Chapter
၂၁
တႃႇဝိတ်ႉတီႈမိူင်းၼေႃႇပတိ
၁ မိူဝ်ႈၼၼ်ႉတႃႇဝိတ်ႉႁွတ်ႈထိုင်ၵႃႈတီႈဝဵင်းၼေႃႇပတိဢၼ်ယိတ်ႉပရေႃးႁိၵ်ႈဢႁိမလိၵ်ႉမီးၼၼ်ႉဢေႃႈ။ဢႁိမလိၵ်ႉၵေႃႈသၼ်ႇသၼ်ႇသၢႆသၢႆသေလႄႈမႃးႁပ်ႉႁူဝ်တၢင်းတႃႇဝိတ်ႉလႄႈထၢမ်ဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းယင်းဢမ်ႇပႃးၵူၼ်းသေၵေႃႉသေၵူၼ်းလႄႈမႃးၵေႃႉလဵဝ်ၵူၺ်း၊ဝႃႈၼင်ႇၼႆလႄႈတႃႇဝိတ်ႉလၢတ်ႈတီႈယိတ်ႉပရေႃးႁိၵ်ႈဢႁိမလိၵ်ႉၼၼ်ႉလႄႈဝႃႈ၊-
၂ ၵွပ်ႈပိူဝ်ႈဢၼ်ၶုၼ်ႁေႃၶမ်းဢၢပ်ႈပၼ်ဢမူႉၸဝ်ႈဢၼ်ၼိုင်ႈၵႃႈတီႈၵဝ်ၶႃႈလႄႈမီးဢမိင်ႉဝႃႈယႃႇပေႁႂ်ႈၽူႈလႂ်ႁူႉလွင်ႈဢမူႉဢၼ်မၼ်းၸဝ်ႈပွႆႇၸႂ်ႉၵဝ်မႃးၼၼ်ႉ၊ဝႃႈၼင်ႇၼႆၶႃႈဢေႃႈ။ၵူၼ်းဢွၼ်ႇလႂ်ၸမ်းၵဝ်ၶႃႈပွႆႇၸႂ်ႉၵႂႃႇဢွၼ်တၢင်းၵဝ်ၶႃႈႁႂ်ႈလႆႈၵိုတ်းပႂ်ႉထႃႈယူႇၵႃႈတီႈတီႈၼိုင်ႈယဝ်ႉ။
၃ တေႃႈလဵဝ်ၼႆႉၵႃႈတီႈမိုဝ်းၸဝ်ႈႁဝ်းမီးၵႃႈသင်ၶႃႈ။ပၼ်ၶဝ်ႈမုၼ်းႁႃႈလုၵ်ႈဢမ်ႇၼၼ်ၵႃႈဢၼ်မီးၼၼ်ႉၵႃႈတီႈၵဝ်ၶႃႈသေၵမ်း၊ဝႃႈၼင်ႇၼႆဢေႃႈ။
၄ ယိတ်ႉပရေႃးႁိၵ်ႈၵေႃႈၶိုၼ်းလၢတ်ႈတီႈတႃႇဝိတ်ႉလႄႈဝႃႈ၊-ၵႃႈတီႈမိုဝ်းၵဝ်ဢမ်ႇမီးၶဝ်ႈမုၼ်းယူဝ်းယူဝ်း။မီးၶဝ်ႈမုၼ်းဢၼ်မူတ်းၸၢင်ႇပုၼ်ႈၵူၺ်းၸၢႆးဢၼ်ဝေႈပိူင်ႈမေႈယိင်းၵူၺ်းဢေႃႈ၊ဝႃႈၼင်ႇၼႆဢေႃႈ။
၅ တႃႇဝိတ်ႉၵေႃႈၶိုၼ်းလၢတ်ႈတီႈယိတ်ႉပရေႃးႁိၵ်ႈလႄႈဝႃႈ၊-ႁဝ်းၶႃႈလႆႈဝေႈပိူင်ႈမေႈယိင်းမိူဝ်ႈဢၼ်ႁဝ်းၶႃႈလႆႈဢွၵ်ႇတႃပႆတၢင်းၼၼ်ႉၶႃႈဢေႃႈ။ဢၼ်ဢမ်ႇမူတ်းၸၢင်ႇၵူၼ်းၸၢႆးၵေႃႈလႆႈပဵၼ်တၢင်းဢၼ်မူတ်းၸၢင်ႇဢေႃႈ။
၆ ဝၼ်းမိူဝ်ႈၼႆႉယိင်ႈၶႅၼ်းပဵၼ်ဢၼ်မူတ်းၸၢင်ႇဢေႃႈ၊ဝႃႈၼင်ႇၼႆလႄႈယိတ်ႉပရေႃးႁိၵ်ႈၼၼ်ႉဢဝ်ၶဝ်ႈမုၼ်းဢၼ်မူတ်းၸၢင်ႇၼၼ်ႉပၼ်တီႈမၼ်းၵွပ်ႈပိူဝ်ႈဢၼ်ဢမ်ႇမီးၶဝ်ႈမုၼ်းဢၼ်ၼွၵ်ႈသေၶဝ်ႈမုၼ်းၽၢႆႇၼႃႈထႃႇဝရႃႉၽြႃးၼၼ်ႉဢေႃႈ။
၇ ၶဝ်ႈမုၼ်းၼၼ်ႉပဵၼ်ဢၼ်မႂ်ႇဢၼ်တၢင်ႇဝႆႉၼႂ်းဝၼ်းဢၼ်လႆႈၼုၵ်ႈဢဝ်ၼၼ်ႉဢေႃႈ။ၼႂ်းဝၼ်းၼၼ်ႉၵေႃႉဢၼ်ၶဝ်ႈပႃးၼႂ်းၶႃႈၵူၼ်းသေႃးလုၸိူဝ်းၼၼ်ႉၵေႃႉၼိုင်ႈမီးယူႇၵႃႈတီႈၼၼ်ႉလႄႈၵိုတ်းသဝ်းယူႇၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉဢေႃႈ။ၸိုဝ်ႈသဵင်မၼ်းၼၼ်ႉၸမ်းပဵၼ်တေႃႇၵ၊ၵူၼ်းမဵဝ်းဢေႇတုင်ႇဢၼ်ဢုပ်ႉၵႃႈၼိူဝ်ၵူၼ်းဢၼ်လဵင်ႉထိင်းသူဝ်းသေႃးလုတင်းလၢႆၼၼ်ႉဢေႃႈ။
၈ တႃႇဝိတ်ႉၵေႃႈလၢတ်ႈတီႈဢႁိမလိၵ်ႉလႄႈဝႃႈ၊-ၵႃႈတီႈၸဝ်ႈႁဝ်းၼႆႉမီးႁွၵ်ႇလႂ်၊လၢပ်ႇလႂ်ၶႃႈႁိုဝ်။ၵွပ်ႈပိူဝ်ႈဢၼ်ဢမူႉၶုၼ်ႁေႃၶမ်းမီးတၢင်းဢၼ်ႁိပ်ႈၼႅတ်ႈလႄႈၵဝ်ၶႃႈဢမ်ႇတၼ်းပႃးႁွၵ်ႇလႂ်၊လၢၵ်ႈၼၢၵ်ႈလႂ်သေၸိူဝ်ႉသေပိူင်မႃးၶႃႈ၊ဝႃႈၼင်ႇၼႆသေယဝ်ႉယိတ်ႉပရေႃးႁိၵ်ႈလၢတ်ႈလႄႈဝႃႈ၊-
၉ လၢပ်ႇၵေႃႇလျၢတ်ႉၵူၼ်းၽိလိတ်ႉတိဢၼ်မႂ်းဢဝ်တၢႆပႅတ်ႈၵႃႈတီႈႁူၺ်ႈဢေႇလႃႇၼၼ်ႉႁေႃႇၶဵၼ်းၽႅၼ်ႇဝႆႉယူႇလႄႈမီးယူႇၵႃႈတီႈၽၢႆႇလင်သိူဝ်ႈသုပ်းၸဝ်ႈၼၼ်ႉဢေႃႈ။ၶႆႈဢဝ်ၵေႃႈဢဝ်တႃႉ။လၢပ်ႇတၢင်ႇမၢၵ်ႈတၢင်ႇဢၼ်ဢမ်ႇမီး၊မိူဝ်ႈဢၼ်ဝႃႈၼင်ႇၼႆၸိုင်၊တႃႇဝိတ်ႉလၢတ်ႈလႄႈဝႃႈ၊-လၢပ်ႇဢၼ်မိူၼ်ၵၼ်တင်းလၢပ်ႇၼၼ်ႉဢမ်ႇမီးၶႃႈယဝ်ႉ။ပၼ်သေၵမ်းၶႃႈ၊ဝႃႈၼင်ႇၼႆဢေႃႈ။
တႃႇဝိတ်ႉတီႈမိူင်းၵႃႇသ
၁၀ ၼႂ်းဝၼ်းၼၼ်ႉၵမ်းလဵဝ်တႃႇဝိတ်ႉလုၵ်ႉသေလႄႈဢွၵ်ႇပၢႆၵႂႃႇၵွပ်ႈပိူဝ်ႈဢၼ်ၵူဝ်ႁႄသေႃးလုၼၼ်ႉလႄႈၵႂႃႇၸူးၵႃႈတီႈဢႃႇၶိတ်ႉၶုၼ်လူင်ၵႃႇသဢေႃႈ။ၶႃႈၶုၼ်ဢႃႇၶိတ်ႉၸိူဝ်းၼၼ်ႉလဝ်ႈလၢတ်ႈလႄႈဝႃႈ၊-ၵေႃႉၼႆႉပဵၼ်တႃႇဝိတ်ႉၶုၼ်ႁေႃၶမ်းမိူင်းပုၼ်ႉ၊ဢမ်ႇၸႂ်ႈႁိုဝ်။
၁၁ ၶဝ်ဢွၼ်ၵၼ်ၵႃႈဝႅၼ်းယူႇသေလႄႈဢဝ်လွင်ႈမၼ်းႁဵတ်းၵႂၢမ်းပဵၼ်လႄႉပဵၼ်ၵမ်းလႄႈဝႃႈ၊-သေႃးလုဢဝ်တၢႆပဵၼ်ႁဵင်ပဵၼ်ႁဵင်၊တႃႇဝိတ်ႉဢဝ်တၢႆပဵၼ်မိုၼ်ႇပဵၼ်မိုၼ်ႇ၊ဢၼ်ဝႃႈၼၼ်ႉဢမ်ႇၸႂ်ႈႁိုဝ်၊ဝႃႈၼင်ႇၼႆဢေႃႈ။
၁၂ တႃႇဝိတ်ႉဢဝ်ၵႂၢမ်းၼၼ်ႉသႂ်ႇၼႂ်းၸႂ်မၼ်းဝႆႉလႄႈမၼ်းၵူဝ်ႁႄၶုၼ်လူင်ဢႃႇၶိတ်ႉၶုၼ်ႁေႃၶမ်းၵႃႇသၼၼ်ႉၼႃႇလူင်လၢင်လႄႈမၼ်းႁဵတ်းၼင်ႇႁၢင်ႈပဵၼ်ၵူၼ်းယွင်ႇၵူၼ်းမႃႈယူႇၵႃႈၼႂ်းမိုဝ်းၶဝ်သေလႄႈၶိတ်ႇတႅမ်ႈၵႃႈတီႈမႂ်ႊၽၵ်းတူယူႇ၊
၁၃ ႁႂ်ႈၼမ်ႉလၢႆးမၼ်းယွႆႉတူၵ်းၵႃႈၼူတ်ႇၵၢင်းမၼ်းယူႇဢေႃႈ။
၁၄ မိူဝ်ႈၼၼ်ႉၶုၼ်ဢႃႇၶိတ်ႉလၢတ်ႈတီႈၶႃႈၵူၼ်းမၼ်းတင်းလၢႆလႄႈဝႃႈ၊-တူၺ်းလူး။ၵေႃႉၼႆႉပဵၼ်ၵူၼ်းယွင်ႇဢေႃႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူဢဝ်မၼ်းသႂၢင်းၶဝ်ႈၵႃႈတီႈၵဝ်ၼႆႉ။
၁၅ ၵဝ်လူဝ်ႇၵူၼ်းယွင်ႇလႄႈသူဢဝ်ၵေႃႉၼႆႉသႂၢင်းၶဝ်ႈမႃးႁႂ်ႈလႆႈႁဵတ်းၵူၼ်းယွင်ႇၵႃႈတီႈၽၢႆႇၼႃႈၵဝ်ႁိုဝ်။ၵေႃႉၼႆႉတၵ်းလႆႈၶဝ်ႈၵႃႈၼႂ်းႁေႃၸဝ်ႈႁိုဝ်၊ဝႃႈၼင်ႇၼႆဢေႃႈ။