Chapter
၁၀
၁ သမူၺ်ႇလဢဝ်ၼမ်ႉမၼ်းထွၵ်ႇသႂ်ႇၵႃႈၼိူဝ်ႁူဝ်သေႃးလုသေယဝ်ႉၸုပ်ႇၼူမ်မၼ်းလႄႈဝႃႈ၊-ထႃႇဝရႃႉၽြႃးပၼ်ၽိၵ်ႈတီႈမႂ်းလႄႈၶၢၼ်းမႂ်းဝႆႉၼႂ်းဢရႃႇၶုၼ်ၵႃႈၼိူဝ်မဵဝ်းၵူၼ်းဢမူၺ်ႇမၼ်းၸဝ်ႈၼၼ်ႉယဝ်ႉဢမ်ႇၸႂ်ႈႁိုဝ်။
၂ ဝၼ်းမိူဝ်ႈၼႆႉမိူဝ်ႈဢၼ်မႂ်းၽၢတ်ႇၵၼ်တင်းၵဝ်ၵႂႃႇယဝ်ႉၼၼ်ႉမႂ်းတၵ်းထူပ်းႁၼ်ၵူၼ်းသွင်ၵေႃႉၵႃႈတီႈႁိမ်းသၢင်းၶျႅင်းရႃႇၶေႇလဝၢၼ်ႈၸလေၸၵႃႈတီႈႁိမ်းလႅၼ်လိၼ်မိူင်းပိၼ်ႇယႃႇမိၼ်ႇပုၼ်ႉဢေႃႈ။သွင်ၶႃၼၼ်ႉတၵ်းလၢတ်ႈတီႈမႂ်းလႄႈဝႃႈ၊-မႃႉလီႈဢၼ်မႂ်းၵႂႃႇႁႃၸိူဝ်းၼၼ်ႉၶိုၼ်းထူပ်းႁၼ်ယဝ်ႉ။
၃ ပေႃႈမႂ်းၼၼ်ႉဢမ်ႇမႆႈၸႂ်ၵွပ်ႈမႃႉလီႈၸိူဝ်းၼၼ်ႉလႄႈမႆႈၸႂ်ၵွပ်ႈမႂ်းယူႇလႄႈဝႃႈ၊ၵွပ်ႈပိူဝ်ႈလုၵ်ႈၸၢႆးၵဝ်ၼၼ်ႉၵဝ်တၵ်းႁဵတ်းၸိူဝ်ႉၼင်ႇႁိုဝ်၊ဝႃႈၼင်ႇၼႆယဝ်ႉ။မိူဝ်ႈဢၼ်မႂ်းပူၼ်ႉသေၵႃႈတီႈၼၼ်ႉလႄႈႁွတ်ႈထိုင်ၵႃႈတီႈတူၼ်ႈမႆႉၼိမ်တႃႇပေႃႇၼၼ်ႉၸိုင်မႂ်းတၵ်းထူပ်းႁၼ်ၵူၼ်းသၢမ်ၵေႃႉဢၼ်ၶိုၼ်ႈၸူးၵႃႈတီႈၽြႃးပဵၼ်ၸဝ်ႈၵႃႈတီႈဝဵင်းပေႇသလၼၼ်ႉဢေႃႈ။ၵေႃႉၼိုင်ႈပႃးဢဝ်ပႄႉဢွၼ်ႇသၢမ်တူဝ်၊ၵေႃႉၼိုင်ႈပႃးဢဝ်ၶဝ်ႈမုၼ်းသၢမ်လုၵ်ႈ၊ၵေႃႉၼိုင်ႈပႃးဢဝ်ထူင်ၼမ်ႉၸပိတ်ႉယူႇဢေႃႈ။
၄ ၶဝ်တၵ်းတၵ်ႉၵၼ်တင်းမႂ်းသေလႄႈဢဝ်ၶဝ်ႈမုၼ်းသွင်လုၵ်ႈပၼ်တီႈမႂ်းလႄႈမႂ်းတၵ်းလႆႈႁပ်ႉတုင်းဢဝ်ၵႃႈတီႈမိုဝ်းၶဝ်ၼၼ်ႉဢေႃႈ။
၅ လိုၼ်းၼၼ်ႉမိူဝ်ႈဢၼ်မႂ်းႁွတ်ႈထိုင်ၵႃႈတီႈလွႆၽြႃးပဵၼ်ၸဝ်ႈတီႈဢၼ်မီးတပ်ႉၵူၼ်းၽိလိတ်ႉတိလႄႈသုတ်ႉၸပ်းသုတ်ႉၸူးၵႃႈတီႈဝဵင်းၼၼ်ႉၸိုင်မႂ်းတၵ်းထူပ်းႁၼ်မုၵ်ႉၸုမ်းပရေႃးၽႅတ်ႈဢၼ်ပႃးတင်းတရေႃး၊ၵွင်ၶဵတ်ႇ၊ပီႇ၊တိင်ႇ၊သေလႄႈလူင်းၵႃႈၼိူဝ်ႈထႃႇၼႃႉတီႈသုင်ၼၼ်ႉမႃးယူႇသေလႄႈႁဵတ်းပရေႃးၽႅတ်ႈယူႇဢေႃႈ။
၆ မိူဝ်ႈၼၼ်ႉဝိၺိၺ်ႇၽြႃးပဵၼ်ၸဝ်ႈတၵ်းတူၵ်းႁွတ်ႈၵႃႈၼိူဝ်မႂ်းၼႃႇလူင်လၢင်လႄႈမႂ်းတၵ်းႁဵတ်းပရေႃးၽႅတ်ႈလူၺ်ႈၵၼ်တင်းၶဝ်ၼၼ်ႉလႄႈပဵၼ်ၵေႃႉဢၼ်လၢၵ်ႇပိူင်ႈဢေႃႈ။
၇ မိူဝ်ႈဢၼ်ၼီႈမိၵ်ႈလၢၵ်ႈၶၼႃႇၸိူဝ်းၼႆႉပဵၼ်မႃးတီႈမႂ်းၼၼ်ႉၸိုင်ႁဵတ်းၸွမ်းၵႃႈၼင်ႇဢၼ်သၢင်ႇထုၵ်ႇၼၼ်ႉတႃႉ။ၽြႃးပဵၼ်ႈၸဝ်ႈမီးယူႇလူၺ်ႈၵၼ်တင်းမႂ်းဢေႃႈ။မႂ်းၵေႃႈတၵ်းလႆႈလူင်းၵႂႃႇၵႃႈတီႈဝဵင်းၵိလၵႃႇလပုၼ်ႉဢွၼ်တၢင်းၵဝ်ဢေႃႈ။
၈ ၵဝ်ၵေႃႈတၵ်းလူင်းၸူးၵႃႈတီႈမႂ်းတီႈၼၼ်ႉလႄႈႁႂ်ႈလႆႈပုၵ်ႉၸေႃႇယိၸ်ႉဢၼ်တုတ်ႇၽႆးဢိၵ်ႇတင်းယိၸ်ႉမိၵ်ႉသႁႃႇယႃႉဢေႃႈ။မႂ်းတၵ်းလႆႈပႂ်ႉထႃႈယူႇၸဵတ်းဝၼ်းတေႃႇထိုင်ႁွတ်ႈၵဝ်မႃးတီႈမႂ်းလႄႈၼႄပၼ်လွင်ႈတၢင်းဢၼ်မႂ်းတၵ်းလႆႈႁဵတ်းၼၼ်ႉဢေႃႈ၊ဝႃႈၼင်ႇၼႆဢေႃႈ။
သေႃးလုလႆႈဢရႃႇၶုၼ်ႁေႃၶမ်း
၉ မိူဝ်ႈဢၼ်မၼ်းဝၢႆႇၶိုၼ်းႁႂ်ႈလႆႈဢွၵ်ႇသေၵႃႈတီႈသမူၺ်ႇလၵႂႃႇၼၼ်ႉၸိုင်ၽြႃးပဵၼ်ၸဝ်ႈပၼ်ႁူဝ်ၸႂ်ဢၼ်လၢၵ်ႇပိူင်ႈလႄႈၼီႈမိၵ်ႉလၢၵ်ႈၶၼႃႇၵူႈၸိူဝ်ႉၵူႈပိူင်ၸိူဝ်းၼၼ်ႉပဵၼ်မႃးၼႂ်းဝၼ်းၼၼ်ႉၵမ်းလဵဝ်ဢေႃႈ။
၁၀ မိူဝ်ႈဢၼ်သွင်ၶႃႁွတ်ႈထိုင်ၵႃႈတီႈလွႆၼၼ်ႉၸိုင်မုၵ်ႉၸုမ်းပရေႃးၽႅတ်ႈၶဝ်ႁႄႉႁပ်ႉဢဝ်မၼ်းလႄႈဝိၺိၺ်ႇၽြႃးပဵၼ်ၸဝ်ႈတူၵ်းႁွတ်ႈၵႃႈၼိူဝ်မၼ်းၼႃႇလူင်လၢင်သေယဝ်ႉမၼ်းႁဵတ်းပရေႃးၽႅတ်ႈလူၺ်ႈၵၼ်တင်းၶဝ်ၼၼ်ႉဢေႃႈ။
၁၁ မိူဝ်ႈဢၼ်ၶဝ်ၸိူဝ်းဢၼ်ႁူႉၸၵ်းမိုတ်ႈၵိုဝ်းမၼ်းမိူဝ်ႈဢွၼ်ၼႆႉၼၼ်ႉႁၼ်လွင်ႈဢၼ်မၼ်းႁဵတ်းပရေႃးၽႅတ်ႈလူၺ်ႈၵၼ်တင်းပရေႃးၽႅတ်ႈၸိူဝ်းၼၼ်ႉယူႇၼၼ်ႉၸိုင်ၵူၼ်းတင်းလၢႆၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်ၵၼ်လႄႈဝႃႈ၊-ပဵၼ်ၸိူဝ်ႉၼင်ႇႁိုဝ်မႃးတီႈလုၵ်ႈၸၢႆးၵိသၼၼ်ႉ။သေႃးလုၼႆႉၵေႃႈၶဝ်ႈပႃးၼႂ်းပရေႃးၽႅတ်ႈတင်းလၢႆႁိုဝ်၊ဝႃႈၼင်ႇၼႆဢေႃႈ။
၁၂ ၵူၼ်းၵႃႈတီႈၼၼ်ႉၵေႃႉၼိုင်ႈၶိုၼ်းလၢတ်ႈလႄႈဝႃႈ၊-ပေႃႈၶဝ်ပဵၼ်ၽူႈလႂ်၊ဝႃႈၼင်ႇၼႆလႄႈၵႂၢမ်းဢၼ်ဝႃႈသေႃးလုၵေႃႈၶဝ်ပႃးၼႂ်းပရေႃးၽႅတ်ႈတင်းလၢႆႁိုဝ်၊ဢၼ်ဝႃႈၼၼ်ႉပဵၼ်ထုင်းဝႆႉဢေႃႈ။
၁၃ ဝၢႆးသမေၼ်းႁဵတ်းပရေႃးၽႅတ်ႈယဝ်ႉတူဝ်ႈၼၼ်ႉၸိုင်မၼ်းၶိုၼ်ႈၵႂႃႇၵႃႈတီႈထႃႇၼႃႉတီႈဢၼ်သုင်ၼၼ်ႉဢေႃႈ။
၁၄ ပေႃႈၼႃႉသေႃးလုထၢမ်တီႈသေႃးလုတင်းၵူၼ်းဢွၼ်ႇမၼ်းလႄႈဝႃႈ၊-သွင်ၶိူဝ်ၵႂႃႇတီႈလႂ်၊ဝႃႈၼင်ႇၼႆလႄႈမၼ်းၵေႃႈၶိုၼ်းလၢတ်ႈလႄႈဝႃႈ၊-ၵႂႃႇႁႂ်ႈလႆႈႁႃမႃႉလီႈၸိူဝ်းၼၼ်ႉဢေႃႈ။
၁၅ မိူဝ်ႈဢၼ်ႁူႉဝႃႈဢမ်ႇထူပ်းႁၼ်ၼၼ်ႉၸိုင်ႁႃးသွင်ၵေႃႉႁွတ်ႈထိုင်ၵႂႃႇၵႃႈတီႈသမူၺ်ႇလဢေႃႈ၊ဝႃႈၼင်ႇၼႆဢေႃႈ။ပေႃႈၼႃႉသေႃးလုၵေႃႈထၢမ်လႄႈဝႃႈ၊-မွၵ်ႇလၢတ်ႈတီႈၵဝ်လွင်ႈဢၼ်သမူၺ်ႇလလၢတ်ႈၸိူဝ်ႉၼင်ႇႁိုဝ်တီႈသူၼၼ်ႉသေၵမ်း၊မိူဝ်ႈဢၼ်ဝႃႈၼင်ႇၼႆၸိုင်သေႃးလုၵေႃႈၶိုၼ်းလၢတ်ႈတီႈပေႃႈၼႃႉမၼ်းလႄႈဝႃႈ၊-
၁၆ မၼ်းလၢတ်ႈလွင်ႈဢၼ်ၶိုၼ်းထူပ်းႁၼ်မႃႉလီႈၸိူဝ်းၼၼ်ႉယဝ်ႉ၊ဝႃႈၼင်ႇၼႆၵူၺ်းလႄႈယင်းဢမ်ႇလၢတ်ႈၼႄလွင်ႈႁဵတ်းၶုၼ်ဝၢၼ်ႈမိူင်းဢၼ်သမူၺ်ႇလလၢတ်ႈၼၼ်ႉ။
၁၇ လၢႆးသမ်ႉသမူၺ်ႇလႁွင်ႉဢဝ်ၵူၼ်းဢိသရေႇလတင်းလၢႆႁႂ်ႈၸူႉၵၼ်တုမ်ၵၼ်ၵႃႈတီႈထႃႇဝရႃႉၽြႃးၵႃႈၼႂ်းဝဵင်းမိၸပႃႇလႄႈလၢတ်ႈဝႃႈ၊-ထႃႇဝရႃႉၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉလႄႈဝႃႈၸမ်း၊-
၁၈ ၵဝ်ၼုၵ်ႈဢဝ်မဵဝ်းဢိသရေႇလဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးလႄႈၵႄႇသႄႇဢဝ်သူလွတ်ႈသေၵႃႈၼႂ်းမိုဝ်းၵူၼ်းဢေႇၵႅပ်ႉတုတင်းလၢႆဢိၵ်ႇတင်းသိုင်ႇၸိုင်ႈဝၢၼ်ႈမိူင်းဢၼ်ၼိၵ်ႈၸၢၵ်ႈငႅၼ်းသေးသူၼၼ်ႉဢေႃႈ။
၁၉ ၵူၺ်းၵႃႈသူပႄႇပႅတ်ႈၽြႃးပဵၼ်ၸဝ်ႈသူဢၼ်ၵႄႇသႄႇဢဝ်သူလွတ်ႈသေၵႃႈၼႂ်းၽေးဢူးပၢတ်ႈတုၵ်ႉၶႃႉတၢင်းၽၢၼ်ၵႃႈမီးၼၼ်ႉသေယဝ်ႉဝၼ်းမိူဝ်ႈၼႆႉသူဢွၼ်ၵၼ်လဝ်ႈလၢတ်ႈတီႈမၼ်းၸဝ်ႈဝႃႈ၊-ယုၵ်ႉယွင်ႈၶုၼ်ႁေႃၶမ်းဝႆႉၵႃႈၼိူဝ်ႁဝ်းသေၵမ်း၊ဝႃႈၼင်ႇၼႆယဝ်ႉ။ပိူဝ်ႈဢၼ်ပဵၼ်ၼင်ႇၼႆလႄႈၸွမ်းလူၺ်ႈမဵဝ်းၽႂ်မဵဝ်းမၼ်းယေႈႁဵင်ယေႈႁဵင်ၼင်ႇၵၼ်ႁင်းၽႂ်ႁင်းမၼ်းဢွၼ်ၵၼ်သုတ်ႉၸပ်းသုတ်ႉၸူးၵႃႈတီႈၽၢႆႇၼႃႈထႃႇဝရႃႉၽြႃးတႃႉ၊ဝႃၼင်ႇၼႆဢေႃႈ။
၂၀ ၼင်ႇၼၼ်လႄႈမဵဝ်းဢိသရေႇလတင်းလၢႆသုတ်ႉၸပ်းသုတ်ႉၸူးလႄႈသမူၺ်ႇလလိူၵ်ႈၵဵပ်းဢဝ်မဵဝ်းပိၼ်ႇယႃႇမိၼ်ႇလႆႈၶၢမ်ႇတၢင်း၂၁ ဢၼ်မၼ်းၸဝ်ႈမၢတ်ႈမၢႆဢေႃႈ။
၂၁ မၼ်းႁႂ်ႈမဵဝ်းပိၼ်ႇယႃႇမိၼ်ႇသုတ်ႉၸပ်းသုတ်ႉၸူးၸွမ်းလူၺ်ႈမဵဝ်းပီႈမဵဝ်းၼွင်ႉႁင်းၽႂ်ႁင်းမၼ်းလႄႈမဵဝ်းပီႈမဵဝ်းၼွင်ႉမႃႇတရိလႆႈၶၢမ်ႇတၢင်းဢၼ်မၼ်းၸဝ်ႈမၢတ်ႈမၢႆဢေႃႈ။တီႈလိုၼ်းသုတ်းသေႃးလုလုၵ်ႈၸၢႆးၵိသၼၼ်ႉလႆႈၶၢမ်ႇတၢင်းဢၼ်မၼ်းၸဝ်ႈမၢတ်ႈမၢႆဢေႃႈ။
၂၂ မိူဝ်ႈဢၼ်ၶဝ်ႁႃမၼ်းၼၼ်ႉၸိုင်၊ဢမ်ႇထူပ်းဢမ်ႇႁၼ်မၼ်း။ၶဝ်သမ်ႉလဝ်ႈထၢမ်တီႈထႃႇဝရႃႉၽြႃးထႅင်ႈလႄႈဝႃႈ၊-ၸွင်ႇမၼ်းမႃးၵႃႈတီႈၼႆႉႁိုဝ်၊ဝႃႈၼင်ႇၼႆဢေႃႈ။ထႃႇဝရႃႉၽြႃးမီးဢမိင်ႉလႄႈဝႃႈ၊-မၼ်းပၢႆတဵတ်ႇမႅပ်းယူႇၵႃႈၼႂ်းၵႄႈၶူဝ်းလဵင်းၸိူဝ်းၼၼ်ႉဢိူဝ်ႈ၊ဝႃႈၼင်ႇၼႆဢေႃႈ။
၂၃ ၶဝ်ဢွၼ်ၵၼ်လႅၼ်ႈၵႂႃႇလႄႈႁွင်ႉဢဝ်မၼ်းဢွၵ်ႇမႃးဢေႃႈ။သေႃးလုၼၼ်ႉမိူဝ်ႈဢၼ်ၸုၵ်းၵႃႈၼႂ်းၵႄႈၵၢင်ၵူၼ်းတင်းလၢႆၼၼ်ႉၸိုင်မၼ်းသုင်ပူၼ်ႉသေပိူၼ်ႈၵႃႈၼႂ်းၵူၼ်းတင်းသဵင်ႈတင်းလူင်ၸိူဝ်းၼၼ်ႉဢေႃႈ။
၂၄ သမူၺ်ႇလၵေႃႈလၢတ်ႈတီႈၵူၼ်းတင်းသဵင်ႈတင်းလူင်လႄႈဝႃႈ၊-ဢွၼ်ၵၼ်တူၺ်းၵေႃႉဢၼ်ထႃႇဝရႃႉၽြႃးလိူၵ်ႈၵဵပ်းဢဝ်ၼႆႉတႃႉ။ၼႂ်းၵူၼ်းတင်းသဵင်ႈတင်းလူင်ၵေႃႉဢၼ်မိူၼ်ၵၼ်တင်းမၼ်းဢမ်ႇမီးသေၵေႃႉသေၵူၼ်း၊ဝႃႈၼင်ႇၼႆသေယဝ်ႉၵူၼ်းတင်းသဵင်ႈတင်းလူင်ၵေႃႈႁွင်ႉသႅၼ်ႇလႄႈဝႃႈ၊-ႁႂ်ႈဢသၢၵ်ႈၸဝ်ႈၶုၼ်ႁေႃၶမ်းႁဝ်းယိုၼ်းယၢဝ်းသေၵမ်းလူၺ်ႈ၊ဝႃႈၼင်ႇၼႆဢေႃႈ။
၂၅ သမူၺ်ႇလၵေႃႈဢဝ်မၢႆမီႈတြႃးဢၼ်ၶုၼ်တၵ်းလႆႈဢုပ်ႉပိူင်ႇႁဵတ်းၸွမ်းၼၼ်ႉမွၵ်ႇလၢတ်ႈတီႈၵူၼ်းတင်းလၢႆလႄႈတႅမ်ႈသႂ်ႇဝႆႉၵႃႈၼႂ်းလိၵ်ႈသေယဝ်ႉဢဝ်ဝႆႉၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။ဝၢႆးၼၼ်ႉသမူၺ်ႇလႁႂ်ႈၵူၼ်းတင်းသဵင်ႈတင်းလူင်ၶိုၼ်းမိူဝ်းၵႂႃႇၸူးၵႃႈတီႈႁိူၼ်းၽႂ်ႁိူၼ်းမၼ်းသေဢေႃႈ။
၂၆ သေႃးလုၵေႃႈၶိုၼ်းၵႂႃႇၸူးၵႃႈတီႈႁိူၼ်းမၼ်းၵႃႈတီႈဝဵင်းၵိပႃႇလႄႈမုၵ်ႉၵူၼ်းၸိူဝ်းဢၼ်ၽြႃးပဵၼ်ၸဝ်ႈတိုၵ်းယူင်းႁူဝ်ၸႂ်ၶဝ်ၼၼ်ႉၵေႃႈဢွၼ်ၵၼ်ၸွမ်းမၼ်းၵႂႃႇဢေႃႈ။
၂၇ ၵူၺ်းၵႃႈၵူၼ်းႁၢႆႉၵမ်ႈၽွင်ႈဢွၼ်ၵၼ်လၢတ်ႈဝႃႈ၊-ၵေႃႉၼႆႉတၵ်းႁဵတ်းႁိုဝ်ၵႄႇသႄႇဢဝ်ႁဝ်းလွတ်ႈလႆႈ၊ဝႃႈၼင်ႇၼႆသေလႄႈယင်းဢမ်ႇသၢၵ်ႈဢမ်ႇပၼ်လၢၵ်ႈသွင်ႇၵႃႈသင်လႄႈႁဵတ်းဢမ်ႇပေႃးၼင်ႇႁိုဝ်တီႈမၼ်းဢေႃႈ။သေႃးလုဢမ်ႇတၵ်ႉသဵင်သင်လႄႈယူႇဢေႃႈ။