၼ်မုၼ်ႇၼၼ်ႉဢမ်ႇထုၵ်ႇၸႂ်မႅၼ်ႈၸႂ်သေႃးလုလႄႈမၼ်းၸႂ်မႆႈၶႆႈၸႃႉၼႃႇလူင်လၢင်ဢေႃႈ။
၈ ဢၼ်မၼ်းလူဝ်ႇလႆႈထႅင်ႈၼၼ်ႉယင်းၵိုတ်းယူႇဢီသင်။ၵိုတ်းဝၢၼ်ႈမိူင်းၵူၺ်းယဝ်ႉ၊ဝႃႈၼႆလႄႈမၼ်းမီးၸႂ်ဢၼ်ဢမ်ၼႃႇလူဝ်ႇၼိူဝ်တႃႇဝိတ်ႉဢေႃႈ။
၉ ၸႃႉၸဵမ်မိူဝ်ႈဝၼ်းၼၼ်ႉၵႂႃႇသေႃးလုပႂ်ႉလွမ်ပႂ်ႉတူၺ်းတႃႇဝိတ်ႉယူႇသေႇသေႇဢေႃႈ။
၁၀ ဝၼ်းမိူဝ်ႈၽုၵ်ႈၼၼ်ႉဝိၺိၺ်ႇဢၼ်ႁဝ်ႉၵႅမ်းၵႃႈတီႈထႃႇဝရႃႉၽြႃးၼၼ်ႉတူၵ်းႁွတ်ႈၵႃႈၼိူဝ်သေႃးလုဢေႃႈ။သေႃးလုႁဵတ်းပရေႃးၽႅတ်ႈယူႇၵႃႈၼႂ်းႁၢင်ႈႁေႃယူႇလႄႈတႃႇဝိတ်ႉၵေႃႈလဵတ်းတိင်ႇမၼ်းယူႇမိူၼ်ၸိူဝ်ႉၼင်ႇဢၼ်မၼ်းႁဵတ်းၵူႈဝၼ်းၼၼ်ႉဢေႃႈ။
၁၁ သေႃးလုဢဝ်မိုဝ်းယိပ်းၵမ်ႁွၵ်ႇမၼ်းသေလႄႈပုင်ႈသႂ်ႇတႃႇဝိတ်ႉဢေႃႈ။မၼ်းဝႃႈ၊-ၵဝ်တၵ်းတႅင်းတႃႇဝိတ်ႉၵူပ်းၸပ်းၽႃ၊ဝႃႈၼင်ႇၼႆသေၵေႃႈတႃႇဝိတ်ႉယၢင်ႇပႅတ်ႈသွင်ပွၵ်ႈဢေႃႈ။
၁၂ ၵွပ်ႈပိူဝ်ႈထႃႇဝရႃႉၽြႃးၽၢတ်ႇယၢၼ်သေၵႃႈတီႈသေႃးလုလႄႈမီးယူႇလူၺ်ႈၵၼ်တင်းတႃႇဝိတ်ႉၼၼ်ႉလႄႈသေႃးလုၵူဝ်ႁႄတႃႇဝိတ်ႉယူႇဢေႃႈ။
၁၃ မၼ်းဢဝ်တႃႇဝိတ်ႉၶၢၼ်းဝႆႉၼႂ်းဢရႃႇဢုပ်ႉၵူၼ်းသိုၵ်းႁဵင်ၼိုင်ႈလႄႈႁႂ်ႈမၼ်းၶၢႆႉဢွၵ်ႇသေၵႃႈတီႈဢထၢမ်ႇၸဝ်ႈၵႂႃႇဢေႃႈ။မၼ်းၵေႃႈဢွၼ်ႁူဝ်ထူဝ်းတၢင်းၵူၼ်းတင်းလၢႆဢေႃႈ။
၁၄ ၼႂ်းတၢင်းဢၼ်မၼ်းႁဵတ်းသၢင်ႈၼၼ်ႉပဵၼ်တၢင်းဢၼ်ယဝ်ႉတူဝ်လီငၢမ်းၵွပ်ႈပိူဝ်ႈထႃႇဝရႃႉၽြႃးမီးယူႇလူၺ်ႈၵၼ်တင်းမၼ်းၼၼ်ႉဢေႃႈ။
၁၅ မိူဝ်ႈဢၼ်သေႃးလုႁၼ်လွင်ႈဢၼ်မၼ်းၶိုၼ်ႈယႂ်ႇမႂ်ႇသုင်ၼၼ်ႉလႄႈယိင်ႈၶႅၼ်းၵူဝ်ႁႄမၼ်းဢေႃႈ။
၁၆ ၵူၼ်းမဵဝ်းဢိသရေႇလဢိၵ်ႇတင်းၵူၼ်းမဵဝ်းယုတတင်းသဵင်ႈတင်းလူင်ဢွၼ်ၵၼ်ႁၵ်ႉတႃႇဝိတ်ႉဢေႃႈ။လွင်ႈမၼ်းၸမ်းမၼ်းဢွၼ်ႁူဝ်ၶဝ်ၼႂ်းလွင်ႈတၢင်းၵူႈၸိူဝ်ႉၵူႈပိူင်ၼၼ်ႉဢေႃႈ။
၁၇ မီးၽဝ်ႇၼိုင်ႈသေႃးလုလၢတ်ႈတီႈတႃႇဝိတ်ႉလႄႈဝႃႈ၊-တူၺ်းလူး။ၵဝ်တၵ်းဢဝ်လုၵ်ႈယိင်းၵဝ်ၵေႃႉယႂ်ႇမေႇရပ်ႉၼၼ်ႉဢၢပ်ႈပၼ်ၵၼ်တင်းမႂ်းဢေႃႈ။ၵူၺ်းၵွမ်ႉမႂ်းႁတ်းႁၢၼ်ပုၼ်ႈၵဝ်လႄႈႁဵတ်းတၢင်းဢၼ်တိုၵ်းသိုၵ်းပုၼ်ႈထႃႇဝရႃႉၽြႃးၵူၺ်းတႃႉ၊ဝႃႈၼင်ႇၼႆဢေႃႈ။လွင်ႈမၼ်းၸမ်းသေႃးလုလၢတ်ႈၵႃႈၼႂ်းၸႂ်မၼ်းဝႃႈ၊-ၵဝ်တၵ်းဢမ်ႇဢဝ်မိုဝ်းၵဝ်ႁဵတ်းတေႃႇမၼ်း။ႁႂ်ႈၵူၼ်းၽိလိတ်ႉတိၶဝ်ၵူၺ်းႁဵတ်းတေႃႇမၼ်းသေၵမ်း၊ဝႃႈၼင်ႇၼႆဢေႃႈ။
၁၈ တႃႇဝိတ်ႉၵေႃႈလဝ်ႈလၢတ်ႈတီႈသေႃးလုလႄႈဝႃႈ၊-ၶႃႈၸဝ်ႈၼႆႉပဵၼ်ၵူၼ်းၸိူဝ်ႉၼင်ႇႁိုဝ်၊ပီႈၼွင်ႉၸိူဝ်ႉၶိူဝ်းပေႃႈၶႃႈၸဝ်ႈၼၼ်ႉပဵၼ်ၵူၼ်းၵႃႈၼႂ်းမဵဝ်းဢိသရေႇလၸိူဝ်ႉၼင်ႇႁိုဝ်လႄႈၶႃႈၸဝ်ႈတၵ်းလႆႈပဵၼ်လုၵ်ႈၶူၺ်ၶုၼ်ႁေႃၶမ်းၶႃႈ၊ဝႃႈၼင်ႇၼႆဢေႃႈ။
၁၉ မိူဝ်ႈဢၼ်ထိုင်ၶိင်ႇဢၼ်တၵ်းလႆႈဢဝ်လုၵ်ႈယိင်းသေႃးလု၊မေႇရပ်ႉ၊ဢၢပ်ႈပၼ်တႃႇဝိတ်ႉၼၼ်ႉၸိုင်မၼ်းဢဝ်ဢၢပ်ႈပၼ်ဢတြေႇလ၊ၵူၼ်းမဵဝ်းမေႇႁေႃႇလသိၼၼ်ႉသေဢေႃႈ။
၂၀ လၢႆးသမ်ႉ၊မိၶႃႇလ၊လုၵ်ႈယိင်းသေႃးလု၊ၼၼ်ႉႁၵ်ႉပႅင်းတႃႇဝိတ်ႉဢေႃႈ။မိူဝ်ႈဢၼ်ၶဝ်လဝ်ႈလၢတ်ႈလွင်ႈတၢင်းၼၼ်ႉတီႈသေႃးလုၼၼ်ႉၸိုင်ပဵၼ်ဢၼ်ထုၵ်ႇၸႂ်ၵျိူၵ်ႈၸႂ်မၼ်းလႄႈသေႃးလုဝႃႈၼႂ်းၸႂ်လႄႈဝႃႈ၊-
၂၁ ၵဝ်တၵ်းဢဝ်မၼ်းဢၢပ်ႈပၼ်တႃႇဝိတ်ႉ၊ႁႂ်ႈမၼ်းလႆႈပဵၼ်တူင်ႇႁဵဝ်ႉတူင်ႇၶိုမ်းတီႈမၼ်းလႄႈႁႂ်ႈမိုဝ်းၵူၼ်းၽိလိတ်ႉတိၶဝ်ႁဵတ်းရၢၼ်ႇသူႇတေႃႇမၼ်းတႃႉ၊ဝႃႈၼင်ႇၼႆဢေႃႈ။ပိူဝ်ႈၼႆလႄႈသေႃးလုလၢတ်ႈတီႈတႃႇဝိတ်ႉလႄႈဝႃႈ၊-ဝၼ်းမိူဝ်ႈၼႆႉမႂ်းမီးဢၶႂၢင်ႉပွၵ်ႈတုတိယတႃႇတလေႆႈပဵၼ်လုၵ်ႈၶူၺ်ၵဝ်ၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၂ သေႃးလုၼၼ်ႉသင်ႇလၢတ်ႈတီႈၵူၼ်းၵႃႈၼႂ်းႁေႃၸဝ်ႈၵမ်ႈၽွင်ႈလႄႈဝႃႈ၊-သူၵႂႃႇတဵတ်ႇတဵတ်ႇလႄႈသွပ်ႉသႅပ်ႉလၢတ်ႈတီႈတႃႇဝိတ်ႉလႄႈဝႃႈ၊-ၶုၼ်ႁေႃၶမ်းႁၵ်ႉပႅင်းမႂ်းဢိူဝ်ႈ။ၶႃႈၶုၼ်ႁေႃၶမ်းတင်းသဵင်ႈတင်းလူင်ၵေႃႈႁၵ်ႉပႅင်းမႂ်းဢိူဝ်ႈ။
၂၃ ၵွပ်ႈၼႆလႄႈမႂ်းထုၵ်ႇလီပဵၼ်လုၵ်ႈၶူၺ်ၶုၼ်ႁေႃၶမ်းဢိူဝ်ႈ၊ဝႃႈၼင်ႇၼႆဢေႃႈ။ၶႃႈသေႃးလုၸိူဝ်းၼၼ်ႉၵေႃႈထွမ်ႇဢဝ်ၵႂၢမ်းၼၼ်ႉသေယဝ်ႉလၢတ်ႈတီႈတႃႇဝိတ်ႉဢေႃႈ။တႃႇဝိတ်ႉၵေႃႈလၢတ်ႈလႄႈဝႃႈ၊-ၵဝ်ၶႃႈၼႆႉပဵၼ်ၵူၼ်းၽၢၼ်လႄႈဢမ်ႇမီးၼႃႈတႃ။သူထၢင်ႇလွင်ႈတၢင်းဢၼ်ႁဵတ်းလုၵ်ႈၶူၺ်ၶုၼ်ႁေႃၶမ်းၼၼ်ႉပဵၼ်လွင်ႈတၢင်းဢၼ်မဝ်မၢင်ႁိုဝ်၊ဝႃႈၼင်ႇၼႆဢေႃႈ။
၂၄ ၶႃႈသေႃးလုၸိူဝ်းၼၼ်ႉၵေႃႈၶိုၼ်းလဝ်ႈလၢတ်ႈတီႈၸဝ်ႈၶဝ်ဢၼ်တႃႇဝိတ်ႉလၢတ်ႈၼၼ်ႉဢေႃႈ။သေႃးလုသင်ႇလၢတ်ႈထႅင်ႈလႄႈဝႃႈ၊-သူလၢတ်ႈတီႈတႃႇဝိတ်ႉလႄႈဝႃႈ၊-
၂၅ ၼွၵ်ႈသေႁိမ်းပၢႆၼင်ၵူၼ်းၽိလိတ်ႉတိပၢၵ်ႇၼိုင်ႈၼၼ်ႉၶုၼ်ႁေႃၶမ်းဢမ်ႇၶႂ်ႈလႆႈလၢၵ်ႈသွင်ႇၵႃႈသင်ပုၼ်ႈလုၵ်ႈယိင်းသၢဝ်ၸဝ်ႈ၊ဝႃႈၼင်ႇၼႆဢေႃႈ။သေႃးလုမီးတၢင်းၵျၢမ်ႇတၢင်းပွင်တၵ်းႁႂ်ႈတႃႇဝိတ်ႉတိုၵ်းၵၼ်တင်းၵူၼ်းၽိလိတ်ႉတိၶဝ်လႄႈသုမ်းၼႂ်းမိုဝ်းၵူၼ်းၽိလိတ်ႉတိၸိူဝ်းၼၼ်ႉဢေႃႈ။
၂၆ မိူဝ်ႈဢၼ်ၶႃႈသေႃးလုၸိူဝ်းၼၼ်ႉဢဝ်ၵႂၢမ်းၼၼ်ႉလၢတ်ႈတီႈတႃႇဝိတ်ႉၼၼ်ႉၸိုင်တႃႇဝိတ်ႉထုၵ်ႇၸႂ်လူၺ်ႈလွင်ႈဢၼ်တၵ်းလႆႈပဵၼ်လုၵ်ႈၶူၺ်ၶုၼ်ႁေႃၶမ်းၼၼ်ႉဢေႃႈ။
၂၇ ပိူဝ်ႈၼႆလႄႈၸူဝ်ႈဢၼ်ၶိင်ႇမိူဝ်ႈဝၼ်းဢၼ်မၵ်းၶႅၼ်ႈဝႆႉၼၼ်ႉဢမ်ႇပႆႇၸေးၼၼ်ႉၸိုင်တႃႇဝိတ်ႉလုၵ်ႉလႄႈပႃးဢဝ်ၵူၼ်းမၼ်းတင်းလၢႆၵႂႃႇသေယဝ်ႉဢဝ်ၵူၼ်းၽိလိတ်ႉတိတၢႆသွင်ပၢၵ်ႇသေယဝ်ႉထိူဝ်ဢဝ်ႁိမ်းပၢႆၼၢင်ၶဝ်မႃးၼပ်ႉဢၢၼ်ႇၸေးၸေးလႄႈသၢၵ်ႈတီႈၶုၼ်ႁေႃၶမ်းႁႂ်ႈလႆႈပဵၼ်လုၵ်ႈၶူၺ်မၼ်းဢေႃႈ။
၂၈ သေႃးလုၵေႃႈဢဝ်လုၵ်ႈယိင်းမၼ်းမိၶႃႇလၼၼ်ႉဢၢပ်ႈပၼ်တီႈမၼ်းဢေႃႈ။သေႃးလုႁူႉႁၼ်လွင်ႈဢၼ်ဝႃႈထႃႇဝရႃႉၽြႃးမီးယူႇလူၺ်ႈၵၼ်တင်းတႃႇဝိတ်ႉၵူၺ်းဢမ်ႇၵႃးလုၵ်ႈယိင်းမၼ်းမိၶႃႇလၵေႃႈႁၵ်ႉပႅင်းမၼ်းၼႃႇလႄႈသေႃးလုမီးၸႂ်ဢၼ်ယိင်ႈၶႅၼ်းၵူဝ်ႁတေႃႇဝိတ်ႉဢေႃႈ။
၂၉ မၼ်းဝႆႉၸႂ်ႁဵတ်းတၢင်းၽိတ်းတီႈတႃႇဝိတ်ႉယူႇတႃႇသေဢေႃႈ။
၃၀ လၢႆးသမ်ႉၶုၼ်ၽိလိတ်ႉတိတင်းလၢႆၶီႇသိုၵ်းမႃးဢေႃႈ။ပွၵ်ႈလႂ်သေဢမ်ႇဝႃႈမိူဝ်ႈဢၼ်ၶဝ်ၶီႇသိုၵ်းမႃးၼၼ်ႉၸိုင်တႃႇဝိတ်ႉယိင်ႈၶႅၼ်းပႄႉၼႅင်ႇလိူဝ်တွၼ်းၼႃႇသေႇၶႃႈသေႃးလုတင်းသဵင်ႈတင်းလူင်ၸိူဝ်းၼၼ်ႉဢေႃႈ။ၸိုဝ်သဵင်မၼ်းၵေႃႈမီးတၢင်းဢၼ်ပိူၼ်ႈရူဝ်ႇသေႇၵူဝ်ယမ်ၼႃႇဢေႃႈ။