Chapter
၁၉
သေႃးလုၵျၢမ်ႇႁႃဢဝ်တႃႇဝိတ်ႉတၢႆ
၁ သေႃးလုသင်ႇလၢတ်ႈတီႈလုၵ်ႈၸၢႆးမၼ်းယေႃးၼသၼ်ႇတင်းၶႃႈမၼ်းတင်းသဵင်ႈတင်းလူင်ႁႂ်ႈၶဝ်ဢဝ်တႃႇဝိတ်ႉတၢႆဢေႃႈ။
၂ ယေႃးၼသၼ်ႇလုၵ်ႈၸၢႆးသေႃးလုၼၼ်ႉႁၵ်ႉပႅင်းတႃႇဝိတ်ႉၼႃႇလူင်လၢင်လႄႈလၢတ်ႈတီႈတႃႇဝိတ်ႉလႄႈဝႃႈ၊-ၸဝ်ႈပေႃႈၵဝ်သေႃးလုၼၼ်ႉၵျၢမ်ႇႁႃႁႂ်ႈလႆႈဢဝ်မႂ်းတၢႆဢိူဝ်ႈ။ၵွပ်ႈၼႆလႄႈမိူဝ်ႈၽုၵ်ႈၶိင်ႇၵၢင်ၼႂ်ဝႆႉသတိလႄႈၵႂႃႇပၢႆတဵတ်ႇတၢင်ႇတီႈတၢင်ႇလႅၼ်တႃႉ။
၃ ၵဝ်တၵ်းဢွၵ်ႇၵႂႃႇၶႃးၸႃးၵႃႈတီႈၸဝ်ႈပေႃႈၵဝ်ၵႃႈၼႂ်းထိူၼ်ႇတီႈဢၼ်မႂ်းမီးၼၼ်ႉလႄႈၵဝ်တၵ်းလၢတ်ႈတီႈၸဝ်ႈပေႃႈၵဝ်လူၺ်ႈလွင်ႈမႂ်းဢေႃႈ။ၵဝ်ၶိုၼ်းတၵ်းလၢတ်ႈၼႄမႂ်းၵႃႈဢၼ်ၵဝ်လႆႈႁူႉႁၼ်ၼၼ်ႉဢေႃႈ၊ဝႃႈၼင်ႇၼႆဢေႃႈ။
၄ ယေႃးၼသၼ်ႇလၢတ်ႈၼႄၸဝ်ႈပေႃႈမၼ်းလွင်ႈတႃႇဝိတ်ႉပဵၼ်ၵေႃႉဢၼ်လီၸိူဝ်ႉႁိုဝ်ဢၼ်ဝႃႈၼၼ်ႉလႄႈဝႃႈ၊-ၶႅၼ်းတေႃႈယႃႇပေႁႂ်ႈၶုၼ်လူင်ႁဝ်းလႆႈၽိတ်းပိူင်ႈၶႃႈၸဝ်ႈႁဝ်းတႃႇဝိတ်ႉၼၼ်ႉသေၵမ်းၶႃႈ။မၼ်းဢမ်ႇၽိတ်းပိူင်ႈၸဝ်ႈႁဝ်းသေဢိတ်းၶႃႈ။ၵႃႈဢၼ်မၼ်းႁဵတ်းၸိူဝ်းၼၼ်ႉပဵၼ်ဢၼ်လီၼႃႇလူင်လၢင်ပုၼ်ႈၸဝ်ႈႁဝ်းၶႃႈယဝ်ႉ။
၅ မၼ်းယင်းဢမ်ႇသလေၢႆဢသၢၵ်ႈမၼ်းလႄႈဢဝ်ၵူၼ်းၽိလိတ်ႉတိၸိူဝ်းၼၼ်ႉတၢႆဢေႃႈ။ထႃႇဝရႃႉၽြႃးႁဵတ်းၵျေးၸူးတၢင်းဢၼ်ၵႄႇသႄႇၶျွတ်ႈဢဝ်ဢၼ်ယႂ်ႇၼႃႇပုၼ်ႈမဵဝ်းဢိသရေႇလတင်းသဵင်ႈတင်းလူင်တီႈၶႃႈယဝ်ႉ။ၸဝ်ႈႁဝ်းႁၼ်လႄႈၸူမ်းသိူဝ်းယူႇၶႃႈဢေႃႈ။ၵွပ်ႈပိူဝ်ႈလွင်ႈတၢင်းၸိူဝ်ႉၼင်ႇႁိုဝ်လႄႈၸဝ်ႈႁဝ်းတၵ်းႁဵတ်းဢၼ်ၽိတ်းပိူင်ႈၵႃႈၼိူဝ်တႃႇဝိတ်ႉဢၼ်ဢမ်ႇမီးဢပျႅတ်ႈၵႃႈသင်ၼၼ်ႉလႄႈယင်းဢမ်ႇမီးလွင်ႈမၼ်းတၢင်းမၼ်းလႄႈဢဝ်မၼ်းတၢႆၶႃႈ၊ဝႃႈၼင်ႇၼႆဢေႃႈ။
၆ သေႃးလုၵေႃႈထွမ်ႇဢဝ်ၵႂၢမ်းယေႃးၼသၼ်ႇလႄႈတိူင်ႇဝႃႈၵိၼ်ႇဝႃႈလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉမၼ်းတၵ်းဢမ်ႇလႆႈၶၢမ်ႇတၢင်းတၢႆၵူၺ်း၊ဝႃႈၼင်ႇၼႆဢေႃႈ။
၇ ယေႃးၼသၼ်ႇႁွင်ႉဢဝ်တႃႇဝိတ်ႉလႄႈမွၵ်ႇလၢတ်ႈလွင်ႈတၢင်းၼၼ်ႉၵူႈၸိူဝ်ႉၵူႈပိူင်သေယဝ်ႉဢဝ်တႃႇဝိတ်ႉသမ်ႉၶိုၼ်းသႂၢင်းၶဝ်ၵႃႈတီႈသေႃးလုဢေႃႈ။မၼ်းလႆႈယူႇမိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉဢေႃႈ။
၈ လၢႆးသမ်ႉမိူဝ်ႈဢၼ်ဢမူႉသိုၵ်းသမ်ႉပေႃႇမႃးထႅင်ႈၼၼ်ႉၸိုင်တႃႇဝိတ်ႉဢွၵ်ႇလႄႈတိုၵ်းတေႃးၵူၼ်းၽိလိတ်ႉတိၸိူဝ်းၼၼ်ႉဢေႃႈ။မၼ်းႁဵတ်းတၢင်းဢၼ်ၶႃႈၽၼ်းဢဝ်တၢႆဢၼ်ယႂ်ႇၼႃႇလူင်လၢင်ၼၼ်ႉလႄႈၶဝ်လႆႈဢွၵ်ႇပၢႆႈသေၵႃႈတီႈၽၢႆႇၼႃႈမၼ်းၵႂႃႇဢေႃႈ။
၉ မိူဝ်ႈဢၼ်သေႃးလုၼင်ႈယူႇၵႃႈၼႂ်းႁေႃလႄႈမိုဝ်းမၼ်းယင်းတိုၵ်ႉယိပ်းၵမ်ႁွၵ်ႇယူႇၼၼ်ႉဝိၺိၺ်ႇဢၼ်ႁဝ်ႉၵႅမ်းထႃႇဝရႃႉၽြႃးတူၵ်းႁွတ်ႈၵႃႈၼိူဝ်မၼ်းဢေႃႈ။မိူဝ်ႈၶိင်ႇၼၼ်ႉတႃႇဝိတ်ႉၵေႃႈလဵတ်းတိင်ႇယူႇဢေႃႈ။
၁၀ မိူဝ်ႈၼၼ်ႉသေႃးလုဢဝ်ႁွၵ်ႇမၼ်းယိုင်းပုင်ႈသႂ်ႇတႃႇဝိတ်ႉႁႂ်ႈၵူပ်းၸပ်းၽႃဢေႃႈ။တႃႇဝိတ်ႉငိၵ်းပၢႆႈဢွၵ်ႇသေၵႃႈတီႈသေႃးလုလႄႈႁွၵ်ႇၼၼ်ႉသဵပ်ႇပၵ်းသႂ်ႇၵႃႈတီႈၽႃဢေႃႈ။
၁၁ တႃႇဝိတ်ႉဢွၵ်ႇပၢႆႈလႄႈလႆႈလွတ်ႈၼႂ်းၶိုၼ်းၼၼ်ႉဢေႃႈ။သေႃးလုပွႆႇၸႂ်ႉၵူၼ်းၵႂႃႇၵႃႈတီႈႁိူၼ်းတႃႇဝိတ်ႉႁႂ်ႈလႆႈပႂ်ႉမၼ်းယူႇသေလႄႈဢဝ်မၼ်းတၢႆၶိင်ႇၵၢင်ၼႂ်ဢေႃႈ။မိၶႃႇလမေးတႃႇဝိတ်ႉၼၼ်ႉလၢတ်ႈတီႈမၼ်းလႄႈဝႃႈ၊-ပေႃးသူဢမ်ႇဢွၵ်ႇပၢႆၼႂ်းၶိုၼ်းၼႆႉႁႂ်ႈလႆႈလွတ်ႈတၢင်းတၢႆၸိုင်ဝၼ်းမိူဝ်ႈၽုၵ်ႈသူတၵ်းတၢႆဢေႃႈ၊ဝႃႈၼင်ႇၼႆသေလႄႈ
၁၂ မၼ်းဢဝ်တႃႇဝိတ်ႉယွၼ်ႇတူၵ်းၵႃႈတီႈႁူးလၢင်းတဵၼ်လႄႈႁႂ်ႈမၼ်ဢွၵ်ႇပၢႆလွတ်ႈၵႂႃႇဢေႃႈ။
၁၃ မိၶႃႇလၼၼ်ႉၶိုၼ်းဢဝ်တူဝ်ႁၢင်ႊရူၵ်ႉထုဢၼ်ၼိုင်ႈလႄႈဢဝ်ၼွၼ်းဝႆႉၵႃႈၼိူဝ်ၵူႇတီႈၼွၼ်းသေယဝ်ႉဢဝ်ၽႃႈမႆႊႁူမ်ႇဝႆႉဢေႃႈ။
၁၄ မိူဝ်ႈဢၼ်သေႃးလုပွႆႇၸႂ်ႉၵူၼ်းၸႂ်ႉၵူၼ်းသွႆမႃးႁႂ်ႈလႆႈမႃးတီႉဢဝ်တႃႇဝိတ်ႉၼၼ်ႉၸိုင်မေးမၼ်းလၢတ်ႈဝႃႈ၊- တႃႇဝိတ်ႉမီးတၢင်းၶႆႈတၢင်းပဵၼ်ယူႇဢေႃႈ၊ဝႃႈၼင်ႇၼႆဢေႃႈ။
၁၅ သေႃးလုၵေႃႈသမ်ႉၶိုၼ်းပွႆႇၸႂ်ႉၵူၼ်းၸႂ်ႉၵူၼ်းသွႆၸိူဝ်းၼၼ်ႉၵႂႃႇတီႈတႃႇဝိတ်ႉလႄႈဝႃႈ၊-ႁၢမ်ဢဝ်မၼ်းတင်းၵူႇတီႈၼွၼ်းမၼ်းမႃးတီႈၵဝ်ႁႂ်ႈၵဝ်လႆႈဢဝ်မၼ်းတၢႆတႃႉ၊ဝႃႈၼင်ႇၼႆဢေႃႈ။
၁၆ မိူဝ်ႈဢၼ်ၵူၼ်းၸႂ်ႉၵူၼ်းသွႆမၼ်းၸိူဝ်းၼၼ်ႉၶဝ်ႈၵႂႃႇၵႃႈၼႂ်းၼၼ်ႉၸိုင်ထူပ်းႁၼ်တူဝ်ရုၵ်ႉထူႉမီးယူႇၵႃႈၼိူဝ်ၵူႇတီႈၼွၼ်းလႄႈၵႃႈတီႈႁူဝ်မၼ်းၵေႃႈဢဝ်ၶူၼ်ပေႉသႂ်ႇဝႆႉၼၼ်ႉဢေႃႈ။
၁၇ သေႃးလုၵေႃႈထၢမ်တီႈမိၶႃႇလလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းၽႅတ်ႉလႅၼ်ၵဝ်ၸိူဝ်ႉၼင်ႇၼႆသေယဝ်ႉပွႆႇလွတ်ႈရၢၼ်ႇသူႇၵဝ်ပႅတ်ႈႁႂ်ႈမၼ်းပေႃးလႆႈလွတ်ႈဢွၵ်ႇၵႂႃႇ၊ဝႃႈၼင်ႇၼႆလႄႈမိၶႃႇလၵေႃႈၶိုၼ်းလဝ်ႈလၢတ်ႈတီႈသေႃးလုလႄႈဝႃႈ၊-မၼ်းဝႃႈ၊-ပွႆႇၵဝ်ၵႂႃႇသေၵမ်း။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၵဝ်တၵ်းလႆႈဢဝ်မႂ်းတၢႆ၊ဝႃႈၼင်ႇၼႆတီႈၶႃႈဢေႃႈ၊ဝႃႈၼင်ႇၼႆဢေႃႈ။
၁၈ ၼင်ႇၼၼ်လႄႈတႃႇဝိတ်ႉဢွၵ်ႇပၢႆလွတ်ႈၵႂႃႇသေယဝ်ႉ၊ႁွတ်ႈထိုင်ၵႃႈတီႈသမူၺ်ႇလၵႃႈၼႂ်းဝဵင်းရႃႇမလႄႈၶႆႊၼႄလွင်ႈတၢင်းဢၼ်သေႃးလုႁဵတ်းတီႈမၼ်းၼၼ်ႉသေယဝ်ႉမၼ်းဢိၵ်ႇတင်းသမူၺ်ႇလၵႂႃႇယူႇၵႃႈတီႈဝၢၼ်ႈၼႃႇယုတ်ႉပုၼ်ႉဢေႃႈ။
၁၉ ပိူၼ်ႈလဝ်ႈလၢတ်ႈထိုင်သေႃးလုလွင်ႈတႃႇဝိတ်ႉမီးၵႃႈတီႈဝၢၼ်ႈၼႃႇယုတ်ႉၼႂ်းလိၼ်ဝဵင်းရႃႇမၼၼ်ႉလႄႈသေႃးလုသမ်ႉၶိုၼ်းပွႆႇၸႂ်ႉၵူၼ်းၸႂ်ႉၵူၼ်းသွႆမၼ်းၵႂႃႇႁႂ်ႈလႆႈတီႉဢဝ်တႃႇဝိတ်ႉဢေႃႈ။
၂၀ ၵူၼ်းၸႂ်ႉၵူၼ်းသွႆၸိူဝ်းၼၼ်ႉမိူဝ်ႈဢၼ်ႁၼ်မုၵ်ႉၸိူဝ်းပရေႃးၽႅတ်ႈတင်းလၢႆႁဵတ်းပရေႃးၽႅတ်ႈယူႇ၊သမူၺ်ႇလၵေႃႈႁဵတ်းၵႄႇႁဵတ်းႁူဝ်ၶဝ်ယူႇသေလႄႈၸုၵ်းယူႇၼၼ်ႉၸိုင်ဝိၺိၺ်ႇၽြႃးပဵၼ်ၸဝ်ႈတူၵ်းႁွတ်ႈၵႃႈၼိူဝ်ၵူၼ်းၸႂ်ႉၵူၼ်းသွႆသေႃးလုၸိူဝ်းၼၼ်ႉလႄႈၶဝ်ၵေႃႈႁဵတ်းပရေႃးၽႅတ်ႈဢေႃႈ။
၂၁ လိုၼ်းၼၼ်ႉတူဝ်သေႃးလုၵႂႃႇၵႃႈတီႈဝဵင်းရႃႇမလႄႈႁွတ်ႈထိုင်ၵႃႈတီႈၼမ်ႉမေႃႇလူင်ဢၼ်မီးၵႃႈတီႈဝၢၼ်ႈၸေႇၶုၼၼ်ႉသေယဝ်ႉတွင်ႈထၢမ်လႄႈဝႃႈ၊-
၂၂ သမူၺ်ႇလတင်းတႃႇဝိတ်ႉမီးၵႃႈတီႈလႂ်၊ဝႃႈၼင်ႇၼႆလႄႈၵူၼ်းၵေႃႉၼိုင်ႈၶိုၼ်းလဝ်ႈလၢတ်ႈလႄႈဝႃႈ၊-မီးယူႇၵႃႈတီႈဝၢၼ်ႈၼႃႇယုတ်ႉၼႂႂ်းလိၼ်ဝဵင်းရႃႇမၼၼ်ႉၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၵႂႃႇၸူးၵႃႈဝၢၼ်ႈၼႃႇယုတ်ႉၼႂ်းလိၼ်ဝဵင်းရႃႇမၼၼ်ႉဢေႃႈ။
၂၃ ဝိၺိၺ်ႇၽြႃးပဵၼ်ၸဝ်ႈတူၵ်းႁွတ်ႈၵႃႈၼိူဝ်မၼ်းသေယဝ်ႉမၼ်းၵေႃႈလႆႈႁဵတ်းပရေႃးၽႅတ်ႈယူႇသေလႄႈၵႂႃႇတေႃႇထိုင်ႁွတ်ႈဝၢၼ်ႈၼႃႇယုတ်ႉၼႂ်းလိၼ်ဝဵင်းရႃႇမဢေႃႈ။
၂၄ မၼ်းထွတ်ႇပႅတ်ႈၶူဝ်းၼုင်ႈမၼ်းသေယဝ်ႉႁဵတ်းပရေႃးၽႅတ်ႈၵႃႈတီႈၽၢႆႇၼႃႈသမူၺ်ႇလယူႇၶိုၼ်းၼိုင်ႈဝၼ်ႈၼိုင်ႈဢေႃႈ။ၵွပ်ႈပိူဝ်ႈၼင်ႇၼၼ်လႄႈမီးထုင်းၸၢမ်ႇဢၼ်ဝႃႈ၊-ၸွင်ႇသေႃးလုၵေႃႈၶဝ်ႈပႃးၼႂ်းပရေႃးၽႅတ်ႈတင်းလၢႆႁိုဝ်၊ဝႃႈၼင်ႇၼႆၼၼ်ႉဢေႃႈ။