Chapter
၂၉
ၶုၼ်ဢႃႇၶိတ်ႉႁႂ်ႈတႃႇဝိတ်ႉၶိုၼ်းမိူဝ်း
၁ ၵူၼ်းၽိလိတ်ႉတိၸိူဝ်းၼၼ်ႉႁႂ်ႈၵူၼ်းသိုၵ်းၶဝ်ၵႃႈမီးၸူႉၵၼ်တုမ်ၵၼ်ၵႃႈတီႈဝဵင်းဢႃႇၽိၵ်ႉဢေႃႈ။ၵူၼ်းမဵဝ်းဢိသရေႇလတင်းလၢႆၵေႃႈၶျႃးတပ်ႉၶဝ်ယူႇၵႃႈတီႈႁိမ်းၼမ်ႉဢွၵ်ႇႁူးဢၼ်မီးၵႃႈတီႈဝဵင်းယေႇၸရေႇလၼၼ်ႉဢေႃႈ။
၂ ၵူၼ်းၽိလိတ်ႉတိၸိူဝ်းၼၼ်ႉၶီႇသိုၵ်းၵႂႃႇယေႈၸုမ်းၵူၼ်းယေႈပၢၵ်ႇ၊ယေႈႁဵင်ယူႇသေလႄႈတႃႇဝိတ်ႉဢိၵ်ႇတင်းၵူၼ်းမၼ်းၸိူဝ်းၼၼ်ႉၵေႃႈၸွမ်းၶုၼ်ဢႃႇၶိတ်ႉၼၼ်ႉၵႂႃႇၵႃႈတီႈတပ်ႉလိုၼ်းသုတ်းဢေႃႈ။
၃ မိူဝ်ႈၼၼ်ႉႁူဝ်သိုၵ်းၽိလိတ်ႉတိၸိူဝ်းၼၼ်ႉဢွၼ်ၵၼ်ထၢမ်ဝႃႈ၊-ၵူၼ်းႁေႇပႄးၸိူဝ်းၼႆႉပဵၼ်ၽူႈလႂ်၊ဝႃႈၼင်ႇၼႆလႄႈၶုၼ်ဢႃႇၶိတ်ႉၵေႃႈလၢတ်ႈတီႈႁူဝ်သိုၵ်းၽိလိတ်ႉတိၸိူဝ်းၼၼ်ႉလႄႈဝႃႈ၊-မၼ်းပဵၼ်တႃႇဝိတ်ႉ၊ၶႃႈသေႃးလု၊ၶုၼ်ႁေႃၶမ်းဢိသရေႇလ၊ၼၼ်ႉဢေႃႈ။မၼ်းယူႇၵႃႈတီႈၵဝ်ပီႊပၢႆယဝ်ႉ။ၸႃႉၸဵမ်မိူဝ်ႈဝၼ်းဢၼ်မၼ်းႁွတ်ႈထိုင်မႃးၵႃႈတီႈၵဝ်ၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉၵဝ်ဢမ်ႇႁၼ်တီႈဢၼ်တၵ်းလႆႈတၢင်ႇဢပျႅတ်ႈၵႃႈတီႈမၼ်းသေၸိူဝ်ႉသေပိူင်၊ဝႃႈၼင်ႈၼႆသေၵေႃႈ၊ႁူဝ်သိုၵ်းၽိလိတ်ႉတိၸိူဝ်းၼၼ်ႉၸႂ်မႆႈၶႆႈၸႃႉလႄႈဝႃႈ၊-ႁႂ်ႈၵေႃႉၼႆႉၶိုၼ်းမိူဝ်းၵႂႃႇယူႇၵႃႈတီႈဢၼ်ၸဝ်ႈႁဝ်းၶျႃးတီႈယူႇပၼ်မၼ်းၼၼ်ႉသေ။
၄ ယႃႇပေႁႂ်ႈမၼ်းလူင်းၵႂႃႇၸွမ်းၵၼ်တင်းႁဝ်းၵႃႈၼႂ်းသိုၵ်း။မိူဝ်ႈဢၼ်ႁဝ်းတိုၵ်းသိုၵ်းၼၼ်ႉႁဝ်းၵူဝ်မၼ်းတၵ်းယူႇၽၢႆႇရၢၼ်ႇသူႇႁဝ်းလႄႈၶိုၼ်းတိုၵ်းႁဝ်းဢေႃႈ။လိူဝ်သတေၢင်းဢၼ်တဵပ်းဢဝ်ႁူဝ်ၵူၼ်းႁဝ်းၼၼ်ႉလွင်ႈတၢင်းဢၼ်ယိင်ၶႅၼ်းတေႁဵတ်းႁႂ်ႈၸႂ်ၸဝ်ႈမၼ်းသိူဝ်းၸူမ်းၼၼ်ႉဢမ်ႇမီးလွင်ႈတၢင်းတၢင်ႇၸိူဝ်ႉတၢင်းမဵဝ်းယဝ်ႉ။
၅ ၵေႃႉၼႆႉပဵၼ်တႃႇဝိတ်ႉဢဝ်ၶဝ်ဢွၼ်ၵၼ်ၵႃႈဝႅၼ်ႁွင်ႉၵႂၢမ်းၵူပ်းဝႃႈ၊-သေႃးလုဢဝ်တၢႆပဵၼ်ႁဵင်ပဵၼ်ႁဵင်၊တႃႇဝိတ်ႉဢဝ်တၢႆပဵၼ်မိုၼ်ႇပဵၼ်မိုၼ်ႇ၊ဢၼ်ဝႃႈၼၼ်ႉဢမ်ႇၸႂ်ႈႁိုဝ်၊ဝႃႈၼင်ႇၼႆလႄႈ၊ၶုၼ်ဢႃႇၶိတ်ႉႁွင်ႉဢဝ်တႃႇဝိတ်ႉလႄႈလၢတ်ႈတီႈမၼ်းလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉမႂ်းႁဵတ်းသိုဝ်ႈသိုဝ်ႈတေႃႇတေႃႇဢမၢၼ်ႇၶၢၼ်ပဵၼ်လႄႈတၢင်းဢၼ်မႂ်းၵႂႃႇမႃးသၢင်ႈႁဵတ်းၵႃႈၼႂ်းတပ်ႉလူၺ်ႈၵၼ်တင်းၵဝ်ၼၼ်ႉထုၵ်ႇၸႂ်မႅၼ်ႈၸႂ်ၵဝ်ယဝ်ႉ။
၆ ၸႃႉၸဵမ်မိူဝ်ႈဝၼ်းဢၼ်မႂ်းႁွတ်ႈထိုင်ၵႃႈတီႈၵဝ်ၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉၵဝ်ဢမ်ႇႁၼ်ဢပျႅတ်ႈတီႈမႂ်း။
၇ ၼႂ်းဝႃႈၼၼ်သေၵေႃႈမႂ်းဢမ်ႇထုၵ်ႇတႃႁူဝ်သိုၵ်းၸိူဝ်းၼႆႉ။ပိူဝ်ႈၼႆလႄႈမိူဝ်ႈလဵဝ်ၼႆႉမႂ်းၶိုၼ်းမိူဝ်းလႄႈၵႂႃႇၼိမ်ၼိမ်လီလီတႃႉ။ယႃႇပေႁဵတ်းႁႂ်ႈႁူဝ်သိုၵ်းၽိလိတ်ႉတိၸိူဝ်းၼႆႉၸႂ်မႆႈၶႆႈၸႃႉသေၵမ်း၊မိူဝ်ႈဢၼ်ဝႃႈၼင်ႇၼႆၸိုင်တႃႇဝိတ်ႉလဝ်ႈထၢမ်တီႈၶုၼ်ဢႃႇၶိတ်ႉလႄႈဝႃႈ၊-ၶႃႈၸဝ်ႈလႆႈႁဵတ်းၽိတ်းမႅၼ်ႈၵႃႈသင်ယဝ်ႉ။
၈ ၸူဝ်ႈဢၼ်ၶႃႈၸဝ်ႈမႃးယူႇၵႃႈတီႈၸဝ်ႈႁဝ်းၼႆႉတေႃႇထိုင်ႁွတ်ႈဝၼ်းမိူဝ်ႈၼႆႉၸဝ်ႈႁဝ်းထူပ်းႁၼ်ဢပျႅတ်ႈၵႃႈသင်ၼိူဝ်ၶႃႈၸဝ်ႈလႄႈဢမ်ႇပၼ်ႁႂ်ႈၶႃႈၸဝ်ႈလႆႈၵႂႃႇတိုၵ်းရၢၼ်ႇသူႇၸဝ်ႈၶုၼ်ႁေႃၶမ်းႁဝ်းၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၶုၼ်ဢႃႇၶိတ်ႉၶိုၼ်းလၢတ်ႈတီႈတႃႇဝိတ်ႉလႄႈဝႃႈ၊-ၵဝ်ႁူႉလွင်ႈဢၼ်မႂ်းထုၵ်ႇတႃမႅၼ်ႈတႃၵဝ်မိူၼ်ၸိူဝ်ႉၼင်ႇတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈၼၼ်ႉယူႇဢေႃႈ။
၉ ၼႂ်းဝႃႈၼၼ်သေၵေႃႈႁူဝ်သိုၵ်းၽိလိတ်ႉတိၸိူဝ်းၼၼ်ႉဝႃႈ၊-မၼ်းဢမ်ႇလႆႈၸွမ်းၵၼ်တင်းႁဝ်းၵႂႃႇတိုၵ်းသိုၵ်း၊ဝႃႈၼင်ႇၼႆဝႆႉယဝ်ႉ။ပိူဝ်ႈၼႆလႄႈမိူဝ်ႈၽုၵ်ႈၵၢင်ၼႂ်ၸဝ်ႉၸဝ်ႉမႂ်းဢိၵ်ႇတင်းၵူၼ်းမႂ်းဢၼ်ၸွမ်းမႃးလူၺ်ႈၵၼ်တင်းမႂ်းၼၼ်ႉၸိူဝ်းၼၼ်ႉလုၵ်ႉၶိုၼ်းမိူဝ်းတႃႉ၊ဝႃႈၼင်ႇၼႆဢေႃႈ။
၁၀ တႃႇဝိတ်ႉဢိၵ်ႇတင်းၵူၼ်းမၼ်းၸိူဝ်းၼၼ်ႉၵေႃႈလုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈမိူင်းၽိလိတ်ႉတိဢေႃႈ။ၵူၼ်းၽိလိတ်ႉတိၸိူဝ်းၼၼ်ႉၸမ်းၶီႇသိုၵ်းၵႂႃႇၵႃႈတီႈဝဵင်းယေႇၸရေႇလသေဢေႃႈ။