Chapter
၂
တၢင်းသူးတွင်းႁၼ်ႇၼ
၁ လၢႆးသမ်ႉႁၼ်ႇၼဢွၵ်ႇသူပ်းသူးတွင်းပထၼႃႇလႄႈဝႃႈၸမ်း၊-ႁူဝ်ၸႂ်ၶႃႈၸဝ်ႈမီးတၢင်းဢၼ်သႂၢင်ႇသိူဝ်းယူႇၼႂ်းထႃႇဝရႃႉၽြႃးဢေႃႈ။သူပ်းၶႃႈၸဝ်ႈလၢတ်ႈၵႂၢမ်းဢၼ်ဢုပ်ႇဝၢဝ်းၵႃႈၼိူဝ်ရၢၼ်ႇသူႇၶႃႈၸဝ်ႈတင်းလၢႆယူႇၵွပ်ႈပိူဝ်ႈဢၼ်ၶႃႈၸဝ်ႈၸူမ်းသိူဝ်းမူၼ်ႈပျေႃႇၼႂ်းၵျေးၸူးတၢင်းဢၼ်ၸဝ်ႈႁဝ်းၵႄႇၶျွတ်ႈဢဝ်ၼၼ်ႉၶႃႈဢေႃႈ။
၂ ၽူႈလႂ်ဢမ်ႇမူတ်းၸၢင်ႇမိူၼ်ၸိူဝ်ႉၼင်ႇထႃႇဝရႃႉၽြႃးမူတ်းၸၢင်ႇၼၼ်ႉတီႈၶႃႈ။ၼွၵ်ႈသေၸဝ်ႈႁဝ်းၼႆႉၽြႃးတၢင်ႇသူႇတၢင်ႇပႃးဢမ်ႇမီးတီႈၶႃႈ။မၢၵ်ႇႁိၼ်မၢၵ်ႇၽႃတီႈဢၼ်သွၼ်ႈပိုင်ႈဢၼ်မိူၼ်ၸိူဝ်ႉၼင်ႇၽြႃးပဵၼ်ၸဝ်ႈႁဝ်းၶႃႈဢမ်ႇမီးတီႈၶႃႈ။
၃ ယႃႇပေလၢတ်ႈၵႂၢမ်းဢၼ်ဢုပ်ႇဢၢတ်ႇမူင်မႅၼ်လႃးလႃးသေၵမ်း။ယႃႇပေႁႂ်ႈၵႂၢမ်းဢၼ်သေႉသွမ်းလူလၢႆဢွၵ်ႇၵႃႈၼႂ်းသူပ်းလႃးလႃးသေၵမ်း။လွင်ႈမၼ်းၸမ်းထႃႇဝရႃႉၽြႃးပဵၼ်ၽြႃးဢၼ်ႁူႉတင်းသဵင်ႈဢေႃႈ။မၼ်းၸဝ်ႈၸင်တူၺ်းႁိဝ်ႈတူၺ်းတၢင်းၵမ်တၢင်းၵျၢင်ႉတင်းလၢႆဢေႃႈ။
၄ ပိုၼ်ၵၢင်ႇဢၼ်ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇယိပ်းၵမ်ၼၼ်ႉလႆႈၶၢမ်ႇတၢင်းဢၼ်ႁၵ်းပႅတ်ႈလႄႈၶဝ်ၸိူဝ်းဢၼ်ၸၢင်ႊလူမ်ႉၼၼ်ႉမီးတၢင်းဢၼ်ဢဝ်ႁႅင်းတၼ်းၶူဝ်းႁတ်ႉဢႅဝ်ယူႇဢေႃႈ။
၅ ၶဝ်ၸိူဝ်းဢၼ်ၵိၼ်ဢိမ်ႇၵိၼ်တဵမ်ၼၼ်ႉလႆႈႁဵတ်းၵူၼ်းၵိၼ်ၸၢင်ႈၵိၼ်ငႃးႁႂ်ႈလႆႈတၢင်းၵိၼ်လႄႈၶဝ်ၸိူဝ်းဢၼ်ဢိုပ်းယၢၵ်ႈၼၼ်ႉလႆႈဢွၼ်ၵၼ်ဢိမ်ႇတဵမ်တီႈဢေႃႈ။ၵေႃႉဢၼ်မၼ်းဢမ်ႇမီးလုၵ်ႈၼၼ်ႉလႆႈၵိူတ်ႇလဵင်ႉမႃးၸဵတ်းၵေႃႉလႄႈၵေႃႉဢၼ်လုၵ်ႈလၢင်းၼမ်ၼႃႇၼၼ်ႉလႆႈႁႅင်းဢူၼ်ႈႁႅင်းယွမ်းဢေႃႈ။
၆ ထႃႇဝရႃႉၽြႃးပိူင်ႇဢမူႉဢၼ်တၢႆပိူင်ႇဢမူႉဢၼ်ဢသၢၵ်ႈလိပ်းလႄႈမၼ်းၸဝ်ႈပိူင်ႇဢမူႉဢၼ်ၶျႃးတူၵ်းၵႃႈတီႈမိူင်းမရၼ၊ပိူင်ႇဢမူႉဢၼ်ႁႂ်ႈလုၵ်ႉၶိုၼ်းဢေႃႈ။
၇ ထႃႇဝရႃႉၽြႃးပိူင်ႇႁဵတ်းႁႂ်ႈယၢၵ်ႈၽၢၼ်ပိူင်ႇႁဵတ်းႁႂ်ႈမၢၵ်ႈမီးလႄႈမၼ်းၸဝ်ႈပိူင်ႇဢမူႉဢၼ်ၶျႃးတူၵ်းတီႈတႅမ်ႇဢမူႉဢၼ်ယုၵ်ႉယွင်ႈၵေႃႉဢၼ်ယၢၵ်ႈဢၼ်ၽၢၼ်သေၵႃႈၼႂ်းမုၼ်ႈလိၼ်ဢိၵ်ႇတင်းၵေႃႉဢိုပ်းယၢၵ်ႈသေၵႃႈၼႂ်းၵွင်ၶီႈဝူဝ်းလႄႈမၼ်းၸဝ်ႈပၼ်ဢၶႂၢင်ႉဢၼ်ၼင်ႈလူၺ်ႈၵၼ်တင်းလုၵ်ႈၶုၼ်တင်းလၢႆ၊ဢၶႂၢင်ႉဢၼ်လႆႈၶၢမ်ႇဢမူၺ်ႇပလၢင်ႇဢၼ်မုၼ်ၽုင်းယႂ်ႇၼၼ်ႉဢေႃႈ။
၈ လွင်ႈမၼ်းၸမ်းထႃႇဝရႃႉၽြႃးပိူင်ႇသဝ်လိၼ်မိူင်းတင်းလၢႆလႄႈမၼ်းၸဝ်ႈတႄႇႁဵတ်းလေႃးၵထၢတ်ႈၵႃႈၼိူဝ်သဝ်ၸိူဝ်းၼၼ်ႉဢေႃႈ။မၼ်းၸဝ်ႈတၵ်းၸွႆႈထႅမ်မႃႉၸႃႉတိၼ်ၶဝ်ၸိူဝ်းဢၼ်မူတ်းၸၢင်ႇၼၼ်ႉလႄႈၶဝ်ၸိူဝ်းဢၼ်ဢမ်ႇတြႃးၼၼ်ႉၸမ်းတၵ်းလႆႈတဵတ်ႇယဵၼ်ယူႇၵႃႈတီႈၼႂ်းလပ်းသိင်ႇဢေႃႈ။
၉ ၵွပ်ႈပိူဝ်ႈတၢင်းၵတ်ႉတၢင်းၶၼ်တူဝ်ၸဝ်ႈၵဝ်ႇၼၼ်ႉၽူႈလႂ်ဢမ်ႇပႄႉၼႅင်ႇလႆႈတီႈၶႃႈ။
၁၀ ၶဝ်ၸိူဝ်းဢၼ်ၶတ်းၶဵင်ႇႁႅင်းတႃႉထႃႇဝရႃႉၽြႃးၼၼ်ႉတၵ်းလႆႈၶၢမ်ႇတၢင်းဢၼ်ႁၵ်းႁိၵ်းမၢၵ်ႇမိူဝ်ၵႂႃႇဢေႃႈ။မၼ်းၸဝ်ႈတၵ်းႁႂႃ်ႈႉလင်သေၵႃႈၼိူဝႃ်ႉၵၢင်ႁၢဝ်တေႃႇၶဝ်ဢေႃႈ။ထႃႇဝရႃႉၽြႃးတၵ်းၸီႇယၢင်ႇတြႃးတေႃႇထိုင်ႁွတ်ႈတီႈသုတ်းလိၼ်မိူင်းဢေႃႈ။မၼ်းၸဝ်ႈတၵ်းႁႂ်ႈၶုၼ်ႁေႃၶမ်းဢၼ်မၼ်းၸဝ်ႈၶၢၼ်းဝႆႉၼၼ်ႉတဵမ်ဝႆႉတင်းဢဵၼ်ႁႅင်းလႄႈယုၵ်ႉယွင်ႈၶဝ်လႅမ်ၵေႃႉဢၼ်ၶၢမ်ႇၽိၵ်ႈသိၵ်ႈဢၼ်မၼ်းၸဝ်ႈပၼ်ၼၼ်ႉဢေႃႈ၊ဝႃႈၼင်ႇၼႆဢေႃႈ။
၁၁ လိုၼ်းၼၼ်ႉဢေႇလၵႃႇၼၶိုၼ်းမိူဝ်းၵႂႃႇၸူးၵႃႈတီႈႁိူၼ်းမၼ်းၵႃႈတီႈဝဵင်းရႃႇမၼၼ်ႉဢေႃႈ။လုၵ်ႈဢွၼ်ႇၼၼ်ႉၸမ်းႁဵတ်းဝၢတ်ႈပွင်ဢမူႉထႃႇဝရႃႉၽြႃးၵႃႈတီႈၽၢႆႇၼႃႈယိတ်ႉပရေႃးႁိၵ်ႈဢေးလိၼၼ်ႉယူႇဢေႃႈ။
လုၵ်ႈၸႆးဢေးလိဢၼ်ႁၢႆႉမိူၵ်ႈ
၁၂ လုၵ်ႈၸၢႆးဢေးလိၸိူဝ်းၼၼ်ႉပဵၼ်ၵူၼ်းဢႃႉထမ်ႇမႃႉလႄႈဢမ်ႇႁူႉထႃႇဝရႃႉၽြႃး။ထုင်းၸၢမ်ႇဢၼ်ယိတ်ႉပရေႃးႁိၵ်ႈလႆႈႁဵတ်းၼႂ်းၵူၼ်းတင်းလၢႆၸမ်းယၢမ်းမိူဝ်ႈဢၼ်သေၵေႃႉသေၵူၼ်းပုၵ်ႉၸေႃႇယိၸ်ႉလႄႈယင်းတိုၵ်ႉတူမ်ႈၼိူဝ်ႉယူႇၼၼ်ႉၸိုင်ၵူၼ်းၸႂ်ႉၵူၼ်းသွႆယိတ်ႉပရေႃးႁိၵ်ႈၵေႃႉၼိုင်ႈ
၁၃ တၵ်းယိပ်းၵမ်ဢဝ်ၶေႃၵွင်ႉၼိူဝ်ႉဢၼ်မီးသၢမ်ငႅမ်ႈၼၼ်ႉသေလႄႈသေႇတမ်သႂ်ႇၵႃႈၼႂ်းမေႃႈၶၢင်၊မေႃႈမႅၼ်၊မေႃႈလူင်၊မေႃႈဢွၼ်ႇလႄႈၵႃႈဢၼ်ၸပ်းပႃးမႃးတီႈၶေႃၵွင်ႉၼိူဝ်ႉၸိူဝ်းၼၼ်ႉယိတ်ႉပရေႃးႁိၵ်ႈသိမ်းဢဝ်ပုၼ်ႈတူဝ်ၸဝ်ႈၵဝ်ႇဢေႃႈ။
၁၄ ၸွမ်းၼင်ႇၼၼ်လႄႈၶဝ်ဢွၼ်ၵၼ်ႁဵတ်းၵႃႈၼႂ်းဝဵင်းသိလေႃႇတီႈၵူၼ်းမဵဝ်းဢိသရေႇလဢၼ်ႁွတ်ႈမႃးၵႃႈတီႈၼၼ်ႉဢေႃႈ။
၁၅ ၵူၺ်းၵႃႈၸူဝ်ႈဢၼ်ၶဝ်ယင်းဢမ်ႇပႆႇဢဝ်ၵွၼ်ႈၶႆၵွၼ်ႈမၼ်းတုတ်ႇၽႆးၼၼ်ႉၵူၼ်းၸႂ်ႉၵူၼ်းသွႆယိတ်ႉပရေႃးႁိၵ်ႈမႃးလႄႈလၢတ်ႈတီႈၵေႃႉဢၼ်ပုၵ်ႉၸေႃႇယိၸ်ႉၼၼ်ႉလႄႈဝႃႈ၊-ပၼ်ၼိူဝ်ႉပုၼ်ႈဢၼ်တၵ်းပဵၼ်ပုၼ်ႈယိတ်ႉပရေႃးႁိၵ်ႈသေၵမ်း။မၼ်းဢမ်ႇဢဝ်ၼိူဝ်ႉဢၼ်တူမ်ႈယဝ်ႉၼၼ်ႉ။
၁၆ မၼ်းတၵ်းဢဝ်ၼိူဝ်ႉဢၼ်လိပ်းၵူၺ်းဢေႃႈ၊ဝႃႈၼင်ႇၼႆဢေႃႈ။ပေႃးၵေႃႉၼၼ်ႉလၢတ်ႈဝႃႈ၊-ႁႂ်ႈလႆႈဢဝ်ၵွၼ်ႈၶႆၵွၼ်ႈမၼ်းတုတ်ႇၽႆးဢွၼ်တၢင်းလူးၵွၼ်ႇသေၵမ်း၊ဝႃႈၼင်ႇၼႆၸိုင်မၼ်းၼၼ်ႉတၵ်းၶိုၼ်းလၢတ်ႈလႄႈဝႃႈ၊-ဢမ်ႇၸႂ်ႈၵူၺ်း၊တၵ်းလႆႈပၼ်တီႈၵဝ်မိူဝ်ႈလဵဝ်ၼႆႉဢေႃႈ။
၁၇ ပေႃးဢမ်ႇၼၼ်ၵဝ်တၵ်းႁဵတ်းဢႃႉထမ်ႇမႃႉႁိမ်ဢဝ်ဢေႃႈ၊ဝႃႈၼင်ႇၼႆဢေႃႈ။ဢပျႅတ်ႈၵူၼ်းၼုမ်ႇၵူၼ်းၵမ်ၸိူဝ်းၼၼ်ႉယႂ်ႇၼႃႇလူင်လၢင်ၵႃႈတီႈၽၢႆႇၼႃႈထႃႇဝရႃႉၽြႃးၵွပ်ႈပိူဝ်ႈဢၼ်ၶဝ်ႁဵတ်းႁႂ်ႈတၢင်းပုၵ်ႉၸေႃႇၵူၼ်းတင်းလၢႆလီႁင်ႈဢဵတ်ႇသဵတ်ႇဢေႃႈ။
၁၈ သမူၺ်ႇလဢၼ်ပဵၼ်လုၵ်ႈဢွၼ်ႇၼၼ်ႉၼုင်ႈသိူဝ်ႈသုပ်းပိၵ်ႉသေလႄႈပွင်ႁဵတ်းဢမူႉၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။
၁၉ မေႈမၼ်းယိပ်းသိူဝ်ႈယၢဝ်းဢွၼ်ႇပုၼ်ႈမၼ်းသေလႄႈဢဝ်မႃးတီႈမၼ်းၵူႈပီႊၵူႈပီႊမိူဝ်ႈဢၼ်ပေႃႈမေႈမၼ်းၶိုၼ်ႈၸူးႁႂ်ႈလႆႈပုၵ်ႉၸေႃႇယိၸ်ႉၵႃႈတီႈၼၼ်ႉဢေႃႈ။မီးၽဝ်ႇၼိုင်ႈဢေးလိပၼ်တၢင်းလီတီႈဢေႇလၵႃႇၼသွင်ၶႃၽူဝ်မေးလႄႈဝႃႈ၊-
၂၀ ႁႂ်ႈထႃႇဝရႃႉၽြႃးပၼ်လုၵ်ႈလၢင်းတီႈမႂ်းၵႃႈၼႂ်းမေႈယိင်းၼႆႉႁႂ်ႈလႆႈတၢင်တူဝ်လုၵ်ႈၸၢႆးဢၼ်သူးတွင်းယွၼ်းဢဝ်လႆႈမႃးလႄႈသမ်ႉဢဝ်ဢၢပ်ႈပၼ်တီႈထႃႇဝရႃႉၽြႃးၼၼ်ႉသေၵမ်းလူၺ်ႈဝႃႈၼင်ႇၼႆဢေႃႈ။သွင်ၶႃၼၼ်ႉၶိုၼ်မိူဝ်းၵႂႃႇၸူးၵႃႈတီႈႁိူၼ်းတီႈယူႇသွင်ၶႃၼၼ်ႉဢေႃႈ။
၂၁ ထႃႇဝရႃႉၽြႃးမႃးလူမႃးတူၺ်းႁၼ်ႇၼသေယဝ်ႉမၼ်းသမ်ႉပႃးပတိၵ်ႉသၼ်ႇထေႇသေလႄႈၵိူတ်ႇလဵင်ႉလုၵ်ႈၸၢႆးသၢမ်ၵေႃႉ၊လုၵ်ႈယိင်းသွင်ၵေႃႉဢေႃႈ။လုၵ်ႈဢွၼ်ဢၼ်ဝႃႈသမူၺ်ႇလၼၼ်ႉယႂ်ႇသုင်မႃးၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။
၂၂ ဢေးလိထဝ်ႈၵႄႇၼႃႇသေယဝ်ႉႁူႉငိၼ်းလွင်ႈၵႃႈဢၼ်လုၵ်ႈမၼ်းတင်းလၢႆႁဵတ်းတီႈၵူၼ်းဢိသရေႇလတင်းသဵင်ႈတင်းလူင်ဢိၵ်ႇတင်းလွင်ႈဢၼ်ၶဝ်ၽိတ်းပိူင်ႈမေႈယိင်းဢၼ်ပႂ်ႉၵႃႈတီႈႁိမ်းၽၵ်းတူသုမ်ႉထဵင်ၸဝ်ႈၼၼ်ႉၸိုင်မၼ်းသင်ႇသွၼ်သုင်းမႃႉၶဝ်လႄႈဝႃႈ၊-ၵွပ်ႈပိူဝ်ႈသင်လႄႈသူႁဵတ်းၸိူဝ်ႉၼင်ႇၼႆ။
၂၃ တူႉၸရိူၵ်ႈဢၼ်သူႁဵတ်းတင်းလၢႆၼၼ်ႉၵူၼ်းတင်းသဵင်ႈတင်းလူင်လၢတ်ႈၼႄၵဝ်လႄႈၵဝ်လႆႈငိၼ်းဢေႃႈ။ဢမ်ႇလီၵူၺ်း။လုၵ်ႈၸၢႆးၵဝ်ၶဝ်ဢိူၺ်း။
၂၄ သတၢင်းသဵင်ၶၢဝ်ႇဢၼ်ၸွတ်ႇၸႅတ်ႇၵႂႃႇၵႃႈၼႂ်းၵူၼ်းၽြႃးပဵၼ်ၸဝ်ႈဢၼ်ၵဝ်လႆႈငိၼ်းၼၼ်ႉပဵၼ်သတၢင်းဢၼ်လီဢမ်ႇၸႂ်ႈ။ပေႃးၵူၼ်းၼင်ႇၵၼ်ၵေႃႉၼိုင်ႈလႄႈၵေႃႉၼိုင်ႈၽိတ်းပိူင်ႈၵၼ်ၸိုင်ၽြႃးပဵၼ်ၸဝ်ႈတၵ်းႁႂ်ႈထုၵ်ႇမႅၼ်ႈၵၼ်ၶိုၼ်းယူႇဢေႃႈ။
၂၅ ပေႃးၵူၼ်းၽိတ်းပိူင်ႈၽြႃးပဵၼ်ၸဝ်ႈၸိုင်ၽူႈလႂ်တၵ်းတွင်းပၢၼ်ႇပုၼ်ႈမၼ်း၊ဝႃႈၼင်ႇၼႆသေၵေႃႈၶဝ်ဢမ်ႇထွမ်ႇဢမ်ႇဢဝ်ၵႂၢမ်းပေႃႈၶဝ်။
၂၆ လွင်ႈမၼ်းၸမ်းထႃႇဝရႃႉၽြႃးမီးဢလူဝ်ႇႁႂ်ႈလႆႈဢဝ်ၶဝ်တၢႆဢေႃႈ။သမူၺ်ႇလဢၼ်ပဵၼ်လုၵ်ႈဢွၼ်ႇၼၼ်ႉယႂ်ႇသုင်မႃးယူႇသေလႄႈလႆႈၼႃႈလႆႈတႃၵႃႈတီႈၽၢႆႇၼႃႈထႃႇဝရႃႉၽြႃးဢိၵ်ႇတင်းၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။
ႁဵတ်းပရေႃးၽႅတ်ႈလွင်ႈၼႃႈႁိူၼ်းဢေးလိ
၂၇ ၵူၼ်းၽြႃးပဵၼ်ၸဝ်ႈၵေႃႉၼိုင်ႈမႃးၵႃႈတီႈဢေးလိလႄႈလၢတ်ႈဝႃႈ၊-ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၵဝ်ပေႃႇမႃးတီႈမဵဝ်းပေႃႈမႂ်းဢၼ်လႆႈယူႇၼႂ်းမိူင်းဢေႇၵႅပ်ႉတုတီႈၶုၼ်ႁေႃၶမ်းၽႃႇရေႃးၼၼ်ႉဢမ်ႇၸႂ်ႈႁိုဝ်။
၂၈ ၵဝ်လိူၵ်ႈၵဵပ်းဢဝ်မၼ်းၵႃႈၼႂ်းမဵဝ်းဢိသရေႇလတင်းလၢႆႁႂ်ႈမၼ်းလႆႈပဵၼ်ယိတ်ႉပရေႃးႁိၵ်ႈၵဝ်ဢၼ်လႆႈပႂ်ႉဢမူႉတၢင်းဢၼ်ပုၵ်ႉၸေႃႇၵႃႈၼိူဝ်ယိၸ်ႉပလၢင်ႇၵဝ်တၢင်းဢၼ်တုတ်ႇၽႆးၼၢမ်ႇသႃႇတၢင်းဢၼ်ၼုင်ႈသိူဝ်ႈသုပ်းၵႃႈတီႈၽၢႆႇၼႃႈၵဝ်ဢမ်ႇၸႂ်ႈႁိုဝ်။
၂၉ ၵဝ်ဢဝ်ၶိူင်ႈပုၵ်ႉၸေႃႇဢၼ်ၵူၼ်းမဵဝ်းဢိသရေႇလတင်းလၢႆဢဝ်တင်းၽႆးႁဵတ်းၵႃႈမီးၼၼ်ႉပၼ်တီႈမဵဝ်းပေႃႈမႂ်းဢမ်ႇၸႂ်ႈႁိုဝ်။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူဢဝ်တိၼ်ထိပ်ႇၵဝ်ဢိၵ်ႇတင်းၶိူင်ႈပုၵ်ႉၸေႃႇၵဝ်ဢၼ်ၵဝ်ၸီႇယၢင်ႇဝႆႉၵႃႈတီႈႁိူၼ်းတီႈယူႇၵဝ်ၼၼ်ႉ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းယုၵ်ႉယွင်ႈလုၵ်ႈၸၢႆးမႂ်းတင်းလၢႆလိူဝ်တွၼ်းၼႃႇသေၵဝ်ထၼ်ႈပေႃးပီးလီမၼ်းလီလူၺ်ႈတၢင်းပုၵ်ႉၸေႃႇဢၼ်လီသေပိူၼ်ႈၼႂ်းၶိူင်ႈပုၵ်ႉၸေႃႇဢၼ်ၵူၼ်းမဵဝ်းဢိသရေႇလၵဝ်တင်းလၢႆလူႇတၢၼ်း၊ဝႃႈၼင်ႇၼႆဢေႃႈ။
၃၀ ၵွပ်ႈပိူဝ်ႈၸိူဝ်ႉၼင်ႇၼၼ်လႄႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉလႄႈဝႃႈ၊-ပိၵ်ႉသမ်ႉၵဝ်လႆႈဝႃႈမဵဝ်းၸိူဝ်ႉၶိူဝ်းမႂ်း၊မဵဝ်းၸိူဝ်ႉၶိူဝ်းပေႃႈမႂ်းၼၼ်ႉတၵ်းလႆႈယူႇၵႃႈတီႈၽၢႆႇၼႃႈၵဝ်ယူႇတႃႇသေႇဢေႃႈ၊ဝႃႈၼင်ႇၼႆသေၵေႃႈ၊လၢႆးသမ်ႉထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ႁႂ်ႈၵတိၼၼ်ႉၵႆၵၼ်တင်းၵဝ်သေ။ၵဝ်တၵ်းယုၵ်ႉယွင်ႈၶဝ်ၸိူဝ်းဢၼ်ယုၵ်ႉယွင်ႈၵဝ်ၼၼ်ႉဢေႃႈ။ၶဝ်ၸိူဝ်းဢၼ်ႁဵတ်းဢမ်ႇပေႃးၼင်ႇႁိုဝ်တီႈၵဝ်ၼၼ်ႉတၵ်းလႆႈၶၢမ်ႇတၢင်းဢၼ်မူၼ်ႈၵုင်ႇသရေႇလူႉဢေႃႈ။
၃၁ တူၺ်းလူ။ၶိင်ႇမိူဝ်ႈဝၼ်းဢၼ်ၵဝ်တၵ်းႁဵတ်းႁႂ်ႈဢဵၼ်ႁႅင်းမႂ်းဢဵၼ်ႁႅင်းမဵဝ်းၸိူဝ်ႉၶိူဝ်းပေႃႈမႂ်းသုတ်းတိူၵ်ႉၼၼ်ႉႁွတ်ႈထိုင်မႃးယဝ်ႉ။မႂ်းတၵ်းလႆႈႁၼ်ၽေးဢူးပၢတ်ႈႁွတ်ႈထိုင်ၵႃႈၼိူဝ်ႁိူၼ်းမႂ်းဢေႃႈ။
၃၂ ပိၵ်ႉသမ်ႉၵဝ်ႁဵတ်းတၢင်းဢၼ်လီၼႂ်းမဵဝ်းဢိသရေႇလၼၼ်ႉသေၵေႃႈ၊ၵႃႈၼႂ်းမဵဝ်းၸိူဝ်ႉၶိူဝ်းမႂ်းၼၼ်ႉတၵ်းဢမ်ႇလႆႈမီးၵေႃႉဢၼ်ထဝ်ႈဢၼ်ၵႄႇသေၵေႃႉသေၵူၼ်း။
၃၃ ၶဝ်ၸိူဝ်းဢၼ်ဢမ်ႇလႆႈၶၢမ်ႇတၢင်းဢၼ်ၵဝ်တႅပ်းပႅတ်ႈသေၵႃႈတီႈယိၸ်ႉပလၢင်ႇၵဝ်ၸိူဝ်းၼၼ်ႉတၵ်းပဵၼ်တၢင်းဢၼ်ႁဵတ်းႁႂ်ႈမၢၵ်ႇတႃမႂ်းလႆႈလူႉၸွမ်းၼမ်ႉတႃႇလႄႈလႄႈႁဵတ်းႁႂ်ႈႁူဝ်ၸႂ်မႂ်းလႆႈႁဵဝ်ႇၸွပ်ႈဢေႃႈ။လုၵ်ႈလၢၼ်မႂ်းၸိူဝ်းၼၼ်ႉတၵ်းတၢႆမိူဝ်ႈဢသၢၵ်ႈဢရွႆႇၶဝ်ၼုမ်ႇၼၼ်ႉဢေႃႈ။
၃၄ တၢင်းဢၼ်တၵ်းပဵၼ်တီႈလုၵ်ႈၸၢႆးမႂ်းတင်းလၢႆၸမ်းလုၵ်ႈၸၢႆးမႂ်းႁေႃႇၽၼိတင်းၽိၼႁတ်ႉသွင်ၵေႃႉၼၼ်ႉသွင်ၶႃတၵ်းတၢႆၼႂ်းဝၼ်းလဵဝ်ဢေႃႈ။
၃၅ လၢႆးသမ်ႉၵဝ်တၵ်းႁႂ်ႈယိတ်ႉပရေႃးႁိၵ်ႈဢၼ်ပႂ်ႉသႅတ်ႉၸႃႇလႄႈႁဵတ်းၸွမ်းၵႃႈၼင်ႇဢၼ်မီးၵႃႈၼႂ်းႁူဝ်ၸႂ်ၵဝ်ၼၼ်ႉပေႃႇဢွၵ်ႇပဵၼ်မႃးဢေႃႈ။ၵဝ်တၵ်းႁႂ်ႈႁိူၼ်းမၼ်းတႄႇမၼ်ႈလႄႈမၼ်းတၵ်းလႆႈၵႂႃႇမႃးယူႇၵႃႈတီႈၽၢႆႇၼႃႈၵေႃႉဢၼ်လႆႈၶၢမ်ႇဢဝ်ၽိၵ်ႈသိၵ်ႈၵဝ်ၼၼ်ႉတႃႇသေႇဢေႃႈ။
၃၆ ၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇၵႃတီႈမဵဝ်းၸိူဝ်ႉၶိူဝ်းမႂ်းၸိူဝ်းၼၼ်ႉၵူႈၵေႃႉၵူႈၵူၼ်းတၵ်းဢွၼ်ၵၼ်မႃးၵူမ်ႈႁူဝ်ၵႂမ်းႁူဝ်ၵႃႈတီႈမၼ်းလႄႈယွၼ်းငိုၼ်းၶဵပ်းဢွၼ်ႇၼိုင်းတင်းၶႅပ်းၶဝ်ႈမုၼ်းဢွၼ်ႇတီႈမၼ်းလႄႈဝႃႈ၊-ၶႅၼ်းတေႃႈၸႂ်ႉသွႆၵဝ်ၶႃႈၼႂ်းၵၢၼ်ဢမူႉယိတ်ႉပရေႃးႁိၵ်ႈသေၸိူဝ်ႉသေပိူင်လႄႈႁႂ်ႈလႆႈၵိၼ်ၶဝ်ႈမုၼ်းသေၵွၼ်ႈသေၵမ်းၶႃႈ၊ဝႃႈၼင်ႇၼႆယူႇယဝ်ႉ၊ဝႃႈၼင်ႇၼႆဢေႃႈ။