Chapter
၁၇
တႃႇဝိတ်ႉတင်းၵေႃးလျၢၵ်ႉ
၁ မီးၽဝ်ႇၼိုင်ႈၵူၼ်းၽိလိတ်ႉတိတင်းလၢႆသေႃႇဢဝ်ၵူၼ်းသိုၵ်းၶဝ်ၸူႉၵၼ်တုမ်ၵၼ်ၵႃႈတီႈဝဵင်းသေႃႇၶေႃႇၼႂ်းလႅၼ်လိၼ်ယုတႁႂ်ႈလႆႈတိုၵ်းသိုၵ်းလႄႈၶျႃးတပ်ႉၶဝ်ၵႃႈတီႈဢေႇၽိတ်ႉတမ်ႇမိမ်ႇၼႂ်းၵႄႈဝူင်ႈၵၢင်ဝဵင်းသေႃႇၶေႃႇတင်းဝဵင်းဢၸေႇၵႃႇဢေႃႈ။
၂ သေႃးလုဢိၵ်ႇတင်းၵူၼ်းမဵဝ်းဢိသရေႇလတင်းလၢႆၸူႉၵၼ်တုမ်ၵၼ်လႄႈၶျႃးတပ်ႉၶဝ်ၵႃႈၼႂ်းပၢင်ႇႁူၺ်ႈဢေႇလႃႇလႄႈဢွၼ်ၵၼ်ယၼ်ႇတပ်ႉၶၢင်းတပ်ႉၶဝ်ႁႂ်ႈလႆႈတိုၵ်းၵၼ်တင်းၵူၼ်းၽိလိတ်ႉတိၸိူဝ်းၼၼ်ႉဢေႃႈ။
၃ ၵူၼ်းၽိလိတ်ႉတိၸိူဝ်းၼၼ်ႉၸုၵ်းယူႇၵႃႈၼိူဝ်လွႆၽၢႆႇၼိုင်ႈၵူၼ်းမဵဝ်းဢိသရေႇလၸိူဝ်းၼၼ်ႉၸုၵ်းယူႇၵႃႈၼိူဝ်လွႆၽၢႆႇၼိုင်ႈလႄႈၶူင်ႈႁူၺ်ႈမီးၵႃႈတီႈဝူင်ႈၵၢင်ၶဝ်ဢေႃႈ။
၄ ၵူၼ်းသိုၵ်းဢၼ်လႆႈၸိုဝ်ၵေႃႇလျၢၵ်ႉၵူၼ်းဝဵင်းၵႃႇသဢၼ်တၢင်းသုင်မၼ်းမီးႁူၵ်းသွၵ်ႇပၢႆၶိုပ်ႉၼၼ်ႉဢွၵ်ႇၵႃႈၼႂ်းတပ်ႉၽိလိတ်ႉတိမႃးဢေႃႈ။
၅ မၼ်းၼၼ်ႉၵႃႈၼိူဝ်ႁူဝ်မၼ်းတိုဝ်းမွၵ်ႇႁူဝ်တွင်းလိူင်သေလႄႈၼုင်ႈသိူဝ်ႈၶႅင်းတွင်းလိူင်ဢၼ်ၶၼ်ၸင်ႊမၼ်းမီးႁႃႈႁဵင်ၵျၢပ်ႈသၶေႇလ(သၢမ်သိပ်းဢဵတ်းၸွႆႉ)ၼၼ်ႉဢေႃႈ။
၆ မၼ်းတိုဝ်းသွၵ်းတိၼ်တွင်းလိူင်ယူႇၵႃႈတီႈႁူဝ်မႃႇမၼ်းၵေႃႈပႃးတင်းၶႂၢၵ်ႈလႅမ်တွင်းလိူင်ယူႇဢေႃႈ။
၇ ၵၼ်းႁွၵ်ႇမၼ်းၸမ်းယႂ်ႇပဵင်းတၢၼ်ႇသီႇပၢၼ်ႉႁမ်းႁုၵ်ႇဢေႃႈ။မၢၵ်ႈႁွၵ်ႇမၼ်းၼမ်ႉလၢၵ်းမီးႁူၵ်းပၢၵ်ႇၵျၢပ်ႈသၶေႇလ(သီႇၸွႆႉ)ဢေႃႈ။ၵေႃႉဢၼ်ပႃးဢဝ်ၶိူင်ႈႁႄႉလၢၵ်ႈၼၢၵ်ႈမၼ်းၵေႃႉၼိုင်ႈလႆႈၵႂႃႇၽၢႆႇၼႃႈမၼ်းဢေႃႈ။
၈ မၼ်းၼၼ်ႉၸုၵ်းသေလႄႈႁွင်ႉသႅၼ်ႇၸူးတီႈပူဝ်ႇပႃႇၵူၼ်းသိုၵ်းတပ်ႉဢိသရေႇလတင်းလၢႆလႄႈဝႃႈ၊-ႁဵတ်းသင်လႄႈသူဢွၵ်ႇမႃးယၼ်ႇတပ်ႉၶၢင်းတပ်ႉယူႇၸိူဝ်ႉၼႆ။ၵဝ်ၼႆႉပဵၼ်ၵူၼ်းၽိလိတ်ႉတိဢမ်ႇၸႂ်ႈႁိုဝ်။သူပဵၼ်ၶႃႈသေႃးလုဢမ်ႇၸႂ်ႈႁိုဝ်။
၉ လိူၵ်ႈၵဵပ်းဢဝ်ၵူၼ်းၵေႃႉၼိုင်ႈႁႂ်ႈမၼ်းဢွၵ်ႇမႃးၶႄႉၶဵင်ႇၵၼ်တင်းၵဝ်တႃႉ။ပေႃးမၼ်းတိုၵ်းၵဝ်လႄႈဢဝ်ၵဝ်တၢႆလႆႈၸိုင်ႁဝ်းတင်းသဵင်ႈတၵ်းၶၢမ်ႇႁဵတ်းၶႃႈသူဢေႃႈ။ပေႃးၵဝ်တိုၵ်းပႄႉၵေႃႉၼၼ်ႉလႄႈဢဝ်မၼ်းတၢႆၸိုင်သူတၵ်းလႆႈၶၢမ်ႇႁဵတ်းၶႃႈႁဝ်းလႄႈၶၢမ်ႇႁဝ်းၸႂ်ႉၵိၼ်ဢေႃႈ၊ဝႃႈၼင်ႇၼႆဢေႃႈ။
၁၀ လၢႆးသမ်ႉၵူၼ်းၽိလိတ်ႉတိၼၼ်ႉဝႃႈ၊-ဝၼ်းမိူဝ်ႈၼႆႉၵဝ်ယွၼ်းၶဵင်ႇယွၼ်းတႃႉသူဢေႃႈ။
၁၁ ႁႂ်ႈၵူၼ်းသူၵေႃႉၼိုင်ႈမႃးတိုၵ်းၵၼ်တင်းၵဝ်တႃႉ၊ဝႃႈၼင်ႇၼႆဢေႃႈ။သေႃးလုဢိၵ်ႇတင်းၵူၼ်းဢိသရေႇလတင်းသဵင်ႈတင်းလူင်လႆႈငိၼ်းၵႂၢမ်းၵူၼ်းၽိလိတ်ႉတိၼၼ်ႉသေယဝ်ႉၸႂ်လူႉလႄႈၵူဝ်ႁႄၼႃႇလူင်လၢင်ဢေႃႈ။
၁၂ တႃႇဝိတ်ႉပဵၼ်လုၵ်ႈၸၢႆးယေႇသေႇၵူၼ်းဢေႇၽရတ်ႉဝဵင်းပႅတ်ႉလိႁႅမ်ႇမိူင်းယုတၼၼ်ႉဢေႃႈ။ယေႇသေႇမီးလုၵ်ႈၸၢႆးပႅတ်ႇၵေႃႉဢေႃႈ။ၼႂ်းၸူဝ်ႈပၢၼ်သေႃးလုၼၼ်ႉမၼ်းပဵၼ်ၵေႃႉဢၼ်ဢသၢၵ်ႈယႂ်ႇထဝ်ႈၵႄႇၼႃႇလူင်လၢင်ဢေႃႈ။
၁၃ ၼႂ်းလုၵ်ႈၸၢႆးယေႇသေႇၼၼ်ႉၶဝ်ၸိူဝ်းဢၼ်ဢသၢၵ်ႈယႂ်ႇသၢမ်ၵေႃႉၵိုတ်ႉႁၢပ်ႇၵၢၼ်ၼႂ်းသိုၵ်းလႄႈၸွမ်းလင်သေႃးလုယူႇဢေႃႈ။ၸိုဝ်ႈသဵင်လုၵ်ႈၸၢႆးမၼ်းသၢမ်ၵေႃႉဢၼ်ၵႂႃႇၵိုတ်ႉႁၢပ်ႇယူႇၼၼ်ႉၸမ်း၊ပဵၼ်လုၵ်ႈၸၢႆးတူၼ်ႈဢေႇလျႃႇၽလုၵ်ႈၸၢႆးတုတိယဢၽိၼတပ်ႉလုၵ်ႈၸၢႆးတတိယသိမႃႇဢေႃႈ။
၁၄ တႃႇဝိတ်ႉပဵၼ်လုၵ်ႈၸၢႆးဢၼ်လဵၵ်ႉသေပိူၼ်ႈဢေႃႈ။လုၵ်ႈၸၢႆးလူင်သၢမ်ၵေႃႉၼၼ်ႉၸွမ်းလင်သေႃးလုယူႇသေၵေႃႈ
၁၅ တႃႇဝိတ်ႉၸမ်းလွင်ႈၼင်ႇႁိုဝ်တၵ်းလႆႈလဵင်ႉထိင်းသူဝ်းပေႃႈမၼ်းၵႃႈတီႈဝဵင်းပႅတ်ႉလိႁႅမ်ႇၼၼ်ႉၸိုင်ၵႂႃႇၵႂႃႇၶိုၼ်းၶိုၼ်းၵႃႈတီႈသေႃးလုၼၼ်ႉယူႇဢေႃႈ။
၁၆ ၵူၼ်းၽိလိတ်ႉတိၵေႃႉၼၼ်ႉၶိင်ႇၵၢင်ၼႂ်ပွၵ်ႈၼိုင်ႈၶိင်ႇႁူဝ်ၶမ်ႈပွၵ်ႈၼိုင်ႈဢွၵ်ႇမႃးၼႄပျႃႉတူဝ်မၼ်းၵူႈဝၼ်းသီႇသိပ်းဝၼ်းတဵမ်တဵမ်ဢေႃႈ။
၁၇ မိူဝ်ႈၼၼ်ႉယေႇသေႇသင်ႇလၢတ်ႈတီႈလုၵ်ႈၸၢႆးမၼ်းတႃႇဝိတ်ႉလႄႈဝႃႈ၊-ဢဝ်ၶဝ်ႈတႅၵ်ႇဢေႇၽႃႇၼိုင်ႈဢိၵ်တင်းၶဝ်ႈမုၼ်းသိပ်းႁူၺ်ႇသေလႄႈၵႃႉႇပၼ်ပီႈဢၢႆႈမႂ်းၸိူဝ်းၼၼ်ႉၵႃႈၼႂ်းတပ်ႉၼၼ်ႉတႃႉ။
၁၈ ၼမ်ႉၼူမ်းၵၢမ်ႈသိပ်းၵွၼ်ႈၼႆႉၵေႃႈဢဝ်လႄႈသၢၵ်ႈပၼ်တီႈၶုၼ်ဢၼ်ဢုပ်ႉၵႃႈၼိူဝ်ၵူၼ်းႁဵင်ၼိုင်ႈၶဝ်ၼၼ်ႉတႃႉ။၁၉ ၵႂႃႇၸႂ်းတူၺ်းလွင်ႈဢၼ်ပီႈဢၢႆႈမႂ်းၸိူဝ်းၼၼ်ႉမီးတၢင်းဢၼ်ယူႇလီၵိၼ်ဝၢၼ်ယူႇႁိုဝ်၊ဢၼ်ဝႃႈၼၼ်ႉသေယဝ်ႉၶိုၼ်းမႃးလၢတ်ႈထိုင်ၵႃႈတီႈၵဝ်သေႇၶျႃႇလီငၢမ်းတႃႉ၊ဝႃႈၼင်ႇၼႆဢေႃႈ။မိူဝ်ႈၶိင်ႇၼၼ်ႉၸႃႉၸဵမ်သေႃးလုတင်းၵူၼ်းမဵဝ်းဢိသရေႇလတင်းသဵင်ႈတင်းလူင်လႆႈတိုၵ်းတေႃးၵၼ်တင်းၵူၼ်းၽိလိတ်ႉတိၸိူဝ်းၼၼ်ႉၵႃႈတီႈပၢင်ႇႁူၺ်ႈဢေႇလႃႇၼၼ်ႉယူႇဢေႃႈ။
၂၀ တႃႇဝိတ်ႉလုၵ်ႉၶိင်ႇၵၢင်ၼႂ်ၸဝ်ႉၸဝ်ႉသေယဝ်ႉဢဝ်သူဝ်းတင်းလၢႆဢၢပ်ႈပၼ်ၵႃႈတီႈၵူၼ်းဢၼ်လဵင်ႉသူဝ်းထိင်းသူဝ်းၼၼ်ႉသေယဝ်ႉမၼ်းဢဝ်ၸိူဝ်းဢၼ်ပေႃႈမၼ်းယေႇသေႇသင်ႇလၢတ်ႈဝႆႉတီႈမၼ်းၼၼ်ႉလႄႈၵႂႃႇႁွတ်ႈထိုင်ၵႃႈတီႈတပ်ႉသိုၵ်းမိူဝ်ႈဢၼ်ၵူၼ်းသိုၵ်းၶဝ်ႁဵတ်းသဵင်ဢၼ်ႁႅင်းယႂ်ႇၼႃႇလႄႈၶီႇသိုၵ်းၵႂႃႇၵႃႈတီႈပၢင်သိုၵ်းယူႇၼၼ်ႉဢေႃႈ။
၂၁ လွင်ႈမၼ်းၸမ်းၵူၼ်းတပ်ႉဢိသရေႇလဢိၵ်ႇတင်းၵူၼ်းၽိလိတ်ႉတိၸိူဝ်းၼၼ်ႉလႆႈယၼ်ႇတပ်ႉၶၢင်းတပ်ႉတေႃႇၵၼ်ဝႆႉယူႇဢေႃႈ။
၂၂ တႃႇဝိတ်ႉၼၼ်ႉဢဝ်ဢၼ်ပႃးမႃးတီႈမၼ်းၸိူဝ်းၼၼ်ႉဢၢပ်ႈဝႆႉၵႃႈၼႂ်းမိုဝ်းၵေႃႉဢၼ်ပႂ်ႉၶူဝ်းလဵင်းၼၼ်ႉသေယဝ်ႉၶုၼ်ႇလႅၼ်ႈၵႂႃႇၵႃႈၼႂ်းမုၵ်ႉၸိူဝ်းၵူၼ်းသိုၵ်းၸိူဝ်းၼၼ်ႉလႄႈတၵ်းလၢတ်ႈပီႈဢၢႆႈမၼ်းၸိူဝ်းၼၼ်ႉဢေႃႈ။
၂၃ ၼႂ်းမိူဝ်ႈဢၼ်မၼ်းယင်းတိုၵ်ႉလၢတ်ႈၵႂၢမ်းတေႃႇၶဝ်ယူႇၼၼ်ႉၸိုင်ၵူၼ်းသိုၵ်းဢၼ်လႆႈၸိုဝ်ႈၵေႃႇလျၢတ်ႉၵူၼ်းဝဵင်းၵႃႇသ၊ၵူၼ်းၽိလိတ်ႉတိၼၼ်ႉဢွၵ်ႇသေၵႃႈၼႂ်းတပ်ႉၽိလိတ်ႉတိမႃးလႄႈလၢတ်ႈဝႃႈမိူၼ်ၸိူဝ်ႉၼင်ႇဝၼ်းဢွၼ်တၢင်းၼၼ်ႉလႄႈတႃႇဝိတ်ႉလႆႈငိၼ်းၵႂၢမ်းၼၼ်ႉဢေႃႈ။
၂၄ ၵူၼ်းမဵဝ်းဢိသရေႇလတင်းသဵင်ႈတင်းလူင်ႁၼ်ၵေႃႉၼၼ်ႉသေယဝ်ႉၵူဝ်ႁေၼႃႇလူင်လၢင်လႄႈဢွၼ်ၵၼ်ဢွၵ်ႇပၢႆႈဢေႃႈ။
၂၅ ၵူၼ်းမဵဝ်းဢိသရေႇလၸိူဝ်းၼၼ်ႉလၢတ်ႈၵၼ်လႄႈဝႃႈ၊-သူလႆႈႁၼ်ၵေႃႉဢၼ်ဢွၵ်ႇမႃးၼၼ်ႉယဝ်ႉႁိုဝ်။မၼ်းယွၼ်းၶဵင်ႇယွၼ်းတႃႉမဵဝ်းဢိသရေႇလယူႇဢိူဝ်ႈ။ၵေႃႉဢၼ်ဢဝ်မၼ်းတၢႆလႆႈၼၼ်ႉၶုၼ်ႁေႃၶမ်းတၵ်းပၼ်ၸေးၸိမ်ႇဢၼ်ယႂ်ႇၼႃႇဢိၵ်ႇတင်းလုၵ်ႈယိင်းၸဝ်ႈၵႃႈတီႈၵေႃႉၼၼ်ႉဢေႃႈ။တၵ်းႁႂ်ႈပီႈၼွင်ႉၸိူဝ်ႉၶိူဝ်းပေႃႈမၼ်းတင်းလၢႆလႆႈလွတ်ႈသတေၢင်းဢၼ်ပၼ်ဢၶွၼ်ႇၼႂ်းမိူင်းဢိသရေႇလၼႆႉဢေႃႈ၊ဝႃႈၼင်ႇၼႆဢေႃႈ။
၂၆ တႃႇဝိတ်ႉၵေႃႈထၢမ်တီႈၶဝ်ၸိူဝ်းဢၼ်ၸုၵ်းယူႇၵႃႈတီႈႁိမ်းမၼ်းၼၼ်ႉလႄႈဝႃႈ၊-တၵ်းႁဵတ်းတေႃႇၵေႃႉဢၼ်ဢဝ်တၢႆၵူၼ်းၽိလိတ်ႉတိၼၼ်ႉလႄႈဢဝ်ပႅတ်ႈတၢင်းဢၼ်ဢူၵ်းလၢႆႈသရေႇလူႉဢၼ်မဵဝ်းဢိသရေႇလလႆႈၶၢမ်ႇယူႇၼၼ်ႉၸိူဝ်ႉၼင်ႇႁိုဝ်။ၵူၼ်းၽိလိတ်ႉတိၵေႃႉဢၼ်ဢမ်ႇၶၢမ်ႇမၢင်ႇၵလႃႇတၢင်းဢၼ်ထိူဝ်ႁိမ်းၼၼ်ႉမၼ်းပဵၼ်ၵူၼ်းၸိူဝ်ႉၼင်ႇႁိုဝ်လႄႈတၵ်းလႆႈသေႉသွမ်းပူဝ်ႇပႃႇၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉ၊ဝႃႈၼင်ႇၼႆဢေႃႈ။
၂၇ ၵူၼ်းတင်းလၢႆၵေႃႈၶိုၼ်းလၢတ်ႈၸိူဝ်ႉၼင်ႇၵမ်းဢွၼ်တၢင်းၼၼ်ႉလႄႈဝႃႈ၊-ၵေႃႉဢၼ်ဢဝ်မၼ်းတၢႆၼၼ်ႉတၵ်းလႆႈဢၵျူဝ်းၸိူဝ်ႉၼင်ႇၼႆဢေႃႈ၊ဝႃႈၼင်ႇၼႆဢေႃႈ။
၂၈ ဢေႇလျႃႇၽဢၼ်ပဵၼ်ပီႈဢၢႆႈမၼ်းၵေႃႉယႂ်ႇၼၼ်ႉငိၼ်းၵႂၢမ်းဢၼ်မၼ်းလၢတ်ႈတေႃႇၵၼ်တင်းၶဝ်ၼၼ်ႉသေယဝ်ႉမီးတင်းၸႂ်မႆႈၶႆႈၸႃႉဢွၵ်ႇတီႈတႃႇဝိတ်ႉလႄႈဝႃႈ၊-ႁဵတ်းသင်လႄႈမႂ်းမႃးၵႃႈတီႈၼႆႉ။မႂ်းဢဝ်သူဝ်းဢၼ်မီးၵေႇၼႃႇၸိူဝ်းၼၼ်ႉဢၢပ်ႈပၼ်ဝႆႉၵႃႈၼႂ်းမိုဝ်းၽူႈလႂ်ၵႃႈတီႈထိူၼ်ႇၼၼ်ႉ။ၵဝ်ႁူႉမႂ်းမီးၸႂ်မူင်ႈမႅၼ်မႃႇၼႃႉယႂ်ႇ၊ႁူဝ်ၸႂ်ဢၼ်ႁၢႆႉယုတ်ႈၼၼ်ႉယူႇဢိူဝ်ႈ။မႂ်းလူင်းမႃးႁႂ်ႈလႆႈမႃးတူၺ်းပွႆးသိုၵ်းၵူၺ်းလူင်ပေႇ၊ဝႃႈၼင်ႇၼႆဢေႃႈ။
၂၉ တႃႇဝိတ်ႉၵေႃႈလၢတ်ႈလႄႈဝႃႈ၊-ၵဝ်ၶႃႈလႆႈႁဵတ်းမႅၼ်ႈၵႃႈသင်။ၵဝ်ၶႃႈဢမ်ႇမီးဢၶႂင်ႉလၢတ်ႈၵႂၢမ်းႁိုဝ်၊ဝႃႈၼင်ႇၼႆသေယဝ်ႉမၼ်းသမ်ႉဝၢႆႇၸူးၵႃႈတီႈပိူၼ်ႈတၢင်ႇၵေႃႉသေလႄႈထၢမ်မိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉဢေႃႈ။
၃၀ ၵူၼ်းတင်းလၢႆၵေႃႈၶိုၼ်းလၢတ်ႈမိူၼ်ၼင်ႇဢွၼ်တၢင်း၃၁ ၼၼ်ႉဢေႃႈ။
၃၁ ပိူၼ်ႈလႆႈငိၼ်းၵႂၢမ်းဢၼ်တႃႇဝိတ်ႉလၢတ်ႈၼၼ်ႉလႄႈၶဝ်လဝ်ႈလၢတ်ႈထိုင်တီႈသေႃးလုဢေႃႈ။
၃၂ သေႃးလုၵေႃႈႁွင်ႉဢဝ်တႃႇဝိတ်ႉဢေႃႈ။တႃႇဝိတ်ႉၵေႃႈလဝ်ႈလၢတ်ႈတီႈသေႃးလုလႄႈဝႃႈ၊-ယႃႇပေႁႂ်ႈၽူႈလႂ်သေၵေႃႉသေၵူၼ်းလႆႈၸႂ်လူႉၵွပ်ႈပိူဝ်ႈၵူၼ်းၵေႃႉၼၼ်ႉၶႃႈ။ၶႃႈၸဝ်ႈတၵ်းၵႂႃႇလႄႈတိုၵ်းတေႃးၵူၼ်းၽိလိတ်ႉတိၼၼ်ႉၶႃႈဢေႃႈ၊ဝႃႈၼင်ႇၼႆလႄႈသေႃးလုလၢတ်ႈတီႈတႃႇဝိတ်ႉလႄႈဝႃႈ၊-မႂ်းဢမ်ႇၵႂႃႇတိုၵ်းၵူၼ်းၽိလိတ်ႉတိၼၼ်ႉလႆႈ။
၃၃ မႂ်းယင်းပဵၼ်ၵေႃႉဢၼ်လဵၵ်ႉဢၼ်ဢွၼ်ႇယူႇၵူၺ်း။မၼ်းပဵၼ်ၵူၼ်းသိုၵ်းမႃးၸဵမ်မိူဝ်ႈဢၼ်မၼ်းယင်းၼုမ်ႇၼၼ်ႉယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊တႃႇဝိတ်ႉၵေႃႈလဝ်ႈလၢတ်ႈတီႈသေႃးလုလႄႈဝႃႈ၊-
၃၄ မိူဝ်ႈဢၼ်ၶႃႈၸဝ်ႈယင်းတိုၵ်ႉလဵင်ႉထိင်းသူဝ်းပေႃႈၶႃႈၸဝ်ႈယူႇၼၼ်ႉသၢင်ႇသီႈတင်းမီမႃးၶူပ်းၵၢပ်ႈဢဝ်သူဝ်းဢွၼ်ႇၵႃႈၼႂ်းၽုင်သူဝ်းၶႃႈဢေႃႈ။
၃၅ ၶႃႈၸဝ်ႈလိုပ်ႈလမ်းၸွမ်းၵႂႃႇလႄႈဢဝ်တၢႆပႅတ်ႈသေယဝ်ႉၼုၵ်ႈဢဝ်သူဝ်းဢွၼ်ႇၵႃႈၼႂ်းသူပ်းၶဝ်ၼၼ်ႉၶႃႈဢေႃႈ။မိူဝ်ႈဢၼ်ၶဝ်ၶိုၼ်းႁဵတ်းတေႃႇၶႃႈၸဝ်ႈၼၼ်ႉၶႃႈၸဝ်ႈၵမ်တိုတ်ႉၶူၼ်ၼူတ်ႇၶဝ်လႄႈပေႃးယဵၼ်းဢဝ်ၶဝ်တၢႆပႅတ်ႈတီႈၶႃႈဢေႃႈ။
၃၆ ၶႃႈၸဝ်ႈလႆႈဢဝ်တၢႆသၢင်ႇသီႈဢိၵ်ႇတင်းမီၶႃႈဢေႃႈ။ၵူၼ်းၽိလိတ်ႉတိဢၼ်ဢမ်ႇၶၢမ်ႇမၢင်ႇၵလႃႇတၢင်းဢၼ်ထိူဝ်ႁိမ်းၼႆႉတၵ်းပဵၼ်မိူၼ်ၸိူဝ်ႉၼင်ႇတူဝ်ထိူၼ်ႇၼၼ်ႉတူဝ်ၼိုင်ႈၵွပ်ႈပိူဝ်ႈဢၼ်မၼ်းသေႉသွမ်းတပ်ႉသိုၵ်းၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉၶႃႈဢေႃႈ၊ဝႃႈၼင်ႇၼႆသေယဝ်ႉ၊
၃၇ တႃႇဝိတ်ႉသမ်ႉလဝ်ႈလၢတ်ႈလႄႈဝႃႈ၊-ထႃႇဝရႃႉၽြႃးဢၼ်ၵႄႇသႄႇၼုၵ်ႈဢဝ်ၶႃႈၸဝ်ႈဢွၵ်ႇသေၵႃႈၼႂ်းသူပ်းသၢင်ႇသီႈတင်းမီၼၼ်ႉတၵ်းၼုၵ်ႈဢဝ်ၶႃႈၸဝ်ႈလွတ်ႈသေၵႃႈၼႂ်းမိုဝ်းၵူၼ်းၽိလိတ်ႉတိၼႆႉယူႇတီႈၶႃႈဢေႃႈ၊ဝႃႈၼင်ႇၼႆဢေႃႈ။သေႃးလုလၢတ်ႈတီႈတႃႇဝိတ်ႉလႄႈဝႃႈ၊-ၵႂႃႇတႃႉ။ႁႂ်ႈထႃႇဝရႃႉၽြႃးမီးယူႇလူၺ်ႈၵၼ်တင်းမႂ်းသေၵမ်းလူၺ်ႈ၊ဝႃႈၼင်ႇၼႆဢေႃႈ။
၃၈ သေႃးလုၵေႃႈဢဝ်ၶူဝ်းၼုင်ႈၸဝ်ႈၼုင်ႈပၼ်တႃႇဝိတ်ႉသေယဝ်ႉဢဝ်မွၵ်ႇႁူဝ်တွင်းလိူင်တိုဝ်းပၼ်ၵႃႈၼိူဝ်ႁူဝ်မၼ်းလႄႈဢဝ်သိူဝ်ႈၶဵပ်းလဵၵ်းၼုင်ႈပၼ်ဢေႃႈ။
၃၉ တႃႇဝိတ်ႉဢဝ်လၢပ်ႇၸဝ်ႈမတ်ႉသႂ်ႇၵႃႈၼိူဝ်ၶူဝ်းၼုင်ႈမၼ်းသေလႄႈၶတ်းၸႂ်ပႆၸၢမ်းတူၺ်းၵွပ်ႈပိူဝ်ႈမၼ်းဢမ်ႇတွၼ်ႉယၢမ်ႈလႆႈတိုဝ်းၼုင်ႈယိပ်းၵမ်လၢၵ်ႈၼၢၵ်ႈၼၼ်ႉဢေႃႈ။တႃႇဝိတ်ႉလဝ်ႈလၢတ်ႈတီႈသေႃးလုလႄႈဝႃႈ၊-ၶႃႈၸဝ်ႈဢမ်ႇပႃးဢဝ်ၸိူဝ်းၼႆႉသေလႄႈၵႂႃႇလႆႈၶႃႈ။ၶႃႈၸဝ်ႈဢမ်တွၼ်ႉယၢမ်ႈလႆႈသုင်းတိုဝ်းလႄႈဢမ်ႇမိုတ်ႈၶႃႈ၊ဝႃႈၼင်ႇၼႆသေယဝ်ႉ၊မၼ်းၶိုၼ်းၵႄႈထွတ်ႇပႅတ်ႈသေဢေႃႈ။
၄၀ လၢႆးသမ်ႉမၼ်းယိပ်းၵမ်ဢဝ်ၶွၼ်ႉတဝ်ႉမၼ်းသေလႄႈလိူၵ်ႈၵဵပ်းမၢၵ်ႇႁိၼ်ဢၼ်မူၼ်းလီႁႃႈလုၵ်ႉၵႃႈၼႂ်းၼမ်ႉႁွင်ႈသေလႄႈဢဝ်သႂ်ႇၵႃႈၼႂ်းထူင်မၼ်းသေယဝ်ႉၵႂႃႇၸူးၵႃႈတီႈၵူၼ်းၽိလိတ်ႉတိဢေႃႈ။ၵၢင်ႇၵူင်ဢွၼ်ႇၵေႃႈမၼ်းယိပ်းၵမ်ဝႆႉၼႂ်းမိုဝ်းမၼ်းဢေႃႈ။
၄၁ ၵူၼ်းၽိလိတ်ႉတိၼၼ်ႉၵေႃႈမႃးၸမ်ၵႃႈတီႈတႃႇဝိတ်ႉၼၼ်ႉဢေႃႈ။ၵေႃႉဢၼ်ပႃးၶိူင်ႈႁႄႉလၢၵ်ႈၼၢၵ်ႈမၼ်းၼၼ်ႉၵေႃႈၵႂႃႇၽၢႆႇၼႃႈမၼ်းဢေႃႈ။
၄၂ ၵူၼ်းၽိလိတ်ႉတိၼၼ်ႉမိူဝ်ႈဢၼ်တူၺ်းလႄႈႁၼ်တႃႇဝိတ်ႉၼၼ်ႉၸိုင်မၼ်းသေႉသွမ်းလူလၢႆမၼ်းဢေႃႈ။လွင်ႈမၼ်းၸမ်းမၼ်းပဵၼ်ၵေႃႉဢၼ်ဢသၢၵ်ႈယင်းၼုမ်ႇလႄႈမီးၼိူဝ်ႉၼင်ႇလႅင်ႊၵမ်ႇၼႃႈတႃႁၢင်ႊလီၼၼ်ႉဢေႃႈ။
၄၃ ၵူၼ်းၽိလိတ်ႉတိၼၼ်ႉထၢမ်တႃႇဝိတ်ႉလႄႈဝႃႈ၊-ၵဝ်ပဵၼ်မႃလႄႈမႂ်းဢဝ်ၶွၼ်ႉတဝ်ႉမႃးၸူးၵႃႈတီႈၵဝ်ႁိုဝ်၊ဝႃႈၼင်ႇၼႆသေယဝ်ႉဢဝ်ၽြႃးမၼ်းတင်းလၢႆတိူင်ႇလႄႈၵိၼ်ႇလႃႇတႃႇဝိတ်ႉဢေႃႈ။
၄၄ လၢႆးသမ်ႉၵူၼ်းၽိလိတ်ႉတိၼၼ်ႉလၢတ်ႈတီႈတႃႇဝိတ်ႉလႄႈဝႃႈ၊-မႃးၵႃႈတီႈၼႆႉတႃႉ။ၵဝ်တၵ်းဢဝ်ၼိူဝ်ႉမႂ်းပၼ်ၼူၵ်ႉၵၢင်ႁၢဝ်တင်းတူဝ်ထိူၼ်ႇႁၢႆႉတင်းလၢႆဢေႃႈ၊ဝႃႈၼင်ႇၼႆဢေႃႈ။
၄၅ တႃႇဝိတ်ႉၵေႃႈလၢတ်ႈတီႈၵူၼ်းၽိလိတ်ႉတိၼၼ်ႉလႄႈဝႃႈ၊-မႂ်းပႃးဢဝ်တင်းႁွၵ်ႇ၊တင်းလၢပ်ႇ၊တင်းၶႂၢၵ်ႈလႅမ်၊သေလႄႈမႃးၸူးၵႃႈတီႈၵဝ်ဢေႃႈ။ၵဝ်ၸမ်းပႃးဢဝ်ၼႃႇမႃႉၸိုဝ်ႈသဵင်ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃးတပ်ႉသိုၵ်းၵၼ်းမဵဝ်းဢိသရေႇလဢၼ်မႂ်းသေႉသွမ်းၼၼ်ႉသေလႄႈမႃးၸူးၵႃႈတီႈမႂ်းဢေႃႈ။
၄၆ ထႃႇဝရႃႉၽြႃးတၵ်းဢဝ်မႂ်းဢၢပ်ႈပၼ်ၵႃႈၼႂ်းမိုဝ်းၵဝ်ဝၼ်းမိူဝ်ႈၼႆႉလႄႈၵဝ်တၵ်းဢဝ်မႂ်းတၢႆလႄႈတႅပ်းႁူဝ်မႂ်းဢေႃႈ။ၵဝ်တၵ်းဢဝ်တူဝ်တၢႆၵူၼ်းၽိလိတ်ႉတိၸိူဝ်းၼႆႉပၼ်တီႈၼူၵ်ႉၵၢင်ႁၢဝ်တင်းတူဝ်ထိူၼ်ႇႁၢႆႉတင်းလၢႆဝၼ်းမိူဝ်ႈၼႆႉဢေႃႈ။ၵူၼ်းလိၼ်မိူင်းတင်းသဵင်ႈတင်းလူင်တၵ်းလႆႈႁူႉလွင်ႈဢၼ်ဝႃႈၽြႃးပဵၼ်ၸဝ်ႈမဵဝ်းဢိသရေႇလၼၼ်ႉမီးတႄႉဢေႃႈ။
၄၇ ၵူၼ်းဢၼ်ၸူႉဢၼ်တုမ်ႈတင်းသဵင်ႈတင်းလူင်တၵ်းလႆႈႁူႉလွင်ႈဢၼ်ဝႃႈ၊ထႃႇဝရႃႉၽြႃးဢမ်ႇဢဝ်တင်းႁွၵ်ႇတင်းလၢပ်ႇသေလႄႈၵႄႇသႄႇၶျွတ်ႈဢဝ်။လွင်ႈမၼ်းၸမ်းသိုၵ်းၼႆႉပဵၼ်သိုၵ်းထႃႇဝရႃႉၽြႃးဢေႃႈ။မၼ်းၸဝ်ႈတၵ်းဢဝ်သူဢၢပ်ႈပၼ်ၵႃႈၼႂ်းမိုဝ်းႁဝ်းဢေႃႈ၊ဝႃႈၼင်ႇၼႆဢေႃႈ။
၄၈ မိူဝ်ႈဢၼ်ၵူၼ်းၽိလိတ်ႉတိၼၼ်ႉသုတ်ႉၸမ်မႃးႁႂ်ႈလႆႈတိုၵ်းတေႃးတႃႇဝိတ်ႉၼၼ်ႉ၊တႃႇဝိတ်ႉၶုၼ်ႇလႅၼ်ႈၵႂႃႇၶၼ်ၶၼ်ၽႂ်းၽႂ်းႁႂ်ႈလႆႈထူပ်းၵၼ်တင်းၵူၼ်းၽိလိတ်ႉတိဢေႃႈ။
၄၉ တႃႇဝိတ်ႉၸူၵ်းဢဝ်မၢၵ်ႇႁိၼ်လုၵ်ႉၼိုင်ႈၵႃႈၼႂ်းထူင်ပႃးၼၼ်ႉသေယဝ်ႉထိမ်ႈယိုင်းသႂ်ႇၸပ်းသႂ်ႇၼႃႈၽၢၵ်ႇၵူၼ်းၽိလိတ်ႉတိၼၼ်ႉလႄႈမၢၵ်ႇႁိၼ်ၼၼ်ႉၸပ်းပွင်ႇၶဝ်ႈၵႃႈၼႂ်းၼႃႈၽၢၵ်ႇမၼ်းလႄႈမၼ်းလူမ်ႉမူပ်ႇတူၵ်းၵႃႈၼိူဝ်လိၼ်ဢေႃႈ။
၅၀ ၼင်ႇၼၼ်လႄႈတႃႇဝိတ်ႉၼၼ်ႉဢမ်ႇဢဝ်လၢပ်ႇဢဝ်လႅဝ်းဢဝ်ၵၢင်ႇၵူင်ႇတင်းမၢၵ်ႇႁိၼ်လုၵ်ႈၼိုင်ႈၵူၺ်းသေယဝ်ႉပေႉၼႅင်ႇၵူၼ်းၽိလိတ်ႉတိၼၼ်ႉလႄႈဢဝ်မၼ်းတၢႆဢေႃႈ။
၅၁ မိူဝ်ႈၼၼ်ႉတႃႇဝိတ်ႉၶုၼ်ႇလႅၼ်ႈၵႂႃႇလႄႈတဵၵ်းယဵပ်ႇၵူၼ်းၽိလိတ်ႉတိၼၼ်ႉသေယဝ်ႉထွတ်ႇဢဝ်လၢပ်ႇမၼ်းၵႃႈၼႂ်းၵပ်းသေယဝ်ႉဢဝ်မၼ်းတၢႆလႄႈတႅပ်းဢဝ်ႁူဝ်မၼ်းဢေႃႈ။မိူဝ်ႈဢၼ်ၵူၼ်းၽိလိတ်ႉတိၸိူဝ်းၼၼ်ႉႁၼ်လွင်ႈၵူၼ်းသိုၵ်းၼၼ်ႉတၢႆယဝ်ႉၼၼ်ႉၸိုင်ၶဝ်ဢွၼ်ၵၼ်ဢွၵ်ႇပၢႆႈဢေႃႈ။
၅၂ မိူဝ်ႈၼၼ်ႉၵူၼ်းမဵဝ်းဢိသရေႇလဢိၵ်ႇတင်းၵူၼ်းမဵဝ်းယုတတင်းလၢႆဢွၼ်ၵၼ်လိုပ်ႈၸွမ်းလမ်းၸွမ်းၵူၼ်းၽိလိတ်ႉတိတင်းလၢႆတေႃႇထိုင်ႁွတ်ႈဝဵင်းၵႃႇသတေႃႇထိုင်ႁွတ်ႈၽၵ်းတူဝဵင်းဢေႇၵုၼ်ႇၼၼ်ႉဢေႃႈ။ဢဝ်ၵႃႈတီႈၸႃႉၸဵမ်သဵၼ်ႈတၢင်းဝဵင်းသႃႇရိမ်ႇတေႃႇထိုင်ႁွတ်ႈဝဵင်းၵႃႇသတင်းဝဵင်းဢေႇၵုၼ်ႇၼၼ်ႉၵူၼ်းၽိလိတ်ႉတိဢၼ်တိူဝ်ႉမၢတ်ႇၸိူဝ်းၼၼ်ႉဢွၼ်ၵၼ်လူမ်ႉတၢႆဢေႃႈ။
၅၃ ဝႆးသလေိုပ်ႉလမ်းၵူၼ်းမဵဝ်းၽိလိတ်ႉတိၶဝ်ယဝ်ႉၵူၼ်းမဵဝ်းဢိသရေႇလၸိူဝ်းၼၼ်ႉၶိုၼ်းမႃးလႄႈသိမ်းဢဝ်တပ်ႉၶဝ်ဢေႃႈ။
၅၄ တႃႇဝိတ်ႉဢဝ်ၵွၵ်းႁူဝ်ၵူၼ်းၽိလိတ်ႉတိၼၼ်ႉလႄႈပႃးၵႂႃႇၵႃႈတီႈဝဵင်းယေႇရုသလႅမ်ႇဢေႃႈ။
၅၅ ဢဝ်လၢၵ်ႈၼၢၵ်ႈၶဝ်ဝႆႉၵႃႈၼႂ်းသုမ်ႉထဵင်မူဝ်းၵႃႇမၼ်းဢေႃႈ။သေႃးလုၼၼ်ႉမိူဝ်ႈဢၼ်ႁၼ်တႃႇဝိတ်ႉဢွၵ်ႇၵႂႃႇႁႂ်ႈလႆႈတိုၵ်းတေႃးၵူၼ်းၽိလိတ်ႉတိၼၼ်ႉၸိုင်ထၢမ်တီႈၶုၼ်ပူဝ်ႇၶျုၵ်ႈမၼ်းဢႃႇပၼႃႇလႄႈဝႃႈ၊-ဢႃႇပၼႃႇဢိူၺ်း။ၵူၼ်းဢွၼ်ႇၵေႃႉၼၼ်ႉပဵၼ်လုၵ်ႈၸၢႆးၽူႈလႂ်၊ဝႃႈၼင်ႇၼႆဢေႃႈ။
၅၆ ဢႃႇပၼႃႇၵေႃႈလဝ်ႈလၢတ်ႈလႄႈဝႃႈ၊-ၸဝ်ႈၶုၼ်လူင်တီႈၶႃႈ။ၵႃႈၼင်ႇဢၼ်ၸဝ်ႈႁဝ်းဢသၢၵ်ႈလိပ်းယူႇၼၼ်ႉၶႃႈၸဝ်ႈဢမ်ႇႁူႉၶႃႈမိူဝ်ႈဢၼ်ဝႃႈၼင်ႇၼႆၸိုင်ၶုၼ်ႁေႃၶမ်းၵေႃႈမီးဢမိင်ႉလႄႈဝႃႈ၊-ၸႅတ်ႈတူၺ်းထၢမ်တူၺ်းႁႂ်ႈလႆႈႁူႉၵူၼ်းဢွၼ်ႇၼႆႉပဵၼ်လုၵ်ႈၸၢႆးၽူႈလႂ်ၼၼ်ႉတႃႉ၊ဝႃႈၼင်ႇၼႆဢေႃႈ။
၅၇ မိူဝ်ႈဢၼ်တႃႇဝိတ်ႉလုၵ်ႉသေၵႃႈတီႈတၢင်းဢၼ်ဢဝ်ၵူၼ်းၽိလိတ်ႉတိၼၼ်ႉယဝ်ႉလႄႈၶိုၼ်းမႃးၼၼ်ႉၸိုင်ဢႃႇပၼႃႇႁွင်ႉဢဝ်မၼ်းၵႂႃႇၸူးသေႃးလုဢေႃႈ။မၼ်းယင်းဢဝ်မိုဝ်းမၼ်းယိပ်းၵမ်ဝႆႉၵွၵ်းႁူဝ်ၵူၼ်းၽိလိတ်ႉတိၼၼ်ႉယူႇဢေႃႈ။
၅၈ သေႃးလုထၢမ်တီႈမၼ်းလႄႈဝႃႈ၊-ၵူၼ်းဢွၼ်ႇဢိူၺ်း။မႂ်းပဵၼ်လုၵ်ႈၸၢႆးၽူႈလႂ်၊ဝႃႈၼင်ႇၼႆဢေႃႈ။တႃႇဝိတ်ႉၵေႃႈၶိုၼ်းလၢတ်ႈလႄႈဝႃႈ၊-ၶႃႈၸဝ်ႈပဵၼ်လုၵ်ႈၸၢႆးၶႃႈၸဝ်ႈႁဝ်းယေႇသေႇ၊ၵူၼ်းဝဵင်းပႅတ်ႉလိႁႅမ်ႇၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။