Chapter
၂၂
တႃႇဝိတ်ႉတီႈမိူင်းဢတုလတင်းဝဵင်းမိၸပႃႇ
၁ ပိူဝ်ႈၼႆလႄႈတႃႇဝိတ်ႉဢွၵ်ႇသေၵႃႈတီႈၼၼ်ႉလႄႈၵၢင်းလွတ်ႈတင်းၽေးယူႇသေလႄႈႁွတ်ႈထိုင်ၵႃႈတီႈႁူးထမ်ႈဢတုလဢေႃႈ။ပီႈၸၢႆးမၼ်းတင်းလၢႆဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်းတင်းသဵင်ႈတင်းလူင်ငိၼ်းလွင်ႈမၼ်းသေယဝ်ႉဢွၼ်ၵၼ်လူင်းၵႂႃႇၸူးၵႃႈတီႈမၼ်းၵႃႈတီႈၼၼ်ႉဢေႃႈ။
၂ ၵႃႈဢၼ်ပဵၼ်ၵေႃႉဢၼ်မီးဢမူႉ၊ၵေႃႉဢၼ်ထုၵ်ႇၼီႈထုၵ်ႇၶွတ်ႇၵေႃႉဢၼ်ၶီၸႂ်ၶူမ်ၸႂ်ၸိူဝ်းၼၼ်ႉဢွၼ်ၵၼ်ၵႂႃႇၸူႉၵၼ်တုမ်ၵၼ်ၵႃႈတီႈမၼ်းလႄႈမၼ်းလႆႈဢုပ်ႉၵႃႈၼိူဝ်ၶဝ်ဢေႃႈ။
၃ ၵူၼ်းဢၼ်မီးတီႈမၼ်းၼၼ်ႉမီးသသေီႇပၢၵ်ႇဢေႃႈ။တႃႇဝိတ်ႉလုၵ်ႉသေၵႃႈတီႈၼၼ်ႉၵႂႃႇၵႃႈတီႈဝဵင်းမိၸပႃႇမိူင်းမေႃႇၽသေလႄႈလဝ်ႈလၢတ်ႈတီႈၶုၼ်ႁေႃၶမ်းမေႃႇၽလႄႈဝႃႈ၊-
၄ ၸူဝ်ႈဢၼ်ၵဝ်ၶႃႈဢမ်ႇပႆႇႁူႉလွင်ႈဢၼ်ၽြႃးပဵၼ်ၸဝ်ႈတၵ်းႁဵတ်းၸိူဝ်ႉၼင်ႇႁိုဝ်တီႈၵဝ်ၶႃႈၼၼ်ႉၸိုင်ၶႅၼ်းတေႃႈပၼ်ဢၶႂၢင်ႉႁႂ်ႈပေႃႈမေႈၵဝ်ၶႃႈၸိူဝ်းၼၼ်ႉဢွၵ်ႇမႃးလႄႈလႆႈယူႇၵႃႈတီႈၸဝ်ႈႁဝ်းသေၵမ်းတီႈၶႃႈ၊ဝႃႈၼင်ႇၼႆသေယဝ်ႉ၊ဢဝ်ၶဝ်သႂၢင်းၶဝ်ႈၵႃႈတီႈၶုၼ်ႁေႃၶမ်းမေႃႇၽလႄႈၶဝ်ၼၼ်ႉလႆႈယူႇၵႃႈတီႈၶုၼ်ၼၼ်ႉၸူဝ်ႈဢၼ်တႃႇဝိတ်ႉယင်းယူႇၵႃႈတီႈၼႂ်းတပ်ႉဢေႃႈ။
၅ လၢႆးသမ်ႉပရေႃးၽႅတ်ႈၵတ်ႉလၢတ်ႈတီႈတႃႇဝိတ်ႉလႄႈဝႃႈ၊-ယႃႇယူႇၵႃႈတီႈၼႂ်းတပ်ႉၼၼ်ႉ။ဢွၵ်ႇလႄႇၵႂႃႇၵႃႈတီႈမိူင်းယုတပုၼ်ႉတႃႉ၊ဝႃႈၼင်ႇၼႆလႄႈတႃႇဝိတ်ႉၵေႃႈၵႂႃႇလႄႈႁွတ်ႈထိုင်ၵႃႈတီႈထိူၼ်ႇႁႃႇရိတ်ႉဢေႃႈ။
သေႃးလုဢဝ်ယိတ်ႉပရေႃးႁိၵ်ႈတီႈဝဵင်းၼေႃႇပတၢႆ
၆ မိူဝ်ႈဢၼ်သေႃးလုယိပ်းၵမ်ႁွၵ်ႇမၼ်းလႄႈၼင်ႈယူႇၵႃႈတီႈဝဵင်းၵိပၵႃႇတႂ်ႈတူၼ်ႈမႆႉဢၼ်မီးၵႃႈၼိူဝ်ၵုင်းၼၼ်ႉၸိုင်မၼ်းလႆႈႁူႉငိၼ်းလွင်ႈဢၼ်တႃႇဝိတ်ႉတင်းၵူၼ်းမၼ်းမီးၵႃႈတီႈလႂ်ၼၼ်ႉၸိုင်မၼ်းလၢတ်ႈတီႈၶႃႈမၼ်းၵူၼ်းမၼ်းဢၼ်ၸုၵ်းလွမ်ႉႁွပ်ႈမၼ်းယူႇၸိူဝ်းၼၼ်ႉလႄႈဝႃႈ၊-
၇ ၵူၼ်းမဵဝ်းပိၼ်ႇယႃႇမိၼ်ႇၶဝ်ဢိူၺ်း။ဢွၼ်ၵၼ်ထွမ်ႇငိၼ်းတႃႉ။လုၵ်ႈၸၢႆးယေႇသေႇၼၼ်ႉၸွင်ႇမၼ်းတၵ်းဢဝ်တူင်ႈႁႆႊတူင်ၼႃးတင်းသူၼ်ဢူးယဵၼ်ႇမၢၵ်ႇၸပိတ်ႉတင်းလၢႆၽႄမႅင်ႇပၼ်တီႈသူႁိုဝ်။ၸွင်ႇမၼ်းတၵ်းဢဝ်သူၶၢၼ်းဝႆႉၼႂ်းဢရႃႇၵေႃႉဢၼ်ဢုပ်ႉၵႃႈၼိူဝ်ၵူၼ်းယေႈႁဵင်၊ၵေႃႉဢၼ်ဢုပ်ႉၵႃႈၼိူဝ်ယေႈပၢၵ်ႇၼၼ်ႉႁိုဝ်။
၈ ၵွပ်ႈပိူဝ်ႈလွင်ႈၼႆႉလႄႈသူၵႃႈမီးဢွၼ်ၵၼ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းၵဝ်ႁိုဝ်။ၼႂ်းသူၼႆႉၽူႈလႂ်သေၵေႃႉသေၵူၼ်းဢမ်ႇလဝ်ႈလၢတ်ႈၵဝ်လွင်ႈဢၼ်လုၵ်ႈၸၢႆးၵဝ်ႁဵတ်းမိၵ်ႈသႁႃႇယႃႉလူၺ်ႈၵၼ်တင်းလုၵ်ႈၸၢႆးယေႇသေႇၼၼ်ႉ။ၽူႈလႂ်သေၵေႃႉသေၵူၼ်းဢမ်ႇမႆႈၸႂ်ၶီၸႂ်လူၺ်ႈၵဝ်။ၽူႈလႂ်ယင်းဢမ်ႇမွၵ်ႇဢမ်ႇလၢတ်ႈလွင်ႈဢၼ်လုၵ်ႈၸၢႆးၵဝ်တိုၵ်းယူင်းၶႃႈၵဝ်ႁႂ်ႈမၼ်းလႆႈပႂ်ႉလွမ်ပႂ်ႉတူၺ်းၵဝ်မိူၼ်ၸိူဝ်ႉၼင်ႇဢၼ်ႁဵတ်းယူႇဝၼ်းမိူဝ်ႈၼႆႉၼၼ်ႉလူင်ပေႇ၊မိူဝ်ႈဢၼ်ဝႃႈၼင်ႇၼႆၸိုင်၊
၉ တေႃႇၵ၊ၵူၼ်းမဵဝ်းဢေႇတုင်ႇ၊ဢၼ်ဢုပ်ႉၵႃႈၼိူဝ်ၶႃႈၵူၼ်းသေႃးလုၼၼ်ႉလဝ်ႈလၢတ်ႈလႄႈဝႃႈ၊-ၶႃႈၸဝ်ႈလႆႈႁၼ်လုၵ်ႈၸၢႆးယေႇသေႇၼၼ်ႉႁွတ်ႈထိုင်ၵႃႈတီႈဝဵင်းၼေႃႇပၵႂႃႇၸူးၵႃႈတီႈဢႁိမလိၵ်ႉ၊လုၵ်ႈၸၢႆးဢႁိတုပ်ႉၼၼ်ႉၶႃႈဢေႃႈ။
၁၀ ဢႁိမလိၵ်ႉတွင်ႈထၢမ်တီႈထႃႇဝရႃႉၽြႃးပုၼ်ႈမၼ်းလႄႈဢဝ်ၸရိပ်ႈတၢင်းၵိၼ်ဢိၵ်ႇတင်းလၢပ်ႇၵေႃႇလျၢတ်ႉၵူၼ်းၽိလိတ်ႉတိၼၼ်ႉဢၢပ်ႈပၼ်တီႈမၼ်းၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊
၁၁ ၶုၼ်ႁေႃၶမ်းသေႃးလုပွႆႇၸႂ်ႉၵူၼ်းၵႂႃႇႁွင်ႉဢဝ်ယိတ်ႉပရေႃးႁိၵ်ႈဢႁိမလိၵ်ႉလုၵ်ႈၸၢႆးဢႁိတုပ်ႉဢိၵ်ႇတင်းၵႃႈဢၼ်ပဵၼ်ပီႈၼွင်ႉၸိူဝ်ႉၶိူဝ်းပေႃႈမၼ်းဢၼ်ပဵၼ်ယိတ်ႉပရေႃးႁိၵ်ႈဢၼ်ယူႇၵႃႈတီႈဝဵင်းၼေႃႇပၸိူဝ်းၼၼ်ႉမႃးလႄႈၶဝ်ၵႃႈမီးၼၼ်ႉၵေႃႈဢွၼ်ၵၼ်ႁွတ်ႈမႃးတီႈၶုၼ်ႁေႃၶမ်းဢေႃႈ။
၁၂ သေႃးလုၵေႃႈလၢတ်ႈလႄႈဝႃႈ၊-လုၵ်ႈဢႁိတုပ်ႉဢိူၺ်း။ထွမ်ႇငိၼ်းတႃႉ၊ဝႃႈၼင်ႇၼႆသေယဝ်ႉ၊မၼ်းၵေႃႈၶိုၼ်းလဝ်ႈလၢတ်ႈလႄႈဝႃႈ၊-ၵဝ်ၶႃႈမီးယူႇၶႃႈဢေႃႈၸဝ်ႈ၊ဝႃႈၼင်ႇၼႆဢေႃႈ။
၁၃ သေႃးလုၵေႃႈလၢတ်ႈတီႈမၼ်းလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းဢိၵ်ႇတင်းလုၵ်ႈၸၢႆးယေႇသေႇၼၼ်ႉႁဵတ်းမုၵ်ႉႁဵတ်းၸိူဝ်းလႄႈယူႇၽၢႆႇၼိုင်ႈတင်းၵဝ်။မႂ်းဢဝ်ၶဝ်ႈမုၼ်းတင်းလၢပ်ႈဢၢပ်ႈပၼ်တီႈမၼ်းလႄႈတွင်ႈထၢမ်တီႈၽြႃးပဵၼ်ၸဝ်ႈပုၼ်ႈမၼ်းႁႂ်ႈမၼ်းလႆႈလုၵ်ႉယူႇၽၢႆႇၼိုင်ႈတင်းၵဝ်သေလႄႈပႂ်ႉလွမ်ၵဝ်ယူႇမိူၼ်ၵႃႈၼင်ႇဢၼ်မၼ်းႁဵတ်းယူႇဝၼ်းမိူဝ်ႈၼႆႉၼၼ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊ဢႁိမလိၵ်ႉၶိုၼ်းလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-
၁၄ ၼႂ်းၶႃႈၵူၼ်းၸဝ်ႈႁဝ်းၵႃႈမီးၸိူဝ်းၼၼ်ႉၵေႃႉလႂ်တၵ်းမီးသႅတ်ႈၸႃႇမိူၼ်ၼင်ႇတႃႇဝိတ်ႉဢၼ်ပဵၼ်လုၵ်ႈၶူၺ်ၸဝ်ႈ၊ဢၼ်ပဵၼ်ၵေႃႉဢၼ်လႆႈၶဝ်ႈလႆႈဢွၵ်ႇတီႈၸဝ်ႈလႄႈမီးသရေႇၵႃႈတီႈႁေႃၸဝ်ႈၼၼ်ႉတီႈၶႃႈ။
၁၅ တၢင်းဢၼ်ၶႃႈၸဝ်ႈတွင်ႉထၢမ်တီႈၽြႃးပဵၼ်ၸဝ်ႈပုၼ်ႈမၼ်းၼႂ်းဝၼ်းၼၼ်ႉပဵၼ်တီႈဢွၼ်တၢင်းသုတ်းပွၵ်ႈပထမၶႃႈႁိုဝ်။ဢမ်ႇၸႂ်ႈၶႃႈၵူၺ်း။ႁႂ်ႈဢမူႉၼၼ်ႉၵႆၵၼ်တင်းၵဝ်ၶႃႈသေၵမ်းလူၺ်ႈ။ယႃႇပေႁႂ်ႈၶုၼ်ႁေႃၶမ်းတၢင်ႇဢပျႅတ်ႈတီႈၶႃႈၸဝ်ႈၼႆႉဢိၵ်ႇတင်းပီႈၼွင်ႉၸိူဝ်ႉၶိူဝ်းပေႃႈၶႃႈၸဝ်ႈသေဢိတ်းၶႃႈ။ၶႃႈၸဝ်ႈဢမ်ႇလႆႈႁူႉလွင်ႈဢမူႉၼႆႉလႃးလႃးသေဢိတ်းၶႃႈ၊ဝႃႈၼင်ႇၼႆဢေႃႈ။
၁၆ ၶုၼ်ႁေႃၶမ်းၵေႃႈလဝ်ႈလၢတ်ႈလႄႈဝႃႈ၊-ဢႁိမလိၵ်ႉဢိူၺ်း။မႂ်းဢိၵ်ႇတင်းပီႈၼွင်ႉၸိူဝ်ႉၶိူဝ်းပေႃႈမႂ်းၵႃႈမီးတၵ်းလႆႈတၢႆဢမၢၼ်ႇၶၢၼ်ပဵၼ်ဢေႃႈ၊ဝႃႈၼင်ႇၼႆသေလႄႈ၊
၁၇ မီးဢမိင်ႉတီႈၵူၼ်းသိုၵ်းပႆတိၼ်ဢၼ်လွမ်ႉလဵပ်ႈႁွပ်ႈယူႇၸိူဝ်းၼၼ်ႉလႄႈဝႃႈ၊-ဢွၼ်ၵၼ်ဝၢႆႇၶိုၼ်းလႄႈဢဝ်ယိတ်ႉပရေႃးႁိၵ်ႈထႃႇဝရႃႉၽြႃးၸိူဝ်းၼႆႉတၢႆၵွပ်ႈပိူဝ်ႈဢၼ်ၶဝ်ယူႇၽၢႆႇတႃႇဝိတ်ႉလႄႈပိၵ်ႉသမ်ႉႁူႉလွင်ႈဢၼ်မၼ်းပဵၼ်ၵေႃႉဢၼ်ဢွၵ်ႇပၢႆယူႇၼၼ်ႉသေၵေႃႈၶဝ်ဢမ်ႇမွၵ်ႇဢမ်ႇလၢတ်ႈတီႈၵဝ်၊ဝႃႈၼင်ႇၼႆသေၵေႃႈၶႃႈၵူၼ်းၸႂ်ႉၶုၼ်ႁေႃၶမ်းၸိူဝ်းၼၼ်ႉယင်းဢမ်ႇၶႂ်ႈယိုၼ်းမိုဝ်းၶဝ်သေလႄႈဢဝ်ယိတ်ႉပရေႃးႁိၵ်ႈထႃႇဝရႃႉၽြႃးၸိူဝ်းၼၼ်ႉတၢႆ။
၁၈ လၢႆးသမ်ႉၶုၼ်ႁေႃၶမ်းမီးဢမိင်ႉတီႈတေႃႇၵလႄႈဝႃႈ၊-မႂ်းဝၢႆႇၶိုၼ်းလႄႈဢဝ်ယိတ်ႉပရေႃးႁိၵ်ႈၸိူဝ်းၼႆႉလူမ်ႉတၢႆတႃႉ၊ဝႃႈၼင်ႇၼႆႉလႄႈတေႃႇၵ၊ၵူၼ်းမဵဝ်းဢေႇတုင်ႇ၊ၼၼ်ႉဝၢႆႇၶိုၼ်းလႄႈဢဝ်ယိတ်ႉပရေႃးႁိၵ်ႈၸိူဝ်းၼၼ်ႉတၢႆပႅတ်ႇသိပ်းပၢႆႁႃႈပႃးဢၼ်ၼုင်ႈသိူဝ်ႈသုပ်းပိၵ်ႈၼၼ်ႉဢေႃႈ။
၁၉ ဝဵင်းၼေႃႇပဢၼ်ယိတ်ႉပရေႃးႁိၵ်ႈပိူင်ႇၼၼ်ႉၵေႃႈမၼ်းတိုၵ်းတေႃးယႃႉၽဵဝ်ႈပႅတ်ႈၸႃႉၸဵမ်ၵူၼ်းၸၢႆး၊ၵူၼ်းယိင်း၊လုၵ်ႈဢွၼ်ႇႁၢႆး၊လုၵ်ႈဢွၼ်ႇဢၼ်ၵိၼ်ၼူမ်း၊ဝူဝ်း၊မႃႉလီႈ၊သူဝ်း၊တင်းလၢႆလူၺ်ႈၶူမ်းလၢပ်ႇၶူမ်းလႅဝ်းဢေႃႈ။
၂၀ ၼႂ်းလုၵ်ႈၸၢႆးဢႁိမလိၵ်ႉ၊ဢၼ်ပဵၼ်လုၵ်ႈၸၢႆးဢႁိတုပ်ႉ၊ၸိူဝ်းၼၼ်ႉၵေႃႉၼိုင်ႈဢၼ်လႆႈၸိုဝ်ဢႃႇပျႃႇထႃႇၼၼ်ႉပၢႆလွတ်ႈၵႂႃႇလႄႈၵႂႃႇၸူးၵႃႈတီႈတႃႇဝိတ်ႉဢေႃႈ။
၂၁ ဢႃႇပျႃႇထႃႇမွၵ်ႇလၢတ်ႈလွင်ႈသေႃးလုဢဝ်ယိတ်ႉပရေႃးႁိၵ်ႈထႃႇဝရႃႉၽြႃးၸိူဝ်းၼၼ်ႉတၢႆယဝ်ႉၼၼ်ႉတီႈတႃႇဝိတ်ႉဢေႃႈ။
၂၂ တႃႇဝိတ်ႉလၢတ်ႈတီႈဢႃႇပျႃႇတႃႇလႄႈဝႃႈ၊-ၵဝ်ႁူႉသၢႆငၢႆလွင်ႈဢၼ်တေႃႇၵ၊ၵူၼ်းမဵဝ်းဢေႇတုင်ႇ၊ၼၼ်ႉတၵ်းမွၵ်ႇလၢတ်တီႈသေႃးလုၼၼ်ႉယူႇၼႂ်းမိုဝ်ႉဝၼ်းဢၼ်ၵဝ်ထူပ်းႁၼ်မၼ်းၵႃႈတီႈၼၼ်ႉၵမ်းလဵဝ်ဢေႃႈ။ၵဝ်လႆႈပဵၼ်လွင်ႈဢၼ်ႁႂ်ႈပီႈၼွင်ႉၸိူဝ်ႉၶိူဝ်းပေႃႈမႂ်းၵႃႈမီးၼၼ်ႉလႆႈတၢႆယဝ်ႉလူင်ပေႇ။
၂၃ ယူႇလူၺ်ႈၵၼ်တင်းၵဝ်တႃႉ။ယႃႇပေမႆႈၸႂ်။ၵေႃႉဢၼ်ႁႃဢသၢၵ်ႈမႂ်းၼၼ်ႉပဵၼ်ၵေႃႉဢၼ်ႁႃဢသၢၵ်ႈၵဝ်ဢေႃႈ။ပေႃးယူႇၸွမ်းၵဝ်ၸိုင်တၵ်းၵၢင်းလွတ်ႈတင်းၽေးယူႇဢေႃႈ၊ဝႃႈၼင်ႇၼႆဢေႃႈ။