Chapter
၁၄
ယေႃးၼသၼ်ႇတိုၵ်းတေႃးၵူၼ်းမဵဝ်းၽိလိတ်ႉတိ
၁ ဝၼ်းၼိုင်ႈယေႃးၼသၼ်ႇ၊လုၵ်ႈၸၢႆးသေႃးလု၊ၼၼ်ႉယင်းဢမ်ႇယွၼ်းဢၶႂၢင်ႉတီႈပေႃႈမၼ်းလႄႈႁွင်ႉဢဝ်ၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈမၼ်းၼၼ်ႉသေလႄႈလၢတ်ႈဝႃႈ၊-မႃးဢိူၺ်း။ႁဝ်းၶၢမ်ႈၵႂႃႇၸူးၵႃႈတီႈတပ်ႉၽိလိတ်ႉတိဢၼ်မီးယူႇၵႃႈတီႈၽၢႆႇပုၼ်ႉၼၼ်ႉတႃႉႁႃး၊ဝႃႈၼင်ႇၼႆဢေႃႈ။
၂ သေႃးလုယူႇၵႃႈတီႈတီႈသုတ်းလႅၼ်လိၼ်ဝဵင်းၵိပႃႇၵႃႈတႂ်ႈတူၼ်ႈမၢၵ်ႇၸင်ႈဢၼ်မီးၵႃႈၼႂ်းဝၢၼ်ႈမိၵုၼ်ႇၼၼ်ႉလႄႈၶဝ်ၸိူဝ်းဢၼ်မီးလူၺ်ႈၵၼ်တင်းမၼ်းၼၼ်ႉမီးသေၵူၼ်းႁူၵ်းပၢၵ်ႇၵူၺ်းဢေႃႈ။
၃ ၵႃႈၼႂ်းၶဝ်ၼၼ်ႉမီးဢႁိယဢၼ်ပဵၼ်လုၵ်ႈၸၢႆးဢႁိတုပ်ႉဢၼ်ပဵၼ်ပီႈၸၢႆးဢိၶပုတ်ႉဢၼ်ပဵၼ်လုၵ်ႈၸၢႆးၽိၼႁတ်ႉဢၼ်ပဵၼ်လုၵ်ႈၸၢႆးဢေးလိၼၼ်ႉဢေႃႈ။မၼ်းၼုင်ႈသိူဝ်ႈသုပ်းသေလႄႈပဵၼ်ယိတ်ႉပရေႃးႁိၵ်ႈထႃႇဝရႃႉၽြႃးၵႃႈတီႈဝဵင်းသိလေႃႇၼၼ်ႉဢေႃႈ။
၄ ၵူၼ်းတင်းလၢႆဢမ်ႇႁူႉလွင်ႈဢၼ်ဝႃႈယေႃးၼသၼ်ႇဢွၵ်ႇၵႂႃႇယဝ်ႉၼၼ်ႉ။ၵႃႈတီႈဝူင်ႈၵၢင်ၵႄႈလွႆဢၼ်ယေႃးၼသၼ်ႇၶၢမ်ႈၵႂႃႇၸူးၵႃႈတီႈတပ်ႉၽိလိတ်ႉတိၼၼ်ႉၸိူဝ်းၼၼ်ႉမီးၸဵင်ႇလႅမ်မၢၵ်ႇၽႃလူင်ဢၼ်ၼိုင်ႈဢေႃႈ။မၢၵ်ႇၽႃဢၼ်ၼိုင်ႈလႆႈၸိုဝ်ပေႃႇၸိၵ်ႉလႄႈဢၼ်ၼိုင်ႈလႆႈၸိုဝ်ႈသေႇၼေႇဢေႃႈ။
၅ ဢၼ်ၼိုင်ႈတင်ႈၶိုၼ်ႈၸူးၽၢႆႇတၢင်းႁွင်ႇသိုဝ်ႈဝဵင်းမိၵ်ႉမတ်ႉလႄႈဢၼ်ၼိုင်ႈၸမ်းတင်ႈၶိုၼ်ႈၸူးၽၢႆႇတၢင်းၸၢၼ်းသိုဝ်ႈဝဵင်းၵိပႃႇဢေႃႈ။ယေႃးၼသၼ်ႇလၢတ်ႈတီႈၵူၼ်းဢွၼ်ဢၼ်ပႃးလၢၵ်ႈၼၢၵ်ႈမၼ်းၼၼ်ႉလႄႈဝႃႈ၊-မႃးဢိူၺ်း။
၆ ႁဝ်းၶၢမ်ႈၵႂႃႇၸူးၵႃႈတီႈတပ်ႉၵူၼ်းဢၼ်ဢမ်ႇၶၢမ်ႇဢဝ်မၢင်ႇၵလႃႇတၢင်းဢၼ်ထိုဝ်ႁႅမ်ၸိူဝ်းၼၼ်ႉတႃႉႁဝ်း။ထႃႇဝရႃႉၽြႃးၸၢင်ႊၶေးတၵ်းပႂ်ႉဢမူႉႁႃးယူႇဢိူဝ်ႈ။ၵူၼ်းၼမ်ၼမ်ၵေႇၵေႇဢမ်ႇမီးလွင်ႈတၢင်းဢၼ်တၵ်းႁႄႉတၵ်းၶႅၼ်ၼႂ်းတၢင်းဢၼ်ထႃႇဝရႃႉၽြႃးၵႄႇသႄႇၶျွတ်ႈဢဝ်ၼၼ်ႉ၊ဝႃႈၼင်ႇၼႆသေယဝ်ႉ
၇ ၵူၼ်းဢွၼ်ဢၼ်ပႃးလၢၵ်ႈၼၢၵ်ႈမၼ်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊-ႁဵတ်းၸွမ်းၵႃႈၼင်ႇဢၼ်ၸႂ်ၸဝ်ႈႁဝ်းမီးၼၼ်ႉသေၵမ်း။ဝၢႆႇၵႂႃႇၸူးသေၵမ်း။ၵဝ်ၶႃႈတၵ်းၸွမ်းၵႃႈၼင်ႇဢၼ်ဢလူဝ်ႇၸဝ်ႈႁဝ်းမီးၼၼ်ႉဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊
၈ ယေႃးၼသၼ်ႇလၢတ်ႈလႄႈဝႃႈ၊-ႁႃးတၵ်းၶၢမ်ႈၵႂႃႇၸူးၵႃႈတီႈၶဝ်ၼၼ်ႉလႄႈၼႄပျႃးတူဝ်ႁႃးတီႈၶဝ်ဢေႃႈ။ပေႃးၶဝ်လၢတ်ႈတီႈႁႃးလႄႈဝႃႈ၊-ၵိုတ်းသဝ်းယူႇတေႃႇထိုင်ႁွတ်ႈႁဝ်းမႃးၸူးတီႈသူၼၼ်ႉတႃႉ၊
၉ ဝႃႈၼင်ႇၼႆၸိုင်ႁႃးယင်းဢမ်ႇၶိုၼ်ႈၸူးၵႃႈတီႈၶဝ်လႄႈတၵ်းလႆႈၸုၵ်းၶၢမ်ႇယူႇတီႈဢၼ်ႁႃးယူႇၼၼ်ႉဢေႃႈ။
၁၀ ဢမ်ႇၼၼ်ၵေႃႈပေႃးၶဝ်လၢတ်ႈဝႃႈ၊-ၶိုၼ်ႈမႃးၸူးၵႃႈတီႈႁဝ်းတႃႉ၊ဝႃႈၼင်ႇၼႆၸိုင်ႁႃးတၵ်းလႆႈၶိုၼ်ႈၸူးဢေႃႈ။ထႃႇဝရႃႉၽြႃးဢဝ်ၶဝ်ၼၼ်ႉဢၢပ်ႈပၼ်ၵႃႈၼႂ်းမိုဝ်းႁႃးယဝ်ႉ။
၁၁ ဢၼ်ၼႆႉတၵ်းလႆႈပဵၼ်ပုၵ်ႉပႃႉၼီႉမိၵ်ႈတီႈႁႃးဢေႃႈ၊ဝႃႈၼင်ႇၼႆသေယဝ်ႉသွင်ၶႃၼႄပျႃႉတူဝ်သွင်ၶႃတီႈတပ်ႉၵူၼ်းၽိလိတ်ႉတိၸိူဝ်းၼၼ်ႉလႄႈၵူၼ်းၽိလိတ်ႉတိၸိူဝ်းၼၼ်ႉလၢတ်ႈလႄႈဝႃႈ၊-တူၺ်းလူး။
၁၂ ၵူၼ်းႁေႇပႄးၸိူဝ်းၼၼ်ႉဢွၵ်ႇသေၵႃႈတီႈၶုမ်ၼႂ်းႁူးဢၼ်ၶဝ်တဵတ်ႇမႅပ်းယူႇၼၼ်ႉမႃးလူင်ပေႇ၊ဝႃႈၼင်ႇၼႆသေလႄႈ၊ၵူၼ်းတပ်ႉၸိူဝ်းၼၼ်ႉလၢတ်ႈတီႈယေႃးၼသၼ်ႇဢိၵ်တင်းၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈမၼ်းၼၼ်ႉလႄႈဝႃႈ၊-ၶိုၼ်ႈမႃးတႃႉ၊ႁဝ်းတၵ်းႁႂ်ႈသူႁူႉဢိူဝ်ႈ၊မိူဝ်ႈဢၼ်ဝႃႈၼင်ႇၼႆၸိုင်ယေႃးၼသၼ်ႇလၢတ်ႈတီႈၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈမၼ်းၼၼ်ႉလႄႈဝႃႈ၊-ၸွမ်းလင်ၵဝ်ၶိုၼ်ႈတႃႉ။ထႃႇဝရႃႉၽြႃးဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းမဵဝ်းဢိသရေႇလယဝ်ႉ၊ဝႃႈၼင်ႇၼႆသေယဝ်ႉ၊ယေႃးၼသၼ်ႇၵၢၼ်းသီႇတိၼ်လႄႈၶိုၼ်ႈဢေႃႈ။
၁၃ ၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈမၼ်းၼၼ်ႉၵေႃႈၶိုၼ်ႈၸွမ်းဢေႃႈ။ၵူၼ်းၽိလိတ်ႉတိၶဝ်လူမ်ႉတူၵ်းၵႃႈတီႈၽၢႆႇၼႃႈယေႃးၼသၼ်ႇလႄႈၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈမၼ်းၼၼ်ႉၵေႃႈဢဝ်တၢႆပႅတ်ႈၶဝ်ၸိူဝ်းဢၼ်မီးၽၢႆႇလင်ၼၼ်ႉဢေႃႈ။
၁၄ ယေႃးၼသၼ်ႇတင်းၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈမၼ်းၶႃႈၽၼ်းဢဝ်တၢႆၵူၼ်းသၢဝ်းၵေႃႉပွၵ်ႈၵမ်းပထမၼၼ်ႉၵႃႈတီႈတူင်ႈၼႃးဢၼ်ယႂ်ႇၵႂၢင်ႈၼွၵ်းၼိုင်ႈၼၼ်ႉဢေႃႈ။
ဢိသရေႇလပႄႉၽိလိတ်ႉတိ
၁၅ ၵႃႈၼႂ်းတပ်ႉဢၼ်မီးၵႃႈတီႈပၢင်ႇပဵင်းဢိၵ်ႇတင်းၵႃႈၼႂ်းၵူၼ်းတင်းသဵင်ႈတင်းလူင်ၼၼ်ႉမီးတၢင်းဢၼ်သၼ်ႇဝႆလႄႈၵူၼ်းတပ်ႉၸိူဝ်းၼၼ်ႉဢိၵ်ႇတင်းၵူၼ်းဢၼ်ႁိမ်ႁူင်ႇၸိူဝ်းၼၼ်ႉၵေႃႈသၼ်ႇဝႆလႄႈလိၼ်မိူင်းၵေႃႈတူင်ႉၼိုင်ထၼ်ႈပေႃးမီးတၢင်းဢၼ်သၼ်ႇဝႆဢၼ်ယႂ်ႇၼႃႇလူင်လၢင်ဢေႃႈ။
၁၆ ပဵၼ်ၽြႃးပဵၼ်ၸဝ်ႈပွႆႇမႃးဢေႃႈ။ၵူၼ်းပႂ်ႉၵၢင်ၵႃႈတီႈဝဵင်းၵိပႃႇၼႂ်းလႅၼ်လိၼ်ပိၼ်ႇယႃႇမိၼ်ႇၸိူဝ်းၼၼ်ႉမုင်တူၺ်းလႄႈလႆႈႁၼ်မုၵ်ႉၵူၼ်းၽိလိတ်ႉတိၸိူဝ်းၼၼ်ႉသုတ်ႈယွမ်းၵႂႃႇၽူင်ႉယၢႆၵႂႃႇၵူႈတီႈၵူႈလႅၼ်ဢေႃႈ။
၁၇ မိူဝ်ႈၼၼ်ႉသေႃးလုလၢတ်ႈတီႈၶဝ်ၸိူဝ်းဢၼ်မီးယူႇတီႈမၼ်းၼၼ်ႉလႄႈဝႃႈ၊-ၼပ်ႉဢၢၼ်ႇၵူၼ်းတင်းလၢႆႁႂ်ႈလႆႈႁူႉၽူႈလႂ်ၵေႃႉလႂ်ဢွၵ်ႇသေၵႃႈတီႈႁဝ်းၵႂႃႇ၊ဝႃႈၼင်ႇၼႆလႄႈၶဝ်ဢွၼ်ၵၼ်ၼပ်ႉဢၢၼ်ႇလႄႈလႆႈႁူႉဝႃႈယေႃးၼသၼ်ႇတင်းၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈမၼ်းၼၼ်ႉဢမ်ႇမီးၵႃႈတီႈၼၼ်ႉ။
၁၈ သေႃးလုလၢတ်ႈတီႈဢႁိယလႄႈဝႃႈ၊-ဢဝ်တိူၵ်ႈပတိၺိၼ်ႇၽြႃးပဵၼ်ၸဝ်ႈမႃးၵႃႈတီႈၼႆႉသေၵမ်း၊ဝႃႈၼင်ႇၼႆဢေႃႈ။လွင်ႈမၼ်းၸမ်းၼႂ်းၶိင်ႇမိူဝ်ႈၼၼ်ႉတိူၵ်ႈပတိၺိၼ်ႇၽြႃးပဵၼ်ၸဝ်ႈမီးယူႇတီႈၵူၼ်းမဵဝ်းဢိသရေႇလၶဝ်ဢေႃႈ။
၁၉ ၼႂ်းမိူဝ်ႈဢၼ်သေႃးလုယင်းတိုၵ်ႉလၢတ်ႈၵႂၢမ်းတေႃႇၵၼ်တင်းယိတ်ႉပရေႃးႁိၵ်ႈယူႇၼၼ်ႉၸိုင်သဵင်ဢၼ်ႁူၼ်ႈဢၼ်မေႃးၵႃႈၼႂ်းတပ်ႉၽိလိတ်ႉတိၼၼ်ႉယိင်ႈၶႅၼ်းယႂ်ႇမႃးလႄႈသေႃးလုလၢတ်ႈတီႈယိတ်ႉပရေႃးႁိၵ်ႈလႄႈဝႃႈ၊-
၂၀ ယိုတ်းဢဝ်မိုဝ်းမႂ်းၶိုၼ်းတႃႉ၊ဝႃႈၼင်ႇၼႆသေယဝ်ႉ၊သေႃးလုဢိၵ်ႇတင်းၵူၼ်းၵႃႈဢၼ်မီးတီႈမၼ်းၸိူဝ်းၼၼ်ႉၸူႉၵၼ်တုမ်ၵၼ်သေလႄႈၶီႇသိုၵ်းၸူးၵူၼ်းမဵဝ်းၽိလိတ်ႉတိၶဝ်ဢေႃႈ။ၶဝ်လႆႈႁၼ်ၵူၼ်းသိုၵ်းၽိလိတ်ႉတိၶဝ်ၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ်ဢဝ်လၢပ်ႇဢဝ်လႅဝ်းၽၼ်းၵၼ်ယူႇသေလႄႈမီးတၢင်းဢၼ်တပ်ႉလူႉတပ်ႉတႅၵ်ႇဢၼ်ယႂ်ႇၼႃႇလူင်လၢင်ဢေႃႈ။
၂၁ ၵူၼ်းႁေႇပႄးဢၼ်ၶဝ်ယူႇၽၢႆႇၵူၼ်းၽိလိတ်ႉတိၶဝ်မိူဝ်ႈဢွၼ်တၢင်းၼၼ်ႉၵေႃႈဢွၼ်ၵၼ်ၶၢႆႉပုတ်ႉမႃးၽၢႆႇသေႃးလုတင်းယေႃးၼသၼ်ႇလႄႈၶဝ်ၶိုၼ်ႈၸူးၵႃႈတီႈတပ်ႉဢေႃႈ။
၂၂ မိူဝ်ႈဢၼ်ၵူၼ်းမဵဝ်းဢိသရေႇလဢၼ်ပၢႆႈတဵတ်ႇပၢႆႈမႅပ်းယူႇၵႃႈၼိူဝ်လွႆဢေးၽရိမ်ႇၸိူဝ်းၼၼ်ႉလႆႈငိၼ်းလွင်ႈဢၼ်ၵူၼ်းၽိလိတ်ႉတိၶဝ်ဢွၵ်ႇပၢႆႈၼၼ်ႉၸိုင်ၶဝ်ၶီႇသိုၵ်းလႄႈလိုပ်ႈၸွမ်းလမ်းၸွမ်းၼႃႇလူင်လၢင်ဢေႃႈ။
၂၃ ၼင်ႇၼၼ်လႄႈထႃႇဝရႃႉၽြႃးၵႄႇသႄႇၶျွတ်ႈဢဝ်မဵဝ်းဢိသရေႇလၼႂ်းဝၼ်းၼၼ်ႉလႄႈဢမူႉသိုၵ်းၼၼ်ႉၸွတ်ႇၵႂႃႇတေႃႇထိုင်ဝဵင်းပိတ်ႉဢႃႇဝိၼ်ႇဢေႃႈ။
ယေႃးၼသၼ်ႇၵိၼ်ၼမ်ႉၽိုင်ႈ
၂၄ ၼႂ်းဝၼ်းၼၼ်ႉၵူၼ်းမဵဝ်းဢိသရေႇလတင်းလၢႆမီးတၢင်းဢၼ်ယၢပ်ႇၸႂ်ၶၢၼ်ၸႂ်ၼႃႇဢေႃႈ။လွင်ႈမၼ်းၸမ်းသေႃးလုပၼ်တၢင်းဢၼ်ၵိၼ်ႇဢၼ်ဝႃႈတီႈၵူၼ်းတင်းလၢႆလႄႈဝႃႈ၊-ၸူဝ်ႈဢၼ်ၵဝ်ဢမ်ႇပႆႇလႆႈၶိုၼ်းတွပ်ႇသူၺ်ႈရၢၼ်ႇသူႇၵဝ်ၸိူဝ်းၼၼ်ႉၽူႈလႂ်သေၵေႃႉသေၵူၼ်းတၵ်းဢမ်ႇလႆႈၵိၼ်တၢင်းၵိၼ်တၢင်းၶူပ်းၸူဝ်ႈဢၼ်ဢမ်ႇပႆႇႁွတ်ႈထိုင်ၶိင်ႇႁူဝ်ၶမ်ႈ။ၵေႃႉဢၼ်ၵိၼ်ၼၼ်ႉတၵ်းလႆႈၶၢမ်ႇတၢင်းဢၼ်ၵိၼ်ႇဝႃႈဢေႃႈ၊ဝႃႈၼင်ႇၼႆၼၼ်ႉဢေႃႈ။ၼင်ႇၼၼ်လႄႈၽူႈလႂ်သေၵေႃႉသေၵူၼ်းဢမ်ႇၵိၼ်တၢင်းၵိၼ်တၢင်းၶူပ်း။
၂၅ ၵူၼ်းၸိူဝ်းၼၼ်ႉမိူဝ်ႈဢၼ်ႁွတ်ႈထိုင်ၵႃႈၼႂ်းပႃႇမႆႉၼၼ်ႉၸိုင်ၵႃႈၼႂ်းၼၼ်ႉမီးၼမ်ႉၽိုင်ႈၵႃႈၼိူဝ်လိၼ်ၼမ်ၼႃႇဢေႃႈ။
၂၆ မိူဝ်ႈဢၼ်ၶဝ်ၶဝ်ႈၵႃႈၼႂ်းပႃႇမႆႉပႃႇတွၵ်ႇၼၼ်ႉၸိုင်ပိၵ်ႉသမ်ႉၼမ်ႉၽိုင်ႈယွတ်ႇတူၵ်းယူႇၸိၵ်းၸိၵ်းသေၵေႃႈၵွပ်ႈပိူဝ်ႈၵူၼ်းတင်းလၢႆၵူဝ်ႁႄတၢင်းဢၼ်ၵိၼ်ႇဝႃႈၼၼ်ႉလႄႈၽူႈလႂ်ဢမ်ႇဢဝ်မိုဝ်းသႂ်ႇၵႃႈတီႈသူပ်းမၼ်းသေၵေႃႉသေၵူၼ်း။
၂၇ ၵူၺ်းၵႃႈယေႃးၼသၼ်ႇၸမ်းၵွပ်ႈပိူဝ်ႈဢၼ်ဢမ်ႇလႆႈငိၼ်းလွင်ႈဢၼ်ပေႃႈမၼ်းႁဵတ်းတၢင်းဢၼ်ၵိၼ်ႇဝႃႈတီႈၵူၼ်းတင်းလၢႆၼၼ်ႉလႄႈမၼ်းဢဝ်ပၢႆၵၼ်းႁွၵ်ႇဢၼ်မၼ်းယိပ်းၵမ်ၼၼ်ႉၸုမ်ႇၵႃႈၼႂ်းႁူဝ်ၼမ်ႉႁူင်းၽိုင်ႈလႄႈဢဝ်မိုဝ်းသႂ်ႇသူပ်းဢေႃႈ။
၂၈ မၢၵ်ႇတႃမၼ်းၵေႃႈၸိုၼ်ႈလီလႅင်းလီမႃးဢေႃႈ။မိူဝ်ႈၼၼ်ႉၵူၼ်းၵေႃႉၼိုင်ႈလဝ်ႈလၢတ်ႈလႄႈဝႃႈ၊-ၸဝ်ႈပေႃႈၸဝ်ႈႁဝ်းပၼ်တၢင်းဢၼ်ၵိၼ်ႇဝႃႈၼႃႇလူင်လၢင်တီႈၵူၼ်းတင်းလၢႆဝႃႈ၊-ႁႂ်ႈၵေႃႉဢၼ်ၵိၼ်တၢင်းၵိၼ်ဝၼ်းမိူဝ်ႈၼႆႉၼၼ်ႉထုၵ်ႇတၢင်းဢၼ်ၵိၼ်ႇဢၼ်ဝႃႈသေၵမ်းလူၺ်ႈ၊ဝႃႈၼင်ႇၼႆၶႃႈဢေႃႈ။ၵွပ်ႈၼႆလႄႈၵူၼ်းတင်းလၢႆႁႅင်းဢူၼ်ႈယူႇဢေႃႈ၊ဝႃႈၼႆဢေႃႈ။
၂၉ ယေႃးၼသၼ်ႇၵေႃႈလၢတ်ႈလႄႈဝႃႈ၊-ၸဝ်ႈၵဝ်ပၼ်တၢင်းဢၼ်ယၢပ်ႇၶၢၼ်ၸႂ်တီႈဝၢၼ်ႈမိူင်းယဝ်ႉ။တူၺ်းလွင်ႈဢၼ်မၢၵ်ႇတႃၵဝ်ၸိုၼ်ႈလီလႅင်းလီမႃးၵွပ်ႈပိူဝ်ႈၵဝ်ၵိၼ်ၼမ်ႉၽိုင်ႈၼႆႉဢိတ်းဢွၼ်ႇၼိုင်ႈၵူၺ်းၼၼ်ႉတႃႉ။
၃၀ သင်ဝႃႈၵူၼ်းတင်းလၢႆလႆႈၵိၼ်တၢင်းၵိၼ်တၢင်းၶူပ်းဢၼ်လႆႈတီႈရၢၼ်ႇသူႇမႃးၸွမ်းၵႃႈၼင်ႇဢၼ်ၶဝ်ၶႂ်ႈၵိၼ်ၼၼ်ႉဝၼ်းမိူဝ်ႈၼႆႉၸိုင်ယိင်ႈၶႅၼ်းတၵ်းလီတွၼ်းၼႃႇလူင်လၢင်ဢေႃႈ။ၶဝ်ယိင်ႈၶ်ၼ်းတၵ်းယႂ်ႇၼႃႇလူင်လၢင်ဢေႃႈ၊ဝႃႈၼင်ႇၼႆဢေႃႈ။
၃၁ ဝၼ်းၼၼ်ႉၶဝ်တိုၵ်းတေႃးယႃႉပႅတ်ႈၵူၼ်းၽိလိတ်ႉတိၸိူဝ်းၼၼ်ႉဢဝ်ၵႃႈတီႈဝဵင်းမိၵ်ႉမတ်ႉတေႃႇထိုင်ႁွတ်ႈဝဵင်းဢႃႇၸလုၼ်ႇလႄႈမီးတၢင်းဢၼ်ႁိူၼ်ႈၼူၼ်းၼႃႇဢေႃႈ။
၃၂ ၶဝ်ဢွၼ်ၵၼ်ႁိမ်ႁူင်ႇဢဝ်ၶူဝ်းလဵင်းရၢၼ်ႇသူႇၶဝ်ဢၼ်ပဵၼ်သူဝ်း၊ဝူဝ်း၊ဝူဝ်းဢွၼ်ႇ၊တင်းလၢႆသေယဝ်ႉဢဝ်တၢႆၵႃႈၼိူဝ်လိၼ်လႄႈၶဝ်ၵိၼ်ၼိူဝ်ႉမၼ်းဢိၵ်ႇလူၺ်ႈၵၼ်တင်းလိူတ်ႈမၼ်းဢေႃႈ။
၃၃ ပိူၼ်ႈဢွၼ်ၵၼ်လဝ်ႈလၢတ်ႈတီႈသေႃးလုလႄႈဝႃႈ၊-ၵူၼ်းတင်းလၢႆဢွၼ်ၵၼ်ၵိၼ်ၼိူဝ်ႉဢိၵ်ႇတင်းလိူတ်ႈလႄႈၽိတ်းပိူင်ႈထႃႇဝရႃႉၽြႃးယဝ်ႉ၊ဝႃႈၼင်ႇၼႆဢေႃႈ။မၼ်းၵေႃႈလၢတ်ႈလႄႈဝႃႈ၊-သူႁဵတ်းႁႂ်ႈသႅတ်ႉၸႃႇလူႉယဝ်ႉ။ဢွၼ်ၵၼ်ၵိင်ႈဢဝ်မၢၵ်ႇႁိၼ်ဢၼ်ယႂ်ႇၼႃႇၼၼ်ႉမႃးၵႃႈတီႈၵဝ်ဝၼ်းမိူဝ်ႈၼႆႉတႃႉ။
၃၄ ဢွၼ်ၵၼ်ၵႂႃႇၼႂ်းၵူၼ်းတင်းလၢႆၵေႃႉႁူးၵေႃႉတၢင်းလႄႈမွၵ်ႇလၢတ်ႈၶဝ်ႁႂ်ႈၶဝ်ႁင်းၽႂ်ႁင်းမၼ်းဢဝ်သူဝ်း၊ဝူဝ်း၊မၼ်းမႃးၵႃႈတီႈၼႆႉသေလႄႈဢဝ်တၢႆလႄႈၵိၼ်ၵႃႈတီႈၼႆႉတႃႉ။ယႃႇပေၵိၼ်ၼိူဝ်ႉဢၼ်ယင်းမီးလိူတ်ႈၼၼ်ႉလႄႈၽိတ်းပိူင်ႈထႃႇဝရႃႉၽြႃး၊ဝႃႈၼင်ႇၼႆဢေႃႈ။ၵူၼ်းတင်းသဵင်ႈတင်းလူင်ၵေႃႈဢဝ်သူဝ်းဝူဝ်းၶဝ်မႃးမိူဝ်ႈၶမ်ႈၼၼ်ႉႁင်းၽႂ်ႁင်းမၼ်းလႄႈဢဝ်တၢႆၵႃႈတီႈၼၼ်ႉဢေႃႈ။
၃၅ သေႃးလုၵေႃႈတႄႇႁဵတ်းယိၸ်ႉပလၢင်ႇပုၼ်ႈထႃႇဝရႃႉၽြႃးဢေႃႈ။ဢၼ်ၼၼ်ႉၸမ်းပဵၼ်ယိၸ်ႉဢွၼ်တၢင်းသုတ်းဢၼ်မၼ်းတႄႇႁဵတ်းပုၼ်ႈထႃႇဝရႃႉၽြႃးဢေႃႈ။
၃၆ လၢႆးသမ်ႉသေႃးလုလၢတ်ႈလႄႈဝႃႈ၊-ႁဝ်းဢွၼ်ၵၼ်လူင်းၵႂႃႇလိုပ်ႈလမ်းၸွမ်းၵူၼ်းၽိလိတ်ႉတိတင်းလၢႆၶိင်ႇၵၢင်ၶိုၼ်းလႄႈယႃႉၶဝ်ပႅတ်ႈယႃႇႁႂ်ႈလႆႈၵိုတ်းလႆႈၵျၢၼ်ႇသေၵေႃႉသေၵူၼ်း၊ဝႃႈၼင်ႇၼႆသေယဝ်ႉၶဝ်ၵေႃႈႁပ်ႉတုင်းဢဝ်လႄႈဝႃႈ၊-ႁဵတ်းၸွမ်းၵႃႈၼင်ႇဢၼ်ၸႂ်ၸဝ်ႈႁဝ်းမီးၼၼ်ႉသေၵမ်းၶႃႈ၊မိူဝ်ႈဢၼ်ဝႃႈၼင်ႇၼႆၸိုင်ယိတ်ႉပရေႃးႁိၵ်ႈလၢတ်ႈလႄႈဝႃႈ၊-သုတ်ႉၸပ်းသုတ်ႉၸူးၵႃႈတီႈၽြႃးပဵၼ်ၸဝ်ႈၵႃႈတီႈၼႆႉတႃႉႁဝ်း၊ဝႃႈၼင်ႇၼႆဢေႃႈ။
၃၇ သေႃးလုၵေႃႈတွင်ႉထၢမ်တီႈၽြႃးပဵၼ်ၸဝ်ႈလႄႈဝႃႈ၊-ၶႃႈၸဝ်ႈတၵ်းလႆႈလူင်းလႄႈလိုပ်ႈၸွမ်းၵူၼ်းၽိလိတ်ႉတိတင်းလၢႆတီႈၶႃႈႁိုဝ်။ၸဝ်ႈႁဝ်းတၵ်းဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းမဵဝ်းဢိသရေႇလတီႈၶႃႈႁိုဝ်၊ဝႃႈၼင်ႇၼႆသေၵေႃႈမၼ်းၸဝ်ႈဢမ်ႇၶိုၼ်းတွပ်ႇၶိုၼ်းလၢတ်ႈၼႂ်းဝၼ်းၼၼ်ႉ။သေႃးလုၵေႃႈလၢတ်ႈလႄႈဝႃႈ၊-ၵူၼ်းဢၼ်ပဵၼ်ၵူၼ်းဢွၼ်ႁူဝ်ၵႃႈၼႂ်းၵူၼ်းတင်းလၢႆၶဝ်ဢိူၺ်း။
၃၈ ဢွၼ်ၵၼ်သုတ်ႉၸပ်းသုတ်ႉၸူးၵႃႈတီႈၼႆႉႁႂ်ႈလႆႈႁူႉႁၼ်လွင်ႈဢၼ်လႆႈၽိတ်းပိူင်ႈဢပျႅတ်ႈၼႂ်းဝၼ်းမိူဝ်ႈၼႆႉၸိူဝ်ႉႁိုဝ်၊ၼၼ်ႉတႃႉ။
၃၉ ၵႃႈၼင်ႇဢၼ်ထႃႇဝရႃႉၽြႃးဢၼ်ၵႄႇသႄႇၶျွတ်ႈဢဝ်မဵဝ်းဢိသရေႇလၼၼ်ႉဢသၢၵ်ႈလိပ်းယူႇၼၼ်ႉပဵၵ်ႉသမ်ႉဝႃႈပဵၼ်ၵွပ်ႈပိူဝ်ႈလုၵ်းၸၢႆးၵဝ်ယေႃးၼသၼ်ႇသေၵေႃႈမၼ်းတၵ်းလႆႈတၢႆဢမၢၼ်ႇၶၢၼ်ပဵၼ်ဢေႃႈ၊ဝႃႈၼင်ႇၼႆဢေႃႈ။
၄၀ ၵူၼ်းတင်းလၢႆၼၼ်ႉၽူႈလႂ်ဢမ်ႇၶိုၼ်းလဝ်ႈၶိုၼ်းလၢတ်ႈသေၵေႃႉသေၵူၼ်း။မၼ်းၵေႃႈလၢတ်ႈတီႈၵူၼ်းမဵဝ်းဢိသရေႇလတင်းသဵင်ႈတင်းလူင်လႄႈဝႃႈ၊-သူဢွၼ်ၵၼ်ယူႇၽၢႆႇၼိုင်ႈတႃႉ။ၵဝ်တင်းလုၵ်ႈၸၢႆးၵဝ်ယေႃးၼသၼ်ႇတၵ်းယူႇၽၢႆႇၼိုင်ႈဢေႃႈ၊ဝႃႈၼင်ႇၼႆသေယဝ်ႉၵူၼ်းတင်းလၢႆလဝ်ႈလၢတ်ႈတီႈသေႃးလုလႄႈဝႃႈ၊-ႁဵတ်းၵႃႈၼင်ႇဢၼ်ၸႂ်ၸဝ်ႈႁဝ်းမီးၼၼ်ႉသေၵမ်းၶႃႈ၊မိူဝ်ႈဢၼ်ဝႃႈၼင်ႇၼႆၸိုင်
၄၁ သေႃးလုသူးတွင်းတီႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလၼၼ်ႉလႄႈဝႃႈ၊-ၶႅၼ်းတေႃႈၸီႇယၢင်ႇသိုဝ်ႈသိုဝ်ႈတေႃႇတေႃႇသေၵမ်းတီႈၶႃႈ၊ဝႃႈၼင်ႇၼႆဢေႃႈ။မၼ်းၸဝ်ႈမၢတ်ႈမၢႆသေႃးလုတင်းယေႃးၼသၼ်ႇလႄႈၵူၼ်းတင်းလၢႆလွတ်ႈဢေႃႈ။
၄၂ သေႃးလုၵေႃႈလၢတ်ႈလႄႈဝႃႈ၊-တူၵ်းၸႃႇၵွၵ်ႈပုၼ်ႈၵဝ်တင်းလုၵ်ႈၸၢႆးၵဝ်ယေႃးၼသၼ်ႇသေၵမ်း၊ဝႃႈၼင်ႇၼႆဢေႃႈ။မၼ်းၸဝ်ႈမၢတ်ႈမၢႆယေႃးၼသၼ်ႇဢေႃႈ။
၄၃ သေႃးလုၵေႃႈလၢတ်ႈတီႈယေႃးၼသၼ်ႇလႄႈဝႃႈ၊-မွၵ်ႇလၢတ်ႈလွင်ႈတၢင်းဢၼ်မႂ်းႁဵတ်းၼၼ်ႉသေၵမ်း၊မိူဝ်ႈဢၼ်ဝႃႈၼင်ႇၼႆၸိုင်ယေႃးၼသၼ်ႇမွၵ်ႇလၢတ်ႈတီႈမၼ်းလႄႈဝႃႈ၊-ၵဝ်ၶႃႈလႆႈဢဝ်တင်းပၢႆၵၼ်းႁွၵ်ႇဢၼ်ၵဝ်ၶႃႈယိပ်းၵမ်ၼၼ်ႉႉၸုမ်ႇဢဝ်ၼမ်ႉၽိုင်ႈဢိတ်းဢွၼ်ႇၼိုင်ႈလႄႈၸိမ်းတူၺ်းမႅၼ်ႈၶႃႈယဝ်ႉ။ဢလူဝ်ႉ၊ၵဝ်ၶႃႈတၵ်းလႆႈတၢႆယဝ်ႉလူင်ပေႇ၊ဝႃႈၼင်ႇၼႆဢေႃႈ။
၄၄ သေႃးလုၵေႃႈၶိုၼ်းလၢတ်ႈလႄႈဝႃႈ၊-ယေႃးၼသၼ်ႇဢိူၺ်း။ပေႃးမႂ်းယင်းဢမ်ႇတၢႆၵေႃႈႁႂ်ႈၽြႃးပဵၼ်ၸဝ်ႈႁဵတ်းတီႈမႂ်းၼၵ်းၼၵ်းၼႃၼႃသေၵမ်းလူၺ်ႈ၊ဝႃႈၼင်ႇၼႆဢေႃႈ။
၄၅ ၵူၼ်းတင်းလၢႆဢွၼ်ၵၼ်လဝ်ႈလၢတ်ႈတီႈသေႃးလုလႄႈဝႃႈ၊-ယေႃးၼသၼ်ႇၼႆႉပဵၼ်ၵေႃႉဢၼ်ႁဵတ်းၵျေးၸူးၵႄႇသႄႇၶျွတ်ႈဢဝ်ၵူၼ်းမဵဝ်းဢိသရေႇလၶႃႈဢေႃႈ။မၼ်းတၵ်းလႆႈတၢႆၶႃႈႁိုဝ်။မၼ်းတၵ်းဢမ်ႇလႆႈတၢႆ။ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉၶူၼ်ႁူဝ်မၼ်းသဵၼ်ႈထိုင်ႈၵေႃႈတၵ်းဢမ်ႇလႆႈတူၵ်းၵႃႈၼိူဝ်လိၼ်။မၼ်းႁဵတ်းလွင်ႈတၢင်းၼၼ်ႉဝၼ်းမိူဝ်ႈၼႆႉၵွပ်ႈပိူဝ်ႈၽြႃးပဵၼ်ၸဝ်ႈၸွႆႈထဵမ်မၼ်းၵူၺ်းဢေႃႈ၊ဝႃႈၼင်ႇၼႆသေယဝ်ႉၵူၼ်းတင်းလၢႆၵႄႇသႄႇၼုၵ်ႈဢဝ်ယေႃးၼသၼ်ႇႁႂ်ႈဢသၢၵ်ႈမၼ်းလႆႈၵတ်းယဵၼ်ၶျၢမ်းသႃႇဢေႃႈ။
၄၆ လိုၼ်းၼၼ်ႉသေႃးလုလုၵ်ႉသေၵႃႈတီႈဢၼ်လိုပ်ႈၸွမ်းၵူၼ်းၽိလိတ်ႉတိၸိူဝ်းၼၼ်ႉၶိုုၼ်းၶိုၼ်ႈမိူဝ်းၵႂႃႇသေဢေႃႈ။ၵူၼ်းၽိလိတ်ႉတိၸိူဝ်းၼၼ်ႉၵေႃႈၶိုၼ်းမိူဝ်းၵႂႃႇၸူးၵႃႈတီႈဢၼ်ၶဝ်ယူႇၶဝ်သဝ်းၼၼ်ႉသေဢေႃႈ။
၄၇ ၼင်ႇၼၼ်လႄႈသေႃးလုလႆႈမီးဢႃႇၼႃႇဢၼ်ဢုပ်ႉပိူင်ႇၵႃႈၼိူဝ်မဵဝ်းဢိသရေႇလသေယဝ်ႉတိုၵ်းတေႃးရၢၼ်ႇသူႇမၼ်းၵႃႈဢၼ်လဵပ်ႈႁွပ်ႈမၼ်းယူႇၵူႈၽၢႆႇၵူႈပႃႈဢၼ်ဝႃႈၵူၼ်းမိူင်းမေႃႇၽ၊ၵူၼ်းမဵဝ်းဢမ်ႇမုၼ်ႇၵူၼ်းမိူင်းဢေႇတုင်ႇ၊ၶုၼ်ႁေႃၶမ်းၸေႃႇၽ၊ၵူၼ်းၽိလိတ်ႉတိတင်းလၢႆၸိူဝ်းၼၼ်ႉဢေႃႈ။ၵႃႈဢၼ်မၼ်းၶီႇသိုၵ်းၵႂႃႇၼၼ်ႉမၼ်းပေႉၼႅင်ႇဢေႃႈ။
၄၈ မၼ်းႁဵတ်းႁတ်းႁတ်းႁၢၼ်ႁၢၼ်ၼႃႇလူင်လၢင်လႄႈတိုၵ်းတေႃးယႃႉပႅတ်ႈၵူၼ်းမဵဝ်းဢႃႇမလိၵ်ႉတင်းလၢႆသေလႄႈၵႄႇသႄႇၵူၼ်းမဵဝ်းဢိသရေႇလလွတ်ႈသေၵႃႈၼႂ်းမိုဝ်းၶဝ်ၸိူဝ်းဢၼ်ႁိမ်ႁူင်ႈၸိူဝ်းၼၼ်ႉဢေႃႈ။
ၵူၼ်းႁိူၼ်းၵူၼ်းယေးသေႃးလု
၄၉ လုၵ်ႈၸၢႆးသေႃးလုၸမ်းပဵၼ်ယေႃးၼသၼ်ႇ၊ဢိထီႉ၊မေႇလၶီႉသႂႃႉ၊ဢေႃႈ။ၸိုဝ်သဵင်လုၵ်ႈယိင်းမၼ်းသွင်ၵေႃႉၸမ်းၵေႃႉယႂ်ႇပဵၼ်မေႇရပ်ႉ၊ၵေႃႉလဵၵ်ႉပဵၼ်မိၶႃႇလဢေႃႈ။ၸိုဝ်ႈသဵင်ႈမေးသေႃးလုၸမ်းပဵၼ်ဢႁိၼွင်ႇလုၵ်ႈယိင်းဢႁိမတ်ႉဢေႃႈ။
၅၀ ၸိုဝ်ႈသဵင်ၶုၼ်ပူဝ်ႇၶျုၵ်ႈမၼ်းၸမ်းပဵၼ်ဢႃႇပၼႃႇ၊လုၵ်ႈၸၢႆးၼေႇရဢၼ်ပဵၼ်ပေႃႈၼႃႉသေႃးလုၼၼ်ႉဢေႃႈ။
၅၁ ၵိသဢၼ်ပဵၼ်ပေႃႈသေႃးလုဢိၵ်ႇတင်းၼေႇရဢၼ်ပဵၼ်ပေႃႈဢႃႇပၼႃႇၼၼ်ႉပဵၼ်လုၵ်ႈၸၢႆးဢပျေႇလဢေႃႈ။
၅၂ ၸူဝ်ႈပၢၼ်သေႃးလုၼၼ်ႉလႆႈတိုၵ်းၵူၼ်းၽိလိတ်ႉတိတင်းလၢႆၼႃႇလူင်လၢင်ဢေႃႈ။မိူဝ်ႈလႂ်သေဢမ်ႇဝႃႈမိူဝ်ႈဢၼ်သေႃးလုထူပ်းႁၼ်ၵေႃႉဢၼ်ႁႅင်းယႂ်ႇ၊ၵေႃႉဢၼ်ႁတ်းႁၢၼ်ၼၼ်ႉၸိုင်မၼ်းယၢမ်ႈႁွင်ႉဢဝ်ႁႂ်ႈၶဝ်ႈပႃးၼႂ်းၸုမ်းသိုၵ်းမၼ်းဢေႃႈ။