Chapter
၂၆
တႃႇဝိတ်ႉႁႂ်ႈဢသၢၵ်ႈသေႃးလုၵတ်းယဵၼ်ၶျၢမ်းသႃႇထႅင်ႈ
၁ လၢႆးသမ်ႉၵူၼ်းၸိၽတင်းလၢႆမႃးတီႈသေႃးလုၵႃႈတီႈဝဵင်းၵိပႃႇၼၼ်ႉသေလႄႈလဝ်ႈလၢတ်ႈလႄဝႃႈ၊-တႃႇဝိတ်ႉၼၼ်ႉတဵတ်ႇမႅပ်းယူႇၵႃႈတီႈလွႆႁၶိလဢၼ်မီးၵႃႈတီႈၽၢႆႇၼႃႈယေႇသိမုၼ်ႇၼၼ်ႉဢေႃႈ၊
၂ ဝႃႈၼင်ႇၼႆလႄႈသေႃးလုၵေႃႈပႃးဢဝ်ၵူၼ်းမဵဝ်းဢိသရေႇလသၢမ်ႁဵင်ဢၼ်မၼ်းလိူၵ်ႈၵဵပ်းဢဝ်ၼၼ်ႉသေလႄႈလူင်းၵႂႃႇၵႃႈတီႈထိူၼ်ႇၸိၽဢေႃႈ။
၃ သေႃးလုၼၼ်ႉၶျႃးတပ်ႉၵႃႈၼိူဝ်လွႆႁၶိလဢၼ်မီးၵႃႈတီႈၽၢႆႇၼႃႈယေႇသိမုၼ်ႇၵႃႈတီႈႁိမ်းတၢင်းဢေႃႈ။
၄ တႃႇဝိတ်ႉယူႇၵႃႈၼႂ်းထိူၼ်ႇလႄႈမိူဝ်ႈဢၼ်မၼ်းႁူႉလွင်ႈဢၼ်သေႃးလုၸွမ်းႁႃမၼ်းၵႃႈၼႂ်းထိူၼ်ႇၼၼ်ႉၸိုင်တႃႇဝိတ်ႉပွႆႇၸႂ်ႉၵူၼ်းၸွပ်ႇႁႃၵႂႃႇႁႂ်ႈလႆႈႁူႉလွင်ႈဢၼ်သေႃးလုႁွတ်ႈထိုင်မႃးတႄႉတႄႉယဝ်ႉၼၼ်ႉဢေႃႈ။
၅ မိူဝ်ႈၼၼ်ႉတႃႇဝိတ်ႉလုၵ်ႉလႄႈၵႂႃႇႁွတ်ႈထိုင်ၵႃႈတီႈဢၼ်သေႃးလုၶျႃးတပ်ႉယူႇၼၼ်ႉဢေႃႈ။တႃႇဝိတ်ႉလူတူၺ်းတီႈဢၼ်သေႃးလုတင်းၶုၼ်ပူဝ်ႇၶျုၵ်ႈမၼ်းဢႃႇပၼႃႇ၊လုၵ်ႈၸၢႆးၼေႇရ၊ၶဝ်ၼွၼ်းၼၼ်ႉဢေႃႈ။သေႃးလုၼၼ်ႉၼွၼ်းၵႃႈၼႂ်းတပ်ႉလႄႈၵူၼ်းတပ်ႉတင်းလၢႆပႂ်ႉလဵပ်ႈႁွပ်ႈမၼ်းဝႆႉဢေႃႈ။
၆ တႃႇဝိတ်ႉၵေႃႈထၢမ်တီႈဢႁိမလိၵ်ႉ၊ၵူၼ်းမဵဝ်းႁိတိ၊တင်းဢၽိသေႇၼွင်ႉၸၢႆးယႂႃႇၽ၊လုၵ်ႈၸၢႆးၸေႇရုယႃႇ၊ၸိူဝ်းၼၼ်ႉလႄႈဝႃႈ၊-ၽူႈလႂ်တၵ်းၸွမ်းၵဝ်လူင်းၵႂႃႇၸူးတီႈသေႃးလုၵႃႈၼႂ်းတပ်ႉၼၼ်ႉ၊ဝႃႈၼင်ႇၼႆလႄႈဢၽိသေႇလဝ်ႈလၢတ်ႈလႄႈဝႃႈ၊-ၵဝ်ၶႃႈတၵ်းၸွမ်းၶႃႈဢေႃႈ၊ဝႃႈၼင်ႇၼႆသေယဝ်ႉ၊တႃႇဝိတ်ႉဢိၵ်ႇတင်းဢၽိသေႇလူင်းၵႂႃႇၸူးၵႃႈတီႈၵူၼ်းတပ်ႉၸိူဝ်းၼၼ်ႉၶိင်ႇၵၢင်ၶိုၼ်းဢေႃႈ။
၇ သေႃးလုၼၼ်ႉၼွၼ်းလပ်းယူႇၵႃႈၼႂ်းတပ်ႉယူႇလႄႈႁွၵ်ႇမၼ်းပၵ်းယူႇၵႃႈတီႈလိၼ်ႁိမ်းႁူဝ်ၼွၼ်းမၼ်းၼၼ်ႉဢေႃႈ။ဢႃႇပၼႃႇတင်းၵူၼ်းတပ်ႉၸိူဝ်းၼၼ်ႉၼွၼ်းလပ်းလဵပ်ႈႁွပ်ႈမၼ်းဝႆႉယူႇဢေႃႈ။
၈ ဢၽိသေႇၵေႃႈလဝ်ႈလၢတ်ႈတီႈတႃႇဝိတ်ႉလႄႈဝႃႈ၊-ၽြႃးပဵၼ်ၸဝ်ႈဢဝ်ရၢၼ်ႇသူႇၸဝ်ႈႁဝ်းဢၢပ်ႈပၼ်ၵႃႈၼႂ်းမိုဝ်းၸဝ်ႈႁဝ်းဝၼ်းမိူဝ်ႈၼႆႉၶႃႈယဝ်ႉ။ၵွပ်ႈၼႆလႄႈႁႂ်ႈၶႃႈၸဝ်ႈလႆႈဢဝ်ႁွၵ်ႇတႅင်းသႂ်ႇမၼ်းႁႂ်ႈပွင်ႇထိုင်ႁွတ်ႈလိၼ်ၵႂႃႇၵမ်းလဵဝ်ၵူၺ်းသေၵမ်းၶႃႈ။ၵဝ်ၶႃႈတၵ်းဢမ်ႇတႅင်းသွင်ၵမ်း။
၉ တၵ်းတႅင်းၵမ်းၼိုင်ႈၵူၺ်း၊ဝႃႈၼင်ႇၼႆသေၵေႃႈ၊တႃႇဝိတ်ႉလၢတ်ႈတီႈဢၽိသေႇလႄႈဝႃႈ၊-ယႃႇပယေႃႉမၼ်းပႅတ်ႈ။ၵေႃႉဢၼ်ယဵတ်ႇမိုဝ်းမၼ်းလႄႈဢဝ်တၢႆၵေႃႉဢၼ်လႆႈၶၢမ်ႇၽိၵ်ႈသိၵ်ႈထႃႇဝရႃႉၽြႃးၼၼ်ႉတၵ်းၵၢင်းလွတ်ႈဢပျႅတ်ႈလႆႈၸိူဝ်ႉၼင်ႇႁိုဝ်၊ဝႃႈၼင်ႇၼႆဢေႃႈ။
၁၀ လၢႆးသမ်ႉတႃႇဝိတ်ႉလၢတ်ႈလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉထႃႇဝရႃႉၽြႃးတၵ်းပၼ်တၢမ်ႇယူႇဢေႃႈ။ဝၼ်းဢၼ်မၼ်းတၵ်းလႆႈတၢႆၼၼ်ႉတၵ်းႁွတ်ႈထိုင်မႃးယူႇဢေႃႈ။ဢမ်ႇၼၼ်ၵေႃႈမၼ်းတၵ်းၵႂႃႇတိုၵ်းသိုၵ်းလႄႈသုမ်းဢသၢၵ်ႈမၼ်းယူႇဢေႃႈ။
၁၁ ႁႂ်ႈထႃႇဝရႃႉၽြႃးႁၢမ်ႈတပ်ႉႁႄႉၶႅၼ်ၵဝ်ယႃႇႁႂ်ႈၵဝ်လႆႈဢဝ်မိုဝ်းၵဝ်ယဵတ်ႇၸူးၵေႃႉဢၼ်လႆႈၶၢမ်ႇၽိၵ်ႉသိၵ်ႈထႃႇဝရႃႉၽြႃးၼၼ်ႉသေၵမ်းလူၺ်ႈ။တေႃႈလဵဝ်ႁဝ်းဢဝ်ႁွၵ်ႇမၼ်းတင်းၼမ်ႉတဝ်ႈမၼ်းဢၼ်မီးၵႃႈတီႈႁူဝ်ၼွၼ်းမၼ်းၼၼ်ႉသေလႄႈၶိုၼ်းမိူဝ်းတႃႉႁဝ်းဝႃႈၼင်ႇၼႆသေလႄႈတႃႇဝိတ်ႉဢဝ်ႁွၵ်ႇတင်းၼမ်ႉတဝ်ႈၵႃႈတီႈႁူဝ်ၼွၼ်းသေႃးလုၼၼ်ႉၵႂႃႇဢေႃႈ။
၁၂ ၽူႈလႂ်ဢမ်ႇႁူႉဢမ်ႇႁၼ်သေၵေႃႉသေၵူၼ်း။ၽူႈလႂ်ဢမ်ႇတိုၼ်ႇသေၵေႃႉသေၵူၼ်း။လွင်ႈမၼ်းၸမ်းၶဝ်တင်းသဵင်ႈတင်းလူင်ၼွၼ်းလပ်းယူႇၵွပ်ႈပိူဝ်ႈဢၼ်ထႃႇဝရႃႉၽြႃးႁႂ်ႈတၢင်းၼွၼ်းဢၼ်ၼူၵ်ႇၼႃတူၵ်းႁွတ်ႈၵႃႈၼိူဝ်ၶဝ်ၼၼ်ႉဢေႃႈ။
၁၃ မိူဝ်ႈၼၼ်ႉတႃႇဝိတ်ႉၶၢမ်ႈၵႂႃႇၵႃႈတီႈၽၢႆႇၼိုင်ႈသေယဝ်ႉၸုၵ်းယူႇၵႃႈတီႈၼိူဝ်လွႆဢၼ်ၵႆၼၼ်ႉဢေႃႈ။ၵႃႈတီႈဝူင်ႈၵၢင်ၶဝ်ၼၼ်ႉပဵၼ်ဢၼ်ၵႂၢင်ႈၼႃႇဢေႃႈ။
၁၄ တႃႇဝိတ်ႉႁွင်ႉသႅၼ်ႇတီႈၵူၼ်းသိုၵ်းတင်းလၢႆဢိၵ်ႇတင်းဢႃႇပၼႃႇ၊လုၵ်ႈၸၢႆးၼေႇရ၊ၼၼ်ႉလႄႈထၢမ်ဝႃႈ၊-ဢႃႇပၼႃႇဢိူၺ်း။
၁၅ မႂ်းဢမ်ႇၶိုၼ်းဢိူဝ်ႈၵဝ်ႁိုဝ်၊ဝႃႈၼင်ႇၼႆလႄႈဢႃႇပၼႃႇၶိုၼ်းထၢမ်လႄႈဝႃႈ၊-ၵေႃႉဢၼ်ႁွင်ႉသႅၼ်ႇတီႈၶုၼ်ႁေႃၶမ်းၼႆႉပဵၼ်ၽူႈလႂ်၊မိူဝ်ႈဢၼ်ဝႃႈၼင်ႇၼႆၸိုင်၊တႃႇဝိတ်ႉၵေႃႈလၢတ်ႈတီႈဢႃႇပၼႃႇလႄႈဝႃႈ၊-မႂ်းပဵၼ်ၵူၼ်းၸၢႆးဢမ်ႇၸႂ်ႈႁိုဝ်။ၵႃႈၼႂ်းမဵဝ်းၵူၼ်းဢိသရေႇလၼႆႉၵေႃႉလႂ်မိူၼ်ၵၼ်တင်းမႂ်း။
၁၆ ႁဵတ်းသင်မႂ်းဢမ်ႇပႂ်ႉလူပႂ်ႉတူၺ်းၸဝ်ႈမႂ်းၶုၼ်ႁေႃၶမ်းၼၼ်ႉ။ၵူၼ်းၵေႃႉၼိုင်ႈယင်းပေႃးၶဝ်ႈၵႂႃႇႁႂ်ႈလႆႈဢဝ်ၸဝ်ႈမႂ်းၶုၼ်ႁေႃၶမ်းၼၼ်ႉတၢႆယဝ်ႉ။လွင်ႈဢၼ်မႂ်းႁဵတ်းၼႆႉဢမ်ႇထုၵ်ႇဢမ်ႇလီလူင်ပေႇ။ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉမႂ်းထုၵ်ႇလီတၢႆၵွပ်ႈပိူဝ်ႈဢၼ်မႂ်းဢမ်ႇပႂ်ႉၸဝ်ႈမႂ်းဢၼ်ပဵၼ်ၵေႃႉဢၼ်လႆႈၶၢမ်ႇၽိၵ်ႈသိၵ်ႈထႃႇဝရႃႉၽြႃးပၼ်ၼၼ်ႉယဝ်ႉ။တေႃႈလဵဝ်ၼႆႉတူၺ်းလူး။ႁွၵ်ႇၶုၼ်ႁေႃၶမ်းတင်းၼမ်ႉတဝ်ႈမၼ်းဢၼ်ဝႆႉၵႃႈတီႈႁိမ်းႁူဝ်ၼွၼ်းမၼ်းၸဝ်ႈၼၼ်ႉၸွင်ႇမီးယူႇႁိုဝ်၊ဝႃႈၼင်ႇၼႆဢေႃႈ။
၁၇ သေႃးလုတွင်းသဵင်တႃႇဝိတ်ႉလႄႈထၢမ်ဝႃႈ၊-လုၵ်ႈၸၢႆးၵဝ်တႃႇဝိတ်ႉဢိူၺ်း။ဢၼ်ၼႆႉပဵၼ်သဵင်မႂ်းဢမ်ႇၸႂ်ႈႁိုဝ်၊ဝႃႈၼင်ႇၼႆလႄႈတႃႇဝိတ်ႉၵေႃႈလဝ်ႈလၢတ်ႈလႄႈဝႃႈ၊-ပဵၼ်သဵင်ၶႃႈၸဝ်ႈတီႈၶႃႈဢေႃႈ။
၁၈ ၸဝ်ႈၶုၼ်လူင်တီႈၶႃႈဢိူၺ်း။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းလိုပ်ႈၸွမ်းလမ်းၸွမ်းၶႃႈၸဝ်ႈယူႇတီႈၶႃႈ။
၁၉ ၶႃႈၸဝ်ႈလႆႈႁဵတ်းၽိတ်းမႅၼ်ႈတေႃႇၸဝ်ႈႁဝ်းၸိူဝ်ႉၼင်ႇၶႃႈ။ၵႃႈတီႈမိုဝ်းၶႃႈၸဝ်ႈမီးဢပျႅတ်ႈၵႃႈသင်ၶႃႈ။မိူဝ်ႈလဵဝ်ၼႆႉၸိုင်ၸဝ်ႈၶုၼ်လူင်ၶႃႈၸဝ်ႈၶႅၼ်းတေႃႈထွမ်ႇငိၼ်းၵႂၢမ်းၶႃႈၸဝ်ႈႁဝ်းၼႆႉသေၵမ်းၶႃႈ။ပေႃးထႃႇဝရႃႉၽြႃးတိုၵ်းယူင်းၸဝ်ႈႁဝ်းႁႂ်ႈၸဝ်ႈႁဝ်းယူႇၽၢႆႇၼိုင်ႈတင်းၶႃႈၸဝ်ႈဢမၢၼ်ႇၶၢၼ်ပဵၼ်ၸိုင်ႁႂ်ႈမၼ်းၸဝ်ႈႁပ်ႉတုင်းဢဝ်တၢင်းဢၼ်ပုၵ်ႉၸေႃႇယိၸ်ႉသေၵမ်းလူၺ်ႈ။ဢမ်ႇၼၼ်ၵေႃႈပေႃးပဵၼ်ၵွပ်ႈပိူဝ်ႈၵူၼ်းတင်းလၢႆတိုၵ်းယူင်းၸိုင်ႁႂ်ႈၶဝ်လႆႈၶၢမ်ႇတၢင်းဢၼ်ၵိၼ်ႇဝႃႈၵႃႈတီႈၽၢႆႇၼႃႈထႃႇဝရႃႉၽြႃးသေၵမ်းလူၺ်ႈ။ၶဝ်ဢွၼ်ၵၼ်ႁေႃႈၶႃႈၸဝ်ႈဢွၵ်ႇပႅတ်ႈဝၼ်းမိူဝ်ႈၼႆႉလႄႈႁႂ်ႈၶႃႈၸဝ်ႈဢမ်ႇလႆႈယူႇလႆႈသဝ်းၵႃႈတီႈလိၼ်ဢမူၺ်ႇၶႃႈၸဝ်ႈၼၼ်ႉလႄႈဝႃႈ၊-ၵႂႃႇတႃႉ။ႁဵတ်းဝၢတ်ႈတီႈထႃႇဝရႃႉၽြႃးတၢင်ႇသူႇတၢင်းပႃးၸိူဝ်းၼၼ်ႉတႃႉ၊ဝႃႈၼင်ႇၼႆတီႈၶႃႈယဝ်ႉ။
၂၀ ပိူဝ်ႈဢၼ််ပဵၼ်ၼင်ႇၼႆလႄႈမိူဝ်ႈလဵဝ်ၼႆႉယႃႇပေႁႂ်ႈလိူတ်ႈၶႃႈၸဝ်ႈတူၵ်းၵႃႈၼိူဝ်လိၼ်တီႈဢၼ်ၵႆၵၼ်တင်းၽၢႆႇၼႃႈထႃႇဝရႃႉၽြႃးၼၼ်ႉသေၵမ်းတီႈၶႃႈ။ၶုၼ်ႁေႃၶမ်းဢိသရေႇလဢွၵ်ႇမႃးႁႂ်ႈလႆႈႁႃဢဝ်မတ်မိူၼ်ၸိူဝ်ႉၼင်ႇၵူၼ်းၸွမ်းႁႃၼူၵ်ႉၶုမ်ႈၵႃႈၼိူဝ်လွႆတင်းလၢႆၼၼ်ႉယဝ်ႉ၊ဝႃႈၼင်ႇၼႆဢေႃႈ။
၂၁ သေႃးလုၵေႃႈလၢတ်ႈလႄႈဝႃႈ၊-ၵဝ်ၽိတ်းပိူင်ႈယဝ်ႉလုၵ်ႈၸၢႆးၵဝ်တႃႇဝိတ်ႉဢိူၺ်း။ၶိုၼ်းမႃးသေၵမ်း။ၵမ်းလိုၼ်းၵဝ်တၵ်းဢမ်ႇၼိၵ်ႈၸၢၵ်ႈငႅၼ်းသေးမႂ်းထႅင်ႈယဝ်ႉ။လွင်ႈမၼ်းၸမ်းၵွပ်ႈပိူဝ်ႈမႂ်းမၢတ်ႈဢသၢၵ်ႈၵဝ်ပဵၼ်ဢၼ်ထိူၵ်ႈၵႃႈထိူၵ်ႈၶၼ်ဝၼ်းမိူဝ်ႈၼႆႉၼၼ်ႉဢေႃႈ။တူၺ်းလူး။ၵဝ်ပဵၼ်ၼင်ႇၵူၼ်းယွင်ႇဢေႃႈ။ၵဝ်လႆႈၽိတ်းပိူင်ႈၼႃႇလူင်လၢင်ယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊တႃႇဝိတ်ႉၵေႃႈၶိုၼ်းလဝ်ႈလၢတ်ႈလႄႈဝႃႈ၊-ၸဝ်ႈၶုၼ်လူင်တီႈၶႃႈဢိူၺ်း။
၂၂ ႁွၵ်ႇၸဝ်ႈႁဝ်းမီးၵႃႈတီႈၼႆႉဢေႃႈ။ပွႆႇၸႂ်ႉၵူၼ်းဢွၼ်ႇၸဝ်ႈႁဝ်းမႃးၵေႃႉၼိုင်ႈလႄႈၶိုၼ်းဢဝ်သေၵမ်းၶႃႈ။ထႃႇဝရႃႉၽြႃးတွပ်ႇတႅၼ်းပၼ်ဢၵျူဝ်းတီႈၽႂ်တီႈမၼ်းၸွမ်းၵႃႈၼင်ႇဢၼ်ၶဝ်မီးတၢင်းဢၼ်သိုဝ်ႈတေႃႇ၊တၢင်းဢၼ်ပႂ်ႉသႅတ်ႈၸႃႇၼၼ်ႉဢေႃႈ။
၂၃ ပိၵ်ႉသမ်ႉထႃႇဝရႃႉၽြႃးဢဝ်ၸဝ်ႈႁဝ်းဢၢပ်ႈပၼ်ၵႃႈၼႂ်းမိုဝ်းၶႃႈၸဝ်ႈဝၼ်းမိူဝ်ႈၼႆႉယဝ်ႉသေၵေႃႈၶႃႈၸဝ်ႈယင်းဢမ်ႇယဵတ်ႇမိုဝ်းၸူးၵေႃႉဢၼ်လႆႈၶၢမ်ႇၽိၵ်ႉသိၵ်ႈထႃႇဝရႃႉၽြႃးၼၼ်ႉၶႃႈ။
၂၄ မိူၼ်ၸိူဝ်ႉၼင်ႇဢၼ်ၶႃႈၸဝ်ႈသလေၢႆဢသၢၵ်ႈၸဝ်ႈႁဝ်းဝၼ်းမိူဝ်ႈၼႆႉၼၼ်ႉႁႂ်ႈထႃႇဝရႃႉၽြႃးသလေၢႆဢသၢၵ်ႈၶႃႈၸဝ်ႈလႄႈၵႄႇသႄႇၼုၵ်ႈဢဝ်ၶႃႈၸဝ်ႈဢွၵ်ႇသေၵႃႈၼႂ်းတုၵ်ႉၶႃႉတၢင်းၽၢၼ်ၵူႈၸိူဝ်ႉၵူႈပိူင်သေၵမ်းလူၺ်ႈ၊ဝႃႈၼင်ႇၼႆဢေႃႈ။
၂၅ သေႃးလုလၢတ်ႈတီႈတႃႇဝိတ်ႉလႄႈဝႃႈ၊-လုၵ်ႈၸၢႆးၵဝ်တႃႇဝိတ်ႉဢိူၺ်း။ႁႂ်ႈမႂ်းမီးမၢင်ႇၵလႃႇသေၵမ်းလူၺ်ႈ။မႂ်းတၵ်းႁဵတ်းလွင်ႈတၢင်းဢၼ်ယႂ်ႇဢၼ်လူင်လႄႈပႄႉၼႅင်ႇဢမၢၼ်ႇၶၢၼ်ပဵၼ်ဢေႃႈ၊ဝႃႈၼင်ႇၼႆသေယဝ်ႉတႃႇဝိတ်ႉဢွၵ်ႇၵႂႃႇလႄႈသေႃးလုၵေႃႈၶိုၼ်းမိူဝ်းၵွႃႇၵႃႈတီႈဢၼ်မၼ်းယူႇၼၼ်ႉသေဢေႃႈ။