Chapter
၂၀
တႃႇဝိတ်ႉတင်းယေႃးၼသၼ်ႇ
၁ တႃႇဝိတ်ႉဢွၵ်ႇပၢႆႈသေၵႃႈတီႈဝၢၼ်ႈၼႃႇယုတ်ႉမိူင်းရႃႇမၼၼ်ႉလႄႈႁွတ်ႈထိုင်ၵႃႈတီႈယေႃႇၼသၼ်ႇသေယဝ်ႉထၢမ်ဝႃႈ၊-ၵဝ်လႆႈႁဵတ်းမႅၼ်ႈၵႃႈသင်ယဝ်ႉ။ၵဝ်မီးဢပျႅတ်ႈၵႃႈသင်။ၵဝ်ၶႃႈလႆႈႁဵတ်းတူႉၸရိူၵ်ႈၵႃႈသင်တေႃႇၸဝ်ႈပေႃႈမႂ်းထၼ်ႈပေႃးၸဝ်ႈႁဝ်းလႆႈႁႃဢသၢၵ်ႈၵဝ်တၢႆယူ၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၵေႃႈၶိုၼ်းလၢတ်ႈလႄႈဝႃႈ၊-ႁႂ်ႈဢမူႉၼႆႉၵႆၵၼ်တင်းမႂ်းသေၵမ်းလူၺ်ႈ။
၂ မႂ်းဢမ်ႇလႆႈတၢႆၵူၺ်း။ၸဝ်ႈပေႃႈၵဝ်ၼၼ်ႉယင်းဢမ်ႇမွၵ်ႇဢမ်ႇလၢတ်ႈတီႈၵဝ်လႄႈမၼ်းဢမ်ႇႁဵတ်းဢမူႉဢၼ်ယႂ်ႇဢၼ်လဵၵ်ႉသေၸိူဝ်ႉသေပိူင်။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမၼ်းတၵ်းသိူင်ႇမႅပ်းဢမူႉၼႆႉသတေီးၵဝ်ဢမ်ႇလႆႈ။ဢမူႉၼႆႉဢမ်ႇၸိုဝ်ႈဢၼ်ႇၸႂ်ႈၵူၺ်း၊ဝႃႈၼင်ႇၼႆဢေႃႈ။
၃ တႃႇဝိတ်ႉၵေႃႈႁဵတ်းတၢင်းဢၼ်ၵိၼ်ႇဢၼ်ဝႃႈလႄႈဝႃႈ၊-ၸဝ်ႈပေႃႈမႂ်းႁူႉလွင်ႈဢၼ်ဝႃႈမႂ်းႁၵ်ႉပႅင်းၵဝ်ၼႃႇလႄႈမၼ်းလၢတ်ႈတီႈၼႂ်းၸႂ်မၼ်းဝႃႈမၼ်းတၵ်းဢမ်ႇႁႂ်ႈယေႃးၼသၼ်ႇႁူႉလွင်ႈၼႆႉ။ပေႃးမၼ်းႁူႉၸိုင်မၼ်းတၵ်းၸႂ်ဢမ်ႇလီဢေႃႈ၊ဝႃႈၼႆယူႇယဝ်ႉ။ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇ၊ၵႃႈၼင်ႇဢၼ်မႂ်းဢသၢၵ်ႈလိပ်းယူႇၼၼ်ႉၵႃႈတီႈၵႄႈဝူင်ႈၵၢင်ၵဝ်တင်းတၢင်းတၢႆၼၼ်ႉမီးၸူဝ်ႈယၢင်ႈတိၼ်ၼိုင်ႈၵူၺ်းယဝ်ႉ၊ဝႃႈၼင်ႇၼႆဢေႃႈ။
၄ ယေႃးၼသၼ်ႇၵေႃႈလၢတ်ႈတီႈတႃႇဝိတ်ႉလႄႈဝႃႈ၊-ၵႃႈၼင်ႇဢၼ်မႂ်းၶႂ်ႈႁႂ်ႈၵဝ်ႁဵတ်းၼၼ်ႉၵဝ်တၵ်းႁဵတ်းပုၼ်ႈမႂ်းဢေႃႈ၊ဝႃႈၼင်ႇၼႆသေယဝ်ႉ၊တႃႇဝိတ်ႉၵေႃႈလၢတ်ႈတီႈယေႃးၼသၼ်ႇလႄႈဝႃႈ၊-
၅ ဝၼ်းမိူဝ်ႈၽုၵ်ႈပဵၼ်ဝၼ်းလိူၼ်မႂ်ႇလႄႈၵဝ်မီးတၢင်းဢၼ်တၵ်းလႆႈၼင်ႈယူႇၵႃႈတီႈၶူင်ႇတီႈၵိၼ်လႄႈၵိၼ်လူၺ်ႈၵၼ်တင်းၶုၼ်ႁေႃၶမ်းဢေႃႈ။ၼႂ်းဝႃႈၼၼ်သေၵေႃႈႁႂ်ႈၵဝ်လႆႈၵႂႃႇပၢႆတဵတ်ႇမႅပ်းယူႇၵႃႈၼႂ်းထိူၼ်ႇတေႃႇထိုင်ႁွတ်ႈဝၼ်းမိူဝ်ႈႁိုဝ်းသေၵမ်း။
၆ ပေႃးၸဝ်ႈပေႃႈႁဝ်းၶုၵ်းၸႂ်လႆႈလႄႈတွင်ႉထၢမ်လွင်ႈၵဝ်ၶႃႈၸိုင်ၶႅၼ်းတေႃႈလဝ်ႈလၢတ်ႈဝႃႈ၊-တႃႇဝိတ်ႉယွၼ်းဢၶႂၢင်ႉႁႂ်ႈလႆႈၵႂႃႇၸူးၵႃႈတီႈဝဵင်းပႅတ်ႉလိႁႅမ်ႇတီႈယူႇမၼ်းပုၼ်ႉဢၼ်တၵ်းလႆႈႁဵတ်းတၢင်းပုၵ်ႉၸေႃႇယိၸ်ႉပုၼ်ႈဢပျႅတ်ႈပီႈၼွင်ႉၸိူဝ်ႉၶိူဝ်းမၼ်းၸိူဝ်းၼၼ်ႉၶႃႈဢေႃႈ၊ဝႃႈၼင်ႇၼႆသေၵမ်း။
၇ ပေႃးမၼ်းၸဝ်ႈလၢတ်ႈလႄႈဝႃႈလီယဝ်ႉ၊ဝႃႈၼင်ႇၼႆၸိုင်ၵဝ်ၶႃႈလႆႈၵတ်းယဵၼ်ၶျၢမ်းသႃႇယဝ်ႉ။ပေႃးဢမ်ႇၼၼ်ပေႃးမၼ်းၸဝ်ႈၸႂ်မႆႈၶႆႈၸႃႉၼႃႇလူင်လၢင်ၸိုင်ၶႅၼ်းတေႃႈတူၵ်းၵၢင်ၸႂ်ဝႃႈမၼ်းၸဝ်ႈမီးတၢင်းၵျၢမ်ႇတၢင်းပွင်ဢၼ်တၵ်းႁဵတ်းၽေးတီႈၵဝ်ၶႃႈၼၼ်ႉသေၵမ်း။
၈ ႁဵတ်းၵျေးၸူးတီႈၵဝ်ၶႃႈသေၵမ်း။ၸဝ်ႈႁဝ်းလႆႈႁဵတ်းပတိၺိၼ်ႇထႃႇဝရႃႉၽြႃးလူၺ်ႈၵၼ်တင်းၵဝ်ၶႃႈၶႃႈယဝ်ႉ။ၼႂ်းဝႃႈၼၼ်သေၵေႃႈပေႃးဢပျႅတ်ႈမီးတီႈၵဝ်ၶႃႈၸိုင်တူဝ်ၸဝ်ႈႁဝ်းဢဝ်ၵဝ်ၶႃႈတၢႆသေၵမ်း။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈတၵ်းလႆႈဢဝ်ၵဝ်ၶႃႈၵႂႃႇၸူးၵႃႈတီႈၸဝ်ႈပေႃႈၸဝ်ႈႁဝ်းၼၼ်ႉ၊ဝႃႈၼင်ႇၼႆဢေႃႈ။
၉ ယေႃးၼသၼ်ႇလၢတ်ႈလႄႈဝႃႈ၊-ႁႂ်ႈဢမူႉၸိူဝ်ႉၼင်ႇၼၼ်ၵႆၵၼ်တင်းမႂ်းသေၵမ်းလူၺ်ႈ။ပေႃးၵဝ်ႁူႉလွင်ႈဢၼ်ၸဝ်ႈပေႃႈၵဝ်တၵ်းႁဵတ်းၽေးတီႈမႂ်းဢမၢၼ်ႇၶၢၼ်ပဵၼ်ၸိုင်ၵဝ်ယင်းဢမ်ႇမွၵ်ႇဢမ်ႇလၢတ်ႈမႂ်းလႄႈတၵ်းယူႇႁိုဝ်၊ဝႃႈၼင်ႇၼႆဢေႃႈ။
၁၀ တႃႇဝိတ်ႉၵေႃႈထၢမ်တီႈယေႃးၼသၼ်ႇလႄႈဝႃႈ၊-ပေႃးၸဝ်ႈပေႃႈႁဝ်းၶိုၼ်းလၢတ်ႈတီႈၸဝ်ႈႁဝ်းၵျၢမ်းႁၢဝ်ႉၼႃႇလူင်လၢင်ၸိုင်ၽူႈလႂ်တၵ်းၶိုၼ်းမွၵ်ႇလၢတ်ႈပၼ်တီႈၵဝ်ၶႃႈ၊မိူဝ်ႈဢၼ်ဝႃႈၼင်ႇၼႆၸိုင်ယေႃးၼသၼ်ႇလၢတ်ႈတီႈတႃႇဝိတ်ႉလႄႈဝႃႈ၊-မႃးတႃႉ။
၁၁ ၵႂႃႇၸူးၵႃႈတီႈထိူၼ်ႇတႃႉႁႃး၊ဝႃႈၼင်ႇၼႆသေလႄႈသွင်ၶႃဢွၵ်ႇၵႂႃႇၸူးၵႃႈတီႈထိူၼ်ႇဢေႃႈ။
၁၂ ယေႃးၼသၼ်ႇၵေႃႈသမ်ႉလၢတ်ႈတီႈတႃႇဝိတ်ႉလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလဢသၢၵ်ႈလိပ်းယူႇၼၼ်ႉမိူဝ်ႈဢၼ်ၵဝ်ထၢမ်တူၺ်းတီႈၸဝ်ႈပေႃႈၵဝ်ၶိင်ႇၼႆႉဝၼ်းမိူဝ်ႈႁိုဝ်း၊ယဝ်ႉၼၼ်ႉပေႃးမၼ်းၸဝ်ႈမီးတၢင်းၵျၢမ်ႇတၢင်းပွင်ဢၼ်လီတေႃႇမႂ်းၸိုင်ၵဝ်ယင်းဢမ်ႇပွႆႇၸႂ်ႉၵူၼ်းမႃးမွၵ်ႇလၢတ်ႈမႂ်းလႄႈတၵ်းယူႇႁိုဝ်း။
၁၃ ပေႃးၸဝ်ႈပေႃႈၵဝ်မီးတၢင်းၵျၢမ်ႇႁႂ်ႈလႆႈဢဝ်မႂ်းတၢႆၸိုင်ပေႃးၵဝ်ယင်းဢမ်ႇမႃးၶႆႊၼႄမႂ်းလႄႈႁႂ်ႈမႂ်းပၢႆၵႂႃႇတၢင်ႇတီႈတၢင်ႇလႅၼ်ၸိုင်ႁႂ်ႈထႃႇဝရႃႉၽြႃးႁဵတ်းတေႃႇၵဝ်ၼၵ်းၼၵ်းၼႃၼႃသေၵမ်း။ႁႂ်ႈထႃႇဝရႃႉၽြႃးမီးယူႇလူၺ်ႈၵၼ်တင်းမႂ်းမိူၼ်ၸိူဝ်ႉၼင်ႇဢၼ်မၼ်းၸဝ်ႈမီးယူႇလူၺ်ႈၵၼ်တင်းၸဝ်ႈပေႃႈၵဝ်မႃးယဝ်ႉၼၼ်ႉသေၵမ်းလူၺ်ႈ။
၁၄ ၼႂ်းမိူဝ်ႈဢၼ်ၵဝ်ယင်းတိုၵ်ႉဢသၢၵ်ႈလိပ်းယူႇၼႆႉၶႅၼ်းတေႃႈႁဵတ်းၵျေးၸူးတီႈၵဝ်ၶႃႈယႃႇႁႂ်ႈၵဝ်ၶႃႈလႆႈၶၢမ်ႇတၢင်းဢၼ်ဢဝ်တၢႆၵူၺ်းဢမ်ႇၵႃး၊ၵႃႈတီႈပီႈၼွင်ႉၸိူဝ်ႉၶိူဝ်းၵဝ်ၶႃႈယူႇတႃႇသေႇသေၵမ်း။
၁၅ ပိၵ်ႉသမ်ႉထႃႇဝရႃႉၽြႃးၽဵဝ်ႈရၢၼ်ႇသူႇတႃႇဝိတ်ႉပႅတ်ႈသေၵႃႈၼိူဝ်လိၼ်မိူင်းမူတ်းမူတ်းသဵင်ႈသဵင်ႈယဝ်ႉသေၵေႃႈယႃႇပေဢဝ်ၶၢတ်ႇပႅတ်ႈၵရူႉၼႃႇ၁၆ မႂ်းသေၵႃႈတီႈၸိူဝ်ႉၶိူဝ်းၵဝ်ၶႃႈသေၵမ်း၊ဝႃႈၼင်ႇၼႆဢေႃႈ။
၁၆ ၼင်ႇၼၼ်လႄႈယေႃးၼသၼ်ႇသမ်ႉႁဵတ်းပတိၺိၼ်ႇဝႆႉလူၺ်ႈၵၼ်တင်းပီႈၼွင်ႉၸိူဝ်ႉၶိူဝ်းတႃႇဝိတ်ႉဢေႃႈ။
၁၇ ယေႃးၼသၼ်ႇသမ်ႉႁႂ်ႈတႃႇဝိတ်ႉၵိၼ်ႇဝႃႈထႅင်ႈလူၺ်ႈတၢင်းဢၼ်မၼ်းႁၵ်ႉယေႃးၼသၼ်ႇၵွပ်ႈပိူဝ်ႈဢၼ်မၼ်းႁၵ်ႉတႃႇဝိတ်ႉမိူၼ်ၸိူဝ်ႉၼင်ႇမၼ်းႁၵ်ႉတူဝ်ၸဝ်ႈၵဝ်ႇၼၼ်ႉဢေႃႈ။
၁၈ လၢႆးသမ်ႉယေႃးၼသၼ်ႇလၢတ်ႈတီႈမၼ်းလႄႈဝႃႈ၊-ဝၼ်းမိူဝ်ႈၽုၵ်ႈၼၼ်ႉပဵၼ်ဝၼ်းလိူၼ်မႂ်ႇလႄႈတၵ်းဢွၼ်ၵၼ်ၶုၵ်းၸႂ်လႆႈမႂ်းၵွပ်ႈပိူဝ်ႈတီႈၼင်ႈမႂ်းပဝ်ႇဝႆႉၼၼ်ႉဢေႃႈ။
၁၉ မိူဝ်ႈႁိုဝ်းၶိင်ႇႁူဝ်ၶမ်ႈမႂ်းလူင်းမႃးၶၼ်ၶၼ်ၽႂ်းၽႂ်းၵႃႈတီႈဢၼ်မႂ်းပၢႆတဵတ်ႇမႅပ်းမိူဝ်ႈဢွၼ်တၢင်းၼၼ်ႉသေယဝ်ႉပႂ်ႉယူႇႁိမ်းမၢၵ်ႇႁိၼ်ဢေႇၸေႇလၼၼ်ႉတႃႉ။
၂၀ ၵဝ်တၵ်းႁဵတ်းႁၢင်ႊယိုဝ်းၸၢၵ်ႈလႄႈတၵ်းယိုဝ်းပိုၼ်ၵႂႃႇၵႃႈတီႈမၢၵ်ႇႁိၼ်ၼၼ်ႉသၢမ်လႅမ်ႈဢေႃႈ။
၂၁ ၵဝ်တၵ်းပွႆႇၸႂ်ႉၵူၼ်းဢွၼ်ႇၵႂႃႇႁႃပိုၼ်ဢၼ်ၵဝ်ယိုဝ်းၵႂႃႇၸိူဝ်းၼၼ်ႉလႄႈပေႃးၵဝ်ဝႃႈတီႈၵူၼ်းဢွၼ်ႇၼၼ်ႉလႄႈဝႃႈ၊-တူၺ်းလူး။ပိုၼ်ၸိူဝ်းၼၼ်ႉမီးၵႃႈတီႈၽၢႆႇၼႆႉမႂ်းဢေႃႈ၊ဢဝ်မႃးတႃႉ၊ဝႃႈၼင်ႇၼႆၸိုင်၊မႂ်းမႃးတႃႉ။ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉမႂ်းလႆႈၵတ်းယဵၼ်ၶျၢမ်းသႃႇလႄႈဢမ်ႇမီးၽေးယဝ်ႉ။
၂၂ ဢမ်ႇၼၼ်ပေႃးၵဝ်ဝႃႈတီႈၵူၼ်းဢွၼ်ႇၼၼ်ႉလႄႈဝႃႈ၊-ပိုၼ်ၸိူဝ်းၼၼ်ႉမီးပူၼ်ႉမႂ်းၵႂႃႇဢေႃႈ၊ဝႃႈၼင်ႇၼႆၸိုင်မႂ်းတၵ်းလႆႈပၢႆဢေႃႈ။
၂၃ လွင်ႈမၼ်းၸမ်းထႃႇဝရႃႉၽြႃးပွႆႇမႂ်းၵႂႃႇယဝ်ႉ။ၼႂ်းလွင်ႈဢၼ်ႁႃးသွင်ၵေႃႉလၢတ်ႈၵၼ်ၼႆႉႁႂ်ႈထႃႇဝရႃႉၽြႃးမီးယူႇၵႃႈတီႈဝူင်ႈၵၢင်မႂ်းတင်းၵဝ်တႃႇသေႇသေၵမ်းလူၺ်ႈ၊ဝႃႈၼင်ႇၼႆဢေႃႈ။
၂၄ ၼင်ႇၼၼ်လႄႈတႃႇဝိတ်ႉတဵတ်ႇမႅပ်းယူႇၵႃႈတီႈထိူၼ်ႇဢေႃႈ။မိူဝ်ႈဢၼ်ႁွတ်ႈထိုင်ဝၼ်းလိူၼ်မႂ်ႇၼၼ်ႉၶုၼ်ႁေႃၶမ်းၼင်ႈတီႈၶူင်ႇတီႈၵိၼ်ႁႂ်ႈလႆႈၵိၼ်တၢင်းၵိၼ်တၢင်းၶူပ်းဢေႃႈ။
၂၅ ၵႃႈၼင်ႇဢၼ်ထုင်းၸၢမ်ႇမီးၼၼ်ႉၶုၼ်ႁေုၶမ်းၼင်ႈၵႃႈၼိူဝ်တီႈၼင်ႈမၼ်းဢၼ်ဝႃႈတီႈၼင်ႈဢၼ်မီးၵႃႈတီႈႁိမ်းၽႃႇတေႃႇၼႃႈယေႃးၼသၼ်ႇလႄႈဢႃႇပၼႃႇၼင်ႈၵႃႈတီႈႁိမ်းသေႃးလုဢေႃႈ။တီႈၼင်ႈတႃႇဝိတ်ႉၼၼ်ႉပဝ်ႇလၢပ်ႈဝႆႉဢေႃႈ။
၂၆ ၵူၺ်းၵႃႈၼႂ်းဝၼ်းၼၼ်ႉသေႃးလုဢမ်ႇလၢတ်ႈၵႃႈသင်လူၺ်ႈလွင်ႈတႃႇဝိတ်ႉ။ၵွပ်ႈပိူဝ်ႈဝႃႈမၼ်းထၢင်ႇတႃႇဝိတ်ႉမီးတၢင်းဢၼ်ဢမ်ႇမူတ်းသႂ်သေၸိူဝ်ႉသေပိူင်လႄႈဢမ်ႇႁွတ်ႈထိုင်မႃး။
၂၇ မၼ်းဢမ်ႇမူတ်းသႂ်ဢမၢၼ်ႇၶၢၼ်ပဵၼ်ယဝ်ႉ၊ဝႃႈၼင်ႇၼႆဢေႃႈ။ဝၼ်းမိူဝ်ႈၽုၵ်ႈဝၢႆးသဝေၼ်းလိူၼ်မႂ်ႇယဝ်ႉပဵၼ်ဝၼ်းတုတိယၼၼ်ႉၵွပ်ႈပိူဝ်ႈဢၼ်တီႈၼင်ႈတႃႇဝိတ်ႉယင်းပဝ်ႇလၢပ်ႈဝႆႉလႄႈသေႃးလုထၢမ်တီႈလုၵ်ႈၸၢႆးမၼ်းယေႃႇၼသၼ်ႇလႄႈဝႃႈ၊-
၂၈ ၵွပ်ႈသင်လုၵ်ႈၸၢႆးယေႇသေႇဢမ်ႇမႃးၵႃႈတီႈပွႆးၵိၼ်ဝၼ်းမိူဝ်ႈဝႃးတင်းဝၼ်းမိူဝ်ႈၼႆႉ၊ဝႃႈၼင်ႇၼႆလႄႈယေႃးၼသၼ်ႇၶိုၼ်းလဝ်ႈလၢတ်ႈတီႈသေႃးလုလႄႈဝႃႈ၊-တႃႇဝိတ်ႉယွၼ်းဢၶႂၢင်ႉတီႈၵဝ်ၶႃႈႁႂ်ႈလႆႈၵႂႃႇၵႃႈတီႈဝဵင်းပႅတ်ႉလိႁႅမ်ႇလႄႈဝႃႈ၊-ပၼ်ဢၶႂၢင်ႉႁႂ်ႈၵဝ်ၶႃႈလႆႈၵႂႃႇသေၵမ်း။
၂၉ ပီႈၼွင်ႉၸိူဝ်ႉၶိူဝ်းႁဝ်းၶႃႈၸိူဝ်းၼၼ်ႉႁဵတ်းပွႆးယိၸ်ႉၵႃႈတီႈဝဵင်းၼၼ်ႉၶႃႈဢေႃႈ။ပီႈၸၢႆးၶႃႈၵေႃႈသင်ႇလၢတ်ႈမႃးတီႈၵဝ်ၶႃႈၶႃႈယဝ်ႉ။ပေႃးၵဝ်ၶႃႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းဢမၢၼ်ႇၶၢၼ်ပဵၼ်ၸိုင်ၶႅၼ်းတေႃႈပၼ်ဢၶႂၢင်ႉႁႂ်ႈၵဝ်ၶႃႈလႆႈၵႂႃႇႁၼ်ပီႈၸၢႆးၵဝ်ၶႃႈၸိူဝ်းၼၼ်ႉသေၵမ်းၶႃႈ၊ဝႃႈၼင်ႇၼႆတီႈၶႃႈဢေႃႈ။
၃၀ ၵွပ်ႈပိူဝ်ႈၸိူဝ်ႉၼင်ႇၼၼ်လႄႈမၼ်းဢမ်ႇမႃးၵႃႈတီႈပွႆးၵိၼ်ၼႆႉၶႃႈ၊ဝႃႈၼင်ႇၼႆဢေႃႈ။မိူဝ်ႈၼၼ်ႉသေႃးလုၸႂ်မႆႈၶႆႈၸႃႉတီႈယေႃးၼသၼ်ႇလႄႈလၢတ်ႈတီႈမၼ်းလႄႈဝႃႈ၊-လုၵ်ႈၸၢႆးမေႈယိင်းဢမ်ႁၢႆႉမိူၵ်ႈလႄႈလဵၼ်ႈၽူဝ်ဢွၼ်ႇၼႆႉ၊မႂ်းယင်းဢမ်ႇႁူႉလွင်ႈဢၼ်မႂ်းယူႇၽၢႆႇလုၵ်ႈၸၢႆးယေႇသေႇလႄႈႁဵတ်းႁႂ်ႈတၢင်းဢူၵ်းတၢင်းဢၢႆလႆႈႁွတ်ႈထိုင်တီႈမႂ်းဢိၵ်ႇတင်းမေႈဢၼ်ၵိူတ်ႇလဵင်ႉမႂ်းမႃးၼၼ်ႉႁိုဝ်။
၃၁ ၸူဝ်ႈဢၼ်လုၵ်ႈၸၢႆးယေႇသေႇယင်းဢသၢၵ်ႈလိပ်းယူႇၵႃႈၼိူဝ်လိၼ်မိူင်းၼႆႉမႂ်းဢိၵ်ႇတင်းသိုင်ႇၸိုင်ႈဝၢၼ်ႈမိူင်းမႂ်းတၵ်းဢမ်ႇလႆႈတႄႇ။ပွႆႇၸႂ်ႉၵူၼ်းၵႂႃႇဢဝ်မၼ်းမႃးမိူဝ်ႈလဵဝ်ၼႆႉၵမ်းလဵဝ်တႃႉ။
၃၂ မၼ်းတၵ်းလႆႈတၢႆဢေႃႈ၊ဝႃႈၼင်ႇၼႆဢေႃႈ။ယေႃးၼသၼ်ႇၶိုၼ်းလဝ်ႈထၢမ်တီႈပေႃႈမၼ်းသေႃးလုလႄႈဝႃႈ၊-ၵွပ်ႈပိူဝ်ႈလွင်ႈတၢင်းၸိူဝ်ႉၼင်ႇႁိုဝ်လႄႈတႃႇဝိတ်ႉတေလႆႈတၢႆ။မၼ်းႁဵတ်းၽိတ်းမႅၼ်ႈၵႃႈသင်ယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်သေႃးလုဢဝ်ႁွၵ်ႇယိုဝ်းပုင်ႈသႂ်ႇမၼ်းဢေႃႈ။
၃၃ ပိူဝ်ႈဢၼ်ပဵၼ်ၼင်ႇၼၼ်လႄႈယေႃးၼသၼ်ႇႁူႉဝႃႈၸဝ်ႈပေႃႈမၼ်းမီးတၢင်းၵျၢမ်ႇတၢင်းပွင်တၵ်းဢဝ်တႃႇဝိတ်ႉတၢႆၼၼ်ႉလႄႈမၼ်းၸႂ်မႆႈၶႆႈၸႃႉၼႃႇလူင်လၢင်သေယဝ်ႉလုၵ်ႉဢွၵ်ႇၵႂႃႇသေဢေႃႈ။
၃၄ ဝၼ်းတုတိယၼၼ်ႉတင်းဝၼ်းမၼ်းဢမ်ႇၵိၼ်တၢင်းၵိၼ်လႄႈယူႇဢေႃႈ။မၼ်းမီးၸႂ်ဢၼ်ႁဵဝ်ႇၸွပ်ႈပုၼ်ႈတႃႇဝိတ်ႉၵွပ်ႈပိူဝ်ႈဢၼ်ၸဝ်ႈပေႃႈမၼ်းယႃႉသရေႇတႃႇဝိတ်ႉၼၼ်ႉဢေႃႈ။
၃၅ မိူဝ်ႈဢၼ်ႁွတ်ႈထိုင်ၶိင်ႇၵၢင်ၼႂ်ၼၼ်ႉၸိုင်ယေႃးၼသၼ်ႇသမ်ႉပႃးဢဝ်ၵူၼ်းဢွၼ်ႇမၼ်းသေလႄႈၵႂႃႇၵႃႈတီႈထိူၼ်ႇၶိင်ႇဢၼ်ၶဵၼ်းၵၼ်ဝႆႉတင်းတႃႇဝိတ်ႉၼၼ်ႉဢေႃႈ။
၃၆ မၼ်းလၢတ်ႈတီႈၵူၼ်းဢွၼ်ႇၼၼ်ႉလႄႈဝႃႈ၊-ၶုၼ်ႇလႅၼ်ႈၵႂႃႇလႄႈႁႃဢဝ်ပိုၼ်ဢၼ်ၵဝ်ယိုဝ်းၵႂႃႇၸိူဝ်းၼၼ်ႉတႃႉ၊ဝႃႈၼင်ႇၼႆသေလႄႈၼႂ်းမိူဝ်ႈဢၼ်ၵူၼ်းဢွၼ်ႇယင်းတိုၵ်ႉၶုၼ်ႇလႅၼ်ႈၵႂႃႇယူႇၼၼ်ႉၸိုင်မၼ်းယိုဝ်းပိုၼ်လႅမ်ႈၼိုင်ႈႁႂ်ႈပူၼ်ႉမၼ်းၵႂႃႇဢေႃႈ။
၃၇ မိူဝ်ႈဢၼ်ၵူၼ်းဢွၼ်ႇမၼ်းႁွတ်ႈထိုင်ၵႃႈတီႈဢၼ်ပိုၼ်ဢၼ်ယေႃးၼသၼ်ႇယိုဝ်းၼၼ်ႉယေႃးၼသၼ်ႇႁွင်ႉၸွမ်းလင်ၵူၼ်းဢွၼ်ႇၼၼ်ႉလႄႈဝႃႈ၊-ႁိပ်ႈၼႅတ်ႈလႄႈၶုၼ်ႇလႅၼ်ႈၵႂႃႇၶၼ်ၶၼ်ၽႂ်းၽႂ်းတႃႉ။ယႃႇပေယူႇ၊ဝႃႈၼင်ႇၼႆဢေႃႈ။
၃၈ ၵူၼ်းဢွၼ်ႇယေႃးၼသၼ်ႇၼၼ်ႉၵေႃႈၵဵပ်းဢဝ်ပိုၼ်ၸိူဝ်းၼၼ်ႉသေလႄႈမႃးၸူးၵႃႈတီႈၸဝ်ႈမၼ်းဢေႃႈ။ၵူၺ်းၵႃႈၵူၼ်းဢွၼ်ၼၼ်ႉဢမ်ႇႁူႉလွင်ႈၼၼ်ႉ။
၃၉ ယေႃးၼသၼ်ႇဢိၵ်ႇတင်းတႃႇဝိတ်ႉၵူၺ်းႁူႉလွင်ႈၼၼ်ႉဢေႃႈ။
၄၀ ယေႃးၼသၼ်ႇဢဝ်လၢၵ်ႈၼၢၵ်ႈမၼ်းဢၢပ်ႈပၼ်တီႈၵူၼ်းဢွၼ်ႇမၼ်းသေလႄႈသင်ႇလၢတ်ႈဝႃႈ၊-မႂ်းဢဝ်ၸိူဝ်းၼႆႉၵႂႃႇၵႃႈတီႈဝဵင်းတႃႉ၊ဝႃႈၼင်ႇၼႆဢေႃႈ။
၄၁ လိုၼ်းသေၵူၼ်းဢွၼ်ႇၼၼ်ႉၵႂႃႇယဝ်ႉၼၼ်ႉတႃႇဝိတ်ႉလုၵ်ႉဢွၵ်ႇသေၵႃႈတီႈၽၢႆႇတၢင်းၸၢၼ်းဢွၵ်ႇမႃးလႄႈၶုပ်ႉမူပ်ႇၵႃႈတီႈၼိူဝ်လိၼ်သေလႄႈၽၢႆႇၼႃႈယေႃးၼသၼ်ႇသေယဝ်ႉၵူမ်ႈႁူဝ်တေႃႇထိုင်ႁွတ်ႈသၢမ်ပွၵ်ႈဢေႃႈ။သွင်ၶႃၼၼ်ႉၵေႃႉၼိုင်ႈလႄႈၵေႃႉၼိုင်ႈၸုပ်ႇၼူမ်ၵၼ်လႄႈၼမ်ႉတႃတူၵ်းၸွမ်းၵၼ်ဢေႃႈ။တႃႇဝိတ်ႉယိင်ႈၶႅၼ်းၼမ်ႉတႃတူၵ်းလိူဝ်တွၼ်းၼႃႇလူင်လၢင်ဢေႃႈ။
၄၂ ယေႃးၼသၼ်ႇၵေႃႈလၢတ်ႈတီႈတႃႇဝိတ်ႉလႄႈဝႃႈ၊-ထွၵ်ႈလူၺ်ႈလွင်ႈဢၼ်ႁႃးသွင်ၵေႃႉဢဝ်ၼႃႇမႃႉၸိုဝ်ႈသဵင်ထႃႇဝရႃႉၽြႃးလႄႈၵိၼ်ႇဝႃႈတီႈၵၼ်လႄႈဝႃႈ၊-ႁႂ်ႈထႃႇဝရႃႉၽြႃးမီးယူႇၵႃႈတီႈဝူင်ႈၵၢင်မႂ်းတင်းၵဝ်၊ၵႃႈတီႈဝူင်ႈၵၢင်ပီႈၼွင်ႉၸိူဝ်ႉၶိူဝ်းမႂ်းတင်းပီႈၼွင်ႉၸိူဝ်ႉၶိူဝ်းၵဝ်တႃႇသေႇသေၵမ်းလူၺ်ႈ၊ဝႃႈၼင်ႇၼႆဝႆႉယဝ်ႉၼၼ်ႉလႄႈၵႂႃႇၼိမ်ၼိမ်လီလီတႃႉ၊ဝႃႈၼင်ႇၼႆသေယဝ်ႉ၊တႃႇဝိတ်ႉဢွၵ်ႇၵႂႃႇလႄႈယေႃးၼသၼ်ႇၵေႃႈၶိုၼ်းၶဝ်ႈၵႂႃႇၵႃႈၼႂ်းဝဵင်းသေဢေႃႈ။