Chapter
၉
ဢၽိမလိၵ်ႉ
၁ ဢၽိမလိၵ်ႉလုၵ်ႈၸၢႆးယေႇရုပ်ႇပႃႇလ ၼၼ်ႉၵႂႃႇၵႃႈတီႈဝဵင်းသေႇၶိမ်ႇတီႈ ဢၼ်လုင်းမၼ်းတင်းလၢႆယူႇၼၼ်ႉလႄႈ လၢတ်ႈတီႈၶဝ် တင်းပီႈၼွင်ႉၸိူဝ်ႉၶိူဝ်းပူႇ မၼ်းတင်းလၢႆၼၼ်ႉလႄႈဝႃႈ၊-
၂ ၵဝ်တွင်းပၢၼ်ႇသူႁႂ်ႈသူလႆႈလၢတ်ႈထိုင်ႁူၵူၼ်းဝဵင်းသေႇၶိမ်ႇ တင်းသဵင်ႈတင်းလူင်ဝႃႈ၊-လွင်ႈတၢင်းဢၼ်တေႁႂ်ႈလုၵ်ႈၸၢႆးယေႇရုပ်ႉပႃႇလ ၸဵတ်းသိပ်းၵေႃႉၼၼ်ႉဢုပ်ႉပိူင်ႇၵႃႈၼိူဝ်သူၼၼ်ႉတထေုၵ်ႇလီသေ တၢင်းဢၼ်ႁႂ်ႈၵူၼ်းၸၢႆးၵေႃႉလဵဝ်ၵူၺ်းဢုပ်ႉပိူင်ႇၵႃႈၼိူဝ်သူႁိုဝ်၊ ဢၼ်ဝႃႈၼၼ်ႉတႃႉ။ၶုၵ်းၸႂ်လႆႈလွင်ႈဢၼ်ဝႃႈ ၵဝ်ပဵၼ်လုပ်ႇသူၼိူဝ်ႉသူၼၼ်ႉ သေၵမ်း၊ဝႃႈၼင်ႇၼႆဢေႃႈ။
၃ လုင်းမၼ်းၸိူဝ်းၼၼ်ႉဢဝ်ၵႂၢမ်းၵႃႈမီးၸိူဝ်းၼၼ်ႉ ၶိုၼ်းဢွၼ်ၵၼ်လၢတ်ႈထိုင်ႁူၵူၼ်းဝဵင်းသေႇၶိမ်ႇ တင်းသဵင်ႈတင်းလူင်လႄႈၶဝ်ၸိူဝ်းၼၼ်ႉၵေႃႈ မီးၸႂ်ဢၼ်ဢူၼ်ႈၼူပ်ႈၵွမ်းၸူးၶႂ်ႈၸွမ်းလင်ဢၽိမလိၵ်ႉ ၼၼ်ႉလႄႈ ၶဝ်ဢွၼ်ၵၼ်လၢတ်ႈဝႃႈ၊-မၼ်းၼႆႉပဵၼ်ပီႈၼွင်ႉႁဝ်းဢေႃႈ၊ဝႃႈၼင်ႇၼႆသေယဝ်ႉ၊
၄ ဢဝ်ငိုၼ်းၸဵတ်းသိပ်းၵျၢပ်ႈဢွၵ်ႇသေၵႃႈၼႂ်းပိၵ်ႉမၢၼ်ႇပႃႇလပေႇရိတ်ႉ သေလႄႈပၼ်တီႈမၼ်းဢေႃႈ။ဢၽိမလိၵ်ႉ ၵေႃႈဢဝ်ငိုၼ်းၼၼ်ႉသေယဝ်ႉၸၢင်ႈငႃးဢဝ်ၵူၼ်းဢၼ်မဝ်ႈမၢင်ႈဢမ်ႇပွင်ႇလွင်ႈသင်ၸိူဝ်း ၼၼ်ႉလႄႈႁႂ်ႈၸွမ်းလင်မၼ်းဢေႃႈ။
၅ မၼ်းသမ်ႉၵႂႃႇၵႃႈတီႈႁိူၼ်းပေႃႈမၼ်း ဢၼ်မီးၵႃႈတီႈဝဵင်းဢေႃႇၽရၼၼ်ႉသေယဝ်ႉ ဢဝ်ပီႈမၼ်းၼွင်ႉမၼ်းဢၼ်ပဵၼ်လုၵ်ႈၸၢႆးယေႇရုပ်ႇပႃႇလ ၸဵတ်းသိပ်းၵေႃႉၸိူဝ်းၼၼ်ႉတၢႆပႅတ်ႈၵႃႈၼိူဝ်မၢၵ်ႇႁိၼ်လုၵ်ႉလဵဝ်ဢေႃႈ။ၵူၺ်းၵႃႈယေႃႇသမ်ႇလုၵ်ႈၸၢႆးယေႇရုပ်ႉပႃႇလ၊ ဢၼ်ၵေႃႉလဵၵ်ႉသေပိူၼ်ႈၼၼ်ႉတဵတ်ႇမႅပ်းယူႇလေႈ ၵိုတ်းၵျၢၼ်ႇဝႆႉဢေႃႈ။
၆ ၵူၼ်းဝဵင်းသေႇၶိမ်ႇတင်းသဵင်းတင်းလူင် ဢိၵ်ႇတင်းပီႈၼွင်ႉၸိူဝ်ႉၶိူဝ်းမိလေႃႇ တင်းလၢႆၼၼ်ႉၸူႉၵၼ်တုမ်ၵၼ်သေလႄႈ ဢဝ်ဢၽိမလိၵ်ႉၼၼ်ႉၶၢၼ်းဝႆႉၼႂ်းဢရႃႇၶုၼ်ႁေႃၶမ်းၶဝ် ၵႃႈတီႈႁိမ်းတူၼ်ႈမႆႉၼိမ်သဝ်တီႈမၢတ်ႈ တီႈတွင်းဢၼ်မီးၵႃႈၼႂ်းဝဵင်းသေႇၶိၼ်ႇၼၼ်ႉဢေႃႈ။
၇ မိူဝ်ႈဢၼ်ပိူၼ်ႈလၢတ်ႈလွင်ႈတၢင်းၼၼ်ႉတီႈယေႃႇသမ်ႇ ၼၼ်ႉၸိုင်မၼ်းၶိုၼ်ႈၵႂႃႇၸုၵ်းယူႇၵႃႈၼိူဝ်ပၢႆလွႆၵေႇရၸိမ်ႇ ၼၼ်ႉသေယဝ်ႉၵိဝ်သဵင်ႈႁွင်ႉပၢဝ်ႇႁွင်ႉလၢတ်ႈလႄႈဝႃႈ၊-ၵူၼ်းဝဵင်းသေႇၶိမ်ႇၶဝ်ဢူၺ်း။လွင်ႈၼင်ႇႁိုဝ်ၽြႃးပဵၼ်ၸဝ်ႈ တၵ်းထွမ်ႇငိၼ်းၵႂၢမ်းသူၸိုင် သူဢွၼ်ၵၼ်ထွမ်ႇငိၼ်းၵႂၢမ်းၵဝ်တႃႉ။
၈ မီးၽဝ်ႇၼိုင်ႈတူၼ်ႈမႆႉတင်းလၢႆဢွၼ်ၵၼ်ဢွၵ်ႇၵႂႃႇႁႂ်ႈလႆႈၶၢၼ်းတူၼ်ႈၼိုင်ႈ ၼႂ်းဢရႃႇၶုၼ်ႁေႃၶမ်းဢၼ်တၵ်းဢုပ်ႉပိူင်ႇၶဝ်ၼၼ်ႉဢေႃႈ။ၶဝ်ပၼ်ၽိၵ်ႉသိၵ်ႉၼၼ်ႉလႄႈလဝ်ႈလၢတ်ႈတီႈတူၼ်ႈသၢၼ်ႇလုၼ်ႇလႄႈဝႃႈ၊-ဢုပ်ႉပိူင်ႇၵႃႈၼိူဝ်ႁဝ်းၶႃႈသေၵမ်းၶႃႈ၊ဝႃႈၼင်ႇၼႆဢေႃႈ။
၉ တူၼ်ႈသၢၼ်ႇလုၼ်ႇၼၼ်ႉၵေႃႈ ၶိုၼ်းလၢတ်ႈတီႈၶဝ်လႄႈဝႃႈ၊-ၵဝ်တၵ်းလႆႈၸုၼ်ႉပႅတ်ႈၵွၼ်ႈၶႆၵွၼ်ႈမၼ်းၵဝ်ဢၼ်ၵူၼ်းဢဝ်လုမ်းလႃး သရေႇၽြႃးသရေႇၵူၼ်းၼၼ်ႉသေလႄႈၵႂႃႇႁူမ်ႇငမ်း ၵႂႃႇငမ်းၶိုၼ်ႈယူႇၵႃႈၼိူဝ် တူၼ်ႈမႆႉတင်းလၢႆႁိုဝ်၊ဝႃႈၼင်ႇၼႆဢေႃႈ။
၁၀ တူၼ်ႈမႆႉၸိူဝ်းၼၼ်ႉ သမ်ႉလဝ်လၢတ်ႈတီႈ မၢၵ်ႇလိူဝ်ႇသၢင်းၽေႃးလႄႈဝႃႈ၊- ၸဝ်ႈႁဝ်းမႃးလႄႈဢုပ်ႉပိူင်ႇၵႃႈၼိူဝ်ႁဝ်း ၶႃႈသေၵမ်းၶႃႈ၊ဝႃႈၼင်ႇၼႆဢေႃႈ။
၁၁ တူၼ်ႈမၢၵ်ႇလိူဝ်ႇသၢင်းၽေႃးၼၼ်ႉၵေႃႈ ၶိုၼ်းလၢတ်ႈတီႈၶဝ်လႄႈဝႃႈ၊-ၵဝ်တၵ်းလႆႈၸုၼ်ႉပႅတ်ႈဢရႃႉသႃႇဢၼ်ဝၢၼ်ဢၼ်ၸဵမ်းဢိၵ်ႇတင်း မၢၵ်ႇဢၼ်လီဢၼ်ငၢမ်းၵဝ်သေလႄႈ ၵႂႃႇႁူမ်ႇငမ်းၵႂႃႇငမ်းၶိုၼ်းယူႇၵႃႈၼိူဝ်တူၼ်ႈမႆႉတင်းလၢႆၸိူဝ်းၼၼ်ႉႁိုဝ်၊ဝႃႈၼင်ႇၼႆသေဢေႃႈ။
၁၂ တူၼ်မႆႉၸိူဝ်းၼၼ်ႉ သမ်ႉလဝ်ႈလၢတ်ႈတီႈၶိူဝ်းတူၼ်ႈမၢၵ်ႇၸပိတ်ႉလႄႈဝႃႈ၊-မႃးလႄႈဢုပ်ႉပိူင်ႇၵႃႈၼိူဝ်ႁဝ်းၶႃႈသေၵမ်းၶႃႈ၊ဝႃႈၼင်ႇၼႆဢေႃႈ။
၁၃ ၶိူဝ်းတူၼ်ႈမၢၵ်ႇၸပိတ်ႉၵေႃႈလၢတ်ႈလႄႈဝႃႈ၊-ၵဝ်တၵ်းလႆႈၸုၼ်ႉပႅတ်ႈၼမ်ႉၸပိတ်ႉၵဝ် ဢၼ်ႁႂ်ႈၸႂ်ၽြႃးဢိၵ်ႇတင်းၸႂ်ၵူၼ်းသႂၢင်ႇသိူဝ်းၼၼ်ႉသေယဝ်ႉ ၵႂႃႇႁူမ်ႈငမ်းၵႂႃႇငမ်းၶိုၼ်ႈယူႇၵႃႈၼိူဝ်တူၼ်ႈမႆႉတင်းလၢႆၸိူဝ်းၼၼ်ႉႁိုဝ်၊ ဝႃႈၼင်ႇ ၼႆသေဢေႃႈ။
၁၄ မိူဝ်ႈၼၼ်ႉတူၼ်ႈမႆႉတင်းသဵင်ႈတင်းလူင်ၼၼ်ႉ သမ်ႉလဝ်ႈလၢတ်ႈတီႈတူၼ်ႈၼၢမ်လိၼ်လႄႈဝႃႈ၊-မႃးဢုပ်ႉပိူင်ႇၵႃႈၼိူဝ်ႁဝ်းၶႃးသေၵမ်းၶႃႈ၊ဝႃႈၼင်ႇ ၼႆဢေႃႈ။
၁၅ တူၼ်ႈၼၢမ်လိၼ်ၼၼ်ႉၶိုၼ်းလၢတ်ႈတီႈတူၼ်ႈမႆႉၸိူဝ်းၼၼ်ႉလႄႈဝႃႈ၊-ပေႃးသူဢဝ်ၵဝ်ၶၢၼ်းဝႆႉႁႂ်ႈလႆႈပဵၼ်ၶုၼ်ႁေႃၶမ်းလႄႈ ပၼ်ၽိၵ်ႉသိၵ်ႉဢမၢၼ်ႇၶၢၼ်ပဵၼ်ၸိုင် ဢွၼ်ၵၼ်မႃးလႄႈသွၼ်ႈပိုင်ႈယူႇၵႃႈတီႈတႂ်ႈႁူမ်ႈၵဝ်တႃႉ။ပေႃးဢမ်ႇၼၼ်ႁႂ်ႇၽႆးဢွၵ်ႇၵႃႈၼႂ်းတူၼ်ႈၼၢမ်လိၼ်လႄႈ မႆႈတူၼ်ႈဢႃႇရိတ်ႉလေႇပၼုၼ်ႇ တင်းလၢႆသေၵမ်းလူၺ်ႈ၊ဝႃႈၼင်ႇၼႆဢေႃႈ။
၁၆ မိူဝ်ႈလဵဝ်ၼႆႉသူဢဝ်ဢၽိမလိၵ်ႉ ၶၢၼ်းဝႆႉၼႂ်းဢရႃႇၶုၼ်ႁေႃၶမ်းယဝ်ႉလႄႈ သူပႂ်ႉသႅတ်ႈၸႃႇလႄႈ ႁဵတ်းသိုဝ်ႈသိုဝ်ႈတေႃႇတေႃႇႁိုဝ်။သူႁဵတ်းလီလီငၢမ်းငၢမ်းတီႈယေႇရုပ်ႉပႃႇလ ဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်းတွပ်ႇတႅၼ်းပၼ်ၵျေးၸူးတီႈမၼ်း ၸွမ်းၵႃႈၼင်ႇဢၼ်မၼ်းႁဵတ်း ၵျေးၸူးလႄႈထိူၵ်ႈၶၢမ်ႇၼၼ်ႉယဝ်ႉႁိုဝ်။
၁၇ ပေႃႈၵဝ်ၼၼ်ႉတိုၵ်းသိုၵ်းပုၼ်ႈသူလႄႈ ဝႆႉၸႂ်ၸုၼ်ႉဢသၢၵ်ႈမၼ်းသေလႄႈ ၵႄႇသႄႇၼုၵ်ႉဢဝ်သူဢွၵ်ႇသေၵႃႈၼႂ်းမိုဝ်းၵူၼ်း မဵဝ်းမိတျၢၼ်ႇယဝ်ႉ။
၁၈ သူဢွၼ်ၵၼ်လုၵ်ႉယူႇၽၢႆႇၼိုင်ႈတင်းပီႈၼွင်ႉပေႃႈၵဝ်ၸိူဝ်းၼၼ်ႉ ဝၼ်းမိူဝ်ႈၼႆႉလႄႈဢဝ်လုၵ်ႈၸၢႆးမၼ်းၸဵတ်းသိပ်းၵေႃႉၼၼ်ႉတၢႆၵႃႈၼိူဝ်မၢၵ်ႇႁိၼ်လုၵ်ႈလဵဝ်ၼၼ်ႉသေယဝ်ႉ ဢဝ်ဢၽိမလိၵ်ႉဢၼ်ပဵၼ်လုၵ်ႈၸၢႆးမေႈယိင်းၶႃႈၼၼ်ႉ ႁဵတ်းၶုၼ်ႁေႃၶမ်းၵႃႈၼိူဝ်ၵူၼ်းဝဵင်းသေႇၶိမ်ႇ တင်းလၢႆၵွပ်ႈပိူဝ်ႈဢၼ် မၼ်းပဵၼ်ပီႈၼွင်ႉသူၼၼ်ႉလူင်ပေႇ။
၁၉ မိူဝ်ႈလဵဝ်ၼႆႉပေႃးသူလႆႈပႂ်ႉသႅတ်ႈၸႃႇလႄႈ ယူႇလီလီငၢမ်းငၢမ်းတီႈယေႇရုပ်ႇပႃႇလ ဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်းၸိူဝ်းၼၼ်ႉယဝ်ႉၸိုင်ဢွၼ်ၵၼ်ၸူမ်းသိူဝ်းၼႂ်းဢၽိမလိၵ်ႉတႃႉ။
၂၀ ႁႂ်ႈ မၼ်းၵေႃႈၸူမ်းသိူဝ်းၼႂ်းသူတႃႉ။ဢမ်ႇၼၼ်ႁႂ်ႈၽႆးဢွၵ်ႇသေၵႃႈၼႂ်းဢၽိမလိၵ်ႉ လႄႈမႆႈၵူၼ်းဝဵင်းသေႇၶိမ်ႇ တင်းလၢႆဢိၵ်ႇတင်းပီႈၼွင်ႉၸိူဝ်ႉၶိူဝ်းမိလေႃႇၼၼ်ႉသေၵမ်းလူၺ်ႈ။ႁႂ်ႈၽႆးဢွၵ်ႇသေၵႃႈၼႂ်းၵူၼ်းဝဵင်းသေႇၶိမ်ႇ တင်းလၢႆဢိၵ်ႇတင်းပီႈၼွင်ႉၸိူဝ်ႉၶိူဝ်းမိလေႃႇ ၼၼ်ႉသေလႄႈမႆႈဢၽိမလိၵ်ႉသေၵမ်းလူၺ်ႈ၊ ဝႃႈၼင်ႇၼႆ သေယဝ်ႉ၊
၂၁ ယေႃႇသမ်ႇ ၼၼ်ႉၶုၼ်ႇလႅၼ်ႈလႄႈဢွၵ်ႇပၢႆႈၶၼ်ၶၼ်ၽႂ်းၽႂ်းၵႂႃႇၸူးၵႃႈတီႈဝဵင်းပေႇရလႄႈ ယူႇၵႃႈတီႈၼၼ်ႉၵွပ်ႈပိူဝ်ႈမၼ်းၵူဝ်ပီႈၸၢႆးမၼ်း ဢၽိမလိၵ်ႉၼၼ်ႉဢေႃႈ။
၂၂ ဢၽိမလိၵ်ႉ ၼၼ်ႉႁဵတ်းၶုၼ်ၵႃႈၼိူဝ်မဵဝ်းဢိသရေႇလသၢမ်ပီႊသေယဝ်ႉ ၽြႃးပဵၼ်ၸဝ်ႈပွႆႇၸႂ်ႉဝိၺိၺ်ႇဢၼ်ႁၢႆႉ ၼၼ်ႉ
၂၃ ၸူးၵႃႈတီႈဝူင်ႈၵၢင်ဢၽိမလိၵ်ႉ တင်းၵူၼ်းဝဵင်းသေႇၶိမ်ႇၸိူဝ်းၼၼ်ႉလႄႈၵူၼ်းဝဵင်းသေႇၶိမ်ႇၸိူဝ်း ၼၼ်ႉၽိုၼ်ႉသႅတ်ႈၸႃႇဢၽိမလိၵ်ႉဢေႃႈ။
၂၄ လွင်ႈမၼ်းၸမ်းလွင်ႈတၢင်းၼႆႉ လႆႈပဵၼ်မႃး လွင်ႈၼင်ႇႁိုဝ်ဢပျႅတ်ႈဢၼ် ႁဵတ်းႁၢႆႉၵျၢမ်းၼႃႇလူင်လၢင်ၵႃႈၼိူဝ်လုၵ်ႈၸၢႆးယေႇရုပ်ႉပႃႇလၸဵတ်းသိပ်းၵေႃႉ လိူတ်ႈၶဝ်ၼၼ်ႉတၵ်းလႆႈတူၵ်းႁွတ်ႈထိုင်ၵႃႈၼိူဝ် ဢၽိမလိၵ်ႉ တင်း ၵူၼ်းဝဵင်းသေႇၶိမ်ႇတင်းလၢႆၼၼ်ႉဢေႃႈ။
၂၅ ၵူၼ်းသေႇၶိမ်ႇၸိူဝ်းၼၼ်ႉ ပၢႆမႅပ်းပႂ်ႉလွမ်ၵႃႈၼိူဝ်ပၢႆလွႆၵုင်းလွႆလႄႈ ႁိမ်ဢဝ်ၶူဝ်းလဵင်းၶဝ်ၸိူဝ်းဢၼ်ၵႂႃႇမႃးတီႈသဵၼ်ႈတၢင်းၼၼ်ႉဢေႃႈ။ပိူၼ်ႈလဝ်ႈလၢတ်ႈလွင်ႈ တၢင်းၼၼ်ႉတီႈဢၽိမလိၵ်ႉဢေႃႈ။
၂၆ မိူဝ်ႈၶိင်ႇၼၼ်ႉၵေႃႇလ ဢၼ်ပဵၼ်လုၵ်ႈၸၢႆးဢေႇပိတ်ႉၼၼ်ႉပႃးဢဝ်တင်းပီႈၼွင်ႉမၼ်းသေလႄႈ ၶဝ်ယူႇၼႂ်းဝဵင်းသေႇၶိမ်ႇဢေႃႈ။ၵူၼ်းဝဵင်းသေႇၶိမ်ႇၸိူဝ်းၼၼ်ႉၵေႃႈ မီးၸႂ်ပိူင်ၸႂ်ဢိင်ႈ ၵႃႈၼိူဝ်မၼ်းဢေႃႈ။
၂၇ ၶဝ်ဢွၵ်ႇၸူးၵႃႈတီႈတူင်ႊႁႆႊတူင်ႊၼႃးၶဝ် ၵဵပ်းဢဝ်သိမ်းဢဝ်မၢၵ်ႇၸပိတ်ႉၶဝ်ဢဝ်တိၼ်ယဵပ်ႇပႅတ်ႈမၢၵ်ႇၸပိတ်ႉၶဝ် ႁဵတ်းၶိူင်ႈပုၵ်ႉၸေႃႇဢၼ်မူၼ်ႈဢၼ်ပျေႃႇသေလႄႈ ၵႂႃႇၵႃႈတီႈၵျွင်းၽြႃးၶဝ်လႄႈ ၵိၼ်ၶူပ်းယူႇ၊သူတ်ႉဢိုၵ်ႉယူႇသေလႄႈဢွၼ်ၵၼ် ၵိၼ်ႇလႃႇဢၽိမလိၵ်ႉဢေႃႈ။
၂၈ ၵေႃႇလလုၵ်ႈၸၢႆးဢေႇပိတ်ႉၼၼ်ႉလၢတ်ႈလႄႈဝႃႈ၊-ဢၽိမလိၵ်ႉပဵၼ်ၽူႈ လႂ်။သေႇၶိမ်ႇ၊ပဵၼ်ၽူႈ လႂ်။ၵွပ်ႈသင်လႄႈႁဝ်းတေလႆႈပႂ်ႉဢမူႉမၼ်း။မၼ်းပဵၼ်လုၵ်ႈၸၢႆးယေႇရုပ်ႉပႃႇလဢမ်ႇၸႂ်ႈႁိုဝ်။ၸေႇပလ၊ပဵၼ်ၵေႃႉဢၼ်ႁၢပ်ႇဢမူႉမၼ်းဢမ်ႇၸႂ်ႈႁိုဝ်။ဢွၼ်ၵၼ်ႁၢပ်ႇဢမူႉၵူၼ်းႁႃႇမေႃႇဢၼ်ပဵၼ်ပေႃႈသေႇၶိမ်ႇၸိူဝ်းၼၼ်ႉတႃႉ။ၵွပ်ႈပိူဝ်ႈၸိူဝ်ႉၼင်ႇႁိုဝ် လႄႈႁဝ်းတၵ်းလႆႈႁၢပ်ႇဢမူႉမၼ်းၼၼ်ႉ။
၂၉ ပေႃးၵူၼ်းတင်းလၢႆမီးၵႃႈတႂ်ႈမိုဝ်းၵဝ်ၸိုင် ၵဝ်တၵ်းပေႇၽႅဝ်ႈပႅတ်ႈဢၽိမလိၵ်ႉဢေႃႈ၊ ဝႃႈၼင်ႇၼႆသေယဝ်ႉ မၼ်းသမ်ႉလၢတ်ႈၵႂႃႇၵႃႈတီႈဢၽိမလိၵ်ႉလႄႈဝႃႈ၊-ႁွင်ႉဢဝ်ႁႂ်ႈပူဝ်ႇပႃႇၵူၼ်းသိုၵ်းမႂ်းတင်းလၢႆလႄႈ ဢွၵ်ႇမႃးတႃႉ၊ဝႃႈၼင်ႇၼႆဢေႃႈ။
၃၀ မိူဝ်ႈဢၼ်ပူႇၵေႇၸေႇပုလငိၼ်းၵႂၢမ်းၵႃႇလလုၵ်ႈၸၢႆးဢေႇပိတ်ႇ လၢတ်ႈၼၼ်ႉၸိုင်မၼ်း ၸႂ်မႆႈၶႆႈၸႃႉၼႃႇဢေႃႈ။
၃၁ မၼ်းလၵ်ႉလွမ်ပွႆႇၸႂ်ႉၵူၼ်းၵႂႃႇၸူးဢၽိမလိၵ်ႉသေလႄႈ ႁႂ်ႈလဝ်ႈလၢတ်ႈလႄႈဝႃႈ၊-တူၺ်းလူ။ၵေႃႇလ၊လုၵ်ႈၸၢႆးဢေႇပိတ်ႉ၊ဢိၵ်ႇတင်းပီႈၼွင်ႉမၼ်းၸိူဝ်းၼၼ်ႉ မႃးယူႇၵႃႈတီႈဝဵင်းသေႇၶိမ်ႇလႄႈတိုၵ်းသူၼ်း ႁႂ်ႈၵူၼ်းဝဵင်းယူႇၽၢႆႇၼိုင်ႈတင်းၸဝ်ႈႁဝ်း ၶႃႈယဝ်ႉ။
၃၂ ပိူဝ်ႈၼႆလႄႈမိူဝ်ႈၶိင်ႇၵၢင်ၶိုၼ်းၸဝ်ႈႁဝ်းတင်းၶဝ်ၸိူဝ်းဢၼ်မီးတီႈၸဝ်ႈႁဝ်းၸိူဝ်းၼၼ်ႉ ဢွၼ်ၵၼ်ၵႂႃႇလွမ်ပႂ်ႉယူႇ ၵႃႈတီႈတူင်ႊႁႆႊတူင်ႊၼႃးတဵတ်ႇတဵတ်ႇသေၵမ်းၶႃႈ။
၃၃မိူဝ်ႈႁွတ်ႈထိုင်ၶိင်ႇၵၢင်ၼႂ်ၸဝ်ႉၸဝ်ႉမိူဝ်ႈၵၢင်ဝၼ်းၸႃႉဢွၵ်ႇၼၼ်ႉလုၵ်ႉလႄႈ တိုၵ်းတေႃးဝဵင်းၼၼ်ႉသေၵမ်းၶႃႈ။မိူဝ်ႈဢၼ်မၼ်းတင်းၶဝ်ၸိူဝ်းဢၼ်မီးတီႈမၼ်းၸိူဝ်းၼၼ်ႉ ဢွၼ်ၵၼ်ဢွၵ်ႇမႃးႁႂ်ႈလႆႈႁေႉၶႅၼ်သိုၵ်းၼၼ်ႉၸိုင် ၸဝ်ႈႁဝ်းၶႅၼ်းတေႃႈႁဵတ်းတီႈမၼ်းၵႃႈၼင်ႇဢၼ်သၢင်ႇထုၵ်ႇၼၼ်ႉသေၵမ်းၶႃႈ၊ ဝႃႈ ၼင်ႇၼႆႉဢေႃႈ။
၃၄ ဢၽိမလိၵ်ႉဢိၵ်ႇတင်းၵူၼ်းၵႃႈဢၼ်မီးတီႈမၼ်းၸိူဝ်းၼၼ်ႉ ဢွၼ်ၵၼ်လုၵ်ႉၶိင်ႇၵၢင်ၶိုၼ်းလႄႈ ၽႄႁဵတ်းသီႇတပ်ႉသေယဝ်ႉလွမ်ပႂ်ႉဝဵင်းသေႇၶိမ်ႇယူႇဢေႃႈ။ၵေႃႇလ လုၵ်ႈၸၢႆးဢေႇပိတ်ႉ ဢွၵ်ႇလႄႈ ၸုၵ်းယူႇၵႃႈတီႈႁူးၽၵ်းတူဝဵင်းဢေႃႈ။
၃၅ ဢၽိမလိၵ်ႉတင်းၶဝ်ၸိူဝ်းဢၼ်မီးတီႈမၼ်းၼၼ်ႉၵေႃႈ ဢွၼ်ၵၼ် လုၵ်ႉသေၵႃႈတီႈဢၼ်လွမ်ပႂ်ႉၼၼ်ႉမႃးဢေႃႈ။
၃၆ ၵေႃႇလႁၼ်ၵူၼ်းၸိူဝ်းၼၼ်ႉသေယဝ်ႉ လၢတ်ႈတီႈၸေႇပုလလႄႈဝႃႈ၊-တူၺ်းလူး။ၵူၼ်းၼမ်ႇၼႃႇလုၵ်ႉသေၵႃႈၼိူဝ်ပၢႆလွႆၵုင်းပုၼ်ႉလူင်းမႃးယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်ၸေႇပုလၶိုၼ်းလၢတ်ႈလႄႈဝႃႈ၊- တႃၸဝ်ႈႁၼ်ၵွင်ႉငဝ်းလွႆၼၼ်ႉပဵၼ်မိူၼ်ၸိူဝ်ႉ ၼင်ႇၵူၼ်းၼၼ်ႉ ၵူၺ်းဢိူဝ်ႈ၊ဝႃႈၼင်ႇၼႆဢေႃႈ။
၃၇ ၵေႃႇလသမ်ႉလၢတ်ႈဝႃႈ၊-တူၺ်းလူး။ၵူၼ်းၵမ်ႈၽွင်ႈလူင်းသေၵႃႈၼိူဝ်သၼ်လွႆၼၼ်ႉမႃးယဝ်ႉ။ၵူၼ်းၵမ်ႈၽွင်ႈၵေႃႈၸွမ်းသဵၼ်ႈတၢင်းတူၼ်ႈမႆႉၼိမ် ဢၼ်ႁဵတ်းၽိူဝ်ၼၼ်ႉလႄႈ မႃးယဝ်ႉ၊ဝႃႈၼင်ႇၼႆဢေႃႈ။
၃၈ ၸေႇပုလလၢတ်ႈတီႈမၼ်းလႄႈဝႃႈ၊-သူပ်းၸဝ်ႈဢၼ်လၢတ်ႈဝႃႈ ဢၽိမလိၵ်ႉပဵၼ်ၽူႈ လႂ်ႁႂ်ႈႁဝ်းလႆႈႁၢပ်ႇဢမူႉမၼ်း၊ဝႃႈၼင်ႇၼႆၼၼ်ႉတေႃႈလဵဝ်ၼႆႉမီႈၵႃႈ လႂ်။ၵူၼ်းၸိူဝ်းၼၼ်ႉပဵၼ်ၵူၼ်းဢၼ်ၸဝ်းႁဵတ်း ဢမ်ႇပေႃးၼင်ႇႁိုဝ်ၼၼ်ႉဢမ်ႇၸႂ်ႈႁိုဝ်။တေႃႈလဵဝ်ၼႆႉဢွၵ်ႇလႄႈတိုၵ်းၵၼ်တင်းၶဝ်တႃႉ မိူဝ်ႈဢၼ်ဝႃႈၼင်ႇၼႆၸိုင်
၃၉ ၵေႃႇလၼၼ်ႉဢွၵ်ႇၵႃႈတီႈၽၢႆႇၼႃႈၵူၼ်းဝဵင်းသေႇၶိမ်ႇ တင်းလၢႆလႄႈတိုၵ်းၵၼ် တင်းဢၽိမလိၵ်ႉဢေႃႈ။
၄၀ ဢၽိမလိၵ်ႉလိုပ်ႈၸွမ်းလမ်းၸွမ်းမၼ်းတေႃႇထိုင်ႁွတ်ႈႁူးၽၵ်းတူဝဵင်းဢေႃႈ။ၵူၼ်း ၼမ်ၼႃႇလူမ်ႉလႄႈတိူဝ်ႉမၢတ်ႇဢေႃႈ။
၄၁ ဢၽိမလိၵ်ႉၼၼ်ႉယူႇၵႃႈတီႈဝဵင်းဢရုမဢေႃႈ။ၸေႇပုလႁေႃႈၵေႃႇလ တင်းပီႈၼွင်ႉၸိူဝ်ႉၶိူဝ်းမၼ်းဢွၵ်ႇသေၵႃႈၼႂ်းဝဵင်း သေႇၶိမ်ႇၵႂႃႇဢေႃႈ။
၄၂ ဝၼ်းမိူဝ်ႈၽုၵ်ႈၵူၼ်းဝဵင်းသေႇၶိမ်ႇတင်းလၢႆ ဢွၵ်ႇၸူးၵႃႈတီႈတူင်ႊႁႆႊတူင်ႊၼႃးဢေႃႈ။ပိူၼ်ႈလၢတ်ႈထိုင်တီႈဢၽိမလိၵ်ႉလႄႈ မၼ်းၵေႃႈဢဝ် ၵူၼ်းမၼ်းတင်းလၢႆ ၽႄႁဵတ်းသၢမ်မုၵ်ႉသၢမ်ၸုမ်းသေယဝ်ႉလွမ်ပႂ်ႉယူႇၵႃႈတီႈတူင်ႊႁႆႊတူင်ႊၼႃးဢေႃႈ။
၄၃ မိူဝ်ႈဢၼ်ၵူၼ်းဝဵင်းတင်းလၢႆဢွၵ်ႇမႃးၼၼ်ႉၸိုင် ၶဝ်လုၵ်ႉလႄႈတိုၵ်းတေႃးယႃႉပႅတ်ႈၶဝ်ဢေႃႈ။
၄၄ ဢၽိမလိၵ်ႉ တင်းၵူၼ်းမုၵ်ႉၼိုင်ႈၶုၼ်ႇလႅၼ်ႈၶိုၼ်ႈၸူးလႄႈ ဢွၼ်ၵၼ်ၸုၵ်းပႂ်ႉယူႇ ၵႃႈတီႈႁူးၽၵ်းတူဝဵင်းဢေႃႈ။ၵူၼ်းသွင်မုၵ်ႉၸမ်းဢွၼ်ၵၼ်ၶုၼ်ႇလႅၼ်ႈၸူးၵႃႈတီႈ ၵူၼ်းဢၼ်မီးၵႃႈၼႂ်းတူင်ႊႁႆႊတူင်ႊၼႃးၸိူဝ်း ၼၼ်ႉလႄႈဢဝ်ၶဝ်တၢႆဢေႃႈ။
၄၅ ဢၽိမလိၵ်ႉတိုၵ်းတေႃးဝဵင်းၼၼ်ႉတင်းဝၼ်းလႄႈလႆႈဝဵင်းၼၼ်ႉသေယဝ်ႉ ဢဝ်ၵူၼ်းဢၼ်ထူပ်း ၵႃႈၼႂ်းဝဵင်းၼၼ်ႉၸိူဝ်းၼၼ်ႉ တၢႆလႄႈ ၵိူၼ်ႇယႃႉလမ်းဝဵင်းပႅတ်ႈသေယဝ်ႉဢဝ်ၵိူဝ်ၸၢတ်ႇ ပိုၼ်ၵႃႈတီႈဝဵင်းၼၼ်ႉဢေႃႈ။
၄၆ မိူဝ်ႈဢၼ်ၵူၼ်းၼႂ်းလမ်းမိူင်းသေႇၶိမ်ႇ တင်းသဵင်ႈတင်းလူင်ငိၼ်းလွင်ႈၼၼ်ႉၸိုင် ၶဝ်ၸူႉၵၼ်တုမ်ၵၼ်ၵႃႈၼႂ်းလုၵ်းဢၼ်မၼ်းၶိူင်ႇ ၵႃႈတီႈၵျွင်းၽြႃး ပေႇရိတ်ႉ ဢေႃႈ။
၄၇ မိူဝ်ႈဢၼ်ပိူၼ်ႈလၢတ်ႈၼႄတီႈ ဢၽိမလိၵ်ႉလွင်ႈၵူၼ်းၼႂ်းလမ်းမိူင်းသေႇၶိမ်ႇ တင်းသဵင်ႈတင်းလူင်ၸူႉၵၼ်တုမ်ၵၼ်ၼၼ်ႉ ၸိုင် ၸႃႉၸဵမ်တူဝ် ဢၽိမလိၵ်ႉ
၄၈ ဢိၵ်ႇတင်းၶဝ်ၸိူဝ်းဢၼ်မီးတီႈမၼ်းတင်းသဵင်ႈတင်းလူင်ၸိူဝ်းၼၼ်ႉဢွၼ်ၵၼ်ၶိုၼ်ႈၸူးၵႃႈတီႈလွႆ ၸလမုၼ်ႇ သေလႄႈဢၽိမလိၵ်ႉ ဢဝ်တႃမၢတ်ႇ တႅပ်းၽၼ်းၵိင်ႇမႆႉသေလႄႈ ႁၢပ်ႇတၢင်ႇၵႃႈၼိူဝ်ႁူဝ်မႃႇမၼ်းသေယဝ်ႉလၢတ်ႈတီႈၶဝ်ၸိူဝ်းဢၼ်မီးတီႈမၼ်းၼၼ်ႉလႄႈဝႃႈ၊-ၵႃႈၼင်ႇဢၼ်သူႁၼ်ၵဝ်ႁဵတ်းၼႆႉ သူဢွၼ်ၵၼ်ႁဵတ်း ၸွမ်းၶၼ်ၶၼ်ၽႂ်းၽႂ်းတႃႉ၊ဝႃႈၼင်ႇၼႆဢေႃႈ။
၄၉ ၵူၼ်းမၼ်းတင်းသဵင်ႈတင်းလူင်ၸိူဝ်းၼၼ်ႉၵေႃႈ ဢွၼ်ၵၼ်တႅပ်းၽၼ်းၵိင်ႇမႆႉ ႁင်းၽႂ်ႇႁင်းမၼ်း မိူၼ်ၸိူဝ်ႉၼင်ႇၼၼ်လႄႈ ၸွမ်းလင်ဢၽိမလိၵ်ႉၵႂႃႇသေယဝ်ႉ ဢဝ်သႂ်ႇၵႃႈတီႈလုၵ်းထမ်ႈဢၼ်မၼ်းၶိူင်ႇၼၼ်ႉလႄႈ ဢဝ်ႆးတုတ်ႇပႃးၸွမ်းၵူၼ်းဢၼ်မီးၼႂ်းၼၼ်ႉဢေႃႈ။ၼင်ႇၼၼ်လႄႈ ၵူၼ်းၼႂ်းလမ်းမိူင်းသေႇၶိမ်ႇတင်းသဵင်ႈတင်းလူင် ၵူၼ်းၸၢႆးၵူၼ်းယိင်းႁဵင်ၼိုင်ႈၸမ်ၸမ်တၢႆဢေႃႈ။
၅၀ လိုၼ်းၼၼ်ႉဢၽိမလိၵ်ႉၵႂႃႇၸူးၵႃႈတီႈဝဵင်းထေႇပိတ်ႉလႄႈ တိုၵ်းတေႃးသိမ်းဢဝ်ဝဵင်းၼၼ်ႉဢေႃႈ။
၅၁ ၵူၺ်းၵႃႈ ၵႃႈၼႂ်းဝဵင်းၼၼ်ႉမီးလမ်းမိူင်းဢၼ်မၼ်ႈၶိူင်ႇဢၼ်ၼိုင်ႈလႄႈ ၽူႈယိင်းၽူႈၸၢႆးၵူၼ်းဝဵင်းၵႃႈဢၼ်မီးၼၼ်ႉ ဢွၼ်ၵၼ်ပၢႆၶဝ်ၵႃႈၼႂ်းလမ်းမိူင်းၼၼ်ႉသေယဝ်ႉဢိုတ်းၽၵ်းတူဝႆႉသေလႄႈ ဢွၼ်ၵၼ်ၶိုၼ်ႈ ယူႇၵႃႈၼိူဝ်မုင်းလမ်းမိူင်းၼၼ်ႉဢေႃႈ။
၅၂ ဢၽိမလိၵ်ႉၼၼ်ႉ သုတ်ႉၸပ်းသုတ်ႉၸူးၵႃႈတီႈႁိမ်းတီႈၽၵ်းတူႈႁႂ်ႈလႆႈတိုၵ်းတေႃးဢဝ်ၽႆးတုတ်ႇၼၼ်ႉၸိုင် မေႈယိင်း ၵေႃႉၼိုင်ႈ
၅၃ ဢဝ်မၢၵ်ႇႁိၼ်လုၺ်ၽၢၵ်ႇၼိုင်ႈထိမ်ႈတူၵ်းသႂ်ႇၵႃႈၼိူဝ်ႁူဝ်ဢၽိမလိၵ်ႉလႄႈ လုပ်ႇၵွၵ်းႁူဝ်မၼ်း တႅၵ်ႇလႅဝ်ၵႂႃႇဢေႃႈ။
၅၄ မိူဝ်ႈၼၼ်ႉ မၼ်းႁွင်ႉဢဝ်ၵူၼ်းဢွၼ်ႇမၼ်း ဢၼ်ယိပ်းၵမ်လၢၵ်ႈၼၢၵ်ႈၼၼ်ႉမႃးၶၼ်ၶၼ်ၽႂ်းၽႂ်းလႄႈဝႃႈ၊-ၼင်ႇႁိုဝ်ၵူၼ်းတင်းလၢႆတၵ်းဢမ်ႇမီးတီႈလၢတ်ႈလႄႈဝႃႈ၊-မေႈယိင်းဢဝ်မၼ်းတၢႆဢိူဝ်ႈ၊ ဝႃႈၼင်ႇၼႆၼၼ်ႉၸိုင် မႂ်းထွတ်ႇဢဝ်လၢပ်ႇမႂ်းဢွၵ်ႇသေလႄႈဢဝ်ၵဝ်တၢႆတႃႉ၊ ဝႃႈၼင်ႇၼႆလႄႈ ၵူၼ်းဢွၼ်ႇမၼ်းၼၼ်ႉၵေႃႈဢဝ်လၢပ်ႇတႅင်းသႂ်ႇ လႄႈမၼ်းတၢႆၵႂႃႇဢေႃႈ။
၅၅ ၵူၼ်းမဵဝ်းဢိသရေႇလတင်းလၢႆမိူဝ်ႈႁူႉႁၼ်လွင်ႈ ဢၽိမလိၵ်ႉ တၢႆယဝ်ႉၼၼ်ႉၶဝ်ဢွၼ်ၵၼ်ၶိုၼ်းမိူဝ်းၵႂႃႇ ၵႃႈတီႈဢၼ်ၶဝ်ယူႇၼၼ်ႉႁင်းၽႂ်ႇႁင်းမၼ်းသေဢေႃႈ။
၅၆ ၼင်ႇၼၼ်လႄႈၽြႃးပဵၼ်ၸဝ်ႈ တွပ်ႇတႅၼ်းပၼ်တူႉၸရိူၵ်ႈဢပျႅတ်ႈဢၼ် ဢၽိမလိၵ်ႉႁဵတ်းမႅၼ်ႈတီႈပေႃႈမၼ်းလႄႈ ဢဝ်ပီႈမၼ်းၼွင်ႉမၼ်းၸဵတ်းၵေႃႉတၢႆ ၼၼ်ႉဢေႃႈ။
၅၇ တူႉၸရိူၵ်ႈဢပျႅတ်ႈဢၼ်ၵူၼ်းဝဵင်းသေႇၶိမ်ႇၶဝ်ႁဵတ်းၸိူဝ်းၼၼ်ႉၵေႃႈ ၽြႃးပဵၼ်ၸဝ်ႈႁႂ်ႈတူၵ်းႁွတ်ႈၵႃႈၼိူဝ်ႁူဝ်ၶဝ်သေယဝ်ႉ ၶဝ်လႆႈၶၢမ်ႇမႅၼ်ႈၸွမ်းၵႃႈၼင်ႇၵႂၢမ်းဢၼ် ယေႃႇသမ်ႇလုၵ်ႈၸၢႆးယေႇရုပ်ႉပႃႇလ ၵိၼ်ႇဝႃႈၼၼ်ႉဢေႃႈ။