၁၁
သေႃးလုၵႄႇသႄႇဢဝ်ဝဵင်းတႃႇပိတ်ႉ
၁ လိုၼ်းၼၼ်ႉၼႃႇႁတ်ႉ၊ၵူၼ်းမဵဝ်းဢမ်ႇမုၼ်ႇ၊ၶီႇသိုၵ်းမႃးလႄႈၶျႃးတပ်ႉၵႃႈတီႈႁိမ်းဝဵင်းယႃႇပိတ်ႉၵိလတ်ႉဢေႃႈ။ၵူၼ်းဝဵင်းယႃႇပိတ်ႉၵႃႈမီးၸိူဝ်းၼၼ်ႉဢွၼ်ၵၼ်လဝ်ႈလဝ်ႈလၢတ်ႈတီႈၶုၼ်ၼႃႇႁတ်ႉၼၼ်ႉလႄႈဝႃႈ၊-ႁဵတ်းမိၵ်ႉသႁႃႇယႃႉလူၺ်ႈၵၼ်တင်းႁဝ်းၶႃႈသေၵမ်းၶႃႈ။
၂ ႁဝ်းၶႃႈတၵ်းၶၢမ်ႇႁဵတ်းၶႃႈတီႈၸဝ်ႈႁဝ်းၶႃႈဢေႃႈ၊ဝႃႈၼင်ႇၼႆသေၵေႃႈ၊ၼႃႇႁတ်ႉ၊ၵူၼ်းမဵဝ်းဢမ်ႇမုၼ်ႇ၊ၼၼ်ႉၶိုၼ်းလၢတ်ႈတီႈၶဝ်လႄႈဝႃႈ၊-ပေႃးသူလႆႈၶွၵ်းဢွၵ်ႇမၢၵ်ႇတႃၶွၼ်ၶႂႃသူလႄႈႁဵတ်းႁႂ်ႈပဵၼ်တၢင်းဢၼ်သေႉသွမ်းတီႈမဵဝ်းဢိသရေႇလတင်းလၢႆၸင်ႇၵဝ်တၵ်းႁဵတ်းမိၵ်ႈသႁႃႇယႃႉလူၺ်ႈၵၼ်တင်းသူဢေႃႈ၊
၃ မိူဝ်ႈဢၼ်ဝႃႈၼင်ႇၼႆၸိုင်၊ၵူၼ်းဢၼ်ပဵၼ်ၵႄႇပဵၼ်ႁူဝ်ဝဵင်းယႃႇပိတ်ႉၸိူဝ်းၼၼ်ႉလဝ်ႈလၢတ်ႈလႄႈဝႃႈ၊-ၶႅၼ်းတေႃႈယိူၼ်ႉထႃႈယူႇၸဵတ်းဝၼ်း၊ႁႂ်ႈႁဝ်းၶႃႈလႆႈပွႆႇၸႂ်ႉတမၢၼ်ႇတင်းလၢႆၵႂႃႇၵႃႈၼႂ်းမိူင်းဢိသရေႇလၵူႈတီႈၵူႈလႅၼ်သေၵမ်းၶႃႈ။ပေႃးဢမ်ႇမီးၵေႃႉဢၼ်တၵ်းၵႄႇသႄႇဢဝ်ႁဝ်းၶႃႈလွတ်ႈၸိုင်ႁဝ်းၶႃႈတၵ်းဢၢပ်ႈပၼ်တီႈၶုၼ်၄ လူင်ၶႃႈဢေႃႈ၊ဝႃႈၼင်ႇၼႆဢေႃႈ။
၄ တမၢၼ်ႇၸိူဝ်းၼၼ်ႉႁွတ်ႈထိုင်ၵႃႈတီႈဝဵင်းၵိပႃႇ၊တီႈယူႇသေႃးလုၼၼ်ႉလႄႈဢဝ်ၵႂၢမ်းၸိူဝ်းၼၼ်ႉမွၵ်ႇလၢတ်ႈထိုင်ႁူၵူၼ်းတင်းလၢႆသေယဝ်ႉၵူၼ်းတင်းသဵင်ႈတင်းလူင်ၵေႃႈဢွၼ်ၵၼ်ၵိဝ်သဵင်သေလႄႈႁႆႈႁွင်ႉဢေႃႈ။
၅ မိူဝ်ႈၼၼ်ႉသေႃးလုၸွမ်းလင်ၽုင်ဝူဝ်းသေလႄႈလုၵ်ႉသေၵႃႈတီႈတူင်ႁႆႊတူင်ၼႃးႁွတ်ႈမႃးလႄႈမၼ်းထၢမ်ႇလႄႈဝႃႈ၊-ၵူၼ်းတင်းလၢႆႁႆႈႁွင်ႉၵွပ်ႈပိူဝ်ႈၸိူဝ်ႉၼင်ႇႁိုဝ်၊ဝႃႈၼင်ႇၼႆလႄႈၶဝ်ဢွၼ်ၵၼ်ဢဝ်ၵႂၢမ်းၵူၼ်းဝဵင်းယႃႇပိတ်ႉၸိူဝ်းၼၼ်ႉမွၵ်ႇလၢတ်ႈဢေႃႈ။
၆ မိူဝ်ႈဢၼ်သေႃးလုငိၼ်းၵႂၢမ်းၼၼ်ႉၸိုင်ဝိၺိၺ်ႇၽြႃးပဵၼ်ၸဝ်ႈတူၵ်းႁွတ်ႈၵႃႈၼိူဝ်မၼ်းႁႅင်းၼႃႇလူင်လၢင်လႄႈတၢင်းၸႂ်မႆႈၶႆႈၸႃႉမၼ်းဢွၵ်ႇႁႅင်းယႂ်ႇၼႃႇယူႇဢေႃႈ။
၇ မၼ်းဢဝ်ဝူဝ်းၵူႈၼိုင်ႈတႅပ်းၽၼ်းပဵၼ်ၵွၼ်ႈပဵၼ်မမ်ႈသေယဝ်ႉသႂ်ႇပၼ်ၵႃႈၼႂ်းမိုဝ်းတမၢၼ်ႇတင်းလၢႆၵႂႃႇသူင်ႇၵႃႈတီႈမဵဝ်းဢိသရေႇလၵူႈတီႈၵူႈလႅၼ်လႄႈႁႂ်ႈမွၵ်ႇလၢတ်ႈလႄႈဝႃႈ၊-ၽူႈလႂ်သေဢမ်ႇဝႃႈၵေႃႉဢၼ်ဢမ်ႇဢွၵ်ႇမႃးလႄႈၸွမ်းပႃႈလင်သေႃးလုဢိၵ်ႇတင်းသမူၺ်ႇလၼၼ်ႉဝူဝ်းၵေႃႉၼၼ်ႉတၵ်းလႆႈၶၢမ်ႇတၢင်းဢၼ်တႅပ်းၽၼ်းမိူၼ်ၸိူဝ်ႉၼင်ႇၼႆဢေႃႈ၊ဝႃႈၼင်ႇၼႆဢေႃႈ။တၢင်းဢၼ်ၵူဝ်ႁႄထႃႇဝရႃႉၽြႃးတူၵ်းႁွတ်ႈၵႃႈၼိူဝ်ၵူၼ်းတင်းလၢႆလႄႈၶဝ်ၽွမ်ႉၵၼ်ဢွၵ်ႇမႃးမိူၼ်ၸိူဝ်ႉၼင်ႇၵူၼ်းၵေႃႉလဵဝ်ဢေႃႈ။
၈ မၼ်းဢဝ်ၸရၢင်းၵူၼ်းၵႃႈတီႈဝဵင်းပေႇၸိၵ်ႉလႄႈမီးၵူၼ်းမဵဝ်းဢိသရေႇလသၢမ်သႅၼ်၊ၵူၼ်းမဵဝ်းယုတသၢမ်မိုၼ်ႈဢေႃႈ။
၉ ၶဝ်သင်ႇလၢတ်ႈတီႈတမၢၼ်ႇၸိူဝ်းၼၼ်ႉလႄႈဝႃႈ၊-သူမွၵ်ႇလၢတ်ႈတီႈၵူၼ်းဝဵင်းယႃႇပိတ်ႉၵိလတ်ႉၸိူဝ်းၼၼ်ႉလႄႈဝႃႈ၊-ဝၼ်းမိူဝ်ႈၽုၵ်ႈ၊မိူဝ်ႈဢၼ်ထိုင်ၶိင်ႇလႅတ်ႇမႆႈၼၼ်ႉသူတၵ်းလႆႈၵတ်းယဵၼ်ၶျၢမ်းသႃႇဢေႃႈ၊ဝႃႈၼင်ႇၼႆဢေႃႈ။တမၢၼ်ႇၸိူဝ်းၼၼ်ႉႁွတ်ႈထိုင်လႄႈမွၵ်ႇလၢတ်ႈတီႈၵူၼ်းဝဵင်းယႃႇပိတ်ႉၸိူဝ်းၼၼ်ႉလႄႈၶဝ်ၼၼ်ႉၸူမ်းသိူဝ်းၼႃႇဢေႃႈ။
၁၀ ပိူဝ်ႈၼႆလႄႈၵူၼ်းဝဵင်းယႃႇပိတ်ႉၸိူဝ်းၼၼ်ႉလဝ်ႈလၢတ်ႈတီႈၶုၼ်ၼႃႇႁတ်ႉလႄႈဝႃႈ၊-ဝၼ်းမိူဝ်ႈၽုၵ်ႈႁဝ်းၶႃႈတၵ်းဢွၵ်ႇၸူးၵႃႈတီႈၸဝ်ႈႁဝ်းလႄႈၸဝ်ႈႁဝ်းတၵ်းလႆႈႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းမီးဢလူဝ်ႇၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။
၁၁ ဝၼ်းမိူဝ်ႈၽုၵ်ႈသေႃးလုၽႄၵူၼ်းမၼ်းႁဵတ်းသၢမ်တပ်ႉသေယဝ်ႉၶဝ်ႈၸူးၵႃႈၼႂ်းမုၵ်ႉၸိူဝ်းရၢၼ်ႇသူႇၶိင်ႇၵၢင်ၼႂ်သေလႄႈတိုၵ်းတေႃးယႃႉပႅတ်ႈၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉတေႃႇထိုင်ႁွတ်ႈၶိင်ႇလႅတ်ႇမႆႈလႄႈၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉၽၢတ်ႇၽႄၵၼ်ၵႂႃႇတေႃႇထိုင်ႁွတ်ႈထၼ်ႈပေႃးသွင်ၵေႃႉဢမ်ႇလႆႈၸပ်းလႆႈႁူမ်ႈၵၼ်ဢေႃႈ။
၁၂ ၵူၼ်းတင်းလၢႆၵေႃႈဢွၼ်ၵၼ်လဝ်ႈလၢတ်ႈတီႈသမူၺ်ႇလလႄႈဝႃႈ၊-ၶဝ်ၸိူဝ်းဢၼ်လၢတ်ႈမႅၼ်ႈဝႃႈသေႃးလုတၵ်းလႆႈဢုပ်ႉပိူင်ႇႁဝ်းႁိုဝ်၊ဝႃႈၼင်ႇၼႆၼၼ်ႉပဵၼ်ၽူႈလႂ်။ႁွင်ႉဢဝ်ၶဝ်ၼၼ်ႉမႃးႁႂ်ႈႁဝ်းၶႃႈလႆႈဢဝ်ၶဝ်တၢႆပႅတ်ႈသေၵမ်း၊ဝႃႈၼင်ႇၼႆဢေႃႈ။
၁၃ သေႃးလုလၢတ်ႈဝႃႈ၊-ဝၼ်းမိူဝ်ႈၼႆႉထႃႇဝရႃႉၽြႃးႁဵတ်းတၢင်းဢၼ်ၵႄႇသႄႇၶျွတ်ႈဢဝ်ၼႂ်းမဵဝ်းဢိသရေႇလယဝ်ႉလႄႈတၵ်းဢမ်ႇလႆႈဢဝ်ၵူၼ်းတၢႆသေၵေႃႉသေၵူၼ်း။ဝႃႈၼင်ႇၼႆဢေႃႈ။
၁၄ သမူၺ်ႇလၵေႃႈလၢတ်ႈတီႈၵူၼ်းတင်းလၢႆလႄႈဝႃႈ၊-ဢွၼ်ၵၼ်ၵႂႃႇၵႃႈတီႈဝဵင်းၵိလၵႃႇလလႄႈသမ်ႉၶိုၼ်းမႄးၵုမ်းမႄးႁဵတ်းသိုင်ၸိုင်ႈဝၢၼ်ႈမိူင်းၸဝ်ႈတႃႉႁဝ်း၊ဝႃႈၼင်ႇၼႆသေယဝ်ႉၵူၼ်းတင်းသဵင်ႈတင်းလူင်ဢွၼ်ၵၼ်ၵႂႃႇၵႃႈတီႈဝဵင်းၵိလၵႃႇလလႄႈယုၵ်ႉယွင်ႈသေႃးလုဝႆႉၼႂ်းဢရႃႇၶုၼ်ႁေႃၶမ်းၵႃႈတီႈၽၢႆႇၼႃႈထႃႇဝရႃႉၽြႃးၵႃႈၼႂ်းဝဵင်းၵိလၵႃႇလၼၼ်ႉဢေႃႈ။
၁၅ ၵႃႈတီႈၼၼ်ႉၵေႃႈၶဝ်ဢွၼ်ၵၼ်ပုၵ်ႉၸေႃႇယိၸ်ႉမိၵ်ႈသႁႃယႃႉၵႃႈတီႈၽၢႆႇၼႃႈထႃႇဝရႃႉၽြႃးလႄႈသေႃးလုဢိၵ်ႇတင်းၵူၼ်းမဵဝ်းဢိသရေႇလၵႃႈမီးၸိူဝ်းၼၼ်ႉႁဵတ်းတၢင်းဢၼ်ၸူမ်းသိူဝ်းမူၼ်ႈပျေႃႇၼႃႇလူင်လၢင်ၵႃႈတီႈၼၼ်ႉဢေႃႈ။