Chapter
၂၇
တႃႇဝိတ်ႉၼႂ်းၵေၵၢင်ၽိလိတ်ႉတိ
၁ လၢႆးသမ်ႉတႃႇဝိတ်ႉလၢတ်ႈၼႂ်းၸႂ်လႄႈဝႃႈ၊-ဝၼ်းၼိုင်ႈၵဝ်တၵ်းတူၵ်းသုမ်းၵႃႈၼႂ်းမိုဝ်းသေႃးလုယူႇယဝ်ႉ။ပိူဝ်ႈၼႆလႄႈပေႃးၵဝ်ပၢႆၵႂႃႇယူႇၵႃႈၼႂ်းလႅၼ်လိၼ်မိူင်းၽိလိတ်ႉတိၸိုင်တၵ်းလီဢေႃႈ။
၂ သေႃးလုၵေႃႈတၵ်းဢမ်ႇၸွမ်းႁႃၵဝ်ၵႃႈတီႈၼႂ်းလႅၼ်လိၼ်ဢိသရေႇလၼႆႉလႄႈၵဝ်တၵ်းလွတ်ႈသေၵႃႈၼႂ်းမိုဝ်းမၼ်းယူႇယဝ်ႉဝႃႈၼင်ႇၼႆသေယဝ်ႉ၊တႃႇဝိတ်ႉတင်းၵူၼ်းႁူၵ်းပၢၵ်ႇဢၼ်ပႃးတီႈမၼ်းၸိူဝ်းၼၼ်ႉလႄႈၶၢမ်ႈၵႂႃႇၸူးၵႃႈတီႈဢႃႇၶိတ်ႉ၊လုၵ်ႈၸၢႆးမေႃႇၶ၊ၶုၼ်ၵႃႇသ၊ၼၼ်ႉဢေႃႈ။
၃ တႃႇဝိတ်ႉဢိၵ်ႇတင်းၵူၼ်းမၼ်းၸိူဝ်းၼၼ်ႉပႃးဢဝ်လုၵ်ႈၶဝ်မေးၶဝ်ႁင်းၽႂ်ႁင်းမၼ်းလႄႈယူႇၵႃႈတီႈၶုၼ်ဢႃႇၶိတ်ႉၵႃႈၼႂ်းဝဵင်းၵႃႇသပုၼ်ႉဢေႃႈ။မေးတႃႇဝိတ်ႉသွင်ၵေႃႉဢၼ်ဝႃႈဢၽိၼွင်ႇ၊ၵူၼ်းယိင်းဝဵင်းယေႇၸရေႇလ၊တင်းဢၽိၵေႇလ၊ၵူၼ်းယိင်းဝဵင်းၵရမေႇလ၊ဢၼ်ပဵၼ်မေးၵဝ်ႇၼႃႇပလ၊ၼၼ်ႉၵေႃႈယူႇၸွမ်းတႃႇဝိတ်ႉဢေႃႈ။
၄ ပိူၼ်ႈလဝ်ႈလၢတ်ႈသေႃးလုလွင်ႈဢၼ်တႃႇဝိတ်ႉပၢႆႈၵႂႃႇၵႃႈတီႈဝဵင်းၵႃႇသၼၼ်ႉၸိုင်မၼ်းယင်းဢမ်ႇလိုပ်ႈဢမ်ႇၸွမ်းႁႃယဝ်ႉဢေႃႈ။
၅ တႃႇဝိတ်ႉလဝ်ႈလၢတ်ႈတီႈၶုၼ်ဢႃႇၶိတ်ႉလႄႈဝႃႈ၊-ပေႃးၵဝ်ၶႃႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈဢမၢၼ်ႇၶၢၼ်ပဵၼ်ၸိုင်ၶႅၼ်းတေႃႈပၼ်တီႈယူႇတီႈသဝ်းတီႈၵဝ်ၶႃႈၵႃႈတီႈဝၢၼ်ႈထိူၼ်ႇသဝေၢၼ်ႈဝၢၼ်ႈသေၵမ်းၶႃႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၶႃႈၸဝ်ႈတၵ်းလႆႈယူႇလူၺ်ႈၵၼ်တင်းၸဝ်ႈႁဝ်းၵႃႈၼႂ်းဝဵင်းလူင်ၸဝ်ႈႁဝ်းၼႆႉၶႃႈ၊မိူဝ်ႈဢၼ်ဝႃႈၼင်ႇၼႆၸိုင်ၼႂ်းဝၼ်းၼၼ်ႉၶုၼ်ဢႃႇၶိတ်ႉပၼ်ဝဵင်းၸိၵလတ်ႉတီႈမၼ်းဢေႃႈ။
၆ ၵွပ်ႈပိူဝ်ႈၼင်ႇၼၼ်လႄႈဝဵင်းၸိၵလတ်ႉၸၢပ်ႈသႅင်ႇၵၼ်တင်းၶုၼ်ႁေႃၶမ်းယုတတင်းလၢႆယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
၇ တႃႇဝိတ်ႉယူႇၵႃႈတီႈမိူင်းၽိလိတ်ႉတိၼၼ်ႉပီႊပၢႆသီႇလိူၼ်ဢေႃႈ။မီးၽဝ်ႇၼိုင်ႈတႃႇဝိတ်ႉဢိၵ်ႇတင်းၵူၼ်းမၼ်းၸိူဝ်းၼၼ်ႉၶိုၼ်ႈၵႂႃႇလႄႈတိုၵ်းတေႃးၵူၼ်းၵေႇသုရိ၊ၵူၼ်းၵေႇရၸိ၊ၵူၼ်းဢႃႇမလိၵ်ႉတင်းလၢႆဢေႃႈ။
၈ ၵူၼ်းမဵဝ်းၸိူဝ်းၼၼ်ႉပဵၼ်ၵူၼ်းဢၼ်ယူႇၵႃႈၼႂ်းမိူင်းဢၼ်မီးၸႃႉၸဵမ်သဵၼ်ႈတၢင်းဢၼ်ၵႂႃႇၸူးဝဵင်းသုရတေႃႇထိုင်ႁွတ်ႈမိူင်းဢေႇၵႅပ်ႉတုၼၼ်ႉယူႇၸဵမ်မိူဝ်ႈဢွၼ်ႇၼႆႉၼၼ်ႉဢေႃႈ။
၉ တႃႇဝိတ်ႉတိုၵ်းတေႃးယႃႉပႅတ်ႈမိူင်းၼၼ်ႉလႄႈဢမ်ႇပၼ်ဢသၢၵ်ႈၵူၼ်းယိင်းၵူၼ်းၸၢႆးၵတ်းယဵၼ်ၶျၢမ်းသႃႇသေၵေႃႉသေၵူၼ်း။သိမ်းဢဝ်သူဝ်း၊ဝူဝ်း၊မႃႉလီႈ၊ၵလႃႇဢုၵ်ႉ၊ၶူဝ်းၼုင်ႈတၢင်းမႆႊသေလႄႈၶိုၼ်းမိူဝ်းၵႂႃႇၵႃႈတီႈၶုၼ်ဢႃႇၶိတ်ႉသေဢေႃႈ။
၁၀ ၶုၼ်ဢႃႇၶိတ်ႉထၢမ်လႄႈဝႃႈ၊-မိူဝ်ႈၼႆႉသူၵႂႃႇတိုၵ်းသိုၵ်းၵႃႈတီႈလႂ်၊ဝႃႈၼင်ႇၼႆၸိုင်တႃႇဝိတ်ႉလဝ်ႈလၢတ်ႈလႄႈဝႃႈ၊-ၵႂႃႇတိုၵ်းၵႃႈတီႈပွတ်းတၢင်းၸၢၼ်းမိူင်းယုတ၊ပွတ်းတၢင်းၸၢၼ်းမိူင်းယေႇရမေႇလ၊ပွတ်းတၢင်းၸၢၼ်းမိူင်းၵေႇၼိ၊ၸိူဝ်းၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။
၁၁ တႃႇဝိတ်ႉဢမ်ႇပၼ်ၵူၼ်းၸၢႆးၵူၼ်းယိင်းဢသၢၵ်ႈလိပ်းလႄႈဢဝ်မႃးၵႃႈၼႂ်းဝဵင်းၵႃႇသသေၵေႃႉ။လွင်ႈမၼ်းၸမ်းမၼ်းၵူဝ်ၶဝ်တၵ်းမွၵ်ႇလၢတ်ႈလူၺ်ႈလွင်ႈတၢင်းဢၼ်တႃႇဝိတ်ႉႁဵတ်းၸိူဝ်းၼၼ်ႉဢေႃႈ။ၸူဝ်ႈဢၼ်မၼ်းယင်းယူႇၵႃႈၼႂ်းမိူင်းၽိလိတ်ႉတိယူႇၼၼ်ႉမၼ်းမီးဢလေႉဢၼ်ႁဵတ်းၸိူဝ်ႉၼင်ႇၼၼ်ဢေႃႈ။
၁၂ ၶုၼ်ဢႃႇၶိတ်ႉယုမ်ႇၵႂၢမ်းတႃႇဝိတ်ႉလႄႈဝႃႈ၊-မၼ်းႁဵတ်းတေႃႇထိုင်ႁွတ်ႈထၼ်ႈပေႃးၵူၼ်းမဵဝ်းမၼ်းၵူၼ်းမဵဝ်းဢိသရေႇလၶဝ်ဢဵတ်ႇသဵတ်ႇမၼ်းယဝ်ႉ။ပိူဝ်ႈၼႆလႄႈမၼ်းတၵ်းၶၢမ်ႇႁဵတ်းၶႃႈတီႈၵဝ်ယူႇတႃႇသေႇဢေႃႈ၊ဝႃႈၼင်ႇၼႆဢေႃႈ။