၁၂
သမူၺ်ႇလလၢတ်ႈၵႂၢမ်းၼုၵ်ႉသၢၵ်ႈ
၁ သမူၺ်ႇလၵေႃႈလၢတ်ႈတီႈၵူၼ်းမဵဝ်းဢိသရေႇလတင်းသဵင်ႈတင်းလူင်လႄႈဝႃႈ၊-တူၺ်းလူး။ၵဝ်ထွမ်ႇဢဝ်ၵႂၢမ်းဢၼ်သူလၢတ်ႈတီႈၵဝ်ၵႃႈမီးၼၼ်ႉလႄႈယုၵ်ႉယွင်ႈၶုၼ်ႁေႃၶမ်းဝႆႉၵႃႈၼိူဝ်သူႇယဝ်ႉ။
၂ မိူဝ်ႈလဵဝ်ၼႆႉၶုၼ်ႁေႃၶမ်းၼၼ်ႉဢွၼ်ႁူဝ်သူယူႇဢေႃႈ။ၵဝ်ၸမ်းဢသၢၵ်ႈယႂ်ႇလႄႈၶူၼ်ႁူဝ်ႁွၵ်ႇယဝ်ႉ။လုၵ်ႈၸၢႆးၵဝ်တင်းလၢႆၵေႃႈမီးယူႇၵႃႈတီႈသူဢေႃႈ။ၵဝ်လႆႈဢွၼ်ႁူဝ်သူၸႃႉၸဵမ်မိူဝ်ႈဢၼ်ဢသၢၵ်ႈယင်းလဵၵ်ႉလႄႈတေႃႇထိုင်ႁွတ်ႈဝၼ်းမိူဝ်ႈၼႆႉယဝ်ႉ။
၃ ၵဝ်ယင်းမီးယူႇၵႃႈတီႈၼႆႉဢေႃႈ။ယူႇၽၢႆႇၼိုင်ႈတင်းၵဝ်သေလႄႈၶၢမ်ႇသၢၵ်ႈသေႇၵႃႈတီႈၽၢႆႇၼႃႈထႃႇဝရႃႉၽြႃးဢိၵ်ႇတင်းၵႃႈတီႈၽၢႆႇၼႃႈၵေႃႉဢၼ်လႆႈၶၢမ်ႇၽိၵ်ႈသိၵ်ႈၸဝ်ႈၼၼ်ႉတႃႉ။ၵဝ်ယၢမ်ႈတွၼ်ႉလႆႈဢဝ်ဝူဝ်းၽူႈလႂ်။ၵဝ်ယၢမ်ႈတွၼ်ႉလႆႈပႅတ်ႉလႆႈလႅၼ်ၽူႈလႂ်။ၵဝ်ယၢမ်ႈတွၼ်ႉလႆႈၼိၵ်ႈၸၢၵ်ႈငႅၼ်းသေးၽူႈလႂ်။ၵဝ်ယၢမ်ႈတွၼ်ႉဢိူတ်းမၢၵ်ႇတႃၵဝ်လႄႈၵိၼ်သူးၵိၼ်လၢပ်ႈၵႃႈတီႈမိုဝ်းၽူႈလႂ်။
၄ ပေႃးၵဝ်လႆႈႁဵတ်းၽိတ်းမႅၼ်ႈသေၸိူဝ်ႉသေပိူင်ၸိုင်ၵဝ်တၵ်းၶိုၼ်းတႅၼ်းပၼ်ဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ဢွၼ်ၵၼ်လဝ်ႈလၢတ်ႈလႄႈဝႃႈ၊-ၸဝ်ႈႁဝ်းၼႆႉဢမ်ႇပႅတ်ႉဢမ်ႇလႅၼ်ႁဝ်းၶႃႈ။ဢမ်ႇၼိၵ်ႈၸၢၵ်ႈငႅၼ်းသေးႁဝ်းၶႃႈ။ဢမ်ႇဢဝ်ၶူဝ်းလဵင်းၵႃႈၼႂ်းမိုဝ်းၽူႈလႂ်သေၵေႃႉသေၵူၼ်း၊ဝႃႈၼင်ႇၼႆဢေႃႈ။
၅ မၼ်းၵေႃႈလၢတ်ႈလႄႈဝႃႈ၊-ထႃႇဝရႃႉၽြႃးပဵၼ်သၢၵ်ႈသေႇၽၢႆႇၼိုင်ႈတင်းသူဢေႃႈ။ၵေႃႉဢၼ်လႆႈၶၢမ်ႇၽိၵ်ႈသိၵ်ႈၸဝ်ႈၼၼ်ႉၵေႃႈပဵၼ်သၢၵ်ႈသေႇၽၢႆႇၼိုင်ႈတင်းသူလွင်ႈဢၼ်သူဢမ်ႇထူပ်းဢမ်ႇႁၼ်ၶူဝ်းလဵင်းပိူၼ်ႈၵႃႈၼႂ်းမိုဝ်းၵဝ်ၼၼ်ႉဢေႃႈမိူဝ်ႈဢၼ်ဝႃႈၼင်ႇၼႆၸိုင်ၶဝ်ၼၼ်ႉဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊-မၼ်းၸဝ်ႈပဵၼ်သၢၵ်ႈသေႇၶႃႈဢေႃႈ၊ဝႃႈၼင်ႇၼႆဢေႃႈ။
၆ လၢႆးသမ်ႉသမူၺ်ႇလလၢတ်ႈတီႈၵူၼ်းတင်းလၢႆလႄႈဝႃႈ၊-မၼ်းၸဝ်ႈၼၼ်ႉပဵၼ်ထႃႇဝရႃႉၽြႃးဢၼ်ယုၵ်ႉယွင်ႈမုဝ်းသေႇဢိၵ်ႇတင်းဢႃႇရုၼ်ႇလႄႈဢဝ်ပူႇမွၼ်ႇသူဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉဢေႃႈ။
၇ မိူဝ်ႈလဵဝ်ၼႆႉသူဢွၼ်ၵၼ်ယူႇတဵတ်ႇတဵတ်ႇယဵၼ်ယဵၼ်တႃႉ။ၵဝ်တၵ်းတိူင်ႇပၢင်ႇလၢတ်ႈၸႃၵၼ်တင်းသူၵႃႈတီႈၽၢႆႇၼႃႈထႃႇဝရႃႉၽြႃးလူၺ်ႈလွင်ႈတၢင်းဢၼ်ထႃႇဝရႃႉၽြႃးႁဵတ်းတီႈသူတင်းပူႇမွၼ်ႇသူၸွမ်းၼင်ႇတြႃးၸိူဝ်းၼၼ်ႉဢေႃႈ။
၈ မိူဝ်ႈဢၼ်ယႃႇၵုပ်ႉႁွတ်ႈထိုင်ၵႃႈတီႈမိူင်းဢေႇၵႅပ်ႉတုၼၼ်ႉၸိုင်ပူႇမွၼ်ႇသူၸိူဝ်းၼၼ်ႉႁွင်ႉသႅၼ်ႇတီႈထႃႇဝရႃႉၽြႃးလႄႈထႃႇဝရႃႉၽြႃးပွႆႇၸႂ်ႉမုဝ်းသေႇဢိၵ်ႇတင်းဢႃႇရုၼ်ႇႁႂ်ႈၵႂႃႇၼုၵ်ႉဢဝ်ပူႇမွၼ်ႇသူၸိူဝ်းၼၼ်ႉဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးလႄႈၶျႃးတီႈယူႇပၼ်ၶဝ်ၵႃႈတီႈၼႆႉဢေႃႈ။
၉ ၵူၺ်းၵႃႈၶဝ်လူင်လိုမ်းထႃႇဝရႃႉၽြႃးၽြႃးပဵၼ်ၸဝ်ႈၶဝ်လႄႈမၼ်းၸဝ်ႈဢဝ်ၶဝ်ၶၢႆပၼ်ၵႃႈၼႂ်းမိုဝ်းသိသရၶုၼ်ပူဝ်ႇၶျူၵ်ႈႁႃႇၸေႃႇဢိၵ်ႇတင်းၵႃႈၼႂ်းမိုဝ်းၶုၼ်ႁေႃၶမ်းမေႃႇၽၼၼ်ႉသေယဝ်ႉ၊ၶဝ်ၼၼ်ႉဢွၼ်ၵၼ်တိုၵ်းတေႃးၶဝ်ဢေႃႈ။
၁၀ လၢႆးသမ်ႉၶဝ်ႁွင်ႉသႅၼ်ႇတီႈထႃႇဝရႃႉၽြႃးလႄႈလဝ်ႈလၢတ်ႈဝႃႈ၊-ၶႃႈၸဝ်ႈႁဝ်းၶဝ်ၽိတ်းပိူင်ႈၸဝ်ႈႁဝ်းၵွပ်ႈပိူဝ်ႈလႆႈၸုၼ်ႉပႅတ်ႈၸဝ်ႈႁဝ်းလႄႈႁဵတ်းဝၢတ်ႈတီႈၽြႃးပႃႇလဢိၵ်ႇတင်းၽြႃးဢႃႇသတရိၵ်ႉၼၼ်ႉၶႃႈယဝ်ႉ။ၼႂ်းဝႃႈၼၼ်သေၵေႃႈၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းၶဝ်လွတ်ႈဢွၵ်ႇသေၵႃႈၼႂ်းမိုဝ်းရၢၼ်ႇသူႇသေၵမ်းတီႈၶႃႈ။
၁၁ ႁဝ်းၶႃႈတၵ်းႁဵတ်းဝၢတ်ႈတီႈၸဝ်ႈႁဝ်းၶႃႈဢေႃႈ၊ဝႃႈၼင်ႇၼႆလႄႈထႃႇဝရႃႉၽြႃးပွႆႇၸႂ်ႉယေႇရုပပေႇလ၊ပေႇတၼ်ႇ၊ယေႇၽသ၊သမူၺ်ႇလၸိူဝ်းၼၼ်ႉသေလႄႈၼုၵ်ႉဢဝ်သူဢွၵ်ႇသေၵႃႈၼႂ်းမိုဝ်းရၢၼ်ႇသူႇဢၼ်လဵပ်ႈႁွပ်ႈသူဝႆႉၼၼ်ႉသေယဝ်ႉႁႂ်ႈသူလႆႈယူႇလူင်ႉလီလွတ်ႈလီဢေႃႈ။
၁၂ လိုၼ်းၼၼ်ႉမိူဝ်ႈဢၼ်သူႁၼ်ၼႃႇႁတ်ႉၶုၼ်ႁေႃၶမ်းၵူၼ်းမဵဝ်းဢမ်ႇမုၼ်ႇၶီႇသိုၵ်းမႃးၼၼ်ႉၸိုင်ပိၵ်ႉသမ်ႉထႃႇဝရႃႉၽြႃးၽြႃးပဵၼ်ၸဝ်ႈသူပဵၼ်ၶုၼ်ႁေႃၶမ်းသူယူႇသေၵေႃႈ၊သူယင်းလၢတ်ႈတီႈၵဝ်ဝႃႈ၊-ဢမ်ႇၸႂ်ႈၵူၺ်း။
၁၃ ႁဝ်းၶႃႈၶႂ်ႈလႆႈၶုၼ်ႁေႃၶမ်းဢၼ်တၵ်းဢုပ်ႉပိူင်ႇၼိူဝ်ႁဝ်းၶႃႈၶႃႈဢေႃႈ၊ဝႃႈၼင်ႇၼႆယဝ်ႉ။မိူဝ်ႈလဵဝ်ၼႆႉၸိုင်သူဢွၼ်ၵၼ်တူၺ်းၶုၼ်ႁေႃၶမ်းသူဢၼ်သူယွၼ်းဢဝ်လႄႈလိူၵ်ႈၵဵပ်းဢဝ်ၼၼ်ႉတႃႉ။တူၺ်းလူး။ထႃႇဝရႃႉၽြႃးယုၵ်ႉယွင်ႈၵေႃႉၼိုင်ႈဝႆႉႁႂ်ႈပဵၼ်ၶုၼ်ႁေႃၶမ်းၵႃႈၼိူဝ်သူယဝ်ႉ။
၁၄ ပေႃးသူၵူဝ်ႁႄထႃႇဝရႃႉၽြႃးလႄႈႁဵတ်းဝၢတ်ႈယူႇ၊ယင်းဢမ်ႇပူၼ်ႉလိူဝ်ပိင်းၺၢပ်ႈမၼ်းၸဝ်ႈလႄႈထွမ်ႇဢဝ်ၵႂၢမ်းမၼ်းၸဝ်ႈယူႇၸိုင်၊သူဢိၵ်ႇတင်းၶုၼ်ႁေႃၶမ်းဢၼ်ဢုပ်ႉပိူင်ႇသူၼၼ်ႉတၵ်းပဵၼ်ၵေႃႉဢၼ်ၸွမ်းလင်ထႃႇဝရႃႉၽြႃးၽြႃးပဵၼ်ၸဝ်ႈသူယူႇမၼ်ႈမၼ်ႈၶိူင်ႇၶိူင်ႇဢေႃႈ။
၁၅ ပေႃးဢမ်ႇၼၼ်ပေႃးသူဢမ်ႇထွမ်ႇဢဝ်ၵႂၢမ်းထႃႇဝရႃႉၽြႃးလႄႈပူၼ်ႉလိူဝ်ပိင်းၺၢပ်ႈထႃႇဝရႃႉၽြႃးၸိုင်မိုဝ်းထႃႇဝရႃႉၽြႃးၼၼ်ႉတၵ်းယူႇၽၢႆႇၼိုင်ႈတင်းသူမိူၼ်ၸိူဝ်ႉၼင်ႇဢၼ်ယူႇၽၢႆႇၼိုင်ႈတင်းပူႇမွၼ်ႇသူၸိူဝ်းၼၼ်ႉဢေႃႈ။
၁၆ မိူဝ်ႈလဵဝ်ၼႆႉယူႇၼိမ်ၼိမ်လီလီသေလႄႈလူတူၺ်းဢမူႉလူင်ဢၼ်ထႃႇဝရႃႉၽြႃးတၵ်းႁဵတ်းသိုဝ်ႈၼႃႈတႂ်ႈတႃႇသူၼၼ်ႉတႃႉ။
၁၇ ဝၼ်းမိူဝ်ႈၼႆႉပဵၼ်ၶိင်ႇဢၼ်ပၢတ်ႇၶဝ်ႈၵျုင်ႇဢမ်ႇၸႂ်ႈႁိုဝ်။ၵူၺ်းၵႃႈၵဝ်တၵ်းသူးတွင်းတီႈထႃႇဝရႃႉၽြႃးလႄႈမၼ်းၸဝ်ႈတၵ်းႁႂ်ႈၽူၼ်တူၵ်းတငႃ်းႉလင်ႊဢေႃႈ။ပိူဝ်ႈဢၼ်ပဵၼ်ၼင်ႇၼႆလႄႈသူတၵ်းႁၼ်လႄႈႁူႉသၢႆငၢႆလွင်ႈဢပျႅတ်ႈသူၼႂ်းတၢင်းဢၼ်သူယွၼ်းဢဝ်ၶုၼ်ႁေႃၶမ်းၼၼ်ႉပဵၼ်တၢင်းဢၼ်သူၽိတ်းပိူင်ႈမႅၼ်ႈၵႃႈတီႈၽၢႆႇၼႃႈထႃႇဝရႃႉၽြႃးၸိူဝ်ႉၼင်ႇႁိုဝ်ၼၼ်ႉဢေႃႈ၊
၁၈ ဝႃႈၼင်ႇၼႆသေယဝ်ႉ၊သမူၺ်ႇလသူးတွင်းတီႈထႃႇဝရႃႉၽြႃးလႄႈၼႂ်းဝၼ်းၼၼ်ႉထႃႇဝရႃႉၽြႃးႁႂ်ႈၽူၼ်တူၵ်းဢိၵ်ႇတငႃ်းႉလင်ႊလႄႈၵူၼ်းတင်းသဵင်ႈတင်းလူင်ဢွၼ်ၵၼ်ၵူဝ်ႁႄထႃႇဝရႃႉၽြႃးဢိၵ်ႇတင်းသမူၺ်ႇလၼႃႇလူင်လၢင်ဢေႃႈ။
၁၉ ၵူၼ်းတင်းသဵင်ႈတင်းလူင်ၵေႃႈဢွၼ်ၵၼ်တွင်းပၢၼ်ႇတီႈသမူၺ်ႇလလႄႈဝႃႈ၊-လွင်ႈၼင်ႇႁိုဝ်ႁဝ်းၶႃႈတၵ်းဢမ်ႇလႆႈတၢႆၸိုင်ၶႅၼ်းတေႃႈသူးတွင်းပုၼ်ႈႁဝ်းၶႃႈတီႈထႃႇဝရႃႉၽြႃးၽြႃးပဵၼ်ၸဝ်ႈၸဝ်ႈႁဝ်းသေၵမ်း။ႁဝ်းၶႃႈၼႆႉလႆႈထၢပ်ႈသႂ်ႇဢပျႅတ်ႈႁဝ်းၶႃႈၵႃႈၼႂ်းတၢင်းဢၼ်ယွၼ်းဢဝ်ၶုၼ်ႁေႃၶမ်းၼၼ်ႉၶႃႈယဝ်ႉ၊ဝႃႈၼင်ႇၼႆဢေႃႈ။
၂၀ သမူၺ်ႇလၵေႃႈလၢတ်ႈတီႈၵူၼ်းတင်းလၢႆလႄႈဝႃႈ၊-ယႃႇပေမႆႈၸႂ်။သူႁဵတ်းမႅၼ်ႈတူႉၸရိူၵ်ႈၵႃႈမီးၼႆႉသေၵေႃႈယႃႇပဝေႄႈပိူင်ႈသဵၼ်ႈတၢင်းဢၼ်ၸွမ်းလင်ထႃႇဝရႃႉၽြႃးၼၼ်ႉ။ပႃးတင်းႁူဝ်ၸႂ်သဵင်ႈသဵင်ႈမူတ်းမူတ်းသေလႄႈႁဵတ်းဝၢတ်ႈတီႈထႃႇဝရႃႉၽြႃးတႃႉ။
၂၁ ယႃႇပဝေႄႈပိူင်ႈသဵၼ်ႈတၢင်ႈလႄႈၸွမ်းလင်လွင်ႈတၢင်းဢၼ်ပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်၊ဢၼ်ဢမ်ႇႁဵတ်းၵျေးၸူး၊ဢၼ်ဢမ်ႇၵႄႇသႄႇၶျွတ်ႈဢဝ်လႆႈၸိူဝ်းၼၼ်ႉတႃႉ။
၂၂ လွင်ႈတၢင်းၸိူဝ်းၼၼ်ႉပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ဢေႃႈ။ထႃႇဝရႃႉၽြႃးထွၵ်ႈလူၺ်ႈၼႃႇမႃႉၸိုဝ်သဵင်မၼ်းၸဝ်ႈသေလႄႈဢမ်ႇၸုၼ်ႉပႅတ်ႈၵူၼ်းမၼ်းၸဝ်ႈ။မၼ်းၸဝ်ႈပဵၼ်ဢၼ်ထုၵ်ႇၸႂ်မႅၼ်ႈၸႂ်ႁႂ်ႈလႆႈၶၢၼ်းသူဝႆႉၼႂ်းဢရႃႇၵူၼ်းမၼ်းၸဝ်ႈဢေႃႈ။
၂၃ ပုၼ်ႈၵဝ်ၸမ်းႁႂ်ႈဢမူႉတၢင်းဢၼ်ၽိတ်းပိူင်ႈထႃႇဝရႃႉၽြႃးဢၼ်လိုမ်းသူးတွင်းပုၼ်ႈသူၼၼ်ႉယၢၼ်ၵႆၵၼ်တင်းၵဝ်သေၵမ်းလူၺ်ႈ။ၵဝ်တၵ်းသင်ႇသွၼ်သုင်းမႃႉသူသဵၼ်ႈတၢင်းဢၼ်လီဢၼ်ငၢမ်းသိုဝ်ႈတေႃႇၼၼ်ႉဢေႃႈ။
၂၄ ဢွၼ်ၵၼ်ရူဝ်ႇသေႇၵူဝ်ယမ်ထႃႇဝရႃႉၽြႃးလႄႈပႃးတင်းႁူဝ်ၸႂ်သဵင်ႈသဵင်ႈမူတ်းမူတ်းဢိၵ်ႇတင်းသႅတ်ႉၸႃႇသေလႄႈႁဵတ်းဝၢတ်ႈတီႈမၼ်းၸဝ်ႈတႃႉ။ဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်းလွင်ႈတၢင်းဢၼ်မၼ်းၸဝ်ႈႁဵတ်းပုၼ်ႈသူယႂ်ႇၼႃႇထၢၼ်ႇႁိုဝ်ၼၼ်ႉတႃႉ။
၂၅ ပေႃးသူယင်းထၢပ်ႈထႅင်ႈလႄႈႁဵတ်းတူႉၸရိူၵ်ႈယူႇၸိုင်သူဢိၵ်ႇတင်းၶုၼ်ႁေႃၶမ်းသူတၵ်းလႆႈႁွတ်ႈထိုင်တၢင်းလူႉတၢင်းလႅဝ်ဢေႃႈ၊ဝႃႈၼင်ႇၼႆဢေႃႈ။