Chapter
၈
ၵူၼ်းမဵဝ်းဢိသရေႇလၶဝ်ယွၼ်းဢဝ်ၶုၼ်ႁေႃၶမ်း
၁ သမူၺ်ႇလၼၼ်ႉမိူဝ်ႈဢၼ်ဢသၢၵ်ႈမၼ်းယႂ်ႇထဝ်ႈၼၼ်ႉၸိုင်မၼ်းဢဝ်လုၵ်ႈၸၢႆးမၼ်းတင်းလၢႆၶၢၼ်းဝႆႉႁႂ်ႈလႆႈပဵၼ်ၵူၼ်းလူင်ဢၼ်ၸီႇယၢင်ႇၵႃႈၼိူဝ်မဵဝ်းဢိသရေႇလဢေႃႈ။
၂ ၸိုဝ်ႈသဵင်လုၵ်ႈၸၢႆးတူၼ်ႈမၼ်းၸမ်းပဵၼ်ဢေႇလ၊ၸိုဝ်ႈသဵင်လုၵ်ႈၸၢႆးတုတိယၸမ်းပဵၼ်ဢၽိရဢေႃႈ။ၶဝ်ႁဵတ်းၵူၼ်းလူင်ဢၼ်ၸီႇယၢင်ႇတြႃးၵႃႈတီႈဝဵင်းပေႇရသေႇၽဢေႃႈ။
၃ ၼႂ်းဝႃႈၼၼ်သေၵေႃႈလုၵ်ႈၸၢႆးမၼ်းၸိူဝ်းၼၼ်ႉဢမ်ႇၸွမ်းသဵၼ်ႈတၢင်းမၼ်း။ၶဝ်ဝႄႈပိူင်ႈၵႂႃႇၸူးၽၢႆႇမၢၵ်ႈမီးဢၼ်ဢမ်ႇတြႃးၼၼ်ႉလႄႈၵိၼ်သူးၵိၼ်လၢပ်လႄႈယႃႉတြႃးဢေႃႈ။
၄ မိူဝ်ႈၼၼ်ႉၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်းဢိသရေႇလတင်းသဵင်ႈတင်းလူင်ၸိူဝ်းၼၼ်ႉၸူႉၵၼ်တုမ်ၵၼ်သေလႄႈမႃးၸူးၵႃႈတီႈသမူၺ်ႇလၵႃႈတီႈဝဵင်းရႃႇမၼၼ်ႉသေယဝ်ႉ၊ဢွၼ်ၵၼ်လဝ်ႈလၢတ်ႈတီႈမၼ်းလႄႈဝႃႈ၊-တူၺ်းၶႃႈလူး။
၅ ၸဝ်ႈႁဝ်းဢသၢၵ်ႈယႂ်ႇထဝ်ႈၶႃႈယဝ်ႉ။လုၵ်ႈၸၢႆးၸဝ်ႈႁဝ်းၸိူဝ်းၼၼ်ႉယင်းဢမ်ႇၸွမ်းသဵၼ်ႈတၢင်းၸဝ်ႈႁဝ်းၶႃႈ။ၶႅၼ်းတေႃႈယုၵ်ႉယွင်ႈၶုၼ်ႁေႃၶမ်းဢၼ်တၵ်းလႆႈၸီႇယၢင်ႇၵႃႈၼိူဝ်ႁဝ်းၶႃႈမိူၼ်ၸိူဝ်ႉၼင်ႇၵူၼ်းမဵဝ်းတင်းသဵင်ႈတင်းလူင်ၼၼ်ႉသေၵမ်းၶႃႈ၊ဝႃႈၼင်ႇၼႆဢေႃႈ။
၆ ဢမူႉဢၼ်ၶဝ်လၢတ်ႈဝႃႈပၼ်ၶုၼ်ႁေႃၶမ်းဢၼ်တၵ်းၸီႇယၢင်ႇၵႃႈၼိူဝ်ႁဝ်းၶႃႈသေၵမ်း၊ဝႃႈၼင်ႇၼႆၼၼ်ႉဢမ်ႇထုၵ်ႇမႅၼ်ၸႂ်သမူၺ်ႇလလႄႈသမူၺ်ႇလသူးတွင်းတီႈထႃႇဝရႃႉၽြႃးဢေႃႈ။
၇ ထႃႇဝရႃႉၽြႃးၵေႃႈမီးဢမိင်ႉတီႈသမူၺ်ႇလလႄႈဝႃႈ၊-ထွမ်ႇဢဝ်ၵႂၢမ်းၵႃႈဢၼ်ၵူၼ်းတင်းလၢႆလၢတ်ႈတီႈမႂ်းၼၼ်ႉတႃႉ။ၶဝ်ပႄႇပႅတ်ႈမႂ်းၵူၺ်းဢမ်ႇၸႂ်ႈ။
၈ ၶဝ်ပႄႇပႅတ်ႈၵဝ်ႁႂ်ႈၵဝ်ဢမ်ႇလႆႈဢုပ်ႉပိူင်ႇၵႃႈၼိူဝ်ၶဝ်ယဝ်ႉ။ၸိူဝ်ႉၼင်ႇဢၼ်ၶဝ်ႁဵတ်းၸႃႉၸဵမ်မိူဝ်ႈဝၼ်းဢၼ်ၵဝ်ဢဝ်ၶဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးတေႃႇထိုင်ႁွတ်ႈဝၼ်းမိူဝ်ႈၼႆႉၶဝ်ၸုၼ်ႉပႅတ်ႈၵဝ်လႄႈႁဵတ်းဝၢတ်ႈတီႈၽြႃးတၢင်ႇသူႇတၢင်ႇပႃးဢေႃႈ။တေႃႈလဵဝ်ၼႆႉၵေႃႈၶဝ်ႁဵတ်းတေႃႇမႂ်းယဝ်ႉ။
၉ မိူဝ်ႈလဵဝ်ၼႆႉထွမ်ႇဢဝ်ၵႂၢမ်းၶဝ်တႃႉ။ၵူၺ်းၵႃႈပၼ်သတိႁႅင်းၼႃႇလူင်လၢင်လႄႈလၢတ်ႈၼႄပၼ်ၶဝ်လွင်ႈၶုၼ်ႁေႃၶမ်းဢၼ်တၵ်းဢုပ်ႉပိူင်ႇၵႃႈၼိူဝ်ၶဝ်ၼၼ်ႉတၵ်းႁဵတ်းၸိူဝ်ႉႁိုဝ်တီႈၶဝ်၊ဢၼ်ဝႃႈၼၼ်ႉတႃႉ၊ဝႃႈၼင်ႇၼႆဢေႃႈ။
၁၀ သမူၺ်ႇလၵေႃႈဢဝ်ဢမိင်ႉထႃႇဝရႃႉၽြႃးၵႃႈမီးၸိူဝ်းၼၼ်ႉၶိုၼ်းမွၵ်ႇလၢတ်ႈထိုင်တီႈၶဝ်ၸိူဝ်းဢၼ်ယွၼ်းၶုၼ်ႁေႃၶမ်းၼၼ်ႉလႄႈဝႃႈ၊-ၶုၼ်ႁေႃၶမ်းဢၼ်တၵ်းဢုပ်ႉပိူင်ႇသူၼၼ်ႉတၵ်းႁဵတ်းၸိူဝ်ႉၼႆတေႃႇသူဢေႃႈ။
၁၁ မၼ်းတၵ်းဢဝ်လုၵ်ႈၸၢႆးသူၶၢၼ်းဝႆႉၼႂ်းဢရႃႇၵေႃႉဢၼ်ပႂ်ႉထိင်းလေႃႉရထႃးမၼ်း၊ၵေႃႉဢၼ်ပႂ်ႉထိင်းမႃႉမၼ်းၸိူဝ်းၼၼ်ႉလႄႈၵမ်ႈၽွင်ႈတၵ်းလႆႈၶုၼ်ႇလႅၼ်ႈဢွၼ်တၢင်းလေႃႉရထႃးမၼ်းဢေႃႈ။
၁၂ မၼ်းတၵ်းၶၢၼ်းၶဝ်ဝႆႉႁႂ်ႈပဵၼ်ၵေႃႉဢၼ်ဢုပ်ႉၵႃႈၼိူဝ်ၵူၼ်းယေႈႁဵင်၊ၵေႃႉဢၼ်ဢုပ်ႉၵႃႈၼိူဝ်ၵူၼ်းႁႃႈသိပ်းလႄႈတၵ်းဢဝ်ၵမ်ႈၽွင်ႈၶၢၼ်းဝႆႉႁႂ်ႈလႆႈထႆၼႃးႁဵတ်းၼႃး၊ၵမ်ႈၽွင်ႈႁႂ်ႈလႆႈပၢတ်ႇၶဝ်ႈ၊ၵမ်ႈၽွင်ႈႁႂ်ႈလႆႈႁဵတ်းလၢၵ်ႈၼၢၵ်ႈၶိူင်ႈတိုၵ်းသိုၵ်းဢိၵ်ႇတင်းၶိူင်ႈလေႃႉရထႃးလႂ်ဢေႃႈ။
၁၃ လုၵ်ႈယိင်းသူတင်းလၢႆၵေႃႈမၼ်းတၵ်းဢဝ်ၶၢၼ်းဝႆႉႁႂ်ႈပဵၼ်ၵေႃႉဢၼ်ႁဵတ်းၼမ်ႉႁွမ်၊ၵေႃႉဢၼ်တူမ်ႈၶဝ်ႈႁုင်ၽၵ်း၊ၵေႃႉဢၼ်ထိုင်ႈၶဝ်ႈမုၼ်းၼၼ်ႉဢေႃႈ။
၁၄ မၼ်းတၵ်းဢဝ်တူင်ႁႆႊတူင်ၼႃးသူ၊သူၼ်ဢူးယဵၼ်ႇမၢၵ်ႇၸပိတ်ႉသူ၊သူၼ်ဢူးယဵၼ်ႇတူၼ်ႈသၢၼ်ႇလုၼ်ႇသူဢၼ်လီၼႃႇသေပိူၼ်ႈၼၼ်ႉလႄႈပၼ်တီႈၶႃႈမၼ်းၵူၼ်းမၼ်းဢေႃႈ။
၁၅ မၼ်းတၵ်းဢဝ်ၸိူဝ်ႉၽၼ်းသူ၊မၢၵ်ႇၸပိတ်ႉသူသိပ်းပုၼ်ႊပုၼ်ႊၼိုင်ႈလႄႈပၼ်တီႈၶဝ်ၸိူဝ်းဢၼ်မီးဢရႃႇဢိၵ်ႇတင်းၶဝ်ၸိူဝ်းဢၼ်ၵိုတ်းႁၢပ်ႇဢမူႉတီႈမၼ်းၼၼ်ႉဢေႃႈ။
၁၆ မၼ်းတၵ်းဢဝ်ၶႃႈၵူၼ်းၸၢႆးသူ၊ၶႃႈၵူၼ်းယိင်းသူ၊ၵူၼ်းၸႂ်ႉၵူၼ်းသွႆသူ၊ဝူဝ်းမႃႉလီႈဢၼ်လီၼႃႇသေပိူၼ်ႈၵႃႈတီႈသူၼၼ်ႉၵေႃႈမၼ်းတေဢဝ်ပုၼ်ႈတူဝ်မၼ်းဢေႃႈ။
၁၇ ၽုင်သူဝ်းသူသိပ်းပုၼ်ႊပုၼ်ႊၼိုင်ႈၵေႃႈမၼ်းတၵ်းဢဝ်လႄႈသူတၵ်းလႆႈၶၢမ်ႇႁဵတ်းၶႃႈတီႈမၼ်းဢေႃႈ။
၁၈ ၶိင်ႇမိူဝ်ႈဝၼ်းၼၼ်ႉႁွတ်ႈထိုင်မႃးၼၼ်ႉၸိုင်သူတၵ်းႁွင်ႉသႅၼ်ႇၵွပ်ႈပိူဝ်ႈၶုၼ်ႁေႃၶမ်းဢၼ်သူလိုၵ်ႇၵဵပ်းဢဝ်ၼၼ်ႉလႄႈထႃႇဝရႃႉၽြႃးတၵ်းဢမ်ႇထွမ်ႇဢမ်ႇငိၼ်းၵႂၢမ်းသူၼႂ်းၶိင်ႇမိူဝ်ႈဝၼ်းၼၼ်ႉ၊ဝႃႈၼင်ႇၼႆဢေႃႈ။
၁၉ ၼႂ်းဝႃႈၼၼ်သေၵေႃႈၵူၼ်းတင်းလၢႆယင်းဢမ်ႇထွမ်ႇဢဝ်ၵႂၢမ်းသမူၺ်ႇလလႄႈဢွၼ်ၵၼ်လၢတ်ႈလႄႈဝႃႈ၊-ဢမ်ႇၸႂ်ႈၶႃႈ၊ႁဝ်းၶႃႈၶႂ်ႈလႆႈၶုၼ်ႁေႃၶမ်းဢၼ်တၵ်းဢုပ်ႉပိူင်ႇၵႃႈၼိူဝ်ႁဝ်းၶႃႈၼၼ်ႉၶႃႈဢေႃႈ။
၂၀ ႁႂ်ႈႁဝ်းၶႃႈလႆႈမိူၼ်ၵူၼ်းၵူႈမဵဝ်းဢၼ်မီးၶုၼ်ႁေႃၶမ်းဢၼ်တၵ်းဢွၼ်ႁူဝ်ႁဝ်းဢၼ်တၵ်းၵႂႃႇၽၢႆႇၼႃႈႁဝ်းမိူဝ်ႈဢၼ်ၵႂႃႇတိုၵ်းသိုၵ်းၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။
၂၁ သမူၺ်ႇလလႆႈငိၼ်းၵႂၢမ်းၵူၼ်းတင်းလၢႆတင်းသဵင်ႈတင်းမူတ်းသေယဝ်ႉမၼ်းၶိုၼ်းဢဝ်လဝ်ႈ၂၂ လၢတ်ႈထိုင်ထႃႇဝရႃႉၽြႃးဢေႃႈ။
၂၂ ထႃႇဝရႃႉၽြႃးၵေႃႈမီးဢမိင်ႉတီႈသမူၺ်ႇလလႄႈဝႃႈ၊-ထွမ်ႇဢဝ်ၵႂၢမ်းၶဝ်သေလႄႈယုၵ်ႉယွင်ႈၶုၼ်ႁေႃၶမ်းပုၼ်ႈၶဝ်တႃႉ၊ဝႃႈၼင်ႇၼႆဢေႃႈ။သမူၺ်ႇလလၢတ်ႈတီႈၵူၼ်းမဵဝ်းဢိသရေႇလတင်းလၢႆလႄႈဝႃႈ၊-သူဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈဝဵင်းတီႈဢၼ်သူယူႇၼၼ်ႉႁင်းၽႂ်ႇႁင်းမၼ်းလူးၵွၼ်ႇတႃႉ၊ဝႃႈၼင်ႇၼႆဢေႃႈ။