Chapter
၁၅
ၽြႃးပဵၼ်ၸဝ်ႈၸုၼ်ႉပႅတ်ႈၶုၼ်ႁေႃၶမ်းသေႃးလု
၁ လၢႆးသမ်ႉသမူၺ်ႇလလၢတ်ႈတီႈသေႃးလုလႄႈဝႃႈ၊-ထႃႇဝရႃႉၽြႃးပွႆႇၸႂ်ႉၵဝ်ႁႂ်ႈၵဝ်လႆႈပၼ်ၽိၵ်ႈသိၵ်ႈတီႈမႂ်းႁႂ်ႈမႂ်းလႆႈဢုပ်ႉပိူင်ႇၵူၼ်းမၼ်းၸဝ်ႈမဵဝ်းဢိသရေႇလမႃးယဝ်ႉ။ပိူဝ်ႈၼႆလႄႈမိူဝ်ႈလဵဝ်ၼႆႉထွမ်ႇငိၼ်းၵႂၢမ်းထႃႇဝရႃႉၽြႃးတႃႉ။
၂ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၵဝ်တၵ်းပၼ်တၢမ်ႇၵူၼ်းမဵဝ်းဢႃႇမလိၵ်ႉၶဝ်ၵွပ်ႈပိူဝ်ႈလွင်ႈတၢင်းဢၼ်ၶဝ်ႁဵတ်းတီႈမဵဝ်းဢိသရေႇလလႄႈႁၢမ်ႈတပ်ႉႁႄႉၶႅၼ်ၶဝ်ၼႂ်းသဵၼ်ႈတၢင်းၶဝ်မိူဝ်ႈဢၼ်ၶဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉဢေႃႈ။
၃ မိူဝ်ႈလဵဝ်ၼႆႉၵႂႃႇလႄႈတိုၵ်းတေႃးယႃႉပႅတ်ႈမဵဝ်းဢႃႇမလိၵ်ႉၼၼ်ႉတႃႉ။ယင်းဢမ်ႇမီးတၢင်းဢၼ်သလေၢႆလႄႈယႃႉၽဵဝ်ႈပႅတ်ႈၵႃႈဢၼ်ၶဝ်မီးၼၼ်ႉမူတ်းမူတ်းသဵင်ႈသဵင်ႈတႃႉ။ဢဝ်တၢႆၵူၼ်းၸၢႆး၊ၵူၼ်းယိင်း၊လုၵ်ႈဢွၼ်ႇ၊လုၵ်ႈဢွၼ်ႇလႅင်ႊဢၼ်ၵိၼ်ၼူမ်းယူႇ၊သူဝ်း၊ဝူဝ်း၊ၵလႃႇဢုၵ်ႉ၊မႃႉလီႈတင်းလၢႆတႃႉ၊ဝႃႈၼင်ႇၼႆဢေႃႈ။
၄ သေႃးလုၵေႃႈႁႂ်ႈၵူၼ်းတင်းလၢႆၸူႉၵၼ်တုမ်ၵၼ်သေယဝ်ႉဢဝ်ၸရၢင်းၶဝ်ၵႃႈတီႈဝဵင်းတေႇလိမ်ႇလႄႈမီးႁူဝ်ႁၢၼ်ၵူၼ်းသိုၵ်းပႆတိၼ်သွင်သႅၼ်၊ႁူဝ်ႁၢၼ်ၵူၼ်းသိုၵ်းယုတမိုၼ်ႈၼိုင်ႈဢေႃႈ။
၅ သေႃးလုၵေႃႈၶီႇသိုၵ်းၸူးၵႃႈတီႈဝဵင်းဢႃႇမလိၵ်ႉသေယဝ်ႉမူၵ်းသိုၵ်းယူႇၵႃႈတီႈၶူင်ႈႁူၺ်ႈသေဢေႃႈ။
၆ သေႃးလုသင်ႇလၢတ်ႈၵႃႈတီႈၵူၼ်းၵေႇၼိတင်းလၢႆလႄႈဝႃႈ၊-သူဢွၼ်ၵၼ်ဢွၵ်ႇလႄႈလူင်းၵႂႃႇသေၵႃႈၼႂ်းၵူၼ်းဢႃႇမလိၵ်ႉၸိူဝ်းၼၼ်ႉတႃႉ။ပေႃးဢမ်ႇၼၼ်သူၵေႃႈတၵ်းပႃးၸွမ်းၵႂႃႇၵႃႈၼႂ်းတၢင်းဢၼ်ယႃႉပႅတ်ႈၼၼ်ႉဢေႃႈ။လွင်ႈမၼ်းၸမ်းသူလႆႈႁဵတ်းၵျေးၸူးဝႆႉတီႈၵူၼ်းမဵဝ်းဢိသရေႇလၶဝ်ၼႂ်းမိူဝ်ႈၶဝ်ဢၼ်ၶဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉယဝ်ႉ၊ဝႃႈၼင်ႇၼႆလႄႈၵူၼ်းၵေႇၼိၸိူဝ်းၼၼ်ႉၵေႃႈဢွၼ်ၵၼ်ဢွၵ်ႇၵႂႃႇသေၵႃႈၼႂ်းၵူၼ်းဢႃႇမလိၵ်ႉၸိူဝ်းၼၼ်ႉၵႂႃႇဢေႃႈ။
၇ သေႃးလုတိုၵ်းတေႃးယႃႉပႅတ်ႈၵူၼ်းဢႃႇမလိၵ်ႉၸိူဝ်းၼၼ်ႉဢဝ်ၸႃႉၸဵမ်တီႈဝဵင်းႁႃႇဝိလၸူးသဵၼ်ႈတၢင်းဢၼ်ၵႂႃႇၸူးဝဵင်းသုရဢၼ်သိုဝ်ႈမိူင်းဢေႇၵႅပ်ႉတုၼၼ်ႉဢေႃႈ။
၈ မၼ်းတီႉလႆႈတူဝ်လိပ်းဢႃႇၵတ်ႉၶုၼ်ႁေႃၶမ်းဢႃႇမလိၵ်ႉၼၼ်ႉသေယဝ်ႉယႃႉၽဵဝ်ႈပႅတ်ႈၵူၼ်းတင်းသဵင်ႈတင်းလူင်မူတ်းမူတ်းသဵင်ႈသဵင်ႈလူၺ်ႈၶူမ်းလၢပ်ႇၶူမ်းလႅဝ်းဢေႃႈ။
၉ ၵူၺ်းၵႃႈသေႃးလုဢိၵ်ႇတင်းၵူၼ်းတင်းလၢႆပၼ်ၶျၢမ်းသႃႇၶုၼ်ဢႃႇၵတ်ႉတင်းသူဝ်းဝူဝ်းပၢၼ်ၵၢင်သူဝ်းဢၼ်ပီးလီမၼ်းလီ၊သူဝ်းဢွၼ်ႇတင်းလၢႆၵႃႈဢၼ်ပဵၼ်ဢၼ်လီဢၼ်ငၢမ်းၸိူဝ်းၼၼ်ႉလႄႈဢမ်ႇယႃႉဢမ်ႇၽဵဝ်ႈၶဝ်ပႅတ်ႈမူတ်းမူတ်းသဵင်ႈသဵင်ႈ။ၶဝ်ၵူၺ်းယႃႉဢၼ်ဢမ်ႇၶဝ်ႈဢသုင်းသင်ဢၼ်ယုတ်ႈဢၼ်ယွၵ်းၸိူဝ်းၼၼ်ႉၵူၺ်းမူတ်းမူတ်းသဵင်ႈသဵင်ႈဢေႃႈ။
၁၀ မိူဝ်ႈၼၼ်ႉၼုၵ်ႈၵပၢတ်ႈထႃႇဝရႃႉၽြႃးႁွတ်ႈမႃးတီႈသမူၺ်ႇလလႄႈဝႃႈၸမ်း၊-ၵဝ်မီးတၢင်းဢၼ်ၽိတ်းၸႂ်ၵွပ်ႈပိူဝ်ၵဝ်လႆႈဢဝ်သေႃးလုၶၢၼ်းဝႆႉၼႂ်းဢရႃႇၶုၼ်ႁေႃၶမ်းၼၼ်ႉဢေႃႈ။
၁၁ မၼ်းဝၢႆႇၶိုၼ်းသေလႄႈဢမ်ႇၸွမ်းလင်ၵဝ်၊ဢမ်ႇပႂ်ႉၵမ်ပႂ်ႉၸွမ်းပိင်းၺၢပ်ႈၵဝ်၊ဝႃႈၼင်ႇၼႆဢေႃႈ။သမူၺ်ႇလမႆႈၸႂ်ၶီၸႂ်ၼႃႇလူင်လၢင်လႄႈႁွင်ႉသႅၼ်ႇတီႈထႃႇဝရႃႉၽြႃးတင်းၶိုၼ်းဢေႃႈ။
၁၂ မၼ်းလုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈၵႂႃႇႁႂ်ႈလႆႈႁပ်ႉႁူဝ်တၢင်းသေႃးလုဢေႃႈ။ၵူၺ်းၵႃႈပိူၼ်ႈလၢတ်ႈဝႃႈ၊-သေႃးလုၵႂႃႇႁွတ်ႈထိုင်တီႈဝဵင်းၵရမေႇလလႄႈပူၵ်းသဝ်းပေႉၼႅင်ႇသေယဝ်ႉဢဝ်ၵုင်ႇဢဝ်မူၼ်ႈတူဝ်ၸဝ်ႈၵဝ်ႇလႄႈလူင်းၸူးၵႃႈတီႈဝဵင်းၵိလၵႃႇလယဝ်ႉ၊ဝႃႈၼႆဢေႃႈ။
၁၃ သမူၺ်ႇလၵႂႃႇၸူးၵႃႈတီႈသေႃးလုလႄႈသေႃးလုၵေႃႈတၵ်းလၢတ်ႈလႄႈဝႃႈ၊-ႁႂ်ႈထႃႇဝရႃႉၽြႃးပၼ်တၢင်းလီတီႈၸဝ်ႈသေၵမ်းလူၺ်ႈ။ၵဝ်ၶႃႈႁဵတ်းၸွမ်းၵႃႈၼင်ႇဢၼ်ဢမိင်ႉထႃႇဝရႃႉၽြႃးမီးၼၼ်ႉယဝ်ႉၶႃႈယဝ်ႉ၊ဝႃႈၼင်ႇၼႆဢေႃႈ။
၁၄ သမူၺ်ႇလၵေႃႈထၢမ်ႇလႄႈဝႃႈ၊-ပေႃးပဵၼ်ၸိူဝ်ႉၼင်ႇၼၼ်ၸိုင်သဵင်သူဝ်းဢၼ်ႁွင်ႉယူႇၵႃႈၼႂ်းႁူၵဝ်၊သဵင်ဝူဝ်းဢၼ်ႁွင်ႉဢၼ်ၵဝ်လႆႈငိၼ်းၼၼ်ႉၸမ်းပဵၼ်ၸိူဝ်ႉၼင်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်သေႃးလုလၢတ်ႈလႄႈဝႃႈ၊-
၁၅ ၵူၼ်းသိုၵ်းၶဝ်ဢဝ်ၸိူဝ်းၼၼ်ႉၵႃႈတီႈၵူၼ်းမဵဝ်းဢႃႇမလိၵ်ႉတင်းလၢႆပုၼ်ႈမႃးၶႃႈယဝ်ႉ။ၶဝ်ႁႂ်ႈၵိုတ်းၵျၢၼ်ႇဝႆႉသူဝ်းဝူဝ်းဢၼ်လီၼႃႇသေပိူၼ်ႈၸိူဝ်းၼၼ်ႉႁႂ်ႈလႆႈပဵၼ်ယိၸ်ႉဢၼ်တၵ်းလႆႈပုၵ်ႉၸေႃႇတီႈထႃႇဝရႃႉၽြႃးၽြႃးပဵၼ်ႈၸဝ်ႈၸဝ်ႈႁဝ်းၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။
၁၆ သမူၺ်ႇလၵေႃႈလၢတ်ႈတီႈသေႃးလုလႄႈဝႃႈ၊-ၵိုတ်းသဝ်းလူးၵွၼ်ႇ။ၵဝ်တၵ်းမွၵ်ႇလၢတ်ႈပၼ်မႂ်းၵႂၢမ်းဢၼ်ထႃႇဝရႃႉၽြႃးမီးဢမိင်ႉတီႈၵဝ်မိူဝ်ႈၶမ်ႈဝႃးၼၼ်ႉလူးၵွၼ်ႇဢေႃႈ၊ဝႃႈၼင်ႇၼႆဢေႃႈ။သေႃးလုၵေႃႈလၢတ်ႈဝႃႈ၊-လၢတ်ႈသေၵမ်းၶႃႈ၊ဝႃႈၼင်ႇၼႆဢေႃႈ။
၁၇ သမူၺ်ႇလၵေႃႈလၢတ်ႈလႄႈဝႃႈ၊-ပဵၵ်ႉသမ်ႉမႂ်းပဵၼ်ၵေႃႉဢၼ်လဵၵ်ႉဢၼ်ၼွႆႉယူႇသေၵေႃႈမႂ်းႁွတ်ႈထိုင်ၵႃႈတီႈၸိၵ်းၸွမ်မဵဝ်းဢိသရေႇလတင်းလၢႆလႄႈလႆႈပဵၼ်ၶုၼ်ႁေႃၶမ်းယဝ်ႉဢမ်ႇၸႂ်ႈႁိုဝ်။ထႃႇဝရႃႉၽြႃးပၼ်ၽိၵ်ႈသိၵ်ႈတီႈမႂ်းႁႂ်ႈမႂ်းပဵၼ်ၶုၼ်ႁေႃႇၶမ်းဢိသရေႇလဢေႃႈ။
၁၈ ထႃႇဝရႃႉၽြႃးမီးဢမိင်ႉလႄႈပွႆႇၸႂ်ႉမႂ်းၵႂႃႇၵႃႈတီႈဢၼ်ၵႆႁႂ်ႈလႆႈၵႂႃႇတိုၵ်းတေႃးယႃႉၽဵဝ်ႈပႅတ်ႈၵူၼ်းမဵဝ်းဢႃႇမလိၵ်ႉၸိူဝ်းၼၼ်ႉတေႃႇထိုင်ႁွတ်ႈထၼ်ႈပေႃးလူႉလႅဝ်ႁၢႆလၢႆၵႂႃႇဢမ်ႇၸႂ်ႈႁိုဝ်။
၁၉ ၵွပ်ႈပိူဝ်ႈၸိူဝ်ႉၼင်ႇႁိုဝ်မႂ်းယင်းဢမ်ႇထွမ်ႇဢမ်ႇဢဝ်ဢမိင်ႉၽြႃးပဵၼ်ၸဝ်ႈလႄႈႁိမ်ႁူင်ႈဢဝ်ၶူဝ်းလဵင်းရၢၼ်ႇသူႇၸိူဝ်းၼၼ်ႉသေလႄႈႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးယဝ်ႉ၊
၂၀ မိူဝ်ႈဢၼ်ဝႃႈၼင်ႇၼႆၸိုင်၊သေႃးလုလၢတ်ႈတီႈသမူၺ်ႇလလႄႈဝႃႈ၊-ၵဝ်ၶႃႈထွမ်ႇဢဝ်ဢမိင်ႉထႃႇဝရႃႉၽြႃးဢမၢၼ်ႇၶၢၼ်ပဵၼ်ယဝ်ႉလႄႈၸွမ်းသဵၼ်ႈတၢင်းဢၼ်ထႃႇဝရႃႉၽြႃးပွႆႇၸႂ်ႉၵဝ်ၶႃႈၼၼ်ႉယဝ်ႉ။ၵဝ်ၶႃႈဢဝ်ဢႃႇၵတ်ႉ၊ၶုၼ်ႁေႃၶမ်းဢႃႇမလိၵ်ႉမႃးလႄႈယႃႉၽဵဝ်ႈၵူၼ်းမဵဝ်းဢႃႇမလိၵ်ႉတင်းလၢႆပႅတ်ႈမူတ်းမူတ်းသဵင်ႈသဵင်ႈယဝ်ႉ။
၂၁ ၵူၺ်းၵႃႈၵူၼ်းသိုၵ်းတင်းလၢႆဢွၼ်ၵၼ်သိမ်းဢဝ်သူဝ်းဝူဝ်းဢၼ်လီသေပိူၼ်ႈၸိူဝ်းၼၼ်ႉဢွၵ်ႇသေၵႃႈၼႂ်းလွင်ႈတၢင်းဢၼ်ႁိမ်ႁူင်ႇဢဝ်တင်းလၢႆၼၼ်ႉႁႂ်ႈလႆႈဢဝ်ပုၵ်ႉၸေႃႇယိၸ်ႉတီႈထႃႇဝရႃႉၽြႃးၽြႃးပဵၼ်ၸဝ်ႈၸဝ်ႈႁဝ်းၵႃႈၼႂ်းဝဵင်းၵိလၵႃႇလၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။
၂၂ သမူၺ်ႇလၵေႃႈလၢတ်ႈလႄႈဝႃႈ၊-ထႃႇဝရႃႉၽြႃးထုၵ်ႇၸႂ်ၵျိူၵ်ႈၸႂ်တၢင်းဢၼ်ထွမ်ႇဢဝ်ဢမိင်ႉမၼ်းၸဝ်ႈမိူၼ်ၸိူဝ်ႉၼင်ႇမၼ်းၸဝ်ႈထုၵ်ႇၸႂ်ၵျိူၵ်ႈၸႂ်ယိၸ်ႉဢၼ်ပုၵ်ႉၸေႃႇၼၼ်ႉဢေႃႈ။တူၺ်းလူး။တၢင်းဢၼ်ၸွမ်းဢႃလူဝ်ႇၸဝ်ႈၼၼ်ႉယိင်ႈၶႅၼ်းလီသေၵွၼ်ႈၶႆၵွၼ်ႈမၼ်းသူဝ်းပေႃႈဢေႃႈ။
၂၃ သၽေႃးဢၼ်တွပ်ႇဢၼ်ထဵင်ၼၼ်ႉပဵၼ်ၸိူဝ်ႉၼင်ႇဢၼ်ႁဵတ်းၵေႃႉႁူမ်ႈပွင်းလူၺ်ႈၵၼ်တင်းၽီႁၢႆႉဢေႃႈ။သၽေႃးဢၼ်ၵႅၼ်ႇၶႅင်ၼၼ်ႉပဵၼ်ၸိူဝ်ႉၼင်ႇတၢင်းဢၼ်ဢမ်ႇႁူႉၽြႃးတြႃးလႄႈၵူဝ်းၵႂၢႆႇရုၵ်ႈထူႉၼၼ်ႉဢေႃႈ။ၵွပ်ႈပိူဝ်ႈဢၼ်မႂ်းပႄႇပႅတ်ႈၵႂၢမ်းထႃႇဝရႃႉၽြႃးၼၼ်ႉလႄႈမၼ်းၸဝ်ႈပႄႇပႅတ်ႈမႂ်းသေၵႃႈၼႂ်းဢရႃႇၶုၼ်ႁေႃၶမ်းယဝ်ႉ၊ဝႃႈၼင်ႇၼႆဢေႃႈ။
၂၄ သေႃးလုၵေႃႈတွင်းပၢၼ်တီႈသမူၺ်ႇလလႄႈဝႃႈ၊-ၵဝ်ၶႃႈၽိတ်းပိူင်ႈၶႃႈယဝ်ႉ။ၵဝ်ၶႃႈပူၼ်ႉလိူဝ်ဢမိင်ႉထႃႇဝရႃႉၽြႃးဢိၵ်ႇတင်းၵႂၢမ်းဢၼ်ၸဝ်ႈလၢတ်ႈၼၼ်ႉၵွပ်ႈပိူဝ်ႈဢၼ်ၵဝ်ၶႃႈၵူဝ်ၵူၼ်းတင်းလၢႆလႄႈထွမ်ႇဢဝ်ၵႂၢမ်းၶဝ်ၼၼ်ႉၶႃႈယဝ်ႉ။
၂၅ မိူဝ်ႈလဵဝ်ႈၼႆႉၸိုင်ယိူၼ်ႉၶၢမ်ႇၵဝ်ၶႃႈသေၵမ်း၊ဝႃႈၼင်ႇၼႆသေၵေႃႈသမူၺ်ႇလလၢတ်ႈတီႈသေႃးလုလႄႈဝႃႈ၊-ၵဝ်တၵ်းဢမ်ႇၶိုၼ်းမိူဝ်းလူၺ်ႈၵၼ်တင်းမႂ်း။
၂၆ ၵွပ်ႈပိူဝ်ႈမႂ်းပႄႇပႅတ်ႈဢမိင်ႉထႃႇဝရႃႉၽြႃးလႄႈထႃႇဝရႃႉၽြႃးပႄႇပႅတ်ႈမႂ်းသေၵႃႈၼႂ်းဢရႃႇၶုၼ်ႁေႃၶမ်းၼၼ်ႉယဝ်ႉ၊ဝႃႈၼင်ႇၼႆဢေႃႈ။
၂၇ မိူဝ်ႈဢၼ်သမူၺ်ႇလဝၢႆႇၶိုၼ်းႁႂ်ႈလႆႈမိူဝ်းၵႂႃႇၼၼ်ႉၸိုင်မၼ်းယိပ်းၸၼ်ႁိမ်းၸဵင်ႇသိူဝ်ႈယၢဝ်းသမူၺ်ႇလလႄႈသိူဝ်ႈယၢဝ်းမၼ်းသိၵ်ႇၶၢတ်ႇၵႂႃႇဢေႃႈ။
၂၈ သမူၺ်ႇလၵေႃႈလၢတ်ႈတီႈမၼ်းလႄႈဝႃႈ၊-ဝၼ်းမိူဝ်ႈၼႆႉထႃႇဝရႃႉၽြႃးသိၵ်ႇဢဝ်သိုင်ႇၸိုင်ႈဝၢၼ်ႈမိူင်းဢိသရေႇလဢွၵ်ႇသေၵႃႈတီႈမႂ်းလႄႈပၼ်တီႈၵူၼ်းႁိူၼ်းဢၼ်ၸမ်ၵၼ်တင်းမႂ်းဢၼ်လီသမေ်းႂၼၼ်ႉယဝ်ႉ။ၽူႈဢၼ်ပဵၼ်မူၼ်ႈၽုင်းဢႃႇၼူႉၽေႃႇမဵဝ်းဢိသရေႇလၼၼ်ႉဢမ်ႇသုင်းမူႉသႃႇ၊ဢမ်ႇၶၢႆႉပုတ်ႉဢမ်ႇလႅၵ်ႈလၢႆ။
၂၉ လွင်ႈမၼ်းၸမ်းမၼ်းၸဝ်ႈဢမ်ႇၸႂ်ႈၵူၼ်းဢၼ်မေႃၶၢႆႉပုတ်ႉလႅၵ်ႈလၢႆၼၼ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းတွင်းပၢၼ်လႄႈဝႃႈ၊-ၵဝ်ၶႃႈလႆႈၽိတ်းပိူင်ႈၶႃႈယဝ်ႉ။
၃၀ ၼႂ်းဝႃႈၼၼ်သေၵေႃႈမိူဝ်ႈလဵဝ်ၼႆႉၶႅၼ်းတေႃႈႁဵတ်းႁႂ်ႈမူၼ်ႈၵုင်ႇသရေႇၵဝ်ၶႃႈမီးၵႃႈတီႈၽၢႆႇၼႃႈၵူၼ်းဢၼ်ပဵၼ်ၵႄႇပဵၼ်ႁူဝ်ဢိၵ်ႇတင်းၼႂ်းၵူၼ်းမဵဝ်းၵဝ်ၶႃႈတင်းလၢႆဢိၵ်ႇတင်းၵႃႈတီႈၽၢႆႇၼႃႈမဵဝ်းဢိသရေႇလတင်းလၢႆသေၵမ်းၶႃႈ။
၃၁ ၶိုၼ်းမႃးၸွမ်းၵၼ်တင်းၵဝ်ၶႃႈႁႂ်ႈၵဝ်ၶႃႈလႆႈၵူဝ်းၵႂၢႆႇထႃႇဝရႃႉၽြႃးၽြႃးပဵၼ်ၸဝ်ႈၸဝ်ႈႁဝ်းၼၼ်ႉသေၵမ်းၶႃႈ၊ဝႃႈၼင်ႇၼႆလႄႈသမူၺ်ႇလၵေႃႈဝၢႆႇၶိုၼ်းသေယဝ်ႉၸွမ်းလင်သေႃးလုၵႂႃႇလႄႈသေႃးလုၼၼ်ႉႁဵတ်းဝၢတ်ႈၵူဝ်းၵႂၢႆႇထႃႇဝရႃႉၽြႃးဢေႃႈ။
၃၂ မိူဝ်ႈၼၼ်ႉသမူၺ်ႇလလၢတ်ႈလႄႈဝႃႈ၊-ႁွင်ႉဢဝ်ဢႃႇၵတ်ႉ၊ၶုၼ်ႁေႃၶမ်းဢႃႇမလိၵ်ႉ၊ၼၼ်ႉမႃးတီႈၵဝ်တႃႉ၊ဝႃႈၼင်ႇၼႆလႄႈဢႃႇၵတ်ႉၼၼ်ႉၸူမ်းၸူမ်းသိူဝ်းသိူဝ်းသေလႄႈမႃးဢေႃႈ။လွင်ႈမၼ်းၸမ်းဢႃႇၵတ်ႉထၢင်ႇဝႃႈၽေးတၢင်းတၢႆၼၼ်ႉပူၼ်ႉယဝ်ႉ၊ဝႃႈၼင်ႇၼႆဢေႃႈ။
၃၃ သမူၺ်ႇလလၢတ်ႈလႄႈဝႃႈ၊-ၸိူဝ်ႉၼင်ႇဢၼ်လၢပ်ႇမႂ်းလႅဝ်းမႂ်းႁဵတ်ႈႁႂ်ႈမေႈယိင်းတင်းလၢႆသုမ်းလုၵ်ႈသုမ်းလၢင်းၼၼ်ႉမေးမႂ်းတၵ်းလႆႈပဵၼ်မေႈယိင်းဢၼ်သုမ်းလုၵ်ႈသုမ်းလၢင်းၼႃႇသမေေႈယိင်းတင်းလၢႆဢေႃႈ၊ဝႃႈၼင်ႇၼႆသေယဝ်ႉသမူၺ်ႇလတႅပ်းဢႃႇၵတ်ႉပဵၼ်ပွတ်းပဵၼ်တွၼ်ႈၵႃႈတီႈၽၢႆႇၼႃႈထႃႇဝရႃႉၽြႃးၵႃႈၼႂ်းဝဵင်းၵိလၵႃႇလၼၼ်ႉဢေႃႈ။
၃၄ မိူဝ်ႈၼၼ်ႉသမူၺ်ႇလၵႂႃႇၵႃႈတီႈဝဵင်းရႃႇမလႄႈသေႃးလုၶိုၼ်းမိူဝ်းၵႂႃႇၵႃႈတီႈႁေႃၸဝ်ႈဝဵင်းၵိပႃႇတီႈယူႇမၼ်းၼၼ်ႉသေဢေႃႈ။
၃၅ လိုၼ်းၼၼ်ႉသမူၺ်ႇလဢမ်ႇမႃးသူႇမႃးၸႂ်းသေႃးလုတေႃႇထိုင်ႁွတ်ႈဝၼ်းဢၼ်မၼ်းႁွတ်ႈဢၼိၵ်ႉၸႃႉၼၼ်ႉဢေႃႈ။ၵူၺ်းၵႃႈသမူၺ်ႇလၼၼ်ႉၸႂ်ဢမ်ႇသႃႇၶၢင်းၶီၶၢင်းၽၢၼ်လူၺ်ႈလွင်ႈသေႃးလုယူႇဢေႃႈ။ထႃႇဝရႃႉၽြႃးၽိတ်းၸႂ်ၵွပ်ႈပိူဝ်ႈဢၼ်လႆႈၶၢၼ်းသေႃးလုၼႂ်းဢရႃႇၶုၼ်ႁေႃၶမ်းၼၼ်ႉဢေႃႈ။