Chapter
၂၁
မေးပိၼ်ႇယႃႇမိၼ်ႇ
၁ ၵူၼ်းမဵဝ်းဢိသရေႇလ တင်းလၢႆလႆႈႁဵတ်းတင်းဢၼ်ၵိၼ်ႇဝႃႈၵႃႈတီႈဝဵင်းမိၸပႃႇဝႃႈ၊- ႁဝ်းသေၵေႃႉသေၵူၼ်း တေဢမ်ႇလႆႈဢဝ်လုၵ်ႈယိင်းႁဝ်းဢၢပ်ႈပၼ်တီႈၵူၼ်းမဵဝ်းပိၼ်ႇယႃႇမိၼ်ႇ၊ ဝႃႈၼင်ႇၼႆဝႆႉယဝ်ႉ။
၂ ၵူၼ်းတင်းလၢႆဢွၼ်ၵၼ်မႃးၵႃတီႈ ဝဵင်းပေႇသလလႄႈယူႇၵႃႈတီႈၽၢႆႇၼႃႈ ၽြႃးပဵၼ်ၸဝ်ႈတေႃႇထိုင် ႁွတ်ႈၶိင်ႇႁူဝ်ၶမ်ႈသေယဝ်ႉၵိဝ်သဵင်လႄႈ ႁွင်ႉႁႆႈယႂ်ႇၼႃႇ လူင်လၢင်လႄႈဝႃႈ၊-
၃ ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်းဢိသရေႇလတီႈၶႃႈ။ဢမူႉလွင်ႈဢၼ်ၸၢဝ်းၶိူဝ်းမဵဝ်းၼိုင်ႈတၵ်းလႆႈလုတ်ႈႁၢမ်းၵႂႃႇၵႃႈၼႂ်းမဵဝ်းဢိသရေႇလ တင်းလၢႆ ၼၼ်ႉပဵၼ်မႃးၵွပ်ႈပိူဝ်ႈၸိူဝ်ႉ ၼင်ႇႁိုဝ်တီႈၶႃႈ၊ဝႃႈၼင်ႇၼႆဢေႃႈ။
၄ ဝၼ်းမိူဝ်ႈၽုၵ်ႈၼၼ်ႉ ၶိင်ႇၵၢင်ၼႂ်ၸဝ်ႉၸဝ်ႉ ၵူၼ်းတင်းလၢႆလုၵ်ႉသေလႄႈ ဢွၼ်ၵၼ်တေႇႁဵတ်းယိတ်ႉပလၢင်ႇသေယဝ်ႉပုၵ်ႉၸေႃႇယိၸ်ႉဢၼ်တုတ်ႇၽႆးဢိၵ်ႇတင်း ယိတ်ႉမိၵ်ႉသ ႁႃႇယႃႉတင်းလၢႆဢေႃႈ။
၅ ၵူၼ်းမဵဝ်းဢိသရေႇလတင်းလၢႆဢွၼ်ၵၼ်တွင်ႉထၢမ်ႇလႄႈဝႃႈ၊-ၼႂ်းၵူၼ်းမဵဝ်းဢိသရေႇလ ၵူႈၸိူဝ်ႉ ၵူႈၶိူဝ်းၼႆႉမီးၸၢဝ်းၶိူဝ်း လႂ်ယင်းဢမ်ႇမႃးႁူမ်ႈလူၺ်ႈၵၼ်တင်းႁဝ်း ၵႃႈတီႈၽၢႆႇၼႃႈထႃႇဝရႃႉၽြႃး၊ဝႃႈၼင်ႇၼႆဢေႃႈ။လွင်ႈမၼ်းၸမ်းၶဝ်လႆႈႁဵတ်းတၢင်းဢၼ်ၵိၼ်ႇဝႃႈဝႆႉဝႃႈ ၸၢဝ်းၶိူဝ်းဢမ်ႇမႃးၵႃႈတီႈထႃႇဝရႃႉၽြႃးတီႈဝဵင်းမိၸပႃႇ လႄႈယူႇၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်တၢႆ ဢမၢၼ်ႇ ၶၼ်ပဵၼ်ဢေႃႈ၊ဝႃႈၼင်ႇၼႆမႃးယဝ်ႉ။
၆ ၵူၼ်းမဵဝ်းဢိသရေႇလတင်းလၢႆ မီးတၢင်းဢၼ်မႆႈၸႂ်လူၺ်ႈၼွင်ႉၸၢႆးၶဝ်ပိၼ်ႇယႃႇမိၼ်ႇ ၼၼ်ႉလႄႈ ဢွၼ်ၵၼ်လၢတ်ႈဝႃႈ၊-ၼႂ်းမဵဝ်းဢိသရေႇလတင်းလၢႆၼႆႉ မဵဝ်းၼိုင်ႈလႆႈၶၢမ်ႇတၢင်းဢၼ်ပႄႇ ပႅတ်ႈ ယဝ်ႉ ၼႂ်းဝၼ်းမိူဝ်ႈၼႆႉယဝ်ႉ။
၇ ၵွပ်ႈပိူဝ်ႈဢၼ်ႁဝ်းဢဝ်ထႃႇဝရႃႉၽြႃးတိူင်ႇဝႃႈၵိၼ်ႇဝႃႈဝႆႉဝႃႈႁဝ်းတၵ်းဢမ်ႇဢဝ်လုၵ်ႈယိင်းႁဝ်း ဢၢပ်ႈပၼ်တီႈၶဝ်ဝႃႈၼႆယဝ်ႉလႄႈ ႁဝ်းတၵ်းႁဵတ်းႁိုဝ်ပၼ်မေႈယိင်း ပုၼ်ႈၶဝ်ၸိူဝ်းဢၼ်ယင်းၵိုတ်း ၵျၢၼ်ႇဝႆႉၸိူဝ်းၼၼ်ႉ၊ဝႃႈၼင်ႇၼႆဢေႃႈ။
၈ ၶဝ်သမ်ႉတွင်ႉထၢမ်လႄႈဝႃႈ၊-ၼႂ်းမဵဝ်းဢိသရေႇလဢၼ်ဢမ်ႇမႃးၵႃႈတီႈထႃႇဝရႃႉၽြႃး တီႈဝဵင်းမိၸပႃႇလႄႈယူႇၼၼ်ႉၸွင်ႇမီးႁိုဝ်၊ဝႃႈၼင်ႇၼႆလႄႈ လႆႈႁူႉႁၼ်လွင်ႈဢၼ်ဝႃႈၵူၼ်းဝဵင်းယႃႇပိတ်ႉ မိူင်းၵိလတ်ႉၸိူဝ်းၼၼ်ႉ ဢမ်ႇမႃးဢမ်ႇႁွတ်ႈဢမ်ႇၸူႉဢမ်ႇတုမ်ႈၵႃႈတီႈ ဢၼ်ၶဝ်ၸူႉတုမ်ႈ ၵၼ်ၼၼ်ႉဢေႃႈ။
၉ လွင်ႈမၼ်းၸမ်းမိူဝ်ႈဢၼ်ၶဝ်ၼပ်ႉဢၢၼ်ႇတူၺ်း ၵူၼ်းတင်းလၢႆၼၼ်ႉၸိုင် လႆႈႁၼ်ၵူၼ်းဝဵင်းယႃႇပိတ်ႉမိူင်းၵိလတ်ႉၼၼ်ႉဢမ်ႇ မႃးသေၵေႃႉသေၵူၼ်း။
၁၀ မိူဝ်ႈၼၼ်ႉၶဝ်ပွႆႇၸႂ်ႉၵူၼ်းသိုၵ်းဢၼ်ႁႅင်းယႂ်ႇၼႃႇလူင်လၢင် မိုၼ်ႇပၢႆသွင်ႁဵင်ၼၼ်ႉႁႂ်ႈၵႂႃႇတိုၵ်းတေႃးယႃႉပႅတ်ႈ ၵူၼ်းၸၢႆးၵူၼ်းယိင်းလုၵ်ႈဢွၼ်ႇ ၵူၼ်းဝဵင်းယႃႇပိတ်ႉ မိူင်းၵိလတ်ႉၸိူဝ်းၼၼ်ႉ လူၺ်ႈၶူမ်းလၢပ်ႇၶူမ်းလႅဝ်းဢေႃႈ။
၁၁ ၶဝ်သင်လၢတ်ႈဝႆႉႁႂ်ႈၶဝ်ပႄႇၽဵဝ်ႈၵူၼ်းၸၢႆးၵႃႈမီးဢိၵ်ႇတင်း ၵူၼ်းယိင်းဢၼ်ပေႃးလႆႈ တိူဝ်ႉထူပ်းၵၼ်တင်းၵူၼ်းၸၢႆးယဝ်ႉၸိူဝ်း ၼၼ်ႉတင်းသဵင်ႈတင်းမူတ်းဢေႃႈ။
၁၂ ၶဝ်ၸိူဝ်းၼၼ်ႉထူပ်းၵူၼ်းယိင်းသၢဝ်ၵၢၼ်ႇၺႃႇ ဢၼ်ပႆႇလႆႈတိူဝ်ႉထူပ်းၵၼ်တင်းၵူၼ်းၸၢႆးၼၼ်ႉ သီႇပၢၵ်ႇၵေႃႉၵႃႈၼႂ်းၵူၼ်းဝဵင်းယႃႇပိတ်ႉမိူင်းၵိလတ်ႉၼၼ်ႉလႄႈ ၶဝ်ဢဝ်မႃးၵႃႈတီႈတပ်ႉၵႃႈတီႈဝဵင်းသိလေႃႇ ဢၼ်မီးၵႃႈၼႂ်း မိူင်းၶႃႇၼၢၼ်ႇ ၼၼ်ႉဢေႃႈ။
၁၃ လၢႆးသမ်ႉ ၵူၼ်းၸူႉတုမ်ႈၸိူဝ်းၼၼ်ႉဢွၼ်ၵၼ်ပွႆႇၸႂ်ႉၵူၼ်းၵႂႃႇ လၢတ်ႈထိုင်တီႈၵူၼ်းမဵဝ်းပိၼ်ႇယႃႇမိၼ်ႇဢၼ်မီးယူႇၵႃႈတီႈမၢၵ်ႇႁိၼ်မၢၵ်ႇၽႃရိမ်ႇမုၼ်ႇ ၸိူဝ်း ၼၼ်ႉႁႂ်ႈသိုၵ်းလႆႈထၢတ်ႇယဵၼ်ဢေႃႈ။
၁၄ မိူဝ်ႈၶိင်ႇၼၼ်ႉၵူၼ်းမဵဝ်းပိၼ်ႇယႃႇမိၼ်ႇ ၸိူဝ်းၼၼ်ႉဢွၼ်ၵၼ်ၶိုၼ်းမႃးဢေႃႈ။ၶဝ်ဢဝ်လုၵ်ႈယိင်းသၢဝ်ၵူၼ်းဝဵင်းယႃႇပိတ်ႉမိူင်းၵိလတ်ႉ ဢၼ်ၶဝ်ဢဝ်မႃးၸိူဝ်းၼၼ်ႉဢၢပ်ႈပၼ်ၵူၼ်းမဵဝ်းပိၼ်ႇယႃႇမိၼ်ႇၶဝ်ဢေႃႈ။ၵူၺ်းၵႃႈမေႈယိင်းသၢဝ်ၸိူဝ်းၼၼ်ႉဢမ်ႇပေႃးဢမ်ႇၵုမ်ႇ။
၁၅ ၵူၼ်းတင်းလၢႆမႆႈၸႂ်လူၺ်ႈၸၢဝ်းၶိူဝ်း မဵဝ်းပိၼ်ႇယႃႇမိၼ်ႇ ၵွပ်ႈပိူဝ်ႈထႃႇဝရႃႉၽြႃး ႁဵတ်းတၢင်း ဢၼ်ႁႂ်ႈႁၢမ်းဝႆႉၵႃႈၼႂ်းၸိူဝ်ႉၶိူဝ်းမဵဝ်းဢိသရေႇလ တင်းလၢႆၼၼ်ႉဢေႃႈ။
၁၆ ၵူၼ်းဢၼ်ပဵၼ်ၵႄႇပဵၼ်ႁူဝ် ၵႃႈၼႂ်းၵူၼ်းၸူႉၵူၼ်းတုမ်ႈၸိူဝ်းၼၼ်ႉၵေႃႈလၢတ်ႈလႄႈဝႃႈ၊- ၵွပ်ႈပိူဝ်ႈ မေႈယိင်းၶဝ်တင်းလၢႆ လႆႈၶၢမ်ႇတၢင်းဢၼ်ပႄႇၽဵဝ်ပႅတ်ႈယဝ်ႉလႄႈ ႁဝ်းတေႁဵတ်းႁိုဝ်ႁႂ်ႈၵူၼ်းၸၢႆးဢၼ်ၵိုတ်းဢၼ် ၵျၢၼ်ႇၸိူဝ်းၼၼ်ႉလႆႈမေး။
၁၇ လွင်ႈၼင်ႇႁိုဝ်ၸၢဝ်းၶိူဝ်းမဵဝ်းၼိုင်ႈတၵ်းဢမ်ႇလႆႈမွတ်ႇႁၢႆသေ ၵႃႈၼႂ်းမဵဝ်းဢိသရေႇလ ၵႂႃႇၼၼ်ႉၸိုင် တၵ်းလႆႈမီးလိၼ်တီႈဢၼ်ၵူၼ်းမဵဝ်းပိၼ်ႇယႃႇမိၼ်ႇ တၵ်းၶၢမ်ႇဢမူၺ်ႇၼၼ်ႉဢေႃႈ။
၁၈ ၼႂ်းဝႃႈၼၼ်သေၵေႃႈ ႁဝ်းဢမ်ႇဢဝ်လုၵ်ႈယိင်းႁဝ်းဢၢပ်ႈပၼ်ၵၼ်တင်းၶဝ် ၵွပ်ႈပိူဝ်ႈၵူၼ်းမဵဝ်း ဢိသရေႇလ တင်းလၢႆယင်းပေႃးလႆႈႁဵတ်းတၢင်းဢၼ်တိူင်ႇဝႃႈဝႆႉဝႃႈ၊- ႁႂ်ႈၵေႃႉဢၼ်ဢဝ်လုၵ်ႈယိင်းမၼ်းဢၢပ်ႈပၼ်မဵဝ်းပိၼ်ႇယႃႇမိၼ်ႇ ၼၼ်ႉပဵၼ်ၵေႃႉဢၼ်ထုၵ်ႇတၢင်း ၵိၼ်ႇတၢင်းဝႃႈသေၵမ်း၊ ဝႃႈၼင်ႇ ၼႆဝႆႉယဝ်ႉ။
၁၉ ၶဝ်သမ်ႉဝႃႈ၊-တူၺ်းလူ။ယႄႈပီႊယႄႈပွၵ်ႈမီးတၢင်းဢၼ်ၶၢမ်ႇပွႆးဢၸႅၼ်ႇပုၼ်ႈထႃႇဝရႃႉၽြႃး ၼႂ်းလိၼ်သိလေႃႇၼႃႈတၢင်းႁွင်ႇ ဝဵင်းပေႇသလ၊ၼႃႈဝၼ်းဢွၵ်ႇသဵၼ်ႈတၢင်းဢၼ်လုၵ်ႉၵႃႈတီႈဝဵင်းပေႇသလ ၵႂႃႇၸူးၵႃႈတီႈဝဵင်းသေႇၶိမ်ႇ ၼႃႈတၢင်းၸၢၼ်းဝဵင်းလေႇပေႃႇ ၼၼၼ်ႉဢိူဝ်ႈ၊ဝႃႈၼႆလႄႈ
၂၀ ၶဝ်သင်ႇလၢတ်ႈတီႈၵူၼ်းမဵဝ်းပိၼ်ႇယႃႇမိၼ်ႇၸိူဝ်းၼၼ်ႉလႄႈဝႃႈ၊-သူၵႂႃႇလႄႈလွမ်ပႂ်ႉယူႇၵႃႈတီႈသူၼ်ဢူးယဵၼ်ႇမၢၵ်ႇၸပိတ်ႉတႃႉ။မိူဝ်ႈဢၼ်လုၵ်ႈယိင်းသၢဝ်ဝဵင်းသိလေႃႇ ၸိူဝ်းၼၼ်ႉ မႃးလႄႈ
၂၁ ၵႃႈဝႅၼ်ယူႇၼႂ်းပွႆးၼၼ်ႉသူဢွၼ်ၵၼ်ဢွၵ်ႇသေၵႃႈၼႂ်းသူၼ်ဢူးယဵၼ်ႇမၢၵ်ႇၸပိတ်ႉသေလႄႈ ႁိမ် ဢဝ်လုၵ်ႈယိင်းဝဵင်းသိလေႃႇ ၸိူဝ်းၼၼ်ႉႁင်းၽႂ်ႇႁင်းမၼ်းပုၼ်ႈဢၼ်တၵ်းႁႂ်ႈပဵၼ်မေးတူဝ်ၸဝ်ႈၵဝ် ၼၼ်ႉတႃႉ။ဢဝ်ၶဝ်မိူဝ်းၵႂႃႇမိူင်းပိၼ်ႇယႃႇမိၼ်ႇပုၼ်ႉတႃႉ။
၂၂ ပေႃးပေႃႈၶဝ်၊ပီႈၸၢႆးၼွင်ႉၸၢႆးၶဝ် မႃးတိူင်ႇၵႃႈတီႈႁဝ်းၸိုင်ႁဝ်းတၵ်းၶိုၼ်းလၢတ်ႈတီႈၶဝ်လႄႈဝႃႈ၊- ထွၵ်ႈလူၺ်ႈၼႃႈႁဝ်းသေလႄႈၸွႆႈထႅမ်ႁဝ်းသေၵမ်း။မိူဝ်ႈဢၼ်ပဵၼ်သိုၵ်းၼၼ်ႉ ႁဝ်းဢမ်ႇလႆႈဢဝ်မေးပၼ်ပုၼ်ႈၶဝ်ၵူႈၵေႃႉၵူႈၵူၼ်းႁင်းၽႂ်ႇႁင်းမၼ်း။သူၵေႃႈဢမ်ႇထုၵ်ႇဢပျႅတ်ႈၵွပ်ႈပိူဝ်ႈဝႃႈသူလႆႈပၼ်ၶဝ်ၸွမ်း ဢလူဝ်ႇသူ ဢမ်ႇၸႂ်ႈၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၃ ၵူၼ်းမဵဝ်းပိၼ်ႇယႃႇမိၼ်ႇၸိူဝ်းၼၼ်ႉၵေႃႈ ႁဵတ်းၸွမ်းၸိူဝ်ႉၼင်ႇၼၼ်ဢေႃႈ။ၶဝ်ႈ ၵူႈၵေႃႉၵူႈၵူၼ်းႁိမ်ဢဝ်မေႈယိင်းဢၼ်ၵႃႈဝႅၼ်ယူႇၸိူဝ်းၼၼ်ႉ ႁင်းၽႂ်ႁင်းမၼ်းဢေႃႈ။ၶဝ်ၶိုၼ်းႁွတ်ႈထိုင်ၵႃႈတီႈလိၼ်ဢၼ်ၶဝ်ၶၢမ်ႇဢမူၺ်ႇၼၼ်ႉသေယဝ်ႉ၊ ၶိုၼ်းမႄးတႄႇႁဵတ်းဝဵင်းၶဝ် ဢေႃႈ။
၂၄ မိူဝ်ႈၼၼ်ႉၵူၼ်းမဵဝ်းဢိသရေႇလတင်းလၢႆၵေႃႈၶိုၼ်းမိူဝ်းၵႂႃႇၸူးၵႃႈတီႈမဵဝ်းတူဝ်ၸဝ်ႈၵဝ်ႇ တီႈယူႇပီႈၼွင်ႉၸိူဝ်ႉၶိူဝ်းတူဝ်ၸဝ်ႈၵဝ်ႇ လိၼ်တူဝ်ၸဝ်ႈၵဝ်ႇၶၢမ်ႇ ဢမူၺ်ႇၼၼ်ႉႁင်းၽႂ်ႇႁင်းမၼ်းသေဢေႃႈ။
၂၅ မိူဝ်ႈၶိင်ႇမိူဝ်ႈဝၼ်းၼၼ်ႉၵူၼ်းဢိသရေႇလ ၶဝ်ဢမ်ႇပႆႇမီးၶုၼ်ႁေႃၶမ်းလႄႈ ၵူႈၵေႃႉၵူႈၵူၼ်း ႁဵတ်း ၸွမ်းၵႃႈဢၼ်ထုၵ်ႇတႃတူဝ်ၸဝ်ႈၵဝ်ႇႁင်းၽႂ်ႇႁင်းမၼ်းၼၼ်ႉဢေႃႈ။