Chapter
၁၆
သမူၺ်ႇလပၼ်ၽိၵ်ႉသိၵ်ႈတႃႇဝိတ်ႉ
၁ လၢႆးသမ်ႉထႃႇဝရႃႉၽြႃးမီးဢမိင်ႉတီႈသမူၺ်ႇလလႄႈဝႃႈ၊-ၵွပ်ႈပိူဝ်ႈဢၼ်ၵဝ်ပႄႇပႅတ်ႈသေႃးလုသေၵႃႈၼႂ်းဢရႃႇၶုၼ်ႁေႃၶမ်းဢိသရေႇလယဝ်ႉလႄႈမႂ်းတၵ်းၸႂ်ဢမ်ႇသႃႇၶၢင်းၶီၶၢင်းၽၢၼ်ယူႇၶိင်ႇၵႃႇလႃႉႁိုင်ၵႃႈႁိုဝ်။ဢဝ်ၼမ်ႉမၼ်းထႅမ်သႂ်ႇႁႂ်ႈၼမ်ႉတဝ်ႈမႂ်းတဵမ်တဵမ်လႄႈၵႂႃႇတႃႉ။ၵဝ်တၵ်းပွႆႇၸႂ်ႉမႂ်းၵႂႃႇၸူးၵႃႈတီႈယေႇသေႇ၊ၵူၼ်းဝဵင်းပႅတ်ႉလိႁႅမ်ႇၼၼ်ႉဢေႃႈ။ၵဝ်လႆႈလိူၵ်ႈၵဵပ်းဢဝ်လုၵ်ႈၸၢႆးမၼ်းၵေႃႉၼိုင်ႈႁႂ်ႈလႆႈပဵၼ်ၶုၼ်ႁေႃၶမ်းယဝ်ႉ၊ဝႃႈၼင်ႇၼႆဢေႃႈ။
၂ သမူၺ်ႇလလဝ်ႈလၢတ်ႈလႄႈဝႃႈ၊-ၶႃႈၸဝ်ႈတၵ်းႁဵတ်းၸိူဝ်ႉၼင်ႇႁိုဝ်ၵႂႃႇလႆႈတီႈၶႃႈ။ပေႃးသေႃးလုငိၼ်းၸိုင်မၼ်းတၵ်းဢဝ်ၶႃႈၸဝ်ႈတၢႆတီႈၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်ထႃႇဝရႃႉၽြႃးမီးဢမိင်ႉလႄႈဝႃႈ၊-ပႃးဢဝ်ဝူဝ်းမေႈသိုဝ်ႇသေလႄႈဝႃႈၵဝ်မႃးႁႂ်ႈလႆႈပုၵ်ႉၸေႃႇယိၸ်ႉတီႈထႃႇဝရႃႉၽြႃးယဝ်ႉ၊ဝႃႈၼင်ႇၼႆတႃႉ။
၃ ယေႇသေႇၼၼ်ႉၵေႃႈႁွင်ႉပၢင်းဢဝ်မႃးၵႃႈတီႈပွႆးယိၸ်ႉတႃႉ။မိူဝ်ႈၼၼ်ႉၵဝ်တၵ်းၼႄပျႃးတီႈမႂ်းလွင်ႈဢၼ်မႂ်းတၵ်းလႆႈႁဵတ်းၸိူဝ်ႉၼင်ႇႁိုဝ်ၼၼ်ႉဢေႃႈ။မႂ်းတၵ်းလႆႈပၼ်ၽိၵ်ႈသိၵ်ႈတီႈၵေႃႉဢၼ်ၵဝ်ၼႄပျႃႉတီႈမႂ်းၼၼ်ႉဢေႃႈ၊ဝႃႈၼင်ႇၼႆဢေႃႈ။
၄ သမူၺ်ႇလၵေႃႈႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉၼၼ်ႉလႄႈၵႂႃႇၵႃႈတီႈဝဵင်းပႅတ်ႉလိႁႅမ်ႇဢေႃႈ။မိူဝ်ႈၼၼ်ႉၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းဝဵင်းပႅတ်ႉလိႁႅမ်ႇၼၼ်ႉသၼ်ႇသၼ်ႇသၢႆသၢႆယူႇသေလႄႈဢွၼ်ၵၼ်ဢွၵ်ႇမႃးႁႂ်ႈလႆႈႁပ်ႉႁူဝ်တၢင်းမၼ်းလႄႈလဝ်ႈထၢမ်လႄႈဝႃႈ၊-ၸဝ်ႈႁဝ်းမႃးႁႂ်ႈလႆႈပဵၼ်ၵတ်းယဵၼ်ၶျၢမ်းသႃႇၶႃႈႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၵေႃႈလၢတ်ႈလႄႈဝႃႈ၊-ဢေႃႈ။
၅ ၵဝ်မႃးႁႂ်ႈလႆႈပၼ်ၵတ်းယဵၼ်ၶျၢမ်းသႃႇဢေႃႈ။ၵဝ်မႃးႁႂ်ႈလႆႈပုၵ်ႉၸေႃႇယိၸ်ႉတီႈထႃႇဝရႃႉၽြႃးယဝ်ႉ။ႁႂ်ႈတူဝ်သူမူတ်းၸၢင်ႇသေလႄႈမႃးတီႈပွႆးယိၸ်ႉႉႁူမ်ႈလူၺ်ႈၵၼ်တင်းၵဝ်တႃႉ၊ဝႃႈၼင်ႇၼႆသေယဝ်ႉမၼ်းႁဵတ်းႁႂ်ႈယေႇသေႇဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉမူတ်းၸၢင်ႇလႄႈႁွင်ႉပၢင်းၶဝ်မႃးၵႃႈတီႈပွႆးယိၸ်ႉဢေႃႈ။
၆ မိူဝ်ႈဢၼ်ၶဝ်ႁွတ်ႈမႃးၼၼ်ႉၸိုင်မၼ်းႁၼ်ဢေႇလျႃႇၽလႄႈထၢင်ႇၼႂ်းၸႂ်ဝႃႈ၊-ၵေႃႉဢၼ်ၸုၵ်းယူႇၵႃႈတီႈၼႆႉပဵၼ်ၵေႃႉဢၼ်လႆႈၶၢမ်ႇၽိၵ်ႈသိၵ်ႈထႃႇဝရႃႉၽြႃးၼၼ်ႉယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊ထႃႇဝရႃႉၽြႃးမီးဢမိင်ႉတီႈသမူၺ်ႇလလႄႈဝႃႈ၊-ယႃႇပေႇတူၺ်းၼႃႈတႃမၼ်းတၢင်းသုင်မၼ်း။
၇ ၵဝ်ပႄႇမၼ်းပႅတ်ႈယဝ်ႉ။ထႃႇဝရႃႉၽြႃးဢမ်ႇတူၺ်းမိူၼ်ၸိူဝ်ႉၼင်ႇၵူၼ်းၸၢင်ႊမေႃတူၺ်းၼၼ်ႉ။ၵူၼ်းၸၢင်ႊမေႃတူၺ်းႁၢင်ႊၽၢင်တၢင်းၼွၵ်ႈၵူၺ်းဢေႃႈ။ထႃႇဝရႃႉၽြႃးတူၺ်းႁူဝ်ၸႂ်ဢေႃႈ၊ဝႃႈၼင်ႇၼႆဢေႃႈ။
၈ လၢႆးသမ်ႉယေႇသေႇႁွင်ႉဢဝ်ဢၽိၼတပ်ႉလႄႈႁႂ်ႈမၼ်းပႆႈၵႂႃႇၽၢႆႇၼႃႈသမူၺ်ႇလဢေႃႈ။သမူၺ်ႇလလၢတ်ႈလႄႈဝႃႈ၊-ၵေႃႉၼႆႉၵေႃႈဢမ်ႇၸႂ်ႈၵေႃႉဢၼ်ထႃႇဝရႃႉၽြႃးလိူၵ်ႈၵဵပ်းဢဝ်ၼၼ်ႉ၊ဝႃႈၼင်ႇၼႆဢေႃႈ။
၉ လၢႆးသမ်ႉယေႇသေႇႁႂ်ႈသိမႃႇပႆၵႂႃႇၽၢႆႇၼႃႈသမူၺ်ႇလဢေႃႈ။သမူၺ်ႇလၵေႃႈဝႃႈ၊-ၵေႃႉၼႆႉၵေႃႈဢမ်ႇၸႂ်ႈၵေႃႉဢၼ်ထႃႇဝရႃႉ၁၀ ၽြႃးလိူၵ်ႈၵဵပ်းဢဝ်ၼၼ်ႉ၊ဝႃႈၼင်ႇၼႆဢေႃႈ။
၁၀ လၢႆးသမ်ႉယေႇသေႇၼၼ်ႉႁႂ်ႈလုၵ်ႈၸၢႆးမၼ်းတင်းၸဵတ်းၵေႃႉၼၼ်ႉပႆၵႂႃႇၵႃႈတီႈၽၢႆႇၼႃႈသမူၺ်ႇလဢေႃႈ။
၁၁ သမူၺ်ႇလလၢတ်ႈတီႈယေႇသေႇလႄႈဝႃႈ၊-ၶဝ်ၸိူဝ်းၼႆႉၵေႃႈဢမ်ႇၸႂ်ႈထႃႇဝရႃႉၽြႃးလိူၵ်ႈၵဵပ်းဢဝ်၊ဝႃႈၼင်ႇၼႆလႄႈသမူၺ်ႇလထၢမ်တီႈယေႇသေႇလႄႈဝႃႈ၊-ၶဝ်ၸိူဝ်းၼႆႉပဵၼ်လုၵ်ႈၸၢႆးဢၼ်မႂ်းမီးတင်းသဵင်ႈတင်းမူတ်းၼၼ်ႉႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်မၼ်းၼၼ်ႉလၢတ်ႈလႄႈဝႃႈ၊-ယင်းမီးလုၵ်ႈၸၢႆးဢၼ်လဵၵ်ႉသေပိူၼ်ႈၵေႃႉၼိုင်ႈလူးၵွၼ်ႇၶႃႈဢေႃႈ။မၼ်းလဵင်ႉထိ်င်းသူဝ်းယူႇၶႃႈဢေႃႈ၊ဝႃႈၼင်ႇၼႆလႄႈသမူၺ်ႇလလၢတ်ႈတီႈယေႇသေႇလႄႈဝႃႈ၊-ပွႆႇၸႂ်ႉၵူၼ်းၵႂႃႇႁွင်ႉဢဝ်မၼ်းမႃးသေၵမ်း။ၸူဝ်ႈဢၼ်မၼ်းဢမ်ႇပႆႇႁွတ်ႈထိုင်မႃးၼၼ်ႉၸိုင်ႁဝ်းတၵ်းဢမ်ႇၶဝ်ႈၼင်ႈၵႃႈၼႂ်းပၢင်ႈပွႆးၵူၺ်း၊ဝႃႈၼင်ႇၼႆသေယဝ်ႉ၊မၼ်းပွႆႇၸႂ်ႉၵႂႃႇႁွင်ႉဢဝ်မၼ်းမႃးဢေႃႈ။
၁၂ မၼ်းၼၼ်ႉမီးၼင်ၼိူဝ်ႉလႅင်ႊၵမ်ႇဝႆႉလႄႈမီးၼႃႈတႃဢၼ်လီႁၵ်ႉ၊ႁၢင်ႈၽၢင်ဢၼ်ႁၢင်ႈလီဢေႃႈ။ထႃႇဝရႃႉၽြႃးမီးဢမိင်ႉဝႃႈ၊-မႂ်းလုၵ်ႉလႄႈပၼ်ၽိၵ်ႈသိၵ်ႈတီႈမၼ်းတႃႉ။
၁၃ ပဵၼ်ၵေႃႉၼႆႉယဝ်ႉ၊ဝႃႈၼင်ႇၼႆဢေႃႈ။သမူၺ်ႇလၵေႃႈဢဝ်တဝ်ႈၼမ်ႉမၼ်းလႄႈပၼ်ၽိၵ်ႈသိၵ်ႈတီႈမၼ်းသိုဝ်ႈၼႃႈတႂ်ႈတႃပီႈဢၢႆႈမၼ်းၸိူဝ်းၼၼ်ႉဢေႃႈ။ၸႃႉၸဵမ်မိူဝ်ႈဝၼ်းၼၼ်ႉဝိၺိၺ်ႇၽြႃးပဵၼ်ၸဝ်ႈပႃးတင်းတၼ်းၶူဝ်းလႄႈတူၵ်းႁွတ်ႈၵႃႈၼိူဝ်တႃႇဝိတ်ႉဢေႃႈ။သမူၺ်ႇလၵေႃႈၶိုၼ်းမိူဝ်းၵႂႃႇတီႈဝဵင်းရႃႇမသေဢေႃႈ။
တႃႇဝိတ်ႉၼႂ်းႁၢင်ႈႁေႃးၶမ်းသေႃးလု
၁၄ ဝိၺိၺ်ႇထႃႇဝရႃႉၽြႃးဢွၵ်ႇသေၵႃႈတီႈသေႃးလုၵႂႃႇလႄႈဝိၺိၺ်ႇဢၼ်ယၢပ်ႇၶၢၼ်ၸႂ်ၵႃႈတီႈထႃႇဝရႃႉၽြႃးၼၼ်ႉယႃႉယူၵ်ႉႁူဝ်ၸႂ်မၼ်းဢေႃႈ။ၶႃႈသေႃးလုၸိူဝ်းၼၼ်ႉၵေႃႈဢွၼ်ၵၼ်လဝ်ႈလၢတ်ႈတီႈမၼ်းလႄႈဝႃႈ၊-တူၺ်းတီႈၶႃႈလူး။
၁၅ ဝိၺိၺ်ႇဢၼ်ယၢပ်ႇၶၢၼ်ၸႂ်ၵႃႈတီႈၽြႃးပဵၼ်ၸဝ်ႈၼၼ်ႉယႃႉယူၵ်ႉၸဝ်ႈႁဝ်းတီႈၶႃႈယဝ်ႉ။ၸဝ်ႈႁဝ်းၶႅၼ်းတေႃႈမီးဢမိင်ႉတီႈၶႃႈၸဝ်ႈႁဝ်းၶဝ်ႁႂ်ႈလႆႈၵႂႃႇႁႃၵေႃႉဢၼ်မေႃလဵတ်းတိင်ႇသဵင်လီသဵင်ဝၢၼ်ၼၼ်ႉသေၵမ်းတီႈၶႃႈ။
၁၆ ပေႃးယၢမ်းမိူဝ်ႈဢၼ်ဝိၺိၺ်ႇဢၼ်ယၢပ်ႇၶၢၼ်ၸႂ်ၼၼ်ႉႁွတ်ႈထိုင်မႃးၵႃႈၼိူဝ်ၸဝ်ႈႁဝ်းၸိုင်မၼ်းတၵ်းဢဝ်မိုဝ်းမၼ်းလဵတ်းတိင်ႇသေလႄႈႁဵတ်းႁႂ်ႈၸဝ်ႈႁဝ်းလႆႈတၢင်းဢၼ်သၢၵ်ႈသႃႇယူႇၶႃႈဢေႃႈ၊
၁၇ မိူဝ်ႈဢၼ်ဝႃႈၼင်ႇၼႆၸိုင်သေႃးလုၵေႃႈမီးဢမိင်ႉတီႈၶႃႈမၼ်းၸိူဝ်းၼၼ်ႉလႄႈဝႃႈ၊-ႁႃဢဝ်ၵေႃႉဢၼ်မေႃလဵၸ်းတိင်ႇသဵင်လီသဵင်ဝၢၼ်ၼၼ်ႉပုၼ်ႈၵဝ်လႄႈႁွင်ႉဢဝ်မႃးၵႃႈတီႈၵဝ်တႃႉ၊ဝႃႈၼင်ႇၼႆဢေႃႈ။
၁၈ ၵူၼ်းဢွၼ်ႇၵေႃႉၼိုင်ႈၶိုၼ်းလဝ်ႈလၢတ်ႈလႄႈဝႃႈ၊-ၵဝ်ၶႃႈလႆႈထူပ်းလႆႈႁၼ်လုၵ်ႈၸၢႆးယေႇသေႇၵူၼ်းဝဵင်းပႅတ်ႉလိႁႅမ်ႇဢၼ်မေႃလဵတ်းတိင်ႇဢၼ်မီးတၢင်းဢၼ်ၵတ်ႉၶၼ်ႁတ်းႁၢၼ်ဢၼ်ၸၢင်ႊတိုၵ်းသိုၵ်း၊ဢၼ်ႁူႉၸႅင်ႈၵႂၢမ်းပိင်ႇၺႃႇ၊ဢၼ်မီးႁၢင်ႊၽၢင်ဢၼ်ႁၢင်ႊလီ၊ၼၼ်ႉၵေႃႉၼိုင်ႈၶႃႈဢေႃႈ။ထႃႇဝရႃႉၽြႃးမီးယူႇလူၺ်ႈၵၼ်တင်းမၼ်းၶႃႈဢေႃႈ၊ဝႃႈၼင်ႇၼႆဢေႃႈ။
၁၉ ပိူဝ်ႈၼႆလႄႈသေႃးလုပွႆႇၸႂ်ႉၵူၼ်းၵႂႃႇၵႃႈတီႈယေႇသေႇသေလႄႈမီးဢမိင်ႉဝႃႈ၊-ပွႆႇၸႂ်ႉလုၵ်ႈၸၢႆးမႂ်းတႃႇဝိတ်ႉဢၼ်ပဵၼ်ၵူၼ်းလဵင်ႉသူဝ်းထိင်းသူဝ်းၼၼ်ႉမႃးၵႃႈတီႈၵဝ်တႃႉ၊ဝႃႈၼင်ႇၼႆဢေႃႈ။
၂၀ ယေႇသေႇၼၼ်ႉဢဝ်မႃႉလီႈတူဝ်ၼိုင်ႈတၢင်ႇသႂ်ႇၶဝ်ႈမုၼ်းဢိၵ်ႇတင်းတဝ်ႈၼမ်ႉၸပိတ်ႉတင်းပေႉဢွၼ်ႇတူဝ်ၼိုင်ႈသေလႄႈဢၢပ်ႈပၼ်ၵႃႈၼႂ်းမိုဝ်းလုၵ်ႈၸၢႆးမၼ်းတႃႇဝိတ်ႉသေယဝ်ႉႁႂ်ႈမၼ်းၵႂႃႇၸူးၵႃႈတီႈသေႃးလုဢေႃႈ။
၂၁ တႃႇဝိတ်ႉၼၼ်ႉႁွတ်ႈထို်င်ၵႃႈတီႈသေႃးလုသေယဝ်ႉၶႃးၸႃးလႄႈသေႃးလုၼၼ်ႉႁၵ်ႉမၼ်းၼႃႇလူင်လၢင်လႄႈၶၢၼ်းမၼ်းဝႆႉၼႂ်းဢရႃႇၽူႈဢၼ်ယိပ်းၵမ်လၢၵ်ႈၼၢၵ်ႈၸဝ်ႈဢေႃႈ။
၂၂ သေႃးလုသင်ႇၵႂၢမ်းၵႂႃႇၵႃႈတီႈယေႇသေႇလႄႈယွၼ်းဢၶႂၢင်ႉလႄႈဝႃႈ၊-ၵွပ်ႈပိူဝ်ႈတႃႇဝိတ်ႉထုၵ်ႇၸႂ်ၵျိူၵ်ႈၸႂ်ၵဝ်ၼႃႇလႄႈႁႂ်ႈမၼ်းၶႃးၸႃးယူႇၵႃႈတီႈၵဝ်သေၵမ်း၊ဝႃႈၼင်ႇၼႆဢေႃႈ။
၂၃ ယၢမ်းမိူဝ်ႈဢၼ်ဝိၺိၺ်ႇဢၼ်ယၢပ်ႇၶၢၼ်ၸႂ်ၵႃတီႈၽြႃးပဵၼ်ၸဝ်ႈၼၼ်ႉႉႁွတ်ႈထိုင်ၵႃႈၼိူဝ်သေႃးလုၼၼ်ႉၸိုင်တႃႇဝိတ်ႉဢဝ်တိင်ႇမၼ်းသေလႄႈဢဝ်မိုဝ်းမၼ်းလဵတ်းသေယဝ်ႉႁဵတ်းႁႂ်ႈသေႃႇလုလႆႈၸႂ်သၢၵ်ႈသႃႇၶႅၼ်းမႃး၊ယူႇလီၵိၼ်ဝၢၼ်မႃးလႄႈဝိၺိၺ်ႇဢၼ်ယၢပ်ႇၶၢၼ်ၸႂ်ၼၼ်ႉၵေႃႈၸင်ႇဢွၵ်ႇသေၵႃႈတီးမၼ်းၵႂႃႇဢေႃႈ။