Chapter
၁
သမူၺ်ႇလၵိူတ်ႇလဵင်ႉမႃး
၁ မိူဝ်ႈၼၼ်ႉမီးၵူၼ်းမဵဝ်းဢေႇၽရိမ်ႇၵေႃႉၼိုင်ႈဢၼ်ယူႇၵႃႈတီႈဝဵင်းရႃႇမသိမ်ႇၸုသိမ်ႇၵႃႈၼိူဝ်ႁၢၼ်ႉလွႆဢေႇၽရိမ်ႇဢၼ်မီးၸိုဝ်ႈဝႃႈဢေႇလၵႃႇၼဢၼ်ပဵၼ်လုၵ်ႈၸၢႆးယေႇရေႃႇႁမ်ႇ၊ဢၼ်ပဵၼ်လုၵ်ႈၸၢႆးဢေႇလိႁု၊ဢၼ်ပဵၼ်လုၵ်ႈၸၢႆးတေႃႇႁု၊ဢၼ်ပဵၼ်လုၵ်ႈၸၢႆးၸုၽ၊ၼၼ်ႉဢေႃႈ။
၂ မၼ်းမီးမေးသွင်ၵေႃႉဢေႃႈ။ၵေႃႉၼိုင်ႈမီးၸိုဝ်ႈဝႃႈႁၼ်ႇၼ၊ၵေႃႉၼိုင်ႈၸမ်းမီးၸိုဝ်ႈဝႃႈပေႇၼိၼ်ႇၼဢေႃႈ။ပေႇၼိၼ်ႇၼၼၼ်ႉမီးလုၵ်ႈလၢင်းဢေႃႈ။
၃ ႁၼ်ႇၼၸမ်းဢမ်ႇမီးလုၵ်ႈလၢင်း။ၵူၼ်းၸၢႆးၼၼ်ႉၵူႈပီႊၵူႈပီႊယၢမ်ႈၶိုၼ်းၵႂႃႇၵႃႈတီႈဝဵင်းသိလေႃႇႁႂ်ႈလႆႈၵူဝ်းၵႂၢႆႇလႄႈပုၵ်ႉၸေႃႇယိၸ်ႉတီႈၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးဢေႃႈ။ယိတ်ႉပရေႃးႁိၵ်ႈထႃႇဝရႃႉၽြႃးႁေႃႇၽၼိတင်းၽိၼႁတ်ႉဢၼ်ပဵၼ်လုၵ်ႈၸၢႆးဢေႇလိၸိူဝ်းၼၼ်ႉယူႇၵႃႈတီႈဝဵင်းသိလေႃႇၼၼ်ႉဢေႃႈ။
၄ ဢေႇလၵႃႇၼၼၼ်ႉမိူဝ်ႈဢၼ်ထိုင်ၶိင်ႇဝၼ်းဢၼ်ပုၵ်ႉၸေႃႇယိၸ်ႉၼၼ်ႉၸိုင်မၼ်းယၢမ်ႈမႅင်ႇၼိူဝ်ႉယိၸ်ႉၼၼ်ႉပၼ်တီႈမေးမၼ်းပေႇၼိၼ်ႇၼတင်းလုၵ်ႈယိင်းလုၵ်ႈၸၢႆးမၼ်းတင်းလၢႆဢေႃႈ။
၅ တီႈႁၼ်ႇၼၸမ်းၵွပ်ႈပိူဝ်ႈဢၼ်ထႃႇဝရႃႉၽြႃးဢမ်ႇပၼ်ဢၶႂၢင်ႉႁႂ်ႈမၼ်းၵိူတ်ႇလဵင်ႉလုၵ်ႈလၢင်းလႄႈမၼ်းႁၵ်ႉၼႃႇသေယဝ်ႉမၼ်းယၢမ်ႈမႅင်ႇပၼ်သွင်ပုၼ်ႊဢေႃႈ။
၆ ၵွပ်ႈပိူဝ်ႈထႃႇဝရႃႉၽြႃးဢမ်ႇပၼ်ဢၶႂၢင်ႉဢၼ်လႆႈၵိူတ်ႇလဵင်ႉလုၵ်ႈလဵင်ႉလၢင်းတီႈမၼ်းလႄႈပိူၼ်ႈယႃႉယူၵ်ႉမၼ်းၼႃႇလူင်လၢင်တေႃႇမၼ်းပေႃးၸႂ်လမ်သႆႈၵမ်ႇဢေႃႈ။
၇ ပီႊၼိုင်ႈယဝ်ႉပီႊၼိုင်ႈၼႂ်းမိူဝ်ႈဢၼ်မၼ်းၶိုၼ်ႈၸူးၵႃႈတီႈႁိူၼ်းထႃႇဝရႃႉၽြႃးၼၼ်ႉၶဝ်ဢွၼ်ၵၼ်ယႃႉယူၵ်ႉမၼ်းတေႃႇႁွတ်ထၼ်ႈပေႃးမၼ်းလႆႈႁႆႈႁွင်ႉလႄႈဢမ်ႇၵိၼ်တၢင်းၵိၼ်လႄႈယူႇဢေႃႈ။
၈ ၽူဝ်မၼ်းဢေႇလၵႃႇၼၼ်ႉထၢမ်တီႈမၼ်းလႄႈဝႃႈ၊-ႁၼ်ႇၼဢိူၺ်း။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းဢမ်ႇၵိၼ်ဢမ်ႇၶူပ်းလႄႈယူႇၸိူဝ်ႉၼႆ။
၉ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းႁႆႈႁွင်ႉယူႇၸိူဝ်ႉၼႆ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းၸႂ်လဵၵ်ႉၸႂ်ဢူၼ်ႈယူႇၸိူဝ်ႉၼႆ။ၵဝ်ယိင်ႈၶႅၼ်းလီတီႈမႂ်းလိူဝ်တွၼ်းၼႃႇသလေုၵ်ႈၸၢႆးသိပ်းၵေႃႉဢမ်ႇၸႂ်ႈႁိုဝ်၊ဝႃႈၼင်ႇၼႆဢေႃႈ။
၁၀ လိုၼ်းသေၶဝ်ၵိၼ်ၶူပ်းၵႃႈတီႈဝဵင်းသိလေႃႇယဝ်ႉၼႂ်းမိူဝ်ႈဢၼ်ယိတ်ႉပရေႃးႁိၵ်ႈဢေးလိယင်းတိုၵ်ႉၼင်ႈယူႇၵႃႈတီႈႁိမ်းသဝ်ပိၵ်ႉမၢၼ်ႇထႃႇဝရႃႉၽြႃးယူႇၼၼ်ႉၸိုင်ႁၼ်ႇၼလုၵ်ႉၸုၵ်းလႄႈမီးတင်းၸႂ်ဢၼ်ၶူမ်ၼႃႇသေယဝ်ႉၼမ်ႉတႃတူၵ်းသူးတွင်းတီႈထႃႇဝရႃႉၽြႃးဢေႃႈ။
၁၁ မၼ်းႁဵတ်းၵတိသႅတ်ႉၸႃႇလႄႈဝႃႈၸမ်း၊-ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးတီႈၶႃႈ၊ပေႃးၸဝ်ႈႁဝ်းတၵ်းတူၺ်းႁၼ်ထိုင်တၢင်းတုၵ်ႉၶႃႉၶၢၼ်ၸႂ်ၶႃႈၸဝ်ႈလႄႈတၵ်းၶုၵ်းၸႂ်လႆႈၶႆႈၸႂ်ထူပ်းၶႃႈၸဝ်ႈသေယဝ်ႉဢိတ်းလူပၼ်လုၵ်ႈၸၢႆးတီႈၶႃႈၸဝ်ႈၸိုင်၊ၶႃႈၸဝ်ႈတၵ်းဢမ်ႇႁဵတ်းတၢင်းဢၼ်ထႃႁူဝ်မၼ်းလႃးလႃးသေလႄႈၶႃႈၸဝ်ႈတၵ်းဢဝ်မၼ်းဢၢပ်ႈပၼ်တီႈထႃႇဝရႃႉၽြႃးၸူဝ်ႈဢသၢၵ်ႈသၢၵ်ႈမၼ်းၶႃႈဢေႃႈ၊ဝႃႈၼင်ႇၼႆဢေႃႈ။
၁၂ ၼႂ်းမိူဝ်ႈဢၼ်မၼ်းယင်းတိုၵ်ႉသူးတွင်းယူႇႁိုင်ၼႃႇၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉၸိုင်ဢေးလိလူတူၺ်းလႄႈႁၼ်သူပ်းမၼ်းၼိုင်ယူႇဢေႃႈ။
၁၃ ႁၼ်ႇၼသူးတွင်းၼႂ်းႁူဝ်ၸႂ်မၼ်းလႄႈပိၵ်ႉသမ်ႉသီႇသူပ်းမၼ်းတူင်ႉၼိုင်ယူႇသေၵေႃႈဢမ်ႇဢွၵ်ႇသဵင်လႄႈဢေးလိထၢင်ႇဝႃႈမၼ်းမဝ်းလဝ်ႈယဝ်ႉဝႃႈၼႆလႄႈမၼ်းလၢတ်ႈတီႈႁၼ်ႇၼလႄႈဝႃႈ၊-
၁၄ မႂ်းတၵ်းမဝ်းလဝ်ႈယူႇႁိုင်ၵႃႈႁိုဝ်။ယႃႇပေၵိၼ်ၼမ်ႉၸပိတ်ႉယဝ်ႉ၊ဝႃႈၼင်ႇၼႆဢေႃႈ။
၁၅ ႁၼ်ႇၼၵေႃႈၶိုၼ်းလဝ်ႈလၢတ်ႈလႄႈဝႃႈ၊-ဢမ်ႇၸႂ်ႈၶႃႈၸဝ်ႈ။ၵဝ်ၶႃႈၼႆႉပဵၼ်မေႈယိင်းဢၼ်ႁူဝ်ၸႂ်သူၵ်ႉသၢၵ်ႉၼႃႇၶႃႈဢေႃႈ။ၵဝ်ၶႃႈဢမ်ႇသူတ်ႉဢမ်ႇၵိၼ်ႇၼမ်ႉၸပိတ်ႈၼမ်ႉလဝ်ႈၶႃႈ။ၵဝ်ၶႃႈဢဝ်ႁူဝ်ၸႂ်ၵဝ်ၶႃႈသွၼ်းလေႃႇၵႃႈတီႈၽၢႆႇၼႃႈထႃႇဝရႃႉၽြႃးယူႇၶႃႈဢေႃႈ။
၁၆ ယႃႇပထေၢင်ႇၵဝ်ၶႃႈပဵၼ်မေႈယိင်းဢႃႉထမ်ႇမႃႉသေၵမ်းၶႃႈ။ၵွပ်ႈပိူဝ်ႈလွင်ႈတၢင်းဢၼ်ၶၢင်းၶီၶၢင်းၽၢၼ်၊လွင်ႈတၢင်းဢၼ်မႆႈၸႂ်ၶီၸႂ်ၼၼ်ႉလႄႈၵဝ်ၶႃႈလဝ်ႈလၢတ်ႈသူးတွင်းယူႇတေႃႇထိုင်ႁွတ်ႈမိူဝ်ႈလဵဝ်ၼႆႉဢေႃႈ၊ဝႃႈၼင်ႇၼႆဢေႃႈ။
၁၇ ဢေးလိၵေႃႈဢွၵ်ႇသူပ်းလၢတ်ႈလႄႈဝႃႈ၊-ၵႂႃႇၼိမ်ၼိမ်လီလီတႃႉ။ႁႂ်ႈၽြႃးပဵၼ်ၸဝ်ႈမဵဝ်းဢိသရေႇလဢိတ်းလူပၼ်မႂ်းၵႃႈဢၼ်မႂ်းလႆႈသူးတွင်းယွၼ်းဢဝ်ၼၼ်ႉသေၵမ်းလူၺ်ႈ၊ဝႃႈၼင်ႇၼႆဢေႃႈ။
၁၈ မၼ်းၵေႃႈလဝ်ႈလၢတ်ႈလႄႈဝႃႈ၊-ႁႂ်ႈၶႃႈၸဝ်ႈလႆႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းသေၵမ်းလူၺ်ႈ၊ဝႃႈၼင်ႇၼႆသေယဝ်ႉမၼ်းၵိၼ်တၢင်းၵိၼ်တၢင်းၶူပ်းလႄႈၼႃႈမၼ်းၵေႃႈဢမ်ႇမီးၼႃႈငိူဝ်ႈၼႃႈငဝ်ထႅင်ႈယဝ်ႉဢေႃႈ။
၁၉ ဝၼ်းမိူဝ်ႈၽုၵ်ႉၶိင်ႇၵၢင်ၼႂ်ၸဝ်ႉၸဝ်ႉၶဝ်ဢွၼ်ၵၼ်လုၵ်ႉလႄႈႁဵတ်းဝၢတ်ႈၵႃႈတီႈၽၢႆႇၼႃႈထႃႇဝရႃႉၽြႃးသေယဝ်ႉၶိုၼ်းမိူဝ်းၵႂႃႇၵႃႈတီႈႁိူၼ်းၶဝ်ဢၼ်မီးၵႃႈတီႈဝဵင်းရႃႇမၼၼ်ႉသေဢေႃႈ။ဝၢႆးၼၼ်ႉဢေႇလၵႃႇၼၶဝ်ႈၼွၼ်းၸူးတီႈမေးမၼ်းႁၼ်ႇၼဢေႃႈ။
၂၀ ထႃႇဝရႃႉၽြႃးၶုၵ်းၸႂ်လႆႈၶႆႈၸႂ်ထူပ်းမၼ်းသေယဝ်ႉႁႂ်ႈႁၼ်ႇၼပႃးပတိၵ်ႉသၼ်ႇထေႇဢေႃႈ။မိူဝ်ႈဢၼ်ၶိင်ႇၵႃႇလႃႉၸေးယဝ်ႉၼၼ်ႉမၼ်းၵိူတ်ႇလဵင်ႉလုၵ်ႈၸၢႆးမႃးလႄႈႁွင်ႉႁိၵ်ႈၸိုဝ်လုၵ်ႈၸၢႆးၼၼ်ႉဝႃႈသမူၺ်ႇလလႄႈဝႃႈ၊-ၵွပ်ႈပိူဝ်ႈၵဝ်ၶႃႈသူးတွင်းယွၼ်းဢဝ်တီႈထႃႇဝရႃႉၽြႃးၼၼ်ႉၵူၺ်းယဝ်ႉ၊ဝႃႈၼင်ႇၼႆဢေႃႈ။
ႁၼ်ႇၼဢဝ်သမူၺ်ႇလသၢၵ်ႈၵၢပ်ႈ
၂၁ မိူဝ်ႈဢၼ်ဢေႇလၵႃႇၼဢိၵ်ႇတင်းၵူၼ်းႁိူၼ်းၵူၼ်းယေးမၼ်းဢွၼ်ၵၼ်ၶိုၼ်ႈၸူးႁႂ်ႈလႆႈပုၵ်ႉၸေႃႇယိၸ်ႉဢိၵ်ႇတင်းၶိူင်ႈပုၵ်ႉၸေႃႇဢၼ်ၸၢပ်ႈသိင်ႇၵၼ်တင်းၵတိသႅတ်ႈၸႃႇၼၼ်ႉတီႈထႃႇဝရႃႉၽြႃးၵူႈပီႊၵူႈပီႊၼၼ်ႉႁၼ်ႇၼဢမ်ႇၸွမ်းၵႂႃႇလႄႈယူႇဢေႃႈ။
၂၂ လွင်ႈမၼ်းၸမ်းမၼ်းလၢတ်ႈတီႈၽူဝ်မၼ်းလႄႈဝႃႈ၊-ပေႃးလုၵ်ႈဢွၼ်ႇၼႆႉၽၢတ်ႇၼူမ်းယဝ်ႉၸင်ႇၵဝ်ၶႃႈတၵ်းဢဝ်မၼ်းၶိုၼ်ႈၸူးႁႂ်ႈမၼ်းႁွတ်ႈထိုင်ၵႃႈတီႈၽၢႆႇၼႃႈထႃႇဝရႃႉၽြႃးလႄႈယူႇၵႃႈတီႈၼၼ်ႉသေႇသေႇၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၽူဝ်မၼ်းဢေႇလၵႃႇၼၵေႃႈလႆႈၸႂ်လႄႈဝႃႈ၊-ႁဵတ်းၵႃႈၼင်ႇဢၼ်ၵၢင်ၸႂ်မႂ်းမီးၼၼ်ႉတႃႉ။
၂၃ ယူႇတေႃႇထိုင်ႁွတ်ႈမၼ်းပေႃးၽၢတ်ႇၼူမ်းၼၼ်ႉတႃႉ။ႁႂ်ႈၵတိထႃႇဝရႃႉၽြႃးတႄႇသေၵမ်းလူၺ်ႈ၊ဝႃႈၼင်ႇၼႆဢေႃႈ။မေးမၼ်းၼၼ်ႉၵိုတ်းသဝ်းယူႇတီႈႁိူၼ်းလႄႈတိုၵ်းၼူမ်းပၼ်တီႈလုၵ်ႈၸၢႆးဢွၼ်ႇမၼ်းတေႃႇထိုင်ႁွတ်ႈမၼ်းပေႃးၽၢတ်ႇၼူမ်းၼၼ်ႉဢေႃႈ။
၂၄ မၼ်းႁႂ်ႈၽၢတ်ႇၼူမ်းယဝ်ႉၸင်ႇဢဝ်လုၵ်ႈဢွၼ်ႇတင်းဝူဝ်းသၢမ်တူဝ်၊ၽွင်ၶဝ်ႈမုၼ်းဢေႇၽႃႇၼိုင်ႈ၊ၼမ်ႉၸပိတ်ႉမူၵ်ႇၼိုင်ႈလႄႈၵႂႃႇႁွတ်ႈထိုင်ၵႃႈတီႈႁိူၼ်းထႃႇဝရႃႉၽြႃးၵႃႈၼႂ်းဝဵင်းသိလေႃႇဢေႃႈ။မိူဝ်ႈၼၼ်ႉလုၵ်ႈဢွၼ်ႇၼၼ်ႉဢသၢၵ်ႈယင်းလဵၵ်ႉယင်းဢွၼ်ႇဢေႃႈ။
၂၅ ၶဝ်ဢွၼ်ၵၼ်ဢဝ်ဝူဝ်းတၢႆလႄႈဢဝ်လုၵ်ႈဢွၼ်ႇၼၼ်ႉၶဝ်ႈၸူးၵႃႈတီႈဢေးလိဢေႃႈ။
၂၆ ႁၼ်ႇၼလဝ်ႈလၢတ်ႈလႄႈဝႃႈ၊-ၸဝ်ႈႁဝ်း၊ၵႃႈၼင်ႇဢၼ်ၸဝ်ႈႁဝ်းဢသၢၵ်ႈလိပ်းယူႇၼၼ်ႉၵဝ်ၶႃႈၼႆႉပဵၼ်မေႈယိင်းဢၼ်ၸုၵ်းယူႇၵႃႈတီႈႁိမ်းၸဝ်ႈႁဝ်းလႄႈသူးတွင်းတီႈထႃႇဝရႃႉၽြႃးမိူဝ်ႈဝၼ်းၼၼ်ႉယူႇၶႃႈဢေႃႈ။
၂၇ မိူဝ်ႈၼၼ်ႉၵဝ်ၶႃႈသူးတွင်းႁႂ်ႈလႆႈလုၵ်ႈဢွၼ်ႇၼႆႉၶႃႈဢေႃႈ။ထႃႇဝရႃၽြႃးဢိတ်းလူပၼ်ၵႃႈၼင်ႇဢၼ်ၵဝ်ၶႃႈယွၼ်းၼၼ်ႉၶႃႈယဝ်ႉ။ၵွပ်ႈပိူဝ်ႈၼၼ်လႄႈၵဝ်ၶႃႈဢဝ်မၼ်းဢၢပ်ႈပၼ်တီႈထႃႇဝရႃႉၽြႃးၶႃႈယဝ်ႉ။မၼ်းတၵ်းလႆႈၶၢမ်ႇတၢင်းဢၼ်ဢၢပ်ႈပၼ်တီႈထႃႇဝရႃႉၽြႃးၸူဝ်ႈဢသၢၵ်ႈမၼ်းၶႃႈဢေႃႈ၊ဝႃႈၼင်ႇၼႆဢေႃႈ။ၶဝ်ၵူဝ်းၵႂၢႆႇထႃႇဝရႃႉၽြႃးၵႃႈတီႈၼၼ်ႉဢေႃႈ။