Chapter
၂၅
တႃႇဝိတ်ႉၼႃႇပလဢၽိၵေႇလ
၁ လိုၼ်းၼၼ်ႉသမူၺ်ႇလတၢႆလႄႈၵူၼ်းမဵဝ်းဢိသရေႇလတင်းသဵင်ႈတင်းလူင်ၸူႉၵၼ်တုမ်ၵၼ်သေယဝ်ႉႁဵတ်းတၢင်းဢၼ်ႁႆႈႁွင်ႉပွင်ႉၶၢင်းသေလႄႈဢွၼ်ၵၼ်ဢဝ်မၼ်းသၢင်းၵျူဝ်ႇၵႃႈတီႈႁိူၼ်းမၼ်းၵႃႈၼႂ်းဝဵင်းရႃႇမၼၼ်ႉဢေႃႈ။တႃႇဝိတ်ႉၵေႃႈလုၵ်ႉလႄႈလူင်းၵႂႃႇၵႃႈတီႈထိူၼ်ႇပႃႇရၼ်ႇသေဢေႃႈ။
၂ မိူဝ်ႈၶိင်ႇၼၼ်ႉမီးၵူၼ်းၵေႃႉၼိုင်ႈဢၼ်ယူႇၵႃႈတီႈမေႃႇၼၼၼ်ႉမၼ်းမီးၶူဝ်းလဵင်းၼမ်ၼႃႇလူင်လၢင်ၵႃႈတီႈဝဵင်းၵရမေႇလၼၼ်ႉဢေႃႈ။ၵေႃႉၼၼ်ႉပဵၼ်ၵူၼ်းယႂ်ႇၵူၼ်းလူင်လႄႈမီးသူဝ်းသၢမ်ႁဵင်၊ပေႉသၢမ်ႁဵင်ဢေႃႈ။မၼ်းၼၼ်ႉၵႅတ်းႁႆးၶူၼ်သူဝ်းမၼ်းယူႇၵႃႈတီႈဝဵင်းၵရမေႇလၼၼ်ႉဢေႃႈ။
၃ ၸိုဝ်ႈသဵင်ၵေႃႉၼၼ်ႉၸမ်းပဵၼ်ၼႃႇပလ၊ၸိုဝ်ႈသဵင်မေးမၼ်းၸမ်းပဵၼ်ဢၽိၵေႇလဢေႃႈ။မေႈယိင်းၼၼ်ႉၺၢၼ်ႇလီလႄႈႁၢင်ႊၽၢင်ၵေႃႈလီဢေႃႈ။ၵူၼ်းၸၢႆးၼၼ်ႉမီးၸႂ်သၽေႃးဢၼ်ႁၢဝ်ႉၵႅမ်းလႄႈၸၢင်ႊႁဵတ်းလွင်ႈတၢင်းဢၼ်ဢမ်ႇလီဢေႃႈ။မၼ်းပဵၼ်ပီႈၼွင်ႉၸိူဝ်ႉၶိူဝ်းၵႃႇလိပ်ႉဢေႃႈ။
၄ မိူဝ်ႈဢၼ်တႃႇဝိတ်ႉယူႇၵႃႈၼႂ်းထိူၼ်ႇလႄႈငိၼ်းလွင်ႈဢၼ်ၼႃႇပလၵႅတ်းၶူၼ်သူဝ်မၼ်းယူႇၼၼ်ႉၸိုင်မၼ်းသင်ႇလၢတ်ႈတီႈၵူၼ်းဢွၼ်ႇသိပ်းၼိုင်ႈသေလႄႈပွႆႇၸႂ်ႉၶဝ်ၵႂႃႇဝႃႈ၊-
၅ သူၶိုၼ်ႈၵႂႃႇၵႃႈတီႈဝဵင်းၵရမေႇလၸူးၵႃႈတီႈၼႃႇပလလႄႈဢဝ်ၸိုဝ်ႈသဵင်ၵဝ်တၵ်ႉလၢတ်ႈမၼ်းတႃႉ။
၆ ၵႂၢမ်းဢၼ်သူတၵ်းလႆႈလၢတ်ႈတီႈမၼ်းၼၼ်ႉၸမ်း၊-ႁႂ်ႈယူႇလီႇၵိၼ်ဝၢၼ်သေၵမ်းလူၺ်ႈ။ၵဝ်ၶႃႈႁူႉငိၼ်းဝႃႈၶိင်ႇၼႆႉပဵၼ်ၶိင်ႇဢၼ်ၵႅတ်းႁႆးၶူၼ်သူဝ်းၼၼ်ႉဢေႃႈ။
၇ ၵူၼ်းလဵင်ႉထိင်းသူဝ်းၸဝ်ႈႁဝ်းၸိူဝ်းၼၼ်ႉယူႇလူၺ်ႈၵၼ်တင်းႁဝ်းၶႃႈမႃးလႄႈႁဝ်းၶႃႈဢမ်ႇႁဵတ်းၽိတ်းပိူင်ႈတေႃႇၶဝ်သေၸိူဝ်ႉသေမဵဝ်း။ၸူဝ်ႈဢၼ်ၶဝ်ယူႇၵႃႈတီႈဝဵင်းၵရမေႇလၼၼ်ႉၵေႃႈၶူဝ်းလဵင်းၶဝ်ဢမ်ႇႁူင်ႈဢမ်ႇႁၢႆသေၸိူဝ်ႉသေမဵဝ်း။
၈ ထၢမ်တူၺ်းၶဝ်တႃႉ။ၶဝ်တၵ်းမွၵ်ႇလၢတ်ႈယူႇၶႃႈဢေႃႈ။ၵွပ်ႈပိူဝ်ႈၼႆလႄႈႁႂ်ႈၵူၼ်းဢွၼ်ႇၵဝ်ၶႃႈၸိူဝ်းၼႆႉထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈသေၵမ်း။ႁဝ်းၶႃႈႁွတ်ႈထိုင်ၼႂ်းဝၼ်းပွႆးၶႃႈယဝ်ႉ။ၶႅၼ်းတေႃႈဢဝ်ပၼ်တီႈၶႃႈၸဝ်ႈႁဝ်းဢိၵ်ႇတင်းတီႈလုၵ်ႈၸၢႆးၸဝ်ႈႁဝ်းတႃႇဝိတ်ႉၼၼ်ႉသေၵမ်းၶႃႈ၊ဝႃႈၼင်ႇၼႆဢေႃႈ။
၉ မိူဝ်ႈဢၼ်ၵူၼ်းဢွၼ်ႇတႃႇဝိတ်ႉၸိူဝ်းၼၼ်ႉႁွတ်ႈထိုင်ၵႃႈတီႈၼႃႇပလၼၼ်ႉၸိုင်ၶဝ်ဢွၼ်ႇၵၼ်ဢဝ်ၸိုဝ်သဵင်တႃႇဝိတ်ႉသေလႄႈၶိုၼ်းလၢတ်ႈတီႈၼႃႇပလၸွမ်းၵႃႈၼင်ႇၵႂၢမ်းဢၼ်တႃႇဝိတ်ႉသင်ၼၼ်ႉလႄႈယူႇတဵတ်ႇတဵတ်ႇယဵၼ်ယဵၼ်ဢေႃႈ။
၁၀ ၼႃႇပလၵေႃႈၶိုၼ်းလၢတ်ႈတီႈၵူၼ်းဢွၼ်ႇတႃႇဝိတ်ႉၸိူဝ်းၼၼ်ႉလႄႈဝႃႈ၊-တႃႇဝိတ်ႉပဵၼ်ၽူႈလႂ်။လုၵ်ႈၸၢႆးယေႇသေႇပဵၼ်ၽူႈလႂ်။
၁၁ ၶိင်ႇၵႃႇလႃႉမိူဝ်ႈလဵဝ်ၼႆႉၶႃႈဢၼ်လုၵ်ႉၽိုၼ်ႉၸဝ်ႈၼၼ်ႉမီးၼမ်ၼႃႇလူင်ပေႇ။ၵဝ်တၵ်းလႆႈဢဝ်ၶဝ်ႈမုၼ်းၵဝ်၊ၼမ်ႉၵဝ်၊ၼိူဝ်ႉၵဝ်ဢၼ်ၵဝ်ဢဝ်တၢႆပုၼ်ႈၶဝ်ၸိူဝ်းဢၼ်ၵႅတ်းႁႆးၶူၼ်သူဝ်းၵဝ်ၸိူဝ်းၼႆႉသေလႄႈ
၁၂ ပၼ်တီႈၶဝ်ၸိူဝ်းဢၼ်ၵဝ်ဢမ်ႇႁူႉၶဝ်လုၵ်ႉၵႃႈတီႈလႂ်မႃးၼၼ်ႉႁိုဝ်၊ဝႃႈၼင်ႇၼႆဢေႃႈ။ၵူၼ်းဢွၼ်ႇတႃႇဝိတ်ႉၸိူဝ်းၼၼ်ႉၵေႃႈဝၢႆႇၶိုၼ်းမိူဝ်းၵႂႃႇလႄႈဢဝ်ၵႂၢမ်းတင်းသဵင်ႈလူင်ၼၼ်ႉလဝ်ႈလၢတ်ႈတီႈတႃႇဝိတ်ႉဢေႃႈ။
၁၃ တႃႇဝိတ်ႉၵေႃႈလၢတ်ႈတီႈၵူၼ်းမၼ်းတင်းလၢႆလႄႈဝႃႈ၊-သူဢွၼ်ၵၼ်ဢဝ်လၢပ်ႇသူမတ်ႉၵွပ်ႈတီႈဢႅဝ်သူၵူႈၵေႃႉၵူႈၵူၼ်းတႃႉ၊ဝႃႈၼင်ႇၼႆသေလႄႈၶဝ်ဢွၼ်ၵၼ်ဢဝ်လၢပ်ႇၶဝ်မတ်ႉၵွပ်ႈဢႅဝ်ၶဝ်ၵူႈၵေႃႉၵူႈၵူၼ်းလႄႈတႃႇဝိတ်ႉၵေႃႈဢဝ်လၢပ်ႇမၼ်းမတ်ႉၵွပ်ႈဢႅဝ်မၼ်းဢေႃႈ။ၵူၼ်းသီႇပၢၵ်ႇၸွမ်းလင်တႃႇဝိတ်ႉၶိုၼ်ႈၵႂႃႇလႄႈသွင်ပၢၵ်ႇပႂ်ႉၶူဝ်းလဵင်းၶဝ်ယူႇဢေႃႈ။
၁၄ ၵူၼ်းဢွၼ်ၵေႃႉၼိုင်ႈမွၵ်ႇလၢတ်ႈတီႈဢၽိၵေႇလဢၼ်ပဵၼ်မေးၼႃႇပလၼၼ်ႉလႄႈဝႃႈ၊-တူၺ်းလူး။တႃႇဝိတ်ႉပွႆႇၸႂ်ႉၵူၼ်းမၼ်းလုၵ်ႉသေၵႃႈတီႈၼႂ်းထိူၼ်မႃးႁႂ်ႈလႆႈတၵ်ႉလၢတ်ႈၸဝ်ႈႁဝ်းဢေႃႈ။ၵူၺ်းၵႃႈၸဝ်ႈႁဝ်းထႃႉၶဝ်လႃႇၶဝ်ပႅတ်ႈၶႃႈဢေႃႈ။
၁၅ ဝႃႈတႄႉမၼ်းၶဝ်ၼၼ်ႉႁဵတ်းၵျေးၸူးတီႈႁဝ်းၶႃႈၼႃႇလူင်လၢင်ၶႃႈဢေႃႈ။ၸူဝ်ႈဢၼ်ၶႃႈႁဝ်းယူႇၵႃႈတီႈၼႂ်းထိူၼ်ႇသေလႄႈႁဵတ်းၵေႃႉႁဵတ်းသေႈယူႇလူၺ်ႈၵၼ်တင်းၶဝ်ၼၼ်ႉႁဝ်းၶႃႈဢမ်ႇလႆႈၶၢမ်ႇတၢင်းသုမ်းသင်ၶႃႈ။ၶူဝ်းလဵင်းဢမ်ႇႁူင်ႈဢမ်ႇႁၢႆသေၸိူဝ်ႉသေပိူင်ၶႃႈၵူၺ်း။
၁၆ ၸူဝ်ႈဢၼ်ႁဝ်းၶႃႈလဵင်ႉထိင်းသူဝ်းလႄႈႁဵတ်းၵေႃႉႁဵတ်းသေႈယူႇလူၺ်ႈၵၼ်တင်းၶဝ်ၼၼ်ႉၶဝ်ပဵၼ်ၵေႃႉဢၼ်ႁႄႉဢၼ်ၵင်ႈႁဝ်းၶႃႈယူႇၵူႈဝၼ်းၵူႈၶိုၼ်းတႃႇသေႇဢမ်ႇထၢတ်ႇၶႃႈဢေႃႈ။
၁၇ ပိူဝ်ႈဢၼ်ပဵၼ်ၼင်ႇၼႆလႄႈၸဝ်ႈၼၢင်းႁဝ်းလူတူၺ်းၶႆႈၸႂ်လူၺ်ႈလွင်ႈဢၼ်ထုၵ်ႇလီႁဵတ်းၸိူဝ်ႉၼင်ႇႁိုဝ်ၼၼ်ႉသေၵမ်းၶႃႈ။ၽေးဢၼ်ယႂ်ႇၼႃႇတၵ်းတူၵ်းႁွတ်ႈထိုင်တီႈၸဝ်ႈႁဝ်းဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းသဵင်ႈတင်းလူင်ၶႃႈယဝ်ႉ။မၼ်းပဵၼ်ၵူၼ်းဢႃႉထမ်ႇမႃႉလႄႈၽူႈလႂ်ဢမ်ႇလၢတ်ႈသင်ၵႃႈတီႈမၼ်းလႆႈလႃးလႃးၶႃႈ၊မိူဝ်ႈဢၼ်ဝႃႈၼင်ႇၼႆၸိုင်
၁၈ ဢၽိၵေႇလၼၼ်ႉဢဝ်ၶဝ်ႈမုၼ်းသွင်ပၢၵ်ႇလုၵ်ႉ၊တဝ်ႈၼမ်ႉၸပိတ်ႉသွင်လုၵ်ႉ၊သူဝ်းဢၼ်တူမ်ႈႁုင်ယဝ်ႉႁႃႈတူဝ်၊ၶဝ်ႈတႅၵ်ႇႁႃႈဢေႇၽႃႇ၊မၢၵ်ႇၸပိတ်ႉဢၼ်ႁႅင်ႈပၢၵ်ႇပုၵ်ႉ၊ၶႅပ်းမၢၵ်ႇလိူဝ်သၢင်းၽေႃးသွင်ပၢၵ်ႇ၊ၸိူဝ်းၼၼ်ႉၶၼ်ၶၼ်ၽႂ်းၽႂ်းသေလႄႈတၢင်ႇသႂ်ႇၵႃႈၼိူဝ်မႃႉလီႈသေယဝ်ႉလၢတ်ႈတီႈၵူၼ်းဢွၼ်ႇမၼ်းတင်းလၢႆလႄႈဝႃႈ၊-
၁၉ သူဢွၼ်ႁူဝ်ၵဝ်ၵႂႃႇတႃႉ။ၵဝ်တၵ်းၸွမ်းဢေႃႈ၊ဝႃႈၼင်ႇၼႆဢေႃႈ။မၼ်းဢမ်ႇမွၵ်ႇဢမ်ႇလၢတ်ႈၽူဝ်မၼ်းၼႃႇပလၼၼ်ႉလႃးလႃး။
၂၀ ၼႂ်းမိူဝ်ႈဢၼ်မၼ်းယင်းတိုၵ်ႉၶီႇမႃႉလီႈမၼ်းၵႂႃႇလႄႈလူင်းၸွမ်းသဵၼ်ႈတၢင်းတီႈဢၼ်ယင်းလပ်ႉယူႇၵႃႈတီႈလွႆၼၼ်ႉယူႇၼၼ်ႉၸိုင်တႃႇဝိတ်ႉတင်းၵူၼ်းမၼ်းၸိူဝ်းၼၼ်ႉလူင်းသေၵႃႈတီႈလွႆၽၢႆႇၼိုင်ႈမႃးလႄႈမၼ်းႁူပ်ႉထူပ်းၶဝ်ၼၼ်ႉဢေႃႈ။
၂၁ ၸူဝ်ႈဢမ်ႇပႆႇႁူပ်ႉၸိူဝ်ႉၼင်ႇၼၼ်ၼၼ်ႉတႃႇဝိတ်ႉဝႃႈ၊-လွင်ႈတၢင်းဢၼ်ၵဝ်လႆႈပႂ်ႉလႆႈထိင်းၵႃႈဢၼ်မၼ်းပိူင်ႇၼၼ်ႉၵႃႈတီႈၼႂ်းထိူၼ်ႇဢမ်ႇႁႂ်ႈၶူဝ်းလဵင်းမၼ်းလႆႈႁူင်ႈလႆႈႁၢႆသေၸိူဝ်ႉသေပိူင်ၼၼ်ႉပဵၼ်လၢႆလၢႆလွၵ်ႇလွၵ်ႇၵူၺ်းယဝ်ႉ။မၼ်းဢဝ်လွင်ႈတၢင်းဢၼ်ဢမ်ႇလီလႄႈတွပ်ႇတႅၼ်းပုၼ်ႈလွင်ႈတၢင်းဢၼ်လီၼၼ်ႉယဝ်ႉလူင်ႇပေႇ။
၂၂ ဝၼ်းမိူဝ်ႈၽုၵ်ႈၶိင်ႇၵၢင်ၼႂ်မိူဝ်ႈဢၼ်မိူင်းလႅင်းၼၼ်ႉပေႃးၵဝ်ယင်းဝႆႉၵိုတ်းဝႆႉၵျၢၼ်ႇၵူၼ်းၸၢႆးၼႂ်းၶဝ်ၸိူဝ်းဢၼ်ၸၢပ်ႈသႅင်ႇၵၼ်တင်းမၼ်းသေၵေႃႉသေၵူၼ်းၸိုင်ႁႂ်ႈထႃႇဝရႃႉၽြႃးႁဵတ်းၼိူဝ်ၵဝ်လိူဝ်တွၼ်းၼႃႇသေၼၼ်ႉသေၵမ်းလူၺ်ႈ၊ဝႃႈၼင်ႇၼႆဢေႃႈ။
၂၃ ဢၽိၵေႇလၼၼ်ႉႁၼ်တႃႇဝိတ်ႉသေယဝ်ႉလူင်းသေၵႃႈၼိူဝ်မႃႉလီႈမၼ်းၶၼ်ၶၼ်ၽႂ်းၽႂ်းလႄႈၵူမ်ႈႁူဝ်ၵွမ်းႁူဝ်ၵႃႈတီႈၽၢႆႇၼႃႈတႃႇဝိတ်ႉလႄႈၶုပ်ႉမူပ်ႇၵႃႈၼိူဝ်လိၼ်သေယဝ်ႉ၊မူပ်ႇတဵတ်ႇယူႇၵႃႈတီႈတိၼ်မၼ်းယူႇသေလႄႈလၢတ်ႈဝႃႈ၊-
၂၄ ၸဝ်ႈၵဝ်ၶႃႈဢိူၺ်း။ႁႂ်ႈဢပျႅတ်ႈၸိူဝ်းၼၼ်ႉတၢင်ႇသႂ်ႇၵႃႈၼိူဝ်ၵဝ်ၶႃႈသေၵမ်းတႃႉ။ပၼ်ဢၶႂၢင်ႉႁႂ်ႈၶႃႈမေႈယိင်းၸဝ်ႈႁဝ်းလႆႈလဝ်ႈလၢတ်ႈထိုင်ႁူၸဝ်ႈႁဝ်းသေၵမ်းၶႃႈ။
၂၅ ထွမ်ႇဢဝ်ၵႂၢမ်းၶႃႈမေႈယိင်းၸဝ်ႈႁဝ်းၼႆႉသေၵမ်းၶႃႈ။ၶႅၼ်းတေႃႈယႃႇပေၶႆႈၸႂ်လူၺ်ႈလွင်ႈၼႃႇပလၵူၼ်းဢႃႉထမ်ႇမႃႉၼၼ်ႉသေၵမ်းၶႃႈ။ၸိုဝ်ႈသဵင်မၼ်းၼၼ်ႉၵိုင်ႇၵၼ်မႅၼ်ႈၵၼ်တင်းၸႂ်သၽေႃးမၼ်းၶႃႈယဝ်ႉ။ၸိုဝ်သဵင်မၼ်းပဵၼ်ၼႃႉပလလႄႈၸႂ်သၽေႃးမၼ်းၵေႃႈပဵၼ်တၢင်းဢၼ်ယုတ်ႈဢၼ်မိူၵ်ႈယူႇၶႃႈဢေႃႈ။ၵဝ်ၶႃႈဢၼ်ပဵၼ်ၶႃႈမေႈယိင်းၸဝ်ႈႁဝ်းၼႆႉဢမ်ႇလႆႈႁၼ်ၵူၼ်းဢွၼ်ႇဢၼ်ၸဝ်ႈႁဝ်းပွႆႇၸႂ်ႉမႃးၸိူဝ်းၼၼ်ႉၶႃႈ။
၂၆ မိူဝ်ႈလဵဝ်ၼႆႉၸိုင်၊ၸဝ်ႈၵဝ်ၶႃႈဢိူၺ်း။ၵွပ်ႈပိူဝ်ႈထႃႇဝရႃႉၽြႃးႁႄႉၶႅၼ်ၸဝ်ႈႁဝ်းဝႆႉဢမ်ႇႁႂ်ႈၸဝ်ႈႁဝ်းလႆႈႁွတ်ႈထိုင်တၢင်းဢၼ်ထုၵ်ႇဢပျႅတ်ႈလူၺ်ႈလိူတ်ႈဢၼ်ဢဝ်တင်းမိုဝ်းၸဝ်ႈႁဝ်းႁဵတ်းၼၼ်ႉၵႃႈၼင်ႇဢၼ်ဢသၢၵ်ႈထႃႇဝရႃႉၽြႃးလိပ်းယူႇၼၼ်ႉၵႃႈၼင်ႇဢၼ်ဢသၢၵ်ႈၸဝ်ႈႁဝ်းလိပ်းယူႇၼၼ်ႉႁႂ်ႈရၢၼ်ႇသူႇၸဝ်ႈႁဝ်းဢိၵ်ႇတင်းၶဝ်ၸိူဝ်းဢၼ်ၶႂ်ႈယႃႉဢၵျူဝ်းၸဝ်ႈႁဝ်းၸိူဝ်းၼၼ်ႉပဵၼ်ၸိူဝ်ႉၼင်ႇၼႃႇပလၼၼ်ႉသေၵမ်းလူၺ်ႈ။
၂၇ မိူဝ်ႈလဵဝ်ၼႆႉၸိုင်ၶႅၼ်းတေႃႈႁႂ်ႈလႆႈဢဝ်လၢၵ်ႈသွင်ႇဢၼ်ၶႃႈၸဝ်ႈႁဝ်းဢဝ်မႃးၼၼ်ႉပၼ်တီႈၵူၼ်းဢွၼ်ႇဢၼ်ၸွမ်းလင်ၸဝ်ႈႁဝ်းမႃးၸိူဝ်းၼၼ်ႉသေၵမ်းၶႃႈ။
၂၈ ယိူၼ်ႉၶၢမ်ႇၶႃႈၸဝ်ႈသေၵမ်းၶႃႈ။ၵွပ်ႈပိူဝ်ႈဢၼ်ၸဝ်ႈၵဝ်ၶႃႈတိုၵ်းသိုၵ်းယူႇၽၢႆႇထႃႇဝရႃႉၽြႃးလႄႈဢမ်ႇထူပ်းဢမ်ႇႁၼ်တီႈဢၼ်လီတၢင်ႇဢပျႅတ်ႈတီႈၸဝ်ႈႁဝ်းၸူဝ်ႈဢသၢၵ်ႈၼၼ်ႉလႄႈထႃႇဝရႃႉၽြႃးတၵ်းပွင်တႄႇပွင်ႁဵတ်းႁိူၼ်းဢၼ်မၼ်ႈၶိူင်ႇၼႅၼ်ႈၼႃဝႆႉပုၼ်ႈၸဝ်ႈႁဝ်းၶႃႈၶႃႈဢေႃႈ။
၂၉ ပိၵ်ႉသမ်ႉၵူၼ်းၵမ်ႈၽွင်ႈလႄႇႁႃႈႁႂ်ႈလႆႈဢဝ်ဢသၢၵ်ႈၸဝ်ႈႁဝ်းတၢႆသေၵေႃႈဢသၢၵ်ႈၸဝ်ႈႁဝ်းတၵ်းမီးတၢင်းဢၼ်မတ်ႉၶၢတ်ႈၶဵၼ်းၶွတ်ႇဝႆႉၵႃႈၼႂ်းပူၵ်ႉၼႂ်းႁေႃႇဢသၢၵ်ႈၼၼ်ႉလူၺ်ႈၵၼ်တင်းထႃႇဝရႃႉၽြႃးၽြႃးပဵၼ်ၸဝ်ႈႁဝ်းၼၼ်ႉၶႃႈဢေႃႈ။ဢသၢၵ်ႈရၢၼ်ႇသူႇၸဝ်ႈႁဝ်းၸိူဝ်းၼၼ်ႉၸမ်းမၼ်းၸဝ်ႈတၵ်းဢဝ်ပိုတ်ႉပႅတ်ႈမိူၼ်ၸိူဝ်ႉၼင်ႇဢၼ်ပိုတ်ႉပႅတ်ႈသေၵႃႈၼႂ်းၵၢင်ႇၵူင်ၼၼ်ႉဢေႃႈ။
၃၀ မိူဝ်ႈဢၼ်ထႃႇဝရႃႉၽြႃးႁဵတ်းၵျေးၸူးတီႈၸဝ်ႈႁဝ်းၸွမ်းၵႃႈၼင်ႇဢၼ်မၼ်းၸဝ်ႈမီးဢမိင်ႉဝႆႉလူၺ်ႈလွင်ႈၸဝ်ႈၼၼ်ႉလႄႈၶၢၼ်းၸဝ်ႈႁဝ်းဝႆႉႁႂ်ႈပဵၼ်ၵူၼ်းဢၼ်ဢုပ်ႉပိူင်ႇမဵဝ်းဢိသရေႇလၼၼ်ႉၸိုင်ႈလွင်ႈတၢင်းမၼ်းယင်းဢမ်ႇမီးလႄႈၸဝ်ႈႁဝ်းဢမ်ႇလႆႈထွၵ်ႇပႅတ်ႈလိူတ်ႈပိူၼ်ႈဢိၵ်ႇတင်းဢမ်ႇလႆႈမီးတၢင်းဢၼ်တူဝ်ၸဝ်ႈၵဝ်ႇတၵ်းလႆႈတွပ်ႇတႅၼ်းၶိုၼ်းၼၼ်ႉဢေႃႈ။
၃၁ မိူဝ်ႈဢၼ်ထႃႇဝရႃႉၽြႃးႁဵတ်းၵျေးၸူးတီႈၸဝ်ႈႁဝ်းယဝ်ႉတူဝ်ၼၼ်ႉၸိုင်ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၶႃႈၸဝ်ႈသေၵမ်းၶႃႈ၊ဝႃႈၼင်ႇၼႆဢေႃႈ။
၃၂ တႃႇဝိတ်ႉၵေႃႈလၢတ်ႈတီႈဢၽိၵေႇလလႄႈဝႃႈ၊-ႁႂ်ႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလဢၼ်ပွႆႇၸႂ်ႉမႂ်းမႃးႁႂ်ႈလႆႈထူပ်းႁၼ်ၵဝ်ဝၼ်းမိူဝ်ႈၼႆႉၼၼ်ႉမီးမၢင်ႇၵလႃႇသေၵမ်းလူၺ်ႈ။
၃၃ ၺၢၼ်ႇပိင်ႇၺႃႇမႂ်းၼၼ်ႉၵေႃႈႁႂ်ႈမီးမၢင်ႇၵလႃႇသေၵမ်းလူၺ်ႈ။မႂ်းဢၼ်ႁႄႉၶႅၼ်ၵဝ်ဝႆႉႁႂ်ႈၵဝ်ဢမ်ႇလႆႈႁွတ်ႈထိုင်တၢင်းဢၼ်ထုၵ်ႇဢပျႅတ်ႈလူၺ်ႈလိူတ်ႈပိူၼ်ႈဢိၵ်ႇတင်းဢမ်ႇလႆႈဢဝ်မိုဝ်းၵဝ်သေလႄႈၶိုၼ်းတွပ်ႇတႅၼ်းၶိုၼ်းၼၼ်ႉၵေႃႈႁႂ်ႈမီးမၢင်ႇၵလႃႇသေၵမ်းလူၺ်ႈ။
၃၄ ၵႃႈၼင်ႇဢၼ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလဢၼ်ႁႄႉၶႅၼ်ၵဝ်ႁႂ်ႈၵဝ်ဢမ်ႇလႆႈၼိၵ်ႈၸၢၵ်ႈငႅၼ်းသေးမႂ်းၼၼ်ႉဢသၢၵ်ႈလိပ်းယူႇၼၼ်ႉသင်မႂ်းဢမ်ႇႁိပ်ႈၼႅတ်ႈလႄႈမႃးၶၼ်ၶၼ်ၽႂ်းၽႂ်းႁႂ်ႈလႆႈႁူပ်ႉထူပ်းၵဝ်ၸိုင်မိူဝ်ႈၶိင်ႇၵၢင်ၼႂ်မိူဝ်ႈဢၼ်မိူင်းလႅင်းၼၼ်ႉၵဝ်တၵ်းဢမ်ႇဝႆႉၵိုတ်းဝႆႉၵျၢၼ်ႇၵူၼ်းၸၢႆးသေၵေႃႉသေၵူၼ်းတီႈၼႃႇပလၼၼ်ႉဢမၢၼ်ႇၶၢၼ်ပဵၼ်ယဝ်ႉ၊ဝႃႈၼင်ႇၼႆသေလႄႈ
၃၅ တႃႇဝိတ်ႉႁပ်ႉတုင်းဢဝ်လၢၵ်ႈသွင်ႇဢၼ်မၼ်းဢဝ်မႃးၼၼ်ႉလႄႈဝႃႈ၊-မႂ်းၶိုၼ်းမိူဝ်းၵႂႃႇၸူးၵႃႈတီႈႁိူၼ်းမႂ်းၼိမ်ၼိမ်လီလီတႃႉ။တူၺ်းလူး။ၵဝ်ထွမ်ႇဢဝ်ၵႂၢမ်းမႂ်းယဝ်ႉ။ၵဝ်ထွၵ်ႈလူၺ်ႈၼႃႈမႂ်းယဝ်ႉ၊ဝႃႈၼင်ႇၼႆဢေႃႈ။
၃၆ မိူဝ်ႈဢၼ်ဢၽိၵေႇလၶိုၼ်းႁွတ်ႈထိုင်ၵႂႃႇၵႃႈတီႈၼႃႇပလၼၼ်ႉမၼ်းၼၼ်ႉၶၢမ်ႇပွႆးယူႇမိူၼ်ၸိူဝ်ႉၼင်ႇပွႆးၶုၼ်ႁေႃၶမ်းၼၼ်ႉၵႃႈတီႈႁိူၼ်းမၼ်းလႄႈငိၼ်းသႂၢင်ႇငိၼ်းသိူဝ်းယူႇၵႃႈၼႂ်းၸႂ်မၼ်းၵွပ်ႈပိူဝ်ႈဢၼ်မဝ်းလဝ်ႈဝႆႉဢေႃႈ။ပိူဝ်ႈၼႆလႄႈၸူဝ်ႈဢၼ်မိူင်းဢမ်ႇပႆႇလႅင်းၼၼ်ႉမေးမၼ်းဢမ်ႇမွၵ်ႈဢမ်ႇလၢတ်ႈတီႈမၼ်းၵႃႈသင်လႃးလႃး။
၃၇ မိူဝ်ႈဢၼ်မိူင်းလႅင်းလႄႈႁႅင်းၼမ်ႉၸပိတ်ႉသဵင်ႈသေၵႃႈၼႂ်းၼႃႇပလယဝ်ႉၼၼ်ႉၸိုင်မေးမၼ်းမွၵ်ႇလၢတ်ႈလွင်ႈတၢင်းၸိူဝ်းၼၼ်ႉတီႈမၼ်းလႄႈႁူဝ်ၸႂ်မၼ်းလူႉၵႂႃႇလႄႈမၼ်းပဵၼ်ၸိူဝ်ႉၼင်ႇမၢၵ်ႇႁိၼ်ၵႂႃႇဢေႃႈ။
၃၈ ပူၼ်ႉသသေိပ်းဝၼ်းယဝ်ႉထႃႇဝရႃႉၽြႃးပၼ်တၢမ်ႇတီႈၼႃႇပလလႄႈမၼ်းတၢႆသေဢေႃႈ။
၃၉ မိူဝ်ႈဢၼ်တႃႇဝိတ်ႉငိၼ်းလွင်ႈဢၼ်ၼႃႇပလတၢႆယဝ်ႉၼၼ်ႉၸိုင်မၼ်းလၢတ်ႈလႄႈဝႃႈ၊-ႁႂ်ႈထႃႇဝရႃႉၽြႃးဢၼ်ပႂ်ႉဢမူႉတၢင်းဢၼ်သေႉသွမ်းဢၼ်ၵဝ်လႆႈၶၢမ်ႇၼၼ်ႉလႄႈၼုၵ်ႈဢဝ်ၵဝ်ဢွၵ်ႇသေၵႃႈၼႂ်းမိုဝ်းၼႃႇပလလႄႈႁႄႉၶႅၼ်ၶႃႈမၼ်းၸဝ်ႈဢမ်ႇႁႂ်ႈလႆႈႁဵတ်းတူႉၸရိူၵ်ႈၼၼ်ႉမီးမၢင်ႇၵလႃႇသေၵမ်းလူၺ်ႈ။ထႃႇဝရႃႉၽြႃးၼၼ်ႉႁႂ်ႈတူႉၸရိူၵ်ႈဢၼ်ၼႃႇပလႁဵတ်းၼၼ်ႉၶိုၼ်းႁွတ်ႈထိုင်ၵႃႈၼိူဝ်ႁူဝ်မၼ်းယဝ်ႉ၊ဝႃႈၼင်ႇၼႆဢေႃႈ။လၢႆးသမ်ႉတႃႇဝိတ်ႉပွႆႇၸႂ်ႉၵူၼ်းၵႂႃႇႁႂ်ႈလႆႈတွင်ႉထၢမ်ဢၽိၵေႇလႁႂ်ႈလႆႈပဵၼ်မေးမၼ်းဢေႃႈ။
၄၀ မိူဝ်ႈဢၼ်ၶႃႈတႃႇဝိတ်ႉၸိူဝ်းၼၼ်ႉႁွတ်ႈထိုင်ၵႃႈတီႈဢၽိၵေႇလၵႃႈတီႈဝဵင်းၵရမေႇလၼၼ်ႉၸိုင်ၶဝ်လၢတ်ႈတီႈမၼ်းလႄႈဝႃႈ၊-တႃႇဝိတ်ႉပွႆႇၸႂ်ႉႁဝ်းမႃးႁႂ်ႈလႆႈဢဝ်ၸဝ်ႈၼၢင်းႁဝ်းႁူမ်ႈပွင်းပဵၼ်မေးမၼ်းၶႃႈဢေႃႈ၊ဝႃႈၼင်ႇၼႆဢေႃႈ။
၄၁ မၼ်းၵေႃႈလုၵ်ႉလႄႈၶုပ်ႉမူပ်ႇၵႃႈၼိူဝ်လိၼ်ယူႇသေလႄႈဝႃႈ၊-ႁႂ်ႈၶႃႈမေႈယိင်းၸဝ်ႈၼႆႉလႆႈပဵၼ်ၶႃႈဢၼ်သုၵ်ႈတိၼ်ၸဝ်ႈၵဝ်ၶႃႈၼၼ်ႉသေၵမ်းလူၺ်ႈ၊ဝႃႈၼင်ႇၼႆသေယဝ်ႉ
၄၂ ဢၽိၵေႇလႁိပ်ႈၼႅတ်ႈလုၵ်ႉလႄႈပႃးဢဝ်ၶႃႈမေႈယိင်းမၼ်းဢၼ်ၸွမ်းလင်မၼ်းၼၼ်ႉႁႃႈၵေႃႉသေလႄႈၶီႇမႃႉလီႈၸွမ်းလူၺ်ႈၵၼ်တင်းၵူၼ်းၸႂ်ႉၵူၼ်းသွႆတႃႇဝိတ်ႉၸိူဝ်းၵႂႃႇလႄႈပဵၼ်မေးတႃႇဝိတ်ႉဢေႃႈ။
၄၃ ဢၽိၼွင်ႇၵူၼ်းယိင်းဝဵင်းယေႇၸရေႇလၼၼ်ႉၵေႃႈတႃႇဝိတ်ႉသိမ်းဢဝ်လႄႈသွင်ၶႃ၄၄ ၼၼ်ႉပဵၼ်မေးမၼ်းဢေႃႈ။
၄၄ သေႃးလုၼၼ်ႉဢဝ်လုၵ်ႈယိင်းမၼ်းမိၶႃႇလ၊မေးတႃႇဝိတ်ႉ၊ၼၼ်ႉဢၢပ်ႈပၼ်ၽႃႇလတိ၊လုၵ်ႈၸၢႆးလေႇသ၊ဢၼ်ပဵၼ်ၵူၼ်းဝဵင်းၵႃႇလိမ်ႇၼၼ်ႉယဝ်ႉ။