Chapter
၃၀
တႃႇဝိတ်ႉတိုၵ်းတေႃးၵူၼ်းဢႃႇမလိၵ်ႉ
၁ ပူၼ်ႉသၢမ်ဝၼ်းယဝ်ႉလႄႈတႃႇဝိတ်ႉတင်းၵူၼ်းမၼ်းၸိူဝ်းၼၼ်ႉႁွတ်ႈထိုင်ၵႃႈတီႈဝဵင်းၸိၵလတ်ႉဢေႃႈ။ၵူၼ်းဢႃႇမလိၵ်ႉတင်းလၢႆမႃးတိုၵ်းတေႃးမိူင်းပွတ်းတၢင်းၸၢၼ်းတင်းဝဵင်းၸိၵလတ်ႉသေယဝ်ႉ၊ယႃႉပႅတ်ႈဝဵင်းၸိၵလတ်ႉလႄႈဢဝ်ၽႆးတုတ်ႇပႅတ်ႈဢေႃႈ။
၂ ၶဝ်တီႉဢဝ်မေႈယိင်းၵေႃႉလဵၵ်ႉၵေႃႉယႂ်ႇဢၼ်မီးၵႃႈတီႈဝဵင်းၼၼ်ႉဢေႃႈ။ၶဝ်ဢမ်ႇဢဝ်တၢႆသေၵေႃႉသေၵူၼ်း။ၶဝ်သိမ်းဢဝ်ၵႃႈမီးၼၼ်ႉသေလႄႈၵႂႃႇၸွမ်းၶဝ်ဢေႃႈ။
၃ ပိူဝ်ႈဢၼ်ပဵၼ်ၼင်ႇၼႆလႄႈမိူဝ်ႈဢၼ်တႃႇဝိတ်ႉဢိၵ်ႇတင်းၵူၼ်းမၼ်းၸိူဝ်းၼၼ်ႉႁွတ်ႈထိုင်မႃးၵႃႈတီႈဝဵင်းၼၼ်ႉၸိုင်ၶဝ်ထူပ်းႁၼ်လွင်ႈဢၼ်ၵူၼ်းဢႃႇမလိၵ်ႉဢဝ်ၽႆးတုတ်ႇဝဵင်းၶဝ်ပႅတ်ႈလႄႈတီႉဢဝ်သိမ်းဢဝ်လုၵ်ႈၸၢႆးၶဝ်၊လုၵ်ႈယိင်းၶဝ်၊မေးၶဝ်ၵႂႃႇၼၼ်ႉၸိုင်
၄ တႃႇဝိတ်ႉဢိၵ်ႇတင်းၵူၼ်းဢၼ်ပႃးလူၺ်ႈၵၼ်တင်းမၼ်းၸိူဝ်းၼၼ်ႉဢွၼ်ၵၼ်ၵိဝ်သဵင်သေႁႆႈႁွင်ႉတေႃႇထိုင်ႁွတ်ႈထၼ်ႈပေႃးဢမ်ႇမီးႁႅင်းႁႂ်ႈလႆႈႁႆႈထႅင်ႈႁွင်ႉထႅင်ႈဢေႃႈ။
၅ မေးတႃႇဝိတ်ႉသွင်ၵေႃႉ၊ဢၽိၼွင်ႇ၊ၵူၼ်းယိင်းဝဵင်းယေႇၸရေႇလတင်းဢၽိၵေႇလ၊ၵူၼ်းယိင်းဝဵင်းၵရမေႇလ၊မေးၵဝ်ႇၼႃႇပလၼၼ်ႉၵေႃႈပႃးၵႂႃႇယဝ်ႉ။တႃႇဝိတ်ႉၼၼ်ႉမီးတၢင်းဢၼ်ယၢပ်ႇၸႂ်ၶၢၼ်ၸႂ်ၼႃႇလူင်လၢင်ၵွပ်ႈပိူဝ်ႈၵူၼ်းတင်းလၢႆဢွၼ်ၵၼ်တၢင်ႇဢပျႅတ်ႈၵႃႈၼိူဝ်မၼ်းလႄႈတၵ်းဢဝ်မၢၵ်ႇႁိၼ်ထိမ်ႈမၼ်းၵွပ်ႈပိူဝ်ႈလုၵ်ႈၸၢႆးၶဝ်လုၵ်ႈယိင်းၶဝ်ၼၼ်ႉႁင်းၽႂ်ႁင်းမၼ်းၼၼ်ႉဢေႃႈ။
၆ ၵူၺ်းၵႃႈတႃႇဝိတ်ႉလႆႈဢဵၼ်လႆႈႁႅင်းတီႈထႃႇဝရႃႉၽြႃးပဵၼ်ၸဝ်ႈမၼ်းဢေႃႈ။
၇ တႃႇဝိတ်ႉလၢတ်ႈတီႈဢႃႇပျႃႇထႃႇလုၵ်ႈၸၢႆးဢႁိမလိတ်ႉလႄႈဝႃႈ၊-ၶႅၼ်းတေႃႈဢဝ်သိူဝ်ႈသုပ်းၸဝ်ႈမႃးတီႈၵဝ်သေၵမ်း၊ဝႃႈၼင်ႇၼႆသေယဝ်ႉ၊ဢႃႇပျႃႇထႃႇၵေႃႈၼၼ်ႉဢဝ်သိူဝ်ႈသုပ်းၸဝ်ႈမႃးၸူးၵႃႈတီႈတႃႇဝိတ်ႉဢေႃႈ။
၈ တႃႇဝိတ်ႉၵေႃႈလဝ်ႈထၢမ်တီႈထႃႇဝရႃႉၽြႃးလႄႈဝႃႈ၊-ၶႃႈၸဝ်ႈတၵ်းလႆႈလိုပ်ႈၸွမ်းလမ်းၸွမ်းမူႇၽုင်မုၵ်ႉၸိူဝ်းၼၼ်ႉတီႈၶႃႈႁိုဝ်၊တၵ်းၶိုတ်းၶဝ်တီႈၶႃႈႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈမီးဢမိင်ႉလႄႈဝႃႈ၊-လိုပ်ႈၸွမ်းတႃႉ။
၉ မႂ်းတၵ်းၶိုတ်းၶဝ်ဢမၢၼ်ႇၶၢၼ်ပဵၼ်လႄႈၶိုၼ်းလႆႈၵူႈၸိူဝ်ႉၵူႈပိူင်ဢေႃႈ၊ဝႃႈၼင်ႇၼႆလႄႈတႃႇဝိတ်ႉဢိၵ်ႇတင်းၵူၼ်းဢၼ်ပႃးလူၺ်ႈၵၼ်တင်းမၼ်းႁူၵ်းပၢၵ်ႇၸိူဝ်းၼၼ်ႉလိုပ်ႈလမ်းၵႂႃႇလႄႈႁွတ်ႈထိုင်ၵႃႈတီႈၼမ်ႉႁွင်ႊပေႇသေႃႇၼၼ်ႉသေယဝ်ႉၵမ်ႈၽွင်ႈၵိုတ်းသဝ်းယူႇၵႃႈတီႈႁိမ်းၼမ်ႉႁွင်ႊၼၼ်ႉသေဢေႃႈ။
၁၀ တႃႇဝိတ်ႉတင်းၵူၼ်းသီႇပၢၵ်ႇဢွၼ်ၵၼ်လိုပ်ႈၸွမ်းလမ်းၸွမ်းဢေႃႈ။သွင်ပၢၵ်ႇဢၼ်ႁိူဝ်ႉဢူၼ်ႈၼႃႇထၼ်ႈပေႃးဢမ်ႇၶၢမ်ႈၼမ်ႉႁွင်ႊပေႇသေႃႇလႆႈၼၼ်ႉၵိုတ်းသဝ်းယူႇတီႈၼၼ်ႉဢေႃႈ။
၁၁ ၶဝ်ထူပ်းႁၼ်ၵူၼ်းဢေႇၵႅပ်ႉတုၵေႃႉၼိုင်ႈၵႃႈတီႈပၢင်ႇပဵင်းၼၼ်ႉလႄႈၶဝ်ဢဝ်မၼ်းမႃးၸူးၵႃႈတီႈတႃႇဝိတ်ႉသေယဝ်ႉပၼ်ၶဝ်ႈမုၼ်းတီႈၵေႃႉၼၼ်ႉလႄႈၵေႃႉၼၼ်ႉၵေႃႈၵိၼ်ဢေႃႈ။
၁၂ ၼမ်ႉၵေႃႈၶဝ်ႁႂ်ႈမၼ်းၵိၼ်ဢေႃႈ။ၶႅပ်းမၢၵ်ႇလိူဝ်ႇသၢင်းၽေႃးၽၢၵ်ႇၼိုင်ႈဢိၵ်ႇတင်းမၢၵ်ႇၸပိတ်ႉဢၼ်ႁႅင်ႈသွင်ပုၵ်ႉၵေႃႈၶဝ်ပၼ်လႄႈၵေႃႉၼၼ်ႉၵေႃႈၵိၼ်သေယဝ်ႉမၼ်းသမ်ႉၶိုၼ်းမီးႁႅင်းမႃးဢေႃႈ။မၼ်းဢမ်ႇလႆႈၵိၼ်ၶဝ်ႈမုၼ်းဢမ်ႇလႆႈၵိၼ်ၼမ်ႉသၢမ်ဝၼ်းသၢမ်ၶိုၼ်းတဵမ်တဵမ်ယဝ်ႉ။
၁၃ တႃႇဝိတ်ႉၵေႃႈထၢမ်တီႈမၼ်းလႄႈဝႃႈ၊-မႂ်းၸၢပ်ႈသႅင်ႇၵၼ်တင်းၽူႈလႂ်။မႂ်းလုၵ်ႉသေၵႃႈတီႈလႂ်မႃး၊ဝႃႈၼင်ႇၼႆလႄႈမၼ်းၼၼ်ႉလၢတ်ႈလႄႈဝႃႈ၊-ၵဝ်ၶႃႈပဵၼ််ၵူၼ်းဢွၼ်ႇၵူၼ်းဢေႇၵႅပ်ႉတုဢၼ်လႆႈၶၢမ်ႇႁဵတ်းၶႃႈတီႈၵူၼ်းဢႃႇမလိၵ်ႉၼၼ်ႉၶႃႈဢေႃႈ။ၸဝ်ႈၵဝ်ၶႃႈပႅတ်ႈၵဝ်ၶႃႈဝႆႉၵွပ်ႈပိူဝ်ႈၵဝ်ၶႃႈမီးတၢင်းၶႆႈတၢင်းပဵၼ်မိူဝ်ႈသၢမ်ဝၼ်းၼၼ်ႉၶႃႈဢေႃႈ။
၁၄ ႁဝ်းၶႃႈတိုၵ်းတေႃးပွတ်းတၢင်းၸၢၼ်းမိူင်းၶေႇရသိဢိၵ်ႇတင်းဢၼ်ၸၢပ်ႈသႅင်ႇၵၼ်တင်းမိူင်းယုတတင်းပွတ်းတၢင်းၸၢၼ်းလိၼ်ၵႃႇလိပ်ႉလႄႈဢဝ်ၽႆးတုတ်ႇဝဵင်းၸိၵလတ်ႉပႅတ်ႈယဝ်ႉၶႃႈယဝ်ႉ၊ဝႃႈၼင်ႇၼႆဢေႃႈ။
၁၅ တႃႇဝိတ်ႉၵေႃႈထၢမ်ႇတီႈမၼ်းလႄႈဝႃႈ၊-ၸွင်ႇမႂ်းတၵ်းဢွၼ်ၵဝ်လူင်းၸူးၵႃႈတီႈမုၵ်ႉၸုမ်းၸိူဝ်းၼၼ်ႉႁိုဝ်၊ဝႃႈၼင်ႇၼႆလႄႈမၼ်းၵေႃႈလၢတ်ႈဝႃႈ၊-ပေႃးၸဝ်ႈႁဝ်းတိူင်ႇၽြႃးပဵၼ်ၸဝ်ႈလႄႈၵိၼ်ႇဝႃႈတီႈၵဝ်ၶႃႈဝႃႈ၊ၸဝ်ႈႁဝ်းတၵ်းဢမ်ႇဢဝ်ၵဝ်ၶႃႈတၢႆ၊တၵ်းဢမ်ႇဢဝ်ၵဝ်ၶႃႈၶိုၼ်းဢၢပ်ႈပၼ်ၵႃႈၼႂ်းမိုဝ်းၸဝ်ႈၵဝ်ၶႃႈၸိုင်ၵဝ်ၶႃႈတၵ်းဢွၼ်ၸဝ်ႈႁဝ်းလူင်းၸူးၵႃႈတီႈဢၼ်မုၵ်ႉၸုမ်းၶဝ်မီးၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။
၁၆ မိူဝ်ႈဢၼ်ၵူၼ်းဢွၼ်ႇၼၼ်ႉဢွၼ်မၼ်းလူင်းၸူးလႄႈႁွတ်ႈထိုင်ၼၼ်ႉၸိုင်လႆႈႁၼ်ၶဝ်ၸိူဝ်းၼၼ်ႉဢွၼ်ၵၼ်ၵိၼ်ၶူပ်းယူႇ၊ၵႃႈဝႅၼ်ယူႇသေလႄႈမီးၸွတ်ႇၸႅတ်ႇၵႃႈၼိူဝ်လိၼ်ၵူႈတီႈၵူႈလႅၼ်ၵွပ်ႈပိူဝ်ႈၶဝ်လႆႈၶူဝ်းလဵင်းၼမ်ၼႃႇဢၼ်ၶဝ်ႁိမ်လႆႈၵႃႈၼႂ်းမိူင်းၽိလိတ်ႉတိဢိၵ်ႇတင်းမိူင်းယုတၼၼ်ႉဢေႃႈ။
၁၇ တႃႇဝိတ်ႉၵေႃႈတိုၵ်းတေႃးယႃႉပႅတ်ႈၶဝ်ၸႃႉၸဵမ်ၶိင်ႇၵၢင်ၶိုၼ်းတေႃႇႁွတ်ႈၶိင်ႇႁဝ်ၶမ်ဝၼ်းမိူဝ်ႈၽုၵ်ႈဢေႃႈ။ၼွၵ်ႈသေၵူၼ်းၼုမ်ႇသီႇပၢၵ်ႇဢၼ်ၶီႇၵလႃႇဢုၵ်ႉလႄႈဢွၵ်ႇပၢႆႈၵႂႃႇၼၼ်ႉဢမ်ႇမီးၵူၼ်းလွတ်ႈသေၵေႃႉသေၵူၼ်း။
၁၈ တႃႇဝိတ်ႉၶိုၼ်းလႆႈၶိုၼ်းၵႃႈဢၼ်ၵူၼ်းဢႃႇမလိၵ်ႉၸိူဝ်းၼၼ်ႉသိမ်းဢဝ်ၵႂႃႇၼၼ်ႉလႄႈမေးမၼ်းသွင်ၵေႃႉၼၼ်ႉၵေႃႈတႃႇဝိတ်ႉၵႄႇၼုၵ်ႈဢဝ်ဢေႃႈ။
၁၉ ၵူၼ်းယႂ်ႇၵူၼ်းဢွၼ်ႇ၊လုၵ်ႈၸၢႆးလုၵ်ႈယိင်း၊ၶူဝ်းလဵင်းၵႃႈဢၼ်ႁိမ်ဢဝ်သိမ်းဢဝ်ၵႂႃႇၸိူဝ်းၼၼ်ႉဢမ်ႇၵိုတ်းဢမ်ႇၵျၢၼ်ႇသေၸိူဝ်ႉသေဢၼ်တႃႇဝိတ်ႉၶိုၼ်းဢဝ်မႃးတင်းသဵင်ႈတင်းမူတ်းဢေႃႈ။
၂၀ တႃႇဝိတ်ႉၵေႃႈဢဝ်ၽုင်သူဝ်းၽုင်ဝူဝ်းၵႃႈဢၼ်ၶဝ်လႆႈၼၼ်ႉႁေႃႈၵႂႃႇဢွၼ်တၢင်းၶဝ်လႄႈဝႃႈ၊-ဢၼ်ၸိူဝ်းၼႆႉၸမ်းပဵၼ်ၶူဝ်းလဵင်းဢၼ်တႃႇဝိတ်ႉပိူင်ႇၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၁ တႃႇဝိတ်ႉၶိုၼ်းႁွတ်ႈထိုင်ၵႃႈတီႈၵူၼ်းသွင်ပၢၵ်ႇဢၼ်ႁိူဝ်ႉဢူၼ်ႈၼႃႇထၼ်ႈပေႃးဢမ်ႇၸွမ်းၵႂႃႇလႆႈလႄႈလႆႈၵိုတ်းသဝ်းယူႇၵႃႈတီႈႁိမ်းၼမ်ႉႁွင်ႊပေႇသေႃႇၼၼ်ႉလႄႈၶဝ်ၼၼ်ႉဢွၼ်ၵၼ်ဢွၵ်ႇမႃးႁႂ်ႈလႆႈႁပ်ႉႁူဝ်တၢင်းတႃႇဝိတ်ႉဢိၵ်ႇတင်းၵူၼ်းဢၼ်ၸွမ်းလူၺ်ႈၵၼ်တင်းမၼ်းၸိူဝ်းၼၼ်ႉဢေႃႈ။မိူဝ်ႈဢၼ်တႃႇဝိတ်ႉႁွတ်ႈထိုင်ၵႃႈတီႈဢၼ်ၸမ်ၶဝ်ၼၼ်ႉၸိုင်မၼ်းတၵ်ႉလၢတ်ႈၶဝ်ဢေႃႈ။
၂၂ မိူဝ်ႈၼၼ်ႉၼႂ်းၵူၼ်းႁၢႆႉဢၼ်ႁဵတ်းဢႃႉထမ်ႇမႃႉဢၼ်ၸွမ်းတႃႇဝိတ်ႉလၢတ်ႈဝႃႈ၊-ၵွပ်ႈပိူဝ်ႈၶဝ်ဢမ်ႇၸွမ်းၵၼ်တင်းႁဝ်းလႄႈၼႂ်းၶူဝ်းလဵင်းဢၼ်ႁဝ်းႁိမ်လႆႈမႃးၸိူဝ်းၼၼ်ႉၼွၵ်ႈသလေုၵ်ႈၶဝ်မေးၶဝ်ၼၼ်ႉႁဝ်းဢမ်ႇလႆႈၶွင်ၶူဝ်းပၼ်တီႈၶဝ်သေၸိူဝ်ႉသေပိူင်။ႁႂ်ႈၶဝ်ဢဝ်လုၵ်ႈဢဝ်မေးၶဝ်သေလႄႈဢွၵ်ႇၵႂႃႇတႃႉ၊ဝႃႈၼင်ႇၼႆဢေႃႈ။
၂၃ တႃႇဝိတ်ႉၵေႃႈၸီႇယၢင်ႇလႄႈဝႃႈ၊-ပီႈၼွင်ႉၵဝ်တင်းလၢႆၶဝ်ဢိူၺ်း။သူဢမ်ႇလႆႈဢဝ်ၶွင်ၶူဝ်းဢၼ်ထႃႇဝရႃႉၽြႃးဢၢပ်ႈပၼ်တီႈႁဝ်းၼၼ်ႉ။မၼ်းၸဝ်ႈပႂ်ႉၸွႆႈပႂ်ႉထႅမ်ႁဝ်းလႄႈဢဝ်မူႇၽုင်မုၵ်ႉၸိူဝ်းဢၼ်မႃးတိုၵ်းတေႃးႁဝ်းၸိူဝ်းၼၼ်ႉဢၢပ်ႈပၼ်တီႈႁဝ်းယဝ်ႉ။
၂၄ ၼႂ်းလွင်ႈတၢင်းၼႆႉၽူႈလႂ်ၵေႃႈတၵ်းထွမ်ႇဢဝ်ၵႂၢမ်းသူ။ၵႃႈၼင်ႇဢၼ်ၵေႃႉဢၼ်ၵႂႃႇတိုၵ်းသိုၵ်းလႆႈၼၼ်ႉႁႂ်ႈၵေႃႉဢၼ်ပႂ်ႉၶူဝ်းလဵင်းယူႇၼၼ်ႉၵေႃႈလႆႈသေၵမ်း။ႁႂ်ႈတင်းသွင်မုၵ်ႉသွင်ၸိူဝ်းၶၢမ်ႇဢဝ်မိူၼ်မိူၼ်ၵၼ်သေၵမ်း၊ဝႃႈၼင်ႇၼႆဢေႃႈ။
၂၅ မၼ်းႁဵတ်းႁႂ်ႈပဵၼ်ထုင်းၾိင်ႈၼႂ်းလွင်ႈတၢင်းဢၼ်ၸီႇယၢင်ႇဝႆႉတီႈမဵဝ်းဢိသရေႇလၸႃႉၸဵမ်ဝၼ်းမိူဝ်ႈၼၼ်ႉၵႂႃႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
၂၆ တႃႇဝိတ်ႉၼၼ်ႉႁွတ်ႈထိုင်ၵႃႈတီႈဝဵင်းၸိၵလတ်ႉသေယဝ်ႉဢဝ်ၶူဝ်းလဵင်းဢၼ်ႁိမ်လႆႈၼၼ်ႉၵမ်ႈၽွင်ႈပၼ်ၵႂႃႇၵႃႈတီႈၵူၼ်းဢၼ်ပဵၼ်ၵႄႇပဵၼ််ႁူဝ်ၼႂ်းမဵဝ်းယုတဢၼ်ပဵၼ်ၵေႃႉသေႈမၼ်းၸိူဝ်းၼၼ်ႉသေလႄႈသင်ႇလၢတ်ႈလႄႈဝႃႈ၊-တူၺ်းလူး။
၂၇ လၢၵ်ႈသွင်ႇပုၼ်ႈသူၼႆႉပဵၼ်ဢၼ်ဢဝ်ၵႃႈၼႂ်းၶူဝ်းလဵင်းဢၼ်ႁိမ်လႆႈၵႃႈၼႂ်းမိုဝ်းရၢၼ်ႇသူႇထႃႇဝရႃႉၽြႃးၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၈ မၼ်းဢဝ်ပၼ်ၵႂႃႇၵႃႈတီႈၶဝ်ၸိူဝ်းဢၼ်မီးၵႃႈၼႂ်းဝဵင်းပေႇသလ၊ဝဵင်းရႃႇမုတ်ႉၼႂ်းပွတ်းတၢင်းၸၢၼ်း၊ဝဵင်းယတ်ႉတိ၇ ၊ဝဵင်းဢႃႇရေႃႇ၊ဝဵင်းသိၽမုတ်ႉ၊ဝဵင်းဢေႇသတမေႃႇ၊ဝဵင်းရႃႇၶလ၊ဝဵင်းတီႈဢၼ်ၵူၼ်းယေႇရမေႇလယူႇၸိူဝ်းၼၼ်ႉ၊
၂၉ ဝဵင်းတီႈဢၼ်ၵူၼ်းၵေႇၼိယူႇၸိူဝ်းၼၼ်ႉ၊ဝဵင်းႁေႇပုၼ်ႇဢၼ်ဝႃႈဝၢၼ်ႈဝဵင်းၵႃႈဢၼ်တႃႇဝိတ်ႉဢိၵ်ႇတင်း
၃၀ ၵူၼ်းမၼ်းတင်းလၢႆယၢမ်ႈသွၼ်ႈပိုင်ႈယူႇၸိူဝ်းၼၼ်ႉဢေႃႈ။