1 Samuel 23

သေႃးလုလိုပ်ႈလမ်းတႃႇဝိတ်ႉ
၇ ပိူၼ်ႈလဝ်ႈလၢတ်ႈသေႃးလုလွင်ႈဢၼ်တႃႇဝိတ်ႉႁွတ်ႈထိုင်မႃးၵႃႈတီႈဝဵင်းၵိလၼၼ်ႉဢေႃႈ။သေႃးလုလၢတ်ႈလႄႈဝႃႈ၊-ၽြႃးပဵၼ်ၸဝ်ႈဢဝ်မၼ်းဢၢပ်ႈပၼ်ၵႃႈၼႂ်းမိုဝ်းၵဝ်ယဝ်ႉ။မၼ်းၶဝ်ႈၵႃႈၼႂ်းဝဵင်းဢၼ်မီးၽၵ်းတူဢိၵ်ႇတင်းၵိူၼ်ႇၽၵ်းတူၼၼ်ႉယဝ်ႉ။
၈ မၼ်းလႆႈၶၢမ်ႇတၢင်းဢၼ်ၶျုၵ်ႉဝႆႉယဝ်ႉ၊ဝႃႈၼင်ႇၼႆသေယဝ်ႉသေႃးလုႁွင်ႉဢဝ်ၵူၼ်းမၼ်းတင်းသဵင်ႈတင်းလူင်ၸူႉၵၼ်တုမ်ၵၼ်ႁႂ်ႈလႆႈၶီႇသိုၵ်းလူင်းၸူးၵႃႈတီႈဝဵင်းၵိလလႄႈလွမ်ႉႁွပ်ႈတႃႇဝိတ်ႉဢိၵ်ႇတင်းၵူၼ်းမၼ်းတင်းလၢႆဢေႃႈ။
၉ တႃႇဝိတ်ႉႁူႉႁၼ်လွင်ႈဢၼ်သေႃးလုၶတ်းၸႂ်ႁဵတ်းတၢင်းၵျၢမ်ႇတၢင်းပွင်ဢၼ်ဢမ်ႇလီတေႃႇမၼ်းၼၼ်ႉလႄႈမၼ်းလၢတ်ႈတီႈယိတ်ႉပရေႃးႁိၵ်ႈဢႃႇပျႃႇထႃႇလႄႈဝႃႈ၊-ဢဝ်သိူဝ်ႈသုပ်းၸဝ်ႈမႃးၵႃႈတီႈၼႆႉသေၵမ်း၊ဝႃႈၼင်ႇၼႆဢေႃႈ။
၁၀ မိူဝ်ႈၼၼ်ႉတႃႇဝိတ်ႉထၢမ်လႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလတီႈၶႃႈ။ၶႃႈၸဝ်ႈႁဝ်းလႆႈငိၼ်းလွင်ႈဢၼ်သေႃးလုမီးတၢင်းၵျၢမ်ႇတၢင်းပွင်တၵ်းမႃးၵႃႈတီႈဝဵင်းၵိလၼႆႉသေလႄႈယႃႉပႅတ်ႈဝဵင်းၵွပ်ႈပိူဝ်ႈၶႃႈၸဝ်ႈႁဝ်းၼၼ်ႉဢမၢၼ်ႇၶၢၼ်ပဵၼ်တီႈၶႃႈဢေႃႈ။
၁၁ ၵူၼ်းဝဵင်းၵိလၸိူဝ်းၼႆႉတၵ်းဢဝ်ၶႃႈၸဝ်ႈဢၢပ်ႈပၼ်ၵႃႈၼႂ်းမိုဝ်းမၼ်းတီႈၶႃႈႁိုဝ်။သေႃးလုတၵ်းမႃးမႅၼ်ႈၸွမ်းၵႃႈၼင်ႇဢၼ်ၶႃႈၸဝ်ႈငိၼ်းၼၼ်ႉၶႃႈႁိုဝ်။ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလတီႈၶႃႈ၊ၶႃႈၸဝ်ႈႁဝ်းတွင်းပၢၼ်ႇႁႂ်ႈၸဝ်ႈႁဝ်းမီးဢမိင်ႉတီႈၶႃႈၸဝ်ႈတီႈၶႃႈဢေႃႈ။မိူဝ်ႈဢၼ်ဝႃႈၼင်ႇၼႆၸိုင်ထႃႇဝရႃႉၽြႃးမီးဢမိင်ႉလႄႈဝႃႈ၊-သေႃးလုတၵ်းလူင်းမႃးဢေႃႈ၊ဝႃႈၼင်ႇၼႆဢေႃႈ။
၁၂ လၢႆးသမ်ႉတႃႇဝိတ်ႉလဝ်ႈထၢမ်လႄႈဝႃႈ၊-ၵူၼ်းဝဵင်းၵိလၸိူဝ်းၼႆႉတၵ်းဢဝ်ၶႃႈႁဝ်းဢိၵ်ႇတင်းၵူၼ်းၶႃႈၸဝ်ႈႁဝ်းၸိူဝ်းၼႆႉဢၢပ်ႈပၼ်ၵႃႈၼႂ်းမိုဝ်းသေႃးလုၶႃႈႁိုဝ်၊ဝႃႈၼင်ႇၼႆလႄႈထႃႇဝရႃႉၽြႃးမီးဢမိင်ႉလႄႈဝႃႈ၊-ၶဝ်တၵ်းဢဝ်မႂ်းဢၢပ်ႈပၼ်ဢေႃႈ၊ဝႃႈၼင်ႇၼႆဢေႃႈ။
၁၃ တႃႇဝိတ်ႉၵေႃႈပႃးဢဝ်တင်းၵူၼ်းမၼ်းႁူၵ်းပၢၵ်ႇၸိူဝ်းၼၼ်ႉသေယဝ်ႉဢွၵ်ႇသေၵႃႈၼႂ်းဝဵင်းၵိလလႄႈၶၢႆႉဢွင်ႈၶၢႆႉတီႈယူႇၵူႈတီႈၵူႈလႅၼ်ဢေႃႈ။မိူဝ်ႈဢၼ်ပိူၼ်ႈလဝ်ႈလၢတ်ႈသေႃးလုလွင်ႈဢၼ်တႃႇဝိတ်ႉပၢႆလွတ်ႈဢွၵ်ႇၵႂႃႇသေၵႃႈၼႂ်းဝဵင်းၵိလၼၼ်ႉၸိုင်မၼ်းယင်းဢမ်ႇၵႂႃႇၵႃႈတီႈၼၼ်ႉလႄႈယူႇဢေႃႈ။
၁၄ တႃႇဝိတ်ႉၼၼ်ႉယူႇၵႃႈၼႂ်းထိူၼ်ႇၵႃႈတီႈဢၼ်မၼ်ႈၶိူင်ႇၸိူဝ်းၼၼ်ႉလႄႈၵိုတ်းသဝ်းယူႇၵႃႈတီႈၵႄႈႁူၺ်ႈၵႃႈၼိူဝ်လွႆၵႃႈၼႂ်းထိူၼ်ႇၸိၽဢေႃႈ။ပိၵ်ႉသမ်ႉသေႃးလုႁႃမၼ်းယူႇၵူႈဝၼ်းသေၵေႃႈၽြႃးပဵၼ်ၸဝ်ႈဢမ်ႇဢဝ်တႃႇဝိတ်ႉဢၢပ်ႈပၼ်ၵႃႈၼႂ်းမိုဝ်းမၼ်း။
၁၅ မိူဝ်ႈဢၼ်တႃႇဝိတ်ႉယင်းတိုၵ်ႈမီးယူႇၵႃႈၼႂ်းထိူၼ်ႇၸိၽၼႂ်းပႃႇမႆႉပႃႇတွၵ်ႇ၊ယူႇၼၼ်ႉၸိုင်မၼ်းလႆႈႁူႉႁၼ်လွင်ႈဢၼ် သေႃးလုဢွၵ်ႇမႃးႁႂ်ႈလႆႈႁႃဢဝ်ဢသၢၵ်ႈမၼ်းတၢႆၼၼ်ႉဢေႃႈ။
၁၆ ယေႃးၼသၼ်ႇ၊လုၵ်ႈၸၢႆးသေႃးလုၼၼ်ႉၵႂႃႇၸူးၵႃႈတီႈတႃႇဝိတ်ႉၵႃႈၼႂ်းထိူၼ်ႇသေယဝ်ႉၸွႆႈထႅမ်မၼ်းႁႂ်ႈမၼ်းလႆႈဢဵၼ်ႁႅင်းတီႈၽြႃးပဵၼ်ၸဝ်ႈလႄႈဝႃႈ၊-ယႃႇပေမႆႈၸႂ်။
၁၇ မႂ်းတၵ်းၵၢင်းလွတ်ႈသေၵႃႈၼႂ်းမိုဝ်းၸဝ်ႈပေႃႈၵဝ်သေႃးလုၼၼ်ႉလႄႈမႂ်းတၵ်းပဵၼ်ၶုၼ်ႁေႃၶမ်းမဵဝ်းၵူၼ်းဢိသရေႇလယူႇဢေႃႈ။
၁၈ ၵဝ်ၶႃႈတၵ်းလႆႈဢရႃႇတႂ်ႈမိုဝ်းမႂ်းဢေႃႈ။လွင်ႈတၢင်းၼႆႉၸဝ်ႈပေႃႈၵဝ်ၶႃႈသေႃးလုႁူႉယူႇဢေႃႈ၊ဝႃႈၼင်ႇၼႆသေယဝ်ႉသွင်ၶႃႁဵတ်းပတိၺိၼ်ႇၵႃႈတီႈၽၢႆႇၼႃႈထႃႇဝရႃႉၽြႃးလႄႈတႃႇဝိတ်ႉယူႇၵႃႈၼႂ်းထိူၼ်ႇလႄႈယေႃးၼသၼ်ႇၶိုၼ်းမိူဝ်းၵႂႃႇၵႃႈတီႈႁိူၼ်းမၼ်းဢေႃႈ။
၁၉ လၢႆးသမ်ႉၵူၼ်းၸိၽတင်းလၢႆဢွၼ်ၵၼ်ၶိုၼ်ႈၸူးၵႃႈတီႈသေႃးလုတီႈဝဵင်းၵိပႃႇၼၼ်ႉသေယဝ်ႉလဝ်ႈလၢတ်ႈလႄႈဝႃႈ၊-တႃႇဝိတ်ႉၼၼ်ႉပၢႆတဵတ်ႇမႅပ်းယူႇၵႃႈတီႈၶႃႈၸဝ်ႈႁဝ်းၶဝ်ၵႃႈၼႂ်းတီႈဢၼ်မၼ်ႈၶိူင်ႇၵႃႈတီႈထိူၼ်ႇပႃႇမႆႉပႃႇတွၵ်ႇၵႃႈၼိူဝ်လွႆႁၶိလ၊ဢၼ်မီးၵႃႈတီႈၽၢႆႇတၢင်းၸၢၼ်းယေႇသိမုၼ်ႇၼၼ်ႉၶႃႈဢေႃႈ။
၂၀ ပိူဝ်ႈၼႆလႄႈၸဝ်ႈၶုၼ်လူင်တီႈၶႃႈ။ၵႃႈၼင်ႇဢၼ်ၸဝ်ႈႁဝ်းမီးဢလူဝ်ႇၼၼ်ႉၶႅၼ်းတေႃႈလူင်းမႃးသေၵမ်းၶႃႈ။ႁဝ်းၶႃႈတၵ်းဢဝ်ပၵုၼ်ႈၽွၼ်းတႃႇတေလႆႈဢဝ်မၼ်းဢၢပ်ႈပၼ်တီႈၸဝ်ႈႁဝ်းၶႃႈဢေႃႈ၊ဝႃႈၼင်ႇၼႆဢေႃႈ။
၂၁ သေႃးလုလၢတ်ႈလႄႈဝႃႈ၊-ႁႂ်ႈသူၼႆႉပဵၼ်ၵေႃႉဢၼ်လႆႈၶၢမ်ႇတၢင်းလီမၢင်ႇၵလႃႇတီႈထႃႇဝရႃႉၽြႃးသေၵမ်းလူၺ်ႈ။ ၂၂ သူၼႆႉဢိတ်းလူၵဝ်ယဝ်ႉ။မိူဝ်ႈလဵဝ်ၼႆႉသူၵႂႃႇႁဵတ်းႁႂ်ႈယိင်ႈၶႅၼ်းႁႂ်ႈႁူႉသေႇၶျႃႇလီငၢမ်းတီႈဢၼ်မၼ်းတဵတ်ႇမႅပ်းယူၼၼ်ႉဢိၵ်ႇတင်းလွင်ႈဢၼ်ၽူႈလႂ်လႆႈႁၼ်မၼ်းၵႃႈတီႈၼၼ်ႉတႃႉ။
၂၃ ပိူၼ်ႈလၢတ်ႈၵဝ်ဝႃႈမၼ်းပဵၼ်ၵေႃႉဢၼ်လၵ်းလႅမ်ၼႃႇလူင်လၢင်ၼၼ်ႉဢေႃႈ။ၵွပ်ႈၼႆလႄႈၵႂႃႇလူတူၺ်းမၢတ်ႈတွင်းတီႈဢၼ်မၼ်းယၢမ်ႈတဵတ်ႇမႅပ်းသွၼ်ႈပိုင်ႈယူႇၵူႈတီႈၵူႈလႅၼ်ၼၼ်ႉသေယဝ်ႉ၊ၶိုၼ်းမႃးလၢတ်ႈၼႄၵဝ်သေႇၶျႃႇလီငၢမ်းသေၵမ်း။ၵဝ်တၵ်းၸွမ်းသူၵႂႃႇဢေႃႈ။ပေႃးမၼ်းမီးၵႃႈတီႈမိူင်းၼၼ်ႉၸိုင်ၵဝ်တၵ်းႁႃႁႂ်ႈႁၼ်မၼ်းၵႃႈၼႂ်းၵူၼ်းယုတၸိူဝ်းၼၼ်ႉဢေႃႈ၊ဝႃႈၼင်ႇၼႆလႄႈ၊ၶဝ်ၵေႃႈၵႂႃႇၵႃႈတီႈထိူၼ်ႇၸိၽဢွၼ်တၢင်းသေႃးလုဢေႃႈ။
၂၄ တႃႇဝိတ်ႉဢိၵ်ႇတင်းၵူၼ်းမၼ်းတင်းလၢႆၼၼ်ႉမီးယူႇၵႃႈၼႂ်းထိူၼ်ႇမေႃႇၼႃႉၵႃႈတီႈပၢင်ႇဝဵင်းဢႃႇရၽႃႇၽၢႆႇတၢင်းၸၢၼ်းယေႇသိမုၼ်ႇၼၼ်ႉဢေႃႈ။
၂၅ မိူဝ်ႈၼၼ်ႉသေႃးလုဢိၵ်ႇတင်းၵူၼ်းမၼ်းတင်းလၢႆၵႂႃႇႁႂ်ႈလႆႈႁႃတႃႇဝိတ်ႉလႄႈပိူၼ်ႈလၢတ်ႈလွင်ႈၼၼ်ႉတီႈမၼ်းဢေႃႈ။ပိူဝ်ႈၼႆလႄႈမၼ်းလုၵ်ႉသေၵႃႈၼိူဝ်လွႆႁိၼ်လွႆၽႃလူင်းမႃးလႄႈယူႇၵႃႈၼႂ်းထိူၼ်ႇမေႃႇၼသေဢေႃႈ။
၂၆ သေႃးလုငိၼ်းလွင်ႈၼၼ်ႉသေယဝ်ႉၸွမ်းႁႃတႃႇဝိတ်ႉၵႃႈၼႂ်းထိူၼ်ႇမေႃႇၼဢေႃႈ။သေႃးလုၵႂႃႇၽၢႆႇၼိုင်ႈလွႆလႄႈတႃႇဝိတ်ႉဢိၵ်ႇတင်းၵူၼ်းမၼ်းၸိူဝ်းၼၼ်ႉၵႂႃႇၽၢႆႇၼိုင်ႈလွႆလႄႈတႃႇဝိတ်ႉၶတ်းၸႂ်ႁႂ်ႈလႆႈလွတ်ႈၵႂႃႇၵွပ်ႈပိူဝ်ႈၵူဝ်ႁႄသေႃးလုၼၼ်ႉဢေႃႈ။သေႃးလုတင်းၵူၼ်းမၼ်းတင်းလၢႆဝႆးၼႃႇလႄႈၸမ်တၵ်းတီႉလႆႈၶဝ်ယဝ်ႉ။
၂၇ မိူဝ်ႈၼၼ်ႉၵူၼ်းၸႂ်ႉၵေႃႉၼိုင်ႈႁွတ်ႈမႃးၵႃႈတီႈသေႃးလုလႄႈလဝ်ႈလၢတ်ႈဝႃႈ၊-မႃးၶၼ်ၶၼ်ၽႂ်းၽႂ်းသေၵမ်းၶႃႈ။
၂၈ ၵူၼ်းၽိလိတ်ႉတိၶဝ်မႃးတိုၵ်းမိူင်းၸဝ်ႈႁဝ်းၶႃႈယဝ်ႉ၊ဝႃႈၼင်ႇၼႆလႄႈ၊သေႃးလုၵေႃႈလုၵ်ႉသေၵႃႈတီႈဢၼ်လိုပ်ႈၸွမ်းႁႃတႃႇဝိတ်ႉၼၼ်ႉၶိုၼ်းမိူဝ်းလႄႈၶီႇသိုၵ်းၸူးၵႃႈတီႈၵူၼ်းၽိလိတ်ႉတိၸိူဝ်းၼၼ်ႉဢေႃႈ။
၂၉ ပိူဝ်ႈဢၼ်ပဵၼ်ၼင်ႇၼႆလႄႈၶဝ်ႁွင်ႉႁိၵ်ႈၸိုဝ်ႈတီႈၼၼ်ႉဝႃႈသေႇလႁမ်ႇမလေႇၵုတ်ႉဝႃႈၼႆဢေႃႈ။တႃႇဝိတ်ႉလုၵ်ႉသေၵႃႈတီႈၼၼ်ႉၵႂႃႇလႄႈယူႇၵႃႈၼႂ်းတီႈဢၼ်မၼ်ႈၶိူင်ႇၼႂ်းလိၼ်ဢိၼ်ႇၵေႇတိၼၼ်ႉဢေႃႈ။