Chapter
၇
သမူၺ်ႇလပႄႉၼႅင်ႇၵူၼ်းမဵဝ်းၽိလိပ်ႉတိ
၁ ၵူၼ်းဝဵင်းၵိရယတ်ႉယႃႇရိမ်ႇၸိူဝ်းၼၼ်ႉဢွၼ်ၵၼ်မႃးလႄႈဢဝ်တိူၵ်ႈပတိၺိၼ်ႇထႃႇဝရႃႉၽြႃးၵႂႃႇသေယဝ်ႉဝႆႉၵႃႈၼႂ်းႁိူၼ်းဢၽိၼတပ်ႉဢၼ်မီးၵႃႈတီႈၼိူဝ်လွႆၼၼ်ႉလႄႈဢၢပ်ႈပၼ်ႁႂ်ႈလုၵ်ႈၸၢႆးမၼ်းဢေႇလႃႇၸႃႇၼၼ်ႉပႂ်ႉတိူၵ်ႈပတိၺိၼ်ႇထႃႇဝရႃႉၽြႃးဢေႃႈ။
၂ တိူၵ်ႈပတိၺိၼ်ႇၸဝ်ႈၼၼ်ႉမီးယူႇၵႃႈတီႈဝဵင်းၵိရယတ်ႉယႃႇရိမ်ႇၼၼ်ႉႁိုင်သၢဝ်းပီႊတဵမ်တဵမ်လႄႈၵူၼ်းမဵဝ်းဢိသရေႇလတင်းသဵင်ႈတင်းလူင်ဢွၼ်ၵၼ်ၶၢင်းၶီၶၢင်းၽၢၼ်တေႃႇထႃႇဝရႃႉၽြႃးဢေႃႈ။
၃ လၢႆးသမ်ႉသမူၺ်ႇလသင်ႇသွၼ်သုင်းမႃႉတီႈၵူၼ်းဢိသရေႇလတင်းသဵင်ႈတင်းလူင်လႄႈဝႃႈ၊-ပေႃးသူပႃးတင်းႁူဝ်ၸႂ်သဵင်ႈသဵင်ႈလႄႈၶိုၼ်းမႃးၸူးတီႈထႃႇဝရႃႉၽြႃးၸိုင်ပႄႇပႅတ်ႈၽြႃးတၢင်ႇသူႇတၢင်ႇပႃးဢိၵ်ႇတင်းၽြႃးဢႃႇသတရိၵ်ႈတင်းလၢႆၼၼ်ႉသေၵႃႈတီႈသူလႄႈမႄးႁႅၼ်းႁူဝ်ၸႂ်သူပုၼ်ႈထႃႇဝရႃႉၽြႃးလႄႈႁဵတ်းဝၢတ်ႈတီႈမၼ်းၸဝ်ႈၼၼ်ႉၵူၺ်းသေၵမ်း။ပေႃးႁဵတ်းၸိူဝ်ႉၼင်ႇၼၼ်ၸိုင်မၼ်းၸဝ်ႈတၵ်းၵႄႇသႄႇဢဝ်သူဢွၵ်ႇသေၵႃႈၼႂ်းမိုဝ်းၵူၼ်းၽိလိတ်ႉတိၸိူဝ်းၼၼ်ႉဢေႃႈ၊ဝႃႈၼင်ႇၼႆဢေႃႈ။
၄ မဵဝ်းဢိသရေႇလတင်းလၢႆၵေႃႈဢွၼ်ၵၼ်ပႄႇပႅတ်ႈၽြႃးပႃႇလဢိၵ်ႇတင်းၽြႃးဢႃႇသတရိၵ်ႈၸိူဝ်းၼၼ်ႉသေယဝ်ႉႁဵတ်းဝၢတ်ႈတီႈထႃႇဝရႃႉၽြႃးၵူၺ်းဢေႃႈ။
၅ သမူၺ်ႇလၵေႃႈသင်ႇလၢတ်ႈလႄႈဝႃႈ၊-ႁႂ်ႈၵူၼ်းမဵဝ်းဢိသရေႇလတင်းသဵင်ႈတင်းလူင်ၸူႉၵၼ်တုမ်ၵၼ်ၵႃႈတီႈဝဵင်းမိၸပႃႇတႃႉ။ၵဝ်တၵ်းသူးတွင်းတီႈထႃႇဝရႃႉၽြႃးပုၼ်ႈသူဢေႃႈ၊ဝႃႈၼင်ႇၼႆလႄႈ၊ၶဝ်ၵေႃႈၸူႉၵၼ်တုမ်ၵၼ်ၵႃႈတီႈဝဵင်းမိၸပႃႇသေယဝ်ႉဢွၼ်ၵၼ်တဵၵ်းၼမ်ႉလႄႈသွၼ်းလေႃႇၵႃႈတီႈၽၢႆႇၼႃႈထႃႇဝရႃႉၽြႃးယူႇၵမ်တၢင်းၵိၼ်ယူႇသေလႄႈယိုၼ်ဢပျႅတ်ႈလႄႈဝႃႈႁဝ်းၶႃႈၼႆႉၽိတ်းပိူင်ႈထႃႇဝရႃႉၽြႃးၶႃႈယဝ်ႉဝႃႈၼင်ႇၼႆဢေႃႈ။
၆ သမူၺ်ႇလဢွၼ်ႁူဝ်ၵူၼ်းမဵဝ်းဢိသရေႇလတင်းလၢႆၵႃႈတီႈဝဵင်းမိၸပႃႇၼၼ်ႉဢေႃႈ။
၇ မိူဝ်ႈဢၼ်ၵူၼ်းၽိလိတ်ႉတိတင်းလၢႆငိၼ်းလွင်ႈဢၼ်ၵူၼ်းမဵဝ်းဢိသရေႇလၶဝ်ၸူႉၵၼ်တုမ်ၵၼ်ၵႃႈတီႈဝဵင်းမိၸပႃႇၼၼ်ႉၸိုင်ၶုၼ်ၽိလိတ်ႉတိၸိူဝ်းၼၼ်ႉၶီႇသိုၵ်းၸူးၵႃႈတီႈၵူၼ်းမဵဝ်းဢိသရေႇလတင်းလၢႆဢေႃႈ။ၵူၼ်းမဵဝ်းဢိသရေႇလတင်းလၢႆငိၼ်းလွင်ႈမၼ်းတၢင်းၼၼ်ႉသေယဝ်ႉၵူဝ်ႁႄၵူၼ်းၽိလိတ်ႉတိၸိူဝ်းၼၼ်ႉဢေႃႈ။
၈ ၵူၼ်းမဵဝ်းဢိသရေႇလတင်းလၢႆဢွၼ်ၵၼ်လၢတ်ႈတီႈသမူၺ်ႇလလႄႈဝႃႈ၊-ယင်းဢမ်ႇယူႇဢမ်ႇသဝ်းလႄႈသူးတွင်းတီႈထႃႇဝရႃႉၽြႃးၽြႃးပဵၼ်ၸဝ်ႈႁဝ်းၶႃႈပုၼ်ႈႁဝ်းၶႃႈႁႂ်ႈမၼ်းၸဝ်ႈၵႄႇသႄႇဢဝ်ႁဝ်းၶႃႈလွတ်ႈသေၵႃႈၼႂ်းမိုဝ်းၵူၼ်းၽိလိတ်ႉတိၸိူဝ်းၼၼ်ႉသေၵမ်း၊ဝႃႈၼင်ႇၼႆဢေႃႈ။
၉ သမူၺ်ႇလၵေႃႈဢဝ်သူဝ်းဢွၼ်ႇဢၼ်ၵိၼ်ၼူမ်းၼၼ်ႉသေလႄႈပုၵ်ႉၸေႃႇယိၸ်ႉဢၼ်တုတ်ႇၽႆးတီႈထႃႇဝရႃႉၽြႃးသေလႄႈသူးတွင်းတီႈထႃႇဝရႃႉၽြႃးပုၼ်ႈၵူၼ်းမဵဝ်းဢိသရေႇလဢေႃႈ။ထႃႇဝရႃႉၽြႃးထွမ်ႇဢဝ်တၢင်းသူးတွင်းမၼ်းဢေႃႈ။
၁၀ ၼႂ်းမိူဝ်ႈဢၼ်သမူၺ်ႇလယင်းတိုၵ်ႉပုၵ်ႉၸေႃႇယိၸ်ႉဢၼ်တုတ်ႇၽႆးယူႇၼၼ်ႉၸိုင်ၵူၼ်းၽိလိတ်ႉတိၸိူဝ်းၼၼ်ႉဢွၼ်ၵၼ်သုတ်ႉၸပ်းသုတ်ႉၸူးႁႂ်ႈလႆႈတိုၵ်းတေႃးမဵဝ်းဢိသရေႇလဢေႃႈ။ထႃႇဝရႃႉၽြႃးၵေႃႈႁႂႃ်ႈႉလင်ႊၵႃႈၼိူဝ်ၵူၼ်းၽိလိတ်ႉတိၸိူဝ်းၼၼ်ႉႁႅင်းယႂ်ႇၼႃႇလူင်လၢင်ၼႂ်းဝၼ်းၼၼ်ႉလႄႈၶဝ်ပဵၼ်တၢင်းဢၼ်ၵူဝ်ႁႄသၼ်ႇဝႆၼႃႇသေယဝ်ႉၶဝ်ၼၼ်ႉတူၵ်းသုမ်းၵႃႈတီႈၽၢႆႇၼႃႈမဵဝ်းဢိသရေႇလဢေႃႈ။
၁၁ ၵူၼ်းမဵဝ်းဢိသရေႇလတင်းလၢႆဢွၼ်ၵၼ်ဢွၵ်ႇသေၵႃႈၼႂ်းဝဵင်းမိၸပႃႇလႄႈလိုပ်ႇၸွမ်းလမ်းၸွမ်းၵူၼ်းၽိလိတ်ႉတိၸိူဝ်းၼၼ်ႉလႄႈတိုၵ်းတေႃးယႃႉပႅတ်ႈၶဝ်တေႃႇထိုင်ႁွတ်ႈဝဵင်းပိတ်ႉၵႃႇဢေႃႈ။
၁၂ မိူဝ်ႈၼၼ်ႉသမူၺ်ႇလဢဝ်မၢၵ်ႇႁိၼ်ပုၵ်းတင်ႈၵႃႈတီႈဝူင်ႈၵၢင်ဝဵင်းမိၸပႃႇတင်းဝဵင်းပိင်ႇသိၼ်ႇသေလႄႈႁွင်ႉႁိၵ်ႈၸိုဝ်ႈမၼ်းဝႃႈဢေႇပၼေႇၸႃႇလႄႈဝႃႈ၊-ထႃႇဝရႃႉၽြႃးၸွႆႈထႅမ်မႃႉၸႃႉတေႃႇထိုင်ႁွတ်ႈဝၼ်းမိူဝ်ႈၼႆႉယဝ်ႉ၊ဝႃႈၼင်ႇၼႆဢေႃႈ။
၁၃ ၼင်ႇၼၼ်လႄႈၵူၼ်းၽိလိတ်ႉတိၸိူဝ်းၼၼ်ႉတူၵ်းသုမ်းသေယဝ်ႉလိုၼ်းၼၼ်ႉဢမ်ႇၶဝ်ႈဢမ်ႇမႃးၵႃႈၼႂ်းၼမ်ႉၼႂ်းလိၼ်မဵဝ်းဢိသရေႇလလႄႈမိုဝ်းထႃႇဝရႃႉၽြႃးႁၢမ်ႈတပ်ႉႁႄႉၶႅၼ်ၵူၼ်းၽိလိတ်ႉတိၸိူဝ်းၼၼ်ႉယူႇၼႂ်းၸူဝ်ႈပၢၼ်သမူၺ်ႇလၼၼ်ႉဢေႃႈ။
၁၄ ဝၢၼ်ႈဝဵင်းဢၼ်ၵူၼ်းၽိလိတ်ႉတိၶဝ်လႆႈသိမ်းဢဝ်ၵႂႃႇသေၵႃႈတီႈမဵဝ်းဢိသရေႇလၸိူဝ်းၼၼ်ႉဢဝ်ပႃးဝဵင်းဢေႇၵုၼ်ႇတေႃႇထိုင်ႁွတ်ႈဝဵင်းၵႃႇသၼၼ်ႉၵူၼ်းမဵဝ်းဢိသရေႇလၶဝ်ၶိုၼ်းလႆႈတင်းသဵင်ႈဢေႃႈ။ဢိူင်ႇဝဵင်းၸိူဝ်းၼၼ်ႉၵေႃႈၵူၼ်းဢိသရေႇလတင်းလၢႆဢွၼ်ၵၼ်ၶိုၼ်းဢဝ်ဢွၵ်ႇသေၵႃႈၼႂ်းမိုဝ်းၵူၼ်းၽိလိတ်ႉတိၸိူဝ်းၼၼ်ႉဢေႃႈ။
၁၅ မိူဝ်ႈၼၼ်ႉသိုၵ်းထၢတ်ႇယဵၼ်သေၵႃႈၼႂ်းၵႄႈဝူင်ႈၵၢင်ၵူၼ်းမဵဝ်းဢိသရေႇလတင်းၵူၼ်းမဵဝ်းဢႃႇမေႃးရိၸိူဝ်းၼၼ်ႉဢေႃႈ။သမူၺ်ႇလဢွၼ်ႁူဝ်ၵူၼ်းမဵဝ်းဢိသရေႇလၸူဝ်ႈဢသၢၵ်ႈမၼ်းဢေႃႈ။
၁၆ ၵူႈပီႊၵူႈပီႊမၼ်းလႄႇလဵပ်ႈၵႂႃႇၵႃႈတီႈဝဵင်းပေႇသလ၊ဝဵင်းၵိလၵႃႇလ၊ဝဵင်းမိၸပႃႇ၊ၸိူဝ်းၼၼ်ႉလႄႈၸီႇယၢင်ႇဢမူႉၼိူဝ်ၵူၼ်းမဵဝ်းဢိသရေႇလၼႂ်းၵူႈတီႈၵူႈလႅၼ်ၸိူဝ်းၼၼ်ႉဢေႃႈ။
၁၇ မိူဝ်ႈဢၼ်မၼ်းၶိုၼ်းမႃးၼၼ်ႉၸိုင်မၼ်းၶိုၼ်ႈမႃးၵႃႈတီႈဝဵင်းရႃႇမၵွပ်ႈပိူဝ်ႈႁိူၼ်းမၼ်းမီးၵႃႈတီႈၼၼ်ႉလႄႈၸီႇယၢင်ႇဢမူႉမဵဝ်းဢိသရေႇလၵႃႈတီႈၼၼ်ႉလႄႈတႄႇႁဵတ်းယိၸ်ႉပလၢင်ႇပုၼ်ႈထႃႇဝရႃႉၽြႃးၵႃႈတီႈၼၼ်ႉဢေႃႈ။