Chapter
၄
ၵူၼ်းမဵဝ်းၽိလိတ်ႉတိသိမ်းဢဝ်တိူၵ်ႈပတိၺိၼ်ႇၸဝ်ႈ
၁ လၢႆးသၢမ်ႉၵူၼ်းမဵဝ်းဢိသရေႇလတင်းလၢႆဢွၼ်ၵၼ်ၶီႇသိုၵ်းၵႂႃႇႁႂ်ႈလႆႈတိုၵ်းၵူၼ်းၽိလိတ်ႉတိတင်းလၢႆဢေႃႈ။ၶဝ်ၶျႃးတပ်ႉၵႃႈတီႈႁိမ်းဝဵင်းဢေႇပၼေႇၸႃႇသေယဝ်ႉၵူၼ်းၽိလိတ်ႉတိၸိူဝ်းၼၼ်ႉၶျႃးတပ်ႉၵႃႈတီႈဝဵင်းဢႃႇၽိၵ်ႉဢေႃႈ။
၂ ၵူၼ်းၽိလိတ်ႉတိၸိူဝ်းၼၼ်ႉၶၢင်းတပ်ႉသေလႄႈတိုၵ်းၵၼ်တင်းမဵဝ်းဢိသရေႇလဢေႃႈ။မဵဝ်းဢိသရလတေတူၵ်းသုမ်းၵႃႇတီႈၽၢႆႇၼႃႈၵူၼ်းမဵဝ်းၽိလိတ်ႉတိၸိူဝ်းၼၼ်ႉလႄႈၶဝ်ဢဝ်ႁူဝ်ႁၢၼ်ၵူၼ်းသိုၵ်းဢၼ်မီးၵႃႈၼႂ်းပၢင်ႇပဵင်းၼၼ်ႉတၢႆသီႇႁဵင်ဢေႃႈ။
၃ မိူဝ်ႈဢၼ်ၵူၼ်းတင်းလၢႆႁွတ်ႈထိုင်ၵႃႈၼႂ်းတပ်ႉၼၼ်ႉၸိုင်ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းမဵဝ်းဢိသရေႇလၸိူဝ်းၼၼ်ႉလၢတ်ႈၵၼ်လႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈထႃႇဝရႃႉၽြႃးႁႂ်ႈႁဝ်းတူၵ်းသုမ်းၵႃႈတီႈၽၢႆႇၼႃႈၵူၼ်းၽိလိတ်ႉတိၸိူဝ်းၼၼ်ႉဝၼ်းမိူဝ်ႈၼႆႉ။ဢွၼ်ၵၼ်ၵႂႃႇဢဝ်တိူၵ်ႈပတိၺိၼ်ႇထႃႇဝရႃႉၽြႃးဢွၵ်ႇသေၵႃႈတီႈဝဵင်းသိလေႃႇမႃးတီႈႁဝ်းႁႂ်ႈလႆႈႁွတ်ႈထိုင်ၵႃႈၼႂ်းႁဝ်းလႄႈၵႄႇသေႇၶျွတ်ႈဢဝ်ႁဝ်းသေၵႃႈၼႂ်းမိုဝ်းရၢၼ်ႇသူႇႁဝ်းသေၵမ်း၊ဝႃႈၼင်ႇၼႆလႄႈ၊
၄ ၵူၼ်းတင်းလၢႆၵေႃႈပွႆႇၸႂ်ႉၵူၼ်းၵႂႃႇၵႃႈတီႈဝဵင်းသိလေႃႇသေယဝ်ႉဢွၼ်ၵၼ်ဢဝ်တိူၵ်ႈပတိၺိၼ်ႇၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးဢၼ်ယူႇၵႃႈၼႂ်းၵႄႈဝူင်ႈၵၢင်ၶေႇရူႉၽိမ်ႇၼၼ်ႉမႃးလႄႈႁေႃႇၽၼိတင်းၽိၼႁတ်ႉဢၼ်ပဵၼ်လုၵ်ႈၸၢႆးဢေးလိသွင်ၵေႃႉၼၼ်ႉပႃးလူၺ်ႈၵၼ်တင်းတိူၵ်ႈပတိၺိၼ်ႇၸဝ်ႈမႃးဢေႃႈ။
၅ မိူဝ်ႈဢၼ်တိူၵ်ႈပတိၺိၼ်ႇထႃႇဝရႃႉၽြႃးႁွတ်ႈထိုင်ၵႃႈၼႂ်းတပ်ႉၼၼ်ႉၸိုင်ၵူၼ်းမဵဝ်းဢိသရေႇလၵႃႈမီးၸိူဝ်းၼၼ်ႉဢွၼ်ၵၼ်ႁွင်ႉပၢဝ်ႇတေႃႇထိုင်ႁွတ်ႈထၼ်ႈပေႃးလိၼ်မိူင်းသၼ်ႇဝႆဢေႃႈ။
၆ ၵူၼ်းၽိလိတ်ႉတိၸိူဝ်းၼၼ်ႉမိူဝ်ႈငိၼ်းသဵင်ဢၼ်ဢၼ်ႁုၼ်ႉမေႃးၼၼ်ႉၸိုင်ၶဝ်ထၢမ်ၵၼ်လႄႈဝႃႈ၊-သဵင်ဢၼ်ႁုၼ်ႉမေႃးလႄႈလင်ႊၼႃႇလူင်လၢင်ၵႃႈတီႈတပ်ႉႁႄႇပေးၼၼ်ႉပဵၼ်လွင်ႈတၢင်းၸိူဝ်ႉၼင်ႇႁိုဝ်၊ဝႃႈၼင်ႇၼႆသေလႄႈလႆႈႁူႉလွင်ႈဢၼ်ဝႃႈတိူၵ်ႈပတိၺိၼ်ႇထႃႇဝရႃႉၽြႃးႁွတ်ႈထိုင်ၵႂႃႇၵႃႈၼႂ်းတပ်ႉၼၼ်ႉဢေႃႈ။
၇ ၵူၼ်းၽိလိတ်ႉတိၸိူဝ်းၼၼ်ႉၵူဝ်ႁႄလႄႈလၢတ်ႈဝႃႈ၊-ၽြႃးပဵၼ်ၸဝ်ႈႁွတ်ႈထိုင်ၵႃႈၼႂ်းတပ်ႉၶဝ်ၼၼ်ႉယဝ်ႉလူင်ပေႇ။ႁဝ်းမီးဢႃႉမၢင်ႇၵလႃႇယဝ်ႉ။ဢမ်ႇတွၼ်ႉပဵၼ်ၸိူဝ်ႉၼင်ႇၼႆသေပွၵ်ႈ။
၈ ၽူႈလႂ်တၵ်းၵႄႇသႄႇဢဝ်ႁဝ်းလွတ်ႈသေၵႃႈၼႂ်းမိုဝ်းၽြႃးဢၼ်တၼ်းၶူဝ်းယႂ်ႇၼႃႇၸိူဝ်ႉၼႆၼၼ်ႉ။ၽြႃးၸိူဝ်ႉၼႆၸမ်းပဵၼ်ၽြႃးဢၼ်ဢဝ်တင်းၽေးၵူႈၸိူဝ်ႉၵူႈပိူင်ပၼ်တၢမ်ႇတီႈၵူၼ်းဢေႇၵႅပ်ႉတုၸိူဝ်းၼၼ်ႉၵႃႈၼႂ်းထိူၼ်ႇၼၼ်ႉဢေႃႈ။
၉ ၵူၼ်းၽိလိတ်ႉတိၶဝ်ဢိူၺ်း။ဢွၼ်ၵၼ်ဢဝ်ႁႅင်းတႃႉ။ႁႂ်ႈပဵၼ်ၵူၼ်းၸၢႆးတႃႉ။ယႃႇႁႂ်ႈသူလႆႈၶၢမ်ႇႁဵတ်းၶႃႈတီႈၵူၼ်းႁေႇပေးၸိူဝ်းၼၼ်ႉမိူၼ်ၸိူဝ်ႉၼင်ႇၶဝ်လႆႈၶၢမ်ႇႁဵတ်းၶႃႈတီႈသူၼၼ်ႉ။ဢွၼ်ၵၼ်ပဵၼ်ၵူၼ်းၸၢႆးလႄႈတိုၵ်းတႃႉ၊ဝႃႈၼင်ႇၼႆဢေႃႈ။
၁၀ ၵူၼ်းၽိလိတ်ႉတိၸိူဝ်းၼၼ်ႉတိုၵ်းသိုၵ်းလႄႈမဵဝ်းဢိသရေႇလသမ်ႉၶိုၼ်းတူၵ်းသုမ်းသေလႄႈဢွၵ်ႇပၢႆႈၸူးၵႃႈတီႈသုမ်ႉထဵင်မူဝ်းၶဝ်ႁင်းၽႂ်ႁင်းမၼ်းသေဢေႃႈ။တၢင်းဢၼ်ၶႃႈၽၼ်းဢဝ်တၢႆၼၼ်ႉယႂ်ႇလူင်လၢင်လႄႈႁူဝ်ႁၢၼ်ၵူၼ်းသိုၵ်းပႆတိၼ်မဵဝ်းဢိသရေႇလၶဝ်လူမ်ႉတၢႆသၢမ်မိုၼ်ႇဢေႃႈ။
၁၁ တိူၵ်ႈပတိၺိၼ်ႇၽြႃးပဵၼ်ၸဝ်ႈၼၼ်ႉၵေႃႈလႆႈၶၢမ်ႇတၢင်းဢၼ်ပိူၼ်ႈသိမ်းဢဝ်ၵႂႃႇလႄႈႁေႃႇၽၼိတင်းၽိၼႁတ်ႉဢၼ်ပဵၼ်လုၵ်ႈၸၢႆးဢေးလိသွင်ၵေႃႉၼၼ်ႉၵေႃႈသုမ်းဢသၢၵ်ႈသေဢေႃႈ။
တၢင်းတၢႆဢေးလိ
၁၂ ၵူၼ်းမဵဝ်းပိၼ်ႇယႃႇမိၼ်ႇၵေႃႉၼိုင်ႈလုၵ်ႉသေၵႃႈတီႈဢၼ်တိုၵ်းသိုၵ်းၼၼ်ႉလႅၼ်ႈပၢႆႈမႃးလႄႈသိၵ်ႇၶူဝ်းၼုင်ႈတူဝ်ၸဝ်ႈၵဝ်ႇယူႇ၊ဢဝ်မုၼ်ႈလိၼ်တၢင်ႇသႂ်ႇၵႃႈၼိူဝ်ႁူဝ်တူဝ်ၸဝ်ႈၵဝ်ႇယူႇသေလႄႈႁွတ်ႈထိုင်ၵႃႈတီႈဝဵင်းသိလေႃႇၼႂ်းဝၼ်းၼၼ်ႉၵမ်းလဵဝ်ဢေႃႈ။
၁၃ မိူဝ်ႈဢၼ်ၵေႃႉၼၼ်ႉႁွတ်ႈထိုင်မႃးၼၼ်ႉၸိုင်ဢေးလိၼင်ႈယူႇၵႃႈၼိူဝ်ၶူင်ႇၵႃႈတီႈႁိမ်းသဵၼ်ႈတၢင်းလႄႈႁူဝ်ၸႂ်မၼ်းသၼ်ႇဝႆယူႇၵွပ်ႈပိူဝ်ႈတိူၵ်ႈပတိၺိၼ်ႇၽြႃးပဵၼ်ၸဝ်ႈၼၼ်ႉလႄႈမၼ်းပႂ်ႉယူႇဢေႃႈ။ၵေႃႉၼၼ်ႉႁွတ်ႈထိုင်ၵႃႈၼႂ်းဝဵင်းလႄႈမွၵ်ႇလၢတ်ႈလွင်ႈမၼ်းတၢင်းမၼ်းသေယဝ်ႉဝဵင်းတင်းဝဵင်းဢွၼ်ၵၼ်ႁွင်ႉသႅၼ်ႇဢေႃႈ။
၁၄ ဢေးလိငိၼ်းသဵင်ဢၼ်ႁွင်ႉသႅၼ်ႇၼၼ်ႉလႄႈထၢမ်ဝႃႈ၊-သဵင်ဢၼ်ဢူၼ်ဢဵၼ်မေႃးမေးၼႆႉၸမ်းပဵၼ်ၸိူဝ်ႉၼင်ႇႁိုဝ်၊ဝႃႈၼင်ႇၼႆဢေႃႈ။ၵေႃႉၼၼ်ႉႁိပ်ႇၼႅတ်ႈလႄႈလဝ်ႈလၢတ်ႈတီႈဢေးလိဢေႃႈ။မိူဝ်ႈၼၼ်ႉဢေးလိလႆႈဢသၢၵ်ႈၵဝ်ႈသိပ်းပၢႆပႅတ်ႇပီႊယဝ်ႉလႄႈသၢႆတႃမွင်ၵႂႃႇတေႃႇထိုင်ႁွတ်ႈထၼ်ႈပေႃးဢမ်ႇႁၼ်လႆႈယဝ်ႉ။
၁၅ ၵေႃႉၼၼ်ႉလဝ်ႈလၢတ်ႈတီႈဢေးလိလႄႈဝႃႈ၊-ၵဝ်ၶႃႈပဵၼ်ၵေႃႉဢၼ်လုၵ်ႉသေၵႃႈတီႈဢၼ်တိုၵ်းသိုၵ်းၼၼ်ႉႁွတ်ႈမႃးၶႃႈဢေႃႈ။ၵဝ်ၶႃႈပၢႆႈဢွၵ်ႇသေၵႃႈၼႂ်းတီႈဢၼ်တိုၵ်းသိုၵ်းၼၼ်ႉဝၼ်းမိူဝ်ႈၼႆႉလႄႈမႃးၶႃႈဢေႃႈ၊ဝႃႈၼင်ႇၼႆဢေႃႈ။
၁၆ မၼ်းထၢမ်လႄႈဝႃႈ၊-လုၵ်ႈၸၢႆးၵဝ်ဢိူၺ်း။ဢမူႉၼႆႉၸမ်းပဵၼ်ၸိူဝ်ႉၼင်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ၵေႃႉဢၼ်မႃးမွၵ်ႇလၢတ်ႈသတၢင်းသဵင်ၶၢဝ်ႇၼၼ်ႉၶိုၼ်းလဝ်ႈလၢတ်ႈလႄႈဝႃႈ၊-
၁၇ မဵဝ်းဢိသရေႇလဢွၵ်ႇပၢႆႈၵႃႈတီႈၽၢႆႇၼႃႈၵူၼ်းမဵဝ်းၽိလိတ်ႉတိၸိူဝ်းၼၼ်ႉလႄႈလႆႈၶၢမ်ႇတၢင်းဢၼ်ၶႃႈၽၼ်းဢဝ်တၢႆပႅတ်ႈယႂ်ႇၼႃႇလူင်လၢင်ၶႃႈယဝ်ႉ။လုၵ်ႈၸၢႆးၸဝ်ႈႁဝ်းႁေႃႇၽၼိတင်းၽိၼႁတ်ႉသွင်ၵေႃႉၼၼ်ႉၵေႃႈတၢႆယဝ်ႉၶႃႈယဝ်ႉ။တိူၵ်ႈပတိၺိၼ်ႇၽြႃးပဵၼ်ၸဝ်ႈၵေႃႈလႆႈၶၢမ်ႇတၢင်းဢၼ်ပိူၼ်ႈသိမ်းဢဝ်ၵႂႃႇယဝ်ႉၶႃႈယဝ်ႉ၊ဝႃႈၼင်ႇၼႆဢေႃႈ။
၁၈ မိူဝ်ႈဢၼ်ၵေႃႉၼၼ်ႉမွၵ်ႇလၢတ်ႈလွင်ႈတိူၵ်ႈပတိၺိၼ်ႇၽြႃးပဵၼ်ၸဝ်ႈၼၼ်ႉၸိုင်မၼ်းပိၼ်ႈတူၵ်းၵႂႃႇတၢင်းလင်သေၵႃႈၼိူဝ်ၶူင်ႇဢၼ်မၼ်းၼင်ႈယူႇၵႃႈႁိမ်းၽၵ်းတူၼၼ်ႉသေယဝ်ႉၶေႃးမၼ်းႁၵ်းလႄႈတၢႆသေဢေႃႈ။မၼ်းၼၼ်ႉပဵၼ်ၵေႃႉဢၼ်ဢသၢၵ်ႈယႂ်ႇလႄႈတူဝ်ၼၵ်းၼႃႇဢေႃႈ။မၼ်းလႆႈဢွၼ်ႁူဝ်ၵူၼ်းမဵဝ်းဢိသရေႇလသီႇသိပ်းပီႊဢေႃႈ။
၁၉ လုၵ်ႈပႂ်ႉမၼ်းမေးၽိၼႁတ်ႉၼၼ်ႉပႃးပတိၵ်ႉသၼ်ႇထေႇၵႄႇထူၼ်ႈလႄႈၸမ်ႈၶိင်ႇမၼ်းၶႃႇမၼ်းယဝ်ႉဢေႃႈ။မိူဝ်ႈဢၼ်မၼ်းလႆႈငိၼ်းသတၢင်းလွင်ႈဢၼ်ဝႃႈတိူၵ်ႈပတိၺိၼ်ႇၽြႃးပဵၼ်ၸဝ်ႈလႆႈၶၢမ်ႇတၢင်းဢၼ်ပိူၼ်ႈသိမ်းဢဝ်ၵႂႃႇ၊ဢိၵ်ႇတင်းလွင်ႈတၢင်းဢၼ်ပေႃႈၸဝ်ႈမၼ်းတင်းၽူဝ်မၼ်းတၢႆယဝ်ႉၼၼ်ႉၸိုင်မၼ်းၵူမ်ႈမူပ်ႇလႄႈၵိူတ်ႇလဵင်ႉလုၵ်ႈၵမ်းလဵဝ်ဢေႃႈ။မၼ်းလႆႈၶၢမ်ႇဝူၺ်ႇတၼႃႇဢၼ်လဵင်ႉလုၵ်ႈၼၼ်ႉႁႅင်းၼႃႇလူင်လၢင်ဢေႃႈ။
၂၀ မိူဝ်ႈဢၼ်မၼ်းၸမ်တၵ်းတၢႆၼၼ်ႉမေႈယိင်းဢၼ်ၸုၵ်းယူႇၵႃႈတီႈႁိမ်းမၼ်းၼၼ်ႉဢွၼ်ၵၼ်လၢတ်ႈမၼ်းလႄႈဝႃႈ၊-ယႃႇပေမႆႈၸႂ်။မႂ်းၵိူတ်ႇလဵင်ႉလုၵ်ႈၸၢႆးမႃးယဝ်ႉ၊ဝႃႈၼင်ႇၼႆသေၵေႃႈမၼ်းယင်းဢမ်ႇတၵ်းသဵင်။
၂၁ ယင်းဢမ်ႇဝႆႉဢမူႉလႄႈယူႇဢေႃႈ။လၢႆးသမ်ႉမၼ်းႁွင်ႉႁိၵ်ႈၸိုဝ်ႈလုၵ်ႈဢွၼ်ႇၼၼ်ႉဝႃႈဢိၶပုတ်ႉဝႃႈၼႆလႄႈဝႃႈ၊-မူၼ်ႈသရေႇမဵဝ်းဢိသရေႇလလပ်ႉႁၢႆၵႂႃႇယဝ်ႉၵွပ်ႈပိူဝ်ႈတိူၵ်ႈပတိၺိၼ်ႇၽြႃးပဵၼ်ၸဝ်ႈလႆႈၶၢမ်ႇတၢင်းဢၼ်ပိူၼ်ႈသိမ်းဢဝ်ၵႂႃႇဢိၵ်ႇတင်းၵွပ်ႈပိူဝ်ႈတၢင်းတၢႆပေႃႈၸဝ်ႈတင်းၽူဝ်ၵဝ်ၼၼ်ႉယဝ်ႉ၊ဝႃႈၼင်ႇၼႆသေယဝ်ႉသမ်ႉလၢတ်ႈလႄႈဝႃႈ၊-
၂၂ မူၼ်ႈသရေႇမဵဝ်းဢိသရေႇလလပ်ႉႁၢႆၵႂႃႇၵွပ်ႈပိူဝ်ႈဢၼ်တိူၵ်ႈပတိၺိၼ်ႇၽြႃးပဵၼ်ၸဝ်ႈလႆႈၶၢမ်ႇတၢင်းဢၼ်ပိူၼ်ႈသိမ်းဢဝ်ၵႂႃႇယဝ်ႉ၊ဝႃႈၼင်ႇၼႆဢေႃႈ။