Chapter
၂၈
သေႃးလုတင်းမေႈယိင်းဢၼ်ၽီၶဝ်ႈ
၁ ၼႂ်းၶိင်ႇမိူဝ်ႈဝၼ်းၼၼ်ႉၵူၼ်းၽိလိတ်ႉတိတင်းလၢႆႁႂ်ႈၵူၼ်းသိုၵ်းၶဝ်ၸူႉၵၼ်တုမ်ၵၼ်ႁႂ်ႈလႆႈတိုၵ်းၵၼ်တင်းမဵဝ်းဢိသရေႇလၶဝ်ဢေႃႈ။ၶုၼ်ဢႃႇၶိတ်ႉၵေႃႈလၢတ်ႈတီႈတႃႇဝိတ်ႉလႄႈဝႃႈ၊-ႁူႉမၢတ်ႈလွင်ႈဢၼ်မႂ်းတၵ်းလႆႈပႃးဢဝ်ၵူၼ်းမႂ်းၸိူဝ်းၼၼ်ႉသေလႄႈၸွမ်းၵဝ်ၵႂႃႇတိုၵ်းသိုၵ်းဢမၢၼ်ႇၶၢၼ်ပဵၼ်တႃႉ၊ဝႃႈၼင်ႇၼႆဢေႃႈ။
၂ တႃႇဝိတ်ႉလဝ်ႈလၢတ်ႈတီႈၶုၼ်ဢႃႇၶိတ်ႉလႄႈဝႃႈ၊-ၵမ်းၼႆႉၸဝ်ႈႁဝ်းတၵ်းႁူႉႁၼ်လွင်ႈဢၼ်ၶႃႈၸဝ်ႈႁဝ်းတၵ်းႁဵတ်းၸိူဝ်ႉၼင်ႇႁိုဝ်ၼၼ်ႉဢမၢၼ်ႇၶၢၼ်ပဵၼ်ဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်ၶုၼ်ဢႃႇၶိတ်ႉၶိုၼ်းလၢတ်ႈတီႈတႃႇဝိတ်ႉလႄႈဝႃႈ၊-လီႈယဝ်ႉ။ၵဝ်တၵ်းၶၢၼ်းမႂ်းဝႆႉၵႃႈတီႈဢရႃႇႁူဝ်သိုၵ်းဢၼ်ပႂ်ႉဢသၢၵ်ႈၵဝ်ၼၼ်ႉဢေႃႈ၊ဝႃႈၼင်ႇၼႆဢေႃႈ။
၃ မိူဝ်ႈၼၼ်ႉသမူၺ်ႇလတၢႆယဝ်ႉဢေႃႈ။ၵူၼ်းမဵဝ်းဢိသရေႇလတင်းသဵင်ႈတင်းလူင်ႁဵတ်းတၢင်းဢၼ်ႁႆႈႁွင်ႉပွင်ႉၶၢင်းသေလႄႈဢဝ်မၼ်းသၢင်းၵျူဝ်ႇၵႃႈၼႂ်းဝဵင်းရႃႇမတီႇဢၼ်မၼ်းယူႇၵဝ်ႇၵဝ်ႇၼၼ်ႉဢေႃႈ။သေႃးလုႁိုပ်ႉသြႃႇၽီလႂ်ၽီလႂ်ဢွၵ်ႇသေၵႃႈၼႂ်းမိူင်းမၼ်းၵႂႃႇတင်းသဵင်ႈဢေႃႈ။
၄ မိူဝ်ႈၼၼ်ႉၵူၼ်းၽိလိတ်ႉတိတင်းလၢႆၸူႉၵၼ်တုမ်ၵၼ်လႄႈၶျႃးတပ်ႉၶဝ်ၵႃႈတီႈဝဵင်းသုၼိမ်ႇဢေႃႈ။သေႃးလုၵေႃႈႁႂ်ႈၵူၼ်းမဵဝ်းဢိသရေႇလတင်းသဵင်ႈတင်းလူင်ၸူႉၵၼ်တုမ်ၵၼ်သေလႄႈၶဝ်ဢွၼ်ၵၼ်ၶျႃးတပ်ႉၶဝ်ယူႇၵႃႈၼိူဝ်လွႆၵိလပေႃႇဢေႃႈ။
၅ သေႃးလုႁၼ်မုၵ်ႉၸိူဝ်းၵူၼ်းၽိလိတ်ႉတိၸိူဝ်းၼၼ်ႉသေယဝ်ႉၵူဝ်ႁႄလႄႈမီးႁူဝ်ၸႂ်ဢၼ်သၼ်ႇဝႆဢေႃႈ။
၆ သေႃးလုလဝ်ႈထၢမ်တီႈထႃႇဝရႃႉၽြႃးဢေႃႈ။ထႃႇဝရႃႉၽြႃးဢမ်ႇဢိူဝ်ႈမၼ်း။မၼ်းၸဝ်ႈဢမ်ႇဢဝ်တၢင်းဢၼ်ၼွၼ်းၽၼ်၊ဢုရိမ်ႇ၊ပရေႃးၽႅတ်ႈ၊တင်းလၢႆသေလႄႈဢိူဝ်ႈမၼ်းဢေႃႈ။
၇ မိူဝ်ႈၼၼ်ႉသေႃးလုလၢတ်ႈတီႈၶႃႈမၼ်းၵူၼ်းမၼ်းလႄႈဝႃႈ၊-ၵႂႃႇႁႃမေႈယိင်းသြႃႇၽီၼၼ်ႉမႃးပုၼ်ႈၵဝ်တႃႉ။ၵဝ်တၵ်းၵႂႃႇလႄႈတွင်ႉထၢမ်တီႈမၼ်းဢေႃႈ၊ဝႃႈၼင်ႇၼႆဢေႃႈ။ၶႃႈမၼ်းၵူၼ်းမၼ်းလဝ်ႈလၢတ်ႈလႄႈဝႃႈ၊-တူၺ်းတီႈၶႃႈလူး။ၵႃႈတီႈဝဵင်းဢိၼ်ႇတေႃႇရၼၼ်ႉမီးမေႈယိင်းသြႃႇၽီၵေႃႉၼိုင်ႈၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊
၈ သေႃးလုပူတ်းလၢႆၶူဝ်းၼုင်ႈမၼ်းၽႅတ်ႉတူဝ်ၽႅတ်ႉႁၢင်ႊမၼ်းသေယဝ်ႉပႃးဢဝ်ၵူၼ်းသွင်ၵေႃႉလႄႈႁွတ်ႈထိုင်ၵႂႃႇၵႃႈတီႈမေႈယိင်းၼၼ်ႉၶိင်ႇၵၢင်ၶိုၼ်းလႄႈတွင်းပၢၼ်ႇလႄႈဝႃႈ၊-မႂ်းဢိင်ပိုင်ႈၽီဢၼ်မႂ်းႁူမ်ႈပွင်းယူႇၼၼ်ႉသေလႄႈၶိုၼ်းႁွင်ႉၵေႃႉဢၼ်ၵဝ်တၵ်းလၢတ်ႈတီႈမႂ်းၼၼ်ႉပေႃႇမႃးတႃႉ၊ဝႃႈၼင်ႇၼႆဢေႃႈ။
၉ မေႈယိင်းသြႃႇၽီၼၼ်ႉၵေႃႈၶိုၼ်းလၢတ်ႈလႄႈဝႃႈ၊-မႂ်းႁူႉလွင်ႈဢၼ်သေႃးလုပႄႇၽဵဝ်ႈပႅတ်ႈသြႃႇၽီလႂ်၊ၽိူဝ်ႉလႂ်၊ၵႃႈၼႂ်မိူင်းတင်းမိူင်းယဝ်ႉဢမ်ႇၸႂ်ႈႁိုဝ်။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းၶႂ်ႈႁဵတ်းတူင်ႇႁဵဝ်ႉတူင်ႇၶိူမ်းသေလႄႈတီႉဢဝ်ၵဝ်ႁႂ်ႈလႆႈဢဝ်ဢသၢၵ်ႈၵဝ်တၢႆႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊
၁၀ သေႃးလုတိူင်ႇထႃႇဝရႃႉၽြႃးသေလႄႈၵိၼ်ႇဝႃႈတီႈမၼ်းလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉမႂ်းတၵ်းဢမ်ႇလႆႈႁွတ်ႈဢပျႅတ်ႈၵွပ်ႈပိူဝ်ႈလွင်ႈၼႆႉလႃးလႃး၊ဝႃႈၼင်ႇၼႆဢေႃႈ။
၁၁ မေႈယိင်းၼၼ်ႉၵေႃႈထၢမ်လႄႈဝႃႈ၊-ၵဝ်တၵ်းႁွင်ႉဢဝ်ၵေႃႉလႂ်ၶိုၼ်းပေႃႇမႃး၊ဝႃႈၼင်ႇၼႆဢေႃႈ။သေႃးလုၵေႃႈဝႃႈ၊-ႁႂ်ႈသမူၺ်ႇလၶိုၼ်းပေႃႇမႃးသေၵမ်း၊ဝႃႈၼင်ႇၼႆဢေႃႈ။
၁၂ မေႈယိင်းၼၼ်ႉႁၼ်သမူၺ်ႇလသေယဝ်ႉႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇတီႈသေႃးလုလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းပႅတ်ႉလႅၼ်ၶႃႈၸဝ်ႈတီႈၶႃႈ။ၸဝ်ႈႁဝ်းၼႆႉပဵၼ်သေႃးလုဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၶုၼ်ႁေႃၶမ်းသေႃးလုလၢတ်ႈတီႈမၼ်းလႄႈဝႃႈ၊-ယႃႇပေမႆႈၸႂ်။
၁၃ မႂ်းႁၼ်ၵႃႈသင်ဝႃႈၼင်ႇၼႆလႄႈမေႈယိင်းသြႃႇၽီၼၼ်ႉၵေႃႈလဝ်ႈလၢတ်ႈလႄႈဝႃႈ-ၶႃႈၸဝ်ႈႁၼ်ဝိၺိၺ်ႇလုၵ်ႉသေၵႃႈၼႂ်းလိၼ်ၶိုၼ်ႈမႃးယူႇတီႈၶႃႈဢေႃႈ၊ဝႃႈၼင်ႇၼႆဢေႃႈ။
၁၄ ၶုၼ်လူင်ၶိုၼ်းထၢမ်လႄႈဝႃႈ၊-ႁၢင်ႊၽၢင်မၼ်းပဵၼ်ၸိူဝ်ႉၼင်ႇႁိုဝ်ဝႆႉ၊ဝႃႈၼင်ႇၼႆဢေႃႈ။မေႈယိင်းသြႃႇၽီၼၼ်ႉၵေႃႈလဝ်ႈလၢတ်ႈလႄႈဝႃႈ၊-ပဵၼ်ၵူၼ်းထဝ်ႈၶိုၼ်ႈမႃးယူႇတီႈၶႃႈဢေႃႈ။မၼ်းမႆႊၽႃႈမႆႊႁူမ်ႇသုမ်ႇယူႇၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်သေႃးလုႁူႉၵမ်းလဵဝ်လွင်ႈဢၼ်ပဵၼ်သမူၺ်ႇလၼၼ်ႉလႄႈမၼ်းၶုပ်ႉမူပ်ႇၵႃႈတီႈလိၼ်ၵမ်းလဵဝ်ဢေႃႈ။
၁၅ သမူၺ်ႇလၵေႃႈထၢမ်တီႈသေႃးလုလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်မႂ်းယႃႉယူၵ်ႉၵဝ်လႄႈႁႂ်ႈၵဝ်ပေႃႇမႃး၊မိူဝ်ႈဢၼ်ႈဝႃႈၼင်ႇၼႆၸိုင်သေႃးလုၵေႃႈၶိုၼ်းလၢတ်ႈလႄႈဝႃႈ၊-ၵဝ်ၶႃႈၼႆႉႁွတ်ႈထိုင်တၢင်းဢၼ်ယၢပ်ႇၸႂ်ၶၢၼ်ၸႂ်ၼႃႇလူင်လၢင်ၶႃႈယဝ်ႉ။ၵူၼ်းၽိလိတ်ႉတိတင်းလၢႆတိုၵ်းတေႃးၵဝ်ၶႃႈဢေႃႈ။ၽြႃးပဵၼ်ၸဝ်ႈၸုၼ်ႉပႅတ်ႈၵဝ်ၶႃႈၶႃႈယဝ်ႉ။မၼ်းၸဝ်ႈဢမ်ႇဢဝ်တင်းပရေႃးၽႅတ်ႈလႂ်တၢင်းဢၼ်ၼွၼ်းၽၼ်ႁၼ်လႂ်သေလႄႈဢိူဝ်ႈၵဝ်ၶႃႈ။ပိူဝ်ႈၼႆလႄႈၵဝ်ၶႃႈႁွင်ႉပၢင်းဢဝ်ၸဝ်ႈႁဝ်းၶႃႈႁႂ်ႈၸဝ်ႈႁဝ်းၶႃႈၼႄပၼ်လွင်ႈတၢင်းဢၼ်ၵဝ်ၶႃႈတၵ်းလႆႈႁဵတ်းၸိူဝ်ႉၼင်ႇႁိုဝ်ၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။
၁၆ သမူၺ်ႇလၵေႃႈလၢတ်ႈလႄႈဝႃႈ၊-ပေႃးထႃႇဝရႃႉၽြႃးၸုၼ်ႉပႅတ်ႈမႂ်းလႄႈဢမ်ႇယူႇၽၢႆႇမႂ်းယဝ်ႉၸိုင်၊ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းယင်းတွင်ႈထၢမ်တီႈၵဝ်ယူႇ။
၁၇ ထႃႇဝရႃႉၽြႃးႁဵတ်းတီႈမႂ်းၸွမ်းၵႃႈၼင်ႇဢၼ်မၼ်းၸဝ်ႈမီးဢမိင်ႉဝႆႉတီႈၵဝ်ၼၼ်ႉယဝ်ႉ။ထႃႇဝရႃႉၽြႃးၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းသေၵႃႈၼႂ်းမိုဝ်းမႂ်းလႄႈပၼ်တီႈၵူၼ်းၵေႃႉဢၼ်ၸၢပ်ႈသႅင်ႇၵၼ်တင်းမႂ်းဢၼ်ဝႃႈတႃႇဝိတ်ႉၼၼ်ႉယဝ်ႉ။
၁၈ လွင်ႈမၼ်းၸမ်းၵွပ်ႈပိူဝ်ႈဢၼ်မႂ်းဢမ်ႇထွမ်ႇဢဝ်ၵႂၢမ်းထႃႇဝရႃႉၽြႃးလႄႈဢမ်ႇႁဵတ်းၸွမ်းၼင်ႇတၢင်းၸႂ်မႆႈၶႆႈၸႃႉမၼ်းၸဝ်ႈဢၼ်ႁႅင်းယႂ်ႇၼႃႇၼၼ်ႉတီႈၵူၼ်းမဵဝ်းဢႃႇမလိၵ်ႉၸိူဝ်းၼၼ်ႉလႄႈထႃႇဝရႃႉၽြႃးႁႂ်ႈဢမူႉၼႆႉႁွတ်ႈထိုင်မႃးၵႃႈတီႈမႂ်းဝၼ်းမိူဝ်ႈၼႆႉယဝ်ႉ။
၁၉ လိူဝ်သေၼႆႉထႃႇဝရႃႉၽြႃးတၵ်းဢဝ်မႂ်းဢိၵ်ႇတင်း
မဵဝ်းဢိသရေႇလဢၢပ်ႈပၼ်ၵႃႈၼႂ်းမိုဝ်းၵူၼ်းၽိလိတ်ႉတိတင်းလၢႆဢေႃႈ။ဝၼ်းမိူဝ်ႈၽုၵ်ႈမႂ်းဢိၵ်ႇတင်းလုၵ်ႈၸၢႆးမႂ်းတင်းလၢႆတၵ်းမီးယူႇလူၺ်ႈၵၼ်တင်းၵဝ်ဢေႃႈ။ထႃႇဝရႃႉၽြႃးတၵ်းဢဝ်မုၵ်ႉၸိူဝ်းမဵဝ်းဢိသရေႇလဢၢပ်ႈပၼ်ၵႃႈၼႂ်းမိုဝ်းၵူၼ်းၽိလိတ်ႉတိတင်းလၢႆဢေႃႈ၊ဝႃႈၼင်ႇၼႆဢေႃႈ။
၂၀ မိူဝ်ႈၼၼ်ႉသေႃးလုလူမ်ႉယဵတ်ႇတဵတ်ႇၸပ်းၵႃႈၼိူဝ်လိၼ်သေလႄႈၵူဝ်ႁႄၼႃႇလူင်လၢင်ၵွပ်ႈပိူဝ်ႈၵႂၢမ်းသမူၺ်ႇလၼၼ်ႉဢေႃႈ။ၵွပ်ႈပိူဝ်ႈမၼ်းဢမ်ႇၵိၼ်တၢင်းၵိၼ်တၢင်းၶူပ်းၵႃႈသင်လႃးလႃးဝၼ်းၼိုင်ႈၶိုၼ်းၼိုင်ႈလႄႈႁႅင်းမၼ်းသဵင်ႈၵႂႃႇဢေႃႈ။
၂၁ မေႈယိင်းသြႃႇၽီၼၼ်ႉမႃးၸူးတီႈသေႃးလုလႄႈႁၼ်လွင်ႈဢၼ်မၼ်းယၢပ်ႇၸႂ်ၼႃႇလူင်လၢင်ယူႇၼၼ်ႉလႄႈလဝ်ႈလၢတ်ႈလႄႈဝႃႈ၊-တူၺ်းတီႈၶႃႈလူး။ၶႃႈၸဝ်ႈႁဝ်းၼႆႉထွမ်ႇဢဝ်ၵႂၢမ်းၸဝ်ႈႁဝ်းတီႈၶႃႈယဝ်ႉ။ယင်းဢမ်ႇသလေၢႆဢသၢၵ်ႈတူဝ်ၸဝ်ႈၵဝ်ႇလႄႈထွမ်ႇဢဝ်ၵႂၢမ်းဢၼ်ၸဝ်ႈႁဝ်းမီးဢမိင်ႉၼၼ်ႉတီႈၶႃႈယဝ်ႉ။
၂၂ ပိူဝ်ႈဢၼ်ပဵၼ်ၼင်ႇၼႆလႄႈမိူဝ်ႈလဵဝ်ၼႆႉၶႅၼ်းတေႃႈထွမ်ႇဢဝ်ၵႂၢမ်းၶႃႈၸဝ်ႈသေၵမ်းၶႃႈ။ႁႂ်ႈၶႃႈၸဝ်ႈလႆႈဢဝ်တၢင်းၵိၼ်ဢိတ်းဢွၼ်ႇၼိုင်ႈတမ်းပၼ်ၵႃႈတီႈၽၢႆႇၼႃႈၸဝ်ႈႁဝ်းသေၵမ်းတီႈၶႃႈ။ၶႅၼ်းတေႃႈၵိၼ်ႁႂ်ႈၸဝ်ႈႁဝ်းမီးႁႅင်းလႄႈတၵ်းလုၵ်ႉပႆၵႂႃႇလႆႈၼၼ်ႉသေၵမ်းၶႃႈ၊ဝႃႈၼင်ႇၼႆသေၵေႃႈ၊မၼ်းထဵင်ပႅတ်ႈလႄႈဝႃႈ၊-ၵဝ်ဢမ်ႇၵိၼ်ၵူၺ်း၊ဝႃႈၼင်ႇၼႆဢေႃႈ။
၂၃ ၵူၺ်းၵႃႈၶႃႈမၼ်းၵူၼ်းမၼ်းၸိူဝ်းၼၼ်ႉၽွမ်ႉၵၼ်တင်းမေႈယိင်းသြႃႇၽီၼၼ်ႉသေလႄႈတွင်းပၢၼ်ႇမၼ်းဢေႃႈ။မၼ်းထွမ်ႇဢဝ်ၵႂၢမ်းၶဝ်ၼၼ်ႉသေယဝ်ႉလုၵ်ႉသေၵႃႈတီႈၼိူဝ်လိၼ်လႄႈၶိုၼ်ႈၵႂႃႇၼင်ႈၵႃႈၼိူဝ်ၵူႇဢေႃႈ။
၂၄ မေႈယိင်းသြႃႇၽီၼၼ်ႉမီးဝူဝ်းဢွၼ်ႇဢၼ်မၼ်းလဵင်ႉဝႆႉပီးလီမၼ်းလီၼၼ်ႉၵႃႈတီႈႁိူၼ်းမၼ်းလႄႈမၼ်းဢဝ်တၢႆၶၼ်ၶၼ်ၽႂ်းၽႂ်းဢေႃႈ။ၽွင်ၶဝ်ႈမုၼ်းၵေႃႈမၼ်းဢဝ်လႄႈၼူတ်ႈသေယဝ်ႉၽဝ်ႁဵတ်းၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈသေလႄႈတမ်းပၼ်ၵႃႈတီႈၽၢႆႇၼႃႈသေႃးလုဢိၵ်ႇတင်းၶႃႈမၼ်းၵူၼ်းမၼ်းၸိူဝ်းၼၼ်ႉလႄႈၶဝ်ၵေႃႈၵိၼ်ဢေႃႈ။
၂၅ ဝၢႆးသေၼၼ်ႉၶဝ်လုၵ်ႉလႄႈၶိုၼ်းမိူဝ်းၵႂႃႇသေဢေႃႈ။