Chapter
၁၉
လေႇဝိတင်းမေးၼွႆႉမၼ်း
၁ မိူဝ်ႈၶိင်ႇၼၼ်ႉ ၵူၼ်းမဵဝ်းဢိသရေႇလ ၶဝ်ဢမ်ႇပႆႇမီးၶုၼ်ႁေႃၶမ်း။မီးၵူၼ်းမဵဝ်းလေႇဝိဢၼ်သွၼ်ႈပိုင်ႈယူႇၵႃႈတီႈႁိမ်းၸဵင်ႇလိၼ်သုတ်းႁၢၼ်ႉလွႆဢေႇၽရိမ်ႇၼၼ်ႉ သိမ်းဢဝ်မေႈယိင်း ဢၼ်ပဵၼ်ၵူၼ်းဝဵင်းပႅတ်ႉလိႁႅမ်ႇၼႂ်းဢိူင်ႇယုတ ၼၼ်ႉၵေႃႉၼိုင်ႈႁဵတ်းမေးၼွႆႉမၼ်း ဢေႃႈ။
၂ မေးၼွႆႉမၼ်းၼၼ်ႉ ၽွၵ်ႈသႅတ်ႈၸႃႇလႄႈၽၢတ်ႇယၢၼ်ၵၼ်တင်းမၼ်းၵႂႃႇ ၵႃႈတီႈႁိူၼ်းပေႃႈတူဝ်ၸဝ်ႈၵဝ်ႇ ၵႃႈတီႈဝဵင်းပႅတ်ႉလႁိမ်ႇၼႂ်းဢိူင်ႇယုတ ၼၼ်ႉလႄႈ ယူႇၵႃႈတီႈၼၼ်ႉသီႇလိူၼ်ဢေႃႈ။
၃ ၽူဝ်မၼ်းၼၼ်ႉ ပႃးဢဝ်ၵူၼ်းဢွၼ်ႇၵေႃႉၼိုင်ႈဢိၵ်ႇတင်းမႃႉလီႈသွင်တူဝ်သေလႄႈ ၵႂႃႇႁႂ်ႈလႆႈ ၶျေႃးဝွၼ်းမေးမၼ်းလႄႈဢဝ်မၼ်းၶိုၼ်းမႃးဢေႃႈ။မေးမၼ်းဢဝ်မၼ်းၶဝ်ႈၵႃႈၼႂ်းႁိူၼ်း ၸူးပေႃႈတူဝ်ၸဝ်ႈၵဝ်ႇဢေႃႈ။
၄ ပေႃႈမၼ်းၼၼ်ႉထူပ်းႁၼ်လုၵ်ႈၶူၺ်မၼ်းသေယဝ်ႉ၊မီးၸႂ်ဢၼ်ၸူမ်းသိူဝ်းၼႃႇလႄႈ ႁပ်ႉဢဝ်မၼ်းလႄႈႁႂ်ႈမၼ်းယူႇၵႃႈတီႈၼၼ်ႉ သၢမ်ဝၼ်းတဵမ်တဵမ်ဢေႃႈ။ၼင်ႇၼၼ်လႄႈၶဝ်ၵိၼ်ၶူပ်းယူႇ၊ ၼွၼ်းယူႇၵႃႈတီႈၼၼ်ႉဢေႃႈ။
၅ ဝၼ်းၸတုၵ်ႉထ မိူဝ်ႈဢၼ်ၶဝ်လုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ မႄးႁႅၼ်းႁႂ်ႈလႆႈဢွၵ်ႇၵႂႃႇၼၼ်ႉၸိုင် ပေႃႈမေႈယိင်းၼၼ်ႉလၢတ်ႈတီႈလုၵ်ႈၶူၺ်မၼ်းလႄႈဝႃႈ၊- ၵိၼ်ၶဝ်ႈမုၼ်းဢိတ်းၼိုင်ႈသေလႄႈ ႁႂ်ႈဢိမ်ႇလီသေယဝ်ႉၸင်ႇၵႂႃႇသေၵမ်း၊ဝႃႈၼင်ႇၼႆလႄႈ၊ သွင်ၶႃၼင်ႈ ၸွမ်းၵၼ်လႄႈၵိၼ်ၶူပ်းၸွမ်းၵၼ်ဢေႃႈ။
၆ ပေႃႈမေႈယိင်းၼၼ်ႉၵေႃႈလၢတ်ႈတီႈလုၵ်ႈၶူၺ်မၼ်းလႄႈဝႃႈ၊-ၶိုၼ်းၼႆႉယူႇၵႃႈတီႈၼႆႉလႄႈမူၼ်ႈၸႂ်ပျေႃႇၸႂ်သေ ၵမ်း၊ဝႃႈၼင်ႇၼႆဢေႃႈ။
၇ မိူဝ်ႈဢၼ်ဢၢင်ႈဢၢၼ်းတၵ်းၵႂႃႇၼၼ်ႉၸိုင် ပူႇၼၢႆးမၼ်းတိုၵ်းယူင်းၸူဝ်းဢဝ်မၼ်းလႄႈ မၼ်းၵေႃႈသမ်ႉၶိုၼ်းၼွၼ်းၵႃႈတီႈၼၼ်ႉၶိုၼ်းၼိုင်ႈဢေႃႈ။
၈ ဝၼ်းပိၼ်ႇၸမၼၼ်ႉမိူဝ်ႈဢၼ်မၼ်းလုၵ်ႉၶိင်ႇၵၢင်ၼႂ်ၸဝ်ႉၸဝ်ႉ ႁႂ်ႈလႆႈၵႂႃႇၼၼ်ႉၸိုင် ပေႃႈမေႈ ယိင်းၼၼ်ႉသမ်ႉလၢတ်ႈထႅင်ႈလႄႈဝႃႈ၊-ႁွမ်ႁႅင်းလႄႈယူႇတေႃႇထိုင်ႁွတ်ႈၵၢင်ဝၼ်းၸၢႆႉသေၵမ်း ဝႃႈၼင်ႇၼႆ လႄႈသွင်ၶႃႈၵေႃႈၵိၼ်ၶူပ်းၸွမ်းၵၼ်ဢေႃႈ။
၉ မိူဝ်ႈဢၼ်ၵေႃႉၼၼ်ႉဢိၵ်ႇတင်းမေးၼွႆႉမၼ်း တင်းၵူၼ်းဢွၼ်ႇမၼ်း သမ်ႉၶိုၼ်း ဢွၼ်ၵၼ်လုၵ်ႉႁႂ်ႈလႆႈၵႂႃႇၼၼ်ႉၸိုင်ပေႃႈမေႈယိင်း ဢၼ်ပဵၼ်ပူႇၼၢႆးမၼ်းၼၼ်ႉလၢတ်ႈလႄႈဝႃႈ၊-တူၺ်းလူ။ၵၢင်ဝၼ်းတူၵ်းလပ်းတသေိင်ႇယဝ်ႉ။ၶိုၼ်းၼႆႉၵေႃႈႁႂ်ႈပူၼ်ႉၶိုၼ်းတီႈၼႆႉသေၵမ်း။ၶိင်ႇၵၢင်ဝၼ်းၸမ်တၵ်းသဵင်ႈယဝ်ႉ။ၼွၼ်းၵႃႈတီႈၼႆႈသေလႄႈမူၼ်ႈၸႂ်ပျေႃႇၸႂ်ယူႇသေၵမ်း။
၁၀ မိူဝ်ႈၽုၵ်ႈမႃးၸင်ႇလုၵ်ႉၶိင်ႇၵင်ၼႂ်ၸဝ်ႉၸဝ်ႉလႄႈ ၶိုၼ်းမိူဝ်းၵႂႃႇၵႃႈတီႈတီႈ ယူႇတူဝ်ၸဝ်ႈၵဝ်ႇသေၵမ်း၊ဝႃႈၼင်ႇၼႆသေၵေႃႈ၊ ၵူၺ်းၵႃႈမၼ်းဢမ်ႇယူႇထႅင်ႈယဝ်ႉလႄႈ မၼ်းဢဝ်မႃႉလီႈတၢင်ႇၵွပ်းသွင်တူဝ်တင်းမေးၼွႆႉမၼ်းၼၼ်ႉလႄႈ လုၵ်ႉဢွၵ်ႇၵႂႃႇသေယဝ်ႉ ႁွတ်ႈထိုင်ၵႃႈတီႈႁိမ်းဝဵင်းယေႇပုတ်ႉဢၼ်ဝႃႈဝဵင်း ယေႇရုသလႅမ်ႇ ၼၼ်ႉဢေႃႈ။
၁၁ မိူဝ်ႈဢၼ်ၶဝ်ႁွတ်ႈထိုင် ၵႃႈတီႈႁိမ်းဝဵင်း ယေႇပုတ်ႉၼၼ်ႉၸိုင်ၵွပ်ႈပိူဝ်ႈဢၼ်ၵၢင်ဝၼ်းၶမ်ႈယဝ်ႉလႄႈ ၵူၼ်းဢွၼ်ႇမၼ်းၼၼ်ႉလၢတ်ႈတီႈၸဝ်ႈမၼ်းလႄႈဝႃႈ၊-မႃးသေၵမ်း။
၁၂ ဝႄႉၶဝ်ႈၸူးၵႃႈၼႂ်းဝဵင်းၵူၼ်း ယေႇပုသိၼႆႉသေလႄႈ ၼွၼ်းၵႃႈတီႈၼၼ်ႉတႃႉႁဝ်း၊ မိူဝ်ႈဢၼ်ဝႃႈၼင်ႇၼႆၸိုင်၊ၸဝ်ႈမၼ်းလၢတ်ႈလႄႈဝႃႈ၊- ႁဝ်းတၵ်း ဢမ်ႇဝႄႉၶဝ်ႈၸူးၵႃႈတီႈ ဝဵင်းၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ဢမ်ႇၸႂ်ႈမဵဝ်းဢိသရေႇလၼၼ်ႉ။
၁၃ တၵ်း ၵႂႃႇၵႃႈတီႈဝဵင်းၵိပႃႇလူးၵွၼ်ႇဢေႃႈ၊ဝႃႈၼင်ႇၼႆဢေႃႈ။မၼ်းၼၼ်ႉသမ်ႉၶိုၼ်းလၢတ်ႈတီႈၵူၼ်းဢွၼ်ႇ မၼ်းလႄႈဝႃႈ၊-
၁၄ ဝႄႉၶဝ်ၸူးၵႃႈတီႈဝဵင်းၸိူဝ်းၼႆႉသေဝဵင်းဝဵင်းလႄႈႁႂ်ႈပူၼ်ႉၶိုၼ်းၵႃႈတီႈဝဵင်းၵိပႃႇ၊ ဢမ်ႇၼၼ်ၵႃႈတီႈဝဵင်းရႃႇမ ၼၼ်ႉတႃႉႁဝ်း၊ဝႃႈၼင်ႇၼႆသေလႄႈသမ်ႉပူၼ်ႉသေၵႃႈတီႈၼၼ်ႉသေယဝ်ႉ မိူဝ်ႈဢၼ်ၶဝ်ႁွတ်ႈထိုင်ၵႃႈတီႈႁိမ်း ဝဵင်းၵိပႃႇ ၼႂ်း ဢိူင်ႇပိၼ်ႇယႃႇမိၼ်ႇ ၼၼ်ႉၸိုင်ၵၢင်ဝၼ်းတူၵ်းသေဢေႃႈ။
၁၅ ၶဝ်ဝႄႉၸူးၵႃႈတီႈၼၼ်ႉႁႂ်ႈလႆႈၶဝ်ႈလႄႈႁႂ်ႈလႆႈပူၼ်ႉၶိုၼ်းၵႃႈၼႂ်းဝဵင်းၵိပႃႇၼၼ်ႉဢေႃႈ။မၼ်းၶဝ်ႈၵႃႈၼႂ်းဝဵင်းၼၼ်ႉသေယဝ်ႉၼင်ႈယူႇၵႃႈတီႈၵၢင်ဝဵင်း ၵွပ်ႈပိူဝ်ႈဢၼ်ဢမ်ႇမီးၵေႃႉဢၼ်ႁပ်ႉဢဝ်ၶဝ်ၵႂႃႇ ၵႃႈၼႂ်းႁိူၼ်းၶဝ်ႁႂ်ႈလႆႈသွၼ်ႈပိုင်ႈၼၼ်ႉဢေႃႈ။
၁၆ မိူဝ်ႈၼၼ်ႉ မီးၵူၼ်းထဝ်ႈၵေႃႉၼိုင်ႈလုၵ်ႉသေၵႃႈတီႈဢၼ်ႁဵတ်းႁႆႊႁဵတ်းၼႃးလႄႈ ပွၵ်ႈၶိုၼ်းမႃးမိူဝ်ႈၶိင်ႇၵၢင်ဝၼ်းၶမ်ႈၼၼ်ႉဢေႃႈ။ၵေႃႉၼၼ်ႉပဵၼ်ၵူၼ်းႁၢၼ်ႉလွႆဢေႇၽရိမ်ႇလႄႈယူႇၵႃတီႈဝဵင်းၵိပႃႇၼၼ်ႉဢေႃႈ။ၵူၼ်းဝဵင်းတင်းလၢႆၸမ်း ပဵၼ်ၵူၼ်းမဵဝ်းပိၼ်ႇယႃႇမိၼ်ႇဢေႃႈ။
၁၇ မၼ်းတူၺ်းႁၼ်ၶႅၵ်ႇဢၼ်မီးယူႇၵႃႈတီႈၵၢင်ဝဵင်းၼၼ်ႉသေယဝ်ႉ ၵူၼ်းထဝ်ႈၼၼ်ႉတွင်ႉထၢမ်ႇလႄႈဝႃႈ၊-မႂ်းတၵ်းၵႂႃႇၵႃႈတီႈ လႂ်။မႂ်းလုၵ်ႉၵႃႈတီႈ လႂ်မႃး၊မိူဝ်ႈဢၼ်ဝႃႈၼင်ႇၼႆၸိုင် မၼ်းၵေႃႈၶိုၼ်းလၢတ်ႈလႄႈဝႃႈ၊-
၁၈ ႁဝ်းၶႃႈလုၵ်ႉသေၵႃႈတီႈဝဵင်းပႅတ်ႉလိႁႅမ်ႇ ဢိူင်ႇယုတမႃးလႄႈႁႂ်ႈလႆႈၵႂႃႇၵႃႈ တီႈႁိမ်းၸဵင်ႇလိၼ်သုတ်းႁၢၼ်ႉလွႆဢေႇၽရိမ်ႇၼၼ်ႉၶႃႈဢေႃႈ။ၵဝ်ၶႃႈၼႆႉပဵၼ်ၵူၼ်းၵႃႈတီႈၼၼ်ႉၶႃႈဢေႃႈ။ၵဝ်ၶႃႈၵႂႃႇၵႃႈတီႈဝဵင်းပႅတ်ႉလိႁႅမ်ႇဢိူင်ႇယုတသေယဝ်ႉတေႃႈလဵဝ်ၼႆႉ ၵဝ်ၶႃႈၵႂႃႇၸူးၵႃႈတီႈႁိူၼ်းထႃႇဝရႃႉၽြႃးဢေႃႈ။ၽူႈ လႂ်ၵေႃႈယင်းဢမ်ႇပႆႇဢဝ်ၵဝ်ၶႃႈ သႂၢင်းသႂ်ႇၶဝ်ႈၵႃႈၼႂ်းႁိူၼ်းမၼ်းၸဝ်ႈ ၶႃႈ။
၁၉ ယိူဝ်ႈႁႅင်ႈတင်းတၢင်ႇၸိူဝ်ႉတၢင်ႇပိူင်ပုၼ်ႈဢၼ်တၵ်းလဵင်ႉတၵ်းဢွႆႇမႃႉလီႈၵေႃႈ ႁဝ်းၶႃႈမီးယူႇၶႃႈဢေႃႈ။ၶဝ်ႈမုၼ်းတင်းၼမ်ႉၸပိတ်ႉ ပုၼ်ႈၵဝ်ၶႃႈ၊ ပုၼ်ႈမေႈယိင်းၵဝ်ၶႃႈတင်းၵူၼ်းဢွၼ်ႇၵဝ်ၶႃႈၸိူဝ်းၼႆႉၵေႃႈ မီးယူႇၶႃႈဢေႃႈ။ဢမ်ႇလူဝ်ႇထႅင်ႈသေၸိူဝ်ႉသေပိူင်ၶႃႈ၊ဝႃႈၼင်ႇၼႆဢေႃႈ။
၂၀ ၵူၼ်းထဝ်ႈၼၼ်ႉၵေႃႈလၢတ်ႈလႄႈဝႃႈ၊- မႃးလႄႈႁဵတ်းၶိၵ်ႇတီႈႁိူၼ်းၵဝ်သေၵမ်း။ၵႃႈဢၼ်မႂ်းလူဝ်ႇၼၼ်ႉၵဝ်တၵ်းပၼ်ဢေႃႈ။
၂၁ ယႃႇပေႁႂ်ႈပူၼ်ႉ ၶိုၼ်းၵႃႈတီႈၵၢင်တၢင်းၼႆႉ၊ဝႃႈၼင်ႇၼႆသေယဝ်ႉ၊ ဢဝ်မၼ်းၶဝ်ႈၵႂႃႇၵႃႈၼႂ်းႁိူၼ်းမၼ်းသေလႄႈ လဵင်ႉဢွႆႇပၼ်မႃႉလီႈမၼ်းၸိူဝ်းၼၼ်ႉဢေႃႈ။ၶဝ်ၵေႃႈသုၵ်ႈတိၼ်ၶဝ်သေယဝ်ႉၵိၼ်ၶူပ်းဢေႃႈ။
၂၂ ၼႂ်းမိူဝ်ႈဢၼ် ၶဝ်ယင်းတိုၵ်ႉမီးတင်းဢၼ်မူၼ်ႈၸႂ်ပျေႃႇၸႂ်ၸိူဝ်ႉၼင်ႇၼၼ်ႉယူႇၼၼ်ႉၸိုင် ၵူၼ်းဝဵင်းၼၼ်ႉၵူၼ်းဢႃႉထမ်ႇမႃႉၼၼ်ႉၵမ်ႈၽွင်ႈၼႂ်းဝဵင်းၼၼ်ႉ ဢွၼ်ၵၼ်လွမ်ႉႁွပ်ႈႁိူၼ်းၶဝ်သေလႄႈပေႃႉထုပ်ႉၽၵ်းတူဢေႃႈ။တီႈၵူၼ်းထဝ်ႈၸဝ်ႈႁိူၼ်းၼၼ်ႉၵေႃႈၶဝ်ႁွင်ႉလႄႈဝႃႈ၊-ဢဝ်ၵူၼ်းၸၢႆးဢၼ်ၶဝ်ႈယူႇၵႃႈတီႈႁိူၼ်းမႂ်းၼၼ်ႉ ဢွၵ်ႇမႃး ႁႂ်ႈႁဝ်းလႆႈႁဵတ်းၵႅင်ႈသိူၵ်ႈသမ်ႇၵၼ်တင်းမၼ်းသေ ၵမ်း၊ဝႃႈၼင်ႇၼႆဢေႃႈ။
၂၃ ၸဝ်ႈႁိူၼ်းၼၼ်ႉၵေႃႈဢွၵ်ႇၸူးတီႈၶဝ်လႄႈတွင်းပၢၼ်ႇဝႃႈ၊-ပီႈၼွင်ႉၶဝ်ဢူၺ်း။ယႃႇပေႁဵတ်းဢမူႉ ဢၼ်ႁုၵ်းဢၼ်ႁၢႆႉၸိူဝ်ႉၼင်ႇၼႆသေၵမ်း။ၵွပ်ႈပိူဝ်ႈဢၼ်ၵေႃႉၼႆႉ ပဵၼ်ၵေႃႉဢၼ်သွၼ်ႈပိုင်ႈတီႈႁိူၼ်းၵဝ်ၶႃႈလႄႈ ယႃႇပေႁဵတ်းတၢင်းဢၼ်ယုတ်ႈ ဢၼ်မိူၵ်ႈၼႆႉသေၵမ်း။
၂၄ တူၺ်းလူ။ၵႃႈတီႈၼႆႉမီးလုၵ်ႈယိင်းၵဝ်ၶႃႈဢၼ်ပဵၼ်သၢဝ်ၵၼ်ႇၺႃႇ ဢိၵ်ႇတင်းမေးၼွႆႉမၼ်းၼၼ်ႉယူႇၶႃႈဢေႃႈ။ၵဝ်ၶႃႈတၵ်းဢဝ်ၶဝ်ဢွၵ်ႇပၼ်သူၶႃႈဢေႃႈ။ႁဵတ်းၸွမ်းၵႃႈၼင်ႇဢၼ်သူမီးဢလူဝ်ႇၶႂ်ႈႁဵတ်းၼၼ်ႉၵႃႈတီႈၶဝ်သေၵမ်း။ၵူၺ်းၵႃႈယႃႇပေႁဵတ်းဢမူႉ ဢၼ်ယုတ်ႈဢၼ်မိူၵ်ႈ ၸိူဝ်ႉၼင်ႇၼႆ ၼၼ်ႉၵႃႈတီႈၵေႃႉၼႆႉသေၵမ်း၊ဝႃႈၼင်ႇၼႆသေၵေႃႈ ၶဝ်ဢမ်ႇထွမ်ႇဢမ်ႇဢဝ်ၵႂၢမ်းမၼ်း။
၂၅ ပိူဝ်ႈၼႆလႄႈၵေႃႉၼၼ်ႉဢဝ်မေးၼွႆႉမၼ်းဢွၵ်ႇပၼ်တီႈၶဝ်လႄႈ ၶဝ်ၸိူဝ်းၼၼ်ႉၵေႃႈ ႁဵတ်းဢႃႉထမ်ႇတဵၵ်းၵၼ်ႉမၼ်းတင်းၶိုၼ်းတေႃႇထိုင်ႁွတ်ႈ ၶိင်ႇၵၢင်ၼႂ်ႁူဝ်မိူင်းသႂ် ၸင်ႇပွႆႇမၼ်းသေ ဢေႃႈ။
၂၆ မိူဝ်ႈဢၼ်ႁူဝ်မိူင်းသႂ်ၼၼ်ႉမေႈယိင်းၼၼ်ႉမႃးလႄႈ လူမ်ႉယူႇၵႃႈတီႈၽၢႆႇၼႃႈၽၵ်းတူႁိူၼ်း တီႈဢၼ်ၸဝ်ႈမၼ်းမီးၼၼ်ႉသေလႄႈယူႇတေႃႇထိုင် ႁွတ်ႈမိူင်းလႅင်းယဝ်ႉၼၼ်ႉဢေႃႈ။
၂၇ ၶိင်ႇၵၢင်ၼႂ်ၼၼ်ႉၸဝ်ႈမၼ်းလုၵ်ႉလႄႈ ၽုၺ်ႇၽၵ်းတူႁိူၼ်းသေယဝ်ႉဢွၵ်ႇႁႂ်ႈလႆႈၵႂႃႇတၢင်းပႆတၢင်းၼၼ်ႉ မၼ်းလႆႈႁၼ်မေးၼွႆႉမၼ်းလူမ်ႉဝႆႉယူႇၵႃႈတီႈၽၢႆႇၼႃႈၽၵ်းတူႁိူၼ်း မိုဝ်းမၼ်းတၢင်ႇၵႃႈၼိူဝ်ၶူင်ႇၽၵ်းတူယူႇၼၼ်ႉ၊ မၼ်းလၢတ်ႈ ဝႃႈ၊-
၂၈ လုၵ်ႉလႄႈၵႂႃႇတႃႉႁဝ်း၊ဝႃႈၼင်ႇၼႆသေၵေႃႈမေးမၼ်းၼၼ်ႉ ယင်းဢမ်ႇၶိုၼ်းလၢတ်ႈလႄႈယူႇဢေႃႈ။မိူဝ်ႈၼၼ်ႉၵူၼ်းၸၢႆးၼၼ်ႉ ဢဝ်မၼ်းတၢင်ႇၵႃႈၼိူဝ်မႃႉလီႈသေလႄႈ လုၵ်ႉၵႂႃႇၸူးၵႃႈတီႈတီႈဢၼ်မၼ်းယူႇၼၼ်ႉဢေႃႈ။
၂၉ မိူဝ်ႈဢၼ်မၼ်းႁွတ်ႈထိုင်ၵႃႈၼႂ်းႁိူၼ်းမၼ်းၼၼ်ႉၸိုင် မၼ်းဢဝ်လၢပ်ႇတႅပ်းတူဝ်မေးၼွႆႉမၼ်းၸွမ်းလူၺ်ႈပွင်ႈလုပ်ႇမၼ်းတင်းလၢႆ ႁဵတ်းသိပ်းသွင်ပွတ်းသေလႄႈ ဢဝ်ပၼ်ၵႂႃႇၵႃႈၼႂ်းမိူင်းဢိသရေႇလ ၵူႈတီႈၵူႈလႅၼ်ဢေႃႈ။
၃၀ ၼင်ႇၼၼ်လႄႈ ၶဝ်ၸိူဝ်းဢၼ်ႁူႉႁၼ်ၵႃႈမီးၼၼ်ႉဢွၼ်ၵၼ်လၢတ်ႈလႄႈဝႃႈ၊- ၸႃႉၸဵမ်ဝၼ်းဢၼ်ၵူၼ်းမဵဝ်းဢိသရေႇလတင်းလၢႆ ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃး တေႃႇထိုင်ႁွတ်ႈဝၼ်းမိူဝ်ႈၼႆႉ ၽူႈ လႂ်ဢမ်ႇႁဵတ်းၸိူဝ်ႉၼင်ႇၼႆ သေၵေႃႉသေၵူၼ်း။ၽူ လႂ်ဢမ်ႇပႆႇတွၼ်ႉႁၼ်သေၽဝ်ႇသပွေၵ်ႈ။ဢွၼ်ၵၼ်ၶႆႈၸႂ်ဝူၼ်ႉၸႂ်လႄႈ ဢုပ်ႇၵၼ်ၸီႇယၢင်ႇတႃႉ၊ဝႃႈၼင်ႇၼႆဢေႃႈ။