Chapter
၁၃
သမူၺ်ႇလသုင်းမႃႉသေႃးလု
၁ သေႃးလုၼၼ်ႉႁဵတ်းၶုၼ်ႁေႃၶမ်းၵူၼ်းမဵဝ်းဢိသရေႇလၶဝ်ပီႊၼိုင်ႈလိူဝ်လိူဝ်သွင်ပီႊယဝ်ႉလႄႈ၊မၼ်းၸင်ႇလိူၵ်ႈၵဵပ်းဢဝ်ၵူၼ်းမဵဝ်းဢိသရေႇလသၢမ်ႁဵင်သေယဝ်ႉဢဝ်သွင်ႁဵင်ဝႆႉၵႃႈတီႈသေႃးလုၵႃႈၼႂ်းဝဵင်းမိၵ်ႉမတ်ႉဢိၵ်ႇတင်းၵႃႈၼိူဝ်လွႆပေႇသလၼၼ်ႉလႄႈဢဝ်ႁဵင်ၼိုင်ႈဝႆႉၵႃႈတီႈယေႃးၼသၼ်ႇၵႃႈၼႂ်းဝဵင်းၵိပႃႇၼႂ်းလိၼ်ပိၼ်ႇယႃႇမိၼ်ႇၼၼ်ႉဢေႃႈ။
၂ မၼ်းပွႆႇၵူၼ်းဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉၶိုၼ်းမိူဝ်းၵႂႃႇၸူးၵႃႈတီႈသုမ်ႉထဵင်ၶဝ်ႁင်းၽႂ်ႁင်းမၼ်းသေဢေႃႈ။
၃ ယေႃးၼသၼ်ႇၼၼ်ႉတိုၵ်းတေႃးယႃႉပႅတ်ႈတပ်ႉၽိလိတ်ႉတိဢၼ်မီးၵႃႈတီႈဝဵင်းၵိပႃႇၼၼ်ႉလႄႈၵူၼ်းၽိလိတ်ႉတိၸိူဝ်းၼၼ်ႉငိၼ်းလွင်ႈမၼ်းတၢင်းမၼ်းၼၼ်ႉဢေႃႈ။သေႃးလုၵေႃႈပဝ်ႇတိုင်ႈၼႄးၶရႃႇၵႃႈၼႂ်းမိူင်းတင်းလၢႆလႄႈႁွင်ႉပၢဝ်ႇလႄႈဝႃႈ၊-ႁႂ်ႈၵူၼ်းႁေႇပႄးတင်းလၢႆႁူႉငိၼ်းတႃႉ၊ဝႃႈၼႆဢေႃႈ။
၄ ၵူၼ်းမဵဝ်းဢိသရေႇလတင်းသဵင်ႈတင်းလူင်လႆႈႁူႉလႆႈငိၼ်းလွင်ႈဢၼ်သေႃးလုတိုၵ်းတေႃးယႃႉပႅတ်ႈတပ်ႉၽိလိတ်ႉတိဢိၵ်ႇတင်းလွင်ႈဢၼ်မဵဝ်းဢိသရေႇလတင်းလၢႆလႆႈပဵၼ်တီႈဢၼ်လီႁင်ႈဢဵတ်ႇသဵတ်ႇတီႈၵူၼ်းမဵဝ်းၽိလိတ်ႉတိၶဝ်ၼၼ်ႉဢေႃႈ။ၵူၼ်းတင်းလၢႆဢွၼ်ၵၼ်ၸူႉၵၼ်တုမ်ၵၼ်တီႈသေႃးလုၵႃႈတီႈဝဵင်းၵိလၵႃႇလၼၼ်ႉဢေႃႈ။
၅ ၵူၼ်းၽိလိတ်ႉတိၸိူဝ်းၼၼ်ႉၵေႃႈၼင်ႇႁိုဝ်တၵ်းတိုၵ်းတေႃးၵၼ်တင်းၵူၼ်းဢိသရေႇလၸိူဝ်းၼၼ်ႉၸိုင်ၶဝ်ႁႂ်ႈလေႃႉရထႃးသၢမ်မိုၼ်ႇ၊မႃႉႁူၵ်းႁဵင်၊ၵူၼ်းသိုၵ်းၼမ်ၼႃႇမိူၼ်ၸိူဝ်ႉၼင်ႇမဵတ်ႉႁိၼ်မဵတ်ႉသၢႆးၼႂ်းၼမ်ႉသမ်ႇမုၵ်ႉတြႃႇၼၼ်ႉၸူႉၵၼ်တုမ်ၵၼ်ၽၢႆႇဝၼ်းဢွၵ်ႇဝဵင်းပိတ်ႉဢႃႇဝိၼ်ဢေႃႈ။
၆ မိူဝ်ႈဢၼ်ၵူၼ်းမဵဝ်းဢိသရေႇလတင်းလၢႆႁူႉႁၼ်လွင်ႈဢၼ်တူဝ်ၸဝ်ႈၵဝ်ႇလႆႈၶၢမ်ႇတုၵ်ႉၶႃႉယၢပ်ႇၼႃႇလူင်လၢင်ဢၼ်ၵိတ်ႇဢၼ်ၵႅၼ်းၼၼ်ႉၸိုင်ၶဝ်ဢွၼ်ၵၼ်တဵတ်ႇမႅပ်းၵႃႈၼႂ်းႁူးထမ်ႈႁူးလွႆယုမ်းမႆႉယုမ်းၶိူဝ်း၊ၵႄႈမၢၵ်ႇႁိၼ်ႇမၢၵ်ႇၽႃၸိၵ်းလွႆပၢႆလွႆႁူးလိၼ်ၶုမ်လိၼ်၊ၸိူဝ်းၼၼ်ႉဢေႃႈ။
၇ ၵူၼ်းႁေႇပႄးၵမ်ႈၽွင်ႈၶၢမ်ႈၼမ်ႉႁွင်ႈယေႃးတၢၼ်ႇလႄႈၵႂႃႇၵႃႈတီႈမိူင်းၵတ်ႉတင်းမိူင်းၵိလတ်ႉပုၼ်ႉဢေႃႈ။သေႃးလုၸမ်းယင်းယူႇၵႃႈတီႈဝဵင်းၵိလၵႃႇလလႄႈၵူၼ်းတင်းလၢႆသၼ်ႇသၼ်ႇသၢႆသၢႆၸွမ်းလင်မၼ်းယူႇဢေႃႈ။
၈ သေႃးလုပႂ်ႉထႃႈယူႇၸဵတ်းဝၼ်းၸွမ်းၵႃႈၼင်ႇဢၼ်သမူၺ်ႇလၶဵၼ်းၶိင်ႇမၼ်းဝႆႉၼၼ်ႉသေၵေႃႈသမူၺ်ႇလဢမ်ႇႁွတ်ႈဢမ်ႇထိုင်မႃးၵႃႈတီႈဝဵင်းၵိလၵႃႇလလႄႈၵူၼ်းတင်းလၢႆဢွၼ်ၵၼ်ၽူင်ႉပၢႆႈယၢႆႈၼီႈသေၵႃႈတီႈမၼ်းဢေႃႈ။
၉ သေႃးလုၵေႃႈလၢတ်ႈလႄႈဝႃႈ၊-ဢဝ်ယိၸ်ႉဢၼ်တုတ်ႇၽႆးဢိၵ်ႇတင်းၶိူင်ႈပုၵ်ႉၸေႃႇမိၵ်ႈသႁႃႇယႃႉတင်းလၢႆမႃးၵႃႈတီႈၵဝ်တႃႉ၊ဝႃႈၼင်ႇၼႆသေယဝ်ႉမၼ်းဢဝ်ယိၸ်ႉဢၼ်တုတ်ႇၽႆးၼၼ်ႉပုၵ်ႉၸေႃႇဢေႃႈ။
၁၀ မိူဝ်ႈဢၼ်မၼ်းပုၵ်ႉၸေႃႇယိၸ်ႉဢၼ်တုတ်ႇၽႆးၼၼ်ႉယဝ်ႉတူဝ်ယဝ်ႉၼၼ်ႉၸိုင်သမူၺ်ႇလႁွတ်ႈထိုင်မႃးဢေႃႈ။သေႃးလုၼၼ်ႉဢွၵ်ႇၵွႃႇႁႂ်ႈလႆႈႁပ်ႉႁူဝ်တၢင်းမၼ်းလႄႈပၼ်တၢင်းလီတီႈမၼ်းဢေႃႈ။
၁၁ သမူၺ်ႇလထၢမ်လႄႈဝႃႈ၊-မႂ်းႁဵတ်းၸိူဝ်ႉၼင်ႇႁိုဝ်ယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်သေႃးလုၶိုၼ်းလၢတ်ႈလႄႈဝႃႈ၊-ၵွပ်ႈပိူဝ်ႈဢၼ်ၵဝ်ၶႃႈလႆႈႁၼ်ၸဝ်ႈႁဝ်းဢမ်ႇႁွတ်ႈဢမ်ႇထိုင်မႃးမိူဝ်ႉဝၼ်းၶိင်ႇဢၼ်ၶဵၼ်းဝႆႉၼၼ်ႉၵူၼ်းတင်းလၢႆၽူင်ႉပၢႆႈယၢႆႈၼီႈသေၵႃႈတီႈၵဝ်ၶႃႈၵႂႃႇဢေႃႈ။ၵူၼ်းၽိလိတ်ႉတိၸိူဝ်းၼၼ်ႉၵေႃႈၸူႉၵၼ်တုမ်ၵၼ်ၵႃႈတီႈဝဵင်းမိၵ်ႉမတ်ႉၼၼ်ႉလႄႈ၊ၵဝ်ၶႃႈဝႃႈ၊-ၵူၼ်းၽိလိတ်ႉတိၸိူဝ်းၼၼ်ႉတၵ်းၶီႇသိုၵ်းလူင်းမႃးၸူးၵႃႈတီႈႁဝ်းၶႃႈတီႈဝဵင်းၵိလၵႃႇလယဝ်ႉ။
၁၂ ၵဝ်ယင်းဢမ်ႇပႆႇလႆႈႁဵတ်းတၢင်းဢၼ်ၵၢဝ်ႇတိူင်ႇလဝ်ႈယွၼ်းၵႃႈတီႈထႃႇဝရႃႉၽြႃးလူင်ပေႇ၊ဝႃႈၼင်ႇၼႆလႄႈၵဝ်ၶႃႈႁဵတ်းမႅၼ်ႈတၢင်းဢၼ်ပုၵ်ႉၸေႃႇယိၸ်ႉဢၼ်တုတ်ႇၽႆးၼၼ်ႉၶႃႈယဝ်ႉ၊ဝႃႈၼင်ႇၼႆဢေႃႈ။
၁၃ သမူၺ်ႇလၵေႃႈလၢတ်ႈတီႈသေႃးလုလႄႈဝႃႈ၊-မႂ်းလႆႈႁဵတ်းတၢင်းဢၼ်မိူၵ်ႈယဝ်ႉ။မႂ်းဢမ်ႇပႂ်ႉပိင်းၺၢပ်ႈတြႃးဢၼ်ထႃႇဝရႃႉၽြႃးၽြႃးပဵၼ်ၸဝ်ႈမႂ်းသင်ႇလၢတ်ႈဝႆႉတီႈမႂ်းၼၼ်ႉလူင်ပေႇ။ဝႃႈတႄႉမၼ်းပေႃးမႂ်းပႂ်ႉၵဝ်ၸိုင်ထႃႇဝရႃႉၽြႃးတၵ်းႁႂ်ႈဢႃႇၼႃႇမႂ်းတႄႇယူႇၵႃႈၼႂ်းမဵဝ်းဢိသရေႇလၸႃႉၸဵမ်ဝၼ်းမိူဝ်ႈၼႆႉၵႂႃႇတႃႇသေႇဢမ်ႇထၢတ်ႇဢိူဝ်ႈ။
၁၄ ၵူၺ်းၵႃႈမိူဝ်ႈလဵဝ်ၼႆႉၸမ်းဢႃႇၼႃႇမႂ်းတၵ်းဢမ်ႇလႆႈတႄႇယဝ်ႉ။ထႃႇဝရႃႉၽြႃးပေႃးလႆႈႁႃဢဝ်ၵေႃႉဢၼ်ထုၵ်ႇမႅၼ်ႈၸႂ်မၼ်းၸဝ်ႈယဝ်ႉလႄႈထႃႇဝရႃႉၽြႃးမီးဢမိင်ႉႁႂ်ႈၵေႃႉၼၼ်ႉလႆႈပဵၼ်ၶုၼ်ၵႃႈၼိူဝ်ၵူၼ်းမဵဝ်းမၼ်းၸဝ်ႈယဝ်ႉ။လွင်ႈမၼ်းၸမ်းၵွပ်ႈပိူဝ်ႈမႂ်းဢမ်ႇၵမ်ဢမ်ႇၵျၢင်ႉၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမႂ်းၼၼ်ႉယဝ်ႉ၊ဝႃႈၼင်ႇၼႆသေယဝ်ႉ၊သမူၺ်ႇလလုၵ်ႉလႄႈဢွၵ်ႇသေၵႃႈတီႈဝဵင်းၵိလၵႃႇလသေယဝ်ႉၵႂႃႇၵႃႈတီႈဝဵင်းၵိပႃႇၼႂ်းလႅၼ်လိၼ်ပိၼ်ႇယႃႇမိၼ်ႇၼၼ်ႉဢေႃႈ။
၁၅ သေႃးလုၼပ်ႉဢၢၼ်ႇၵူၼ်းဢၼ်မီးယူႇၵႃႈတီႈမၼ်းၸိူဝ်းၼၼ်ႉမီးသေၵူၼ်းႁူၵ်းပၢၵ်ႇၵူၺ်းဢေႃႈ။
ၵူၼ်းမဵဝ်းဢိသရေႇလဢမ်ႇမီးလၢၵ်ႈၼၢၵ်ႈ
၁၆ သေႃးလုဢိၵ်ႇတင်းလုၵ်ႈၸၢႆးမၼ်းယေႃးၼသၼ်ႇတင်းၵူၼ်းတင်းလၢႆဢၼ်မီးၵႃႈတီႈၶဝ်ၼၼ်ႉယူႇၵႃႈတီႈဝဵင်းၵိပႃႇၼႂ်းလႅၼ်လိၼ်ပိၼ်ႇယႃႇမိၼ်ႇၼၼ်ႉဢေႃႈ။ၵူၼ်းၽိလိတ်ႉတိၸိူဝ်းၼၼ်ႉၶျႃးတပ်ႉၵႃႈတီႈဝဵင်းမိၵ်ႉမတ်ႉဢေႃႈ။
၁၇ ၶဝ်ၸိူဝ်းဢၼ်တၵ်းႁိမ်ႁူင်ႇဢဝ်ၸိူဝ်းၼၼ်ႉႁဵတ်းသၢမ်တပ်ႉသေလႄႈဢွၵ်ႇသေၵႃႈၼႂ်းတပ်ႉၽိလိတ်ႉတိမႃးသေယဝ်ႉတပ်ႉၼိုင်ႈဝၢႆႇၼႃႈၸွမ်းသဵၼ်ႈတၢင်းဢၼ်ၵႂႃႇၸူးဝဵင်းဢေႃႇၽရမိူင်းသႂႃႇလဢေႃႈ။
၁၈ တပ်ႉၼိုင်ႈဝၢႆႇၼႃႈၸွမ်းသဵၼ်ႈတၢင်းဢၼ်ၵႂႃႇၸူးဝဵင်းပိတ်ႉႁေႃႇရုၼ်ႇဢေႃႈ။တပ်ႉၼိုင်ႈဝၢႆႇၼႃႈၸွမ်းသဵၼ်ႈတၢင်းလႅၼ်လိၼ်မိူင်းဢၼ်ဝၢႆႇၼႃႈတေႃႇၶူင်ႈႁူၺ်ႈၸေႇပုဝ်ႇဢိမ်ႇၽၢႆႇတၢင်းထိူၼ်ႇၼၼ်ႉဢေႃႈ။
၁၉ ၼႂ်းမိူင်းဢိသရေႇလၵူႈတီႈၵူႈလႅၼ်ၼၼ်ႉဢမ်ႇမီးၸၢင်ႊလဵၵ်းသေၵေႃႉသေၵူၼ်းလႄႈၵူၼ်းၽိလိတ်ႉတိတင်းလၢႆဝႃႈၵူၼ်းႁေႇပႄးၶဝ်တၵ်းဢမ်ႇၸၢင်ႊႁဵတ်းႁွၵ်ႇႁဵတ်းလၢပ်ႇဝႃႈၼင်ႇၼႆဢေႃႈ။
၂၀ ၼႂ်းဝႃႈၼၼ်သေၵေႃႈၵူၼ်းဢိသရေႇလၸိူဝ်းၼၼ်ႉလူင်းၵႂႃႇၸူးၵႃႈတီႈၸၢင်ႊလဵၵ်းၵူၼ်းၽိလိတ်ႉတိႁႂ်ႈလႆႈလပ်ႉသိၵ်ႉထိူၼ်ႇ၊သဵမ်၊တႃမၢတ်ႇ၊ၸေႃႉ၊ၶဝ်ဢေႃႈ။
၂၁ ၵႃႈၶၼ်ဢၼ်လႆႈပၼ်ပုၼ်ႉသိၵ်ႈထိူၼ်ႇ၊သဵမ်၊ၶၢၵ်ႈလၢင်းသၢမ်လႅမ်၊ၸမ်းပဵၼ်ငိုၼ်းၶႅပ်းၼိုင်ႈလႄႈပုၼ်ႈတႃမၢတ်ႇ၊လဵၵ်းသဵပ်ႇ၊ဢၼ်လႅမ်ၸိူဝ်းၼၼ်ႉၸမ်းငိုၼ်းသွင်ၶႅပ်းဢေႃႈ။
၂၂ ပိူဝ်ႈဢၼ်ပဵၼ်ၼင်ႇၼႆလႄႈမိူဝ်ႈဢၼ်တိုၵ်းသိုၵ်းၼၼ်ႉၶဝ်ဢမ်ႇမီးလၢပ်ႇမီးႁွၵ်ႇၼႂ်းမိူင်းၶဝ်ၸိူဝ်းဢၼ်မီးယူႇလူၺ်ႈၵၼ်တင်းသေႃးလုတင်းယေႃးၼသၼ်ႇၼၼ်ႉၸိူဝ်းၼၼ်ႉသေၵေႃႉသေၵူၼ်း။ၵူၺ်းၵႃႈတီႈသေႃးလုတင်းလုၵ်ႈၸၢႆးမၼ်းယေႃးၼသၼ်ႇၼၼ်ႉၵူၺ်းမီးလၢပ်ႇမီးႁွၵ်ႇဢေႃႈ။
၂၃ မိူဝ်ႈၼၼ်ႉတပ်ႉၵူၼ်းၽိလိတ်ႉတိဢွၵ်ႇၸူးၵႃႈတီႈသူပ်းသဵၼ်ႈတၢင်းၵႄႈလွႆဢၼ်ၵႂႃႇၸူးဝဵင်းမိၵ်ႉမတ်ႉၼၼ်ႉဢေႃႈ။